重新查詢
經文:

箴言 1:1-1:6

註釋:

Chit章thang分做兩個部分來看,一是第1到19節,chia是先紹介chit本箴言ê作者,續落來就是kā少年人講tio̍h聽chiah-ê箴言。二是第20到33節,這部分先說明智慧ê重要性,因為智慧就是代表認bat上帝。續落來講只有愚戇ê人輕視、不尊重智慧。

Chit段經文開始就說明chit本經冊是「箴言」,它ê功效是會hō͘ 讀者得tio̍h智慧。

第1節,chia開始就講這是「以色列王所羅門ê箴言」,m̄-koh實際上是m̄是真正是所羅門ê作品,bē少聖經學者採取保留ê態度。只是因為所羅門王hông稱做是「智慧ê君王」,因為án-ne,有kóa並m̄是屬tī所羅門王ê作品,mā被歸類tī所羅門王ê名下。親像第廿二章17節到第廿四章34節、第三十章、第三十一章等。

所羅門王之所以hō͘人認為是siōng有智慧ê君王,列王記上第三章以伊向上帝祈求賞賜智慧hō͘伊,並用一則「審斷疑難案件」為例,說明伊確實是tùi上帝得tio̍h非常特別ê「智慧」,連遠tī非洲ê「示巴女王」都慕名而晉見伊(參考列王記上十:1—13),列王記ê作者甚至講伊比「世間任何一國ê君王koh khah富有,koh khah聰明。全世界ê人lóng想覲見所羅門,beh聽上帝賜hō͘伊ê智慧ê話」(參考列王記上十:23—24)。

第2節,chia講本經冊ê「箴言」會hō͘ 讀者認bat「智慧kah訓誨」。「智慧」一詞是chit本經冊siōng重要ê詞字,chit本經冊mā lóng是用chit-ê詞為基礎,總共出現四十一pái,可見編者ê用意,是希望讀者ē-tàng因chit本冊koh khah有「智慧」。

第3到6節,chit段經文說明「智慧」ê功用,ē-tàng hō͘人「過明智ê生活」,表示chiah-ê智慧是thang應用tī日常生活中,hō͘人知影怎樣過誠實ê生活,作一個「公正、正直ê人」。Bē致使成做「無知ê人」,而且ē-tàng幫助少年人「處事有方」,而且ē-tàng「增長學問」,而且「hō͘明達ê人得tio̍h開導」。「開導」一詞是teh指掌握方向舵,知影航行ê方向。換句話講,一個有智慧ê人,伊會擇善固執行tī正確ê道路上。

「無知」一詞mā是箴言chit本經冊中非常重要ê詞字,出現chē kah十五次。「無知」是teh指「愚戇」、容易「受誘惑」ê意思。

經文:

箴言 1:7-1:19

註釋:

Chit段經文主要是用「訓誨」為主軸,teh強調智慧ê功能,除了thang培養好ê品格外,也ē-tàng因為án-ne幫助koh khah chē人學習,進一步koh建構kui個社會穩定ê氣力。

第7節,chit節thang參考第九章10節,mā是chit本經冊siōng重要ê經節之一。

Chit節ê「敬畏上主」kah「愚戇ê人」相對照。Chia所講ê「敬畏上主」一詞,tī chit本經冊中一再出現,chē kah十五次(參考一:7、29、二:5、八:13、九:10、十:27、十四:2、26、27、十五:16、33、十六:6、十九:23、廿二:4、廿三:17)。Chit句「敬畏上主」mā ē-sái講是kui本聖經ê主旨,特別tī舊約律法冊、先知書等文獻中,「敬畏上主」是中心內容。所謂「敬畏上主」,就是beh用聖潔ê心敬拜上帝。Koh講,一定tio̍h忠實遵守上帝所有ê誡命kah教示。作者講「敬畏上主」乃是一個人得tio̍h「智慧」ê第一步,á是基本要素。

    相對tī「智慧」則「愚戇」;chit-ê詞有「遲鈍」、「固執」ê意思,mā指「無敬畏之心」ê態度(參考一:29)。Chit種人討厭知識(參考一:22),喜愛「冤家」(參考二十:3)。

第8到9節,tī第8到19節ê chit段經文中thang分做三個段落,lóng是用「少年人」chit-ê詞作為區分,來講述聽從智慧之語ê重要性。Tùi第9節開始,作者開始以「智慧」ê話語勸勉,ná親像父母teh勸誡子女仝款。Tī猶太人ê社會,老母扮演「教師」ê角色,m̄-nā是宗教教育,而且有家庭生活ê教導。因為án-ne,chiah-ê教導mā就是第8節所提起ê「訓誨」ê意思。Chia講bē-tàng bē記得老母ê教導,因為bē記得kah棄絕學習是仝款ê愚戇。Á第9節ê「華冠」,可能是teh指cha-bó͘-gín-á包頭用ê巾,tī中東地帶,無戴頭巾ê cha-bó͘-gín-á是非常無禮貌ê,mā表示伊ê身分真低賤、粗俗。

第10到15節,chit段經文說明有智慧ê人,會接受父母ê教導kah訓誨。Chit種少年人即使有同伴誘惑伊去做敗壞社會道德、倫理ê事,伊mā會斷然拒絕。Chit段經文講chit種誘惑就是「勾引」人去「刣」á是傷害「無辜ê人」,而且ē-tàng因為án-ne而「得tio̍h各種財物」,有智慧ê人絕對bē去做chit種傷天害理ê事,而且會「遠遠避開」有chit種惡質行踏ê人。

    第16到19節,chit段經文真清楚說明一心一意想beh傷害別人ê人,最後kan-taⁿ會陷落tī家己所「張下」ê「羅網」,而「害死家己」,甚至因為án-ne「喪命」,一點幫助mā無。

經文:

箴言 1:20-1:33

註釋:

相對tī頭前一段講述聰明ê人會接受有智慧ê父母之教導、訓誨。Á chit段經文就是提起「愚戇ê人」必定會tú-tio̍h ê災難。這mā說明箴言真清楚ê一個基本信念基礎:善有善報,惡有惡報。

Chit段經文主要teh說明愚戇ê人—藐視智慧ê人、m̄敬畏上主ê人—就是「偏行己路」,不聽從上帝ê教示(參考詩篇第一篇),最後會因為愚戇而自食惡果。

    第20到21節,chia一開始講「智慧tī街市kah廣場上呼喚」,chit種筆法mā是希伯來文學ê特色,ài用「擬人化」ê方式表達某一kóa思想、觀念,chit段就是kā「智慧」hō͘ in「擬人化」,ná親像第九章1到12節。

另外一個真有意思ê所在,是chia ê「智慧」一詞,tī希伯來文是用「陰性」名詞,表示ná親像老母teh諄諄教導家己ê子女仝款,告誡家己ê kiáⁿ一定tio̍h嚴守規律,bē-tàng違抗。

「街市kah廣場」kah「城門邊kah人群真kheh ê所在」等詞句,其意思lóng仝款,mā就是teh指公眾出入繁多ê場所。

    第22到25節,chit節說明愚戇ê人ê特性,就是心硬,聽bē落去智慧之言ê勸勉,in siōng大ê特點就是「輕蔑知識」。Chit種人無論甚麼人「呼喚」伊,伊lóng是「m̄聽」,m̄-nā án-ne,而且是連chhap都「m̄-chhap」,拒絕智者ê「糾正」。

    第26到32節,chit段經文描述拒絕智者之勸勉、糾正ê愚戇者,mā就是「一向無ài知識,mām̄敬畏上主」ê人,到最後必定會「遭遇不幸」,伊是hō͘家己ê惡質行踏所傷害,bē-tàng怪別人。

	第33節,相對頂面所講ê愚戇人,就是所謂智慧ê人,chit種人會聽從智慧ê呼籲並學習智者ê教導,伊必定有安全ê日子,而且會「享受康寧,m̄驚災害」臨身。

經文:

箴言 2:1-2:22

註釋:

Chit章mā是繼續teh頌讚智慧ê珍貴,以及智慧所散發出來ê氣力,夠額抵擋生活中所tú-tio̍h ê各種誘惑。

第1到8節,chia真清楚講智慧m̄是生成ê,卻是需要經過「追求」,學習明白「領悟」,而且chit種熱情tio̍h像teh「走chhōe銀á仝款熱心」,á是親像「搜索寶藏仝款認真」,chiah ē-tàng得tio̍h真正智慧(有時作者會用「知識」代替)。

Chia作者koh一pái強調「敬畏上主」等同tī智慧。因為上主就是智慧ê泉源。注意第6節所提起ê,作者講「賜智慧ê是上帝,知識kah悟性」lóng是tùi上帝賞賜而得tio̍h。Chit種智慧ē-tàng hō͘人知影「公義」ê重要性。Ná親像所羅門王得智慧,就是tùi上帝來ê賞賜,並m̄是伊原本就有。Chit種敬畏上帝ê人,必定是「正直」、「誠實」、「公道」,而且會對上帝絕對「忠誠」,chit種人chiah會得tio̍h上帝伸手幫助。

第9到15節,chit段經文提出會聽從智慧引chhōa ê人,kah拒絕chit種tùi敬畏上帝而得tio̍h智慧ê人,二者之間是完全無仝。前者會知影「誠實、公正、正直」ê重要性,而且會永遠堅守。Án-ne,做起事來就bē有錯誤。相對ê,後者就是所講ê愚戇者,kan-taⁿ會逞「嘴舌」之快而惹起真chē「是非」,chit種人mā是siōng會「棄sak正道」、「歡喜作惡」,而且是用「邪惡為樂、行彎曲道路」,chit種人是「bē-tàng信賴ê人」。

第16到22節,chit段經文繼續描述有智慧ê人顯示出來ê樣式,就是kah眾無仝。Chit種智者會抗拒siōng gâu用「甜言蜜語勾引」cha-po͘人ê cha-bó͘人,愚戇ê人chiah會行入chit種cha-bó͘人ê陷阱中,作者認為這「無異行上死路」,必定有去無tńg來。上帝一定會「剷除」chit種「作惡ê人,像拔草仝款」kā chit種罪人「除滅」。

經文:

箴言 3:1-3:12

註釋:

Chit章thang分做兩個段落來看,第一是tùi第1到12節,chit段落是一篇講章,勸勉少年ê一代,tio̍h會記得信靠上帝,卻m̄是óa靠家己。因為上帝是智慧ê泉源,óa靠祂,就會得tio̍h智慧,chit種智慧就是性命ê氣力。第二段落是tùi第13到35節,chit段經文包含兩首詩歌,第一首是tùi第13到18節,第二首是第19到20節,這兩首詩歌lóng是teh歌頌智慧ê美妙,得tio̍h智慧就是有福氣ê人。最後是第21到35節chit段經文,講述智慧kah愚戇者之間ê差別。Chit種以智者kah愚戇者ê對照來描述ê筆法,mā是箴言chit本經冊ê特色。

Chit段經文koh一pái強調「敬畏上主」chit-ê主題,作者khah強調人ê軟弱kah有限。因為án-ne,óa靠上帝ê人chiah會知影敬畏上帝ê重要性。

第1到4節,chit段經文mā是勸勉少年人,一定會聽從智慧ê話,beh kā智慧ê話語謹記在心中,ná親像「繫tī頷頸上」仝款,隨時lóng會看會tio̍h。Chit種要求ná親像申命記第六章4到9節,要求以色列人民kā上帝ê話mā是án-ne牢記tī心。M̄-nā對人tio̍h「忠誠信實」,對上帝mā仝款。對上帝忠實,等於是嚴守祂ê教示,chit種人就是有智慧者。

第5到8節,chit三節經文真清楚說明óa靠上帝ê重要性。人是軟弱而且有限ê,無論tī各方面lóng仝款,因為án-ne,只有「以上主ê旨意為根據」,chit種人chiah會tī上帝ê引chhōa下「行正路」,有力量「拒絕作惡」,而且ná親像得tio̍h良藥ê醫一般。

第9到12節講beh kā「田地ê siōng好產品獻hō͘上主,表示對伊ê尊崇」,意思就是「敬畏上主」ê意思。Mā就是一個真正有智慧ê人,伊必定會知影並m̄是家己有甚麼能力,因為人ê聰明才智lóng是tùi上帝來ê賞賜。Á chit種人必定會得tio̍h koh khah chē上帝ê賞賜,意思是jú óa靠上帝,所得tio̍h只有koh khah chē ê賞賜。

經文:

箴言 3:13-3:20

註釋:

Chit段經文是兩首詩歌,一是第13到18節,這是一首歌頌智慧ê詩歌,以「有福」開始,mā以「有福」結束。Chit首詩歌中,thang看出金銀財寶,lóng遠不如智慧來得貴重。因為有智慧就ē-tàng得tio̍h koh khah chē ê金銀財寶。二是第19到20節,這是另外一首詩歌,是一首四行詩,說明看tio̍h上帝ê創造,就知影智慧ê美妙。

第13到18節,chia提起chhōe-tio̍h智慧ê人,是真正有福ê人。因為智慧就是珍貴ê寶藏,而且是贏過「精金」、「珠寶」,kah任何人看做貴重ê物件。而且智慧會hō͘人「長壽」koh過「愉快ê生活」,這差不多就是每一個人所走chhōe ê。

第19到20節,這是另外一首詩歌。Chit首詩歌teh歌頌上帝ê智慧,創造kui個宇宙萬物。這真清楚teh表明:人若是想beh生活tī chiah-ê世界上,一定tio̍h tńg來到上帝面前,chiah有辦法知影性命ê意義。因為上帝就是創造性命ê主宰。

經文:

箴言 3:21-3:35

註釋:

Chit段經文thang分做兩段落,一是第21到26節,chit段經文講述智慧帶hō͘人ê性命有力量kah喜樂。二是第27到35節,說明一個真正有智慧ê人,會知影行善ê重要性,mā知影上帝痛恨對邪惡ê tāi-chì。

第21到26節,chit段經文作者講beh守tiâu智慧,不beh hō͘智慧tùi性命中「溜行」,因為智慧chiah ē-tàng hō͘人心安理得,thang坦然無驚惶ê生活。上帝會保守chit種人免tī ka-la̍uh tī邪惡者ê「羅網」中而到傷害。

第27到35節,chit段經文提起有智慧ê人,mā是真樂意伸手幫助人ê人。Chit種人tī社會生活上,必定會盡帆拚盡到應該有ê責任,絕對bē藉故推託。M̄-nā án-ne,有智慧ê人會知影怎樣kah左鄰右舍成做好朋友。Chit種人必定會得tio̍h上帝ê賜福,有美好ê「榮譽」。

另外一方面,chit段經文mā提起愚戇ê邪惡者,kan-taⁿ會「強暴」人,chit種人kan-taⁿ會受tio̍h上帝ê討厭kah「詛咒」,「招來koh khah chē ê恥辱」,kah chit種人做伙是lóng無益處。因為án-ne,彌迦書第六章8節講beh「kah上帝同行」。

經文:

箴言 4:1-4:9

註釋:

Chit章mā是仝款強調智慧ê重要性,特別是智慧會影響人對性命ê選擇。Chit章分做三個段落,一是第1到9節,二是第10到19節,三是第20到27節等等。

Chit段經文ná親像家訓仝款,ná親像父母teh教導gín-á怎樣生活,á是怎樣豐富家己ê性命。Chia提起智慧ê益處,除了thang得tio̍h豐富ê性命,iáu thang保守性命,hō͘伊tī危急中bē致使措手不及。智慧mā thang幫助一個人加添見識,並且tī社會上得tio̍h尊榮。

第1到2節,chia所講ê「老父」並無一定是teh指生養ê父母,而可能是teh指學校裡ê老師,á是傳授性命經歷ê資深長輩。「專心領受」就會「記tiâu」,這表示需要注意聽,只有án-ne chiah會明白智慧ê奧秘。

第3節,「當我iáu是一個細漢gín-á」,這是用長輩ê身分kah少年人分享家己過去成長ê經歷。「是我父母疼ê獨生kiáⁿ」,chit句話表示chit位長輩所得tio̍h ê智慧lóng是siōng珍貴ê。

第4到5節,「訓誡」表示性命ê經歷所帶來ê教導,而chiah-ê教導會幫助性命活得koh khah「豐富」。因為án-ne,ài少年人一定「bē-tàng bē記得á是忽略」。

第6到9節,chia勸勉少年人一定會守tiâu智慧,因為智慧帶有「護衛」性命ê氣力。Tio̍h用「所有ê一切來換」智慧,只有án-ne,性命chiah會得tio̍h「尊榮」。「尊榮」是teh指tī公共場合lóng受讚譽。因為án-ne,tio̍h「珍惜」智慧。

經文:

箴言 4:10-4:19

註釋:

Chit段經文講ná親像一個人行到十字路口ê時,一定tio̍h做出選擇。有智慧ê人,伊所選擇ê是通往性命之道(曙光);愚戇ê人選擇ê道路是死亡(暗夜)。Koh khah thang悲ê是,愚戇人甚至m̄知家己tú-teh邁向死亡。

第10到13節,chia所講ê「延年益壽」,chit-ê詞mā表示豐富ê性命,hō͘人活teh ê每一工lóng感覺飽足ê意思。Á chit種人,就是行tī「人生正確ê途徑」上,bē浪費性命,á是行到途中卻「跋倒」,又ài重新koh來。因為智慧kah「性命」仝款珍貴,有智慧hō͘性命豐富,hō͘人每一工lóng充滿活力。

第14到17節,chit段經文講述「pháiⁿ人」ê特性。所謂「pháiⁿ人」就是teh指「邪惡者」。Chia是teh指拒絕接受智慧勸勉ê人,mā ē-sái講是愚戇ê人。絕對無法度學習chit種人ê惡行,因為in kan-taⁿ會做「pháiⁿ事」、「害人」,而且手段「殘暴」。

第18到19節,chit兩節是對應句,「義人」所顯示出來ê就「像天光ê曙光,jú來jú明亮」,這表示性命jú來jú有活力。Á「pháiⁿ人」ê性命,會jú來jú「烏暗」,連家己怎樣「跋倒」lóng m̄知道。

經文:

箴言 4:20-4:27

註釋:

