經文：雅歌 1:1-1:7 註釋:
Chit節開宗明義就講此本詩歌集是：「所羅門之歌，是詩歌中siōng美ê詩歌。」m̄-koh chit句「所羅門之歌」，mā thang看做是「獻hō͘所羅門ê歌」，á是「為所羅門編寫ê詩歌」。因為tī希伯來文ê「之」字，有真chē解釋。既thang解釋為「為」，mā thang解釋為「有關」等意思。在列王紀上第四章32節án-ne記載所羅門王，講：「伊做三千句箴言kah一千零五首詩歌。」chia所講ê「一千零五首詩歌」，是teh指toh一kóa詩歌，並無明確說明，是m̄是有包括「雅歌」chia面ê詩歌，並無清楚。
所羅門王是以色列第三任國王，m̄-koh mā是tùi伊開始，王位tùi原本由先知膏立轉變成世襲，伊並m̄是先知膏立ê，卻是由老父大衛王世襲傳承落來，m̄-koh khah實際ê講，是宮廷內鬥、爭奪了後，伊奪tio̍h ê。伊在位ê年代大約是主前972到932年，在位將近四十年。Tī伊ê任內kā以色列帝國帶到siōng高峰。非常可惜ê是，伊晚年tī信仰上顯得脆弱，竟然是帶頭棄sak上帝，去拜偶像神明，「無親像in父親大衛hit種一心忠於上主—伊ê上帝」（參考列王記上十一：4）。引起上帝艱苦心，mā 致使以色列帝國失去上帝賜福，致使tī伊死後，國家就分裂à。
這是第一首詩歌，先由少女[新娘]開始唱。伊唱出心中對愛情ê渴慕，而俊男[新郎]並不在現場。
Tī第3節中ê「名」kah「芬芳」（原本是teh指膏油）是同音。戀愛中ê情人，一聽tio̍h愛人ê名，心中ê感覺就真舒暢，ná親像香膏油ê馨氣thang提神。M̄-koh chia所講ê芬芳背後含意是「油膏」，mā teh表示男方是一位君王ê意思。若是君王，ná親像有kóa學者所強調ê，這是teh指耶和華上帝。Teh表示以色列人民對上帝渴慕之愛。
第4節，「願你kā我帶走」，這mā是一種下願，表明願一生kah跟tòe chit位俊男[新郎]、君王行，永遠bē後悔ê意思。「寢室」、「歡樂」、「暢飲」、「愛河」等，chiah-ê詞lóng teh表明二者之間親密ê疼，無法度分離。
第5節，「o͘-khia̍t-khia̍t」，是因為kui工lóng tī葡萄園中工作，致使曝日頭過久（參考第6節），皮膚變色ê緣故。M̄-koh並無因為án-ne hō͘ cha-bó͘-gín-á ê心內mā變烏à。顛倒，cha-bó͘-gín-á ê心iáu是仝款「秀美」。Mā就是講，談愛情，就m̄-thang用貌取人，ài beh看心內chiah重要。
「基達」，這是設tī大馬士革東南方ê沙漠地帶，以盛產烏山羊出名。Mā因為án-ne，chit-ê所在ê顧羊人ài用烏山羊皮作帳棚，tī內面歇睏過瞑。Á「所羅門宮中ê帳帷」，意思是teh指非常豪華、súi。
第6節，chit位cha-bó͘-gín-á kā其他cha-bó͘-gín-á講，m̄-thang笑伊皮膚o͘-khia̍t-khia̍t，其實伊ê心內美得像「基達」ê帳棚一般，hō͘人一入去，就感受tio̍h溫暖、爽快。伊ê心內美得ná親像華麗、人見人愛ê王宮中之帳帷。
「tī葡萄園工作」，聖經一再表示以色列人民就是上帝ê葡萄園。上帝就是園主。因為無閒看管兄弟ài伊代替整理ê葡萄園，致使kā家己ê葡萄園hō͘荒廢à。這有隱喻ê內涵，表示伊bē記得整理家己。對一個iáu未出嫁ê姑娘來講，曝烏了，是真oh過ê事，bē記得整理家己ê儀容，甚至無有時間去談情講愛，就會致使愛情生鏽。這cha-bó͘-gín-á開始擔心起來。
第7節，這是teh追求心所kah意ê對象發出ê聲音，若對象是上帝，這mā講出以色列人民teh chhōe牧養in ê牧者。講得koh khah貼切，就是in迷路à。Ná親像第6節所提起ê，這cha-bó͘-gín-á可能疏忽了，因為太無閒別ê tāi-chì而bē記得家己心愛ê cha-po͘人。若是án-ne，mā隱喻tio̍h以色列人民因為無閒tio̍h別ê神明，卻kā siōng重要ê牧者耶和華上帝hō͘疏忽了，甚至bē記得，m̄知上帝tī tó位，想beh chhōe，卻chhōe bē-tio̍h蹤跡。
