Chit段经文记载利未人工作上ê调整，原因是盖好圣殿后，过去tī旷野时间，利未人需要四界扛约柜，chit-má m̄免à。需要负责ê工作当然iáu包括管理圣幕，以及圣幕内所有ê器皿等，taⁿ lóng因为有圣殿。因为án-ne，过去扛搬ê工作，改变成管理、清洁等工作。Mā就是保持洁净比甚么工作lóng重要。

第21到23节，chia记载利未ê第第三kiáⁿ米拉利ê kiáⁿ孙。比较特别ê是chia记落来了米拉利ê孙á以利亚撒无kiáⁿ，而kā cha-bó͘-kiáⁿ嫁hō͘表兄弟ê事记录落来，这算是比较少见ê记载。

第24节，chit节真重要，kā原本三十岁chiah登录名单，tùi án-ne改为二十岁以上。

第25到26节，大卫王强调上帝会因为约柜ê缘故而「永远tòa tī耶路撒冷」，chit句话其实是强化兴建耶路撒冷圣殿ê重要性。另外一方面，mā hō͘利未人ê工作有改变ê理由。

第27到30节，记载利未人过去需要扛约柜kah圣幕kah其他器皿，chit-má因为有圣殿而固定落来，利未人ê工作mā就大幅改变。Chia指出大卫kā利未人用来协助祭司ê工作，管理圣殿ê庭园kah房间，mā负责清洁ê工作，并且准备每工圣殿里所需要ê用品，包括供饼、灯油等等。Iáu有，每工早晚两pái，圣殿一定tio̍h有敬拜礼仪ê课，利未人lóng tio̍h献唱诗歌颂赞上帝。

第31到32节，chit两节提起特别ê节日，包括有安息日、初一，以及其他节期，利未人lóng tio̍h按照指定ê人数kah规例，配合tio̍h祭司ê献祭kah礼拜方式，维护圣殿ê一切秩序，kah帮助祭司进行所有礼拜ê工作。