Chit段是繼續頭前一段,teh選擇正確ê道路上,一定tio̍h堅持,而智慧ê特色就是用「誠實、無講白賊」為基礎。顛倒,就是邪惡ê道路。

第20到22節,koh一pái勸勉少年人tio̍h「聽從」智慧ê「教示」,kā它「銘刻tī心」,án-ne就永遠bē bē記得。

第23節,chia ê「所思所想」,kah人ê心有密切關係。Á人ê行為態度就是會展現人ê心靈ê動向。

第24到25節,「誠實」代表性命ê態度。Mā只有「以誠信ê態度正視頭前」,chit種人會扛頭挺胸,bē垂頭喪氣,ná親像失敗者仝款。

第26到27節,決定不跟tòe「邪惡」行,這thang朝ǹg既定ê「計畫」完成所ài做ê事,án-ne就bē出「差錯」。絕對bē-tàng「離開正路一步」,án-ne chiah是智慧者應有ê堅持。

經文:

箴言 5:1-5:23

註釋:

Chit章koh一pái提起淫婦ê誘惑對人ê性命所造成ê苦難,大大超過人所ē-tàng承受ê。Tī第二章16到19節已經有提起過,chia則koh khah強調淫婦ê敗壞力量。

    第1到2節,chia ê「言語」相對tī第3節所講ê「嘴唇」。換句話,有智慧ê人,講話必定會小心謹慎,真真誠。

    第3到6節,別人ê bó͘會用甜言蜜語來誘惑,mā teh表示hit-ê cha-bó͘人ná親像淫婦一般,kan-taⁿ會帶hō͘親近伊ê人「痛苦」、「悲哀」,甚至是hō͘人行向「死亡ê境地」kah「陰間」ê道路,因為án-ne ài beh特別小心遠離chit種cha-bó͘人。

Tùi第7節開始,到第14節ê chit段經文,lóng是談及接近淫蕩ê cha-bó͘人,必為家己帶來禍害,bē有任何益處。

第7到9節,koh一pái提醒人tio̍h遠離淫婦,甚至連經過「伊家ê門口」siōng好lóng tio̍h避免,因為chit種cha-bó͘人ê背後lóng有「無賴ê手」teh撐腰,真危險。若無遠離chit種淫蕩ê婦人,kan-taⁿ會hō͘家己ê「榮譽」喪失。

第10到11節,koh khah強調如果無小心ka-la̍uh到chit種cha-bó͘人ê陷阱中,必定會是真悽慘,終生勞碌ê結果lóng會付之一炬,甚至到臨終ê時iáu會痛苦到「haiⁿ-haiⁿ叫無停」,he會是真悲哀ê事。

第12到14節,hit時chiah來懊悔講無聽從智慧者ê勸導,為ê時已晚。

    Tùi第15節到第23節ê經文,tú好kah第7到14節ê內容呈現對比。

    第15到17節,相對tī淫婦á是「生份ê cha-bó͘人」,經文中強調tio̍h對家己ê「bó͘忠實,專心愛伊」。Kah家己bó͘所生ê子女chiah會真實,相對ê,kah「別ê cha-bó͘人所生ê gín-á」只有增加負擔,無任何「好處」。

    第18到19節,chit兩節提起對家己ê bó͘忠實chiah是真實。特別是第19節ê用詞,lóng thang tùi雅歌chit本經冊中看tio̍h。第19節講家己ê bó͘像「母鹿」,這「母鹿」通常是形容súi、可愛ê意思。

	第20到23節,chit段經文koh一pái提醒少年人,m̄-thang迷戀別人ê bó͘,á是別ê cha-bó͘-gín-á,只要teh疼家己ê bó͘,因為上帝teh看每一個人所做所為。只有愚戇ê人chiah會因為「無法度自制而喪命」。

經文:

箴言 6:1-6:19

註釋:

Chit章thang分做兩段,其一是第1到19節,二是第20到35節。Tī第一段落真明顯kah頭前第五章kah第七章ê內容不連貫。尤其是chit段第1到19節ê內容,包括第1到5節ê替人作保ê tāi-chì,而第二段落是第6到11節ê講tio̍h有關勤奮kah pîn-tōaⁿ ê問題,以及第三段落講tio̍h有關hō͘人討厭ê事等,ē-tàng看出並m̄是真有系統地論述某種議題。

Ná親像頭前談及ê,chit段經文包含三個題目:一是有關作保ê事,二是講tio̍h pîn-tōaⁿ kah勤奮之間ê差別結果,三是上帝所無歡喜ê事。

第1到5節,chit段經文嚴厲警告m̄-thang隨便替別人「作保」,chia ê「作保」一詞,是teh指替別人承擔債務ê意思(參考廿二:26—27)。為人作保是一定tio̍h負擔律法責任,若m̄是真清楚知影kui個緣由,以及家己ê能力有jōa-chē,就可能因為替人作保而為家己帶來災難,m̄是致使sàn-chhiah,就是hō͘家己反而成做奴隸(參考二十:16)。作者續落來用自然界中ê動物為例,伊講若是發見家己因為替人擔保而面臨chit種危險ê時,就一定tio̍h「像鳥á掙脫羅網,親像鹿逃出獵人ê手」,當做一種逃離性命危險ê陷阱仝款,拚命設法掙脫,免得受害。

第6到8節,作者則用螞蟻為題材,勸勉人tio̍h像螞蟻仝款地殷勤工作。螞蟻雖然是所有動物中非常渺小ê昆蟲之一,m̄-koh卻知影「tī熱天儲備糧食,準備過冬」,án-ne就ē-tàng避免sàn-chhiah、iau餓ê威脅。

第9到11節,相對tī螞蟻ê殷勤,就是「pîn-tōaⁿ ê人」。In只知影「睏重眠」,而且會chhōe出真chē理由來合理化家己ê pîn-tōaⁿ。因為án-ne,對in來講「sàn-chhiah會親像強盜打擊」來臨,「缺乏會親像帶武器ê匪類攻擊」臨身,結果in會一貧如洗,當寒冬來臨ê時,in必定會飢寒交迫,致使性命危險。

第12到15節,講tio̍h一個歡喜賣弄唇舌ê「無賴」,in ê特長就是「四界講白賊」,為tio̍h是beh欺騙。特別是in常常故意挑撥是非,引發真chē衝突、紛爭,m̄-koh最後就是hō͘家己tam-tio̍h災禍,致使性命受tio̍h「傷害」。

第16到19節,chia列出七項上帝所無歡喜ê行為,lóng是kah目睭、嘴舌、手、心、腿、意念、言語等有關。Chiah-ê原本是beh用來o-ló上帝ê慈愛,chit-má卻hō͘人用來當做對敵上帝ê工具,mā就是人誤用了上帝ê創造kah愛,chit種人乃是上帝所恨惡ê。

經文:

箴言 6:20-6:35

註釋:

Koh一pái提醒tio̍h預防淫婦帶來ê災害。仝款ê題材tī第二章16到19節、第五章3到11節、第七章,以及第九章13到18節等等處經文lóng有提起。

第20到23節,chit段經文強調人一定tio̍h kā智慧ê教導當做珍貴ê phōa鍊一般「繫tī頷頸上」,「銘刻tī心」,án-ne就永遠bē bē記得。而且這智慧ê教導會ná親像「亮光」仝款,指引tio̍h「人生ê道路」。

第24到26節,chit種kah性命有關ê智慧,會幫人「遠避蕩婦」,以及「別人bó͘ ê甜言蜜語」ê誘惑、勾引,hō͘家己掉落tī陷阱中而無法度脫離。而且召妓女ê代價khah低,kan-taⁿ需「一塊麵包ê代價,m̄-koh kah「有夫之婦通姦」甚至可能需要付上性命ê代價。Chit-ê意思真清楚,就是絕對bē-tàng kah有夫之婦有染。

    第27到28節,chit兩節lóng teh表示一點:通姦、淫亂ê行為,就ná親像在sńg火仝款,絕對會hō͘家己受傷。

	第29到35節,chit段經文koh khah清楚講述,kah別人bó͘通姦ê結果,是受tio̍h koh khah殘酷ê報復,是teh「毀滅家己」。

第30到31節提起偷the̍h ê行為當然bē hō͘人允准,hō͘人掠tio̍h就beh賠償「七倍」,這等於是「Kā家己所有ê lóng賠出來」,其實根據摩西律法,賠償cheng-seⁿ siōng chē mā不過是「五倍」,chia卻講盜賊tio̍h賠「七倍」,這是一種象徵性ê講法,因為「七」teh表示圓滿、周到、齊全。意思用來表示懲罰真嚴重。M̄-koh相對tī所講ê通姦、姦淫會受tio̍h ê懲罰則koh khah嚴重,明明是連命lóng tio̍h賠上去。

經文:

箴言 7:1-7:27

註釋:

Chit章koh一pái提起tio̍h嚴禁淫亂ê事發生。Tī舊約聖經先知ê文獻中,kā以色列人民kah上帝之間ê關係,以夫妻ê親密關係做譬喻,先知呼籲以色列人民一定tio̍h對上帝忠實,因為上帝就是in ê丈夫,以色列人民ná親像上帝ê bó͘。因為án-ne,提起淫亂ê時chūn,就是有含對上帝無忠實ê意思。Tī摩西ê律法中,特別是十誡ê第七誡就非常清楚講「m̄-thang姦淫」(參考出埃及記二十:14),因為姦淫就是無清氣,án-ne就無法度以真實ê心敬拜上帝。Koh講,當時迦南地人teh敬拜in ê偶像神明ê時,mā有廟妓供給參與敬拜ê cha-po͘人進行苟合ê性行為。因為án-ne,姦淫一再hō͘人認為是hō͘人性命敗壞(死亡ê意思)ê主要因素之一。

    第1到5節,chit段經文作者採用「擬人化」ê筆法,hō͘少年人thang koh khah清楚智慧ê意思。Chia用「目睭」、「姊妹」、「親密ê朋友」等來形容智慧,親像:只要小心保護目睭,就ē-tàng看清楚甚麼是正確ê;對智慧mā tio̍h像對家己ê姊妹仝款,hō͘ in疼惜;像對待親密ê朋友仝款常常有互動。這真清楚teh說明,智慧thang hō͘人遠離「別人ê bó͘」,mā就是chit種專門以「甜言蜜語」勾引cha-po͘人ê cha-bó͘人,ná親像淫蕩ê cha-bó͘人一般ê驚人,一定會躲開。Án-ne就ē-tàng避免災難臨身。

    第6到10節,chia舉出一個實例,就是有一個無知ê少年人,ná親像一個「阿西」仝款,行向「一個淫蕩cha-bó͘人khiā起ê所在」,而hit-ê cha-bó͘人打扮ná親像「妓女」。

	第11到13節,chit段經文描述chit-ê淫蕩ê cha-bó͘人,是無「見笑」心,常tī「街上招搖」,四界chhōe人下手。結果伊看見chit-ê少年人,就「相攬」伊、「chim嘴」伊,而且是「嬉皮笑面」迎接伊。

	第14到20節,chit段經文是此淫蕩婦女對這少年人講ê話,chiah-ê話充滿誘惑。伊採取幾種方式來迷惑chit-ê少年人,包括有:一是用siōng súi ê裝飾來誘惑人ê眼目,hō͘人眼花撩亂。二是用siōng好香料hō͘人ê嗅覺失靈,失去敏感。三是hō͘人失去時間觀念,m̄知節制。四是hō͘人感覺安全,因為伊ê丈夫出遠門,其實是siōng危險。

	第21到23節,作者Tī chit段經文中,描述chit-ê青年ná親像ka-la̍uh陷阱裡ê動物—牛、鹿、飛鳥等—就是死亡,來形容chit-ê少年人就án-ne被chit種淫婦掠tio̍h,而siōng悲哀ê是伊卻iáu「m̄知性命tī危險中」。

第24到27節,chit段經文是用來苦勸人,iáu是kah頭前一再重複敘述過ê,有智慧ê人一定會遠離chit種淫婦,絕對bē「迷迷糊糊地跟tòe伊去」。因為跟tòe去一定會「死亡」。


經文:

箴言 8:1-8:21

註釋:

Chit章是teh歌頌智慧ê真、善、美。Ná親像第四章所描述ê:智慧ê價值khah贏過金銀財寶。Á智慧確實是無價之寶。因為án-ne,擁有智慧,等於hō͘性命有安全保障。作者tī chit章用幾個段落以擬人化ê女性代名詞描述智慧,包括有:

第1到3節,講智慧tī十字路口喊hoah。

第4到11節,講智慧ê珍貴比起金銀珠寶iáu koh khah真實。

第12到21節,講智慧ná親像一個有才智ê女王,會秉公行義治理伊ê子民,á是ná親像王后會輔佐國王,贏過所有臣僕。

第22到31節,智慧在世界之初就存在,伊ná親像宇宙般浩瀚、廣大,無法度測度。

第32到36節,智慧關係tio̍h人ê性命存亡,一定會注意。

    Ná親像頭前敘述過ê,作者tī chia用cha-bó͘人來teh代表「智慧」。智慧ê第一特性,就是「誠實」。「誠實」mā是人ē-tàng面對上帝而m̄免驚惶ê原因。Koh講,智慧所代表ê mā是「適合」、「良藥」般ê箴言,這kah誘惑人犯罪ê淫婦所用ê花言巧語完全無仝。另外一點是作者mā Tī chit段經文中講出智慧ê特性,就是beh「敬畏上主」。Tī這基礎上,智慧hō͘人有夠額ê判斷力、才智,因為án-ne,有智慧ê君王統治國家大業,國勢會比擁有真chē軍事武器koh khah強。無智慧ê君王,就算擁有koh khah chē ê軍隊,mā不過是「有勇無謀」,最後iáu是會落敗。有智慧ê統治者koh khah會知影怎樣「秉公行義」,hō͘國家長治久安。

    第1到5節,chia講智慧mā teh chhōe人,ná親像一個cha-bó͘人「khiā tī十字路口」kah人chē ê「城門邊」呼喊,希望大家會注意聽伊ê聲音。這mā表示,智慧並無隱藏起來,卻是tī真chē公開場合lóng thang聽見,只要詳細看、注意聽lóng會發見。

	第6到11節,chit段經文講述智慧ê內涵,就是智慧ê話「純正」,是「真理」,會「憎恨虛謊」、「無歪曲,無乖謬」,koh khah重要ê,智慧價值贏過「白銀」、「精金」、「珠寶」。

	第12到14節,chit段經文講述智慧ê特質,是「有知識,有健全ê判斷力」,而且有「堅強」ê意志力,其基礎就是建立tī「敬畏上主」。因為智慧會痛恨「邪惡」、「驕傲、狂妄」,並討厭「邪僻kah白賊」。原因是上帝喜愛人有真誠,kah謙卑ê心靈。

	第15到16節,若智慧是女性,chit兩節講述chit-ê有智慧ê cha-bó͘人,便是一個聰明有才智ê王后仝款,會輔佐君王知影怎樣「秉公行義」。若是這有才智ê cha-bó͘人是女王,ná kui個宮廷ê臣僕lóng會需要chit位女王。

	第17節,chit節真重要,說明喜愛智慧ê人,一定會用心chhōe,當伊一chhōe,智慧就會來到chit種人ê身邊。

    第18到21節,chit段經文講述有智慧ê人,真清楚知影行tī「正義」、「正直」ê路上,而且會分享家己所得tio̍h ê,絕對bē吝嗇、縮手。

經文:

箴言 8:22-8:36

註釋:

Chit段經文真類似詩篇第一○四篇詩人所寫ê詩歌,以及約伯記第三十八章,lóng是用kui個宇宙ê創造講述上帝ê偉大。Chit段經文是用kui個宇宙ê創造,形容智慧遠tī「創造ê以前」已經存在,這teh表示「智慧就是上帝ê好幫手」,是kah上帝同在ê。

    第22到25節,chit段經文真清楚,就是先紹介智慧存在tī「亙古」chìn前,tī「太初」kui個宇宙被創造以前就已經有。Mā thang講,智慧就是teh指hit位宇宙萬物ê創造者。

    第26到29節,chit段經文簡單講述宇宙萬物被創造以前,chit-ê智慧者就已經存在à。

第30到31節,chia講智慧ná親像一個好幫手,就tòe-tiâu tī創造者身邊ê「建築師」,聽從創造者ê差遣。其實thang tùi chit兩節經文看出作者ê意思是:上帝就是用祂獨有特殊ê智慧(ná親像祂ê奴僕、參謀)創造宇宙萬物。

第32到34節,喜愛智慧,等於喜愛chit位宇宙萬物ê源頭,必定會為tio̍h beh得tio̍h智慧,「ta̍k工守tī」chit位創造者ê門口,為tio̍h beh注意聽智慧ê話語。因為擁有智慧ê話語,等於擁有性命。

第35到36節,chit兩節是相對句型。Tī箴言,chit種句型非常chē,親像chit章7到8節。有智慧,就有性命;顛倒,無智慧,等於死亡仝款thang悲。

經文:

箴言 9:1-9:18

註釋:

Tùi chit章thang看出箴言ê特色,就是ài用相對性ê句型,án-ne thang幫助人一讀就明白「智慧」kah「愚戇」之間ê差別。作者提醒讀者「敬畏上主」就是智慧ê來源。Chit章ê另外一個特色,就是第1到6節,kah第13到18節,ē-sái講是非常明顯ê對照句。中間ê第7到12節,是前後兩段ê對照句,用愚戇者kah智慧者之間差別ê性格作教導素材,說明教導愚戇者是食力兼pháiⁿ看;相對ê,明智敬畏上帝ê人,知影智慧ê重要性,只要一講,伊就bat,而且會尊敬教導者。

Tī新約福音書中記載耶穌用chit種相對ê句話來教導學生ê例真chē,親像tī馬太福音第七章13到14節,伊提起進入窄門是通往永生,通往滅亡ê路好行卻真闊闊;koh親像第七章24到27節,有兩種厝ê根基,有一種是建造tī沙土上,tú-tio̍h風雨就倒了;另外一種是建造tī石磐頂,m̄驚風吹雨phah。Chit種教導真容易hō͘聽道者明白。