經文：雅歌 1:8-1:11 註釋:
Chit段是俊男[新郎]回應ê詩歌。Chhōe顧羊人，thang先tùi chhōe羊群ê腳跡著手，因為顧羊人必定會kah伊ê羊群做伙。Chia mā ē-sái講是上帝teh回應以色列人民，祂tio̍h以色列人民tńg來到祂身邊，只要認真注意chhōe tńg來ê路徑，並無難chhōe，必定thang真輕易ê就發見，上帝teh thèng候伊tńg來。
第8節，chit位俊男[新郎]講耶路撒冷ê cha-bó͘-gín-á是siōng súi ê。因為hit-ê城就是上帝所khiā起ê所在，hông稱做siōng美好ê城市。
古代ê顧羊人辨識失去ê羊，就是tùi羊行過而留落來ê腳印來辨別該羊行過ê路徑，循tio̍h這路徑去chhōe，一定會chhōe得tio̍h。
第9節，所謂「牝馬」，這是當teh青春期ê雌馬，mā是雄馬siōng歡喜追chhōe ê。另外一種翻譯是：「法老車上套ê駿馬。」埃及ê戰車是有名ê，因為它ê戰馬lóng經過精挑細選。Á法老王戰車上所用ê戰馬koh khah是精選ê。因為án-ne，人看見法老戰車上ê戰馬，自然就會想beh去摸牠、騎牠。Chit位俊男[新郎]唱出chit種詩句，是teh o-ló chit位cha-bó͘-gín-á ê súi，是眾人所欣慕ê對象，大家lóng想擁有伊。Ná親像耶路撒冷城，自古以來，lóng是兵家必爭之地仝款。
第10節，用來形容這cha-bó͘-gín-á ê súi，m̄-nā tī面貌，koh tī伊身上ê裝飾koh khah是án-ne。
第11節，「為你製金鍊á，為你配上銀ê飾物」，這是類似文定ê物。俊男[新郎]深知cha-bó͘-gín-á ê心內感受，為tio̍h hō͘伊安心，伊願意kā伊先定落來終身，hō͘伊知影努力是有結果ê。
經文：雅歌 1:12-1:14 註釋:
短短ê三節經文，是少女[新娘]回應俊男[新郎]ê詩歌，thang看出in bat有過一段美好ê約會ê時光。
第12節，「我ê君王」，這是第二pái提起（參考一：4）。Cha-bó͘-gín-á身上充滿tio̍h珍貴香料ê氣味。Chia ê「香水」，是種極珍貴ê香油。
第13節，chit位少女[新娘]講她ê愛人是倒tī她ê「胸懷」，而伊身上則散發tio̍h如一袋子ê「沒藥hiah-ni̍h芳」。
「沒藥」，這是非常高貴ê香料。當耶穌降生ê時chūn，東方來ê星象學家就是呈獻hō͘耶穌chit種極高貴ê香料（參考馬太福音二：11）。
第14節，chit位少女[新娘]描述她ê愛人ná親像「一叢鳳仙花」，是巴勒斯坦地區出產ê一種灌木，屬tī香柏樹ê一種，其花芬芳。
「隱‧基底」，這是設tī死海附近一大曠野中ê一片綠洲。大衛王為tio̍h beh躲避掃羅ê追殺，bat逃到chit所在避難（參考撒母耳記上廿四：1）。
這thang看tio̍h作者teh表達愛情ê真意：真實ê愛情，是hō͘愛人得tio̍h芬芳ê活氣，koh tī倦tah-tah ê時chūn，得tio̍h安息ê所在。甚至tī災難來臨ê時，成做避難所。只有仇敵chiah會hō͘人感受tio̍h有被落井下石ê壓迫，卻m̄是性命ê解放。
經文：雅歌 1:15-1:17 註釋:
Chit三節是俊男[新郎]kah少女[新娘]teh對話。
第15節，俊男[新郎]回應少女[新娘]ê話。伊o-ló cha-bó͘-gín-á ê美，用「目睭像粉鳥ê目睭」，這是teh表示：純潔、溫順，像粉鳥仝款，m̄是la̍h-hio̍h hit種凶刣之眼，koh khah m̄是仇敵眼中ê憤怒。
第16到17節，當少女[新娘]聽tio̍h俊男[新郎]án-ne o-ló伊後，伊mā回應講願意終生委身tī伊身上，就算無床榻，thang kā「青草」當做牀鋪，就tī香柏樹下，mā thang做厝。這是真愛中閃爍出來ê性命亮光，即使無房屋，mā thang tī野地裡看tio̍h siōng súi ê房舍，就算tī siōng野外之地，mā會看tio̍h kui片樹林遮蔽、ná親像天花板一般ê大寢室。
