重新查詢
經文:

腓立比書 1:1-1:11

註釋:

使徒保羅tī chit章主要表達幾個重要ê信息:一是伊感謝腓力比教會久長以來對伊ê支持,包括我人tī監獄裡,該教會iáu是仝款繼續關懷伊。二是伊向腓立比教會表明:只要ē-tàng kā耶穌基督ê福音傳開,就是好。其他ê,已經不重要à。伊表明性命活teh,就是為tio̍h beh宣揚耶穌基督ê救恩,án-ne,死去就有收成。Chit種收成就是kah耶穌基督連結做伙。三是伊勸勉腓立比教會tio̍h繼續努力,同心協力為福音phah美好ê戰爭,伊表示「這仗」tio̍h繼續phah落去。

Chit段經文是hō͘腓立比教會ê信徒,除了表明感謝之外,mā teh鼓勵in beh kā疼心kah判斷力同齊增進,án-ne tī基督koh再臨ê時chūn,ē-tàng成做「純潔無thang指責」ê信仰團契。

第1到2節,ná親像其他書信仝款,使徒保羅tī每封phoe ê踏話頭lóng是先自我紹介。比較無仝款ê所在是,伊tī chit張phoe ê開始,並無親像其他ê書信先強調家己是「使徒」(參考羅馬書一:1,哥林多前書一:1、哥林多後書一:1,加拉太書一:1,以弗所書一:1,提摩太前書一:1、提摩太後書一:1),不過kah羅馬書仝款,伊講家己kah提摩太lóng自稱是基督耶穌ê「奴僕」(參考羅馬書一:1)。另外一個特色,就是伊常kah提摩太á是其他同工聯名寫phoe(參考哥林多前書一:1—2,哥林多後書一:1,加拉太書一:2,歌羅西書一:1,帖撒羅尼迦前書一:1,帖撒羅尼迦後書一:1,腓利門書1 節),而提摩太是伊siōng疼惜ê門徒之一。

Tio̍h注意ê,是「奴僕」一詞,原本指ê是「奴隸」,表示tī福音事工上,使徒保羅tio̍h表明伊完全順服耶穌基督,因為耶穌基督就是伊性命ê主。這mā是為甚麼伊會tī第21節講「活teh,是為基督」chit句話ê原因。

Koh講,伊tī chia講寫chit張phoe,除了是寫hō͘信徒看,mā同時是寫hō͘「教會領袖kah眾助手」讀ê。Chia提起「教會領袖kah助手」,就看出早期教會內已經出現有系統ê組織。所謂教會「領袖kah助手」,tī中文《和合本》聖經用「監督kah執事」。Á監督chit-ê詞,mā就是一般所指ê「長老」,負有教導、講道、督責ê角色。Á執事,則協助「監督」所beh執行ê各項事務,mā擔當tio̍h kah長老、監督仝款ê角色。

Ná親像當時羅馬文化ê特色,寫書信ê開始,除了紹介家己之外,mā會有請安、祝福ê話語。這mā是使徒保羅所寫書信中一再會出現ê句話(參考羅馬書一:7,哥林多前書一:3,哥林多後書一:2,加拉太書一:3,以弗所書一:2,歌羅西書一:2,帖撒羅尼迦前書一:1,帖撒羅尼迦後書一:2,提摩太前書一:2,提摩太後書一:2,提多冊一:4,腓利門書第3節),這mā是一種禮貌上ê用語方式。

第3到5節,使徒保羅tī chit短短三節經文中,一再表示每pái伊祈禱上帝ê時,就會為該教會獻上感謝,原因是該教會tī福音事工上一直協助伊,無停止過。Ná親像伊teh寫chit封書信ê時,人雖然tī監獄中,該教會mā仝款teh關心伊、幫助伊。Tī第4節chia使徒保羅講一提起腓立比教會,就抱tio̍h「喜樂ê心」,而這「喜樂」一詞ē-sái講是本書信ê中心題旨,tī chit本書信中用chit-ê詞句ê次數相當chē(參考一:18、25;二:2、17、18、28、29;三:1;四:1、4、10)。

第6到8節,使徒保羅Tī chit段經文中表示,伊心中一直kah該教會連結做伙,m̄-nā是心中記念tio̍h,連祈禱中mā是仝款,每pái祈禱,就會為該教會祈禱。Á該教會mā非常清楚使徒保羅tī福音事工上ê情景。因為án-ne,mā知影伊被送到羅馬監獄去,進一步koh派以巴弗提去羅馬監獄協助伊。

第9到11節,因為使徒保羅每pái祈禱ê時,lóng會記念tio̍h該教會,為該教會祈禱。Chia講伊為腓立比教會祈禱,希望in ê疼心kah判斷力(這mā thang指「智慧」)lóng會同時增進。Tī第10節chia提起「tī基督koh來ê日子」,這是早期教會一直深信ê信息(參考約翰福音十四:3、18,使徒行傳一:11),並且認為基督koh一pái來臨ê時,是來審判ê(參考哥林多後書五:10)。使徒保羅講祈禱該教會tī審判ê日子來臨ê時,in lóng會結出「仁義果子」,這是teh指加拉太書第五章22節所講ê,有「博愛、喜樂、和平、忍耐、仁慈、良善、忠信、溫柔、節制」等等chiah-ê信仰上有美好見證ê果子。

經文:

腓立比書 1:12-1:30

註釋:

Tī chit段經文中,使徒保羅提起有人傳福音ê心,並無真實,只是為tio̍h beh hō͘使徒保羅傳福音所結成ê果子帶來「koh khah chē麻煩」而已。M̄-koh伊不介意。伊強調只要ē-tàng hō͘福音傳開,個人ê事已經不重要。因為伊只有一個心志:hō͘耶穌基督ê救恩突顯出來。Chit點chiah是福音ê本質。

第12到14節,是真有意思ê一段經文,說明基督教信仰ê精華:tùi苦難中認bat上帝tī基督耶穌內面ê救恩。使徒保羅tī chia講,伊tī監獄ê苦難反tńg bat幫助福音ê進展。伊kúi-nā pái tī書信中提起家己被囚禁ê事,親像tī歌羅西書第四章3節,伊講是為tio̍h宣揚基督ê奧秘而坐牢,伊ài歌羅西教會ê信徒會記得伊是「帶鎖鍊」寫該封書信(參考歌羅西書四:18,使徒行傳廿八:20);teh寫hō͘腓利門ê書信中,伊mā講家己是因為基督ê緣故成做囚犯(參考腓利門書9、13節);hō͘以弗所教會ê書信soah講是為tio̍h傳福音hō͘外邦人而成做囚犯(參考以弗所書三:1)。Á福音ê可貴ê所在,就是bē因為苦難來致使信仰破碎,顛倒,會因為苦難而koh khah堅定信仰ê內涵。伊寫hō͘羅馬教會ê書信中án-ne講:「我想,咱chit 時ê 艱苦kah teh beh對咱顯明ê 榮光bē 比得。(全民版)」(羅馬書八:18)而值得注意ê是,伊講tī羅馬ê警衛全體人員,以及tī羅馬官邸ê人lóng知影,伊是為tio̍h beh見證福音而被囚禁。Mā因為án-ne,m̄-nā無損害福音ê發展,反tńg是hō͘ koh khah chē「信徒對主koh khah有信心,koh khah勇敢,lóng無驚惶地傳講上帝ê信息」。

第15到18節,chit段經文thang看出使徒保羅確實是一個心胸開闊ê傳道者。伊知影有人講是teh傳福音,其實m̄是,只不過是想beh拆使徒保羅ê「台」而已。伊講chiah-ê人ê主要目的,是beh「製造koh khah chē ê麻煩」而已。M̄-koh福音事工是上帝拯救ê工作。人有pháiⁿ念頭,上帝卻有美好ê旨意。因為án-ne,對hiah-ê嫉妒伊傳福音ê人,伊根本bē致意,伊所在意ê是怎樣kā福音傳出去。只要ē-tàng傳出福音,伊ê心中就充滿歡喜、歡喜。Chit種心境thang參考哥林多前書第九章19到22節chit段經文提起,使徒保羅講「無論用甚麼方法,總是beh救一kóa人」看出伊ê用心。Tī chia,伊講只要福音ē-tàng被傳出去,伊就歡喜,而且「iáu koh khah繼續歡喜」。

第19到20節,這二節mā ē-sái講是使徒保羅ê信仰告白。伊已經是kā kui個性命lóng獻身tī傳福音ê事工上。因為án-ne,伊講「無論生死,用kui個ê我來榮耀基督」。伊講這力量是來自腓立比教會ê代禱。

第21到22節,chit節ē-sái講是腓立比書siōng精華ê一節經文。Chit節說明使徒保羅之所以傾盡所有一切傳福音ê原因,是伊kā性命完全kah耶穌基督連結做伙,不分開。Tī第三章7到9節,伊koh一pái表明家己ê性命是kah耶穌基督完全結合做伙。伊寫hō͘加拉太教會ê書信mā án-ne講:「因為照律法來講,我已經死tī 律法下面,這是 beh hō͘ 我 thang ǹg 上帝來活。我已經kah基督同齊hō͘ 人釘十字架。 Án ne,chit-má teh 活ê 我m̄ 是原來ê 我,是基督tiàm-tī 我內面teh 活;我chit-máteh 活,是靠信上帝ê Kiáⁿ teh 活;基督疼我,為tio̍h 我放sak 性命。(全民版)」(加拉太書二:19b—20)伊ê kui個性命價值就是khǹg tī耶穌基督ê身上,除了耶穌基督,伊已經放棄所有ê一切。

第23到24節,tùichit三節thang看出使徒保羅ê心境;伊已經預期到家己無久會被判死刑,伊願意為tio̍h福音ê緣故受死,因為án-ne等於kah基督耶穌相會合。Ē-sái講是,因為iáu有真chē人iáu未信主,á是信仰基礎iáu無夠堅定ê信徒,無論是就此受難,á是ē-tàng存活落來,伊ê目標只有一個:hō͘未信主ê人得tio̍h福音,mā beh hō͘信仰軟弱ê人堅強起來。因為伊想ê,lóng m̄是家己ê利益,卻是耶穌基督ê福音。

第25到26節,為tio̍h chit-ê緣故,伊表示只要家己iáu ē-tàng存活ê一工,伊lóng會繼續kah腓立比教會所有信徒做伙,幫助in tī信仰上「koh khah長進,koh khah有喜樂」,伊相信只有án-ne,當有一工伊得tio̍h tháu放而kah該教會信徒相見面ê時,in會因為使徒保羅tī福音事工上ê堅持而感覺kah有榮焉。

