哥林多前书 10章1节 到 10章13节   背景资料  上一笔  下一笔
使徒保罗tī chit-ê本hō͘哥林多教会ê书信中,用了真chē篇幅teh讨论有关基督徒ê「自由」问题。伊会chiah-ni̍h用心讨论「自由」ê信仰意义,是因为tī哥林多教会内,有kóa信徒乱使用了「自由」,认为只要信了耶稣成做基督徒了后,就ē-tàng随心所beh。In所持ê理由就是使徒保罗所讲ê「基督已经tháu放咱」chit-ê观念(参考加拉太书五:1)。M̄-koh当使徒保罗teh讲基督徒ê「自由」ê时,是非常强调「自由」一定tio̍h有koh khah顶真ê自律相配合,m̄是放纵。Koh讲,「自由」一定tio̍h考虑tio̍h kah身边做伙人ê软弱,m̄是用来展宝家己ê信心坚定。哥林多教会ê问题tùi chit本书信一开始就提起分党结派,致使教会内部有纷争,甚至iáu有ê信徒因为放纵情欲,发生kah继母同居ê事,使徒保罗谴责án-ne严重ê淫乱,是连「tī异教徒中mā无法度容忍ê」行为(参考哥林多前书五:1)。

严格律己ê生活态度,ē-sái讲是使徒保罗写hō͘所有教会书信中ê主要内容之一,tùi伊所写ê书信lóng会提起有关基督徒tī社会生活上应该有ê顶真态度,就thang看出伊tī chit方面ê用心。伊期待每一个信耶稣基督ê人lóng会知影怎样透过生活,hō͘人闻到基督ê香味,mā tùi基督徒ê生活中看tio̍h因为信仰带来「新造ê人」(参考哥林多后书五:17,加拉太书六:15,以弗所书四:23—24)ê新形像。

Chit-má使徒保罗koh tī第十章讨论到有关「自由」kah生活ê关连,伊kā重点锁定tī第31节:「Lín无论做甚么,á是食á是lim,lóng tio̍h为荣耀上帝而做。」这是一个非常重要ê信仰认知。

使徒保罗以以色列人民tī旷野ê经验举例,tī旷野中in因为试探上帝而遇tio̍h惩罚。如果食祭拜偶像ê食物,成做一种试探,就ài beh特别小心。所谓「试探ê食物」,指ê是哥林多教会有kóa信徒siuⁿ过「自信」了,认为家己真有信心,无论食、lim等lóng bē有问题。M̄-koh chit种态度ná亲像早期以色列人民tī旷野ê经验仝款,in mā食过吗哪,lim过tùi石磐顶出来ê泉水,m̄-koh,in即使经历过chit种性命旅途,iáu是跋倒了,in chhōe出tī认正当ê理由离弃上帝去拜偶像,结果惹起上帝极大ê愤怒。

第1到5节,chit段经文是讲tio̍h犹太人祖先以色列民族tī出埃及进入旷野了后漂流期间所发生ê事,包括tī上帝奇妙ê安排下,平安过红海;食过tùi天顶落来ê吗哪,而且tùi石磐中上帝出泉水止in口渴。比较值得注意ê是,使徒保罗tī chia讲「石磐就是基督」,将chit句话对照约翰福音第四章13到14节,耶稣对hit位撒马利亚cha-bó͘人讲,伊即使lim了祖先雅各所流落来ê井ê泉水iáu是会渴,m̄-koh lim伊所hō͘ ê水,chiah是永远不渴ê泉水,因为伊是永恒ê性命之泉。使徒保罗tī chia表示:基督,就是拯救者。Chit位拯救者,就是上帝,他一直teh陪伴以色列人民行过hit段siōng艰辛ê旅程。一个tī耶稣里ê人mā会仝款得tio̍h chit种恩典。可惜ê,是以色列人民因为对上帝怀疑,结果上帝hō͘ in tī旷野漂流ê时,只要年满二十岁ê,后来lóng无资格进入迦南应允之地。M̄-koh若是亲像以色列人民án-ne心硬,结果mā会是仝款无法度进入上帝国度享受永恒ê性命。

第6到10节,chit段经文使徒保罗引用了几个所在经文背景,包括出埃及记第三十二章6节,in tī旷野铸造金牛后,拜之,既lim koh跳。然后koh引用民数记第廿五章,in因为受tio̍h摩押cha-bó͘人ê诱惑,犯了淫乱罪,为tio̍h án-ne件事引起瘟疫,有二万四千人死亡(m̄是chia记载ê二万三千人)。然后koh引用民数记第廿一章4到9节,in因为埋怨上帝无hō͘ in食物kah水,结果上帝发怒,hō͘毒蛇咬死真chē人。第10节真可能是kah民数记第十六章记载可拉、大坍,kah亚比兰等人不服上帝奴仆摩西ê领导而遭灭绝ê事件有关。Tī第9节ê「试探基督」,mā thang用「试探主」,á是「试探上帝」来表示。基督ê意思就是拯救者。

第11到13节,使徒保罗Tī chit段经文中kā哥林多教会ê信徒讲,m̄免担心,in所面临ê试探,lóng m̄是甚么值得惊惶ê,chiah-ê lóng是一般人ē-tàng承受ê。因为「信实ê上帝」bē hō͘ in遇tio̍h承受不了ê试探,慈悲ê上帝绝对bē会án-ne对待信靠他ê子民。M̄-nā án-ne,颠倒,慈悲ê上帝会赐hō͘ in力量,hō͘ in tī遇tio̍h困境ê时,赏赐hō͘ in力量,行出一条性命ê大道。


重新查询 专卷研经 哥林多前书系列
错误回报,请联系comm[@]fhl.net