重新查詢
經文:

那鴻書 1:1-1:15

註釋:

「那鴻書」chit本先知文獻用伊ê名mā是真有意思ê一件事,因為chit-ê名字就是「安慰」ê意思。Á先知那鴻所傳達ê信息中心,就談起亞述帝國ê首都尼尼微城真緊to̍h會受毀滅,而南國猶大繁榮重現,因為上帝kā伸出大能ê手來拯救祂ê子民以色列人民。

	原因是主前721年,亞述帝國毀滅了北國以色列,並且kā人民掠到亞述帝國去,然後轉賣到各地去做奴隸。Koh kā附近國家、族群強制移居到撒馬利亞城內,kah北國以色列人民混居做伙。

	因為án-ne,當先知那鴻傳出信息講上帝會懲罰亞述帝國,首府尼尼微城會受毀滅ê時,chit對正面臨威脅ê猶大之以色列人民來講,實在是大快人心ê好消息。Á對hiah-ê被掠到亞述kah外國奴隸市場等待販賣ê以色列人民來講,確實是tùi chia得tio̍h真大ê安慰。

	其實,tùi先知ê文獻來看會發見一個真重要ê信息,he就是一個國家ê興旺,是因為該國ê統治者知影用謙卑ê心帶領人民建造公義、和平ê社會,卻m̄是家己扮演神明ê角色,chit點是非常重要ê。Ná親像主前第八世紀ê先知彌迦所講ê,上帝ê要求是「伸張正義,實行無變ê疼,謙卑kah咱ê上帝同行」(參考彌迦書六:8)。一個無公義ê社會,就無法度見證上帝ê疼。因為上帝是公義ê,祂希望人類社會有公義;無愛ê社會、國家,真緊to̍h會滅亡,自古以來lóng是án-ne。

	另外一方面,聖經ê作者mā提起上帝siōng無法度容忍ê事,就是統治者kā家己神化了,這m̄-nā是先知那鴻所指出亞述帝國ê問題(參考那鴻書一:2),mā是先知以賽亞指出巴比倫帝國毀滅ê原因(參考以賽亞書十四:12—15)。

第1節,chit節只提起先知那鴻是「伊勒歌斯人」,頭前已經有提過,確定ê地點已經bē-tàng考。M̄-koh chia講先知那鴻所傳出ê信息kah當時亞述帝國ê首府尼尼微城有密切關係。上帝hō͘先知那鴻所看見ê「異象」。這「異象」mā thang當做「啟示」解釋。

第2節,tùi chit節開始,kui本那鴻書lóng是用詩歌ê型態寫出來ê信息。先知那鴻真清楚講「上主是不容忍對立ê上帝」。Chia ê「對立」,是teh指「嫉妒」ê意思,是出埃及記第二十章5節所用ê「忌邪」是仝一個字,mā kah約書亞記第廿四章19節所用ê「忌邪」chit-ê字仝款。Chit點thang tùi亞述皇帝西拿基立tī主前701年圍攻耶路撒冷ê時,伊對希西家王kah大臣所講ê話,等於是teh侮辱上帝仝款,因為伊輕視上帝,認為上帝庇護不了耶路撒冷,並且自認kah上帝仝款偉大。

先知那鴻得tio̍h上帝ê啟示,講上帝對chit種自扮神明角色ê統治者非常不滿,因為án-ne,一定會採取「報復」ê行動,而且上帝對亞述皇帝chit種傲慢ê態度感覺非常地忿怒。

第3節,「上主不輕易受氣」,chit句子Tī聖經中一再出現(參考出埃及記三十四:6,民數記十四:18,尼希米記九:17,詩篇八十六:15、一○三:8節、一四五:8,約珥書二:13,約拿書四:2),描述上帝ê慈悲。M̄-koh chit句話mā同時是teh表示當上帝會受氣ê時,事態已經非常嚴重à。

「絕無用有罪為無罪」,chit句話mā說明了上帝就是公義ê,這是上帝ê特性。先知那鴻講chit句上帝「絕無用有罪為無罪」,已經說明了獨裁統治者ê真正ê問題,in不時會冤屈人民,殺害無辜ê人。

