重新查詢
經文:

馬太福音 1:1-1:17

註釋:

A.這是一份族譜。
Chit份族譜真特別,一開始就講「耶穌基督是大衛ê後代,大衛是亞伯拉罕ê後代」,chit種ê講法lóng是有特別用意ê。而且比較特別ê所在,是chit份族譜是tùi亞伯拉罕開始講起,然後依序講tio̍h後代。然後tī第17節特別強調tùi亞伯拉罕到大衛是「十四代」。

馬太福音會án-ne tī一開始就寫族譜,這是因為chit本福音書是為tio̍h beh寫hō͘猶太人讀來寫ê。因為猶太人會通過族譜來確認kui個族群á是個人,kah上帝ê拯救有bē-tàng分割ê密切關係,所以對tī族譜ê重視免講mā知。Tī聖經內面時常會讀tio̍h chit種ê一句話講:「亞伯拉罕ê上帝、以撒ê上帝、雅各ê上帝。」chit句話表面上看起來,是teh表明「約」ê延續,m̄-koh khah重要ê乃是teh強調族群血脈kah上帝之間緊密結合做伙。所以用族譜做開始來紹介耶穌ê身世,對猶太人來講會感受tio̍h親切,尤其是當「耶穌基督是大衛ê後代」chit句話做開場白ê時,馬上就會掠tiâu猶太人ê眼光,因為猶太人對大衛王有一種無法度忘懷ê情結。先知以賽亞就有án-ne預言講:「 Tùi 耶西ê 樹頭會發一支芛,tùi它ê 根所生ê 枝會結果子。(全民版)」(以賽亞書11:1)續落來koh講:「到hit 日,耶西ê 根頭khiā 做萬民ê 大旗,列邦會歸óa 上帝;伊安息ê 所在有大榮光。(全民版)」(以賽亞書11:10)chiah-ê話句lóng teh表明tùi大衛ê kiáⁿ孫中,會出現一位新ê王來帶領以色列民族恢復大衛王朝hit種輝煌ê時代,á耶穌又koh是大衛ê kiáⁿ孫,這就是作者寫chit份族譜ê主要用意。

B. Chit份族譜ê特色,就在tī它kā它分做三個「十四」代,就是tùi亞伯拉罕到大衛;大衛到以色列人民hông掠到巴比倫;tùi hông掠到巴比倫到耶穌ê時代等(參考馬太福音1:17),á這「十四」tú好是「七」ê倍數。

「七」chit-ê數字,tī猶太人ê觀念中有「神聖」、「完美」ê意思。作者kā族譜chit種ê分法,是有意想beh kā猶太同胞講:大家注意à,時間到à,猶太人久長以來所期待ê hit位拯救者就是耶穌,祂來à。

C.值得注意ê是tī chit份族譜中出現四位女性,chit點真無平凡,因為tī猶太人觀念中,女性ê社會地位真低,而且族譜是bē出現女性名ê,chit-má卻特別記明,表示chit四位女性tī以色列ê歷史上有扮演過真重要ê角色。

第一位tī第3節,名叫「塔瑪」。她ê事蹟記載tī創世記第三十八章,原本是雅各ê kiáⁿ猶大kah迦南人書亞ê cha-bó͘-kiáⁿ結婚後所生長子珥ê bó͘,mā就是猶大ê媳婦。因為塔瑪iáu無生kiáⁿ,丈夫珥就往生。珥ê小弟俄南娶阿嫂塔瑪過門同房,m̄-koh mā是仝款iáu無生kiáⁿ就往生。M̄-koh猶大m̄ hō͘塔瑪kah第三個kiáⁿ示拉同房,驚示拉mā往生。因此叫她tńg來後頭厝。過一段時間了後,塔瑪設法勾引已經bē記得媳婦ê ta-ke猶大上床,結果因此來有娠。猶大chit時chūn chiah知影家己無理,就將塔瑪帶入門來。

第二位tī第5節ê「喇合」。她ê事蹟記載tī約書亞記第二章kah第六章22到25節。Tī chit兩段經文中,thang清楚看tio̍h喇合原是一位妓女,bat幫助約書亞派入耶利哥城偵察實況ê探子。所以當約書亞率領以色列人民攻入耶利哥城了後,有保存喇合ê性命。

第三位mā是記載tī第5節ê「路得」。有關她ê事蹟就是kui卷路得記。她是摩押ê cha-bó͘-gín-á,嫁hō͘以法蓮支派ê以利米勒ê大kiáⁿ瑪倫。瑪倫kah小弟基連lóng有結婚,m̄-koh lóng無生gín-á就往生。以利米勒ê bó͘ 拿娥美決定beh tńg去故鄉。路得跟tòe ta-ke拿娥美tńg來伯利恆,得tio̍h利米勒親族波阿斯ê賞賜,波阿斯決定娶路得做bó͘,大衛就是án-ne koh再經過三代出世。Tio̍h注意ê是摩押chit-ê族群是亂倫ê kiáⁿ孫(參考創世記十九:34—38)。

