Tùi chit章就thang清楚看tio̍h哥林多教会内部确实发生真大ê问题，除了有分裂ê事之外，mā发生信徒生活ê堕落，而且chit种堕落是连一般道德生活ê水平lóng 不如，he就是严重ê淫乱ê tāi-chì mā出现。使徒保罗特别强调tio̍h kah chit种人断绝来往，伊用真严厉讲，就算kah chit种人同齐食饭lóng该拒绝（参考第11节）。伊ê意思是有án-ne行为ê人，就无法度tī教会内出现，beh kā chit种人tùi教会中驱逐出去。伊之所以án-ne严格要求ê原因，是认为chit种人tī教会内，会ná亲像酵母仝款，m̄-nā家己败坏，iáu会影响tio̍h其他ê信徒。Tī使徒保罗ê观点，教会是基督ê身躯（以弗所书一：23），mā是「圣神ê殿」，是属tī上帝ê殿（参考哥林多前书六：18—19），是圣洁ê记号，是神圣ê。

使徒保罗讲伊已经听tio̍h哥林多ê教会内发生「淫乱」ê事，伊tùi chit件事直接指出该教会应该感觉惭愧、见笑chiah-tio̍h，伊虽然无tī in中间，m̄-koh伊提醒该教会信徒，伊ê心lóng kah in做伙。所以对hiah-ê犯淫乱罪ê信徒，伊ài in kā chit种人交hō͘撒旦去。意思是teh指kā它tùi教会信仰团契驱离出去。

第1到2节，注意chia所用ê「淫乱」一词，m̄-nā是teh指iáu未结婚就有「性」行为chit方面ê事，mā是teh指违反一般道德规范ê事。换句话讲，chia指ê「淫乱」，并m̄是非常特别ê案子，却是一般人tī伦理道德上lóng真清楚，是bē-tàng发生ê事，亲像：乱伦，就ná第1节所讲ê「kah继母同居」。信徒中有人会做chit种事，确实是真难得tio̍h社会大众ê认同，会hō͘人掠做是基督徒是允准乱伦ê事。摩西律法非常清楚规定bē-tàng有乱伦ê行为，利未记第十八章8节就特别记载讲：「你 ê 老父ê后 bó͘ ê 下身，你m̄-thang 露现，因为he 是你ê 老父ê 下身。(全民版)」申命记mā有这chit种规定（参考申命记廿二：30）。Mā tùi chia thang看出哥林多城是一个道德生活规矩真乱ê城市，而教会tī chia m̄-nā无显明出信仰ê光芒，反tńg是受tio̍h影响非常大。Tùi chia看出一个重要ê讯息：如果教会内信徒ê生活án-ne堕落，hiah-ê夸耀家己是属tī「保罗」、「亚波罗」、「彼得」、「基督」等派别，m̄-nā无法度显示出chiah-ê人ê名号，颠倒地，是亵渎了in所传hō͘该教会信徒ê福音信息。所以使徒保罗强烈主张应该将chiah-ê犯淫乱罪ê信徒hō͘开除并驱离教会。

第3到5节，使徒保罗先谴责chiah-ê犯淫乱罪ê信徒，然后伊表明时刻lóng kah该教会信徒同在，虽然伊本人并无tī现场，m̄-koh伊表明伊ê心是kah in同在同齐。伊认为应该将chiah-ê犯淫乱罪ê信徒「交hō͘撒旦」，意思是tùi教会中驱离出去，伊讲hō͘ chit种人ê身躯败坏，有可能iáu有机会hō͘伊ê身躯得tio̍h拯救。

使徒保罗会有chit种看法，是当时ê教会有一个普遍ê观念，世界分做两个领域，其一是属tī上帝管理ê世界（教会），其二是属tī魔鬼、撒旦管理ê领域（社会）。使徒保罗将chit种观念tī教会内面强化起来，希望由基督徒组成ê教会，众信徒lóng ē-tàng成做「新造ê人」（参考哥林多后书五：17），hō͘旧ê一切lóng成做过去。换句话讲，大家是带tio̍h新ê性命tī教会内。对hiah-ê iáu继续犯罪ê人，hō͘ in tī教会外面ê世界里被消灭。M̄-koh问题是：如果教会是属tī上帝管理ê所在，án-ne，chit种人若tùi教会被驱离，不就等于是离开了上帝ê管理，án-ne tio̍h怎样办？使徒保罗并无tī chia有明白ê表示。Á是允准以án-ne了解：使徒保罗认为将chit种人tùi教会信仰团契驱离出去，有可能会hō͘ chit-ê人惊醒起来而悔改认错，án-ne就有机会拯救chit-ê人ê性命。