第1節,chia用智慧者建造厝做譬喻。所謂「立七根柱子」,可能kah創世記第一章七工創造完成ê「七」有關係。Koh講,「七根柱子」,mā隱喻tio̍h厝真大,表示主人是一個真有能力ê人,以siōng美好、完整ê方式建造房屋。

第2到3節,tī建造房屋完成了後,建造者非常歡喜設下「筵席」宴請賓客。然後派女僕去街上邀請人來加入伊ê主人ê筵席。然後,主人mā會到「城裡ê siōng koân處呼喊」,表示chit件美好ê筵席是公開ê,歡喜ê人lóng thang來加入。Chia ê「siōng koân處」,mā teh表示一種極高ê權威、能力,mā是siōng好ê防衛地點。這已經teh表明真正智慧,ná親像有siōng好ê性命防衛能力仝款。

第4到6節,呼喊ê對象,就是「愚戇人」,主要就是beh幫助in遠離愚戇,行向智慧ê「路」,這已經teh隱喻,只要進入智慧者所建造ê城池,á是智者ê厝,就算是愚戇者mā會得tio̍h智慧。

第7到9節,講有智慧ê人,bē隨便糾正人ê過錯,因為對「傲慢人」來講,別人對伊ê糾正,ná親像針刺一般ê痛苦,m̄-nā無幫助,反tńg是帶來仇「恨」,「傷害家己」。M̄-koh相對ê,教導「明智ê人」,結果是完全顛倒;明智ê人歡喜受教,因為án-ne,教導chit種人會受tio̍h「尊重」,而且jú教導伊,會hō͘伊「koh khah明智」、「增長學問」。

第10到12節,chit三節真清楚說明智慧ê來源,m̄是人原本擁有,卻是tùi上帝來ê賞賜。因為án-ne,真正明智ê人,知影「敬畏上主」,因為chit位創造並賞賜性命ê主,chiah是智慧ê泉源。敬畏chit位性命ê賞賜者,得tio̍h利益ê是家己;相對ê,m̄知敬畏上主ê人,「虧損」ê mā是家己。
Ná親像頭前所提起ê,第13到18節kah第一段ê 1到6節,差不多是完全相對稱ê句型。

第13到15節,仝款是到街路上去呼喊,m̄-koh無知ê愚戇者會「像一個喧嚷、無知、無恥ê cha-bó͘人」仝款講個無停,卻lóng是無用ê物件。Siōng危險ê所在,就是chit種愚戇ê誘惑力mā是非常大,它mā會到城中ê siōng koân處顯示力量,為tio̍h是beh迷惑人心,向hiah-ê「匆忙趕路ê人呼喊」,因為chit種人無有時間思考,看tio̍h ê lóng是外表亮麗ê權威。

第16到18節,呼喊仝款ê對象「無知ê人」,m̄-koh提供ê,m̄是家己ê能力所建造起來,卻是用「偷」the̍h得tio̍h ê「水」kah「偷來ê餅」,結果是引誘人進入「死亡」,掉落tī「陰間ê深處」無法度脫離。Kah第5到6節ê景況完全顛倒。第17節chia講tio̍h「偷來ê水甜些」,這是因為tī中東地區有bē少地方是乾旱缺水地帶,因為án-ne,水,往往是珍貴,需要用極高ê價錢買。「偷來ê水甜些」,是因為缺水嚴重,嘴乾久了,感覺就無仝款。Tī chia,意思是teh指愚戇人往往會為tio̍h tam-tio̍h目nih-á ê甜頭,而會失去性命。

經文:

箴言 10:1-10:32

註釋:

Tùi第十章到第廿二章16節,是箴言ê第二部分,mā hông稱做「所羅門ê箴言」,總共收錄了375則。在列王紀上第四章32節講所羅門王總共做「三千句箴言」,因為án-ne,有kóa聖經學者認為這375則就是tùi這「三千句箴言」中摘錄來ê。

Chit章siōng明顯ê特色,就是用對比ê句型寫出來,kah一般所講ê「諺語」仝款。Kui章一再呈現編者對智慧ê觀點:正直、才智、誠實、正義koh有疼心、敬畏上主。

第1節,「明智」kah「愚戇」是相對句,而「老父得意」kah「老母煩惱」mā是相對。真清楚,作者beh表示「明智ê kiáⁿ」,所做ê事,必定會加添家族ê光彩,m̄-koh相對ê,「愚戇ê kiáⁿ」只ē-sái家族蒙羞,hō͘懷伊養育伊長大ê老母傷心。

第2到3節,「不義之財」,指ê是用不正當手段得tio̍h ê財富。親像用欺騙、搶劫奪取等方式。Chiah-ê財富m̄-nā對人無幫助,反tńg會hō͘人受tio̍h上帝ê懲罰。

第4到5節,「勤勞」ê人,就算tī siōng惡質ê環境中,iáu是會得tio̍h收成。M̄-koh相對ê是「pîn-tōaⁿ」ê人,就算有好ê穗等待收割mā會疏忽。二者ê結果就會產生成做「富足」kah「sàn-chhiah」ê差別。

第6到7節,chia提起「正直人」kah「邪惡人」,是完全顛倒ê族類。In所得tio̍h ê結果mā是完全無相仝;前者被「懷念」,後者是「身敗名裂」。

第8到11節,段經文講出「聰明人」ê特質,就是知影「誠實」、「坦白」,m̄-koh相對ê是「愚戇人」ê特徵,就是會講「愚妄」ê話、「詐欺」、隱藏「真相」kah「殘暴」。

    第12節,chit節用「憎恨」kah「愛」相對照,說明憎恨往往會挑起無聊ê爭端,m̄-koh真實ê疼卻ē-tàng「掩蓋一切過錯」。

    第13到14節,chit兩節用「明智人」kah「愚妄人」對照。前者會進步因為伊不斷追求新知,相對ê,後者只知影四界「闖禍」而已。

	第15到16節,thang kā第15節對照第2節來看,清楚說明財富一定tio̍h得來正確、誠實,若無,koh khah chē ê財富kan-taⁿ會帶來損傷,甚至會親像第16節所講ê「招引koh khah chē ê罪」而已。Koh講,有財富mā一定tio̍h ná親像第16節所講ê會「行善」幫助別人,án-ne chiah是真正擁有財富ê意思。

	第17節,只有明智ê人chiah會「聽從訓誨」,因為伊知影he是伊ê生存之道。相對ê,明知he是錯誤,卻堅持m̄承認犯錯ê人,確實是愚昧至極,因為jú隱藏所犯ê過錯,到最後就是kan-taⁿ會hō͘家己koh khah孤獨無助,hō͘家己「身臨險境」。

	第18節,chit節真值得注意,作者khah強調ê是:心中「懷忿恨」ê時,往往會hō͘人因恨而扭曲真相,加添不實在ê話,反而成做「散播謠言」ê人。

第19到21節,chit三節講出語言kah智慧之間ê關係。作者講有智慧ê人知影tio̍h講造就人ê話,m̄-koh,愚戇ê人一講話就會傷人。

第22節,作者提醒咱,除了勤勞之外,想beh致富尚且需要聰明ê智慧,chit種智慧,乃是tùi上帝來ê賜福。上帝賞賜財富hō͘人,koh加上智慧,主要是希望人ē-tàng好好á管理世界。

第23到25節,chia ê「愚妄人」kah「邪惡人」lóng仝款ê一類,chit種人mā就是m̄相信上帝ê人,mā ē-sái講是驕傲ê人。相對tī chit種人,就是「義人」、「正直人」、「明達人」等是仝一個類,chit種人必定有上帝引chhōa kah看顧,所做ê事lóng thang穩妥。

第26節,「像牙縫裡ê醋kah眼裡ê煙」,這lóng是感覺器官敏感地帶,牙縫裡ê醋,ē-sái嘴齒酸痛,ná親像患有牙周病ê人,無論lim冷水á是燒水,lóng會感覺疼痛無停。「眼裡ê煙」會燻得目屎直直流下。這兩句話lóng是表示真oh忍受ê意思。作者講「m̄-thang chhōe pîn-tōaⁿ人替你做事」,因為chhōe chit種人等於家己討皮痛仝款。

第27到32節,chit段經文是繼續以「善」kah「惡」做對比。Ná親像詩篇第一篇詩人所講ê仝款。

經文:

箴言 11:1-11:31

註釋:

Chit章繼續第十章所提起ê「正直人」kah「邪惡人」之間ê無仝。

第1節,「不準ê天平」,意思是teh指seng-lí人用不準確ê秤欺騙顧客。同時mā是teh指司法人員用不公平ê審判對待hiah-ê sàn-chhiah ê人民。Chiah-ê tī先知ê文獻lóng被嚴厲譴責。親像先知阿摩司就bat指責伊hit-ê時代ê北國以色列社會,會「恨惡別人tī法庭上主持公道,公正無私」,而司法人員則「tī法庭上阻止sàn-chhiah人得tio̍h公平ê裁判」,原因是司法官接受o͘-se(參考阿摩司書五:10—12)。伊講以色列ê商人、權貴者,是「販賣老實人,kā無法度還債ê sàn-chhiah人以一雙涼鞋ê價錢賣hō͘人做奴隸。In踐踏貧民,推開路上ê sàn-chhiah人」(參考阿摩司書二:6—7),chiah-ê權貴階級者甚至是用欺壓貧困者為樂,in「扛高物價,用假法碼kah小升斗欺騙顧客」、「用高價賣出劣等ê麥á」,然後koh去「chhōe個無法度還債ê sàn-chhiah人,用一雙涼鞋ê價錢kā伊買了落來做奴隸」(參考阿摩司書八:5—6)等,以上chiah-ê lóng是主前第八世紀ê北國以色列景況。先知彌迦mā講「邪惡別人裡ê財物是用不誠實手段得來ê。In使用兩樣ê天平kah升斗」(參考彌迦書六:10)。

    第1節下半句講「上主喜愛公平ê法碼」,thang比較以西結書第四十五章10節:「Lín tio̍h 用公道ê 天秤,公道ê伊法,公道ê 霸特。(全民版)」先知以西結講這是每一個君王應該有ê治國守則。

    第2節,「驕傲」kah「謙遜」是相對詞,仝款,結果mā是「恥辱」kah「智慧」相對。Chia ê「智慧」,指ê是「尊榮」ê意思。Chit節mā thang參考以賽亞書第十章12節,講上帝hō͘亞述ê驕傲受tio̍h嚴厲懲罰。

第3節、第4節、第5節、第6節、第10節、第13節等等,lóng提起「誠實」ê重要性,kah因誠實所帶來ê功效。顛倒,就是「奸詐」ê人,chit種人原本想beh獲取koh khah chē,結果tī上帝審判ê時kā全部落空。

第4節、第7節、第28節等等,這幾節提起óa靠錢財是愚戇ê想法。Tī以西結第七章19到21節講,tī上帝審判ê日子來臨ê時chūn,金銀珠寶是一點路用mā無,反tńg有害。

第8節,chit節ê「惡人難逃禍患」,chit句話mā teh表示邪惡ê人設計謀想beh陷害別人,結果是害了家己。Ná親像以斯帖記中ê哈曼,設計beh殺害末底改,結果伊設計ê絞刑台,反tńg是絞死去家己仝款。

第9節、第11節、第13節等等,chiah-ê經文lóng tī提醒一件重要ê事,he就是愚戇人chiah會烏白講,盡講kóa無用ê話。第11節ê「市鎮因邪惡人ê言語而傾覆」,chit件事thang tùi撒母耳記下第二十章14到22節所記載ê,示巴鼓吹人民離開大衛,結果亞比giú城差一點á就因為án-ne被大衛ê大將約押攻陷。

第14節,所謂「謀士眾chē」,表示廣納建言,á是講聽tio̍h正確ê民聲,會認真思考怎樣hō͘所表達出來ê意見thang改善、落實。Chit種國家必定會興旺。相對ê,就是獨裁者,á是拒絕聽從民意ê君王,只ē-sái國家陷入敗壞滅亡之途。Chit件事mā thang tùi羅波安接落老父所羅門ê王位,因為拒絕注意聽民眾kah老臣ê建議,結果hō͘老父所羅門留落來ê以色列王國分裂做做為北國以色列,南國猶大。

第15節,chit節thang參考第六章1到5節ê解釋。

第16節、第22節,chit兩節lóng提起女性,會受人敬重ê cha-bó͘人,是「端莊」、有「智慧」者(見識)。第22節ê「豬」,tī以色列文化中表示無清氣、lah-sap ê動物。

第17節,chit段經文提起「仁慈」kah「強暴」tú好顛倒;前者m̄-nā hō͘別人受益,受益koh khah chē ê是家己。Á後者則殘害了別人,等於就是傷害家己。

第18到21節,chiah-ê經文lóng真清楚講tio̍h「正直」kah「邪惡」之間ê無仝,ná親像頭前已經有提起過ê結果之差別。

    第23節,chia講tio̍h「邪惡人ê期望干犯眾怒」,這是因為邪惡人ê心思意念lóng是teh圖謀家己ê利益,甚至會因為án-ne危害到別人ê時,只要有益tī家己ê,mā會無teh可惜去做,chit種人必hō͘人怨。

第24到27節,chit段經文提起「慷慨好施」ê美德,m̄-nā bē「窮困」,iáu會得tio̍h koh khah chē ê祝福。Tī第廿二章9節講:「好心ê 人會得tio̍h 福氣,因為伊 kā 米糧分 hō͘ sàn-chhiah 人。(全民版)」比較khah使徒行傳第二十章35節,使徒保羅講「施比受koh khah有福」。

第29節,chit節所講ê「帶災難進家門」ê人,就是愚戇人,á是邪惡者。Chit種人是過奢華ê生活。因為án-ne,必定會「傾家蕩產」,結果只好去做「明智者ê奴僕」。另外一方面,會「帶災難進家門」ê人,mā是殘暴ê人,結果必定會連累厝內人而受tio̍h懲罰。像創世記第三十四章描述ê西緬kah利未就是siōng好ê例。

第30節,chia所講ê「結性命ê果子」,表示「義人」會影響真chē身邊ê人。相對ê是殘暴ê人,kan-taⁿ會「殘害」koh khah chē人ê性命,對別人一點利益mā無。

第31節,chit節ē-sái講是第十一章ê總結。Ná親像頭前所講ê,義人應該lóng有真好ê結果,m̄-koh作者iáu是提醒大家注意一件事實:tī chit世間,義人並無一定會興旺,甚至「正直人在世間尚且遭報」,這mā是約伯記作者一再表達ê現象,何況是作惡多端ê人,伊豈m̄是koh khah會遇tio̍h極大ê報應!


經文:

箴言 12:1-12:28

註釋:

Tùi第十二章到第十五章15節止,lóng是用相對性ê「善惡」、「好bái」等型態講出人間生活萬象,範圍甚廣,lóng是平日生活中經常常發見kah體驗得tio̍h ê。

第十二章中以「邪惡者」kah「義人」、「正直人」相對照做主題,強調上帝所kah意ê就是「正直人」,對作惡ê,上帝會嚴懲。因為án-ne,以後ê經文lóng會提起二者之間行為顯現出來ê差別。

另外,chit章mā提起「愚戇」kah「智慧」之間ê差別,包括聰明者(á是智慧者)歡喜受教、聽從苦勸、深藏chiah學;相對ê是愚戇者lóng是拒絕苦勸(第1節),因為án-ne,in除了顯示出家己ê無知之外(第23節),mā會hō͘人輕蔑(第8節)。

第1到3節,tī第1節ê「愚戇人憎恨苦勸」,mā表示chit種「愚戇人」kah「cheng-seⁿ」無jōa大差別。表示愚戇人ê行為已經偏離應該有ê規律。Chit種人,tī上帝眼中是只有受懲罰ê份,bē有任何祝福,因為chit種人不時以惡質ê計謀陷害別人,m̄-koh上帝ē-sái chit種人ka-la̍uh tī家己設下ê羅網裡,無「安全」thang講。

第4節,chit節特別用「賢慧」ê bó͘ kah「無恥ê bó͘」做對比,解釋「賢慧」kah「無恥」兩個之間ê差別。Chit節thang參考箴言第三十一章10到31節,有詳詳細說明出「賢慧ê bó͘」帶hō͘家庭kah丈夫ê榮耀。Á「無恥ê bó͘」對丈夫來講,已經是「無藥thang救」,kan-taⁿ會hō͘伊感受tio̍h ná親像毒瘤在身ê。

第5到8節,chit段經文以「誠實人」、「義人」對照「邪惡人」、「愚戇人」,in之間ê結局就大無相仝;前者對人有幫助,後者kan-taⁿ會傷害別人,甚至影響tio̍h in ê kiáⁿ孫後代。

第9節,chit節tú親像俗語所講ê:「過平凡生活,遠比phah腫面充胖子會khah受koh khah好。」chia ê「自高自大」,表示傲慢,m̄-koh並無真正實力。

第10節,chia ê動物是teh指家畜,特別是teh指牛、驢á、馬、駱駝等會協助人工作ê動物。一般lóng會餵食草料hō͘ in,thang hō͘ in ē-tàng落田工作(參考申命記廿五:4)。一個對動物殘忍ê人,對待厝內ê奴僕必定koh khah殘酷。

第11節、第24節、第27節,chit三節lóng用「勤勞」kah「pîn-tōaⁿ」chit兩種人做對比;自古以來,勤勞ê人大lóng m̄免為生活愁煩,in ê生活無一定富裕,m̄-koh至少是擁有「資財」thang供生活之需。相對tī pîn-tōaⁿ者,in kan-taⁿ會「幻想」,kan-taⁿ有幻想並無會hō͘伊「達tio̍h願望」,反tńg最後成做勤勞者ê奴僕,一定tio̍h「服苦役」chiah ē-tàng維生。

第12到13節,chit兩節經文koh一pái提起「正直人」kah「邪惡人」之間ê問題。前者bē受tio̍h後者ê影響,即使邪惡者「終日想beh做pháiⁿ事」,正直人iáu-koh無為所動,伊知影tio̍h「誠實」chiah ē-tàng「免tī禍患」臨身。

第14到16節,chia特別強調「明達ê人」kah「精明ê人」lóng會知影聽從苦勸,因為這kan-taⁿ會幫助家己有koh khah大ê「容忍」毅力,bē被激怒而做出愚戇ê動作。