第四位是第16節ê「馬利亞」。有關馬利亞ê背景,除了chit章18到25節記載外,也thang參考路加福音第一章26到56節。

Án-ne,thang看tio̍h前三位女性lóng有特別ê背景,獨獨馬利亞只有紹介她是一位卑微ê cha-bó͘-gín-á而已。M̄-koh,卑微ê cha-bó͘-gín-á卻是上帝所揀選完成祂拯救旨意siōng重要ê器皿。

Tī第6節「大衛 tùi烏利亞 ê bó͘生所羅門」,簡單ê一句話,卻講出大衛王犯姦淫罪ê事件(全民版)(參考撒母耳記落來第十一章)。Án-ne看起來,chit份族譜kā chiah-ê cha-bó͘人ê名寫出來,hō͘讀者清楚知影in ê背景,對講究身分、背景、種族優越感ê猶太人來講,必定會造成真大ê震撼。



經文:

馬太福音 1:18-1:25

註釋:

Chit段經文記載耶穌降生ê背景。作者特別強調耶穌ê降生,是「經由聖靈懷孕」(參考一:18),表明耶穌ê降生乃是上帝拯救ê計畫,kah一般人ê出世大大無仝。聖經作者一再表達一個信仰觀念:拯救ê工作,是上帝ê計畫。M̄是用人ê氣力ē-tàng達成,卻是需要上帝ê手親自做工。Á上帝ê作法就是用祂聖靈ê氣力來達成chit項計畫。

Koh講,tio̍h注意ê是馬利亞當時是已經訂婚,m̄-koh iáu未結婚。照猶太人律法ê規定,訂婚就是已經確定婚姻關係。所以若是tī iáu無結婚就有娠孕,這對猶太人來講是真大ê問題。上帝tī約瑟ê眠夢中,特別差遣天使來hō͘馬利亞ê未婚夫約瑟清楚知影馬利亞是藉tio̍h上帝ê聖靈有娠,koh賞賜名beh稱做「耶穌」,chit-ê名tī猶太人社會是普遍ê,意思是teh指:耶和華上帝是幫助者。所以當約瑟醒起來了後,隨時照上帝透過天使指示伊ê話去做,kā馬利亞娶入門。
第22到23節所引用ê經文是用賽亞書第七章14節。


經文:

馬太福音 2:1-2:12

註釋:

馬太福音tī記錄耶穌降生ê時,講有幾個東方ê星象家來chhōe,後來因為tī東方發見一粒真特別ê星,chit粒星是teh代表猶太人ê王ê星,in就án-ne根據所看見ê星象,koh tī星ê引chhōa之下,in chhōe-tio̍h伯利恆,mā chhōe -tio̍h耶穌,就án-ne獻上三項禮物:一是黃金、二是乳香、三是沒藥。

Chia所講ê星象學家,mā thang kā伊稱做「有智慧ê人」,用現代ê語言就是所講ê「知識份子」,是有受過良好教育ê人ê意思。Chit種人必須隨時teh chhōe上帝拯救ê記號,並且m̄驚艱苦去chhōe。Chiah-ê星象學家就是án-ne用心,終其尾chiah chhōe-tio̍h耶穌。

Siōng擔憂chit件事ê人是統治猶太地區ê大希律王。因為猶太人不時有叛亂ê事發生,所以,伊一聽tio̍h有一個新ê王降臨,就假做真想beh認bat伊,就先問猶太人ê宗教領袖chit位新王會tī toh位出世。續落來,伊召見chiah-ê星象學家,ài in chhōe-tio̍h了後來回報。

經文:

馬太福音 2:13-2:23

註釋:

上帝真清楚chiah-ê tī世間掌權者ê心思意念,祂知影大希律王並m̄是真正想beh拜見耶穌,卻是想beh kā祂殺害。因為伊想ê是chit位新王會威脅tio̍h伊ê統治權。所以上帝差派天使啟示約瑟,ài伊chhōa馬利亞kah嬰á耶穌逃走去埃及避難。因為大希律王會為tio̍h beh維護家己ê權位來進行大屠殺。果然,大希律王kā伯利恆kah附近地區兩歲以下ê cha-po͘-gín-á lóng刣死。In就án-ne tòa tī埃及,一直等到希律王往生之後,chiah koh tī上帝ê啟示下,無tńg去伯利恆,卻是去加利利地區ê拿撒勒定居。所以耶穌有另外一種稱號,就是「拿撒勒人耶穌」。Chit-ê稱號koh有另外一種意義:是teh指祂確實是一個人,成長kah生活、工作lóng tī拿撒勒chit-ê庄頭。

