列王纪上 11章1节 到 11章13节   背景资料  上一笔  下一笔
圣经一再提起,对人siōng大ê诱惑,就是财富。有财富,就一定tio̍h koh khah小心。若是无坚定ê信仰做基础,真紧to̍h会弃sak上帝,结果就是遗祸到下一代kiáⁿ孙。耶稣bat提醒讲,一定tio̍h tī上帝kah财富之间作一个明确选择(参考马太福音六:24),这m̄是无原因ê。因为伊看出人性ê软弱。以色列人民会弃sak上帝,主要原因mā是因为tī迦南过富裕ê物质生活所致。

Chit章真清楚讲出过去反对所罗门统治之下ê仇敌,开始利用所罗门荒废政事ê时,起来反抗伊,造成以色列人民ê不安,而北部ê族群mā因为án-ne开始思考独立伊去ê运动萌芽起来。

Beh解读所罗门弃sak上帝ê原因,á是解释所罗门死后王国分裂ê原因真chē,包括伊是大卫犯奸淫罪所生ê kiáⁿ;m̄是上帝亲自差遣先知膏立ê国王等等,chiah-ê lóng thang讲是所罗门虽然开创了以色列王国ê帝业,却mā为伊死后ê分裂带来暗伏ê远因。Chit章ê作者提供另外一个观点:所罗门无遵守上帝ê话,伊娶外邦ê cha-bó͘-gín-á做bó͘,致使对上帝忠实ê信仰丧失,是伊弃sak上帝ê主要因素。伊总共娶一千个cha-bó͘-gín-á做bó͘,大多数lóng是外邦ê cha-bó͘-gín-á,这lóng tī说明一个重要ê讯息:伊ê政治婚姻是为tio̍h图谋政治利益而结婚,m̄-koh却无kā上帝ê话khǹg tī心中。真正hō͘一个国家ē-tàng安定ê,m̄是单靠政治ê气力,而是beh有谦卑ê心灵忠实tī上帝ê话。因为若是无上帝ê话语做基础,就bē有上帝ê赐福,连带ê就无安定ê日子thang期待,chit点是圣经ê作者一再khah强调ê。

第1到3节,除了娶埃及国王ê cha-bó͘-kiáⁿ做bó͘,所罗门koh娶赫人、摩押、亚扪、以东,kah西顿ê cha-bó͘-gín-á等做bó͘,这明显违背摩西律法ê规定(参考申命记七:3—4)。而且伊m̄是只有娶几个而已,却是因为富裕到「娶七百个公主,此外iáu有三百个妃嫔」,这等于teh暗示伊开始过穷极奢华ê生活,甚至是荒淫无度à。当然chit种行为mā是违背摩西律法ê规定(参考申命记十七:17)。

第4到6节,结果chiah-ê妃嫔「引诱伊去拜别ê神明;伊无亲像in父亲大卫hit种一心忠于上主—伊ê上帝」。Á tī伊奉献圣殿hō͘上帝ê祈祷后,上帝回应伊ê祈祷中,真清楚告诫伊,讲如果伊弃sak上帝去拜偶像,上帝mā会弃sak伊kah伊ê人民,hō͘ in被邻国ê人民讥笑,人民受掠伊去(参考列王记上九:6—9)。M̄-koh所罗门显然已经bē记得上帝ê话,伊ê chit种行为mā为以色列人民后来败坏留落来pháiⁿ ê模样kah害。

第7到8节,chit两节说明所罗门去拜偶像神明ê证据,就是伊iáu为所有ê妃嫔建造in原本tī故乡所拜ê神明之祭坛,换句话讲,所罗门m̄-nā家己对上帝无够忠实,甚至iáu因为án-ne kā偶像神明ê祭拜行为引进以色列,hō͘以色列人民mā tòe学样去做,án-ne chiah是siōng大ê败笔。

第9到10节,chia真重要ê,是上帝为tio̍h beh阻止所罗门不要犯chit种siōng令上帝痛心ê事,上帝iáu特别向伊显现「两pái」,「命hō͘伊bē-tàng拜别ê神明,m̄-koh所罗门无听从上主,反tńg弃sak了」上帝,这是非常可惜ê事。

第11到13节,chit段经文是上帝对所罗门chit种m̄听苦劝所讲ê话。上帝决定采取惩罚ê行动,beh「夺回」所罗门治理ê以色列国,chia ê「夺回」一词,是teh指「撕成碎片」ê意思,意思就是分裂。M̄-koh chit件事bē tī伊有生之年出现,会tī伊死后发生。原因是上帝看tī他忠实奴仆大卫ê缘故。作者tī chia强化第11节所讲ê,所罗门是「故意」弃sak kah上帝ê约。圣经讲做一个人「故意」弃sak上帝ê时,已经有含「亵渎」ê意思。Mā就是明明知影he是bē-tàng ê事,却偏偏去做,就等于是侮辱上帝ê神圣仝款。

重新查询 专卷研经 列王纪上系列
错误回报,请联系comm[@]fhl.net