上帝一陣動,會有「暴風驟起」,chit-ê詞tī《台語漢字本》聖經用得khah súi,是用「捲螺風」。先知那鴻用chit種方式teh形容,當上帝進行審判ê時,kui個大地ná親像起了「暴風」般ê揚起「飛塵」,hō͘看見ê人lóng心生懍neh。

第4到5節,chit兩節講出上帝ē-tàng改變祂所創造ê天地kah大海。因為kui個宇宙大地lóng是tī上帝ê旨意之下創造出來ê,所有受造萬物lóng會聽從上帝ê命令,若無,就無法度存在。Chia用「責備海」,表示上帝ē-tàng hō͘海水分開hō͘海床「乾涸」。

Chia提起「巴珊」、「迦密山」、「黎巴嫩」等地,原本都是teh指肥ê土地,草原茂密、花朵遍地盛開ê所在。M̄-koh上帝卻ē-tàng hō͘伊lian去,hō͘原本肥ê土地因為án-ne而如焦土成做發黃貧瘠、寸草不生之地。換句話講,原本人看做性命siōng可靠ê肥土地,會因為上帝ê大受氣而喪盡生機。

第6節,kā頭前chit段詩歌做一個結論:如果上帝真正發出大受氣,iáu有甚麼人ē-tàng生存落來?連海水lóng會枯乾,江河會乾涸,原本肥ê土地lóng會變做貧瘠荒涼之地,甚至連巖石lóng會「粉碎」,絕對無人ē-tàng「活teh」。

第7節,chit節thang參考詩篇第三十三篇18到19節ê詩歌。
先知那鴻講上帝會看顧ê是óa靠祂救恩ê人。上帝絕對會「保護tī患難中ê子民」,甚麼人投靠上帝,甚麼人就會得tio̍h上帝ê「照顧」。

注意「至善」ê「善」字,指ê是良善、美好、快樂、福氣等。

第8節,chit節講上帝會懲罰「敵人」。Tī第1節真清楚講,先知那鴻所傳ê信息對象,就是欺壓上帝子民ê亞述帝國。因為án-ne,chia所講ê「敵人」就是teh指亞述帝國。因為亞述皇帝自比為上帝,並且用非常輕藐ê語句褻瀆上帝ê神聖。

第9節,真清楚說明了亞述一直teh「陰謀反抗上主」,m̄-koh有chit種陰謀ê人只是teh自chhōe死路。「無人ē-tàng koh一pái反抗伊」,意思是bē koh再有第二pái ê災害出現。因為上帝ê懲罰只要一pái就有夠,除非上帝憐憫,若無,無人ē-tàng tī上帝大受氣下懲罰後,iáu ē-tàng生存落來,而且koh有能力繼續反抗上帝ê。

第10節,tī《現代中文譯本》中少了一句無翻譯出來,就是「像lim醉了ê人」,chit句tī其它版本ê聖經lóng有。因為án-ne,chit節提起像「刺phè」、「枯乾ê麥hiūⁿ」、「lim醉ê人」等三種人會「被火燒」到lóng無所chhun。前二項lóng是teh指lóng無價值ê物件,無人會拾,只有ē-tàng當做野草一般棄sak。第三種「lim醉ê人」,意思就是teh指無理智思考,á是瘋狂ê人。

第11節,chit節提起有一個「詭計多端ê人」tùi「尼尼微」出來,雖然無寫明chit-ê人是甚麼人,m̄-koh應該就是teh指頭前提過ê亞述皇帝西拿基立,伊就是用非常褻瀆ê話語「圖謀攻擊上主」。

    第12到13節,chia m̄-nā提起上帝beh毀滅亞述帝國,mā同時teh安慰以色列人民。

    所講「我ê子民」,是teh指南部猶大國ê以色列人民,因為hit時ê南國猶大一再受tio̍h亞述ê攪擾、侵犯、威脅。上帝應允以後be7 koh hō͘祂ê眾子民受tio̍h痛苦。現在上帝beh「終止亞述」對以色列人民ê「轄制」,mā tio̍h「phah斷捆縛」in ê「鎖鍊」。Chia原本用「枷擔」kah「鎖鍊」,表示以色列人民tī亞述人ê控制下,ná親像田裡ê動物一般被趕逐tio̍h從事辛苦ê勞役生活,被ná親像cheng-seⁿ一般對待,甚至kā in看做像囚犯仝款。現在上帝beh釋放in,hō͘ in thang過自由、快樂ê生活。

