重新查詢  A+放大  A-縮小
經文:

尼希米記 1:1-1:11

註釋:

尼希米記第一章1節踏話頭án-ne寫tio̍h:「以下ê記載是哈迦利亞ê kiáⁿ尼希米ê事蹟。」如果照chit句話來看,尼希米記kah以斯拉記是兩本無仝ê經冊。M̄-koh,如果繼續看落去,tùi「亞達薛西做波斯皇帝ê第二十年基斯流月」chit句話就會發見,即使尼希米記kah以斯拉記是兩本經冊,m̄-koh記載ê內容卻是仝款時代背景ê事。因為án-ne,有聖經學者認為這是一本連做伙ê「上、下」經冊。Mā有ê kā它合併為一卷,親像《希臘文譯本》(koh kā它稱做《七十士譯本》)就是。

照尼希米記第二章1節kah 7節ê記載,尼希米是tī亞達薛西皇帝執政ê第二十年(一:1)申請回鄉,而tī隔年成行,這是主前445年。Á以斯拉記第七章7節soah講以斯拉回鄉是tī亞達薛西皇帝在位ê第七年,mā就是主前458年。

第1節,chit節真簡單ê地紹介尼希米是「哈迦利亞ê kiáⁿ」,而這「哈迦利亞」ê名kan-taⁿ出現tī chit所在,因為án-ne,背景資料lóng m̄足。「尼希米」chit-ê名ê意思是「耶和華安慰」。

Chit節講尼希米tī「亞達薛西皇帝ê第二十年」,這mā是主前446年,而「基斯流月」是希伯來曆ê九月,mā就是chit-má ê年曆十一月中旬到十二月中旬。Chit位亞達薛西皇帝一世,在位期間是主前465到424年。Chit時ê尼希米iáu停留tī波斯ê「京城書珊」,因為伊hit時是波斯皇帝ê「酒政長」,mā就是tī皇宮中工作。這工作ê職責是專門teh服事皇帝lim酒ê,主要工作就是tī皇帝lim酒chìn前,先tam味beh hō͘皇帝lim ê酒,並確認酒是安全無毒。因為án-ne,kah皇帝ê關係非常密切,每餐一定tio̍h tī皇帝身邊。雖然伊ê地位並m̄是非常重要,m̄-koh因是常常陪tī皇帝身邊,影響力必定bē輸位高權重ê大臣。

第2到3節,尼希米ê兄弟哈拿尼kah一陣tùi耶路撒冷來ê人,tī書珊城相tú,伊向in探聽有關故鄉ê情景,chiah知影原來耶路撒冷城牆破損,而且猶太同胞受tio̍h侮辱。

Chit節經文ê背景thang參考以斯拉記第四章,發出命令禁止tńg去故鄉ê猶太人繼續施工建造耶路撒冷城牆ê,就是chit位亞達薛西一世。理由是猶大省長kah書記以及其他相關ê人員,bat寫奏冊hō͘亞達薛西皇帝,認為chiah-ê猶太人修築耶路撒冷城牆,就會「m̄肯納各種捐稅」,致使國庫損失,並且認為khiā起tī耶路撒冷城ê猶太人「一直是叛逆ê,自古以來,一直損害列王kah各省ê省長。Chit-ê城ê居民一直lóng是真oh治理ê」(參考以斯拉記四:12—16)。結果亞達薛西皇帝一接tio̍h奏摺,馬上就下命令,ài省長利宏kah書記伸帥,阻止猶太人重建城牆,in「用武力逼kah猶太人停工」(以斯拉記四:21—23)。

第4到11節,chit段經文是尼希米聽tio̍h了後,非常「艱苦心得流下目屎」,tī「悲傷幾nā工」中間,伊用禁食方式向上帝祈禱ê內容。

Tī chit段祈禱文中,伊先認罪,並為所有以色列人民認罪,而且承認tùi祖先開始就犯錯,chit種錯,就是對上帝無夠忠實,無遵行上帝ê旨意。續落來,伊祈求上帝會記得bat應允過摩西所講ê,只要以色列人民悔改認罪,願意遵行上帝ê旨意,上帝會tùi世界各地,kā四散ê以色列人民帶領tńg來chit-ê應允hō͘以色列人民khiā起ê迦南地敬拜上帝(參考申命記三十:1—5)。伊懇求上帝垂聽伊kah所有敬畏上帝ê人ê祈禱,hō͘波斯皇帝對伊特別開恩。這表示尼希米心中計畫進行一項特別ê工作,chiah需要祈求上帝hō͘波斯皇帝會特別對待伊。

經文:

尼希米記 2:1-2:20

註釋:

Chit章主要說明尼希米會得thang tńg去耶路撒冷重建、修復hit-ê城ê經過。可能是因為伊服事亞達薛西皇帝真成功,因為án-ne深受皇帝kah皇后ê信任。後來甚至被任命為猶大省ê省長長到十二年(參考五:14),mā就是伊回鄉後ê hit段時間,伊利用chit段時間修復耶路撒冷城牆。後來伊koh一pái 回鄉處理伊tńg來到波斯皇帝身邊ê時tī耶路撒冷所發生ê事件(參考十三:6—7)。可見伊是非常受器重ê一位宮廷要臣。M̄-nā准hō͘伊回鄉,還hō͘ in特殊ê恩寵,koh khah hō͘伊通行kah採木材ê詔書,koh有軍隊kah伊隨行(本章第7到9節),m̄-nā保護伊ê安全,koh khah thang幫助伊tī執行修復工程ê時減少阻礙。

第1到5節,chit段經文回應了第一章11節所提起尼希米向上帝祈求,結果tī chia有回應,表示上帝垂聽尼希米ê祈禱。Tī chit段經文中,mā顯示了尼希米kah波斯皇帝亞達薛西之間有真好ê互動。皇帝看見尼希米,就發見伊心中ê憂愁,m̄-nā主動詢問iáu表示高度ê關心。因為án-ne,尼希米請求皇帝准伊tńg來到猶大故鄉,重建遇tio̍h阻擋而停建ê耶路撒冷城。

第6到8節,尼希米ê請求,lóng得tio̍h波斯皇帝亞達薛西ê答應,包括伊tńg去停留ê時間,以及hō͘伊特別ê通行證(皇帝詔書),hō͘伊thang順利通行tńg來到猶大,並得tio̍h皇家管理樹林處ê負責人亞薩hia,請伊協助提供木材好建造「聖殿堡壘、營門、城牆」,kah尼希米tńg去了後koh再耶路撒冷ê住宅。Á真奇妙ê,是所有chiah-ê請求lóng得tio̍h允准,這是上帝hō͘ in特別ê恩典所致。

第9節,chit節mā表示波斯皇帝對尼希米ê疼惜,為tio̍h beh hō͘伊平安tńg到耶路撒冷故鄉,特別「派了一kóa軍官kah一隊騎兵護送」伊。就án-ne,尼希米來到河西省ê時,mā kā皇帝ê詔書交hō͘伊,這thang hō͘河西省省長知影尼希米並m̄是一般猶太人,卻是有特殊身分者。

第10節,chia提起ê chit兩個真有影響力ê人,就是「和倫城ê參巴拉以及亞捫省ê官長多比雅」。In lóng是尼希米kah猶太人siōng主要ê對敵者(第19節、四:1、7;六:1—2、5、12)。In兩人一聽tio̍h有人teh替以色列人民爭取權益,就非常「惱怒」。因為in看bē起猶太人,藐視in ê能力,m̄-koh in lóng疏忽了尼希米ê 回鄉是tùi上帝來ê呼召。有上帝參與ê事工,即使koh再艱鉅mā會成功,用人ê氣力想阻擋實在是非常愚戇。

第11到15節,chit段經文thang看出尼希米是一個真聰明ê人,伊雖然tńg來到耶路撒冷了,m̄-koh無馬上透露ài beh進行修建城牆ê工作,免得遇tio̍h koh-khah chē不必要ê阻礙。尼希米mā是一個真有智慧ê人,伊利用大家不注意ê時chūn,巡視耶路撒冷城繞了一kho͘-á,詳細觀察整座城牆被破壞ê狀況,包括有hō͘人放火燒、拆毀成亂石堆等,chiah-ê lóng tī說明當時破壞修建城牆ê人,非常痛恨chit件修復耶路撒冷城ê工作。藉tio̍h巡視工作,chiah hō͘伊知影怎樣進行修復ê工作。伊雖然身上帶皇帝亞達薛西ê詔書,而且身邊擁有皇帝差派ê軍力thang供指揮調派,m̄-koh伊lóng是真低調teh進行巡視ê工作,主要ê原因是想減少不必要ê阻力,免得修復工作iáu未開始就tú-tio̍h koh-khah chē ê困難。伊tńg來到耶路撒冷必定聽tio̍h真chē關係參巴拉等人阻擋修復城牆工作ê事。

