约翰福音 14章1节 到 14章14节     上一笔  下一笔
39.Tī chit-ê四章中间,每一章lóng有它特别强调ê内容:
A. 第十四章,一、他一再强调疼他ê人,就beh遵守他ê命令(第15、21、23、24、31节)。二、他kā咱讲,奉伊ê名,无论求甚么,他lóng会成全(第 13、14 节)。三、他去了后,iáu会koh再tńg来,去是为咱预备地方ê(第3、18、28节)。四、他kah天父之间ê关系亲密结合做伙,认bat他,就是认bat天父。他tī天父性命里,天父mā tī他内面(第7、10、11、23节)。

B. 第十五章,一、以葡萄树做譬喻描述他kah咱之间ê关系。二、天父――耶稣――咱,这三者之间结联做伙。三、特别提起,奉他ê名,无论向天父求甚么,天父定会赐hō͘咱(16节)。

C. 第十六章,一、他koh一pái提起他teh beh离开tńg去天父ê所在,并且用真慎重ê语句讲:「我郑重地kā lín讲,lín奉我ê名,无论向老父求甚么,伊一定赐hō͘ lín。」( 23节)二、koh一pái强调他kah咱是结合做伙,藉tio̍h他,天父mā kah咱结合做伙。

D. 第十七章,是耶稣基督ê祈祷文,总共有26节。Mā是四本福音书中siōng长ê一篇祈祷文。Thang分做三部分,就是先为家己祈祷(1到4节),koh讲为门徒代祷(5到19节),最后是为所有信ê人祈祷( 20到26节)。

40. 十四:1—14节,耶稣对门徒siōng大ê应允就是他去了后,iáu会koh再tńg来。Chit点一直是基督教会坚持基督耶稣会koh再临ê主要ê因素,因为这是耶稣亲嘴讲ê。当他beh升天ê时chūn,mā「有两个穿白衫ê人khiā tī门徒身边」,对门徒讲:「加利利人nah,为甚么khiā tī chia teh仰望天空?Chit位离开lín、被接升天ê耶稣,lín看见他怎样升天,他mā会怎样tńg来。」(使徒行传一:11)问题是甚么时chūn chiah是耶稣会koh来临ê时刻?是koh活了后?iáu是tī人死去ê时chūn?á是世界末日ê时刻?这一直是真chē人想beh知影ê,m̄-koh,耶稣并无说明。

A. 多马,这是门徒中hō͘咱印象深刻ê一位,因为伊bat讲beh亲手摸到耶稣,chiah beh相信耶稣是真正koh活(约翰福音二十:24—25)。伊问耶稣,既然m̄知影耶稣beh去ê所在,「怎样会知影ná条路?」怀疑,并m̄是têng-tâⁿ,重要ê是会提出来,á m̄是隐藏tī心里不讲。另外一点,对怀疑siōng好ê解惑方式,就是chhōe,努力chhōe。耶 稣讲chhōe必定会chhōe-tio̍h。如果kan-taⁿ会怀疑,却m̄知chhōe,怀疑永远bē解开,答案bē家己出现。

B. 「我是道路、真理、性命;若m̄是藉tio̍h我,无人ē-tàng到老父hia去。」这thang讲是耶稣对门徒,mā是对咱siōng重要ê宣告。Mā就是头前我讲过,耶稣一再强调ê,认识伊,就是认bat上帝仝款。Chit句话mā表明耶稣kah上帝之间有bē-tàng分ê关系。其实在犹太人ê观念中,所谓真理、道路kah性命是联做伙ê,无法度分开。Mā就是讲,有 真理ê所在,chiah有性命thang讲,因为真理是人性命生存之道。诗人án-ne写讲:「上主ah,求你指示我该行ê道路,我beh顺服你ê真理;求你教导我怎样敬畏 你。」(诗篇八十六:11)咱thang tùi诗篇中看tio̍h真chē类似ê诗句,lóng是写tio̍h上帝就是真理,他ê话就是性命ê亮光(一一九:105),是性命ê道路(十六:11)。耶稣用chit句「若m̄是藉tio̍h我,无人ē-tàng到老父hia去」,已经明白讲出,伊就是上帝tī世上ê记号。就是ná条通往上帝之家ê道路。

C. 第13到14节,耶稣重复地讲以伊ê名向上帝祈求,必定会有所得。因为伊就是祈祷ê保证者。这就是咱今á日祈祷ê时chūn,奉靠主耶稣ê名求ê原因。

重新查询 专卷研经 约翰福音系列
错误回报,请联系comm[@]fhl.net