	第14節,chit節是「宣告」上帝對亞述人ê懲罰;第一個就是完全消滅亞述人。因為chia講「bē有後代thang保存in ê姓氏」,《台語漢字本》聖經真清楚講「無koh傳種」,意思真清楚是teh指完全滅亡,無後代kiáⁿ孫。

	第二個是beh除掉亞述人「神廟中ê偶像」,意思就是in所敬奉ê皇帝á是神明,lóng成做被鞭phah、懲罰ê對象。

	第三,真清楚講tio̍h beh為亞述人「預備墳墓,in不配活teh」,這表示in會被敵人殘殺。過去亞述帝國siōng興旺ê時chūn,in對待戰敗國人民ê行踏lóng是真殘酷ê,mā因為án-ne,當巴比倫帝國kah瑪代軍隊聯合kā尼尼微城摧毀了後,亞述人所面臨ê災難,差不多是hō͘屠殺殆盡。

    第15節,chit節thang參考以賽亞書第五十二章7節ê詩歌。

	Tī chia先知那鴻傳出ê信息真清楚,就是「和平ê好消息」。原因是戰爭已經結束loh。Ná強大ê侵略者—亞述已經hō͘上帝懲罰,而且滅亡à。所以m̄免koh再驚惶、不安,mā因為án-ne,先知那鴻講大家lóng tio̍h歡喜慶祝。因為這是性命ê解脫,是tùi死亡中行出來,tùi驚惶中得tio̍h釋放ê大好消息,應該好好á慶祝一下。

原本以色列人民siōng重要而且siōng歡喜ê節期就是Pôaⁿ過節,chit節期是當年teh慶祝脫離埃及奴隸ê統治,性命得tio̍h重生ê節期,taⁿ則用來慶祝欺負in、侮辱in ê亞述帝國滅亡,相對ê,就表示以色列人民kā不koh受到欺負、奴役。

經文:

那鴻書 2:1-2:13

註釋:

先知那鴻是為tio̍h beh鼓勵tī受困中ê以色列人民而傳出希望ê信息。當時ê以色列人民受困tī亞述帝國,一再被欺壓,而且被威脅一定tio̍h順從亞述帝國皇帝ê命令。當亞述帝國國勢強盛到siōng顛峰ê時chūn,其統治者認為家己ná親像神明仝款ê偉大,m̄-nā ài伊ê人民kā伊當做神明敬拜,mā tio̍h以色列人民kā伊看做神明仝款ê供奉。Koh khah嚴重ê,乃是tī亞述帝國皇帝西拿基立率兵圍耶路撒冷城ê時,hit種狂傲ê語氣kah話語,藐視上帝ê態度明明是惡質到極點。

	Tī希西家王ê時代,以色列人民真正是為tio̍h beh守護耶路撒冷免除淪陷tī亞述帝國手中,bat委曲求全地「送上一萬公斤ê銀á kah一千公斤ê金子」(參考列王記下十八:14)。M̄-nā án-ne,koh kā耶路撒冷「聖殿kah王宮寶庫裡ê銀á lóng送過去,koh kā聖殿門上ê金子kah包tī殿門柱á頂ê金子lóng刮落來,同齊送hō͘西拿基立」(參考列王記下十八:15—16)。M̄-koh亞述皇帝西拿基立顯然iáu bē滿足,iáu想beh koh khah chē。其實,講穿了,伊就是beh佔領耶路撒冷,好kā城內ê以色列人民當做奴隸統治tio̍h。

	m̄-koh猶大希西家王聽從先知以賽亞ê指導,有堅定ê信心óa靠上帝ê帶領,伊mā帶領耶路撒冷ê以色列人民聽從先知以賽亞ê信息,就án-ne,tī非常危急ê時chūn,上帝果然出手幫助耶路撒冷ē-tàng脫離亞述帝國ê侵犯。這就是先知那鴻所傳siōng重要ê信息,伊ê信息是teh反應主前612年,亞述首都尼尼微城被巴比倫帝國毀滅ê慘狀。