第17到19節、第22節,chit段經文強調講實話ê益處,ē-tàng hō͘人知影伊「公正」、hō͘人信服並且得tio̍h上主ê讚賞。Á講白賊kan-taⁿ會惹來上帝ê「憎恨」,而且會「傷害無辜」,一點幫助mā無,而且chiah-ê白賊真緊to̍h會破滅。「明智」ê話語會ná親像「濟世良藥」,hō͘人心靈清晰。

第20到21節,「正直人」會想出所有ê辦法化解人間ê糾紛,促進彼此之間ê「和平」,chit種人心內一定會「充滿喜樂」,伊所做ê事mā會「無往不利」。相對tī「邪惡人」,kan-taⁿ會為家己「圖謀」,心內所想ê lóng是一kóa「詭詐」ê事,結果「禍患」是續接teh來。

第23節,chit節說明真正有學問ê人,bē隨便就顯露伊ê「chiah學」,伊是會看場面而發表意見,只有愚戇ê人chiah會口不擇言,結果koh khah「顯露」出家己ê「無知」。

第25節,「煩惱」並bē-tàng解決問題,kan-taⁿ會加添人ê愁煩,結果是致使人心「消沉」,失去活力。相對ê,「良言」會「振奮」人心,hō͘人得tio̍h ǹg望。

第26節、第28節,chit兩節lóng提起「義人」kah「邪惡人」帶hō͘親朋厝邊無仝ê結果;前者會ná親像「良師益友」ē-tàng對人有幫助。相對ê,後者kan-taⁿ會帶領人「深入迷路」,hō͘人「趨向死亡」。

經文:

箴言 13:1-13:25

註釋:

Chit章mā是用「邪惡者」kah「好人」之間ê無仝表現,以及「愚戇kah聰明」之間ê無仝相對照。

第1節、第10節、第18節、第24節等等,lóng kah教導有密切關係,chiah-ê經文提起接受智慧(thang用「老父」作代表)ê教導,就是聰明者。只有「傲慢」ê kiáⁿ á是愚戇者,chiah會拒絕智慧者ê教導,chit種人,必定日漸窮困而終hō͘人輕視。

第2到3節、5節,chit三節用「好人」、「誠實人」kah「詭詐ê人」、「邪惡人」作分別;前者講話必定會非常「謹慎」,bē「信口開河」,而且會痛恨「白賊」,相對tī後者,就是只想tio̍h奪取、壓榨別人,而且講話hō͘人感覺「thang憎」,結果是自取毀滅。

第4節、第11節、第23節,chia lóng提起一個重要ê認bat:勤勞kah pîn-tōaⁿ者之間ê差別;前者,必定會夠額有chhun,而且會認真chhōe「未開墾ê土地」,好增加糧食,免得窮困臨身。M̄-koh相對ê是pîn-tōaⁿ者,lóng是會chhōe一大堆理由推託責任,只想beh「不勞而獲」坐享其成,結果hō͘身邊擁有ê真緊to̍h消失à。

第6節、第9節、第25節,chiah-ê經文用「正直」、「正義」kah「邪惡」、「愚昧」相對照;前者知影怎樣護衛無辜ê人,chit種人lóng是hō͘人看tio̍h性命ê「光輝」,kah chit種人做伙,性命會有飽足,bē有欠缺。Á後者lóng是hō͘人看見ná親像teh beh「熄滅ê燈火」,表示性命teh beh結束,無ǹg望,而且會感覺欠缺不足。意思是teh指生活上永遠bē滿足,而iau餓就是siōng明顯ê現象。

第7到8節,chit兩節講tio̍h sàn-chhiah kah富有ê人無仝;有錢人裝窮,是因為驚hō͘人發見而遭遇勒索,án-ne,就需要「開錢贖命」。相對ê,sàn-chhiah人若是裝作富有,必定會遭遇無妄之災,而安tī sàn-chhiah ê人,反tńg ē-tàng安然過日,bē tú-tio̍h恐嚇。

第12節,chit節講tio̍h希望ê問題。失望,lóng是會影響tio̍h人心靈ê安靜。相對ê,「願望實現」,必定會帶hō͘人ê性命「充滿生機」。

第13到17節,chit段經文koh一pái tńg來到「明智」、「智慧」、「明達」、「忠信」,kah「愚戇」、「忠信」相對;前者會聽從教誨、教導,以加添智慧,án-ne,就ē-tàng hō͘人「逃脫死亡ê險境」,khah美好ê,因為有智慧而ē-tàng「促進和平」,chit種人必定會「四界受人尊敬」。M̄-koh愚戇人kan-taⁿ會造成「災禍」,凸顯家己ê「無知」,常常已經落入險境中iáu m̄知。

第19到22節,chit段經文談及「愚昧人」kah「義人」之間ê差別,在tī愚昧人lóng是歡喜kah「邪惡」同行,結果是kah伊同行ê人mā會受tio̍h「連累」。M̄-koh相對ê是有智慧ê人,mā就是義人,一定會得tio̍h好ê報償,siōng重要ê是ē-tàng「為kiáⁿ孫留落來產業」。


經文:

箴言 14:1-14:35

註釋:

Chit章mā是kah頭前一章仝款,lóng是用「愚昧人」、「邪惡人」,kah「正直人」、「智慧」、「聰明人」相對照,說明二者之間ê差別。除了這以外,mā有幾pái談及謹慎講話ê重要性,親像第3節、第5節、第25節等等,lóng teh強調tio̍h講適當ê話。

第1節,chit節thang參考第三十一章10到31節所描述ê「賢慧ê bó͘」。賢慧是建立一個家庭ê基礎,相對ê就是「愚戇ê cha-bó͘人」,in對家庭lóng無幫助,kan-taⁿ會「拆毀」破壞而已。箴言有kúi-nā pái提起,親像第十二章4節、第十九章13節、第廿一章19節等等,lóng講愚戇ê cha-bó͘人真會嘮叨。

第2節,chit節是對偶句型。所謂「行為乖僻」,是teh指不按照規矩辦事,專門鑽牛角尖,á是鑽漏洞ê意思。

第3節、第5節、第25節,chit三節lóng提起有關謹慎講話ê重要性,特別是講誠實話,m̄-nā tī證人席上會救人ê性命,mā會得tio̍h別人ê尊敬。相對ê,就是講白賊言,kan-taⁿ會傷害別人性命,chit點thang參考誡命第九條。

第4節,「cheng-seⁿ耕犁」,意思是teh指殷勤勞動ê意思。雖然是cheng-seⁿ來代表,m̄-koh mā表示一個人若是認真勤勞工作,必定會有夠額ê穀物儲存在倉庫裡,bē致使iau餓。

第6到9節,chit段經文用「愚戇人」、「狂妄」ê人kah「明達」、「聰明」、「正直人」等相對照,說明二者之間ê差別。主要teh說明m̄-thang想beh tùi愚戇人ê身上得tio̍h智慧,in犯siōng嚴重ê罪mā m̄肯認錯悔改。M̄-koh相對ê,就是聰明ê人表現出來ê,就是求知慾真強,mā知影會學習彼此赦免所犯ê過錯。

第10節,這是一節相對句型。說明人心內ê感受,絕對m̄是外人ē-tàng體會。

第11節、第14到16節、第32節,chiah-ê經文lóng是用「正直人」、「聰明人」kah「愚戇人」、「pháiⁿ人」等相對照,mā講出這二者之間ê差別。主要teh說明正直人無論環境怎樣改變,伊lóng ē-tàng屹立不搖,而且結局會得tio̍h「善報」,伊ê所行必定會小心,mā因為án-ne而ē-tàng「閃過禍患」。M̄-koh相對ê,就是愚戇人結局會親像倒塌ê厝,伊用殘暴手段所做ê事,必定會hō͘伊「敗亡」。

第12節,用「道路」來比並一個虛假ê人,表面上看起來真正直,其實是領人行向死亡。

第13節,chit節用「歡笑、歡樂」來掩蓋(khàm)心內ê愁苦,結果是目nih-á ê。意思是teh指不真實,就算是大家歡笑聚集做伙,mā是目nih-á ê享福,災難iáu-koh bē停止。Chit對hiah-ê作惡者來講就是án-ne。親像搶奪tio̍h,歡喜kan-taⁿ會短暫時間,驚惶被發見ê時間koh khah長。因為án-ne,只有愚戇ê人chiah會做chit款tāi-chì。

第17到19節、第29節,chia真清楚表示「愚戇人」ê特性就是急躁,總會敗壞好事,「自食惡果」。相對ê,通情達理ê人會冷靜處理發生ê事,hō͘人看起來就知影是一個有智慧ê人,結果愚戇人lóng tio̍h來chhōe伊幫助。

第20到24節,這四節真清楚teh表達一個基本生活態度,就是聰明ê人,會憐憫別人ê苦難,bē因為別人sàn-chhiah就看bē起伊,會知影殷勤做工;只知影享受,輕視貧困ê人,kui工kan-taⁿ會閒聊,chit種人,bē得tio̍h別人ê尊敬,最後會變成sàn-chhiah。

第26到27節,chit兩節強調「敬畏上主」ê人,tùi án-ne會得tio̍h性命。因為敬畏上主乃是智慧開端(參考一:7、九:10),而智慧hō͘人得tio̍h性命(參考三:17、四:6、九:11、十五:24、廿一:16)。

第28節,一個聰明有智慧ê君王,一定會珍惜伊ê子民,因為伊知影伊ê權柄是來自人民ê支持。

第30節,「心內平靜是肉體ê 活命;怨妒會 hō͘ 骨頭朽瀾。(全民版)」chit句 thang對照第十七章22節:「歡喜ê 心是良藥;憂傷 ê 心會 hō͘ 骨枯焦。(全民版)」教父奧古斯丁講:「驕傲是萬惡ê根源。」人時常會因為驕傲產生嫉妒ê心,而罪則常會埋伏tī嫉妒ê中間。

第31節,「憐憫貧寒」這是kui本聖經ê主題,對tī苦難者m̄-nā無法度輕視,而且tio̍h伸出援手kā in救助,這乃是teh回應上帝ê疼,mā就是對上主敬虔ê態度。

第33到35節,chit段經文講出一個國家、政府,需要有智慧ê人來治理,只有án-ne,chiah ē-tàng hō͘「國家強盛」,有chit種臣僕chiah是君王ê福氣。相對ê,愚戇ê人kan-taⁿ會帶hō͘ kui個民族恥辱,因為chit種臣僕無盡忠職守,對災難為何發生「一無所知」,必受tio̍h君王懲罰。

經文:

箴言 15:1-15:33

註釋:

Chit章ná親像頭前已經有提起過ê,tùi第十二章起ê這幾章lóng是用相對句型描述善惡、好bái、愚戇kah明智者之間ê差別。Chit章mā是用「明智」kah「愚戇」做主題,講tio̍h愚戇ê人kah聰明人、明智者之間ê無仝,而且所用ê句型大多數是對偶句。

第1到2節、第4節、第23節、第26節、第28節,lóng是kah講話有關係。有智慧者講話必定ē-sái對方ê受氣「平息」,hō͘人認為是有「智慧」ê發言,而且會chhōa人「充滿生機」,m̄-nā án-ne,真正智者講話前,lóng會經過「三思而後回答」,bē信口開河,mā bē「口吐惡言」故意傷害別人,因為伊心內「純潔」。相對ê,就是愚戇者講話必定會傷人,而且是「粗暴」chē chē,「廢話」一堆,而且心思意念邪惡,為上帝所「憎恨」,chit種人對別人無任何益處,kan-taⁿ會hō͘人失去意志。第23節mā thang參考第廿五章11節。

第3節、第11節,chit節講出基督教信仰ê特質,chit位創造性命ê上帝,是無所不知、無所不在ê上帝;祂知影人tī隱密中所講、所做ê一切。就算bih tī ná親像「陰間」、「冥府」chit種siōng隱密ê所在,上帝mā會「鑒察」得非常清楚,無人ē-tàng「隱瞞」得了(參考詩篇一三九:7—8)。

第5到7節、第12節,這四節用「愚拙人」、「邪惡人」、「愚妄人」、「狂妄人」,kah「精明人」、「正直人」、「明智人」相對比,說明二者之間ê差別。前者會藐視智者ê「管教」,不領受「苦勸」,mā無法度接受新ê知識,結果為家己帶來「禍患」。M̄-koh後者會明瞭智慧者ê管教是有利益ê,in mā會傳播「知識」hō͘ kah伊同齊生活、工作ê人,hō͘大家lóng得tio̍h利益。

第8到10節,上帝是公義ê主,祂「憎恨邪惡人」所做ê事,因為án-ne,一定會拒絕chit種人ê奉獻,iáu會嚴厲懲罰in。相對ê,「義人」所做ê事、祈禱,lóng會蒙上帝ê歡喜接納、賜福。

第13到15節,thang參考第十七章22節。說明真正智者,會知影保持心靈ê舒暢,bē hō͘憂愁煩擾伊ê心。

第16到17節,「煩惱」,kah第13節ê「悲愁」、15節ê「苦惱」同義。財富chē,卻無「敬畏上主」,chit種人ê「煩惱」會跟tòe財富增加。真正智者會寧可選擇儉樸ê物質生活,而持守對上主ê敬畏,伊知影hō͘家己心靈活潑喜樂,贏過富裕ê物質生活而帶來仇恨。第17節kah第十七章1 ê:「食硬餅乾而心安理得,贏過滿桌酒肉而相爭相吵。」意義仝款。

第18到22節,chit段經文koh一pái講tio̍h智者kah愚戇者之間ê差別;智者顯露出來ê特質,就是「容忍」、「誠實」、做tāi-chì「正直」,會謙卑注意聽別人意見;相對tī愚者,就是「急躁」、「pîn-tōaⁿ」、「藐視父母」、「以愚拙為樂」,做事無計畫。

    第24到25節、第27節,chit段經文說明上帝喜愛ê人,是會知影選擇「性命道路」,chit種道路是kah上帝保持合宜關係;伊bē想beh貪圖「寡婦ê厝業」chit種「不義之財」,mā會拒絕o͘-se。

	第29到33節,chit段經文koh一pái提起愚戇者kah正直者,tī上帝眼中必定會有無仝ê結果。上帝一定會垂聽「正直人ê祈禱」,當然bē chhap邪惡者ê祈禱聲音(參考約翰福音九:31),因為有上帝垂聽,就會hō͘智者心中喜樂,chit種人必定是「敬畏上帝」ê人chiah會得tio̍h chit種智慧。

經文:

箴言 16:1-16:33

註釋:

Chit章主要teh強調上帝就是一切ê主宰,人需要謙卑,m̄-thang認為家己事事lóng ē-tàng,只有上帝chiah有chit種能力,因為祂是萬物ê創造者。

第1節、第9節,chit三節經文lóng teh強調一個基本認bat:真正成就人所計畫ê事,是上帝。Kah台灣ê俗語「千算萬算,不值得天一劃」,á是中國ê俚語「謀事在人,成事在天」仝款。Mā thang對照第十九章21節、第二十章24節、第廿一章30到31節等等經文。

第2到3節,chit兩節講tio̍h上帝觀察人心內ê心思意念。如果人驕傲,上帝bē hō͘ in祝福。因為án-ne,知影kā所計畫ê萬事「交託上主」,chit種人必定會「成功」。

第4節,所謂「天生我才一定有用」,用chit句俗語來看第4節就真接近。作者強調棄sak上帝ê人,最後必定會「滅亡」。

第5到7節、第18節,聖經一再講「狂傲ê人」,心中bē有上帝,chit種人心中看bē起上帝(參考詩篇十四:1)。箴言第六章17節bat講chit種人mā是上帝所討厭ê對象。M̄-koh相對ê,對上帝忠實,信靠、敬畏上帝ê人,一定會得tio̍h上帝ê祝福,即使是仇敵目前,mā會化干戈為玉帛。

第8節,chit節thang參考第十五章16節。誠實是一個人ê性命siōng重要ê要素。寧可守tiâu,mā無願意因欺騙而富有。

第10到15節,chit段經文lóng kah君王ê治國態度有關;講tio̍h君王若想beh長治久安,hō͘國家穩定,siōng重要ê是tī審案、治理國政ê時,必定是用「正義」為根基。因為好ê君王知影傾「聽正直」、「誠實」ê話語。

第16節,「智慧」、「知識」lóng仝款ê意思,這是無法度用世間任何貴重ê物件,包括「精金」、「純銀」等換來得tio̍h。

第17節,智者顯現出來ê就是「正直」,chit種人會知影「遠離邪惡」,而且會「謹慎行正路」,án-ne就會「保全」性命免受傷害。

第19到20節,「謙卑」ê人會kā家己ê身段放落來kah「sàn-chhiah人來往」,因為伊會聽從上帝ê話,去關心貧困ê人,結果發見家己「受益無窮」,因為伊會蒙上帝賜福(參考十九:17)。相對ê,就是「狂妄ê人」,in根本無kā sàn-chhiah人看tī眼內,in心中只想beh奪取koh khah chē財物。

第21到24節、第27到28節,chit段經文談及講話ê表達方式;包括講話「溫雅」(第21節)、「三思而後言」(第23節)、「懇切地ê話」(第24節)、像「無賴」者所講ê話語(第27節)、危言聳聽、搬弄是非ê話(第28節)等。Á只有「聰明人」chiah會講出適當ê話語,伊mā會知影接受「教導」加添知識。

第25節,chit節kah第十四章12節完全仝款。

第26節,「m̄敢pîn-tōaⁿ」kah「勤勞」工作真接近。Chit節mā thang參考第十二章24節、第27節、第十三章4節等等經文。

第29到30節,chit兩節lóng提起「心術不正」ê人,無論伊做甚麼,lóng是為tio̍h beh「欺騙厝邊」,「圖謀pháiⁿ事」。上帝一定會清楚知影chit種人心中所圖謀ê邪惡ê tāi-chì。