其實thang án-ne瞭解:當時hiah-ê破壞者會án-ne想出所有ê辦法beh阻止尼希米進行修復城牆ê工作,並m̄是基於宗教信仰ê理由,卻是政治利益ê考量;因為當時ê人認為:城牆破損無法度修復,á是khiā起tī無城牆ê所在,等於性命無安全保障,隨時會hō͘敵人侵犯。以現代ê語言來講,城牆象徵tio̍h國防。因為án-ne,當猶太人想beh修復城牆ê時,thang解釋為in想beh建立國防力量(參考以斯拉記四:12—16、尼希米記二:19)。

第16到18節,tī巡視完成了後,mā構思好勢ài怎樣重建ê時,尼希米chiah kā猶太同胞ê代表、眾領袖講,表示應該開始進行重建工作。伊kā上帝怎樣kah伊同在,垂聽伊ê祈禱,hō͘伊得tio̍h皇帝亞達薛西全力ê支持。猶太同胞眾領袖聽了後,就同意開始chit項修復耶路撒冷城ê工程。

第19到20節,chiah-ê反對猶太人重建耶路撒冷城ê參巴拉、多比雅,kah基善等人,聽tio̍h尼希米beh帶領猶太人重修耶路撒冷城ê消息,就譏笑in,而且語帶威脅講in想beh背叛皇帝。M̄-koh in並m̄知尼希米就是得tio̍h皇帝之允准,而且有皇帝ê詔書ē-thang證明。因為án-ne,尼希米真無客氣地回應伊,in m̄是猶太人,mā因為án-ne,tī耶路撒冷並無任何資格講話,這就是講in「無產權」ê意思。伊真堅定地講「天頂ê上帝」會幫助chit件重建耶路撒冷ê工程「成功」完成。因為所有ê以色列人民lóng是上帝ê「奴僕」。Chit句話已經真清楚teh表明in重建耶路撒冷城,是順從上帝ê旨意而進行ê。

經文:

尼希米記 3:1-3:32

註釋:

Chit章非常重要,記錄了四十位主要參與修復城牆ê領袖代表,in ê名,以及in所負責ê地段。這mā就順利kā城牆地界做次明確ê鑑定。Koh講,chit pái修復工程是透過分工合作ê方式,表現出堅定ê意志,所有以色列各界代表lóng盡帆拚投入,終其尾kā修復ê工作順利完成。

第1到16節,chit段經文講修復工程是tùi羊門開始,然後用逆ê時鐘方式進行,繞了一kho͘-á tńg來到羊門結束(第32節)。號名「羊門」,真可能chia是專門買賣羊隻ê所在。約翰福音第五章2節講有一個池子靠近羊門ê所在,就是畢士大池。

Tī chit段經文一再重複ê一句話,就是「某某城ê人修造koh再下一段」,這表示每一個宗族參與修建工作,是親密地續接落去,無停止,án-ne chiah有辦法kā kui個耶路撒冷城牆ê修復工作,順利完成。M̄-koh同時mā說明有上帝同在,大家lóng願意盡心盡力。若m̄是上帝ê帶領,想beh順利完成修建ê工作必定是困難重重。

值得注意ê是第5節講有kóa「領袖拒絕督工指定hō͘ in做ê工作」,所謂「領袖」,大概就是hiah-ê有錢ê貴族pah。In拒絕參與修復ê工作,mā teh暗示修復城牆ê工作並m̄是真順利。M̄-koh相對tī chiah-ê拒絕ê領袖,就是第12節所記載ê沙龍,「伊ê cha-bó͘-眾kiáⁿ mā幫了忙」,chit點真特別,已經teh表示哈羅烏ê家族是全部總動員,包括婦女mā參與修建城牆ê工作。原因可能是認知上ê問題,就是城牆確實是關係kui個城內居民ê安危,若是城牆不保,chiah-ê婦女必定陷入危險中,生存會受tio̍h威脅。

第17到21節,chit段經文是參與修建工程ê六個利未家族名單。

第22到26節,chit段經文提供了參與修建工程ê祭司名單,mā是仝款有六個家族。

第27節,chit節講提哥亞城ê人修了兩段城牆,tī第5節提起in續接撒督修起造下一段,tī chia講in koh修起造靠近俄斐勒城,mā就是「聖殿工人tòa ê所在」ê下一段。真可能就是in tī前一段進行得m̄是真順利,因為受tio̍h城內領袖ê阻擋,因為án-ne,有可能chia是用來補足前段修建工程受tio̍h阻礙ê方式之一種。

第28到32節,chit段經文記載有真chē人lóng kā家己厝ê門前hit段城牆修建ê工作承攬落來,因為án-ne,連銀匠、商人lóng參與有份。

其實,kui章經文想beh表達一個基本觀念:修建耶路撒冷城ê工作,被全體以色列人民看做是kui個民族生存siōng重要ê大事。因為án-ne,人人lóng想出所有ê辦法參與修建ê工作,雖然無親像有kóa宗族是kui個族人lóng參與某段城牆ê修建工作,m̄-koh至少tī各家己厝門口ê hit段,一個家庭就ē-tàng來做。這kah所羅門時代,徵召奴工十gōa萬人建造,意義完全無仝款。

經文:

尼希米記 4:1-4:10

註釋:

Chit一章teh說明修築城牆ê困難,tī敵人環伺ê狀況中繼續修建ê工程,除非有上帝ê帶領,若無,beh完成án-ne高難度ê工作確實無容易。Tùi「起城牆ê kah 擔工各擔(taⁿ)in ê 擔(tàⁿ),一手做工,一手gia̍h 軍器。(全民版)」(17節)chit句話就thang看出,修築城牆ê工作,差不多是停頓ê,而且「阮án-ne 做工,in ê 一半gia̍h 鎗,tùi 天phú 光到星出現ê 時。(全民版)」(21節),尼希米ê助手們lóng是「Hit 時, 我koh kā 人民講:「Ta̍k人kah 伊ê 奴僕tio̍h tī 耶路撒冷ê 內面歇暝,thang 暗時來保護阮,日時去做工(全民版)」(22節),chiah-ê lóng幫助咱明白in差不多是拚命teh進行修築城牆ê工作。

另外一方面,chit章mā hō͘咱學習tio̍h一個寶貴ê經驗;尼希米m̄是只停留teh祈求上帝ê幫忙,伊是祈求上帝ê助力,同時mā積極、不怠慢地策劃嚴密ê防衛系統,包括以一半ê人守衛,另外一半ê人工作,而且守衛ê人一定tio̍h the̍h-tio̍h刀矛、盾牌、弓箭,而且iáu穿插盔甲,「每一個工作ê人腰間mā lóng配刀」,這說明in是隨時teh準備作戰。同時,tī敵人中間ê猶太人mā時常提供敵方消息,提高大家ê警戒心。Chiah-ê lóng說明一點:所謂óa靠上帝,並m̄是表示家己甚麼事lóng m̄管,卻是koh khah積極進行應該做ê事,án-ne chiah-tio̍h。因為in是hō͘殖民統治ê順民,無法度有軍隊,koh加上因修築城牆而被誤認為有「叛亂」ê想beh,因為án-ne,無法度主動攻擊,只有ē-tàng tī必要ê時chiah出手防衛。若是無控制好,真可能因為被挑釁而動干戈,tú好落入敵人ê陷阱裡,因為án-ne,尼希米控制tio̍h kui個局勢,伊ài吹軍號角ê人khiā tī伊身邊,由伊發號施令,án-ne chiah bē出亂子。

Chit段經文提起參巴拉、多比雅等等chiah-ê領袖,是積極反對猶太人重建耶路撒冷城ê工程ê人物,in m̄-nā藐視chiah-ê 回鄉ê猶太人有jōa-chē本領,而且iáu聯合阿拉伯、亞捫,kah亞實突ê居民準備來攻擊,製造混亂,thang hō͘波斯皇帝下令阻止chit件工程ê進行。

第1到3節,chia特別提起參巴拉是teh代表北部ê撒馬利亞人,kah teh代表東邊亞捫族ê 多比雅,in用諷刺ê話,主要是teh侮辱猶太人ê能力。認為in就算是beh tùi瓦礫中chhōe建材mā難,chit-ê意思是teh指in連購買新ê磚á角mā無錢ê意思。因為in m̄知波斯帝國塞魯士bat下令全國人民tio̍h好好á鼓勵in。並且皇帝hō͘尼希米ê詔書中,bat囑咐皇家管理樹林ê主管協助尼希米,而河西省ê省長beh幫助尼希米,因為án-ne,chiah敢用chit種態度譏笑猶太人想beh重建城牆ê工程。Tùi第3節看出in甚至認為就算城牆蓋起來,mā是非常弱,不堪一擊,只要有隻狐狸小khóa一撞,城牆就會倒塌。這teh表示in若是beh出手攻擊,根本就無需要費甚麼氣力。這當然是講in重建chit-ê城是無甚麼意義ê。