	第二章就是一首描述外國軍隊攻擊亞述首都尼尼微城ê詩歌,因為án-ne,mā有人認為這是一首「史詩」,記錄了尼尼微城毀滅ê詩歌。

	第1節,真清楚講出詩歌所指ê對象,就是「尼尼微」城,ná親像第一章1節開始就講先知beh傳講ê信息就是針對尼尼微講ê仝款。

	「粉碎你ê勢力已經到à」,這是teh指主前612年進攻亞述帝國ê巴比倫kah瑪代聯軍兵臨尼尼微城下ê情景。續落來「固守堡壘」、「嚴防通道,準備上陣」等等chiah-ê句話lóng thang看見指揮官teh呼喊守衛ê兵丁趕緊走到城堡上去防衛,mā teh指揮軍隊beh對準來攻擊ê敵軍,不beh hō͘對方有隙縫thang侵入。

	第2節,是後來聖經編者加上去ê,主要是teh說明上帝懲罰亞述帝國ê時chūn,mā是同時beh恢復kui個以色列民族tī大衛時代所建立起來ê「光榮」景況。

第3節,「紅盾牌」、「紅制服」,chit種用語mā thang解釋做「染tio̍h鮮血ê盾牌」、「染紅鮮血ê軍服」。若是án-ne,就thang知影來進攻尼尼微城ê敵軍已經沿路刣死bē少軍民à。另外一方面,mā可能指出來攻擊尼尼微城ê敵軍,是一個身經百戰ê軍隊,chiah會tī in ê盾牌kah身上留有真chē血漬。

第4節,kah第3節lóng有提起戰車像「火仝款閃亮」、「像火炬仝款閃光」,這lóng用來描述敵人ê戰車chē而且非常勇猛,chiah-ê戰車tī陽光ê照射下閃閃發亮。而且,所有ê戰車lóng是非常有強壯ê戰馬teh giú,chiah ē-tàng四界奔走,速度ná親像sìh-nà般ê飛快「奔馳」。Án-ne看起來,chiah-ê馬隻lóng是強壯有力ê戰馬,牠ê速度夠額jiok-tio̍h想beh逃脫ê敵人,mā hō͘敵人lóng無遁形ê機會。

第5節,講尼尼微城內ê高階官員lóng被皇帝傳喚去詢問戰況,先知那鴻講chiah-ê官員ê腳步「搖搖晃晃」,表示in已經驚惶失措,連腳步lóng行bē穩。因為敵軍已經來到「城牆」邊,準備ài攀jú城牆à。

第6節,chit節真清楚講tio̍h原本用來做保護城池用ê護城河,有大水閘thang控制tio̍h流水量,現在chiah-ê水閘卻成做淹滅「宮殿」ê武器,因為敵人已經控制了水閘管制區。

第7節,chit節thang看見敵軍已經攻入城牆,而且進入王宮。「皇后受掠去」,服侍皇后ê「宮女」mā必定同時受掠,甚至被強暴,in「ta̍k個捶胸悲泣」。其實,過去亞述帝國強盛ê時chūn,mā是用án-ne殘酷ê手段對待以色列人民kah其它鄰國ê人民。

第8節,chit節講民眾tùi尼尼微城「衝出」來,ná親像「水壩決堤仝款」,表示城內ê居民看tio̍h hit-ê城teh beh毀滅,lóng驚惶地往外逃命,chit時chūn,無論甚麼人大聲hoah「khiā tòa!khiā tòa」,結果lóng仝款無人會聽,因為大家只想beh逃命。

第9節,chit節tú好kah第8節顛倒;tī第8節描述尼尼微城內ê居民驚惶逃命ê款,而第9節chia是講chiah-ê攻入尼尼微城ê軍隊四界「搶奪」、搜刮所有ê「金子」、「銀á」等「財寶」。Mā tùi chit節thang看tio̍h尼尼微城內有真chē寶庫,是過去tùi外國所搜刮得來ê財寶,現在lóng會喪失殆盡。