第31節,chit節thang參考利未記第十九章32節。表示年老「白髮」ê人,mā象徵是智慧ê記號。

第32節,「忍耐」kah「自制」仝款,有chit種本領,就是一種無形ê堅強力量thang致勝仇敵。

第33節,chit節kah第1、3、9節是仝款ê意思。「抽籤問卜」除了表示「謀略」之外,mā指偶像神明ê意思。換句話講,除了上帝以外,其他ê神明lóng無法度取代上帝對人性命ê決定權。這mā是摩西律法嚴厲禁止求神問卜ê原因(參考利未記十九:26),因為chit種行為是迦南地人民敬拜偶像神明ê方式,chiah-ê偶像神明無法度決定人ê運命。除了上帝,無人ē-tàng知影人ê性命會怎樣樣。Tī約拿ê故事中,hiah-ê水手雖然抽籤知影問題出tī約拿,m̄-koh即使眾水手用盡一切辦法beh平息風湧,卻白做無功,因為in無法度改變上帝beh約拿去完成ê工作。

經文:

箴言 17:1-17:28

註釋:

Chit章講tio̍h宮廷á是貴族ê家庭生活,kah一般人家庭生活ê規律,並無特別ê一個主題。

第1節,chit節thang參考第十五章17節。Mā teh表達一個基本認bat:即使生活貧困,卻ē-tàng平安無事,這就是siōng大ê福氣(參考詩篇第一三三篇)。聖經中記載幾則關係「滿桌酒肉」,卻是暗藏刣機ê例,包括撒母耳記上第二十章6到7節,掃羅想beh利用宴席殺害大衛;撒母耳記下第十三章23到29節,記載大衛ê kiáⁿ押沙龍為tio̍h幫小妹討回公道,準備筵席請伊ê兄弟暗嫩食飯,並趁機會kā暗嫩刣死,家己卻因為án-ne逃走tī外面。這說明雖然物質上缺乏,ē-tàng享受和睦相處ê家庭生活,比榮華富貴而彼此猜忌、相爭koh khah有價值。

	第2節,這是teh指王公貴族ê家庭。「精明ê奴僕」thang取代愚拙ê kiáⁿ,而且真可能會「繼承」主人ê「產業」。

第3節,chit節說明上帝「考驗」一個人,就ná親像「鍛鍊」金銀仝款ê,只有堪得考驗ê人,tī信仰上chiah是真實ê。

第4節,chit節講tio̍h「作惡ê人」kah「講白賊ê人」,in lóng是歡喜聽欺騙、不誠實ê話。因為án-ne,所做ê事lóng是邪惡。

第5節,chit節thang參考第十四章31節。聖經ê教導是beh關心、愛護sàn-chhiah人。因為án-ne,任何「嘲(sau)笑」、「侮辱」sàn-chhiah人lóng等於是teh「侮辱」上帝仝款,chit種人肯定會「受懲罰」。

第6節,chit節thang參考第十六章31節。Mā是一句對偶句型。Chia講出年老ê父母以「kiáⁿ孫」ê成就為「華冠」,這表示一種榮耀。Á「kiáⁿ」mā會以有正直、智慧ê父母為「光榮」。

第7節,chit節也kah宮廷、貴族ê生活有關。領導者若是「講白賊」,就kah伊ê地位不相稱,ná親像「愚戇人講溫雅ê話」仝款,搭配bē起來。

第8節、第23節、第26節,「o͘-se」是一種罪行,摩西律法真清楚禁止,講:你ê 審判m̄ -thang 冤枉,m̄ -thang 看人ê 外貌,mā m̄ -thang 接受人 ê 烏紗,因為烏紗會 hō͘智慧 ê 人目睭 chheⁿ-mê,koh 會 hō͘ 義人ê 話péng 倒tńg (全民版)」(申命記十六:19)o͘-se ê行為看起來有時真有路用,m̄-koh就長遠來看,則敗壞人心siōng嚴重ê因素。只有收受o͘-se ê官員chiah會做出「懲罰無辜」kah「責phah善人」ê判決。

第9節,「赦免」kah「懷恨」是相對ê;前者thang「得人喜愛」,而後者就無法度建立「友誼」。

第10到11節,明智者kah愚戇者,二者之間差別真大;前者願意接受「責備」,相對ê,後者就是講「一百」遍mā是無用。因為in聽bē落去勸導,kan-taⁿ會一味地做pháiⁿ事,結果就是面臨「死亡」而m̄知。

第12節,「失去幼子ê熊」,意思是teh指母熊,性情必定會暴戾,攻擊性真大。作者tī chia講「胡作妄為ê愚妄人」比失去幼子ê母熊koh khah慘,chit種人比母熊koh khah惡質,一定會遠離in。

第13節,chit節thang參考羅馬書第十二章21節:「m̄-thang被惡所勝,tio̍h用善勝惡。」箴言chit句話「以惡報善」就是說明m̄知感恩ê人,kan-taⁿ會為厝裡帶來「禍患」。

第14到15節,無論是家庭á是國家lóng仝款,若是「爭論」不休,尤其是對tī「邪惡」ê人無任何懲罰,相對ê,卻是傷kah「無辜」,結果lóng是一種重大負擔,甚至嚴重ê時會引來災禍ná親像河床「決堤」所帶來ê水患仝款,會致使「氾濫」成災。

第16節,只有「愚昧人」chiah會一直相攬錢財,卻m̄知「智慧」ê重要性大大超過chit種thang數ê財富。

第17節,這是一般生活知識,只有互相關心ê人,chiah會有「朋友」,mā chiah ē-tàng繼續維護「親人」ê關係。

第18節,箴言作者一再提起m̄-thang隨便替人「作保」ê事(參考六:1、十一:15、二十:16)。過去án-ne,現今ê時代mā仝款。

第19到20節、第24節、第27到28節,chiah-ê經文lóng是談及愚戇者kah智慧者之間ê差別;愚戇ê人會使弄,愛「誇張」不實ê事,chit種人心內所想ê lóng是「邪惡」。相對tī智者,in講話一定會謹慎、小心(參考十:19、十三:3)。

第21節、第25節,chit兩節lóng談及家庭生活,說明智慧ê kiáⁿ,ē-sái父母歡樂、安慰。

第22節,這是一句不時被引用來安慰、鼓舞病人ê話。類似ê話語mā出現tī第十二章25節、第十五章13節、15節、第十八章14節等等。

第24節,說明「聰明人」kah「愚昧人」處事ê方式真無仝款、前者做事「明智」,後者lóng是優柔寡斷,甚至會變來變去,「永遠the̍h不定主意」。


經文:

箴言 18:1-18:24

註釋:

Chit章談及有關語言ê事khah-chē,包括第4節、第6節、第7節、第8節、第13節、第17節、第20節、第21節等等,lóng kah講話ê態度、方式有關。

    第1到3節,chit兩節lóng談及自私ê人,kah愚戇人是仝款,心內想ê lóng是家己ê利益,bē關心別人,表現出來ê,就是自我中心真強。其實,chit種人tī某一個層面來看,也kah「邪惡」、「傲慢」ê人相差無遠,kan-taⁿ會為家己帶來侮辱而已,對家己一點利益mā無。

    有智慧ê人,知影怎樣謹慎使用語言,伊bē tī人面前搶講話。因為伊知影「話thang保命,mā thang喪生」,絕對bē「信口開河」,免得後患無窮。Chia ê第8節kah第廿六章22節完全仝款。所謂「閒話」mā是teh指不必要ê話,ná親像現代所講ê聊「八卦」,形容人tī食過飯,會koh再lim個茶搭配小甜點,一嘴口真容易吞食落去,感覺口感真好、真爽快。Ē-sái講是,一kóa愉快ê談話thang「促進」消化,siuⁿ chē ê話時常會造成消化不良。

    第5節,thang參考第十七章26節。所謂「縱容」,意指明明知影,卻容許chit種「邪惡不義」ê事繼續存在,致使最後傷kah無辜,這是「不公」ê事。

    第9節,箴言ê作者講tio̍h「pîn-tōaⁿ」者ê事真chē,thang參考第十章26節、第廿一章25節。

	第10到11節,chit兩節提起真正thang hō͘人óa靠ê氣力,並m̄是tī金錢財富,卻是tī上帝,祂chiah是人性命真正óa靠,聰明ê「義人」lóng會知影chit件事。

	第12節,是對偶句。用謙卑kah「狂傲」兩種態度相對比。

	第14節,chit節thang參考十二章25節、第十五章13節、15節、第十七章22節等等經文。Chiah-ê經文lóng tī說明保持愉快ê心情,以及持守對性命樂觀ê態度,就ē-sái性命ê痛苦容易承受落來。

第16節,tī台語有chit種話:「送禮送頭前。」意思是teh指禮物pái頭前,對方講話kah態度看tī禮物ê面子上會改變,並且hō͘ tāi-chì辦得koh khah順利。M̄-koh這mā是因為一個不按規定辦事ê社會chiah會出現ê狀況。其實,chia ê「禮物」mā thang當做「o͘-se」解釋。接受o͘-se ê人往往會kā o͘-se看做是「禮物」。

第18節,chia ê「兩個權貴」,指ê是位階相近ê人,彼此甚麼人mā不服甚麼人ê時,只好用「抽籤」來斷定前後秩序。

第19節,chit節thang參考第十七章17節。只有智者chiah會時刻想tio̍h「幫助親人」,mā只有愚者chiah會kah親人「冤家」。

第22節,thang參考第三十一章10到31節有關賢慧ê bó͘。

第23節,chit節是對偶句,講出「sàn-chhiah人」kah「有錢人」ê態度差別。

第24節,chit節講出朋友在tī深交,而無tī chē。Mā就是講知己ê朋友m̄免chē,有知己親密ê朋友khah贏過骨肉之親卻疏遠ê兄弟姊妹。

經文:

箴言 19:1-19:29

註釋:

第十九到二十章是繼續講tio̍h智慧者kah愚戇者之間ê差別,這二者之間ê無仝,m̄-nā在tī財富ê累積,mā在tī生活ê態度。Chit兩章所用ê語句大部分是對偶句型。

第1節,第4節kah第7節lóng提起「sàn-chhiah人」;chit種人tī一般社會中往往是hō͘人輕視á是疏忽,甚至連「親人lóng厭棄」伊。相tī對有地位、有財富ê人,in tī社會上hō͘人重視、人人歡喜接近,kah-ná朋友真chē,ē-sái講是耳中聽tio̍h ê常常chē是「諂媚」、不真實ê話,若beh án-ne,倒不如chē結交雖然sàn-chhiah卻是正直ê人。

Sàn-chhiah雖然hō͘親友遠離,m̄-koh只要保持正直,朋友雖然少mā bē孤獨。因為上帝喜愛正直ê人。

第2到3節、第10節、第19節、第29節,chiah-ê經文lóng講tio̍h愚戇人ê特質,就是「熱情而無知」、「急躁」、「生活奢華」、「狂傲」等。想beh幫助chit種人是真困難ê,因為in kan-taⁿ會「埋怨上主」,卻m̄知是家己teh毀滅「前途」。

第5節、第9節、第22節,thang參考第十四章25節。摩西律法真清楚講tio̍h bē-tàng做假證陷害人(參考出埃及記二十:16)。Chit種做假證、講白賊ê人,必定會受tio̍h「責罰」。因為這m̄是上帝歡喜ê「見笑」行為,做假證就ná親像邪惡者一般。

第8節,第11到12節,chit三節講tio̍h真實ê「知識」,m̄-nā會hō͘人知影「自愛」,mā會知影怎樣約束家己「不輕易受氣,不追究人ê過失」,若是君王有chit種知識,就會對人民koh khah有益處,因為伊ê子民會感受tio̍h君王ê「恩澤如霖雨沛降」,臨到in ê性命。

第13到14節、第26節,chit兩節講tio̍h家庭生活ê規律,lóng是對偶句型。談夫妻ê關係,mā談父母kah子女ê關係。

「愚戇」kah「冤家」其實是仝款ê意思,對應ê狀況ê就是「災禍」kah會「滴漏」ê厝。「無恥」kah「下流」仝款ê意思,lóng teh表明做邪惡ê事,這kan-taⁿ會侮辱家己ê父母。Á人thang tùi父母承受財產,m̄-koh賢慧ê bó͘卻是上帝所賞賜珍貴ê禮物。

第15節、第24節,chit兩節lóng提起「pîn-tōaⁿ ê人」,thang參考第十二章24節、27節。Chia提起「pîn-tōaⁿ ê人」kui工lóng是藉口遊手好閒,結果必定會iau餓,無力到連「伸手取食」進「家己嘴裡」lóng做bē到。

第16節、第23節,chit兩節lóng提起敬畏上帝ê人,in必定會「遵守上帝律法」,m̄敢「違背」,只有án-ne,chiah不會hō͘人「禍患」臨身來致使「滅亡」。

第17節,有錢m̄是罪惡,因為有錢thang「濟助sàn-chhiah人」,若án-ne做會得tio̍h上帝ê獎賞。這mā是耶穌ê教導(參考路加福音十二:33)。

第18節、第20節、第27節,chia lóng講tio̍h教導ê事,對子女á是少年人ê教導,lóng需要適ê時,chiah ē-tàng hō͘ in成做「明智」ê人,若無,等in偏離正道ê時,就來不及à。

第21節,thang參考第十六章1節、9節、第33節等等。

第25節,chit節mā是對偶句型。Koh一pái提起「狂傲」、「愚戇」人kah「聰明」人之間ê差別,就是用願意á是無願意接受譴責做基準。

第28節,chit節提起不誠實ê證言,只為tio̍h「貪圖」己利而已。M̄-koh chit種人,就是kah「邪惡人」仝款。


經文:

箴言 20:1-20:30

註釋:

Chit章kah第十九章仝款,講tio̍h王室ê智者應該有ê表現。另外繼續講tio̍h兩個主題:一是智者kah愚者之間ê無仝,另外一個是講tio̍h殷勤工作kah pîn-tōaⁿ者必定會有無仝ê結果。

第1節,chit節講出出宮廷常見ê現象,就是不時排設宴席、lim酒作樂。箴言作者特別提醒tio̍h注意,即使是淡淡ê酒,mā會影響tio̍h工作效率。Á濃酒會容易hō͘人bē記得應該有秩序,大聲喧嚷。有ê翻譯本甚至譯成「受氣」、「冤家」。Á「酒狂」則koh khah害,ná親像第廿三章29到30節所講ê,必定會過「悲慘ê生活,為家己哀歎」而已,對人無任何利益。

第2節、第8節、第10節、第23節、第26節、第28節,chiah-ê經文lóng講tio̍h君王治理國家應有ê態度,以及伊kah人民ê關係。Chia形容君王ná親像「獅」,當君王tú-teh受氣ê時,聰明ê人lóng會避開,暫且m̄-chhap。因為君王是坐tī「審判座上」。一位好ê君王必定知影甚麼人是「邪惡」者,一定會「嚴厲懲治」。Koh khah重要ê,一個君王若是有「誠信公正」,必定bē用「兩種法碼、兩樣升斗」,to̍h是會避免司法不公,án-ne伊ê「政權就ē-tàng繼續」,古往今來lóng是án-ne。因為殘酷ê君王kan-taⁿ會hō͘人民kah伊jú來jú疏遠,甚至hō͘人民唾棄、推翻。

第3節、第5節、第15到16節,這幾節經文lóng談明智者kah愚戇者ê無仝,前者會努力追求新ê知識,雖然如同在探取深井中ê水仝款困難重重,m̄-koh iáu勇敢試探。伊會講中肯ê話,m̄-koh bē隨便替人作保。後者tú好顛倒,因為愚戇者kan-taⁿ會引起「冤家」,m̄知ài如何避免風險臨身。
第4節、第13節,chit兩節mā thang參考第十九章15節、24節,lóng提起有關pîn-tōaⁿ kah貪睡ê人,其結局就是「一無所獲」、「窮困潦倒」。相對ê是辛勤工作者,bē擔心「衣食」ê問題。

第6到7節,自古以來,「忠誠」、「正直」ê人無chē,只要有chit種人,伊ê kiáⁿ孫mā會跟tòe學習,hō͘ in得tio̍h信任有幸福ê生活。

第9節,chit節講出會自我反省ê人,lóng知影家己絕對m̄是完人,而是一個罪人。面對上帝ê審判,人唯一ē-tàng做ê事,就是承認家己ê有限kah罪過。

第11節,chit節提起兒童ê教養,tùi in ê「行為ē-tàng看出」來。Mā就是父母ê行為,gín-á會學習、模仿。因為án-ne,tùi gín-á ê身上ē-tàng看出父母ê樣式。

第12節,上帝賞賜hō͘人有「目睭」kah「耳á」,是為tio̍h beh hō͘看清楚、注意聽。會注意看清楚事實ê真相,就bē受tio̍h迷惑。有注意聽上帝ê話語,自然會遵從。希伯來文ê「聽」字,就是teh指「聽從」ê意思。

第14節,chit節kah台語所講ê「嫌貨chiah是買貨人」。原因是伊想買m̄-koh希望價錢ē-tàng koh khah sio̍k,因為án-ne會想用埋怨貨品不佳ê方式來爭取優惠ê價格。

第17節、第21節,chit兩節lóng kah欺騙奪取財富有關,mā teh表示貪婪得tio̍h ê,無論是食物,á是財富lóng仝款,最後並無甚麼利益。

第18節,chit節thang參考第十一章14節。Chia提起tāi-chì是m̄是成功,lóng需要謀士參與策劃,而且是需要「計畫」周詳。

第19節,chit節mā thang參考第十一章13節。所講ê「非短流長」,ná親像今á日所講ê「八卦消息」仝款,作者告誡人mài kah喜愛講chit種話ê人「結交」為朋友。因為chit種人必定mā會到別所在講你ê閒話。

第20節,chit節thang參考出埃及記第二十章17節,利未記第二十章9節,摩西律法規定「受罵父母ê人」,一定tio̍h處死。Chia講chit種人「會親像一盞燈tī黑暗中熄滅」,是仝款ê意思。

第22節,thang參考羅馬書第十二章19節。聖經一再強調,上帝必定會替無辜ê人「伸冤」,因為祂是公義ê神。

第24節,chit節thang參考箴言第十六章1節、9節、33節等等經文。Teh強調無論人怎樣規劃性命ê旅程,上帝chiah是真正引chhōa者。因為án-ne,óa靠上帝ê帶領,chiah會達tio̍h家己所期待ê目標。

