Tùi第十二章开始，一直到第十四章，这三章lóng thang清楚看出发生tī早期教会ê另外一个问题，就是关系圣神充满ê事，mā因为对圣神ê问题看法差别，无形中tī教会内部mā产生分裂á是纠纷ê现象。

Tùi使徒行传ê记事中看tio̍h，耶稣ê门徒会开始见证福音，就是tī圣神感动kah充满之下，tùi不安kah惊惶中，变成勇敢见证耶稣koh活ê信息。所以开启了福音信息传播ê动力。续落来，使徒保罗kah其他同工就是tī圣神ê差遣下，开始踏出海外宣教事工，hō͘福音ê信息因此而传开，m̄-nā tī耶路撒冷，koh khah阔传到外邦地区去。作者路加tī使徒行传chit本史册中，差不多就是用「圣神」做主题teh描述众使徒kah早期信徒信仰上ê见证。圣神tī早期是引chhōa教会福音事工行向ê主要力量，真chē人表明家己有圣神充满，四界去传福音，见证耶稣ê救恩，福音ê事工即使tī被迫害ê环境下，犹原广传出去。不过，哥林多前书第十二到十四章却是teh探讨哥林多教会发生所讲ê「圣神问题」，kah使徒行传所描述圣神大大充满tī门徒身上，hō͘ in勇敢四界去见证福音信息ê情形大无相仝，tī哥林多前书这三章所讲tio̍h ê圣神问题，却是kah讲「方言」有密切关系。原因是有信徒乱使用了「圣神ê恩赐」chit-ê信仰认知，造成教会内部ê纷争。

Tī chit段经文，使徒保罗强调一个重要ê信仰观念：无圣神作工，人无可能认bat耶稣是救主。换句话讲，如果无圣神感动，任人án怎努力，mā是枉然。因为认主耶稣为救主，这是关系tio̍h性命ê问题，关系tio̍h性命得救ê事，就m̄是人ê能力所ē-tàng改变ê，一定tio̍h是来自圣神ê气力。圣神只有一个，m̄-koh，圣神ê工作是多样ê，mā因人ê需要而异。

Koh讲，既然是圣神ê工作，就无所谓「轻重」ê问题，因为圣神是上帝拯救世人性命ê气力，是属tī上帝ê，m̄是用人ê方式ē-tàng衡量ê。所以带领一个细汉ê孩童来认bat主耶稣，kah带领一个王公贵族悔改来信主耶稣，仝款重要，无轻重之别。

第1到3节，tùi第1节thang看出有关圣神ê问题是哥林多教会提出来ê。使徒保罗提出哥林多教会信徒原本m̄知福音信息，因此lóng是teh过拜偶像ê信仰生活，后来听tio̍h福音信息而信耶稣。所以使徒保罗强调这就是圣神ê工作，只有tī圣神感动之下，人chiah会信耶稣是主。Mā就是讲，若无圣神ê启示，人无可能认bat耶稣就是性命ê救主。

第4到6节，tī chit段经文中，使徒保罗强调圣神只有一个，m̄-koh圣神赏赐hō͘每一个人ê「恩赐」lóng无相仝。伊tī chia表明：每一个人身上ê才能 lóng是tùi上帝来圣神ê赏赐。所以每一个人lóng有无仝恩赐，m̄-koh却只有一位主，就是性命ê救主。Chia所谓「恩赐」，tī希腊文kah「恩典」是同字根「charis」，指ê是：自赏赐得tio̍h，m̄是靠人ê能力得tio̍h ê。所以所谓「圣神ê恩赐」，真清楚就是teh指tùi上帝来ê恩赐。Á上帝ê赏赐是白白ê恩典，m̄是任何代价thang换来得tio̍h。这mā说明一个人拥有圣神ê恩赐，m̄是用来夸耀ê，却是beh用来回应上帝赏赐ê疼。

第7到11节，使徒保罗Tī chit段经文中，讲出每一个人领受ê圣神恩赐无相仝，有ê人拥有知识，有ê得tio̍h信心，mā有人拥有医病ê能力，á是行神迹ê能力，á是传讲信息ê恩赐，mā有专门讲灵语者，mā有解释灵语ê能力者等等，m̄-koh chiah-ê无相仝ê圣神恩赐，lóng出tī仝款ê圣神。这已经teh说明争辩甚么人chiah是有上帝圣神ê恩赐，是错误 ê认知。