詩人用chit種方式表明siōng真實ê信仰，是無需要看起來súi建築ê禮拜堂，mā m̄免有富麗堂皇ê外表裝飾，因為信仰所beh表達ê是心內ê美，chit種美，hō͘咱看tio̍h上帝kah-ná就tī咱性命ê四周鋪上了siōng好ê床、地毯、天花板，mā hō͘咱看tio̍h性命如粉鳥ê眼光一般，知影該行ê道路，mā知影怎樣chhōe tńg去厝裡ê路途，bē耽擱，koh khah bē失迷，因為伊知影往tó位去。
經文：雅歌 2:1-2:7 註釋:
「沙崙」，這是設tī地中海東岸，約帕kah chē耳之間ê一個海邊平原，土地非常肥。Chia盛開tio̍h真chē hō͘人一看tio̍h就喜愛ê野花，包括百合花、水仙花等lóng是。
「野玫瑰」，到底是甚麼款ê花？無jōa清楚。Tī《中文和合本》有附註講是「水仙花」。
「百合花」，表明純潔ê意思。Tī耶路撒冷聖殿前ê兩條大柱，就是雕刻tio̍h百合花ê樣式，表明ê是：進入聖殿者，一定tio̍h是心地純潔ê人（參考詩篇廿四：3—4），chit種人chiah ē-tàng得tio̍h上帝ê歡喜。
俊男[新郎]唱出chit種歌聲，講愛人ná親像長tī「刺phè裡ê一朵百合花」。這就非常有涵意了；因為刺phè原本是別人所無歡喜ê，m̄-koh，百合花卻是大家喜愛ê。Tī siōng難成長ê刺phè環境中，看tio̍h siōng純潔、súi ê百合花，這是jōa-ni̍h-á珍貴ah！性命mā是án-ne，tī siōng惡質ê環境中活出siōng美好ê性命力，chit種人就是無仝款。
這是少女[新娘]回應俊男[新郎]ê詩歌。
第3節，「我ê愛人tī男子中」tú好kah第2節ê「我ê愛人tī cha-bó͘-gín-á中」成對應。Cha-po͘人講cha-bó͘-gín-á是「刺phè裡ê一朵百合花」，而cha-bó͘-gín-á則o-ló cha-po͘人是「樹林內ê一叢蘋果樹」。蘋果是會發生香味ê果子。蘋果樹生做無koân，m̄-koh卻ē-tàng生出好koh香甜ê果子。不過咱知影tī巴勒斯坦是無蘋果樹ê，因為án-ne，如果有蘋果，則屬tī進口ê果子。Án-ne，它就是非常珍貴ê食品à。一般ê樹雖然chē、高大，m̄-koh，bē結出果子。少女[新娘]ê愛人（俊男[新郎]）ná親像一叢蘋果樹，遠比樹林中所有ê樹木iáu koh khah實在、突出。
第4節，「旗幟」，這原本是teh指軍隊ê意思。Tī chia表示teh向對方「示愛」ê意思。
第5節，chia提起葡萄乾kah蘋果，lóng是siōng好ê營養果子食品。
第6節，表示兩人ê疼已經進入不分離ê狀態。
第7節，「羚羊kah母鹿」lóng是象徵一種真有性命力、洋溢tio̍h歡喜ê對象。換句話講，詩人希望chit種ê愛情bē受tio̍h干涉攪擾，即使是siōng歡喜ê、siōng hō͘人phut-phut-tiô ê事來臨，mā m̄-thang因為án-ne受tio̍h攪擾。
信仰mā是án-ne，無tī外表ê壯觀，卻在tī實際發出香甜、thang口ê果子。真實ê信仰，會親像羚羊kah母鹿一般，發出極強ê性命力，thang排除誘惑ê來臨。
tùi第二章8節到第三章5節是第二首詩
經文：雅歌 2:8-2:15 註釋:
Chit段是少女[新娘]唱ê詩歌。
少女[新娘]「聽見了」伊熟悉ê聲音，而且是jú來jú接近。第9節續接第8節所講ê「羚羊」kah「母鹿」，chia看tio̍h ê是「小鹿」，mā teh說明新性命ê出世所發出ê歡喜聲音。In跳躍pôaⁿ過山嶺，正表明in性命之強。愛情就ná親像chiah-ê初生之犢，純潔無顧慮ê心，只為tio̍h探望心中所期待ê對象，thang排除所有ê障礙，ē-tàng翻山jú嶺，當來到愛別人ê窗口ê時，就是為tio̍h beh盡量講出心中渴慕ê話語。