第10節,chit節清楚講tio̍h「尼尼微毀滅了」,而且是徹底毀滅,呈現「一片荒蕪淒涼」ê慘狀,城內ê居民lóng因為驚惶而「雙膝phi̍h-phi̍h-chhoah,氣力消失」,而且是驚惶到面孔「蒼白無色」。

第11到12節,chit兩節lóng是teh形容尼尼微城已經陷入一個kah以前完全無仝ê景象;teh過去,尼尼微城非常堅固ná親像一隻「小獅」,被凶猛ê「公獅母獅」tī洞穴中照顧tio̍h,安全無比。M̄-nā thang食到新鮮ê肉,koh tī「洞穴裡堆滿小獅所需要ê「裂碎ê鮮肉」,chit句話是teh說明亞述帝國過去到各所在去相戰,phah贏了後所掠奪得tio̍h ê財物堆滿kui個倉庫,咱人不愁食、lim、穿、用,這表示亞述帝國人民過去ê生活非常富裕,咱人生活享受lóng m̄免煩惱。現在無koh是án-ne,m̄-nā敵人衝入來搶奪擄奪,連皇后lóng被侮辱而且俘虜伊去,王宮破碎,人民ê財產被搜刮殆盡,koh khah嚴重ê,就是人民mā仝款hông擄去做奴隸。這就是先知那鴻tī chia所問ê「現在這大城tī tó位neh」,意思就是尼尼微城已經完全被摧毀了,看bē-tio̍h過去繁榮景象,過去hō͘人認為siōng堅固ê堡壘現在lóng phah m̄見去,因為上帝伸出手懲罰伊。

第13節,亞述ê毀滅,thang講是上帝親自成做亞述帝國ê「敵人」。Tī chit世界上,有甚麼人ē-tàng抵擋會tiâu上帝ê懲罰?只要上帝出手,有甚麼人ē-tàng抵擋會tiâu?過去亞述帝國皇帝西拿基立誇口講,只要伊想beh the̍h落來ê國家,有tó一個神明ē-tàng保護得了?現在則是beh問亞述ê皇帝,現在上帝伸手打擊,伊承受得了mah?連皇后lóng tú-tio̍h侮辱、受掠,伊iáu ē-tàng講甚麼?

「你ê使者ê聲音koh khah án怎都聽bē-tio̍h了」,chit句話就是當年西拿基立派兵去圍攻耶路撒冷城ê時,派出大將tī城門外極盡所ē-tàng koh再侮辱以色列人民ê時所講ê話,列王記下第十八章13到37節記載kui個經過ê情形。M̄-koh現在,當年hiah-ê講出狂傲話ê大將,lóng m̄敢koh再出聲了,因為in mā成做被俘虜ê囚犯。

經文:

那鴻書 3:1-3:19

註釋:

Tī前兩章先知那鴻所傳出ê信息中,包括有傳好消息hō͘耶路撒冷城內ê以色列人民,講tio̍h注意看,看上帝怎樣懲罰亞述。然後tī第二章就講出亞述ê尼尼微已經被敵人攻陷,連亞述ê皇后mā被俘虜、宮女被凌辱,城內四界一片荒蕪,ná親像廢墟。

先知那鴻書中siōng出名ê一句話,是tī第二章13節講上帝beh親自成做亞述帝國ê「敵人」,這是非常嚴肅ê一件信仰課題。甚麼人成做上帝ê敵人,結果必定會遇tio̍h毀滅。

	第三章mā是續接第二章ê內容,teh描述上帝懲罰亞述帝國ê景象。
第1節,chia講亞述ê尼尼微城過去是ná親像是一個「刣人ê城市」。會án-ne講,主要是teh說明亞述帝國刣人實在刣人刣過頭了,chit點tùi「全城充滿tio̍h詐欺kah強暴」ê勢力,以及「搶劫掠奪」得來ê財寶看會出來。

