Tùi第七章开始到第十五章：Lóng是teh回答哥林多教会所提出ê问题。

Chit章谈ê是有关婚姻ê问题。有ê人认为不应该结婚，保持独身以示圣洁；有ê人认为即使结了婚，mā应该避免一切性ê生活；tī chit章经文中mā论到订婚了后，是m̄是ē-tàng无结婚ê问题等等。Tī chit章经文thang分做下列几个段落来看：
第1到7节，对已经结婚者，劝勉tio̍h保持夫妻关系，包括维持性生活。
第8到9节，对鳏夫kah寡妇ê劝勉。
第10到11节，劝勉siōng好mài离婚，因为这是圣经ê教导。
第12到16节，论到信徒kah非信徒ê婚姻关系。
第17到24节，对受呼召ê时是m̄是有受割礼ê问题，以及原本是m̄是奴隶ê事。
第25到38节，论到是m̄是保持独身ê看法。
第39到40节，对寡妇是m̄是thang koh再婚ê看法。
会有顶面所讲chiah-ê婚姻关系ê问题出现，真可能是kah该教会有信徒对耶稣koh再临ê事有关。

Chit段就是讨论到有关已经结了婚ê夫妇，bē-tàng假借任何理由而hō͘原本该有ê夫妇之关系受tio̍h影响。

第1到2节，chit节thang看出使徒保罗开始beh回答in信中所提起ê问题。「一个cha-po͘人ē-tàng无结婚颠倒是好ê」，chit句话真可能是引用该书信上，并m̄是使徒保罗所讲，m̄-koh mā有可能是伊家己ê想法。因为伊家己就是无结婚，á是保持独身。M̄-koh，因为tī哥林多城有真chē淫乱ê事发生，甚至tī教会内mā发生。所以伊认为避免诱惑siōng好ê方法，就是有婚姻关系。

第3到7节，说明夫妻tio̍h彼此互相扶持kah尽各自ê责任，无甚么人比较重要ê问题，却是彼此互相关系。「除非为tio̍h beh专心祈祷」，chit句话指出顶面所讲过ê，有人认为耶稣teh beh koh再临，所以kah婚姻对象分开，伊认为就算是án-ne，mā是有一定ê时间m̄是久长，若无，真容易受tio̍h诱惑致使婚姻关系受tio̍h影响。M̄-koh使徒保罗认为tio̍h beh像伊án-ne保持独身，mā需要有上帝ê恩赐，心志chiah有办法坚持。