历代志上 13章1节 到 13章14节   背景资料  上一笔  下一笔
Tùi第十三章开始,直到第十六章止,lóng是teh描述大卫án怎迎接约柜进入耶路撒冷城ê事件。历代志ê作者kā大卫王当做是此经册ê中心人物,而耶路撒冷圣殿则作者编撰此经册ê主要题旨。

Chit章mā thang参考撒母耳记下第六章1到11节。详细对照这两处ê记载,就会发见chit章ê第1到4节,tī撒母耳记并无出现,特别是大卫强调tio̍h派人去报告「tòa tī各城ê祭司kah利未人,请in lóng来chia kah阮聚集做伙」,主要目的是beh迎接上帝ê约柜进入耶路撒冷城。换句话讲,大卫beh运约柜进入耶路撒冷,有通告所有以色列人民,特别是hō͘祭司kah利未人知影,chit件神圣ê大事,lóng一定tio̍h出席,而且tio̍h用举国庆祝而且神圣ê大事来看待。Koh讲,之所以需要通知利未人,是因为只有in chiah thang搬移约柜(参考历代志上十五:2)。

第1到4节,这是大卫tī执政了后,而且tùi原来tī希伯仑做王,换到耶路撒冷城à。Chit时chūn,伊认为应该kā约柜迎进耶路撒冷chiah-tio̍h。其实,伊是phah算先运进耶路撒冷,然后chiah选一个美好所在做盖圣殿、安置约柜ê所在。因为án-ne,伊召集将领讨论有关运送约柜ê事。Teh徵求大家同意之下,伊向全国人民宣告,beh运约柜入耶路撒冷城。伊koh特别强调讲,过去约柜一直khǹg tī基列・耶琳,是因为扫罗无重视约柜ê缘故。Chit句话,说明大卫kah扫罗之间ê差别;大卫是重视kah上帝之间立约ê君王,而chit点mā是历代志作者主要强调ê。

约柜,这是用来象徵上帝kah以色列人民同在。因为án-ne,有约柜tī-.teh,就表示上帝tī in中间。反之,就是无。因为án-ne,约柜就成做以色列人民宗教生活ê中心。

第5到8节,当决定了后,大卫就号召全国人民lóng kah伊到基列・耶琳去迎接约柜入城。大卫kā约柜khǹg tī「一台新ê车上,然后由乌撒kah亚希约tī头前领路。照撒母耳记下第六章3节ê记载,in是亚比拿达ê kiáⁿ。然后,大卫kah所地人民lóng尽情地欢乐庆祝,ná亲像嘉华年会一般。

第9到11节,无想tio̍h,当拉车ê牛差一点á绊倒ê时,乌撒赶紧伸手扶tòa约柜,无想tio̍h上帝却因为án-ne大大受气,致使乌撒因为án-ne死tī hia,chit件事大卫真无欢喜。

为甚么会造成乌撒ê死亡?这是一个常常hông提起ê问题。照历代志作者ê观点,大卫虽然有真好ê心意,m̄-koh,运送约柜是一件非常神圣ê大事,bē-tàng随便由一般人来搬运,一定tio̍h是有祭司资格ê人chiah thang,chit点是历代志作者ê用意,chit点thang tùi第十五章13节大卫召集祭司、利未人来ê时说明ê原因看出,伊讲:「因为lín 早前无án-ne 做, 咱ê 上帝— 上主已经kā 咱责罚,因为咱无照定tio̍h ê 例走chhōe他。(全民版)」

第12到14节,因为chit件意外ê事件,hō͘大卫心生惊惶,m̄敢继续运送约柜,而kā约柜暂时安置tī迦特城人俄别・以东ê厝里。Tùi第十五章21节、24节,以及第廿六章4到5节ê资料来看,就thang明白俄别・以东乃是利未人。由伊看守约柜mā是符合本来ê用意。约柜tī chia停留了有三个月时间,真特别ê是:约柜停留期间,上帝特别赐福hō͘俄别・以东。这mā说明大卫之所以beh kā约柜运送入耶路撒冷城ê原因。因为只要有上帝同在,就是siōng大ê福气。

重新查询 专卷研经 历代志上系列
错误回报,请联系comm[@]fhl.net