第27到30節,tùi第27節開始,直到第二章結束,是使徒保羅對腓立比教會ê勸勉。Tī這勸勉中,伊表明一個基督徒tī生活上應該有ê基本態度:是tī生活上ê標準,tio̍h比一般人ê要求koh khah高。Tī伊寫hō͘羅馬教會ê書信中就án-ne講:「M̄ -thang kohhō͘ 世俗同化,tio̍ h hō͘ 上帝 kā lín 改造,心志得 tio̍ h 換新,hō͘ lín thang 明白甚麼是上帝ê 旨意,甚麼是良善、純全,上帝所歡喜ê。(全民版)」(羅馬書十二:2)伊要求基督徒應該有khah高ê道德生活標準,這確實m̄是一件容易ê事,因為chit世界ê誘惑實在siuⁿ大,m̄-koh,信仰siōng美好ê見證就是tī-chia。Tī chia,伊要求基督徒ê信仰kah生活tio̍h一致,án-ne chiah ē-tàng防堵hiah-ê專門teh破壞信主ê人ê各種計謀。Tī使徒保羅看起來,伊認為信仰就是kah邪惡對抗ê氣力。因為án-ne,伊ài用戰爭來提醒基督徒ài有chit種警覺性,若無,真緊to̍h會hō͘誘惑而離開了應該有ê信仰準則,而這警覺性一定tio̍h tùi生活開始做起。

Koh講,使徒保羅認為基督徒ê特權,就是thang事奉福音ê工作。M̄-koh為tio̍h beh宣揚福音,就一定tio̍h tī生活上有美好ê見證。伊Kā chit種見證看做ná親像tī戰場上相戰仝款,絕對無法度輸。


經文:

腓立比書 2:1-2:11

註釋:

伊勸勉該教會信徒,tio̍h活出性命ê亮光,án-ne chiah ē-tàng見證耶穌基督ê救恩,而chit點chiah是所有基督徒siōng重要ê使命。

另外,tī chit章中,使徒保羅特別提起有關伊beh hō͘以巴弗提tńg去ê事。以巴弗提是腓立比教會差派去照顧使徒保羅ê同工,結果因為破病,使徒保羅認為iáu是hō͘伊tńg來腓立比教會。可能以巴弗提會擔心tńg去受tio̍h指責,使徒保羅就請伊kā chit書信帶tńg來hō͘腓立比教會,免得除使徒保羅擔心伊會因病來死tī羅馬。

Chit段經文ē-sái講是腓立比書siōng重要ê一段經文,尤其是第6到8 節是使徒保羅所有書信中,siōng深刻描述耶穌基督身分ê一段。Tī chit段經文中,使徒保羅勸勉腓立比教會信徒,一定tio̍h向耶穌基督看齊,學習伊ê樣式,願意謙卑落來,確實做一個順服福音ê奴僕。

第1到4節,tùi chit段經文kah第一章27到30節ê經文有密切關係,mā ē-sái講是延續落來,探討教會內部發生ê問題。伊知影教會是一個信仰團契,一定會有人ê問題。M̄-koh mā因為án-ne,大家tio̍h學習ê,就是tī信仰內面同心協力抵擋hiah-ê會阻礙基督福音廣傳開來ê氣力,只有án-ne,chiah ē-tàng hō͘教會chit-ê信仰團契永遠存在。

使徒保羅tī第1節連續提出四個「問題」hō͘腓立比教會信徒認bat,其實,這並m̄是問題,雖然是用疑問句ê句型出現,真正意思是勸勉ê語句。伊希望腓立比教會信徒tio̍h因為信耶穌基督,hō͘家己tī信仰上koh khah堅定。Án-ne,就bē受tio̍h外來ê真chē虛假信息所影響。二是領受了耶穌基督ê疼了後,就看是m̄是有koh khah進步?若是有,就應該多用寬闊ê心胸看待別人,卻m̄是爭論。三是ài in反省kah上帝ê聖神有無連結成做一體如仝一個團契hit種?四是beh省思信徒彼此之間有無相親相疼ê心?

續落來使徒保羅肯定腓立比教會「有」,所以伊beh進一步要求in。Chia連續提出四個要求:一是「共同ê目標」;二是「仝款ê疼心」;三是「仝款ê情感」;四是「一致地ê想法」等。其實,tùi這四點mā隱約thang看出該教會內部確實是發生彼此不和諧ê情形。Chiah-ê紛爭是m̄是ná親像哥林多教會是因為有分群結黨狀況,tī chia並無說明。不過,tùi字裡行間thang看出教會內出現分裂,主要因素在tī有人心存驕傲,而且想beh貪圖虛名,bē曉得謙讓(jiōng),因為án-ne,使徒保羅勸勉大家「m̄-thang只顧家己,mā tio̍h關心別人ê利益」。換句話講,tī腓立比教會內,有人真自私,kā家己看做siōng重要,á是想beh爭奪權位,這tī一個信仰團契裡是siōng忌諱ê行為。

第5到7節,使徒保羅先tī第5節講「tio̍h用基督耶穌ê心為心」,然後接落去ê第6到11節是用詩歌ê型態寫出耶穌基督所顯現出來ê樣式。Tī chit段詩歌中,siōng重要ê是第6節,使徒保羅非常確信耶穌基督就是上帝本身,kah上帝「同質」。尼西亞信經mā án-ne講,耶穌基督是:「tùi真神出ê真神,是生ê,m̄是受造ê,kah父同質同體。」使徒保羅講耶穌基督是「自甘卑微」來到人世間,然後放落身段hō͘家己成做「奴僕」ê樣式,而且以人thang看見、接觸ê樣式出現。Á koh khah重要ê,就是tī第8節所講ê,chit位自甘卑微到世界起來ê耶穌基督,甚至是順服上帝到願意死tī十字架上。Chit種描述有chiok厚ê以賽亞書第五十三章ê內涵,講出上帝ê奴僕,並m̄是來到世間享受ê,卻是一個受苦ê奴僕。