第25節,chit節非常重要,說明m̄-thang亂咒chōa、發願,每pái「下願」chìn前,siōng好先「三思」家己是m̄是有能力ē-tàng做到,án-ne chiah bē到ê時「懊悔」像耶弗伊仝款(參考士師記十一:30—31)。

第27節,chit節原本是講上帝賞賜hō͘人ê良知,ná親像一盞燈照亮烏暗ê房間,hō͘所有角落lóng光亮無法度隱藏。這說明一個真正有「心智kah良心」ê人,伊ê性命ná親像點to̍h ê一盞燈,照亮tī社會ê暗角中。

第29節,chit節講出「青年人」kah「老年人」有無仝ê表徵。前者充滿性命ê「活力」,後者則經歷過滄桑性命ê旅程,伊ê白髮顯露出性命ê「尊嚴」。

第30節,「創傷」、「痛苦」lóng teh形容性命ê苦難,chiah-ê經歷會hō͘人koh khah清楚甚麼是邪惡,甚麼是正確ê道路。

經文:

箴言 21:1-21:31

註釋:

Chit章真清楚kā「公義」、「明智」kah「邪惡」、「不義」做對比,thang看出二者之間極大ê差別。

    第1節,所謂「隨意支配」,意思是teh指「掌握」、「控制」。有kóa君王表面上看起來真風光、偉大,m̄-koh伊所做ê一切,若是無符合上帝ê旨意,所有chiah-ê lóng會成做泡沫消失殆盡。Ná親像第十九章21節所提起ê仝款。

    第2節,chit節thang參考第十六章2節、第廿四章12節。這mā是kui本聖經ê教導,說明上帝看人心內ê動機m̄看外表(參考撒母耳記上十六:7,路加福音十六:15,帖撒羅尼迦前書二:4)。

    第3節、第15節,chit兩節thang參考箴言第十五章8節。上帝揀選一個人立伊為君王,主要用意是chit位君王ē-tàng「秉公行義」,遠比君王獻祭非常chē koh khah重要(參考撒母耳記上八:15,列王記上十:9,彌迦書六:6—8)。只要君王知影「秉公行義」,伊正直ê子民就會歡喜,而「作惡ê人」就會「心懷驚惶」、不安。

    第4節,thang考詩篇第十四篇1節。「狂妄高傲」chit種人就是所謂驕傲ê人,chit種人心中bē有上帝。因為án-ne,箴言作者tī chia講是「罪」。奧古斯丁講:驕傲乃是罪惡ê源頭。

    第5節,thang參考箴言第十六章3節。這是teh指tī計畫任何事chìn前,會走chhōe上帝ê幫助kah指示。Chia所講ê「富足」,是teh指知影滿足,bē有貪婪ê心。

    第6節,thang參考二十章21節。Chia ê「不義之財」mā是teh指用無正確ê手段得tio̍h ê財富。

  第7節、第10到12節、第16到18節、第20到21節、第24節、第26到29節,chiah-ê經文lóng講tio̍h邪惡人kah正直人之間ê差別;包括邪惡ê人ê行為「暴戾」,kan-taⁿ想beh「做pháiⁿ事」,in ê行為kan-taⁿ會帶來「敗亡」,因為in kan-taⁿ會想過奢華生活,卻lán-si得伸手幫助窮困ê人,而且「任意揮霍」,結果必定「家產蕩然」無存。Ná親像愚戇人仝款,chit種人siōng特別ê所在,就是「自命不凡」,而且是「心驕氣傲」,「貪求無度」,m̄-nā án-ne,in siōng會「講白賊」,tī眾人面前會「假做勇敢」。以上chiah-ê lóng是teh指行為邪惡ê人,而正直人不會án-ne。

第8節,chit節是對偶句型。以「犯罪ê人」kah「純潔ê人」對應,in做事ê方式是「彎曲」kah「正直」對照。

第9節、第19節,thang參考第十九章13節b句,嘮叨kah冤家,bē為厝裡帶來安寧,kan-taⁿ會加添生活ê困擾kah不安。

    第13節,chit節mā thang參考第廿四章11到12節。知影幫助「sàn-chhiah人」ê人,必定會得上帝ê看顧。自私ê人bē關心別人,chit種人tī tú-tio̍h困難ê時,mā bē有人幫伊。

    第14節,chit節thang參考第十七章8節、第十八章16節。講出官場ê現象,m̄-koh tio̍h注意chit種「thang停止大受氣」ê時間真短,利益一旦改變,過去所有o͘-se ê效果隨時會消失。

 第22節、第30節、第31節,chit三節經文意思真相近,lóng tī說明敬畏上主chiah是真正「贏家」。詩篇第三十三篇16到19節ê詩人講:「君王bē-tàng 因為兵chē 就得tio̍h 救;勇士bē-tàng 因為氣力大就得tio̍h 救。Óa 靠馬,無一定會得tio̍h 救;靠大氣力mā 無一定ē-tàng 救人。上主ê 目睭看顧敬畏祂ê 人,照顧仰望祂ê 慈愛ê 人。祂會救in ê 性命脫離死亡,保存in ê 活命度過飢荒。(全民版)」mā thang參考箴言第廿四章5節,傳道書第九章16節、18節。真正有智慧ê人,比手上有武器ê人koh khah容易得tio̍h勝利。

第23節,有智慧ê人,伊開嘴講話lóng會「謹慎」,免得惹來不必要ê「禍患」。

第25節,pîn-tōaⁿ ê人kah自刣仝款,因伊kan-taⁿ會為家己斷了生路。


經文:

箴言 22:1-22:29

註釋:

Chit章分做兩個段落,其一是第1到16節,mā講tio̍h智者kah愚者之間ê差別。其二是第17到29節,這部分ê內容一直延續到第廿四章22節,lóng是屬tī另外收集到ê智慧之言。

第1節,chit節thang參考傳道書第七章1節a句講:「好名譽贏過珍貴ê香水。」意思真接近。Chit節講出tī人間世界,m̄是只有金銀chiah是寶貝,有比chiah-ê koh khah貴重ê物,就是信譽。

第2節、第9節,參考箴言第十四章31節。雖然「sàn-chhiah人」kah「有錢人」lóng是上帝「所造」,m̄-koh知影對sàn-chhiah ê人生出憐憫ê心,卻m̄是用輕視ê態度看待,chiah是有智慧ê富人,chit種人必定會得tio̍h上帝ê賜福(參考箴言十九:17)。

第3節、第5節,chit兩節lóng提起「機警ê人」會知影怎樣避開「災禍」,只有「愚戇ê人」chiah會無顧一切往前行而掉落tī「邪惡人ê羅網」裡。

第4節,具體講出「敬畏上主」者ê所得,乃是「富足、光榮、長壽」。富足,指ê是豐富ê性命內涵(參考約翰福音十:10)。光榮是智慧者ê記號,而長壽是teh指一個人有真強ê性命力。

第6節、第15節,chia提起教導gín-á「行正路」是身為長輩ê責任。Án-ne會改變in性命ê態度,mā會hō͘ in永遠懷念。

第7節、第13節,chia是講出現實社會ê生活形態。Kah第十章15節所講ê:「財富是有錢人ê保障;貧困毀滅了窮苦人。」chiah-ê lóng是teh鼓勵人tio̍h勤勞工作,m̄-thang kui工奢華宴樂(參考十二:24、27),á是chhōe藉口推託工作(第13節)。Koh講,mā是警告人,如果因pîn-tōaⁿ來致使負債,he會是性命悲哀ê事。

第8節,「不義ê種籽」,表示邪惡ê事。意思指專門做pháiⁿ事ê人,結果kan-taⁿ會為伊帶「無窮」ê「後患」,結果伊所有累積起來ê一切,lóng會歸之烏有。

第10節,chia「狂傲ê人」kah愚戇人是仝款ê,in lóng m̄承認有上帝。因為án-ne,chiah會引起koh khah chē ê「糾紛、冤家、侮辱」等。

第11節、第29節,chit兩節lóng提起一個有智慧ê君王所kah意ê部屬,就是「純潔ê心」kah「辦事敏捷ê人」,卻m̄是只有會講好聽話語ê臣僕。

第12節,chit節thang參考第五章21節、第十五章3節。「真理」指純潔、無瑕疵,á是teh指真實ê心思意念,mā thang指聰明者有智慧ê言語。

第14節,chia指ê「陷阱」,ná親像獵人tī樹林內設計掠動物ê陷阱仝款。淫婦總會以甜言蜜語hō͘人掉入陷阱裡,卻m̄知死亡ê來臨。「上主所討厭ê人」是teh指邪惡者。

第16節,「向有錢人送禮」,這是teh指o͘-se ê意思。因為有錢人根本無需要別人送禮hō͘伊。相對ê,「剝削sàn-chhiah人」是上帝所討厭ê行為,上帝一定會追討chit種人ê罪行(參考十四:31)。

Tùi第17節開始,一直到第廿四章34節止,chit段經文被歸類tī「一般智慧ê言語」。Kah頭前第一到九章ê句型相近。分做兩大部分,其一是tùi第廿二章17節到第廿四章22節,這部分共計有三十則。Tī chit段經文中,就是用「óa靠上主」(á是「敬畏上主」)開始,mā以「敬畏上主」結束,中間tī第廿三章17節mā是用「敬畏上主」為重點經文。其二是tùi第廿四章23節到34節。

第17到21節,chit段經文開始就提醒人tio̍h注意聽智慧言語ê「教導」,所謂智慧言語乃是tùi「óa靠上主」著手。「óa靠上主」kah「敬畏上主」(參考廿三:17)是仝款意義,因為會óa靠上主ê人,就是謙卑ê人,in kah狂傲ê人完全無仝。

第22到23節,chit兩節是第1則智慧之語。講tio̍h好款待sàn-chhiah、軟弱ê人,絕對bē-tàng欺壓in。上帝會對chit種欺壓貧困ê人採取懲罰ê動作(參考十四:31、廿三:10)。類似chit種教導tī先知ê文獻中非常明顯,lóng是teh警告人m̄-thang欺負sàn-chhiah人。相對ê,第十四章21節講「憐憫sàn-chhiah ê有福」、第十九章17節講「賑濟sàn-chhiah人就是teh借hō͘ 上主;祂會照伊所行ê 好事來還伊。(全民版)」、第廿二章9節則講:「好心ê 人會得tio̍h 福氣,因為伊 kā 米糧分 hō͘ sàn-chhiah 人。(全民版)」

第24到25節是第2則智言。Chit兩節mā是一般常聽tio̍h ê「近墨則烏」。人真容易學習pháiⁿ ê行為。類似ê句話tī第十二章26節,講:「義人引chhōa 伊ê 厝邊行正路;pháiⁿ人 ê 路 hō͘ 人失迷。(全民版)」mā thang參考第廿四章1到2節。

第26到27節是第3則。Tī箴言中kúi-nā pái提起chit件m̄-thang為別人「作保」chit件事(參考六:1、十一:15、十七:18、二十:16、廿七:13)。Chit句「連你ê床lóng會hō͘人搬行」,意思是teh指厝mā會因為án-ne hō͘人the̍h走。

第28節,chit節是第4則。Kah第廿三章10節仝款ê意義。所謂「移動」祖先留落來ê「舊地界」,表示土地hō͘人強佔,á是併吞。摩西律法嚴格規定不thang án-ne做(參考申命記十九:14、廿七:17)。

第29節,這是第5則。「辦事敏捷ê人」,表示知影時間kah工作效率ê重要性,chit種人bē kah遊手好閒ê人泡做伙。有智慧ê君王一定會歡喜chit種臣僕。

經文:

箴言 23:1-23:35

註釋:

Chit章是tùi第6則到第18則ê一般箴言。

第1到3節,這是第6則。提醒臣僕á是經商ê人必需要注意ê事項,就是參加宴席ê時,m̄-thang因貪嘴而陷入餐會中ê陷阱。

第4到5節,這是第7則。Chit兩節所講ê真類似台語講「人兩隻腳,錢四隻腳」,意思是無論怎樣追,mā bē滿足人心貪婪ê需要。因為án-ne,ài有滿足ê意念,m̄-thang一直追求金錢。

第6到8節,這是第8則。Chit段經文mā thang參考第廿六章24到26節。Chia所講ê「吝嗇ê人」kah第廿八章22節所講ê「貪婪ê人」是仝款ê意思。Kah常聽tio̍h ê俗語:「黃鼠狼kā雞拜年,不懷好心。」有仝款ê意思。

第9節這是第9則。Chit節thang參考第一章7節b句、第22節、第十二章1節b句。Chiah-ê lóng tī說明愚戇人ê特徵,in藐視甚至討厭智慧之語。

第10到11節,這是第10則。Thang參考第廿二章28節第4則箴言,另外mā thang參考第十五章25節。聖經一再教導tio̍h保護孤兒寡婦,絕對bē-tàng欺負in(參考出埃及記廿二:22,申命記廿四:17),卻是應該主動伸手幫助in(參考利未記廿五:25)。

第12節,這是第11則。Chia ê「師長」,表示有智慧ê長輩。「聽從」in ê「訓誨」就是tī接受in ê「智言」仝款,會hō͘人有智慧。

第13到14節,chit兩節是第12則。講tio̍h父母對子女應該盡ê責任,就是beh「認真管教」kiáⁿ。

第15到16節,chit兩節是第13則。「少年人」有「智慧」,mā teh表示已經長大、成熟,會hō͘伊身邊ê人感覺欣慰,甚至感覺kah有榮焉。

第17到18節,chit兩節是第14則。Thang參考箴言第三章31節、第廿四章1節、19節。「罪人」kah「邪惡ê人」仝款,lóng是上帝所討厭ê對象。一個知影「敬畏上主」ê人,必定會遠離chit種作惡ê罪人,而蒙上帝ê賜福。

    第19到21節,chit三節是第15則。Chit三節講tio̍h勸勉生活kho͘-á中,所結交ê朋友,一定tio̍h遠離hiah-ê「好酒貪食ê人」,因為chit種人真pîn-tōaⁿ,bē殷勤工作。

第22到25節,這四節是第16則。第22節mā thang參考十誡ê第五誡(參考出埃及記二十:12)。第23節thang參考第四章5節、7節。Chit段lóng teh強調擁有「真理」、「智慧」、「學問」ê重要性,因為chit三項就是性命ê氣力,「千萬bē-tàng賣」,一定會妥善保存,chiah ē-tàng hō͘家己存活。「義人」kah「明智」lóng teh表示聰明ê意思,chit種kiáⁿ必定hō͘父母感覺欣慰。

第26到28節,chit三節是第17則。Chit段kah第五章、第七章講tio̍h有關避免淫亂ê事仝款。

第29到35節,這是第18則。Chit段經文lóng kah所謂ê「貪杯」有關。酒常常hō͘人亂性。傳道書第十章17節講:「邦國,你ê 王若是尊貴ê 人ê kiáⁿ,你ê 貴族照時lim 食, 為tio̍h beh補in ê體力,m̄ 是因為好(hò͘ ⁿ )lim,你就有福氣。(全民版)」tī以弗所書第五章18節使徒保羅ê勸勉裡án-ne講:「Mā m̄ -thang 酒醉,因為酒醉會致到敗壞;顛倒 tio̍ h hō͘ 聖神 kā lín 充滿。(全民版)」tī提多書第二章3節soah講「不作酒ê奴隸」,beh做好ê模樣。

經文:

箴言 24:1-24:34

註釋:

Chit章第1到22節是繼續前段ê 30則箴言,tī第22到34節是另外一段箴言語錄。

第1到2節,這是第19則。Chit兩節kah第廿三章17節、本章第19到20節仝款。一定tio̍h kah作惡ê人保持距離,因為chit種人kan-taⁿ會「做pháiⁿ事」。

第3到4節,chit兩節是第20則。Tùi第八章21節,就thang看出有智慧ê人,ná親像一個富人仝款,伊ê厝必定永遠不欠缺,而且因為有智慧,而hō͘厝裡ná親像充滿貴重ê珠寶一般hō͘人欣慕。

第5到6節,chit兩節是第21則。Thang參考第十一章14節、第二十章18節、第廿一章22節。

第7節,chit節是第22則。Chit節用「明智」kah「愚戇」相對照。愚戇ê人永遠無法度瞭解有智慧ê人所講ê話。Tī重要ê「會議」場合,愚戇ê人只有ē-tàng聽明智ê人講,m̄-koh in即使聽mā聽m̄-bat。Chia ê「會議」,mā thang當做聖經時代ê「城門口」,表示眾人聚集ê所在。

第8到9節,chit兩節是第23則。Thang對照第1到2節來看,就會清楚知影為甚麼作者ài明智ê人遠離作惡ê人。

第10節,這是第24則。Chit節thang參考耶利米書第十二章5節。表示tī「患難ê日子」裡,就需要koh khah堅定ê信心,chiah ē-tàng hō͘家己khiā穩,bē搖動而倒落去。

第11到12節,chit兩節是第25則。Mā thang參考第十六章2節、第廿一章2節。Chia真清楚teh強調一個明智ê人,會知影伸手救助無辜ê人。無人thang只顧家己,因為人是群居ê,每一個人lóng kah別人有連帶關係。

第13到14節,這是第26則。Chia所講ê「蜂蜜」有另外一種含意,就是teh指tio̍h智慧ê意思。Á智慧乃是上帝ê話語,其甜美ná親像蜂蜜一般。Thang參考詩篇第十九篇7到10節所講ê,上主ê律法、命令、法則、訓誨、規範、判斷等,「比金子可貴,贏過siōng精純ê金子;in比蜂蜜甘甜,贏過siōng純淨ê蜂蜜。」作者tī chia講「智慧kah知識」對一個人ê心靈就ná親像蜂蜜仝款甘甜,會帶hō͘人ê性命看見「希望」、「光明」。

第15到16節,chit兩節是第27則。Chit兩節koh一pái提起「義人」kah「邪惡」者之間ê互動關係。Chia ê「跋倒」是teh指失敗,m̄是犯罪。作者提醒邪惡者,m̄-thang kā邪惡ê思維動到義人ê身上去,因為義人是kah上帝有親密關係ê人。義人受害,上帝必定會替伊伸冤。