第4到6節,尼希米聽chiah-ê對敵者ê嘲(sau)笑了後,伊無反擊,伊知影beh óa靠ê對象,並m̄是武器、波斯帝國皇帝ê權威,卻是上帝。因為án-ne,伊透過祈禱向上帝哭訴,表示敵人就是án-ne teh嘲(sau)笑in修築城牆ê工程。另外一方面,尼希米mā積極地帶領猶大人民趕工修建。上帝賜福猶大人民,hō͘ chit件修築工程進行得非常順利,而且超越預計ê目標。

第7到10節,chiah-ê對敵者一聽tio̍h修建城牆ê工程進行得非常順利,就非常憤怒。In無想tio̍h愈阻礙,in修建ê速度就愈快。就án-ne聯合阿拉伯、亞捫,kah亞實突ê居民,共同策劃想beh攻擊耶路撒冷,好製造事端,然後逼kah波斯皇帝下令停建。

經文:

尼希米記 4:11-4:23

註釋:

Chit段經文記載尼希米怎樣防衛chit項修建工程ê進行。伊已經得tio̍h敵人beh來破壞工程進行ê計謀。M̄-koh伊m̄是停止工作向上帝啼哭,卻是帶領人民the̍h起武器準備對抗。

第11到13節,尼希米得tio̍h ê情報是來自滲透tī chiah-ê敵人陣營中ê人,á是tī敵人陣營中,mā有反對in阻礙chit項工程進行ê人,in kā參巴拉等人想beh策劃製造動亂ê計謀傳hō͘尼希米知影,hō͘伊知影破壞ê計謀teh beh出現。尼希米m̄敢怠慢,伊叫民眾武裝起來,tio̍h配刀矛弓箭,然後組織宗族代表,守tī無修完ê城牆後面ê低窪處。

第14到15節,尼希米巡視每一個角落,kah擔任守衛ê人,鼓勵in m̄免驚敵人,in真正óa靠是上帝。伊mā kā chiah-ê守衛ê猶太人講,hō͘ in知影in是teh固守家己ê家園、家庭。結果敵人才發見in準備ài攻擊耶路撒冷ê計謀被曝光à。因為án-ne,in就收tńg來了chit項計謀。

第16到18節,為tio̍h防衛敵人突如來襲,尼希米ài猶太人民參與修建工程ê人,一半khiā-teh守衛,而且lóng一定tio̍h全副武裝,準備隨時lóng thang kah敵人作戰。包括搬運建材材料ê工人mā是一手the̍h武器,一隻手工作。緊急吹號ê號手是khiā tī尼希米身邊,來方便隨時聽尼希米下令吹號作戰。

第19到21節,因為修築城牆ê範圍甚廣,大家彼此之間ê距離mā遠,因為án-ne,尼希米提醒大家一聽吹號ê聲音,就beh趕緊放落手中ê工作,走到伊hia集合。每工lóng有一半ê人tī工作,另外一半ê人守衛備戰。

第22到23節,尼希米家己mā仝款,連睏ê時mā不換裝,因為án-ne,所有ê部下lóng kah伊學習,表示隨時lóng thang迎戰來惹事ê敵人。另外一方面,伊mā kā所有ê主管kah in ê助手講,暗時lóng一定tio̍h tòa tī城內,不准tńg去厝裡。換句話講,尼希米已經kā修建工程當做ná親像軍事作戰仝款。因為敵人隨時會來突擊。

經文:

尼希米記 5:1-5:19

註釋:

這是一章非常感動人ê記錄,說明tī苦難中同胞ê疼,以及領導者潔淨ê心靈ê重要性。頭前一章提起有外面ê勢力威脅tio̍h in建造城牆ê進行,chit章則記載阻礙修建城牆工程ê,是來自城牆內部,同胞之間ê問題。

第1到5節,因為修建工程延宕多ê時,因為án-ne,有真chē人因為加入修建工程,來致使忽略in ê家庭生活需要。因為án-ne,chiah-ê厝內人可能因為年老,á是尚且弱小無力工作thàn錢,á是因為身軀有疾病無法度óa靠工作飼一家人。因為án-ne,in生活需要ê「糧食」無夠。為tio̍h án-ne,in有人典押葡萄園、田地、房屋等,chiah ē-tàng買糧。M̄-koh mā有人典押chiah-ê田園是為tio̍h繳稅,iáu有kóa人用cha-bó͘-kiáⁿ去做奴工,chiah ē-tàng來換需要糧食á是金錢。

    第6到8節,tùi第六章15節看tio̍h修築工程tī日夜無停工作之下,雖然kan-taⁿ費ê時「五十兩工」,m̄-koh已經造成猶太人民teh生活需要下ê極大壓力,chiah-ê lóng成做in沈重ê負擔。M̄-koh真正ê問題tī第8節,就是tī猶太人中間有kóa富有ê人,竟然借錢hō͘ sàn-chhiah ê同胞,卻收取高利貸,chit種行為是違背摩西律法ê教示。摩西ê律法清楚規定:

「我ê 子民中間若有sàn-chhiah 人kah lín tòa,你若借伊錢,你m̄ -thang 親像債主kā 伊款待,mā m̄ -thang the̍h 伊ê利息。(全民版)」(出埃及記廿二:25)

「你ê 兄弟變sàn-chhiah 來tòa tī你 hia,你 tio̍ h kā 伊補助,hō͘ 伊 kah 你做伙tòa, 親像出外人kah 寄腳ê。M̄ -thang the̍h 伊ê 利息,mā m̄ -thang kā伊the̍h khah 加; 獨獨tio̍h 敬畏你ê 上
帝,hō͘ 你 ê 兄弟 kah 你 tòa。(全民版)」(利未記廿五:35—36)

「你借外族ê 人,thang the̍h 伊ê 利息,總是,借你ê 兄弟
就 m̄ -thang the̍ h 伊 ê 利息;thang hō͘ 上主— 你ê 上帝tī 你所去會得tio̍h 做產業ê 地,tī 你ê 手所做一切ê tāi-chì,kā你賜福。
(全民版)」(申命記廿三:20)

  以上三段經文lóng清楚說明in中間有人並無按照摩西律法ê規定對待sàn-chhiah ê同胞,特別是tī大家lóng盡心、盡力為修築圍牆而荒廢了家己田園ê時chūn,有錢ê人應該koh khah出力協助sàn-chhiah者度過生活難關chiah-tio̍h。尼希米為tio̍h chit件事非常艱苦心,mā真受氣。伊一屑á 都無留情譴責民眾ê首領kah官長,講in剝削家己ê同胞。  
 
第9到11節,伊真清楚表示chit種放高利貸ê行為是錯誤ê,因為真正敬畏上帝ê人是bē做chit款tāi-chì ê。因為án-ne,伊下令所有放款hō͘家己同胞ê人,tio̍h kā所有ê債務一筆勾消,無論是借錢á是借糧食、酒、油,á是田地、葡萄園、橄欖園,甚至是房屋等等ê債務lóng一定tio̍h取消。

第12到13節,當尼希米án-ne講了後,所有ê猶太人lóng表示願意照伊ê命令去執行,歸iáu財產,boài向sàn-chhiah人索取債務。為tio̍h beh hō͘ in所講ê話成真,尼希米chhōe來祭司,叫chiah-ê民間眾領袖tī祭司面前chiù-chōa,表明一定會遵守諾言。尼希米並且用象徵性ê動作,發出詛咒hō͘ hiah-ê無願意遵守chit項誓約ê人,hō͘ in所得tio̍h ê一切lóng消失殆盡。所有ê民間領袖lóng異口同聲表示:in是真誠願意遵照尼希米ê吩咐。

    第14到18節,亞達薛西在位第三十二年,mā就是主前432年。第14節chia講尼希米「做猶大省長」。伊原本是回鄉beh協助修築耶路撒冷城牆ê,結果卻變成tńg去擔任省長ê職務。Tī chit段經文中,尼希米mā記落來了家己tī當省長執政期間,從來m̄-bat有the̍h省長應得ê報酬,kah chìn前ê省長無仝。原因是伊深知chit時猶大人民生活非常痛苦。伊強調家己是一個敬畏上帝ê人,絕對bē做貪婪ê事。換句話講,敬畏上帝ê人,必定會愛民、不貪、不奢侈。伊樹立做領袖者ê典範──不貪、愛民、khiām。