Chia講「亞基老」繼承了伊ê老父大希律tī主前4年往生後留落來ê王位。其實,大希律ê統治權留hō͘三個kiáⁿ分別掌管三個區域,猶大kah撒馬利亞就是由亞基老掌管,加利利kah比利亞由安提帕管理,約旦河東北方由腓力所管轄。Chit位掌管猶大ê亞基老是一個暴君,動tio̍h to̍h會殘害伊統治之下ê人民。所以羅馬皇帝奧古斯lóng真無歡喜,bat ài伊好好á管理統治地區,好款待人民。M̄-koh,顯然伊無遵照羅馬皇帝ê要求,tī主後第6年to̍h hō͘皇帝kā伊除去王位。

Tùi馬太福音ê chit段記事來看,koh再對照出埃及記第二章15節所記載ê:「法老聽tio̍h chit-ê tāi-chì,就想beh 刣摩西,總是,摩西閃避法老,走去米甸地tòa,坐tī 古井邊。(全民版)」然後tùi chia繼續看tio̍h出埃及記第四章19到20節,講後來想beh殺害摩西ê人lóng死去,摩西就kā bó͘-kiáⁿ chhōa teh,向埃及出發,準備ài beh進行上帝交帶伊ê使命。出埃及記ê記事,對猶太人來講非常清楚,mā tùi chia thang看tio̍h馬太福音ê作者,伊是用chit種寫法,有意思beh表明耶穌ê降生,就ná親像舊約聖經時代ê摩西。


經文:

馬太福音 3:1-3:12

註釋:

「Tio̍h悔改,因為天國teh beh實現ā!」這是行洗禮約翰出來tī約旦河邊傳出上帝信息ê時所講非常重要ê一句話。馬太福音作者siōng歡喜引用舊約先知ê話語來佐證耶穌ê出現,就是kah先知ê預言有關。chit-má作者引用以賽亞書第四十章3節ê話,當做預備者ê行洗禮約翰,就是kah-ná先知瑪拉基所講ê,tī上帝「大koh thang驚ê日iáu未到ê chìn前,我會差先知以利亞到lín hia。(全民版)」(參考瑪拉基書四:5),對照一下馬太福音第十一章14節耶穌所講ê:「Lín 若願意接受chiah-ê 預言,chit-ê 人就是teh beh來ê 以利亞。(全民版)」Αń-ne就ē-tàng看出馬太福音作者引用先知以賽亞chit句話ê用意,就是beh講行洗禮約翰就是為耶穌ê來臨做預備ê。Á行洗禮約翰出現時ê穿插,mā真親像以利亞仝款,穿駱駝毛ê衫褲,縖皮帶,食簡單ê食物(參考列王紀下一:8)。

行洗禮約翰ê出現確實是對當時ê猶太人社會造成真大ê震撼,chit點tùi成群結隊ê人群來接受伊ê施洗,以及「真chē法利賽人kah撒都該人mā來要求受洗」,就ē-tàng看出伊傳出ê悔改信息確實是有撼動人心。伊對當時ê人講:tio̍h悔改,若無悔改,即使有亞伯拉罕作猶太人祖先mā是枉然。會有chit種ê講法,是因為猶太人拉比不時kā猶太人講in ê祖先亞伯拉罕會tī地獄門口,以免猶太人進入地獄。M̄-koh,行洗禮約翰講若無悔改,任何人lóng bē-tàng保證。伊強調悔改必須有實際ê行為來見證。

經文:

馬太福音 3:13-3:17

註釋:

猶太人認為是有罪ê人chiah需要受洗,á是外邦人有beh加入猶太人ê宗教信仰,就必須受洗,表示潔淨。四本福音書lóng有記載耶穌受行洗禮約翰ê洗禮(參考馬可福音一:9—11,路加福音三:21—22,約翰福音一:32—34),m̄-koh,其中約翰福音並無清楚記載耶穌tī水裡受洗ê情形。Á馬太福音真清楚強調行洗禮約翰知影耶穌ê身分,所以感覺耶穌kā家己ê身分降低來接受伊ê施洗,並無妥當。M̄-koh耶穌認為應該照規矩來,á祂受洗是為tio̍h beh表示祂kah所有罪人做伙,表明祂beh帶領大家同齊悔改、歸向上帝。Á耶穌受洗之後,所出現ê聖靈降臨之景象,tú好teh說明祂kah上帝之間有密切bē-tàng分割ê關係。

經文:

馬太福音 4:1-4:11

註釋:

耶穌tī曠野受試探ê記事,tī馬可福音第一章12到13節kah路加福音第四章1到13節lóng有記載,m̄-koh,馬可福音kan-taⁿ用兩節記載,無記載試探ê內容,非常簡略。顛倒是馬太kah路加chit兩本福音書記載kah非常詳細,只是tī第二、三個試探,chit兩本福音書記錄上ê順序tú好顛倒。馬太福音kā重點khǹg tī「世間萬國ê榮華」對人ê誘惑,路加福音則kā重點khǹg tī宗教權力慾會致使人墮落ê方一向看。M̄-koh,三本福音書lóng強調試探ê時間長到「四十工」,而且lóng無lim食。

