哥林多前书 3章10节 到 3章23节   背景资料  上一笔  下一笔
Tī chit段经文中,使徒保罗用建筑物做譬喻,用怎样ê材料,建造怎样ê厝,这主权lóng是tī建造者,m̄是奴仆á是材料本身thang决定ê。

第10到11节,建筑物siōng重要ê,就是根基。好ê根基,chiah ē-tàng hō͘建造起来ê建筑物屹立不摇。上帝已经立耶稣基督做教会唯一ê根基,无其它ê根基thang取代,chit点m̄-nā tī早期教会非常重要,tī今á日ê时代mā是仝款。无任何人ē-tàng取代耶稣tī十字架上ê救赎恩典。

第12到15节,tī chit段经文中,使徒保罗特别提起有kóa人建立ê根基m̄是用基督,却是各式各种ê物件,意思是teh指chiah-ê物件,无在tī价值chē少,而在tī审判ê日子来临ê时,其他ê根基lóng会露馅,经不起考验。Chia提起「大火」,就是审判ê意思。Ná亲像台湾俗语所讲ê:「真金m̄惊火。」好ê信仰根基,火jú烧,会jú光华亮丽。信仰mā是án-ne,奠立tī耶稣基督之基础上ê信仰,无论受tio̍h怎样ê考验只会发生闪亮ê光芒。

第16到17节,chit两节是chit章ê中心经文;使徒保罗用「上帝ê殿」来形容教会kah上帝之间ê亲密关系,信主耶稣ê人应该有chit种认bat。教会就是用基督为体(参考以弗所书一:23),所以分裂ê教会,等于是teh分裂基督ê身躯,teh毁损上帝ê圣殿仝款,会做chit种事ê人,bē是信主耶稣ê人。Á上帝一定会对chit种分裂教会ê人采取严厉ê审判。

Koh讲,chit两节mā teh提醒哥林多教会ê信徒,tī日常生活中,一定tio̍h有顶真ê态度,而bē-sái有淫荡ê行为。因为每一个人ê身上lóng有上帝ê记号。

第18到20节,tī教会内部,每一个人lóng m̄-thang自认为真有智慧,因为每一个人tī上帝面前lóng是愚拙ê。使徒保罗引用约伯记第五章13节语,说明上帝会hō͘ hiah-ê自命聪明ê人,掉落tī家己认为周全ê诡计中,这表示人无论jōa-ni̍h-á聪明,一定会谦卑落来,chiah会看见上帝ê大能。

第21到23节,chit三节真清楚说明使徒保罗ê观点:基督徒身上所有ê一切,全部lóng是tùi上帝来ê赏赐。一个真正有美好信仰ê人,bē kā所做ê事,全lóng看做是家己ê成就,应该tio̍h清楚知影,是上帝ê赏赐chiah有ê结果。无论是甚么人lóng仝款,只要进入基督教会ê信仰团契,大家lóng仝款同属tī基督、属tī上帝。

第22到23节,chit两节被「日本无教会主义」ê创始者内村鉴三引用有类似ê名言:「我为日本、日本为基督、基督为世界。」仝款ê,基督徒应该有chit种看法:我为福音,福音为基督,基督为上帝。

重新查询 专卷研经 哥林多前书系列
错误回报,请联系comm[@]fhl.net