第8節,tùi chit節mā thang看tio̍h使徒保羅kui個中心思想,就是tī耶穌基督ê十字架,chit點mā是伊寫hō͘哥林多教會所表示ê,伊只傳耶穌基督kah伊死tī十字架上ê事,其他ê事已經m̄是重要ê了(參考哥林多前書二:2)。這就是犧牲ê疼,為tio̍h完成上帝所付託ê拯救使命。

第9到10節,chit兩節tú好講出基督教信仰ê特性:人看做卑微ê,tī上帝眼中往往是高貴ê。人teh看耶穌giâ人類苦難ê死亡是一種懲罰,m̄-koh he卻是上帝拯救ê記號。Chit兩節mā說明耶穌基督koh活信息ê意義。

第11節,chit節是基督教宣教工作siōng重要ê經文,因為福音ê主要內容,就是teh見證耶穌基督是人類ê救主。傳福音ê目標就是beh hō͘所有聽tio̍h而且信ê人,lóng公開宣認耶穌基督是主,只有án-ne,chiah ē-tàng榮耀上帝ê名。

經文:

腓立比書 2:12-2:18

註釋:

Chit段經文mā thang清楚看見腓立比教會ê信徒,有人會埋怨、爭論,chit種行為是教會內部siōng容易出現分裂ê原因。伊勸勉腓立比教會ê信徒, tio̍h堅守性命ê道,chit種道,就是上帝tī耶穌基督內面ê救恩。

第12到13節, 使徒保羅hō͘腓立比教會信徒知影,過去tī腓立比傳福音ê時,信徒lóng會聽從伊ê教導。因為án-ne,伊期待in會繼續守tiâu chiah-ê教導,tī每樣事頂面lóng有美好ê見證。

第14到16節,tùi chit段經文thang看見tī腓立比教會內,有人為tio̍h教會ê事發出怨言,á是有紛爭。Tī第1到4節中,就有提起過in中間有真chē紛爭,chit種紛爭lóng是kah信徒中有人真自私,á是貪圖某種利益有關,án-ne tī團契中,必定會產生真chē bē爽快ê事。使徒保羅希望腓立比教會ê信徒tio̍h像光仝款發亮,hō͘別人看見in有好ê行為。Thang kā第15節thang對照馬太福音第五章14到16節耶穌基督山上寶訓中所講ê話。Koh講,使徒保羅提醒腓立比教會信徒,一定會堅守性命ê道,這就是福音ê信息,mā就是關係耶穌基督死tī十字架上ê救恩,chit點一定會堅持守tiâu,bē-tàng放棄,mā bē改變。使徒保羅講,án-ne tī「基督koh來ê日子」,伊就ē-tàng得tio̍h安慰,表示伊ê教導無白費。

所謂「基督koh來ê日子」,這是早期教會共同ê信仰認知,而且認為時間已經接近,除了tī chia提起,mā tī第一章6節、10節,第三章20節,第四章5節等等處經文lóng有提起。伊寫hō͘哥林多教會ê書信mā提起chit種觀念(參考哥林多前書一:8、五:5)。

第17到18節,使徒保羅真清楚表明家己有非常ê準備,即使一定tio̍h為福音ê緣故獻上性命,伊mā會kā它看做是一件歡喜ê事,因為he mā是teh分享腓立比教會信徒性命得救ê喜樂。

經文:

腓立比書 2:19-2:30

註釋:

Chit段經文中,使徒保羅提起兩位好koh盡忠ê同工,一位tùi第19到23節thang看出,就是siōng hō͘使徒保羅稱心ê門徒提摩太,就ná親像第22節所講ê,伊kah提摩太ná親像「父子」一般。伊稱提摩太是伊「tī信仰上ê真kiáⁿ」(參考提摩太前書一:2),mā是「親愛ê kiáⁿ」(參考提摩太後書一:2)。第25到30節紹介另外一位同工──以巴弗提。伊是腓立比教會差派去跟tòe使徒保羅傳福音ê同工,是真盡職ê福音工人,為tio̍h傳福音「冒性命ê危險,差不多死去」。可惜,咱kan-taⁿ tī chit段經文,以及第四章18節koh一pái提起伊ê名外,並無koh khah充分ê資料知影以巴弗提所做ê事工。

第19到20節,chit兩節使徒保羅紹介了伊siōng得意ê門徒提摩太hō͘腓立比教會ê信徒認bat。伊會想tio̍h差派提摩太去腓立比教會,除了希望穩固信徒ê信心外,另外一個主要原因是:希望tī提摩太ê努力下,腓立比教會ē-tàng成做其他教會ê典範。提摩太是使徒保羅tī第二pái旅行傳道所收ê門徒,老父是希臘人,老母是猶太人。Beh tio̍h差派出去傳福音前,使徒保羅特別為伊行割禮(參考使徒行傳十六:1—3)。當使徒保羅tī監獄ê時,提摩太hit時mā陪伴tī邊á(參考歌羅西書一:1,腓利門書1節)。甚至到最後,連提摩太mā tòe坐牢(參考希伯來書十三:23),而原因是為甚麼?咱已經無法度知影,唯一thang確信ê是,伊會坐牢必定是為tio̍h福音ê緣故。Tùi頂面所講chiah-ê資料,咱thang看tio̍h提摩太確實是一位真thang信託ê忠實福音同工。伊特別強調提摩太kah伊非常同心teh關心腓立比教會ê情景。