第17到18節,這第28則。Thang參考第十七章5節。Chit兩節ná親像俗語所講ê,m̄-thang幸災樂禍,而是beh心存憐憫。

第19到20節,這是第29則。Thang參第三章31到32節、第廿三章17節、第廿四章1節。另外thang參考詩篇第三十七篇1節。Chiah-ê經文lóng有提起m̄-thang羨慕作惡ê人,因為上帝自有一把尺會回應chiah-ê作惡ê人。

第21到22節,這是第30則。Ná親像頭前已經有提起過ê,chit段智者之言30則,是tùi「敬畏上主」開始,然後tī中間提起「敬畏上主」(參考第17節),tī最後chia用「敬畏上主」做結尾。表示一切lóng需要tùi「敬畏上主」做起。會敬畏上主ê人,必定bē kah作惡ê人仝伴,因為知影上帝必定會伸手制裁chit種人。若kah chit種作惡ê人做伙,mā會連帶受懲罰面臨災害。

第廿四章23到34節,這是另外一部分智慧者ê言語。

第23到25節,thang參考箴言十七章23節,阿摩司書第五章10到15節。摩西律法mā有明確規定法官bē-tàng收受o͘-se,因為收o͘-se會hō͘人chheⁿ-mê、心不正(參考申命記十六:19—20)。Chia則講按照公義審判ê法官,會得tio̍h眾人ê讚譽,而且會事事亨通。

第26節,「誠實」ê話,連國王mā會歡喜聽(參考十六:13)。講話誠實ê朋友,chiah是真誠懇ê友誼ê表現。

第27節,chit節講tio̍h一個人一定tio̍h衡量家己ê能力有jōa-chē,不虛張聲勢,用真踏實ê腳步建造家業。

第28到29節,thang參考第廿五章18節。Tī十誡ê第九誡之「bē-tàng做假證陷害人」(參考出埃及記二十:16),以及bē-tàng存有報復ê心,這mā是耶穌基督ê教示所講ê「bē-tàng向欺負lín ê人報復」(參考馬太福音五:39)。使徒保羅講beh「以善勝惡」(參考羅馬書十二:21)。

第30到34節,chit段經文主要teh說明「pîn-tōaⁿ人」kah「愚昧人」ê態度,就是m̄知性命隨時會發生患難來致使sàn-chhiah,ná親像「帶武器ê匪類來打擊」人ê性命仝款忽然來臨,hō͘人措手不及。Chit兩節mā thang參考第六章6到11節。

經文:

箴言 25:1-25:28

註釋:

Tùi第廿五章開始,一直到第廿九章,lóng清楚表明是所羅門王ê箴言續篇。Chit段箴言有一個特色,就是句型簡單、直述,而且lóng呈現出「對句」,讀起來容易明白。

第1節,chit節特別註明是「猶大王希西家宮廷ê人抄錄ê」。希西家王是tī主前第715到686年執政。Tī伊當政時間bat有過一個目nih-á ê宗教改革運動出現(參考列王記下第十八到二十章)。希西家王mā有文學ê素養,伊會寫詩,以賽亞書第三十八章10到20節ê詩歌就是伊寫ê。

第2到3節,上帝是「奧秘」ê,人想beh瞭解上帝是無可能ê事,ná親像先知以賽亞所講ê:「上主講:我ê意念m̄是lín ê意念;我ê道路m̄是lín ê道路。Tú親像上主講:我ê 念頭m̄ 是lín ê 念頭,lín ê 路m̄ 是我ê 路。因為天án 怎khah koân 地,我ê 路mā án-ne khah koân lín ê 路,我ê 念頭khah koân lín ê 念頭。(全民版)」(以賽亞書五十五:8—9)m̄-koh,本身是一個君王siōng重要ê就是beh ē-tàng「辨明是非」,正確地判斷事務,並且主持公道。M̄-koh m̄-thang想beh去瞭解君王ê「思想」、心思,因為君王擁有權柄,伊隨時會改變想法。

第4到5節,君王往往tī無注意ê時chūn,會hō͘身邊ê小人宦臣包圍,ná親像若beh hō͘「銀á」純潔,銀匠就一定tio̍h先kā銀á ê渣滓除去,chiah有辦法鑄造出好ê器皿。仝款,君王tio̍h先「清除」身邊ê「小人」,chiah有辦法建立廉ē-tàng ê政府。

第6到7節,chit兩節經文thang參考比較khah路加福音第十四章7到11節。耶穌基督ê教示中mā提起仝款ê句話。

第8到10節、第18節,chit段經文提起糾紛ê事。若是beh當證人,就一定tio̍h是講誠實話,絕對bē-tàng tī法庭上做假證陷害別人(參考出埃及記二十:16)。M̄-nā án-ne,beh維護kah厝邊之間ê關係,就一定tio̍h遵守siōng基本ê守則,就是「bē-tàng洩露別人ê秘密」,這是teh指m̄-thang談論別別人裡ê隱私,á是窺探厝邊ê秘密。即使知影mā無kā它the̍h來當做話題論人長短。

第11節,這是一節不時被引用ê箴言。表明有智慧ê人,會講出得體ê話,鼓舞人心。

第12節,「經驗豐富ê人」,是teh指性命ê體驗,經歷過真chē滄桑,chit種人充滿tio̍h智慧。Chit種人講出ê「警告」,比任何貴重ê「飾物koh khah有價值」,因為有智慧ê警言對性命有極大ê幫助。

第13節,chit節thang kah第廿六章6節相對照。Chia所講「可靠ê使者」,會hō͘差hō͘伊ê人安心,bē擔憂。Mā thang參考第十三章17節。

第14節,chit節講出虛假ê應允,對人lóng無益處(參考雅各書二:15—16)。

第15節,chit節講tio̍h「耐心」ê重要性,贏過任何堅強ê抵抗,甚至君王ê權力。

第16節、第17節、第27節,lóng提起m̄-thang「食過量ê蜂蜜」,表示即使是非常好ê物件mā需要適thang而止,bē-tàng lóng無節制。Mā thang用來警告人,m̄-thang總是聽諂媚ê話語,一兩pái有可能好聽,m̄-koh聽chē了就會hō͘人身心lóng敗壞à。仝款ê,「m̄-thang常常訪問厝邊」,表示kah人交往mā tio̍h知影節制,chiah bē hō͘人感覺「厭煩」。

第19節,「pháiⁿ牙」、「跛腿」,lóng teh表示身軀ê無適合。若是一個人tī「患難」ê時chūn,óa靠一個bē-tàng信任ê人,結果就會ná親像用pháiⁿ嘴齒食物件,用跛腳走步仝款,kan-taⁿ會增加痛苦而已。

第20節,「對傷心ê人唱歌」,ná親像以色列人民被掠到巴比倫做奴隸ê時,不時受tio̍h chit種凌虐、欺負、侮辱(參考詩篇一三七:3—4),m̄-nā無得tio̍h安慰,卻是hō͘ in koh khah痛苦,ná親像「tī傷口上擦鹽」仝款。

第21到22節,耶穌基督提起有關怎樣ê態度對待仇敵(參考路加福音六:27—36)。使徒保羅mā引用chit兩節經文,伊強調tio̍h「以善勝惡」來對待仇敵(參考羅馬書十二:20)。

第23節,「誹謗」,這是teh指不實ê話指控別人。「北風」是teh指寒冷ê意思。

第24節,kah第廿一章9節、第19節、第廿七章15節有仝款ê意思。

第25節,「遠方」,表示家鄉。Ná親像俗語所講ê「家冊抵萬金」仝款,顯得珍貴、難得。

第26節,照理講,「義人」應該是會hō͘「邪惡人」kiu-kiu chiah-tio̍h。Chia卻發見顛倒ê現象出現,表示chit種人原本是「義人」,卻因為收受o͘-se ê結果,hō͘原本清澈ê水混濁,koh khah án怎都看bē清à。

第28節,chit節thang參考第十六章32節。「性情躁暴」,表示一個人欠缺自制力,chit種人無法度約束家己ê衝動,就真容易受tio̍h「攻擊」。

經文:

箴言 26:1-26:28

註釋:

第廿六章主要ê重點teh描述愚戇人kah pîn-tōaⁿ人ê特性。其實,chit兩種人ná親像一個銅板ê兩個面仝款,是仝款ê。

第1節、第8節,chit兩節lóng提起「讚揚愚昧人」ê結果,就是m̄-nā無效果,卻是得tio̍h反效果,ná親像「熱天下雪,收割ê時落雨」,á是用「弓弦」發射「石頭」仝款,lóng是無符合需要。

    第2到3節,chia用「鳥á飛來飛去」,用來形容愚昧人無論是祝福á是詛咒,lóng是bē有任何功效,原因是in ê發言本身就是無理由,只是亂講話而已。M̄-koh任何對愚昧人ê教導,必需要非常清楚無法度含糊,應該用「棍子」就beh用,若無,伊iáu是仝款無清楚到底是怎樣一回事。

第4到5節,kah愚戇人討論問題,kan-taⁿ會hō͘家己kah in仝款愚戇。因為án-ne,siōng好ê方式,就是用in提出ê問題回答in,án-ne,當in發見回答是hit種ê愚戇ê時,chiah會發見原來是家己愚戇,別人kah in無仝款。

第6節,chit節thang參考第廿五章13節。愚戇人基本上是不可靠ê。就算託in轉達消息,mā會pháiⁿ了事,kan-taⁿ會加添「麻煩」,並bē有任何幫助。

第7節、第9節,「箴言」、「智言」lóng仝款ê意思,是teh指智慧之語。就算愚戇人想beh用chit種智者之言來講話,mā會hō͘人看破腳手。Bē因為án-ne加添in任何光彩。這其實mā是teh講,一個人m̄-thang隨便引用智者ê話來講話。

第10節,愚戇人無論是做事,á是受主人ê命做tāi-chì,lóng會hō͘ koh khah chē人擔心,加添麻煩,甚至是白做無功而已。

第11節,彼得後書第二章22節mā引用chit句。表示愚戇人所做ê事bē有甚麼新意,kan-taⁿ會一再回味做過而且是已經無適合ê事而已,就ná親像狗食吐出來ê食物仝款。

第12節,chit節thang參考第廿九章20節。愚戇人已經夠笨ê了,m̄-koh若是用嚴厲ê方式教導,iáu ē-sái愚笨ê人有進步ê空間(參考第3節)。Ē-sái講是,若tú-tio̍h lóng無實chiah,卻自認為真有才華ê人,chit種人比愚戇人就koh khah笨à。使徒保羅對chit種自負、驕傲ê人mā有chit種看法(參考哥林多前書三:18)。

第13到16節,這四節lóng是kah「pîn-tōaⁿ人」有關。Chia描述pîn-tōaⁿ人ê特質,就是pîn-tōaⁿ人siōng歡喜「賴床」,無想beh工作,講睏koh m̄是。In lán-si,lán-si到連the̍h食物來khǹg tī嘴裡都「嫌麻煩」,siōng害ê,就是自認為真聰明,其實是愚笨至極。

Tùi第17節開始直到第28節ê chit段經文,lóng是teh說明歡喜惹是生非ê人,siōng容易顯露出來ê樣式。

第17到21節,chit段經文描述冤家ê事。往往是tùi chē管閒事,而且是根本無清楚糾紛ê原因,就直接介入。Siōng愚戇ê作法,就是用欺騙ê話語處理糾紛ê事,結果kan-taⁿ會增加koh khah chē困擾,而且可能帶來傷害。Á siōng不應該ê,就是故意用使弄ê話,帶來koh khah chē ê糾紛。

第22到28節,chit段經文lóng是kah講話是m̄是誠實有關;誠實ê話,對人ê性命有再生ê推進力,相對ê,虛假、不誠實、花言巧語、諂媚ê話,lóng是對人性命ê摧殘。M̄-koh講chit種「言不由衷」ê話ê人,就ná親像挖了陷阱想beh陷害別人,結果是害了家己。


經文:

箴言 27:1-27:27

註釋:

Chit章khah sêng一般諺語,無特別明顯對比ná親像明智kah愚戇者之間ê差別。M̄-koh iáu是thang清楚看tio̍h對偶句話。

第1節,chit節thang參考路加福音第十二章16到20節,記載一位財主teh phah算怎樣用伊ê財富過生活ê譬喻,結果耶穌講tī上帝眼中,hit位財主是一個真「糊塗」ê人,因為當夜伊ê性命hō͘ 上帝收tńg去,則伊所有ê一切lóng會歸tī別人。雅各書第四章13到14節對箴言chit節經文mā有真好ê回應。

第2節,chit節是勸人m̄-thang家己誇耀。Hō͘別人來誇耀會比較khah正確。先知耶利米認為若是beh誇耀,就beh誇耀認bat上帝,卻m̄是人ê財富、智慧,kah氣力(參考耶利米書九:23—24)。因為上帝chiah是性命ê主宰。使徒保羅強調若是beh伊誇耀,伊就只誇耀家己ê軟弱(參考哥林多後書十一:30),若無,就是只誇耀上帝奇妙ê作為。Soah ē-tàng hō͘上帝o-ló ê人才是真實ê,m̄是「自吹自擂ê人」(參考哥林多後書十:17—18)。

第3到4節,愚昧ê人往往會表現出憤怒、嫉妒,in造成ê禍害khah贏過一切。因為愚昧ê人無法度控制情緒,只有聰明ê人知影怎樣穩tiâu家己。

第5到6節,這是一般人真oh做會到ê事,因為真少人會接受「公開ê譴責」。所謂「做ê疼」,是teh指虛情假意,kan-taⁿ會是如同在傷口掖鹽仝款。因為án-ne知影敵人ê熱情,就一定tio̍h防範,即使是簡單ê「相攬」mā一定tio̍h當心受騙。

第7節,這mā如仝一個句時常聽tio̍h ê俗語:飢不擇食。

第8節,chia所講ê「離鄉背井」,意思是teh指ná親像今á日ê街友仝款。已經會失去thang安居ê處所,mā chhōe bē-tio̍h thang維護生活ê工作者。Chit種人ná親像「鳥á離巢遠飛」,án-ne就無法度孵卵生kiáⁿ,延續下一代。

第9到10節、第17節,lóng提起友情ê重要性。第10節ná親像台灣俗語所講ê:「遠親不如近鄰。」好朋友是hō͘性命ê內涵koh khah昇華。

第11節,thang參考第十章1節。智慧,thang tńg來堵別人ê譏笑、侮辱。

第12節,是對偶句話,thang參考第廿二章3節。「機警ê人」kah「愚昧人」是相對ê。前者知影躲開災禍,後者kan-taⁿ會無知地接近而惹禍上身。

第13節,kah第二十章16節仝款。Lóng是teh提醒m̄-thang為生份人作擔保ê事。

第14節,「清早吵醒朋友」已經是非常無知ê舉止,加上「大聲為伊祝福」,是koh khah無知。Chia ê「祝福」有「講諂媚ê話」ê意思,表示虛假到極點。

第15到16節,thang參考第十九章13節、第廿一章9節、19節等等,表示嘮叨ê婦人,會成做丈夫沉重ê負擔。其實,chia ê「嘮叨」就是teh指「潑婦」仝款ê潑辣凶悍。

第18節,chit節用「看管無花果樹」來形容忠實tī主人ê奴僕,必定會得tio̍h主人ê賞識有好ê 回報。

第19節,chit節說明每一個人lóng應該知影家己是甚麼款子,m̄免隱瞞,mā m̄免掩遮,koh khah無用做,因為甚麼款子就是甚麼款子。Á是允准以騙得了別人,卻騙不了家己。

第20節,慾望就ná親像陰府仝款深,永遠bē滿足需要節制。人ê慾望常常hō͘人m̄知滿足。使徒保羅勸人tio̍h知足,特別是tī錢財ê事頂面,siōng容易hō͘人陷入誘惑裡(參考提摩太前書六:6—10)。知影滿足ê人,伊真容易生活,而且會得tio̍h性命ê歡喜。

第21節,一個人ê真實á無,lóng需要經過「爐火鍛鍊金銀」一般。堪得考驗ê人,chiah會hō͘人o-ló。

第22節,chit節thang參考第廿六章11節,表示愚戇人真oh改變,因為ná已經是僵化ê性格真oh改變。這通常mā是一般人所講ê「本性難移」ê意思。

第23到27節,chit段經文用羊群來譬喻殷勤ê人努力做工,即使tī siōng困境ê時刻,mā會得tio̍h飽足。一個聰明ê人會知影運用家己手上有ê能力,認真工作,án-ne,伊kah厝裡ê人就bē有缺乏。

經文:

箴言 28:1-28:28

註釋:

Chit章是用「正直」做主題彙集起來ê箴言。

第1節,chit節是對偶句話,用「邪惡人」kah「正直人」成對比。所講ê內容ná親像俗語所講ê:「m̄做虧心事,m̄驚半暝有人敲門。」另外一句是:「有理行天下。」

第2節,chit節mā thang參考第廿九章2節。Chit節thang講和以色列ê歷史有關係;tī所羅門王往生後,以色列分裂做做南北二國,北國以色列,南國猶大。北國tùi開國國王耶羅波安一世ê主前930年開始,到何細亞ê主前721年亡國止,短短ê二百十年時間,總共換了十九個國王,有九個王朝,thang看出竄奪王位ê情況真嚴重。先知何西阿就án-ne傳出上帝ê話講:「In 熱 kah 親像火爐,吞滅 in ê 士師。In ê 君王lóng 倒落去;in 中間lóng無人求叫我。(全民版)」(何西阿書七:7)chit種國家政情必定bē穩,社會mā真容易紛亂。相對ê,南國猶大則穩定了真chē,tùi羅波安ê主前930年開始,到最後西底家時代終止ê主前586年,前後共計三百四十五年中,mā是十九個國王,m̄-koh lóng是屬tī大衛ê王朝。

第3節、第12節、第15節、第16節、第28節,chiah-ê經文lóng kah統治者有關,好ê統治者必定是通達事理,而且會維持公義、照顧sàn-chhiah人等弱勢者。相對ê,如果是一位暴君,就完全無仝款,伊m̄-nā會欺負sàn-chhiah人,而且會手段殘酷,大家kan-taⁿ會想出所有ê辦法beh閃避伊ê統治。其中第12節、第28節,lóng是對偶句話。

