Chit段经文mā thang参考撒母耳记下第六章。大卫带所有ê重要官员、将领、民间长老代表等去搬运约柜。为tio̍h beh搬运约柜，大卫真隆重地举行献祭礼仪。Tī撒母耳记ê资料中，特别提起利未人kā约柜扛tī肩头上，chiah行六步，大卫就beh队伍停落来，先举行献祭了后，chiah koh再继续行动。

第25到28节，chia讲伊共献了「七只公牛kah七只绵羊」为祭，chia lóng用「七只」，表示神圣ê意思。M̄-nā án-ne，大卫mā kah利未人穿插仝款ê麻纱长袍，而大卫iáu同时穿「以弗得」，chit点有点á奇怪，因为这以弗得ê衫裤是只有祭司chiah thang穿（参考出埃及记第廿八章，撒母耳记上二：18；廿二：18），至少mā若是利未族人才有资格。大卫并m̄是利未族人，可能是伊想beh参与祭司服事祭祀礼仪ê工作。特别ê所在是kui个搬运ê过程，是用siōng优美ê音乐、舞蹈来迎接约柜，显示出来ê，m̄-nā是kā约柜看做siōng珍贵ê宝物，而是beh表明对上帝ê疼，以o-ló ê态度做出回应。

第29节，大卫因为ē-tàng顺利搬运约柜，因为án-ne，tī搬运ê过程中，伊真尽情ê搭配音乐而跳起舞来，而且沿路一面跳，近óa跟tòe tī搬运ê队伍中。Á chit-ê镜头hō͘伊ê bó͘，mā是扫罗ê cha-bó͘-kiáⁿ米甲看tio̍h，撒母耳记下第六章20节，记载米甲讲出chit种话：「「以色列王今á 日有gōa 大ê 荣光！今á 日露体tī 人臣ê 女婢目睭前，亲像一个无hē 落ê 人无惊见笑露体 (全民版)。」米甲chit种话，是teh表示大卫穿ê是麻纱长袍，却m̄是穿插王服。可能因为伊tī跳舞中无经过意ê露出下体，而hō͘米甲感觉真见笑。撒母耳记下第六章21到22节记载大卫听米甲ê话了后，mā真无欢喜，就讲伊跳舞是为tio̍h beh荣耀上帝，因为上帝拣选伊当以色列ê王。伊会án-ne跳舞，除了是荣耀上帝外，mā teh表明伊ê谦卑，而且mā得tio̍h宫中女婢ê o-ló。结果撒母耳记下作者特别tī第23节讲，米甲tùi chit-ê生都无生养kiáⁿ，有意用chit种话表示米甲受tio̍h上帝ê惩罚。

M̄-koh有关米甲终生不有娠生kiáⁿ ê事mā thang án-ne了解：因为伊是扫罗ê cha-bó͘-kiáⁿ，因为án-ne，生落来ê kiáⁿ mā算是扫罗ê后代，真可能对大卫ê政权有威胁。因为án-ne，大卫mā趁此机会chhōe-tio̍h理由m̄ kah伊同房。

第十六章1到3节，当约柜安置tī大卫准备好势ê会幕里了后，大卫随时就举行献祭礼仪，表示感谢上帝。真清楚，chit项献祭礼仪有大卫参与其中，m̄-nā是祭司而已大卫因为参与献祭ê工作，因为án-ne，伊kā祭司献祭后所得tio̍h ê食物分hō͘所有参加ê人民，并且祝福了in。

	第4到7节，chit段经文说明大卫开始，tī会幕举行敬拜ê时，有利未人担任乐师负责歌唱ê工作。