	第2節,chit節描述敵人龐(pâng)大軍隊進入尼尼微城內ê情景,所有街路lóng充滿tio̍h敵人ê「戰車」iáu有「戰馬」奔馳ê聲音。

	第3節,講出報復ê行動出現tī尼尼微城內,「騎兵」所到ê所在是「死屍堆積如山,屍骸無數」,連行路lóng會被「屍首絆倒」,表示城內ê慘狀。

	第4節,chia講尼尼微城ná親像「妓女」,chit-ê用詞有特別暗示性ê路用語。一是tī亞述帝國興旺ê時代,就是tùi真chē它phah贏ê城市俘虜了真chē婦女tńg來,kā in販賣成做妓女,chit-ê城市就變成一個淫亂充滿、妓女滿街ê所在。Koh講,早期亞述因為拜偶像ê行為非常興旺,而chiah-ê大型ê神廟中,內面養了真chē妓女,除了tī迎神賽會中用來酬神表演外,iáu提供給民眾進行苟合ê行為。因為án-ne,附近真chē seng-lí人、人民lóng會設法來chia渡假嫖妓。第三,聖不時用淫亂來形容拜偶像神明ê宗教行為興旺之景況。Mā就是講,尼尼微城tī亞述帝國非常興旺ê時,mā是一個崇拜偶像神明真興旺ê城市。尼尼微城人ê錯誤信仰已經hō͘ in失去良知,帶亞述人做出殘忍殺害人命ê行為。

	第5節,chit節thang參考以賽亞書第二十章4節,記載亞述皇帝撒珥根命hō͘伊ê元帥攻擊埃及kah非利士人ê亞實突chit兩個城市ê時,講過beh「剝光in ê衫褲」,beh hō͘ hit-ê城裡ê人民「無論老少,lóng tio̍h赤身露體,光tio̍h腳,hō͘埃及蒙羞」。古早時對待phah敗仗ê國家,就是用chit種方式hō͘ in ê人民感覺蒙羞到扛不起頭。先知那鴻真清楚講亞述帝國taⁿ mā tio̍h遇tio̍h仝款ê待遇,敵人會用仝款ê方法回應in過去所做ê。

	第6節,「Kā lah-sap物件丟tī你身上」,這「lah-sap物件」指ê就是尼尼微城人teh拜ê偶像神明。Chiah-ê tī上帝眼中就是性命污穢ê記號,mā表示in過去所崇拜ê偶像神明無法度庇護in,chiah-ê神明會hō͘侵入者kā它棄sak tī in身上,然後用「驚駭ê眼光盯tio̍h」in,chit種眼光mā帶有輕視ê意味。

	第7節,taⁿ尼尼微城是一片荒廢,自然就bē有人來chia城市出入,mā bē有人「同情」á是「願意安慰」伊,因為深驚會受tio̍h連累,hō͘災禍纏身。

第8到9節,「底比斯」是古埃及ê首府,設tī現在埃及首都開羅ê南部大約670公里ê所在。先知那鴻講:如果連「底比斯」城lóng被摧毀,ná比「底比斯」城koh khah小ê尼尼微城怎可能安然無恙?而且先知特別提醒講「底比斯」城有一道埃及siōng重要ê河流,就是「尼羅河」當做國防上ê天然屏障,並且iáu有非利士人ê古實大城、弗、利比亞等等chiah-ê國家kah家己ê國家埃及帝國做同盟國teh保護,怎樣可能會tú-tio̍h被摧毀ê運命?Tī一般人ê想像中,ná絕對是不可能發生ê是,ē-sái講是事實卻tī主前663年發生,因為tī chit年它被亞述帝國所摧毀à。

第10節,先知那鴻teh描述被亞述摧毀了後ê「底比斯」城之慘狀,就是嬰á被侵入者摔死tī街路上,達官顯要lóng被捆縛送到奴隸市場像貨物一般被拍賣。

「嬰á tī街頭巷尾hō͘人摔死」,這是因為驚gín-á ê啼哭聲hō͘敵人發見家己kah民眾bih起來ê所在,而趕緊kā gín-á棄sak tī街路,有ê是gín-á活活hō͘別人tùi老母ê懷中搶去,á是敵人掠到à bih起來ê民眾,然後kā chiah-ê抱tī母親懷中ê嬰á當tio̍h父母ê面摔死tī街路上。Chiah-ê lóng是teh描述戰爭ê恐怖(參考列王記下八:12)。做一個國家被敵軍摧毀ê時chūn,連「達官貴人」lóng會被敵人「鐵鍊鎖tiâu,hō͘人帶走,像貨物仝款分了」,表示in被當做奴隸販賣ê所得被侵佔者瓜分à。