第10節a句，伊聽見chit位疼伊ê愛人tùi門縫中teh呼叫伊。
Chit段是俊男[新郎]唱ê詩歌。
「起來！，親愛ê」，這是用非常溫柔ê呼hoah聲，ài少女[新娘]kah伊同行。
第11到12節，chit兩節指出巴勒斯坦ê寒天mā是雨季，春天大約是tī三、四月間。寒天一過，春天來臨，這mā是自然界性命力siōng旺盛ê時刻。無論tī甚麼所在，只要是春天ê季節，就是充滿tio̍h一片性命力，chia描述百花齊放、飛鳥齊鳴，特別是「斑鳩」，春天季節來到，就會tńg去。Tī以色列人民，這是in siōng期待ê Pôaⁿ過節活動期間。
第13節，chit節講「無花果開始成熟了」，比較khah正確ê講法應該是「無花果開出新ê葉á了」chiah-tio̍h。因為無花果ê果子成熟ê時，是tī六、七月間。巴勒斯坦ê春天是tī三、四月間，chit期間tú好是無花果發出新葉ê時chūn。「葡萄樹mā開花放香」，kā葡萄kah無花果樹連接來看，就會明白巴勒斯坦地區siōng出名ê兩種果子，lóng用來象徵以色列人民kah上帝之間親密關係ê特別記號。
第14節ê「粉鳥」，通常hông用來象徵「溫馴」、「和平」ê意思。Chit節形容少女[新娘]ê súi帶溫馴、柔kah ê性情，hō͘俊男[新郎]一下見tio̍h就傾心陶醉。
第15節提起「狐狸」，牠會搗毀葡萄園。這是時常發生tī巴勒斯坦ê現象，當地ê人通常會kā葡萄園用籬笆圍起來，就是為tio̍h防範狐狸ê侵襲。
經文：雅歌 2:16-3:5 註釋:
Chit段是少女[新娘]回應俊男[新郎]ê詩歌。
第二章16節，「我ê愛人是我ê，我是伊ê」，這就親像上帝kah以色列人民立約ê時所講ê：「我beh做lín ê上帝，lín beh做我ê子民。」（參考出埃及記六：7，利未記廿六：12，耶利米書七：23、十一：4、廿四：7、三十一：1、33，以西結書十四：11、三十四：31、三十六：28、三十七：27，撒迦利亞書八：8、十三：9）。形容二者之間是無法度分開ê親密關係。彼此相疼ê情人就是án-ne，性命ân-ân地結合做伙。人kah上帝之間ê關係ná親像án-ne，無法度分開，因為一旦分開，就會失去性命。人kah上帝之間立有「性命ê約」、「永遠ê約」，chit-ê約teh表明永遠bē分離。
第17節，這是一種迫切ê期待，ná親像teh ǹg望愛人tńg來hit-ê羚羊跳躍ê速度hit種快。
第三章1到4節，這是teh chhōe，行遍大街小巷，chhōe ê燒熱切之心，只要逢人必問，一直到chhōe-tio̍h了為止，就無koh放手hō͘伊離開。
第5節，tī第二章7節、第八章4節lóng出現過。Chhōe心愛ê情人，講出chit位痴情者ê心。無放棄，除非chhōe-tio̍h了chiah肯罷休。chit-má chhōe-tio̍h了，就無koh hō͘愛人離開，而且是帶入老母ê厝kah出世ê房間，chiah-ê lóng tī說明被接納成做厝內ê一員。
tùi第三章6節到第五章1節，是第三首詩歌
經文：雅歌 3:6-3:11 註釋:
大概是因為所羅門王結婚ê時chiah有ê排場，引起大家ê仰慕。Ná親像近代貴族á是王室ê成員結婚仝款，會引起許多年輕愛人ê學習。Mā隱喻tio̍h上帝kah以色列人民之間ê關係，ná親像婚姻，hit種親密kah愛，是thang用來向列國萬邦展寶ê。
Chit段詩歌講為tio̍h chit對愛人結婚，動用ê人力、所用ê香料，以及娶過程所出現ê排場，lóng tī說明這是一pái非常隆重ê婚禮。這tī偏僻ê鄉村是真少見ê，mā非常無容易。M̄-koh，為tio̍h表示非常重視chit pái ê婚禮，所以絕對無法度隨便，因為這是「性命ê約」。
第8節，代表去迎親ê，lóng是siōng勇猛ê戰士，日夜守護tio̍h隊伍ê安全。
第9節，「黎巴嫩木」，這是teh指香柏樹ê材質，是中東地區siōng珍貴ê木材。
第10節，chit節ê描述有án-ne用來載運約櫃ê車。「紫色」，這是聖經時代siōng-kài高貴ê布料。
