历代志上 6章1节 到 6章15节   背景资料  上一笔  下一笔
Chit章全部lóng是kah利未家族ê kiáⁿ孙有关。有一个前题小khóa注意一下,就是利未原本因为kah西缅参与屠杀示剑城ê事件(参考创世记第三十四章)而遇tio̍h雅各ê诅咒(参考创世记四十九:5—7)。后来,利未人ê kiáⁿ孙因为tī出埃及入旷野时代,「服从摩西ê命令」,刣死hiah-ê敬拜金牛ê人民(出埃及记三十二:26—30),tùi án-ne得tio̍h摩西ê祝福(参考申命记三十三:8—11)。因为án-ne,tùi原本雅各诅咒ê分散,到落尾摩西对in ê祝福,变成明显ê对照,就是in分散tī各族khiā起之地,m̄-koh却成做各族tī心灵上ê指导者,in主要ê工作是带领人民敬拜上帝,替以色列人民「赎罪」(第48到49节),mā因为chit种工作,in渐渐变成以色列社会ê意见领袖,特别是亡国tī巴比伦帝国了后,祭司ê角色扛头,而且占有非常重要ê份量,成做后来犹太人社会ê领袖。

Chit段经文是绍介利未ê家族之族谱。Mā可能是kah祭司ê资料有密切关系,因为án-ne,chit份族谱ē-sái讲是siōng详细祭司族谱。其他ê资料thang参考历代志上第九章10到12节,以及以斯拉记第七章1到5节,以及尼希米记第十一章15到24节等等。

第1到4节,chit份tùi利未到非尼哈ê族谱,ē-sái讲是tùi出埃及记第六章16到25节ê资料节录出来ê。

第5到15节,chit段族谱tùi第4节就thang清楚看tio̍h主要是teh绍介以利亚撒ê后代,mā是用撒督ê直系家族为主轴。

Tī第15节特别指出tī主前586年犹大亡国,人民hông掠去巴比伦做奴隶ê时,祭司约萨答mā tī受掠ê行列中。其实,大部分ê祭司lóng是,mā因为祭司tī奴隶之地无法度koh再维护祭祀礼仪,in转而推动「会堂」研读圣经kah祈祷ê活动。直到主前538年巴比伦亡国,波斯帝国hō͘以色列人民回乡,当犹大人民tńg来到故乡,虽然重建了圣殿,m̄-koh in犹原维护tio̍h「会堂」聚会ê方式。

重新查询 专卷研经 历代志上系列
错误回报,请联系comm[@]fhl.net