使徒保罗强调tī疼ê内面，人ê心思意念是会成长ê，一个有成长ê人，tī chit时chūn就会发见家己过去ê幼稚行为，就会知影怎样改正过来。

第11节，一个细汉gín-á，无论所想ê，á是行为举止，lóng会充满tio̍h gín-á气，这是真自然ê现象。M̄-koh若是长大，就会kā过去gín-á气ê表现渐渐弃sak掉。

第12节，chit节讲「tùi镜子里看见ê影像，雾雾无清不清」，chia ê「镜子」是teh指古代ê铜镜，无亲像今á日ê玻璃镜片。古早时ê镜子真贵，所以m̄是一般人买得起。若此，一般人所用ê「镜子」就是koh khah普通ê材料，只要ē-tàng显像出来to̍h ē-sái。使徒保罗引用chit种镜子做譬喻来说明，每一个人无论怎样有才华，对事物ê看法lóng会有雾雾无清不清ê一面。伊chit种讲法，已经teh隐喻哥林多教会内面，有真chē人对别人所讲，所做ê批评，并无一定是正确ê。「将来就会面对面」，这是teh指审判ê时刻，是非曲直lóng会显露出来。仝款，mā无任何一个人thang讲家己对上帝ê认bat siōng正确。只有tńg来到上帝面前，人chiah会真正认bat上帝。

第13节，是chit章ê结论。Tī使徒保罗ê书信中，会看tio̍h伊强调「信心」是得救ê泉源（参考罗马书十：9—10）。伊mā强调基督徒应该心存ǹg望。有人讲基督教ê信仰乃是「ǹg望ê宗教」。M̄-koh，使徒保罗tī chia强调，爱chiah是性命ê本质，若是无爱，则信心、ǹg望并无会真正对人ê性命有益处，因为信心、ǹg望lóng是属tī人ê，只有爱chiah是属tī上帝。Á上帝是永恒ê。所以只有爱，chiah会永远存在。属tī人ê部分，lóng会跟tòe人而消失。