第21到24節,tī chit段經文中,使徒保羅提起家己實在非常希望有機會親自去腓立比教會看in,m̄-koh伊會差派提摩太去。伊hō͘腓立比教會知影提摩太kah伊ê關係,就ná親像父子仝款ê親密,而這lóng是為tio̍h福音ê緣故。提摩太ná親像使徒保羅仝款,願意為福音而付出一切勞苦。

第25到30節,ná親像頭前已經提起過ê,chit段經文是紹介有關以巴弗提ê事。Á聖經提供有關伊ê資料並無chē,chit段經文ē-sái講是比較詳細ê。

真清楚,以巴弗提是tī使徒保羅被關入到監獄去協助幫忙看顧,m̄-nā án-ne,腓立比教會iáu特別準備真chē禮物帶去hō͘使徒保羅(參考腓立比書四:18)。以巴弗提ná親像使徒保羅專用ê「奴僕」一般。會án-ne,真可能是腓立比教會聽講使徒保羅是家己sòe厝當做監獄牢房,而且ē-tàng tī chit種牢房中,接見任何人,並thang向訪ê人客傳揚福音ê信息(參考使徒行傳廿八:16、30—31),因為án-ne,以巴弗提雖然表面上看起來是使徒保羅專用ê「奴僕」,實際上,並m̄是只停留tī服事使徒保羅生活上ê問題而已,mā是kah使徒保羅同時teh見證福音ê工作上,成做使徒保羅ê同工,mā因為án-ne,使徒保羅稱呼以巴弗提是好ê同工,因為伊bat「冒性命ê危險」而見證福音,因為án-ne hō͘保羅講以巴弗提是kah伊「同齊工作,同齊作戰」ê好同工。

Tùi chit段經文mā thang看tio̍h以巴弗提因為真認真地工作,結果可能因過度辛苦而病倒,並且是病得非常嚴重,差一點á死去。Mā因為chit-ê緣故,使徒保羅趕要緊差遣伊tńg去腓立比。不過,以巴弗提確實是一個忠實ê「奴僕」,chit期間可能有真chē pái,使徒保羅一再要求伊趕緊tńg去腓立比,因為伊ê身軀並m̄是真好,m̄-koh lóng被以巴弗提婉拒了,理由可能是伊自認是受腓立比教會ê差遣,m̄敢離開崗位。為tio̍h chit-ê緣故,使徒保羅特別寫chit張phoe,tio̍h用巴弗提帶chit張phoe tńg去腓立比教會,hō͘該教會知影為甚麼以巴弗提會tńg去,並m̄是因為伊工作無好,á是tī同工上有礙事ê所在chiah被差遣tńg去,顛倒,to̍h是因為伊工作真認真,甚至為tio̍h保護使徒保羅á是為tio̍h見證福音ê緣故,iáu「冒性命ê危險」,伊希望腓立比教會ē-tàng以歡喜ê心接納以巴弗提tńg去。因為án-ne,chit段話mā是有替以巴弗提 擔保ê用意。

經文:

腓立比書 3:1-3:11

註釋:

使徒保羅寫hō͘腓立比教會ê chit封書信,原本到第二章最後一段伊提起遣送以巴弗提tńg去腓立比ê時chūn,應該是該書信最後一段了,準備ài結束loh。可能臨時想tio̍h iáu beh koh再交帶甚麼事,就án-ne就koh再繼續寫落去。Mā另外有一種可能,就是chit張phoe原本就是分做兩個無仝ê時段寫做ê。

Chit章thang分做兩部分,其一是第1到11節,tī chit部分使徒保羅講tio̍h家己獻身ê使命感,就是伊性命改變ê經過。其二是第12到21節,這部分使徒保羅講tio̍h身為耶穌基督ê信徒,應該tio̍h清楚家己就是天頂ê公民,因為án-ne,ài kā性命最終ê目標khǹg tī天頂,卻m̄是世間chiah-ê會改變ê榮耀。

Tī chit段經文中,使徒保羅講tio̍h幾個重點:一是beh腓立比教會ê信徒提防hiah-ê假冒偽善ê人,chit種人對耶穌基督ê認bat並m̄是清楚,卻自認真bat。二是伊承認家己原本是藉tio̍h摩西律法而teh進行迫害基督徒ê人,後來改變了,因為認bat了耶穌基督。三是伊分享家己對性命ê看法,就是性命siōng重要ê中心,是tī耶穌基督。

第1到3節,tī chit段經文中,使徒保羅ài腓立比教會信徒注意hiah-ê專門teh教會內提倡守摩西律法中所講割禮之重要性ê人。伊認為真正需要割禮,是心靈ê,m̄是肉體ê,chit點thang參考耶利米書第九章25到26節。因為肉體是外表ê,心靈chiah是心內真實ê表現。伊講基督徒beh誇耀ê,並無肉體有割禮,卻是因為認bat耶穌基督ê救恩,chit點chiah是重點。
第4到6節,使徒保羅是出身法利賽人ê家庭,因為án-ne,完全照規矩tī出世第八工就受割禮。若是tùi摩西律法ê觀點來看,確實是非常典型ê希伯來人,mā是屬tī法利賽派ê人,甚至使徒保羅mā bat迫害過基督教會kah掠基督徒入獄。Chiah-ê條件lóng thang hō͘ hiah-ê一工到晚lóng teh強調遵守摩西律法ê重要性ê人,無thang指責。