第11節，所羅門王建造耶路撒冷聖殿，teh代表以色列人民完成了siōng大ê心願，kā約櫃移送入聖殿裡。
經文：雅歌 4:1-5:1 註釋:
這是一首形容少女[新娘]súi ê詩歌。差不多kā少女[新娘]ê面部kah胸坎lóng o-ló了，包括目睭、嘴齒、嘴唇、嘴舌、胸坎等。
第1節，提起少女[新娘]面部用面紗全部遮，m̄-koh頭毛ê秀長，ná親像一陣烏山羊蓋tòa整座山丘。
第2到3節，續接頭毛了後，chit兩節描述ê是少女[新娘]ê嘴唇kah伊ê面頰之美。
第4節，講少女[新娘]ê「頷頸像大衛ê高塔，圓直牢固」，這是非常特別ê形容，原來是teh指少女[新娘]ê頷頸上，掛tio̍h súi ê phōa鍊，phōa鍊上配tio̍h真chē裝飾品。詩人用它來形容ná親像勇士ê盾牌。
第5到7節，描述胸坎ê發展非常完美、對稱。Tùi面部到胸坎，lóng是完美無缺，hō͘人看tio̍h lóng會驚嘆。
第6節提起「沒藥山」kah「乳香岡」，並無chit種地名，真可能就是用來形容雙乳ê美。
第8節，「我ê少女[新娘]」，俊男[新郎]繼續唱出歌頌ê詩歌。Tùi第8節到第五章1節，一再重複chit句話。Chit節所提起ê山岳ê名，lóng是屬tī北部ê山脈。Chia有「獅、豹子」等野獸隱藏其間。
第9到11節，koh一pái表示少女[新娘]ê súi，勾引tòa俊男[新郎]ê心魂。Á第11節用來表示二者之間有親密關係。
第 12節，愛人是「一座關閉ê花園，kā低圍牆圍teh，泉源封鎖tio̍h」，意思是teh指愛人乃是非常貞潔ê，ná親像發見泉源ê水池一般ê寶貴，m̄ hō͘外人使用。
第15節為第13 到14節做siōng好ê詮釋。
第16節，chit節是少女[新娘]回應俊男[新郎]ê詩歌。伊用「北風」kah「南風」來形容kui片空氣中lóng「洋溢tio̍h芬芳」之氣，真正會hō͘人沉醉其中。
第五章1節，chit節是俊男[新郎]ê回應。「沒藥kah香料」、「蜜房kah蜂蜜」等，lóng是用來形容甜美、芬芳ê意思。
真正體會tio̍h信仰ê奧秘後，就ná親像發見性命甘泉一般ê美，它是性命ê泉源。當人得tio̍h性命甘泉ê時chūn，就會用盡所有ê方法kā它顧守tio̍h，m̄ hō͘這泉源流失，á是hō͘別人hō͘污染à。
經文：雅歌 5:2-5:8 註釋:
tùi第五章2節到第六章3節是第四首詩歌。
Tī chit段詩歌中，thang分做三個段落，一是第五章2到8節、二是第五章10到16節、三是第六章2到3節等等。Tī chit三段詩歌中，以第五章9節kah第六章1節做chit三段詩歌ê連結詩句。
五：2—8節，chit段詩歌thang對照第三章1到5節，lóng是論到俊男[新郎]「失蹤」。
第2節，這是真關鍵ê一節，因為chit節講「夢見愛人tī門外敲門」，因為án-ne一定tio̍h先清楚這是tī眠夢中，á是tī清醒ê實況中。困難ê所在是兩個可能lóng存在。當少女[新娘]準備入睡ê時，俊男[新郎]來到門外敲門，並且希望少女[新娘]起來開門hō͘伊進入厝內，伊ê頭毛已經因為露水濕透à。
第3到4節，伊無馬上起來開門，反tńg chhōe了真chē理由來推辭，其實chiah-ê理由並m̄是真實ê，只是家己lán-si得起來而已。Chit時，門中有隙縫，愛人tùi隙縫中「伸手入來」，這hō͘少女[新娘]ê「心跳無停」。
第5到6節，當少女[新娘]起來準備去開門，伊先塗上「沒藥」tī「雙手」上，為tio̍h beh hō͘心愛ê人ē-tàng tùi門縫中聞到香味。M̄-koh，就tī chit-ê時chūn，俊男[新郎]「已經行了」。伊chiah忽然感受tio̍h非常ê失落，而且非常緊張。就án-ne，上街去chhōe，m̄-koh「chhōe bē-tio̍h」；mā大聲叫伊，m̄-koh「聽無看tio̍h 回音」。