經文:

尼希米記 6:1-6:19

註釋:

Tùi chit章thang看tio̍h尼希米帶領猶太人修築耶路撒冷城牆ê經過確實真無容易,因為伊不斷受tio̍h恐嚇。每pái tú-tio̍h恐嚇ê事,尼希米lóng是一再祈求上帝幫助伊,hō͘伊有智慧明辨上帝ê話語。

第1節,tùi chit節thang知影經過五十兩工了後,全部修築完成,除了進口處iáu未安置城門,其餘是連一個缺口mā無。

第2到4節,因為尼希米非常謹慎,並且要求所有參與修築城牆工作ê人,無論是tī日時頭á是暗時lóng一定tio̍h穿好衫褲,而且lóng「Kā武器giâ tī手中」(參考四:22—23),因為án-ne,伊ê仇敵參巴拉、多比雅、基善等人設計想beh誘hō͘尼希米離開耶路撒冷城,到離約帕東南約十一公里遠ê「阿挪」會面。其實,in ê目的就是beh hō͘尼希米遠離耶路撒冷城,án-ne beh謀殺伊就bē tú-tio̍h猶太人ê阻擋。M̄-koh尼希米深知in ê pháiⁿ念頭,因為án-ne,都無接受邀約,雖然in lóng是波斯帝國皇帝屬下ê官員,m̄-koh尼希米有皇帝亞達薛西ê詔書thang防身。伊派人回覆in表示無法度前往, 因為工作繁重。前後四pái邀約,每pái尼希米lóng用仝款ê理由回覆。

第5到7節,chit段經文講chiah-ê想謀害伊ê人,就án-ne發出第五封公文,所用ê理由lóng kah叛亂有關。In表示聽tio̍h尼希米想beh造反ê消息,所以chiah會積極修建城牆,因為伊想beh自立為王,並且講伊安排先知準備ài膏立伊為猶大ê王。恐嚇尼希米講chit件事一定會傳到波斯皇帝hia去。因為án-ne,in要求尼希米一定會親自kah in會商chit-ê tāi-chì可能帶來ê影響。

第8到9節,尼希米回覆清楚表示這是in捏造ê,絕對m̄是事實。M̄-koh chiah-ê人就恐嚇講beh hō͘ chit項修建工程停頓落來。尼希米是一個敬畏上帝ê人,每pái tú-tio̍h chit種困難á是威脅ê時,伊就是用祈禱來向上帝傾訴,懇求上帝幫助伊。

第10節,尼希米tī危險ê時chūn去走chhōe先知ê聲音,結果示瑪雅卻ài伊bih起來tī「聖殿ê聖所」,這是真奇怪ê建議,因為根據民數記第十八章7節ê規定,只有輪職ê祭司chiah thang進入「聖所」,其他人進入lóng一定tio̍h處死。因為án-ne,伊ê建議其實就是陷阱,beh hō͘尼希米即使不被仇敵刣死,mā beh hō͘猶太人祭司團認為伊褻瀆「聖所」ê神聖,就算不處死伊,伊mā會成做大家所詬病ê對象,án-ne伊要領導猶太人修建城牆ê工作會愈困難。尼希米mā tùi chia知影chit位示瑪雅乃是一位假先知,m̄是真正先知。Tùi第14節mā thang看tio̍h,當時假先知iáu bē少,包括女先知挪亞底。

第11節,尼希米拒絕tī chit困難ê時chūn逃避。其實,若beh逃避tú-tio̍h ê困難而活命,伊不回鄉就好勢。伊就是因為聽tio̍h城牆無修好,荒廢tio̍h,伊chiah決定請求亞達薛西皇帝准伊回鄉。

第12到14節,尼希米省思了示瑪雅ê建議後,chiah發見示瑪雅已經被參巴拉、多比雅等人買收了,想用chit種計謀hō͘尼希米tī猶太人中間失去尊嚴,無領導權,án-ne,in阻礙圍牆修建ê工作就thang達tio̍h。Tùi chia mā看tio̍h信仰墮落ê情況,就是先知mā接受o͘-se去陷害別人,這已經違背十誡ê第九誡à。

    第15到16節,chia真清楚講kui個圍牆ê工程經歷過五十兩工,終其尾完成。Hiah-ê計謀beh阻止chit項工程進行kah陷害尼希米ê人lóng感覺非常見笑,因為in無完成阻礙ê目標。M̄-koh in bē記得,chit項工程是上帝所允准beh重建ê。有上帝允准,祂就會出手幫助。

第17到19節,chit段經文thang看tio̍h除了有假先知附kah chiah-ê反對尼希米ê仇敵之外,同時mā有bē少猶太人參與tī chit項反對尼希米ê計謀中,原因真可能kah耶路撒冷ê貴族有關。In反對尼希米,真可能是因為尼希米ài in kā sàn-chhiah同胞ê債務一筆勾消ê緣故(參考五:1—13),這mā說明當時in同意kā債務一筆勾消,並m̄是真心實意,卻是礙tī面子。另外,mā有可能是kah in kah外邦cha-bó͘-gín-á結婚有關。因為尼希米kah以斯拉lóng是極力反對kah外族通婚。不過mā有可能是因為看tio̍h耶路撒冷城牆修好後,人民óa靠貴族協助之心必定大大減弱,相對ê,是對上帝ê信心大大加添,mā造成chiah-ê有權勢ê人對尼希米ê不滿。

經文:

尼希米記 7:1-7:73

註釋:

Chit章主要teh說明修築完成後ê尼希米,án怎幫助耶路撒冷城ê猶太居民維護城內khiā起ê安全。伊第一件做ê事,就是幫助in建立巡邏防衛制度。Siōng重要ê是chhōe出兩位值得信賴ê助手負責督導巡防ê工作,mā就是家己ê兄弟哈拿尼kah城堡ê司令官哈拿尼雅。Koh講,tī chit章中mā有一份戶口名單,是記錄結伴回鄉ê名單,kah以斯拉第二章所記載ê名單真接近。

第1到3節,chit段經文thang看出尼希米chiâⁿ實是一個真好ê領袖。伊tī城牆完全修建完成了後,隨時組成守衛人員。伊kā聖殿ê詩班、守衛、利未人等工作lóng派妥了後,隨時任命伊ê兄弟哈拿尼kah城堡司令哈拿尼雅兩人,負責耶路撒冷ê安全。伊o-ló哈拿尼雅是一個敬畏上帝、可靠ê人。伊只交帶清早天無亮以前,bē-tàng phah開城門,日頭落山後就beh kā城門關閉、上閂,並且分派守衛人員,負責保護安全。

第4節,tùi chit節thang看tio̍h主前586年,巴比倫皇帝尼布甲尼撒嚴重摧毀耶路撒冷城ê景況,確實荒廢得非常嚴重。另外一方面,因為本來ê城牆無修復,所以khiā起tī城內反tńg無安全,因為無人固守,任何強敵á是盜匪lóng可能入侵,會khiā起tī城內ê人,必定mā是窮到極點,因為án-ne,有無城牆、城門等對in來講已經無關要緊。這就是為甚麼城裡ê人並無chē ê原因,mā是「房屋造好ê mā無chē」ê原因,因為實在無能力繼續修建家己ê房舍。Ná親像前無久in向尼希米講ê,連食飯lóng有問題,iáu tio̍h典押家己ê kiáⁿ為奴,tī chit種情況下,beh修建家己ê房舍確實是真困難。Taⁿ城牆修復後,情況必定改變bē少。搬入來城內khiā起ê猶太人民必定會jú來jú chē。Ná親像第6節所講ê:「真chē流亡ê人離開巴比倫省,tńg去耶路撒冷kah猶大,各tńg來家己ê家鄉。」

	第5到6節,chit段經文講尼希米想beh瞭解kui個回鄉ê實況。因為án-ne,伊召集民眾kah in ê首領、長官,beh觀察in ê家譜。因為耶路撒冷城牆已經修復完成,而且已經有守衛,表示thang安全khiā起ê時,回鄉人潮陸續增加。In就是tùi巴比倫奴隸之地tńg來ê人。

