历代志上 22章2节 到 22章10节   背景资料  上一笔  下一笔
Chit章主要teh说明建造圣殿ê事,表面上是由所罗门所建造,其实是大卫王ê功劳,因为材料、地点等lóng是大卫王为所罗门事先准备、选定ê(第1节、第2到3节、第14节等等)。所罗门充其量是执行大卫所交带ê工作罢à。

「Ē-sái讲是伊少年,koh无经验,所以我一定tio̍h kā一切准备好势」,这是历代志作者kā建造圣殿归功tī大卫王ê一个基本看法。

照历史来看,所罗门继任王位ê时,年纪大约是二十岁左右。建造圣殿大约tī伊当以色列王ê第四年,án-ne算来,所罗门王mā不过chiah二十四岁。既然,上帝讲大卫王并m̄是建造圣殿ê人,伊ê gín-á chiah是。因为án-ne,为tio̍h有份tī建造圣殿,伊决定先kā一切准备好势,然后交带kiáⁿ去执行。至少这mā是表达伊回应上帝hō͘伊ê疼ê一种方式。

第2到4节,chia大卫王运用tī以色列国内ê外侨,chiah-ê外侨包括phah战俘掳来ê奴隶,以及因为以色列强盛而慕名移居来以色列境内工作ê人,大卫王用chiah-ê人来准备大块ê石头。伊mā准备做圣殿门扇ê钉子、钩子,tùi泰尔kah西顿两个港口mā大量运了来自黎巴嫩ê香柏木,这香柏木是当时中东地带siōng珍贵ê木材。

第5节,chit节讲出大卫王做chiah-ê chìn前ê准备工作ê原因,就是看见伊想beh kā王位hō͘所罗门ê时,伊尚且少年,无甚么经验。M̄-koh teh准备chiah-ê工作ê时,所罗门应该是侍卫tī边á,thang看见、听见,大卫王ê指导kah提醒,án-ne有帮助伊以后建造圣殿ê路用。另外一方面mā thang án-ne讲,tio̍h建造一座金碧辉煌ê圣殿,单单准备建材就beh花费真chē时间kah人力。

第6到10节,大卫王这是第一段ài所罗门建造圣殿ê原因,详细说明hō͘所罗门听,thang hō͘伊知影为甚么ài建造圣殿,而且知影应该用甚么态度来进行chit项大而且神圣ê工程。

Tī chia,大卫王先表示原本是伊beh建造圣殿,m̄-koh上帝并无同意,主要原因是伊出兵相战刣死真chē人,上帝无希望用伊ê手来建造圣殿。Á所罗门无chit种问题,koh tī以后伊做国王ê时,上帝会庇护,hō͘以色列国内享受和平。Tī chit段时间内,chiah来兴建圣殿。换句话讲,兴建圣殿是tī国家siōng安稳ê时chūn建造起来ê。Án-ne圣殿ê意义显明出来à,一则,它是一个敬拜上帝ê所在,无法度hō͘杀害人ê性命、流人ê血ê人来建造。因为上帝是慈爱ê上帝。二则,ná亲像大卫向亚劳拿所讲ê,献hō͘上帝ê祭品,无法度是「白白得来ê」,是需要付出代价ê,chit种代价所诠释出来ê意义,祭品ê内面是有性命ê,m̄是死ê。

重新查询 专卷研经 历代志上系列
错误回报,请联系comm[@]fhl.net