第7到8節，當去街á去chhōe ê時，夜間「巡邏ê守夜者」遇tio̍h了少女[新娘]，m̄-nā無同情協助，iáu「phah」伊，kā伊「phah傷」，可能是因為伊半暝上街，而且全身散發tio̍h沒藥ê香味，被誤會為阻街女郎，掠做是伊是出來chhōe cha-po͘人ê浪蕩cha-bó͘-gín-á。Chiah-ê人侮辱了伊，kā伊用來遮身ê「披肩」hō͘「奪行」。即使án-ne，伊iáu是四界去詢問，雖然tú-tio̍h阻礙，伊iáu是無停止。甚至因為chhōe愛人而病倒了，這thang看出伊對伊用情之深，以及需要ê迫切性。
想看māi甚麼時chūn，聖神來敲咱ê心門，而咱卻用真chē理由推辭，無願意起來開門？m̄-koh，當聖神離開咱ê時，咱chiah想tio̍h需要聖神tī咱ê性命中，hit時咱chiah趕緊起來，卻chhōe mā chhōe bē-tio̍h，四界去chhōe訪，mā無下落。有一幅圖畫是咱時常看tio̍h ê，he就是耶穌khiā tī門外敲門。啟示錄ê作者傳出聖神ê話án-ne講：「聽pah，我khiā tī門外敲門；若有人聽見我ê聲音而開門，我beh入去。我beh kah伊同齊食飯，伊mā tio̍h kah我同齊食飯。」（啟示錄三：20）
經文：雅歌 5:9-5:16 註釋:
五：9—16節，這是一段少女[新娘]teh歌頌俊男[新郎]ê詩歌。
第9節連結了前段kah chit段詩歌，第10節後面ê回答，tú好是chit段詩歌所提出ê問題。大家提出ê問題是少女[新娘]為甚麼beh冒hiah-ni̍h大ê險，夜間出來chhōe愛人？伊有甚麼「比別人ê koh khah好」ê mah？「伊有甚麼特別ê所在」，「值得」大家來協助伊chhōe？
第10到16節，chit段詩歌用盡所有súi ê詞彙，描述chit位俊男[新郎]ê帥、美、俊。
為tio̍h beh回答其他cha-bó͘-gín-á詢問伊所chhōe ê俊男[新郎]有甚麼好，ná親像本來俊男[新郎]teh講述少女[新娘]ê美貌仝款（參考四：1—7），chit位少女[新娘]teh回答ê時，mā是kā頭、頭毛、目睭、雙頰、嘴、嘴唇、雙手、身軀、雙腿、儀表等，tùi上到下lóng描述，而且每一個部分lóng搭配tio̍h貴重ê金銀珠寶、香料、花卉等。換句話講，kui個人ê每一部分lóng是值得o-ló ê所在。若beh稱得上完美，大概就是án-ne pah。
經文：雅歌 6:1-6:3 註釋:
大家一聽tio̍h chit位少女[新娘]描述伊ê愛人竟然是án-ne ê俊美，就想beh幫伊chhōe。
第1節，這是第二段詩歌kah chit段短詩ê連接句。大家lóng聽tio̍h這少女[新娘]描述伊ê cha-po͘人竟然是án-ne ê帥氣、俊美，大家lóng真想beh幫助chit位少女[新娘]chhōe-tio̍h伊ê愛人。因為án-ne，in問「伊往toh條路去」？
第2到3節，伊kah-ná已經知影了，原來伊ê愛人就tī「家己ê田園」，he是一個súi ê花園，tú好「盛開tio̍h鳳仙花」，而且mā有「百合花」到處綻開tio̍h，伊mā發見伊心愛ê人正tī hia「顧羊群」。
路加福音第廿三章38到43節，記載一位kah耶穌同時被釘十字架ê犯人，因為祈求耶穌「做王臨到ê時chūn」記念伊，而得tio̍h耶穌ê接納。耶穌因為án-ne對伊講：「今á日你tio̍h kah我同齊tī樂園裡。」chia講ê「樂園」，就是ná親像kah國王同齊tī花園散步、食飯ê所在。Chit位少女[新娘]回答其他ê cha-bó͘-gín-á，講伊ê愛人tīsúi ê花園。
tùi第六章4節到第八章4節，是第五首詩歌。
經文：雅歌 6:4-6:12 註釋:
chit段俊男[新郎]o-ló少女[新娘]ê詩歌，kah第四章1到7節所寫ê詩歌真接近。
第4節，「得撒」，這是古代迦南人ê一座城市，位tī撒馬利亞ê附近。當耶羅波安治理北國以色列期間，直到主前879年北國建lóng撒馬利亞chìn前，大約有五十年時間，得撒lóng是北國ê首都（參考列王記上十四：1—20、十六：8—26）。有豐沛ê水源，koh tī戰略位置上非常重要。Tī chia用來kah耶路撒冷相對稱，表示無論tùi tó一個角度看，lóng是非常美。