Tī chit三pái ê試探中,魔鬼siōng ài用ê一句話,就是「既然你是上帝ê kiáⁿ」,伊用chit句話ê主要目的是teh挑起耶穌抗拒上帝旨意ê念頭,甚至想beh hō͘耶穌興起kah上帝平行ê念頭,m̄-koh耶穌真堅定ê拒絕魔鬼各種試探。即使魔鬼tī第6節引用聖經ê話語(參考詩篇九十一:11—12),m̄-koh,耶穌mā仝款引用聖經ê話回應過去。其實,耶穌三pái lóng是引用申命記ê話來排除魔鬼ê誘惑,第一pái是引用申命記第八章3節,第二pái是引用申命記第六章16節,第三pái是引用申命記第六章13節。
經文:

馬太福音 4:12-4:17

註釋:

Chit段經文是耶穌開始tī加利利地區傳福音ê序文。Tī第12節先講耶穌是tī行洗禮約翰被監禁了後,耶穌開始續接出來傳福音。有關行洗禮約翰被關入監獄ê事,tī第十四章3到12節有詳細記載。並且強調耶穌並m̄是tńg來到家己ê故鄉拿撒勒,卻是到迦百農去傳福音。馬太福音koh一pái引用以賽亞書第九章1節ê經文,說明耶穌就是tī烏暗中hō͘人看見ê亮光。

第17節thang清楚看tio̍h耶穌傳講ê信息kah行洗禮約翰仝款,lóng是勸人趕緊悔改。「天國」chit-ê詞,kah馬可福音、路加福音所用ê「上帝國」是仝款ê意思,lóng是表明上帝ê主權teh beh來臨,而且是beh進行審判。

經文:

馬太福音 4:18-4:22

註釋:

有關耶穌呼召門徒ê記事,馬太福音真清楚記載第一對兄弟檔成做門徒ê,就是彼得kah伊ê小弟安得烈。第二對就是雅各kah約翰。In lóng是討海人,以tī加利利湖掠魚為生。

Chit句「來跟tòe我」,意思是「跟tòe tī我後面」,意思是跟tòe學習。Á「成做得人ê討海人」,表明in會得tio̍h真chē人kah in仝款後來lóng跟tòe耶穌,chiah-ê人數會親像in tī加利利掠魚hit種,得tio̍h非常chē。


經文:

馬太福音 4:23-4:25

註釋:

Chit段經文是先為耶穌以後tī加利利地區傳福音ê情形作一個簡介,包括傳講天國ê信息,mā醫病kah趕鬼,m̄-nā án-ne,有一大陣民眾lóng近óa跟tòe tī祂身邊。

經文:

馬太福音 5:1-5:12

註釋:

馬太福音共計有五段經文是所講ê「耶穌言論集」:
Chit五段就是1.第五到七章;2.第十章5到42節;3.第十三章3到52節;4.第十八章2到35節;5.第廿三到廿五章等。每段話之後,lóng會用一句「耶穌講完chiah-ê話」做結語。

第五到七章chit段所謂「山頂寶訓」,是對門徒所講ê,mā是一種訓練ê意思。門徒是tùi各地來跟tòe ê人,chit時,伊iáu未揀選12位門徒。所以到山頂去聽祂教導ê門徒必定真chē,ná親像第五章1節所講ê「一大陣人」跟tòe祂「上山」。

第五章1到12節:
Chit段經文是出名ê所謂「八福」。每一項lóng用「實在有福氣」來表示。其實tī馬太福音中,iáu有幾個所在mā lóng提起「實在有福氣」ê教導,親像第十一章6節;第十三章16節;第廿四章46節等等。這「福」字mā teh表示內心ê滿足有ê喜樂,就ná親像詩篇第一篇1節所講ê。

經文:

馬太福音 5:13-5:16

註釋:

Chit段經文真清楚teh說明ài做耶穌ê門徒應該有ê內涵,mā是kah一般人無相仝ê所在。

「鹽」,這是調味品,m̄-koh mā是早期社會防腐必用之物。巴勒斯坦ê「鹽」是屬tī岩鹽,所以若是失去氣味ê功能,就會hông棄sak tī路上。

「光」,是引chhōa方向ê要素。詩篇ê詩人講上帝ê話是「做我路上ê 光」(全民版)(參考詩篇一一九:105)。耶穌講祂就是世界上ê光,「 Tòe 我ê人無tī 烏暗中生活,顛倒
會有活命ê光。(全民版)」(參考約翰福音八:12)。耶穌tī chia強調「光」就是一種好ê行為,hō͘人thang跟tòe。


經文:

馬太福音 5:17-5:20

註釋:

Chit段經文主要目的是為tio̍h第21到48節做一個引言,lóng是teh談原本舊約中ê律法問題。Tī chia耶穌特別強調,祂m̄是beh廢除舊約摩西律法kah先知ê教導,á是beh hō͘ chiah-ê被扭曲、誤解ê內容重新呈現出真意,祂特別指出經學教師kah法利賽人,teh暗示in有人故意曲解chiah-ê律法kah先知信息ê內容。Tī chit段經文中,耶穌強調任何正確教導chiah-ê律法真意ê人,lóng是teh為天國努力ê人,chit種人就是上帝所喜悅ê對象。

經文:

馬太福音 5:21-5:48

註釋:

Tī chit段經文中講tio̍h:1是「bē-tàng刣死人」,2是「m̄-thang姦淫」,3是夫妻關係,4是論chiù-chōa ê問題,5是報復ê事,6是疼厝邊ê問題等。Tī chit六項教導中,會看tio̍h一個重要ê特色,就是lóng是用「lín聽過」開始,然後接落去就是「m̄-koh我kā lín講」,表示過去經學教師á是法利賽人tī教導上有偏差,á是故意曲解原本ê意思。

第21到26節,chia用十誡ê第六誡「m̄-thang刣死人」做例。刣死人ê背後誘因就是嫉妒、受氣。耶穌強調和好是避免chit種彼此之間殘害生命siōng好ê途徑,á m̄是用報復ê手段。主要原因是上帝會替受tio̍h冤屈ê人伸冤。這thang回應第五章7節所講ê「以仁慈待人」,就是有福氣ê人。

第27到30節引用十誡ê第七誡「m̄-thang姦淫」。耶穌強調內心ê意念khah贏過行為。行為ē-tàng隱藏內心ê意念。M̄-koh,上帝卻是看人內心。

第31到32節,chit兩節需要先參考申命記第廿四章1節,chiah會明白寫休書hō͘ bó͘ ê律法規定。也thang參考馬太福音第十九章3到12節,耶穌講tio̍h有關休妻ê事。耶穌強調除非有不忠實ê事發生,mā就是今á日所講ê「婚外情」,chia雖然是teh指bó͘,m̄-koh也應該用tī丈夫身上。

第33到37節講tio̍h chiù-chōa ê事。聖經時代ê人chiù-chōa,lóng會指上帝ê名chiù-chōa。所以一定tio̍h真實。若是teh指上帝ê名chiù-chōa,soah koh無照所chiù ê -chōa去做,he就是teh亂使用上帝ê名,甚至會用上帝ê名chiù-chōa來隱藏內心ê邪惡意念。耶穌強調一個誠實ê人,知影上帝鑒察人ê內心,chit種人無chiù-chōa mā會知影誠實ê重要性。

第38到42節,chit段經文ê背景是tī羅馬帝國強勢統治之下,m̄是用硬tú硬ê方式,卻是用疼來贏過恨。Chit段經文常常hông引用來做chit-má所謂「非武力運動」ê教材。

第43到47節,chit段經文thang先參考箴言第廿五章21到22節。Chit段mā是繼續前段經文ê教導延伸出來。重要lóng是teh用疼贏過仇恨,mā只有chit種ê疼,chiah ē-tàng感化對敵。Tī上帝眼中,所有ê人lóng仝款。有好kah pháiⁿ之分,是因為人內心ê意念有偏差。

Tī頂面所講chiah-ê教導中,耶穌lóng重新hō͘ in一個全新ê認知。Á tī最後第48節,耶穌用上帝ê疼當做學習準則,只有án-ne chiah會hō͘人koh khah完全。

經文:

馬太福音 6:1-6:18

註釋:

第六章ê教導是繼續第五章所提起有關經學教師kah法利賽人教導上kah行為上ê問題,第五章講tio̍h chiah-ê宗教領袖tī教導上有偏差,á是有曲解原本上帝律法ê旨意,chit-má第六章1到18節chit段經文則是teh指出in tī教導ê言行kah行為上,連結bē起來,結果形成一種假冒偽善ê樣式出現。

耶穌tùi chiah-ê猶太人宗教領袖教導民眾所認知ê生活中siōng重要ê三件事講起,chit三件事是teh指一施捨、二祈禱、三禁食。Tī chit三項事頂面,lóng有一個共同強調ê中心:看會tio̍h你tī隱密中做事ê天父一定知影,而且會回應。

耶穌強調施捨m̄是為tio̍h beh得tio̍h別人ê o-ló,卻是一種責任,mā就是第五章43到48節所提起ê疼別人,甚至連仇敵mā疼入去。人即使tī無任何人看見之下所行ê善,上帝會看kah一清二楚,而且會有獎賞回應。

祈禱mā是án-ne,是一件真隱密ê事,祈禱是kah上帝對話,m̄是beh向人祈禱。因為祈禱是生命ê告白,是內心真誠ê告解。所以祈禱必須清楚面對ê是上帝。Án-ne,祈禱不在話ê長短,á在tī誠實。上帝看人ê內心意念。

Tī第9到13節有編入一篇基督徒siōng熟悉ê主禱文。並且強調祈禱m̄是teh控訴別人ê錯,卻是原諒kah寬恕。Chit種祈禱表示出來ê意義是:上帝知影真清楚人所有ê一切言行舉止。