其實,phah開使徒保羅所寫ê書信來看,就thang看tio̍h伊每一個一地方,lóng會tú-tio̍h一個共同ê問題,就是爭論有關割禮ê事。堅持一定會受割禮ê人,就是hiah-ê已經信耶穌基督ê保守派猶太人(參考使徒行傳十五:1),in lóng是跟tòe tī使徒保羅後壁,四界去傳割禮ê重要性,tī加拉太地區án-ne(參考加拉太書一:7),tī腓立比地區mā是仝款。因為án-ne,tī chit段經文中,使徒保羅特別koh一pái紹介家己mā是受過割禮ê人,而且受過頂真法利賽派訓練ê人,m̄-koh卻無特別ê意義,因為真正性命並不在tī「肉體上ê割禮」,卻是在tī心靈ê割禮,chit種觀點tī伊寫hō͘其他教會ê書信中mā一再提起(請參考羅馬書二:29、加拉太書五:6、六:15,歌羅西書二:11),而chit種觀點mā是頭前提起過ê先知耶利米之觀點。使徒保羅希望做一個基督徒,m̄是在tī外表ê記號,卻是心內ê真實,是心思意念ê更新,成做一個新造ê人出現tī眾人面前(請參考哥林多後書五: 17,加拉太書六:15,以弗所書四:23—24)。

第7到9節,chit段經文ē-sái講是非常重要ê經文。使徒保羅強調家己ê改變,就是當伊遇tio̍h koh活ê耶穌基督了後,就kā性命kah耶穌基督連結做伙,伊認為這是性命中siōng重要ê事。

第10到11節,tī chit兩節經文中,使徒保羅重新強調伊寫hō͘羅馬教會書信中所提起ê,就是kah做一個基督徒ē-tàng kah耶穌基督同死,就ē-tàng kah耶穌基督同koh活(參考羅馬書六:8)。Á tùi死裡koh活,án-ne chiah是性命siōng重要ê大事。

經文:

腓立比書 3:12-3:21

註釋:

使徒保羅Tī chit段經文中,伊提起基督徒ê性命態度,應該ná親像tī運動競技場上ê運動員仝款,非常清楚家己ê目標。基督徒ê目標應該khǹg tī天頂ê獎賞,卻m̄是kā性命ê目標khǹg tī這會敗壞ê世間。伊同時強調一個基督徒若是認真地以天頂ê獎賞作為家己ê目標,生活言行舉止就會謹慎,免得m̄-nā無見證耶穌基督拯救ê信息,卻是成做十字架救贖功勞ê阻礙者。

第12到14節,使徒保羅ài用運動場上競技作例,來形容信仰上該有ê態度。伊寫hō͘哥林多教會ê書信mā引用運動競技場上ê例(參考哥林多前書九:24—27)。Á競技場上ê獎賞是來自人ê,早期所hō͘ ê冠冕是用桂花樹枝á是橄欖葉編織成ê,m̄-koh這真緊to̍h會凋謝。基督徒beh爭取ê目標是來自天頂ê賞賜,he chiah是永恆ê。使徒保羅講伊ê性命中只有一件事:就是無認為家己已經得tio̍h獎賞,卻是繼續朝ǹg beh得tio̍h天頂獎賞ê目標tī前進,án-ne chiah是伊受呼召ê原因。

第15到16節,tī chia使徒保羅提起「靈性成熟ê人」,意思是teh指hiah-ê已經有因為信仰而改變心思意念ê人,mā就是hiah-ê kah使徒保羅仝款,一直teh追求靈命成長ê人,使徒保羅ài in kah伊仝款kā性命ê終極關懷khǹg tī屬天ê位置上看待。

Tī chia使徒保羅特別提起有繼續teh追求靈命成長ê人,即使teh追求ê過程中發生差誤,上帝mā會清楚指示。因為繼續追求靈命成長ê人,伊知影hō͘人靈命成長siōng重要ê基礎就是明白上帝ê話語,而且tio̍h明白上帝ê話語,就一定tio̍h tńg來到聖經上chiah ē-tàng明白上帝ê旨意是甚麼。伊勸勉腓立比教會信徒m̄-thang亂了心,只要照伊過去教導in ê,努力朝向ná屬tī天頂獎賞ê目標前進就對à。

第17到19節,使徒保羅勸腓立比教會ê信徒beh同齊「效法」伊,「bē記得背後,全力追求頭前ê事」,mā是屬天ê獎賞。使徒保羅m̄-nā是teh寫hō͘腓立比教會ê書信中án-ne鼓勵信徒,伊寫hō͘哥林多教會ê書信中mā án-ne講(參考哥林多前書四:16)。Tùi chia thang看tio̍h使徒保羅有一股極強烈ê使命感,伊真有信心地表達出對耶穌基督ê認bat,mā知影明確ê上帝國度之道。因為án-ne,伊ài眾信徒學習伊ê模樣。伊講chit-má是用「流目屎」ê心情teh苦勸腓立比教會ê信徒,ài in跟tòe伊學習行天路。伊會án-ne講「流目屎」是thang理解ê,因為伊teh寫chit封書信ê時chūn,人是關tī羅馬監獄中,伊mā知影所chhun落來ê日子無chē。另外一點,hō͘伊會「流目屎」寫chit封書信ê原因,就是tī腓立比教會中間,有kóa信徒ê行為已經hō͘耶穌基督tī十字架死ê拯救恩典蒙羞,成做耶穌基督「十字架ê仇敵」。伊m̄是只有一pái苦勸chiah-ê人tio̍h改正,卻是kúi-nā pái,m̄-koh顯然並無得tio̍h所期待ê效果。