Chit節形容chit位cha-bó͘-gín-á像「林立ê軍旗hiah-ni̍h顯（hiáⁿ）目」，chit句話主要是teh講，chit位cha-bó͘-gín-á ê勇敢，家己一個人四界去chhōe俊男[新郎]，m̄驚tú-tio̍h危險kah困難，chit種信心、勇氣、智慧，雖是一個單身cha-bó͘-gín-á，其所發出來ê氣力，ná親像一支勇猛ê隊伍，出征ê時五彩繽紛ê軍旗飄揚tio̍h，甚至súi得hō͘人看了lóng會望旗生畏。
第5到7節，chia重複第四章1到3節ê詩歌。形容cha-bó͘-gín-á ê面貌之皎美，hō͘人看了lóng會心慌意亂，既無法度移開目睭，koh無法度隱藏心中ê疼意、渴慕。
第8到9節，第8節是真oh解說ê經文，因為chia講「君王有六十王后八十妃嬪」，這到底是teh指甚麼，無法度明白。有ê講是所羅門王內宮王后妃嬪ê數目。M̄-koh，所羅門王所有ê數目koh khah chē（參考列王記上十一：3）。無論數目án怎，kah第9節對照來看，就會明白chit位俊男[新郎]心中ê意思，只要有一位賢慧、美好ê cha-bó͘-gín-á，贏過千百ê宮女、妃嬪，伊講只愛chit位少女[新娘]（參考箴言三十一：29）。
第10節，chit節ê詩句通常lóng會被用來形容老母ê美、慈愛。月娘用來表示寧靜、安詳；日頭用來形容亮麗、光芒。
第11到12節，俊男[新郎]進入這充滿tio̍h果子樹ê súi花園裡，渴望少女[新娘]會跟tòe入來，ná親像進入伊ê心田。
經文：雅歌 6:13-7:9 註釋:
這是一段跳舞ê詩歌。Thang án-ne了解：有愛ê所在，就有詩歌；有詩歌ê所在，就有舞蹈、跳躍，表示興奮、滿足。Chit種慶祝ê方式，就成做今á日中東地區婚禮中ê景象，少女[新娘]tī婚宴中，伊跳舞會成做siōng重要ê中心角色。
第13節，甚麼人是「書拉蜜」ê cha-bó͘-gín-á？有可能是teh指所羅門之cha-bó͘-gín-á。不過mā有可能是teh指「書念」（參考撒母耳記上廿八：4）ê cha-bó͘-gín-á。chit-má大家lóng同齊跳舞，m̄-koh lóng會kā焦點khǹg tī少女[新娘]ê身上，因為伊是所有cha-bó͘-gín-á中siōng-kài súi ê一個。
第七章1到9節，chit段詩歌仝款是teh o-ló cha-bó͘-gín-á súi動人，ná親像前述幾段teh歌頌少女[新娘]ê súi仝款。M̄-koh chia無仝ê是，chit首詩歌採用ê譬喻是：酒杯、美酒、百合花、小鹿、羚羊、象牙塔、水池、塔、山、棕樹、葡萄等物件。
第4節，「希實本」，頭前講這súi ê cha-bó͘-gín-á ê目睭像粉鳥ê目睭一般（參考四：1、五：12），chit-má soah講是親像「希實本城ê水池」。希實本，這是泉水豐富ê城市， bat是亞摩利王西宏ê首都（參考民數記廿一：26）。Chia用「水池」，指ê m̄是水泉，卻是水池，意思是該cha-bó͘-gín-á有水汪汪ê目睭。有含súi、寧靜ê意思。「黎巴嫩塔」，這是teh指黎巴嫩ê高山ê意思。
第5節，「迦密山」，這是巴勒斯坦北部唯一ê高山，在地中海邊。以色列文學傳統上lóngài用迦密山來譬喻高高在上、俯視一切。
第6到9節，形容cha-bó͘-gín-á ê súi，真自然tek就會hō͘人陶醉。
「棕樹」，以色列文學上ài用棕樹teh代表性命力旺盛、chē產（參考詩篇九十二：13—15）。然後串串葡萄、蘋果ê芬芳，加上葡萄釀成ê美酒，真是hō͘人陶醉。
經文：雅歌 7:10-8:4 註釋:
chit段是敘述雙方已經結合，而且已經達tio̍h siōng愛ê境界，因為án-ne，in相招到thang互相盡量講出愛情心意之地。
