Chit段经文描写开始有附近国家来进贡，显示出大卫王已经统治了全以色列，泰尔王率领访问团来访，表示对大卫王统治权ê肯定。Koh讲，chit段经文mā同时绍介大卫进入耶路撒冷了后koh娶ê妃嫔。Chit段经文mā thang对照撒母耳记下第五章11到16节。

第1节，泰尔希兰王带珍贵ê礼物来进贡，特别是带来一批工匠kah建材，beh替大卫王建造宫殿，这表示附近国家lóng承认大卫就是以色列国ê统治者，统治全以色列民族。

第2节，大卫续接扫罗ê王权了后，伊发见全以色列人民lóng尊崇伊，并无因为移送约柜发生意外事件而拒绝伊，因为án-ne，伊认为上帝mā接纳伊当以色列人民ê统治者。

第3到7节，大卫除了tī希伯仑ê时娶六个妻细姨，到耶路撒冷koh选真chē妃嫔，chit点mā是当伊犯淫乱刣人罪了后，先知拿单ê故事中所譬喻ê，伊是一个「有钱人有真chē牛羊」（参考撒母耳记下十二：2）。Chiah-ê tī耶路撒冷娶ê妃嫔，mā替伊生真chē kiáⁿ，chia记落来十三个gín-á ê名（参考历代志上三：5—8）。Tī这十三个kiáⁿ中，siōng出名ê一位就是所罗门。