第4節、第5節、第7節、第9節,chiah-ê經文lóng kah遵守律法有關係。其中第4節是對偶句話。Á tio̍h注意ê,chia所講ê律法,是teh指上帝ê規矩。因為án-ne,遵守律法規矩做tāi-chì,就會知影上帝所kah意ê是甚麼。違背上帝法則ê人,就算祈禱,mā bē得tio̍h上帝所垂聽(參考詩篇第一篇,約翰福音九:31)。

第6節、第8節、第11節、第20節、第21節、第22節、第24節、第27節,chiah-ê經文lóng kah財富ê來源,以及對貧困者ê關懷態度有關;一個人富有,如果無疼心,án-ne累積起來ê財富mā會失去。仝款ê,如果一個人ê財富是因為tùi貪婪、詐欺、高利貸、收受o͘-se、剝削別人而累積起來ê財富,chit種人bē得tio̍h上帝ê賜福。第27節是對偶句話。

第10節,chit節說明只有心思邪惡ê人chiah會誘惑正直人去作惡,chit種人最後必定會ka-la̍uh tī家己所設計ê陷阱中。相對ê,不心存陷害人ê人,就是心地純潔者,一定會蒙上帝賜福。

第13節,chit節lóng是對偶句話。用「掩蓋(khàm)」kah「承認」過錯,這二者之間必定無仝。因為上帝會以仁慈對待承認家己過錯ê人(參考約翰一書一:9)。

第14節,chit節mā是對偶句話。Chit節真清楚講出一定tio̍h用敬畏ê心靈敬拜上帝,bē-tàng固執不冥,心地剛硬,chit種聽bē落去上帝ê話,結果是自取滅亡。

第17節,刣人,這是上帝所嚴厲禁止ê事。M̄-thang阻止對chit種人受tio̍h律法ê懲罰。因為這是伊一定tio̍h接受ê懲罰。

第18節,chit節是對偶句話。Mā thang參考箴言第十章9節。「行為正直」kah「行為詭詐」成相對。Chia是teh指照律法ê規定做tāi-chì,而且是誠實,m̄是鑽牛角尖ê思緒。

第19節,chit節thang參考第十二章11節。只有勤勞ê人才bē浪費時間tī hiah-ê瑣碎不事生產ê事頂面。Chit種作穡人絕對會有存糧。相對ê,必定sàn-chhiah。

第23節,講誠實話ê人,一定會受tio̍h koh khah chē ê「愛戴」,相對ê,歡喜講「諂媚」ê話ê人,一定會hō͘人輕視。

第25節,chia ê「自私」隱含tio̍h「貪婪」ê意思。Chit種人siōng容易挑起爭端,「製造紛爭」。Á「信靠上主」ê人一定會得tio̍h上帝ê賜福,永遠bē缺乏。

第26節,愚昧ê人,無論怎樣勸伊都無用。結果必定引來滅亡。M̄-koh相對tī聰明ê人,必定會聽從智者ê勸勉。Chit種人必定會得tio̍h幫助。


經文:

箴言 29:1-29:27

註釋:

Chit章以聰明ê君王做主題,說明有智慧ê君王m̄-nā是國家社會ê福氣,koh khah是人民ê幸福。同時mā用「義人」、「明智人」來表示好ê君王,相對ê,用「愚戇人」、「邪惡人」來形容昏君。

第1節,chia講愚戇ê人即使用心教導、責罰,mā是改變不了伊。Chit種情形ná親像撒母耳記上第二章25節所描寫ê祭司以利ê kiáⁿ仝款。

第2節、第4節、第12節、第14節、第16節,chiah-ê經文lóng用來描述一個好ê君王必定會「秉公行義」,hō͘人民受益,chit種國家一定強盛,chit種君王bē聽諂媚ê話,會知影維護sàn-chhiah人ê權益,chit種國家、社會一定長治久安。相對ê,一個愚戇ê君王,是人民ê悲哀,因為tī chit種君王統治之下,貪污一定盛行,國家真緊to̍h會敗壞,原因是伊歡喜聽虛假ê話,mā無執行公義ê政策。其中第2節、第4節lóng是對偶句話。另外,tī第廿八章12節、28節等等,mā提起好ê君王是人民ê福氣。

第3節,chit節是對偶句話。Chit節ê上半句thang對照第十章1節、第十五章20節、第廿三章24到25節、第廿七章11節等等,lóng是提醒kiáⁿ只有成做明智者,chiah會hō͘父母得tio̍h欣慰。下半句「結交娼妓ê,傾家蕩產」,chit句話thang用來對照第五章7到10節、第六章26節。Mā thang參考路加福音第十五章13到14節耶穌譬喻中所描述ná浪蕩ê kiáⁿ之景況。

第5節,thang參考第廿八章23節。Chia ê「諂媚」,表示虛假ê言詞,結果kan-taⁿ會hō͘家己受害,一點利益mā無。

第6到11節、第23節、第27節,chiah-ê經文lóng提起明智者kah愚戇者之間ê差別,mā是用對偶句話呈現出來。邪惡者kan-taⁿ想beh設計謀害別人,結果ka-la̍uh tī家己ê網羅中,因為伊既會陷害別人,就bē尊重別人ê權利。Kan-taⁿ會講究家己ê利益,會tī動亂中獲取私益,心中憎恨正直人。相對tī明智ê人,既不設計陷害別人,就bē ka-la̍uh tī家己ê網羅中,thang過自由ê生活。伊所想tio̍h ê,就是關心、協助貧困ê人ê需要,lóng是會想辦法協助維護社會安定。無論是做幫助人ê事,lóng是會心懷若谷,謙卑應對,m̄-koh對邪惡ê人會有強烈ê反感。

第13節,ná親像第廿二章2節所講ê:「sàn-chhiah人kah有錢人有一處仝款,二者lóng是上主所造。」chia主要是teh說明所有ê人lóng得tio̍h上帝仝款ê賞賜、恩典,m̄-koh,有kóa人知影怎樣運用上帝ê賞賜,貢獻社會,有kóa人卻是kā上帝ê恩典亂使用到作惡ê事頂面。Ná親像耶穌tī馬太福音第五章45節所講ê:「天父hō͘日頭照好人,仝款mā照pháiⁿ人;落雨hō͘行善ê,mā hō͘作惡ê。」上帝對待所有ê人lóng仝款,m̄-koh有ê人卻m̄知感恩,反tńg去行pháiⁿ事,án-ne chiah是hō͘上帝傷心ê所在。

第15節、第17節,chit兩節thang參考第十三章24節、第十九章18節、第廿二章6節、15節、第廿三章13節等等,chiah-ê經文lóng有提起管教子女,一定對in有幫助。

第18節,chit節提起遵守上帝ê律法,是維護kui個社會安定ê氣力。Chit種社會chiah ē-tàng安定,人民chiah有幸福thang講。

第19節、第21節,chit兩節lóng提起管教奴僕ê方式,一定tio̍h用實際而且真實ê態度規範。單用言語講教,無啥路用。Á放縱奴僕,kan-taⁿ會hō͘家己受害。

第20節,thang參考第十五章2節、第廿六章12節。「信口開河」表示隨便而且語帶誇耀,chit種人kah愚戇ê人無兩樣。

第22節,chit節thang參考第十四章17節、29節、第十五章18節、第廿二章24到25節等等。談及一個明智ê人,會知影怎樣控制家己ê脾氣,免得因急躁而製造koh khah chē ê紛爭。

第24節,「kah盜賊仝伴」,chit種人mā是盜賊,等於是hō͘家己受tio̍h律法ê制裁。

第25節,「驚人」,有幾種原因,其中之一,就是缺乏信心。因為án-ne,「信靠上帝」就是siōng好ê保障kah óa靠。

第26節,一般人lóng認為君王ē-tàng替人伸冤,á是hō͘人真chē利益,其實,真正對人ê性命有幫助ê,是上帝;祂賜hō͘人ê禮物chiah是永恆無變ê。Mā是對人ê性命siōng有幫助ê。君王所hō͘ ê,往往是利益一時而已,甚至有一工,伊會索取tńg去。


經文:

箴言 30:1-30:33

註釋:

Chit章kah第三十一章,ē-sái講是箴言ê後記。Tī第三十章特別標示tio̍h是「亞古珥ê箴言」,這「亞古珥」名只出現tī chia。所講ê「雅基ê kiáⁿ亞谷珥」是甚麼人?已經bē-tàng考。可能就是一位有智慧ê人。伊ê箴言有一個特點,就是真ài用「兩點」(第7節)á是「三點」(第15節)、「四點」(第18節、24節、21節、29節)ê方式來表達。讀起來就感覺真清楚、容易bat。特別是用「四點」á是「四件」來描述自然界kah人類社會ê行為;親像第11到14節ê四種人;第16節ê四種永bē講「有夠」ê存在;第19節ê四種自然景象;第22到23節ê四種事實;第25到28節所提起ê四種聰明小動物;第30到31節另四種動物。

第1節,「上帝m̄ kah我同在,我tio̍h bē-tio̍h幫助。」這真清楚koh再表明只有上帝chiah是賞賜智慧ê源頭。有上帝同在,即使是tī患難中,mā知影怎樣解困。

第2到4節,chit三節經文是延續第1節所提起ê需要有上帝同在。智者會知影用非常謙卑ê語句,講述家己認bat有限。特別是tī第3節提起「對有關上帝ê事lóng無所知」,然續後落來tī第4節非常清楚提出kui個宇宙ê創造,則大大超過人ê能力所知ê範圍。這tùi約伯記第三十八到四十一章,記載上帝回答約伯ê問話,thang看出kui個大自然界之浩瀚偉大,已經m̄是人ê智慧、常識所ē-tàng明白。

第5到6節,上帝ê話語無法度加添á是刪改,因為祂ê話語是性命ê語言(參考提摩太後書三:16—17)。Ná親像申命記第四章2節,上帝ài摩西轉告以色列人民所講ê:「我ê命令lín bē-tàng增減。Lín一定tio̍h遵行我所傳授上主—lín上帝ê誡命。」另外mā thang參考申命記第十二章32節。

第7到9節,chit段祈求兩件事ê內容真實在,ē-sái講是生活上siōng容易經驗得tio̍h ê,m̄-koh卻m̄是真容易實踐。原因貪慾一直是人性命siōng大ê障礙。

「無講白賊」,這是誠實ê另外一講詞。誠實,mā是箴言chit本經冊中siōng重要ê教示之一。「不窮mā不富」,這是teh指滿足、知足。使徒保羅講:因為貪財是萬惡ê 根源;有人貪戀錢財,就受迷惑來離開信仰,hō͘ 家己受真chē 艱苦。(全民版)」(提摩太前書六:10)一個人如果誠實、知足,生活就會感覺愉快、有力。Mā會真緊學tio̍h謙卑。第9節mā回應了第1節所提起ê,需要有上帝,絕對bē-tàng講「無需要」。

第10節,「批評伊ê奴僕」,這是teh指chē管別人ê厝務事,這結果是食力兼pháiⁿ看。

第11節、第17節,chit兩節經文thang參考出埃及記第廿一章17節,以及利未記第二十章9節,lóng清楚記載講:「凡咒罵父母ê,一定tio̍h處死。」第17節ê「嘲(sau)笑」一詞,指ê就是輕視ê意思。Mā只有chit種人才敢咒罵父母。M̄-koh無論是咒罵、輕視,lóng會受tio̍h上帝懲罰。

第12到13節,chit兩節提起m̄知謙卑ê人ê心態。當人想beh驕傲ê時,就beh看第4節提起上帝ê偉大。其實,渺小ê人,無甚麼好誇耀ê。

第14節,chit節mā反應了第1節所提起ê需要有上帝同在。因為無上帝同在ê人,會用「殘暴」ê手段「剝削sàn-chhiah人,吞食無助ê」,m̄-koh chit種人必定會受tio̍h上帝嚴厲ê懲罰。

第15到16節,「水蛭」,歡喜吸附tī人體上,一吸附上,吸tio̍h人體ê血,就不脫離。所以chia講「hō͘我」,意思是牠永bē脫離,因為án-ne mā無「有夠」chit-ê念頭。Kah水蛭仝款ê,就是(1)「陰間」,這是永遠bē「客滿」ê所在。(2)「無kiáⁿ ê婦女」,這tī古代社會是非常悲慘ê,因為伊會hō͘人認為是一個卑賤ê cha-bó͘人看待。顛倒,ē-tàng生育,而且生育真chē,乃是cha-bó͘人得榮耀。因為án-ne,古代ê cha-bó͘人從來bē對家己有娠生kiáⁿ講「有夠」。(3)「乾旱缺雨ê土地」正需要大量ê雨水,對雨水ê需求是jú chē jú好。(4)「蔓延不熄ê火」,這是真恐怖ê災禍。Kā第(1)ê「陰間」kah第(3)ê土地、水,是屬tī自然界ê現象,而第(2)kah第(4)項則屬tī人性ê慾望,ná親像火源一般,bē停止,kan-taⁿ會火燒koh khah chē、koh khah闊。

第18到19節,這四樣lóng chit工常生活中常見ê自然景觀。「鷹」,這是teh指牠飛翔天空,卻thang tùi高空猛然下撲食地上ê動物;蛇,無腳,卻thang tī石磐頂「爬動」mā bē摔落來;船卻thang順風,tī大「海上航行」;而「男女相戀」,確實是siōng無容易明白、奧秘ê一件事,因為這往往m̄是理性thang明白ê事,是超理性ê範圍。

第20節,chit節真特別,講tio̍h不貞潔ê cha-bó͘人,kah淫婦仝款。Chia形容浪蕩ê淫婦kā淫亂ê事當做ná親像食三餐á是偷食點心仝款ê容易、簡單。Mā就是講,chit種cha-bó͘人從來bē承認所犯ê過錯,cha-po͘人只要一接觸tio̍h伊而發生問題ê時,mā只有ē-tàng承受。

第21到23節,這是古代社會ê生活秩序。(1)古早時ê奴隸來源通常lóng是因為戰爭失敗ê緣故,chiah被俘虜去做奴隸,m̄-koh有一工奴隸卻變成主人,表示極大ê改變。(2)愚戇ê人chiah會需索無度、貪婪m̄知足,m̄-koh卻會知影飽足,真oh理解。(3)「討厭ê cha-bó͘人」mā ē-sái講是「無hông疼惜、愛憐」ê cha-bó͘人,差不多無人會想beh娶之做bó͘,因為人見人厭,ná親像第廿一章9節、19節、第廿五章24節、第廿七章15節等等所描述ê「嘮叨ê cha-bó͘人」仝款。Chit種cha-bó͘人mā ē-sái講是被丈夫所厭棄ê cha-bó͘人,遭丈夫冷落,m̄-koh taⁿ卻有人愛慕而kah伊結婚。(4)女婢代替主母ê地位,ná親像創世記第十六章1到6節所記載ê夏甲差一點á取代撒拉 ê地位仝款。

第24到31節,這是自然界ê景觀,三種極小ê昆蟲kah一種小動物—石獾。另外有三種大體積ê動物加上君王。

第32到33節,主要意思在tī勸勉人tio̍h謙卑,m̄-thang kah人起糾紛。


經文:

箴言 31:1-31:31

註釋:

這是另外一段智慧者ê語錄。Chit章thang分做兩個段落,其一是第1到9節,其二是第10到31節。

第1節,「利慕伊勒王」是甚麼人?tī以色列歷史上chhōe bē-tio̍h chit位君王ê名。

第2節,chit段經文是老母對kiáⁿ ê勸勉;開始hō͘ kiáⁿ知影伊ê出世是kah老母ê下願有關,mā就是講,kiáⁿ ê性命來源是上帝特別ê恩賜,chit種gín-á應該過「聖潔」á是「分別為聖」ê生活。Ná親像撒母耳ê出世,就是伊ê老母哈娜向上帝所下願得tio̍h ê(參考撒母耳記上一:11),mā像行洗禮約翰ê出世,乃是老父撒迦利亞向上帝祈求得tio̍h ê(參考路加福音一:13)。

第3到9節就是老母對kiáⁿ ê叮嚀。Chit段勸勉中主要有三點:(1)bē-tàng tī情慾ê事頂面,特別是tī cha-bó͘人身上浪費精力、金錢。(2)m̄-thang酒狂,因為這ē-sái君王亂了國事。(3)tio̍h伸張公義,替弱勢者伸冤。

第10到31節,這是一段頂港有名聲下港有出名ê詩歌,是o-ló「賢慧ê bó͘」ê詩歌,而「賢慧」,chit-ê詞ē-sái講是箴言chit本經冊裡siōng重要ê主題。箴言作者一再強調一個人ē-tàng擁有智慧,是因為敬畏上帝chiah ē-tàng得tio̍h。因為上帝就是智慧ê來源。Chit段詩歌總共有22節,tú好是用希伯來文22個字母秩序排列編撰而成。Kah詩篇ê第九篇、第十篇、第廿五篇、第三十四篇、第三十七篇,以及第一一九篇等詩歌仝款ê編撰方式。

Tī chit段詩歌中所描述ê賢慧bó͘,m̄-nā是家事ē-tàng手,而且是事業ê高手,這tī古代實在真無容易得tio̍h,因為古代社會只要求cha-bó͘人好好á管理家務事,真少會想tio̍h hō͘ cha-bó͘人mā參與丈夫ê事業。M̄-koh,chia所描述ê賢慧bó͘,卻是連管理家族ê事業mā得tio̍h眾人ê o-ló。詩人描述chit位有才德ê cha-bó͘人,是能力強,而且樂意賑濟窮苦人,koh khah難得ê是,伊mā是一個有「智慧」ê cha-bó͘人,知影講甚麼話對人有利益。

Kui篇詩歌ê重點就是tī第30節所講ê,外表ê美真容易流失、改變,mā m̄是真實,「只有敬畏上主ê cha-bó͘-gín-á應該受讚揚」,因為「敬畏上主ê cha-bó͘-gín-á」,就是賢慧ê cha-bó͘-gín-á,這就是詩人所beh表達ê。

重新查詢