禁食,這是一種哀傷、痛苦時真自然ê反應。猶太人用禁食來表示敬虔,這原本是beh用來表示懺悔ê(參考利未記廿三:26—32)。M̄-koh,懺悔m̄是hō͘人看見,懺悔是beh向上帝表白。有真正懺悔á無,這是內心ê事,上帝知影kah非常清楚。

經文:

馬太福音 6:19-6:34

註釋:

Chit段經文是講tio̍h對物質生活應該有ê態度,這牽涉tio̍h對生命價值ê態度kah觀念。

第19到21節,講tio̍h真實財寶應該是存khǹg tī天頂,á m̄是tī地上。原因是積存tī地上會變質,m̄-koh存khǹg tī天頂就永遠bē變pháiⁿ。若kā chit段經文參考箴言第十九章17節,以及路加福音第十二章16到20節耶穌ê比喻,就會koh khah清楚耶穌教導真實財寶ê意義。

第22到23節,短短兩節講出必須清楚生命ê方向。Chia用「光」kah「暗」做強烈對比來教導,這mā是耶穌教導上ê特色。

第24到34節,chit段經文是用第24節作基礎,第25到34節lóng是進一步teh敘述第24節ê意義。人若對上帝忠實,知影倚靠上帝,chit種人永遠會飽足,bē有欠缺。因為上帝是賞賜一切ê源頭。

Tī chit段經文中,耶穌用生活ê例作教導,一般人會án-ne煩惱物質生活ê需要,是因為m̄-bat上帝ê緣故。對上帝有信心ê人lóng會知影知足,有知足之心ê人,就bē貪婪,chit種社會就bē有欠缺。耶穌勸勉門徒tio̍h先追求「上帝主權ê實現,遵行祂ê旨意」,á這mā是teh提醒咱認bat上帝,以上帝做咱生命ê中心,咱倚靠祂,chit種生命自然會豐富起來,chit種人就bē kā生命用來煩惱物質生活上ê事。


經文:

馬太福音 7:1-7:5

註釋:

1.第七章是繼續第五章開始ê山頂寶訓。作者強調tī山頂聽tio̍h耶穌連串ê教導,大家lóng感覺非常驚惶,因為祂教導ê內容確實是大大無仝,kah經學教師傳統ê教導非常無仝。

2.第七章1到5節:
耶穌教導門徒kah群眾,人kah人之間ê關係,先tùi自我反省開始。M̄-thang一開始就論斷別人。伊希望人人先設身處地為別人設想開始,án-ne就比較容易體諒別人。祂強調上帝chiah是真正審判者,因為上帝鑒察人ê內心(參考耶利米書十七:10)。

第3到4節ê「鋸屑灰」kah「大樑」,這是極大ê對比,「鋸屑灰」原本ê意思是「針」;後者「大樑」是teh指建造厝ê樑柱。

第5節所提起ê「偽善ê人」,表示tī「鋸屑灰」kah「大樑」之間ê秩序顛倒。人tio̍h先kā大樑移徙了後,chiah會清楚到底是m̄是有鋸屑灰。若無,永遠看bē清楚。





經文:

馬太福音 7:6-7:11

註釋:

「神聖ê物件」,通常是teh指上帝ê名,á上帝ê名是神聖ê。「珍珠」thang看做是天國。Á「狗」kah「豬」lóng是teh指外邦人ê意思。Chia真清楚teh強調,將上帝ê國kah神聖ê名,講hō͘ hiah-ê拒絕ê人聽,是無效果ê,kan-taⁿ會帶來koh khah大ê侮辱而已。

Tī第六章1到7節已經談過祈禱應該有ê態度kah認bat。Chia koh一pái勸勉門徒kah民眾,對上帝祈禱一定tio̍h抱tio̍h恆心,因為上帝賞賜hō͘人ê lóng是siōng好ê。
經文:

馬太福音 7:12-7:14

註釋:

這是一節重要ê教導,tī路加福音第六章31節mā有記載,m̄-koh路加福音將此節編輯tī疼敵人ê教導了後,表示kā期待別人ê心境,用來khǹg tī家己ê身上,就會koh khah清楚該怎樣對待別人。耶穌強調摩西法律kah先知ê教導就是án-ne。

當福音書出現「摩西法律kah先知教示」chit種話句時,意思就是teh指舊約聖經。Án-ne,tùi第五章3節開始ê登山寶訓,tī chia作一個總結。

「窄門」、「難行」ê路,kah「通向性命ê門」相連結,願意選擇而且chhōe-tio̍h chit-ê方向ê人非常少。相對ê,朝向「寬」ê門、「好行ê」路,kah「通向滅亡」ê道路去ê人卻真chē。
經文:

馬太福音 7:15-7:20

註釋:

「Lín tio̍h 提防假先知」,chit句話thang看出新約時代ê假先知iáu-kú猖獗。耶穌tī預言末日景象ê時,koh一pái提起會有真chē假先知出現來迷惑人心,chiah-ê假先知甚至iáu會行神跡奇事(參考馬太福音廿四:11、24)。

「綿羊」,通常會hō͘人用來形容「善良」、「溫馴」,相對tī「豺狼」則khah常hō͘人用來形容是凶惡ê野獸,kan-taⁿ會欺負弱小ê羊羔。

Tùi日常生活行為就thang看出先知是m̄是真實,ná親像好ê果子樹,會結出好ê果子仝款,pháiⁿ ê果子樹是結bē出好果子ê。

第19到20節,thang看出必定有嚴厲ê審判teh thèng候chiah-ê假冒ê先知。上帝ê審判是tùi人所做ê事kah心思意念來報應。




經文:

馬太福音 7:21-7:23

註釋:

續接前一段論到ê假先知ê問題,ná親像第19節所提起ê,必定會有審判,chit-ê審判並m̄是teh評斷甚麼人有行神跡奇事ê能力,卻是誠實ê心靈。

Chia ê「主ah,主ah」,有兩種意思,一是teh指求救ê呼聲(參考八:2、6、8、25),重複使用,表示非常迫切ê呼聲(參考廿五:11)。二是teh指一種禮儀上ê歡呼,就ná親像今á日ê人teh歡呼「萬歲、萬歲」仝款。

Ē-tàng á是bē-tàng受上帝所接受?Kah一個人是m̄是會行神跡奇事無關係。Siōng重要ê,就是第21節所講ê,實行上帝ê旨意chiah ē-tàng入去。耶穌mā強調只要是實行上帝旨意ê人,lóng是祂ê「老母和兄弟姊妹」(參考十二:50)。




經文:

馬太福音 7:24-7:27

註釋:

Chit段是山頂寶訓最後一段,是延續第21節ê題旨:真正實踐上帝ê旨意。

「石磐」kah「沙土」是相對ê;前者堅硬,後者鬆散。耶穌強調聽見祂ê教導了後,就tio̍h kā chiah-ê教導實踐出來,這chiah是實在,ná親像堅硬ê石磐仝款。Ná親像摩西教導以色列人民,凡上帝所吩咐ê一切命令,lóng tio̍h切實去遵行(參考出埃及記廿四:7,申命記三十一:11—12)。


經文:

馬太福音 7:28-7:29

註釋:

「耶穌講完chiah-」,這是馬太福音收編耶穌五段言論集了後,會出現ê一句話(參考十一:1、十三:53、十九:1、廿六:1)。

民眾聽耶穌ê教導了後,lóng驚kah gāng去,甚至認為伊ê教導遠比經學教師koh khah有「權威」。Chia ê「權威」,表示hō͘人ê心靈震撼ê意思。


經文:

馬太福音 8:1-8:4

註釋:

Chit件醫癩ko病ê神跡是tī大家金金teh看之下teh行,m̄-nā án-ne,耶穌行chit件醫神跡是「伸手摸」chit-ê癩ko病人,這mā表示伊接觸tio̍h癩ko病人,ē-sái講是祂m̄-nā無被感染,顛倒是chit-ê人ê癩ko病是「馬上消除,潔淨」,表示耶穌身上有奇特ê氣力,贏過當時社會siōng驚惶ê癩ko病。

Chhōe祭司檢驗kah照摩西ê規定獻上祭物,thang參考利未記第十四章10到32節。
M̄-koh tī大家金金teh看之下ê醫,卻要求這病人「mài kā chit件kā 人講」,chit種吩咐一再出現tī耶穌行醫神跡了後(參考馬太福音九:30、十二:16,馬可福音五:43、七:36、八:26)。伊會án-ne吩咐,是因為無想beh tī福音ê事工上被扭曲á是受tio̍h阻礙。因為大多數ê人kan-taⁿ ài看神跡奇事,卻無想beh聽天國ê信息。



經文:

馬太福音 8:5-8:13

註釋:

這是馬太福音記載第二件醫ê神跡,醫ê對象是外邦人,是羅馬軍官為tio̍h厝裡ê奴僕來請求耶穌醫,因為伊ê奴僕「半遂」,「非常痛苦」。

羅馬軍官會來請求,表示耶穌醫ê名聲已經遠播,當耶穌決定beh去in-tau ê時,chit-ê羅馬軍官ê回應是m̄敢勞煩耶穌去in-tau,伊kan-taⁿ求耶穌hō͘伊一句「命令」就好,伊kā家己帶兵ê經驗,認為只要耶穌願意出一句命令,伊ê奴僕就會得tio̍h醫。

Chit位羅馬軍官ê信心,mā teh表明伊對耶穌ê認bat比猶太人iáu khah深,chit點是hō͘耶穌大感動ê原因。

Chit句「有真chē人tùi東tùi西前來」,意思是teh指真chē外邦人,in lóng tio̍h kah猶太人ê祖先同齊享受上帝拯救ê恩典。所謂「坐席」,表示是天國ê宴席ê意思,mā表示天國ê歡樂。