Tùi第7節到第73節ê經文,資料kah以斯拉記第二章仝款。Chit段列出了回鄉團中ê十二位領袖名單。

    第8到25節,chit段經文是記載以色列各宗族ê人數。Chia共計提供了十八個宗族。

第26到38節,chit段經文記錄了tńg來到祖籍ê人數。

第39到42節,祭司宗族回鄉ê人數。

第43到45節,chit段經文記載利未宗族、聖殿歌手、聖殿守衛等宗族人數。

第46到56節,chit段記載聖殿工人ê三十二個宗族名單。

第57到59節,這是所羅門奴僕共計有ê時一個宗族。

第60節,聖殿工人ê後代kah所羅門奴僕ê後代tńg來ê人數有「三百九十二名」。

第61到62節,chit兩節真有意思,真可能chiah-ê人確實已經無法度chhōe-tio̍h本來ê族譜,m̄-koh,in mā可能是跟tòein來到耶路撒冷ê外族人,ná親像當年出埃及ê時,mā有真chē外族人跟tòe以色列民族逃出埃及仝款(參考出埃及記十二:38,民數記十一:4)。

第63到65節,chia提起有kóa人無法度chhōe-tio̍h族譜來證明in是屬tī祭司宗族ê人,m̄-koh因為in中間卻有人kah外族人通婚,因為án-ne mā被列入為「無清氣」ê族群,chit種人無法度擔任祭司ê工作。

第66到69節,chia提供總計回鄉人數,mā有男女奴僕,以及男女歌手。另外mā記錄了馬、騾子、駱駝、驢á ê數量。Chiah-ê動物lóng是運輸上真重要ê動力。

第70到72節,chia記落來了有關in帶tńg來貴重ê捐助物件,包括有省長捐贈ê,除了有黃金八公斤外,iáu有祭司禮服、禮儀用ê碗。Iáu有眾族長捐獻ê金銀,以及人民捐獻ê金銀kah祭司禮服等。

第73節,chit節是第一到七章ê總結,表示所有回鄉ê人,生活lóng安頓落來à。

Mā是tùi第一到七章是尼希米記前半部,lóng是記載尼希米ê事。第八到十章,lóng是記載有關以斯拉ê事。伊是一位「飽學之士,精通上主──以色列上帝頒hō͘摩西ê律法」(參考以斯拉記七:6)。

經文:

尼希米記 8:1-8:12

註釋:

Chit章主要提起以斯拉án怎kā上帝ê約冊宣讀hō͘ 回鄉重建家園kah耶路撒冷ê民眾聽,大家lóng感動流目屎。然後民眾ê代表,就是各宗族ê領袖kah祭司、利未人等,聚集到以斯拉hia,表示願意照律法冊ê記載過Tòa棚節。Tī節期中in每工聽以斯拉宣讀律法冊所記載ê。

一般來講,這mā是用斯拉tī主前458年回鄉了後ê十三年,mā就是主前445年第一pái公開宣讀摩西律法冊。

Chit段經文是記載以斯拉tī猶太人過年ê正月,公開宣讀摩西律法冊,而且連ē-tàng聽bat ê兒童mā靜心地聽。表示chit項宣讀律法冊,差不多是回鄉後,以色列人民ê一件全民運動。

第1到3節,chia ê「第七月」、「hit月ê第一日」,是teh指猶太曆ê正月初一,mā就是現代ê十月初八。照利未記第廿三章23到25節ê記載,chit工kā它稱做「吹角節」所有ê人lóng tio̍h放落工作,敬拜上帝(有關過新年ê活動,thang參考民數記第廿九章1到6節)。以斯拉就利用chit-ê時間,向聚集tī耶路撒冷廣場ê民眾宣讀摩西律法冊所記載ê hō͘民眾聽。聽眾包括所有男女老幼。地點就tī耶路撒冷「水門前ê廣場上」,就án-ne整整宣讀了一個上午。而且in lóng是khiā-teh聽,而且tùi黎明khiā-teh聽tio̍h中晝,這卻m̄是一件簡單ê事,時間至少長到六個小時以上。

這mā是用斯拉tńg去耶路撒冷後,第一pái公開宣讀摩西律法。伊mā是重新整理摩西律法ê一位經學教師,mā因為伊,chiah ē-tàng kā舊約聖經完整保存。因為tī主前586年聖殿被巴比倫軍隊拆毀後,所有ê經冊ē-sái講是被火燒殆盡。以斯拉就是重新整理摩西律法經冊ê一位經學教師,m̄-nā án-ne,伊iáu教導人民怎樣學習。

第4節,chit節列出了一份十三個人ê名單,chiah-ê人應該lóng是祭司。

第5到8節,tio̍h注意chia有人「翻譯」以斯拉宣讀ê律法冊hō͘人民聽,hō͘ in lóng聽bat,這是非常重要ê事。所謂「翻譯」chit-ê詞,mā thang解釋為「說明內容」。因為律法冊是用希伯來文寫ê,而大多數ê猶太人已經tī巴比倫khiā起長到五十年以上,可能有人一出世,就已經接受巴比倫ê文化、思想,如果tùi第2節看,就thang明白in中間有kóa lóng是tī巴比倫出世ê少年一代,即使聽bat母語,mā可能無法度明白律法冊ê意義。Koh加上in可能有一kóa外族人跟tòe in來到耶路撒冷,想beh明白律法冊ê意義就koh khah困難à。因為án-ne,kā它解釋á是翻譯lóng是一定tio̍h ê。Á chiah-ê翻譯和解講ê工作就是由第7節所列出ê chit份十三位利未人。

第9到12節,民眾聽律法冊所記載ê內容後,lóng哭了起來。M̄-koh以斯拉、尼希米,以及這十三位解釋、翻譯hō͘民眾知影律法冊內容ê利未人安慰in,ài in kā悲泣轉換做喜樂,因為這是用上帝為主ê日子,應該tio̍h歡喜。Koh khah重要ê,ài in知影分享食物hō͘欠缺ê人。Á民眾mā聽從in ê建議,chiâⁿ實án-ne做。

經文:

尼希米記 8:13-8:18

註釋:

Chit段經文記載回鄉後ê以色列人民,第一pái守Tòa棚節,而且按照摩西律法中所記載ê方式進行。

第13節,當聽一kui工ê摩西律法冊之記載後,各宗族ê代表,包含祭司kah利未人等,in lóng聚集到以斯拉hia,想beh koh khah進一步研究律法冊ê教示。原因是in想beh學習koh-khah chē,好教導家己ê同胞。

第14到15節,in聽tio̍h關係Tòa棚節ê記事,因為án-ne,認為thang隨時舉行守chit節日ê活動,時間照摩西律法冊ê規定,就是tī七月十五日,連續七工,到七月廿一日(參考利未記廿三:33—43)。離in chit-má ê七月第二日(第13節)chhun落來兩個禮拜時間。為tio̍h án-ne,in馬上發出通知hō͘所有同胞,ài in去準備過chit節日所需要ê材料,包括樹枝等,準備搭帳棚用。

第16到18節,chia講「自從嫩ê kiáⁿ約書亞ê時代以來,這是以色列人第一pái án-ne做」過Tòa棚節,chit句話koh khah正確ê意思,應該是teh指in已經真久無án-ne真心、熱情守Tòa棚節了,mā因為án-ne in心中深受感動,甚至啼哭甚久。因為tī所羅門完成聖殿建築了後,mā守過Tòa棚節(參考歷代志下七:8—10),m̄-koh kah亡國回鄉後,重建家園kah耶路撒冷城、聖殿後守chit節期,感受必定有非常無仝款。In過去是tī田園搭帳棚,chit-má是tī各自厝裡ê庭園、厝頂ê平台頂搭帳棚,這thang幫助in重新省思上帝怎樣tī in siōng艱困ê時chūn,kah in同在。帶領in tùi奴隸之地ê巴比倫重新回鄉,就ná親像早年祖先出埃及tī曠野漂流時代仝款。

經文:

尼希米記 9:1-9:37

註釋:

Chit章tī中文版聖經,無論是《現代中文譯本》á是《和合本》,lóng記載到第38節。M̄-koh tī《希伯來文版本》是kā第38節編輯tī第十章1節中。

Chit章主要是以利未人耶書亞等人帶領民眾敬拜,然後全體參加Tòa棚節ê民眾lóng齊聲祈禱。Chit章就是民眾ê祈禱詩歌。Chit首詩歌mā ē-sái講是一首史詩,tùi上帝揀選亞伯拉罕開始,經歷過進入埃及kah行出埃及入曠野,後來進入迦南地,kah以色列人民背叛上帝、亡國等,in承認棄sak上帝ê錯誤。因為án-ne,chit首詩歌mā ē-sái講是一首懺悔ê詩歌。

Chit段經文是tī Tòa棚節結束ê時,參加chit節期活動ê以色列人民聚集,透過敬拜方式唱出ê詩歌。Chit段詩歌是tùi上帝揀選以色列人民ê祖先亞伯拉罕開始,經過in進入埃及kah離開埃及入曠野,後來進入迦南chit片流奶kah蜜之地,為tio̍h án-ne而獻上感恩。