為甚麼會án-ne?腓立比教會m̄是對使徒保羅tī傳福音ê事工上幫助siōng chē mah?無錯,m̄-koh並m̄是每一個人lóng án-ne,卻是tī in中間有kóa信徒iáu是繼續過浪蕩ê生活,這mā就是使徒保羅所講ê,hiah-ê tī靈性性命尚無成長ê人,in過腐敗ê生活。Koh講,ná親像tī第三章2節所提起,tī in中間有人iáu繼續tī教會內鼓動信徒守割禮,以自傲ê態度藐視別人,致使tī腓立比教會中mā有糾紛傳出來。M̄-koh,咱知影mā有講過了:如果遵守摩西律法上規定ê割禮真正ē-tàng hō͘人成做「天頂ê公民」,án-ne,耶穌基督死tī十字架上ê恩典就落空了,這就是伊tī chia所講ê「成做基督十字架ê仇敵」ê意思。

第19節是真值得咱注意ê一節;使徒保羅tī chia講一直teh「對敵基督十字架」ê人,根本就m̄是teh傳福音,卻是teh傳講「另外一種福音」(參考加拉太書一:6),chit種福音就是物質生活ê需要。In關心ê是屬世ê物,使徒保羅tī chia用「腹肚」。就是kā性命ê價值定位tī食、lim、sńg樂ê範疇上。

第20到21節,koh一pái看tio̍h使徒保羅末日ê思想,ná親像tī第一章6、10節、第三章20 節、第四章5節等等處所提起ê「基督koh來ê日子」仝款。Chit節mā清楚說明咱只是暫時寄居tī土腳ê「天頂公民」,teh-thèng候基督耶穌koh一pái來臨ê時,帶領咱同齊tńg來天家。

為甚麼使徒保羅會提起基督徒ná親像一個「天頂ê公民」?這是有原因ê。腓立比chit-ê城市是羅馬政府為安置退伍軍人á是高級官員而設立ê特區,因為án-ne,tī腓立比城裡不時會tī馬路上看tio̍h有tùi軍隊退役落來ê軍人,in iáu穿插羅馬軍隊ê服飾,in以bat身為羅馬軍人為榮。In ê言行舉止ná親像一個雄壯威武ê羅馬軍人仝款英姿煥發、雄赳赳、氣昂昂,koh khah重要ê,in絕對遵守羅馬軍人ê紀律,不隨便惹事生非。使徒保羅來到腓立比chit-ê城市,一看tio̍h這幅景象必定有真深ê感受:如果一個羅馬軍人直到退役了後,lóng iáu以bat身為羅馬軍人為榮耀,ná身為基督徒豈m̄是比做一個羅馬軍人koh khah有榮耀ê性命?因為án-ne,伊用「天頂ê公民」就是beh用來kah「羅馬公民」對比ê。這mā就是為甚麼過去伊mā bat以家己擁有「羅馬公民」身分而自傲(參考使徒行傳廿二:27—28),chit-má因為tú-tio̍h koh活ê耶穌基督,kā chiah-ê原本看做是有「盈利」ê事,lóng當做是垃圾看待,甚至iáu當做是一種性命ê負擔(腓立比書二:7—8)。

經文:

腓立比書 4:1-4:23

註釋:

Tī chit章經文中,使徒保羅koh一pái勸勉腓立比教會ê信徒, tio̍h追求性命siōng súi ê事,就是ē-tàng因信耶穌基督而會得thang kah上帝連結。同時,伊tī chit本書信ê結尾,o-ló mā感謝腓立比教會對伊tī福音事工上ê全力支持。

第1節,ná親像teh紹介認bat chit本書信ê時有提起ê,腓立比書真重要ê一個主題,就是「喜樂」。使徒保羅講每pái伊想起腓立比教會,心內就充滿tio̍h喜樂,mā是伊引認為傲ê信徒。伊koh一pái勸勉in tī信仰上一定會khiā穩。

第2到3節,chia提起兩位tī腓立比教會ê姊妹就是友阿蝶kah循都基。使徒保羅特別提起in兩人ê原因,是因為in兩人bat kah使徒保羅同工tī傳福音ê事工。其他ê資料咱lóng無法知影,非常可惜。另外一位是革利免,chit-ê人是甚麼人?mā已經無任何資料。

Koh講,tī第3節chia特別提起「上帝ê性命冊」,這是猶太人一直有ê觀念,認為每一個人tī天頂lóng有一本性命冊,記載tio̍h每一個人所做所為(參考出埃及記三十二:32,路加福音十:20,啟示錄三:5、二十:12、15),做上帝審判ê參考。

第5到7節,使徒保羅強調每一個基督徒lóng tio̍h因為kah主耶穌基督連結而感覺喜樂,而且性命永遠lóng喜樂。注意第5節chia所提起ê「謙讓(jiōng)」一詞,chit-ê詞tī希臘文有含「公義」、「正義」ê意思。Chia mā同時提起耶穌基督koh一pái降臨ê日子,使徒保羅用chit種末世ê觀念看世間ê一切,因為án-ne,建立生活ê基本態度,ài有喜樂、感謝ê心,保持純潔ê生活,m̄-thang開時間tī hiah-ê會敗壞ê事物上,mā m̄-thang有紛爭。

