这是真重要ê一章，使徒保罗用kui章ê篇幅teh谈论有关死人koh活ê问题，是新约圣经中谈论有关死人koh活siōng详细一章。Chit章mā为后来使徒信经提供非常重要ê信仰告白――肉体ê koh活。Mā tùi chit章ē-tàng看出哥林多教会信徒中，有人虽然信了耶稣，á是来加入信仰团契，m̄-koh却对koh活ê事感觉无法度理解，á是对koh活ê事持怀疑ê态度。Á使徒保罗传福音ê时，siōng重要ê一个信仰告白，就是所有信耶稣ê人，会kah耶稣同死，mā会kah耶稣同koh活（参考罗马书六：8）。

其实，有关koh活ê问题，并m̄是tī外邦人中间chiah有chit种问题，犹太人中间ê撒都该派ê人mā有chit方面ê问题；in并m̄相信有死人koh活chit款tāi-chì，所以in bat利用摩西律法中所规定ê「利未拉特婚姻条例」（Levirate Law）来试问耶稣关系koh活ê事。Á耶稣ê回答是：「今世ê 人有嫁有娶， m̄ -koh，会堪得tùi 死人中koh 活进入来世ê，就无嫁无娶。 因为in koh 活了后bē koh 死，kah 天使仝款，lóng 是上帝ê kiáⁿ 儿。(全民版)」（路加福音二十：34—36）

使徒保罗会án-ne强调肉体ê koh活，是因为希腊思想中，将人分做两个部分，一是肉体ê，另外一个是灵魂ê。肉体是污秽、无好ê，所以人死后，肉体就开始腐pháiⁿ。M̄-koh灵魂是洁净ê，所以当人往生ê hit一刻，灵魂就离开了身躯。所以当使徒保罗tī哥林多教会传福音hō͘ in ê时，lóng会强调身躯就是上帝圣神ê殿（参考六：19），这表示人ê身躯kah上帝有密切关系。Á上帝是圣洁ê，所以人ê身躯一定tio̍h保持圣洁，án-ne，死后koh活就是一个全新ê性命。Á这是希腊思想无法度接受ê想法。这mā是哥林多教会信徒中，有人认为只有灵魂会得救，身躯原本就会败坏死亡。所以chit种信徒虽然是信耶稣了，却iáu是teh过淫乱ê生活，in认为这bē影响tio̍h灵魂ê圣洁，chit点mā是使徒保罗非常受气ê事。其实，chit种态度m̄-nā发生tī哥林多教会，mā出现tī以弗所（参考以弗所书五：5）、歌罗西（参考歌罗西书三：5）等地区ê教会。

Tī chit段经文中，使徒保罗提供了真重要ê珍贵资料，就是描述thang见证耶稣koh活ê神迹ê人真chē，包括有他ê门徒，mā有chē kah五百gōa个跟tòe ê民众，koh khah重要ê，是chiah-ê亲目chiu金金看见koh活ê耶稣ê人iáu活teh，表示这是ē-tàng查证ê事，而且koh khah重要ê，使徒保罗ê转变就是因为伊亲自看见koh活ê耶稣。所以使徒保罗谈死人koh活ê信仰，是根据伊亲目chiu金金看见ê基础，mā是tùi chit点伊自认是hō͘上帝kah耶稣亲自拣选成做「使徒」ê一siōng重要理由（参考加拉太书一：1）。

第1到2节，chit两节mā是chit章经文ê引言。使徒保罗ài哥林多教会信徒记tiâu伊传hō͘ in ê信息，就是「耶稣基督kah伊死tī十字架上」ê信息（参考哥林多前书二：2）。伊讲传chit-ê福音，是「óa靠圣神ê大能来证实ê」，为tio̍h是beh hō͘哥林多教会ê信徒tī信仰上「不根据人ê智慧，却是用上帝ê大能做基础」（参考哥林多前书二：4—5）。这mā说明哥林多教会中，已经有人渗透入去讲「另外一种福音」了（参考哥林多后书十一：4），chiah-ê人后来就是使徒保罗所讲ê「超等使徒」（参考哥林多后书十二：11）。

第3到4节，chit两节真重要，使徒保罗讲已经kā家己所领受ná「siōng重要」ê信息传hō͘哥林多教会信徒。Chia所讲ê「siōng重要」一词，tī中文《和合本》是用「第一」，台语汉字mā是用「第一」，指ê就是「siōng重要」ê意思。表示chit两节所提起ê，mā是福音信息中siōng重要ê－耶稣为人ê罪死，而且埋葬，m̄-koh第三工有koh活。这mā是基督教信仰告白中siōng重要ê内容。Ài beh特别注意ê是，使徒保罗讲伊所传讲ê chiah-ê信息，lóng是「按照圣经所讲ê」，m̄是伊家己发明ê。圣经是上帝语，福音就是beh根据圣经上帝传，m̄是人家己创造ê信息。如果无照圣经，就无法度讲是福音。Chit点是非常重要ê认bat。

第5到7节，tī chit-ê几节经文中，使徒保罗讲tio̍h有关耶稣koh活了后显现hō͘甚么人看过ê记录；Tī chit段经文中，使徒保罗提起耶稣bat向（1）彼得、（2）十二使徒、（3）五百gōa个跟随者、（4）雅各等、（5）最后是使徒保罗家己。Tī圣经中有关koh活ê耶稣显现hō͘彼得看过，可能是路加福音第廿四章34节记载ê资料，说明十一位门徒（除了出卖耶稣基督ê犹大外）当teh讲：「主真正有koh活；伊已经显现hō͘西门看了！」（mā thang参考马可福音十六：7）「五百gōa个跟随者」，chit点tī福音书中chhōe bē-tio̍h chit-ê资料，m̄-koh可能盛传tī早期教会中。最后一位是「雅各」，伊真可能就是耶稣ê小弟；伊原本并m̄相信耶稣（参考约翰福音七：5），福音书mā无特别记载有关雅各看见耶稣koh活ê记事。不过，tùi使徒行传第十五章，以及加拉太书第二章lóng thang看tio̍h chit位雅各后来tī早期耶路撒冷教会有真大ê影响力。使徒保罗强调chiah-ê看过耶稣基督koh活ê人，iáu有真chē人活teh。换句话讲，早期教会teh见证耶稣koh活ê信息，并m̄是空谈，却是确实有人teh见证chit-ê tāi-chì，mā是因为án-ne，加上圣神充满ê气力，in勇敢地见证chit-ê tāi-chì，chiah hō͘福音大大广传开来。

第8到11节，使徒保罗kā家己排tī最后一位；伊遇tio̍h koh活ê耶稣，是因为当时伊当teh四界迫害耶稣ê信徒，然后发生tī伊前往大马士革beh继续掠信徒ê途中，koh活ê耶稣亲自显现hō͘伊看，并且kā伊讲话（参考使徒行传九：1—9）。Mā因为chit pái ê奇妙境遇，改变了使徒保罗ê一生。如果讲耶稣ê兄弟雅各有改变，则使徒保罗ê改变koh khah明确，而且对教会后来ê发展影响koh khah大。使徒保罗讲为tio̍h感谢koh活ê耶稣亲自向伊显现ê恩典，伊并无因此就骄傲，自认为有甚么特权，á是看bē起其他ê门徒，伊讲he是上帝ê恩典kah伊同齐同工，chiah hō͘伊kah其他使徒同齐传耶稣koh活ê信息。