第1到3節,照利未記第廿三章33到43節真清楚記載,有關守Tòa棚節ê細則:Tòa棚節tùi七月十五日開始,連續七工到廿二日止。Tī第八章18節講in守節七工,「到第八工,按照律法ê指示舉行閉會典禮」。照理講Tòa棚節應該已經結束,時間是tī七月廿三日。可能是有人因為感覺罪過太深重pah,因為án-ne有kóa以色列人民感覺án-ne iáu無法度hō͘家己所犯ê罪過得tio̍h釋放,就án-ne隔工,mā就是廿四日,in koh聚集做伙,以禁食ê方式表達in為家己ê罪憂傷。Chiah-ê人用「穿麻衣、掖土粉tī頭殼頂」等等chiah-ê動作,表示in心內ê哀傷,這真類似原本七月初十贖罪日應該有ê方式(參考利未記十六:4、29—30)。除了認罪之外,in mā koh一pái以敬虔ê心注意聽以斯拉所整理出來ê律法冊,án-ne足足khiā了三個鐘頭之久,然後koh用三個鐘頭敬拜上帝。

第4到5節,各提出一組名單,其中有五個名是仝款ê,三個名無仝款。咱無清楚為甚麼會án-ne,真可能是因為取材自無仝ê傳承。M̄-koh mā有可能是分做兩組,擔任tio̍h不同時段ê敬拜工作,其中有五個人工作khah重。

第5節提起有八位利未人帶領以色列民眾開始敬拜上帝,in以「宣召」開始,ài全體以色列人民歌頌o-ló上帝。

Tùi第6節開始直到第37節止,chit段詩歌就是頭前敘述過ê,是以色列ê史詩。Chit首史詩mā ē-sái講是一首懺悔ê詩歌,thang對照詩篇第一○五到一○七篇,真可能是tī in tńg來國內了後tī贖罪日聚會ê時吟唱。

第6到8節,tùi第6節ê歌頌上帝創造宇宙萬物ê美後,續落來就是敘述上帝揀選以色列人民ê祖先亞伯拉罕離開吾珥,而且kah亞伯拉罕立約,應允kā迦南地,mā就是迦南人、赫人等族群khiā起ê土地賞賜hō͘亞伯拉罕ê kiáⁿ孫。Tī chia只提起迦南地ê六個族群,tī創世記第十五章19到20節,則記載十個族群。有一個非常重要ê結論,Tī chit段結尾強調上帝「信守」諾言,而且「公義」ê。

第9到14節,chit段詩歌tùi以色列人民後來tī埃及寄居一段時間後,因為成做奴隸(參考出埃及第一到二章),上帝差遣祂ê奴僕摩西去帶領以色列人民離開埃及,然後行過紅海,kā埃及ê追兵淹滅tī紅海中。續落來,tī曠野漂流期間,上帝日時頭用雲柱、暗時用火柱保守引chhōa in,並且tī西奈山頒布律法誡命hō͘摩西hō͘伊轉告以色列人民。

第15到21節,chit段詩歌是描述以色列人民tī離開埃及進入曠野後ê境遇,in tú-tio̍h iau餓、口渴,因為án-ne,上帝tùi天頂降落嗎哪解in ê飢,並hō͘石磐湧出泉水解in ê渴。M̄-koh in卻無記tiâu chiah-ê奇異恩典,反tńg是悖逆上帝拯救ê恩典,鑄造偶像來拜,褻瀆了上帝ê神聖。M̄-koh上帝iáu是憐憫、赦免in。就án-ne,in tī曠野漂流長到四十年時間。

第22到25節,chit段詩歌是描述tī摩西過世了後,上帝指定由約書亞繼續帶領以色列人民進入祂賞賜ê迦南應允之地,m̄-nā hō͘ in ē-tàng實現眾多ê kiáⁿ孫,而且擁有一大片土地thang khiā起,hō͘ in無koh過奴隸生活,而且ē-tàng豐衣足食。

第26到31節,chit段詩歌說明即使上帝án-ne深愛以色列人民,ē-sái講是以色列人民真緊to̍h bē記得上帝ê恩典,in到à hit-ê流奶kah蜜之地,竟然iáu是背叛了上帝,並且殺害上帝ê奴僕先知,m̄聽上帝beh眾先知對in ê苦勸。有真chē pái,上帝用以色列人民ê敵人來教示in。Án-ne,每pái in悔改,上帝就赦免in。因為上帝是一個滿有恩典、憐憫ê上帝。

第32到37節,這最後一段詩歌是teh講述目前ê景況,tùi主前721年北國以色列淪亡tī亞述帝國之下,到主前586年被巴比倫帝國消滅了南國猶大,以色列人民全部lóng成做奴隸。然後上帝以祂ê大能帶領in重新tńg去家鄉,就tī上帝賞賜hō͘ in khiā起ê迦南土地頂面,做波斯帝國ê奴隸。會遭遇chiah-ê苦難ê唯一原因就是,in棄sak上帝所帶來ê結果。上帝用外族人來統治in,當做懲罰。

經文:

尼希米記 9:38-10:39

註釋:

Chit段經文講tio̍h以色列人民tī利未人帶領下,透過敬拜上帝ê方式,唸出長長ê懺悔文後,續落來就是由以色列人民主動而且慎重簽名,表示beh kah上帝重新立約。

第十章lóng是用「複數」代名詞ê句型表示,說明這是全體以色列人民共同ê心願。Chit章真可能是出tī編輯者ê作品。Chit章主要thang分做兩段,第一段列出一份簽署名單(第1到27節),第二段則約ê內容(第28到39節)。

第九章38節,ē-sái講是第十章ê序論,說明teh敬拜了後,全體參加Tòa棚節ê以色列人民,包括各宗族領袖、利未人,kah眾祭司,大家lóng慎重簽名,表示願意遵從上帝ê旨意,無koh違背。

Chia特別強調所有chiah-ê名單lóng是用簽名ê,所謂「簽名」,指ê是蓋章。

第十章1到27節,總共列出21個祭司、17個利未人,44個人民領袖ê名單。值得注意ê是chiah-ê人民領袖是用家族中khah知名ê祖先來記錄,而且chit份名單kah以斯拉記第二章3到30節所記載ê名單類似。

Koh講,chit份祭司ê名單中,有真chē koh一pái出現tī第十二章1到7節中。Á利未人ê名單大部分mā出現tī第八章7節、第九章4到5節等等。Tio̍h注意ê是祭司人數比利未人chē,chit點tùi第七章ê 回鄉人數就看會出來。

Tùi第14到27節中,thang tùi第七章6到63節,以及以斯拉記第二章1到61節中看tio̍h重複ê名。

第28到29節,chia記載一般人民mā tòe chiah-ê眾領袖chiù-chōa,表示in已經kah外族人隔離出來,in表示願意跟tòe chiah-ê宗教kah人民領袖仝款ê態度,願意遵守摩西律法ê規定過生活。無論是chiù-chōa á是簽名蓋章,內容lóng仝款teh表明絕對會遵守摩西律法kah規例。這mā就是用斯拉siōng重要ê貢獻,伊tī巴比倫精心收集編撰完成ê摩西律法條例,koh一pái成做猶太人民回鄉後siōng重要ê經典。

第30到39節,chit段經文是in誓約ê簡單內容,包括下列幾項:

一是m̄ kah外族人通婚(第30節)。

二是堅持遵守安息日做聖日,無工作之外,mā無買賣(第31節a)。

三是一定會遵守每七年休耕一年ê安息年規律,並且豁免債務(第31節b)。

四是會負擔聖殿所需要ê費用(第32到33節)。這thang參考出埃及記第三十章11到16節,規定凡hit年滿二十歲以上ê男子lóng tio̍h負擔,而且無論貧富貴賤lóng仝款金額。

五是各宗族輪流負責供給聖殿獻祭用ê柴火(第34節),這mā teh表示in絕對無koh會疏忽敬拜上帝ê事。

六是beh獻上初熟ê收成,包括土地生產ê五穀、cheng-seⁿ獻hō͘上帝(第35節)。

七是beh照律法規定獻上大kiáⁿ kah頭胎ê動物hō͘上帝,用chit種方式表達感恩(第36節)。

八是beh奉獻收成ê十分之一(第37節)。

九是祭司kah利未人會共同監督這十分之一ê奉獻,並確實kā奉獻用tī聖殿ê所需要ê(第38到39節)。用chit種方式koh一pái表明絕對不疏忽「上帝ê聖殿」,表示in會忠實tī上帝。因為聖殿是代表敬拜上帝ê所在,bē疏忽,就是teh表示in會謹記在心。