第10節一開始，女方表達得真清楚：伊屬tī對方，而對方mā屬tī伊。彼此相屬，無koh有分離。Chit種句型mā有含立約ê意思，就親像上帝kah以色列人民ê約。Tī chia用「戀慕」，chit-ê字mā出現tī創世記第三章16節ê「慾望」一字，是仝款ê意思。
第11到13節，tī彼此相疼ê時chūn，即使是野外（第11節ê「鄉村」），mā thang看tio̍h上帝創造ê美，包括各種果子、野花，lóng會發生撲鼻而來ê香味。顛倒，如果是彼此相恨，即使是tòa tī高貴ê別莊，kah花團錦簇ê園內，mā會感覺惡臭難聞。夫妻之間ê關係án-ne，兄弟姊妹之間ê親情mā是án-ne，tī教會內信徒彼此之間ê關係mā不例外。
第八章1到4節，這是一段cha-bó͘-gín-á tī心中暗自teh唱，m̄-koh bē-tàng流露出來ê愛慕詩歌。因為早期中東社會，若有cha-bó͘-gín-á公開表示對cha-po͘人（即使是家己ê愛人）ê愛慕，lóng會hō͘人認為是不正經ê cha-bó͘-gín-á，嚴重ê時會hō͘懲罰。因為án-ne，chia用ná親像同生兄妹仝款ê親密關係，án-ne，公開tī眾人面前相約，mā bē hō͘人看出來。同進厝內，甚至相攬，mā無人會追來偷窺。
經文：雅歌 8:5-8:14 註釋:
tùi第八章5節到14節，是雅歌最後一首詩歌。
tī頭前少女[新娘]bat請求耶路撒冷cha-bó͘-gín-á協助chhōe伊心愛ê cha-po͘人（參考五：8—9），chit-má tńg來ê時，手邊是牽tio̍h俊美ê cha-po͘人，因為án-ne引起chiah-ê cha-bó͘-gín-á ê羨慕。
第5節，chia提起tī蘋果樹下，老母臨盆忍痛生gín-á，chit款tāi-chì tī早期ê社會真有可能發生，尤其是tī游牧社會koh khah是常見，而tī農業社會裡mā m̄是新鮮事。因為農務無閒ê時，即使是有娠ê婦女mā得外出田野工作。因為án-ne，tī chit孕育性命ê所在盡量講出愛情，á是定落來終身互相óa靠ê關係是非常有意義ê。
第6到7節，chit兩節lóng teh講述愛情ê氣力，贏過任何一切，thang lóng無障礙來散發出性命ê氣力。
第8到9節，chit兩節是少女[新娘]ê厝內人提出ê意見，講tio̍h in心中ê掛慮，以年紀輕來表示in對這門親事ê憂心。M̄-koh，隨時有少女[新娘]對家己終身大事ê主見。
Chia用「雙乳」ê成熟來表示gín-á是m̄是已經長大。Tī台灣民間mā有chit種俗語，是用「凸肚臍」來表示。如果一個cha-po͘-gín-á被形容iáu未「凸肚臍」，he表示chit-ê cha-po͘-gín-á iáu軟chiáⁿ，無適合擔當重大ê責任，á是成立家庭。
第10節，chit節則清楚表示：cha-bó͘-gín-á已經成熟，伊家己ē-tàng獨當一面，無問題。伊hō͘父母安心，mā hō͘厝內人知影伊ê決定是正確ê。
第11到12節，chit兩節是真無對tâng ê經文，無清楚為甚麼會出現tī chia。真可能因為有「所羅門」chit-ê名ê關係pah，因為雅歌一直hō͘人認為是所羅門寫ê。不過，頭前已經講過不盡然是án-ne。Chit兩節主要teh表示財富非常大，大到租耕此園地ê人需繳納租金高達一千銀á。「m̄-koh我擁有我家己ê葡萄園」，是teh指少女[新娘]ài俊男[新郎]耕耘ê葡萄園。換句話講，只要有伊所疼ê cha-bó͘-gín-á，其他即使koh再好、koh再高貴，伊mā不希罕。這充分說明真實愛情ê可貴kah意義à。
第13節，俊男[新郎]tī園中對少女[新娘]講，ài伊公開宣告對伊ê疼，hō͘所有來參加婚禮ê人lóng聽得見。就ná親像在婚禮中ê誓約仝款。
第14節，少女[新娘]ê回應，beh kah俊男[新郎]同遊tī山嶺各地。表明無論jōa-ni̍h-á oh行ê山路，mā會因為攜手同行而充滿性命ê歡喜，像羚羊、小鹿奔跳tī山phiāⁿ仝款。
重新查詢