哥林多前书 7章17节 到 7章24节   背景资料  上一笔  下一笔
Chit段经文讲tio̍h有关受呼召成做基督徒ê意义,m̄是在tī是m̄是有受割礼,á是有甚么社会地位kah身分背景。使徒保罗Tī chit段经文中强调:「每一个人应该保持蒙召ê时ê身分。」并无表示绝对bē-tàng改变,却是beh先kā蒙召ê时ê基督徒身分hō͘显明出来,真自然tek,会有机会改变现况。因为信仰本身就是一个极大ê气力,ē-tàng改变处境。

Chit段经文ê中心信息是非常强烈ê,因为使徒保罗清楚指出一个超出当时社会ê观念:tī上帝面前,每一个人lóng仝款,无贵贱之别,因为大家lóng是上帝用重价买来ê,lóng是属tī「基督ê奴隶」。Chit种观念tī哥林多城是真大ê挑战,因为连教会内面lóng有分门别派ê时chūn,其所在表明ê意义就是「贵、贱」ê区别,m̄-koh,使徒保罗将「主人、奴隶」ê观念带入信仰ê层面,hō͘所有ê信徒lóng tńg来到上帝面前,án-ne,大家lóng同是有罪ê人,mā lóng是耶稣用性命ê代价赎回来ê。

第17节,chit节ē-sái讲是chit段经文ê中心思想:每一个人蒙召,lóng有上帝特别ê旨意在其中。

第18到20节,chit三节提起一个蒙上帝呼召成做基督信徒,kah chit-ê人是m̄是有受割礼lóng无关系,mā无需要改变。使徒保罗teh写hō͘加拉太教会ê书信中mā án-ne强调,割礼á无,kah一个人是m̄是得救lóng无关系,重要ê,是活出新ê性命来,án-ne chiah是siōng重要ê事(参考加拉太书六:15)。

第21到22节,使徒保罗进一步强调:一个做奴隶ê人,会因为受呼召成做基督徒,虽然伊iáu是继续奴隶ê身分,m̄-koh,伊ê心灵是得tio̍h tháu放ê,是自由ê。M̄-koh只要有机会,就beh hō͘家己tùi主人手中得tio̍h自由。

第23到24节,chia所谓「上帝用重价买来ê」,是teh指耶稣tī十字架上ê牺牲换来得ê。是真珍贵而且值得保留ê身分。Ná亲像一个当主人ê人(相对tī奴隶,就是自由人),则知影家己成做基督徒,并m̄是用家己ê能力换来得tio̍h,却是上帝透过耶稣用重大ê代价赎回有ê,所以tio̍h kā家己看做是福音ê奴仆,这是一种身分ê认bat,mā是对家己信耶稣后性命价值ê改变。

重新查询 专卷研经 哥林多前书系列
错误回报,请联系comm[@]fhl.net