可惜ê是,人lóng是tī得意ê時chūn就bē記得上帝。第十三章講tio̍h當尼希米tńg去波斯向亞達薛西皇帝述職後koh再tńg去耶路撒冷ê時,伊看tio̍h人民故態復萌,koh tī安息日做買賣、工作。

經文:

尼希米記 11:1-11:36

註釋:

Tùi chit章開始,koh以尼希米ê記事為主。Tī頭前第八到十章,是關係以斯拉ê記事。

第十一到十二章26節是一連串ê名單。Chiah-ê名單是記載遷徙tòa入去耶路撒冷城ê各族代表。

第1到3節,chia一開始就講「人民ê眾領袖lóng tòa tī耶路撒冷;其餘ê人民抽籤,每十家選出一間tòa tī耶路撒冷,chhun落來ê就tòa tī其他城鎮。每一個自願tòa tī耶路撒冷ê人,民眾lóng o-ló伊。」chit句話讀起來感覺真奇怪,為甚麼會án-ne?若是對照第七章4節ê「城是闊koh 大,總是,其中人民真少,厝iáu 未起好。(全民版)」chit節經文,就thang明白為甚麼tio̍h用抽籤ê方式,每十個家庭選出一個去tòa tī耶路撒冷城à。這是因為耶路撒冷城是外族人siōng歡喜攻擊、洗劫ê對象。特別是tī主前586年被巴比倫皇帝尼布甲尼撒摧毀hit-ê城後,耶路撒冷城差不多成了廢墟,甚至tī相連續回鄉ê時代,mā無人歡喜khiā起tī耶路撒冷城,這真可能kah本來hit-ê城城牆已經殘破了,因為城牆若是破損ê,表示hit-ê城tī安全上有問題(參考一:3),尼希米就是為tio̍h修建城牆而回鄉ê,伊家己出錢koh出力,chit-má城牆已經修建好勢,應該有koh-khah chē人tòa入去來chiah-tio̍h,何況聖殿mā已經重建完成(參考以斯拉記六:13—18;尼希米記十一:19—23),如果koh再不住入來,hō͘ hit-ê城成做人民聚集ê中心,he是真奇怪ê事。

    第4到9節,chit段經文是記載各支族領袖tòa入去耶路撒冷ê名單。M̄-koh chia只提供猶大支族kah便雅憫支族ê名單,這已經teh隱喻回鄉ê人潮中,雖然講是十二支派,其實,北部支族ê人lóng已經被亞述帝國販賣到世界各地去做奴隸了,ē-tàng 回鄉ê人其實無chē,差不多lóng是南部猶大支族kah便雅憫支族ê人。

第10到14節,chit段是祭司代表名單。主要以西萊雅、亞大雅、亞瑪帥等三大家族為主。

第15到18節,chit段是利未支族。Chia特別強調利未人共計有「兩百八十四人tòa tī聖城耶路撒冷」,表示利未人mā有守護hit-ê城ê使命,甚至比一般民眾koh-khah重視守城ê責任。

第19節是聖殿守衛,共計有「一百七十二名」。

第20到21節,chia雖然講「其餘ê以色列人kah餘下ê祭司、利未人tòa tī猶大ê其他城鎮、in祖業ê所在」,m̄-koh這並無表示in就m̄免負擔聖殿kah聖城ê守衛工作,in mā是beh輪流派人來擔任守護ê工作。

第22到23節,chia講「王有明文規定」,是teh指大衛時代所訂出來ê律法,規定聖殿敬拜一定tio̍h有音樂,一定tio̍h由利未族人中選派專人負責音樂ê事務(參考歷代志上廿五:1—7)。

第24節,chit節真重要,說明比伊希雅是猶大支族ê人,伊teh代表回鄉後ê以色列人民駐在波斯,ē-sái講是擔任外交使節ê角色。

第25到30節,chit段經文是記載猶大支族khiā起ê城鎮。

第31到36節,chit段經文記載便雅憫支族khiā起ê城鎮。
經文:

尼希米記 12:1-12:47

註釋:

Chit章主要分做兩部分,一是四種名單(第1到26節),二是尼希米時代修建完成ê耶路撒冷城牆,舉行奉獻城牆禮儀(第27到43節),最後一小段是第44到47節,記載負責看管聖殿倉庫kah職責分配工作ê人。

第1到7節,chit段經文是記載陪同所羅巴伯,kah大祭司耶書亞等,同齊tńg去耶路撒冷ê祭司。Chit批名單是tī主前538年,mā就是siōng早期回鄉ê人,chia共計提供了22組名單,是屬tī第一批tńg去ê祭司名單。注意第2節ê「以斯拉」,並m̄是用斯拉記ê「以斯拉」,因為以斯拉記中記載ê以斯拉,是tī主前458年chiah tùi巴比倫回鄉ê,時間相距長到八十年之久。

第8到9節,chia提供了這八組名單,是屬tī利未人,比以斯拉記第二章40到42節所提供ê名單koh-khah-chē。第8節ê六組名單,是唱感謝詩歌ê,而後第9節ê名單兩組kah其他利未人,則唱「應」ê部分,chit點thang參考第24節所記載ê「一唱一應地o-ló上帝,感謝上帝」chit句話,就koh khah清楚了,這ná親像chit-má禮拜中讀「啟應文」仝款。

第10到11節,chia是大祭司ê家族。Chit位耶書亞,就是第一批回鄉ê大祭司。第10節chia提起以利亞實,thang參考第十三章4到9節ê記載,講伊因為teh分配聖殿房間ê時,有私下相授ê污點,hō͘尼希米大大受氣。Á第11節ê約拿單,比較第22節ê「約哈難」,有可能是仝一個人。

第12到21節,chit段經文提起祭司ê名單,tī第1到7節已經提過,chit份名單應該是屬tī第二批tńg去故鄉者。

第22到23節,chia提起tī「大流士做波斯皇帝」,這有可能是大流士二世,伊ê時代是tī主前423到404年;á是大流士三世,伊ê時代是主前336到331年。

第24到26節,ná親像頭前已經有提起ê,有一批利未人tī聖殿敬拜中,是用「啟應」ê方式,一唱一應地o-ló上帝、感謝上帝。另外有一批利未人被分配去看守聖殿邊ê庫房。

第27到30節,這是tī尼希米努力之下,kā耶路撒冷城牆修建完成。因為án-ne,舉行特別ê奉獻禮拜,利未人lóng被召集來參加chit pái ê盛會。祭司主持城牆潔淨ê禮儀,而利未人則tī禮儀中獻唱詩歌,mā搭配tio̍h樂器。Thang看出in tī回鄉了後,對tī敬拜ê事非常慎重,m̄敢koh再有怠慢,因為án-ne,潔淨己身成做所有祭司、利未人ê基本要求,mā同時要求所有人民kah in仝款(第44到45節),以潔淨ê心敬拜上帝。雖然這只是耶路撒冷城牆完成ê感恩禮拜,m̄-koh重要ê是禮拜本身是teh回應上帝ê疼,並m̄是城牆ê神聖。

第31到42節,chit段經文記載猶太人領袖分做兩隊,由in帶領群眾tī城牆頂繞城行,象徵tio̍h城牆ê修復已經完成,in是一面行,一面吟唱詩歌頌讚上帝。Soah ē-tàng tī城牆頂繞tio̍h行,mā表示hit-ê城牆已經非常堅固thang抵抗外來ê侵犯。這mā就是為甚麼tú開始ê時,就有參巴拉、多比雅、基善等人認為in修築城牆乃是準備ài背叛波斯皇帝(參考二:19)。

第43節,tùi chit節就thang明白為甚麼in會hit種興奮kah快樂,原因是tùi án-ne了後,有城牆thang保護in,m̄免koh再擔憂會有附近ê外人隨意進入城內攪擾in ê生活,這mā是「婦女kah眾細kiáⁿ」mā加入慶祝行列ê原因。

第44到47節,chit段經文記載利未人被分派看管倉庫,in確實真盡責,得tio̍h人民ê信任,而眾祭司mā lóng按照律法冊上所記載ê規矩,辦理潔淨ê禮儀。加上有利未人ê詩班搭配,致使奉獻城牆ê禮儀進行得非常順利而且美好。因為án-ne,以色列人民會主動送禮物hō͘利未人kah祭司。

經文:

尼希米記 13:1-13:22

註釋:

Chit章主要teh說明回鄉後ê以色列人民,真緊to̍h koh bē記得摩西律法ê規定,無照規定嚴格遵守安息日ê規矩,因為án-ne,尼希米非常無歡喜,伊下令每tú-tio̍h安息日就beh kā城門關閉,hō͘大家ē-tàng確實遵守安息日ê規定。另外,伊mā發見iáu是有人繼續kah外族人通婚,甚至連祭司mā有人án-ne做,因為chiah-ê cha-bó͘-gín-á會誘惑以色列人民像過去仝款,棄sak上帝。因為án-ne,尼希米koh一pái發出通告,絕對bē-tàng koh再有chit種事發生。