第11到13節,chit段經文koh一pái重tńg來到尼尼微城受毀滅chìn前ê情形,當hit-ê城聽tio̍h有敵軍來攻擊ê時chūn,in heⁿh驚kah趕緊修築防禦工事,加強國防,m̄-koh先知那鴻預言說,he是無啥路用ê補救,因為無論亞述帝國無論怎樣努力,上帝已經決意beh kā它摧毀,in ê努力只是白做無功而已。

先知那鴻ê描述是:一亞述ê防禦工事ná親像已經成熟ê無花果一般,只要微風一吹,就會ka-la̍uh tī土腳;二亞述ê軍隊ná親像懦弱ê cha-bó͘-gín-á,敵人m̄-nā thang輕易攻破城門,甚至thang用火來燒毀城門ê門閂。先知那鴻tī chia用「軟弱ê cha-bó͘-gín-á」來形容亞述ê軍隊,其實是對亞述帝國ê一種極大諷刺,因為古早時cha-bó͘人不可能成做軍人,婦女代表ê就是懦弱、無力ê記號。如果kā一個國家ê軍隊形容為cha-bó͘人,he是一種極大ê侮辱。

第14節,chit節thang看tio̍h先知那鴻確實是一個真無仝款ê先知,伊對國防軍事有研究。Chia伊提起「水」,tī戰爭期間,「水」比其他物資lóng重要。伊講尼尼微城ê人為tio̍h beh堅固防禦ê工事,特別儲存了夠額ê水。因為無水ê話,只要敵人圍城幾工,就會hō͘城不攻自破。M̄-koh先知那鴻講即使尼尼微城內ê人儲存了真chē ê水mā無用,因為敵人放火燒城門ê門閂,chit時chūn到底是beh用chiah-ê儲存ê水來滅火?iáu是beh留tio̍h解渴、煮飯?chit-ê定會hō͘領袖kah咱人lóng感覺頭殼痛ah!

「踩泥做磚、預備磚模」,chit句話描寫ê非常入神。這是teh表示預防城牆被敵人攻擊有破洞ê時,tio̍h趕緊修補缺口,若無,會hō͘敵人tùi破洞中侵入。M̄-koh當敵人攻破城牆造成缺口ê時,一定bē退tńg來縮手,hō͘城內ê人有機會修補,敵人一定會趁機會揮兵攻入。先知那鴻用這方式teh說明一件事:無論尼尼微城ê人怎樣努力beh防禦hit-ê城,lóng是無用ê。

第15到17節,lóng是用「草蜢」來譬喻尼尼微城所tú-tio̍h ê災難,ná親像草蜢過境一般無法度抵擋。先知那鴻用草蜢來去ê快速形容亞述帝國ê輝煌ná親像án-ne,過去尼尼微繁榮ê景象,lóng kā像草蜢過境瞬間消失。先知那鴻講亞述帝國「大臣像一陣草蜢」,意思就是國勢強盛ê時chūn,大官員chē kah ná草蜢,m̄-koh,當國家遭遇危難時刻,chiah-ê將領、高官、貴人卻馬上逃得無蹤無影。

第18到19節,chit兩節是對亞述皇帝講ê,tī第18節chia用「大臣」來形容亞述ê領導階層。希伯來原文是用「牧者」,感覺koh khah貼切。因為牧者若是死去,羊群就會四散伊去,甚至會hō͘野獸食掉(參考以西結書三十四:7)。Chia講亞述帝國因為傷口之大,大到「無法度醫」,這mā表示亡國ê意思。Tio̍h注意ê是當亞述帝國毀滅ê時,所有被它欺壓過ê國家、人民lóng會「拍掌歡呼」,因為對in來講,這是一個極大ê好消息,in就án-ne m̄免koh再擔憂chit-ê手段殘酷ê帝國會koh來欺負in。

重新查詢