第8到9節,chit兩節ē-sái講是chit本書信ê最後附加語句,因為án-ne,起頭就用「路尾」chit-ê詞字,表示chit本書信就beh結束loh。Tī chit兩節經文中,使徒保羅提起有六件真重要ê事,希望腓立比教會ê信徒會注意,he就是:

一、真實,指ê是性命中thang óa靠ê。
二、高尚,意思是值得尊敬ê對象。Chit種人,mā是hông稱做忠實可靠ê人。Chit種人tī品格上就是高尚ê人。
三、公正,這是teh指一個人無論teh做甚麼事,伊bē有兩套法碼、準則。Mā就是講:無論是對上帝,á是對人,伊ê態度lóng仝款。
四、純潔,是講一個人thang面對上帝而坦然無驚惶,chit種人必定是無欺騙等不誠實ê態度。
五、可愛,指一個人容易接納別人,會替別人設想,hō͘別人親近伊。
六、光榮ê事,簡單來講,就是有好ê名聲。這mā是使徒保羅不時提起ê事(參考提摩太前書三:7、13)。

以上六點是使徒保羅ài腓立比教會眾信徒努力持守tio̍h,chiah-ê原本tī in中間就已經有ê,m̄-thang忽略。腓立比教會ê信徒可能有bē少tī當地lóng是屬tī社會高階地位ê人,使徒保羅希望in信耶穌基督了後,會koh khah有好ê行為,thang hō͘ in ê信仰tī生活上koh khah有見證。

第10到13節是非常好ê經文,看tio̍h使徒保羅真正是進入性命siōng好ê境界,he就是tī基督裡性命ê知足。Tī第三章8節,伊講性命是用「認bat我主耶穌為至寶」,因為án-ne,其他ê事物對伊來講就m̄是siōng重要ê à。Tī hō͘提摩太ê書信中,伊講:「無m̄-tio̍h,一個人若知足,宗教的確ē-tàng hō͘伊富有。」性命ê飽足,並不在tī lim食á是擁有萬貫財富,而在tī心靈ê滿足。伊講tī耶穌基督內面,伊學會曉了chit種本領,無論tī甚麼款ê環境下,伊lóng ē-tàng因為擁有耶穌基督而hō͘性命感覺滿飽足。

第14到16節,chit段經文thang看出腓立比教會確實是一間非常值得學習kah thang取ê教會楷模,in全力支持使徒保羅ê福音事工,從來m̄-bat間斷。只要使徒保羅有任何需要,in會一屑á 都無躊躇地提供一切需要幫助伊開拓福音事工。Tio̍h注意ê是,使徒保羅tī chia提起腓立比教會幫助伊,並m̄是指金錢ê事而已,iáu有差派人協助伊傳福音ê事工,就ná以巴弗提(二:25)。使徒保羅寫phoe hō͘哥林多教會ê時,就bat勸勉in chit種學習(參考哥林多後書八:1—15)。

第17到19節,使徒保羅tī chia講tio̍h伊對腓立比教會ê期待,並m̄是希望得tio̍h in koh khah chē ê禮物贈品á是生活需要,卻是希望in tī信仰上有khah美好ê見證。這ná親像伊tī第一章9節所提起ê,會tī祈禱中祈求上帝幫in tī「疼心會不斷來kah真知識kah判斷力同齊增進」,hō͘ in成做有成長,而且加倍成長ê教會。伊感謝腓立比教會對伊ê幫助超過伊所需要ê,特別是差派以巴弗提帶去真chē禮物hō͘伊,伊深信腓立比教會所做ê這一切資助福音事工ê美德,必定會hō͘上帝記錄落來,而透過耶穌基督ê救恩豐富tī腓立比教會中。

第21到23節,這mā是當時寫phoe ê一種格式,就是tī phoe ê結尾有請安kah祝福ê話,而chiah-ê請安特別是附帶某一kóa親朋好友ê請安。使徒保羅tī其它書信中mā有chit種格式(參考羅馬書十六:21—23,哥林多前書十六:19—20,歌羅西書四:12、14)。

特別tio̍h注意ê是tī第22節提起「皇宮裡ê人」(中文《和合本》用「該撒厝裡ê人」,《台語漢字版》用「該撒ê厝ê」,天主教《思高聖經學會曉版本》kah《呂振中》教授ê版本mā lóng仝款),意思是teh指hiah-ê tī羅馬帝國中央政府機構工作ê官員。換句話講,使徒保羅chit句請安詞雖然無甚麼,卻已經teh提醒腓立比教會信徒知影:伊雖然關tī羅馬監獄中,m̄-koh因為伊ê監獄是「開放式」ê,是伊家己租來ê厝。伊tī chit「開放式」ê監獄中至少有兩年以上ê時間,這反tńg hō͘伊有充分ê自由thang一向訪ê人客傳福音(參考使徒行傳廿八:30—31),而來訪問伊ê人mā包括羅馬政府官員,這就是伊當初決定上訴到羅馬法庭去ê一個因素背景,希望藉tio̍h chit-ê機會傳福音,mā hō͘ chiah-ê羅馬官員知影基督徒其實是穩定帝國境內治安非常重要ê氣力。使徒保羅確實達tio̍h à伊ê心願,伊hō͘腓立比教會信徒知影:即使tī監獄中,伊mā努力向所有來訪問伊ê人傳福音,其中包括羅馬官員。


重新查詢