Chit段經文主要是記載以色列人民真緊to̍h bē記得in一定tio̍h供養專心tī聖殿服事ê利未人,免得in因為生活ê煩惱而無法度專心工作。因為án-ne,尼希米重新派人管理聖殿ê倉庫,hō͘利未人thang得tio̍h應該有ê生活資助而ē-tàng專心tī聖殿工作。

    第1到3節,tùi第1節講「hit工」,對照第十二章27節來看,就會知影he是「獻耶路撒冷城牆ê時chūn」。Tī宣讀摩西律法冊ê時,特別聽tio̍h「不准亞捫人kah摩押人」進入聖殿參加敬拜ê規定,這是kah申命記第廿三章3到4節,講摩押kah亞捫人「甚至到第十代,mā bē-tàng加入上主ê聚會」規定有關,原因是in出埃及ê時,m̄-nā無伸出援手幫助猶太人ê祖先,反tńg是落井下石陷害in。Tī第2節提起「雇了巴蘭」chit件事,thang參考民數記第廿二到廿四章。而且摩押人iáu bat引誘以色列人民犯姦淫罪(參考民數記第廿五章)。

    第4到9節,chit段經文ê背景是尼希米tńg去波斯述職,向皇帝亞達薛西一世報告伊tī耶路撒冷城進行修築城牆ê事(參考二1—10)。Chia提起時間是tī亞達薛西做王ê第三十二年,mā就是主前433年。不過尼希米真緊koh tńg去耶路撒冷城,這mā是伊擔任第二任省長ê開始。可能就是tī伊tńg去波斯向皇帝報告後,無久就聽tio̍h有關以利亞實大祭司無公平地分配房間,因為伊偏袒了多比雅。尼希米為tio̍h án-ne非常受氣、艱苦心,就án-ne koh向皇帝請假tńg去耶路撒冷。主要原因是多比雅tùi án-ne亞捫人,卻佔tòa聖殿裡存放敬拜用之器具ê倉庫,而且多比雅mā是反對尼希米帶領猶大人民修築耶路撒冷圍牆ê主要份子之一(參考二:10)。尼希米認為chit種人連khiā起tī耶路撒冷城lóng有問題,怎樣ē-tàng koh分配到比較好ê聖殿小屋?因為án-ne,伊kā多比雅趕出去,mā kā伊ê物件全lóng扔出去,然後koh下令潔淨該倉庫,kā聖殿器具、獻祭用品khǹg tńg去。

    第10到13節,這是一段真重要ê經文,表示回鄉ê以色列人民,並無落實摩西律法ê規定,好好á照顧利未人,hō͘ in專心tī聖殿服事敬拜禮儀ê工作。當尼希米tńg來到耶路撒冷ê時,看tio̍h利未人因為無人注意、關心到in ê生活所需要ê,結果為tio̍h生活所需要ê而紛紛tńg去家己ê農莊去。這致使聖殿敬拜ê禮儀欠缺人手,特別是tī清潔ê工作上,無法度保持聖殿ê潔淨。尼希米m̄-nā責備以色列領袖,mā kā tńg去ê利未人koh召了tńg來,hō͘ in thang安心tī聖殿工作。就án-ne,以色列人民koh開始kā十分之一ê奉獻帶到聖殿。

照第十一章18節ê記載,利未人tńg來到故鄉khiā起tī耶路撒冷ê,只有284人,比起祭司ê 1192人實在相差真chē,這可能kah in因為工作量致使壓力大有關係。Koh khah重要ê,是無夠額ê食物維持生活。Tī尼希米ê看法裡,忽略敬拜ê事,就是心中遠離上帝。對專心服事敬拜工作者缺乏照顧,就是疏忽敬拜ê事。這kah in chìn前ê誓約相違背(參考十:37—39)。

第14節,為tio̍h chit件事,尼希米祈求上帝ê憐憫,懇求上帝賞賜hō͘伊koh-khah chē ê氣力。

    第15到18節,chit段經文記載發生違反安息日誡命ê事。有人tī安息日做買賣,而且kah外族ê泰爾人tī安息日進行貿易ê事。尼希米koh一pái譴責以色列人領袖,怎樣ē-tàng允准chit款tāi-chì發生。第18節thang參考耶利米書第十七章19到27節,當人無kā安息日看做聖日來遵守ê時chūn,就表示chit-ê人心中已經棄sak上帝à。因為遵守安息日是十誡中ê第四誡,是上帝所訂ê聖日,非常重要。先知以西結甚至詮釋安息日乃是kah上帝立約ê聖日(參考以西結書二十:12)。

    第19到22節,為tio̍h chit件違背安息日ê事,尼希米kui氣就下令,每tú-tio̍h安息日一定tio̍h關閉城門,hō͘ hiah-ê想beh做seng-lí thàn錢ê外族人,kah tī耶路撒冷城內ê居民無機會。M̄-koh有kóa外族人tī安息日前就留tī城外,m̄信tī安息日bē phah開城門,這mā thang看出已經有城內ê以色列人民是已經真習慣tī安息日繼續做seng-lí,bē記得敬拜ê重要性à。就án-ne,尼希米差派利未人嚴格執行守安息日不開城門ê命令。Mā為tio̍h執行chit件違反安息日ê事,尼希米koh一pái祈求上帝ê憐憫。

經文:

尼希米記 13:23-13:31

註釋:

Chit段經文記載尼希米用嚴厲ê手段對待hiah-ê娶外族人做bó͘ ê猶太人。原因是過去因為娶外族人做bó͘,結果有真chē以色列人民因為án-ne而棄sak了上帝,去拜偶像神明。其實,真正ê問題,並m̄是娶外族人,卻是跟tòe外族人bó͘去拜偶像神明,chit點chiah是真正ê問題所在。因為án-ne,尼希米下令嚴格禁止chit種事發生。

    第23到27節,chia提起有人娶「亞實突」人做bó͘,這「亞實突」,是teh指非利士人,而非利士人一直是欺負以色列人民siōng厲害ê一族。續落來提起「亞捫」、「摩押」,這兩族lóng是摩西律法禁止進入敬拜ê行列。因為án-ne,kah chit種人結婚,等於是會hō͘ in bē記得tio̍h敬拜上帝仝款危險。Tī chia,尼希米認為koh khah嚴重ê,是chiah-ê外族人lóng bē講以色列人民ê語言,而chiah-ê外族人ê bó͘ tio̍h負起教導gín-á ê責任,koh-khah容易hō͘ in ê kiáⁿ孫bē記得語言。伊特別提起所羅門王墮落、敗壞ê原因,就是因為娶外族人做bó͘(參考列王記上十一:3)。

第28到29節,chia特別提起大祭司以利亞實ê kiáⁿ耶何耶大,伊ê kiáⁿ mā是娶外族人做bó͘,為tio̍h án-ne被尼希米下令驅逐離開耶路撒冷,不准伊khiā起tī城內。這mā表示伊會失去祭司ê資格。根據利未記第廿一章14到15節有規定:「bē-tàng kah寡婦、離過婚ê cha-bó͘-gín-á,á是妓女結婚,只thang kah本族裡ê處女結婚。伊bē-tàng hō͘家己ê kiáⁿ成做無清氣ê;我是上主—我已經選立伊做大祭司。」這是對大祭司kah伊kiáⁿ孫ê規定。Koh加上耶何耶大ê kiáⁿ是娶和倫人參巴拉ê cha-bó͘-kiáⁿ,而參巴拉又koh是參與反對尼希米修築城牆ê主要份子之一(參考二:10),這mā是hō͘尼希米koh khah受氣ê原因。為tio̍h án-ne件事,尼希米koh一pái請求上帝憐憫。並且會記得chit件事,用chit種方式來表示懲罰。

第30到31節,chit兩節說明尼希米為tio̍h beh改變頂面所講ê錯誤,制訂規律,tio̍h以色列人民確實遵守無koh kah外族人通婚致使棄sak上帝,mā tio̍h照時kā獻祭用ê柴kah初熟ê物件帶來奉獻好供給利未人、祭司ê生活所需要ê。

    Chit章記載尼希米一再重複ê一句話:求上帝記念伊所做ê工(第14節、第22節、第31節等等)。Chia ê求上帝「記念」、「會記得」,chit-ê詞,其實mā是kui本尼希米記ê主要用語(參考四:14;五:19;六:14;十三:29)。

重新查詢