耶穌照chit位軍官所祈求ê,耶穌kan-taⁿ用一句命令,就醫好伊ê奴僕,chit句話是:「tńg去厝裡,照你ê信心hō͘你成全!」信心堅定ê人,上帝必定會成全伊ê所求。



經文:

馬太福音 8:14-8:17

註釋:

Chit段經文記載兩件事,第一件是第14到15節,講彼得ê丈姆發燒,經耶穌「一摸伊ê手,就退燒」,續落來彼得ê丈姆就起來「接待耶穌」。馬太福音chit種筆法表示:彼得ê丈姆服事耶穌,表示感恩ê意思。

Koh講,chia提起彼得ê丈姆,表示彼得有結婚,而且tī後來出去傳福音ê時,是chhōa bó͘同齊去(參考哥林多前書九:5)。

Tī第16到17節,chit兩節雖然真簡單teh說明耶穌ê工作,m̄-koh卻是kā伊tī加利利所行各種神跡奇事,而且「kan-taⁿ用一句話就kā鬼lóng趕走,koh醫好所有ê病人」,chit種話句,lóng是teh表示耶穌身上確實有特別ê能力。馬太福音作者kā耶穌chit種一直為病人醫ê工作,引用以賽亞書第五十三章4節ê經文來表示,hi̍t節經文原本表示上帝差遣來ê受苦奴僕,就是為tio̍h beh負擔咱ê痛苦,chit種性命ê痛苦kah「罪」有密切關係。



經文:

馬太福音 8:18-8:22

註釋:

馬太福音tùi第四章開始記載耶穌召門徒來tòe祂傳福音,伊是一面呼召人來做門徒(參考八:21—22、九:9—12),另外一方面是隨時teh教導門徒認bat天國ê信息(九:35—38)。

第19節講有一個經學教師對耶穌表示想beh跟tòe伊,這mā說明耶穌出來傳天國ê信息了後,已經tī猶太人中間造成真大ê震撼。經學教師tī猶太人社會ê地位真koân,約翰福音第十二章42節記載有bē少猶太人領袖確實是信了耶穌,m̄-koh因為驚法利賽人反撲,m̄敢公開表態。因為án-ne,第20節就記載耶穌回應chit-ê經學教師,ài伊認真思考tio̍h付出ê代價。

第21節所講ê「門徒」,就是跟tòe耶穌一kóa時間,m̄-koh並m̄是親像彼得、安得烈、雅各、約翰、馬太等等chiah-ê人專心一意跟隨者,chit-má chit-ê門徒表示想beh專心跟tòe耶穌,m̄-koh想beh先tńg去等到in老父死後而且安葬妥當了後,koh來跟tòe。耶穌回應chit-ê人,既然án-ne就m̄免來跟tòe à,因為傳福音ê事工,需要堅定ê毅力,有後顧之憂ê人,並無適合。



經文:

馬太福音 8:23-8:27

註釋:

Chit段經文記載耶穌有能力行奇妙ê神跡,hō͘自然界ê風kah湧lóng聽伊ê命令,已經teh暗示耶穌kah一般人無仝款,tī伊ê身上有上帝創造ê能力,因為án-ne,就算有大風湧打擊,甚至水湧蓋過船,耶穌猶原ē-tàng安然睏。

「主ah,救阮,阮teh beh無命à!」馬太福音用chit種方式beh hō͘猶太人知影,表示耶穌就是性命ê救主、主宰。耶穌醒起來了後並無隨時命令風kah湧停止,卻是先對門徒講:「為甚麼hiah-ni̍h驚惶?Lín ê信心siuⁿ過細lah!」 Kah耶穌做伙,iáu teh擔心性命ê安危,這就是無信心ê表現。
耶穌一下責備風kah湧,風kah湧lóng聽祂,án-ne chiah引起門徒大大tio̍h驚,in lóng提出chit-ê問題:「Chit-ê人究竟是甚麼人?」 表示門徒對耶穌ê認bat真少。


經文:

馬太福音 8:28-8:34

註釋:

馬太福音記載耶穌所行chit件神跡ê地點是tī「加大拉」,chit-ê庄頭離加利利湖東南方約有十公里。

Chit兩個hō͘鬼附身ê人,是tòa tī「墓穴」中,照摩西律法來看,in就是屬tī無清氣ê人(參考民數記十九:16)。福音書作者一再表示鬼認bat耶穌(參考馬可福音一:23—24、三:11),chiah-ê鬼對耶穌講表達出重要ê意義:

一是「上帝ê Kiáⁿ」,這表示in認為耶穌是彌賽亞、拯救者。

二是「你為甚麼ài干涉攪擾阮」,chit句話表示耶穌來到in中間,hō͘ in想beh繼續危害人性命ê事受tio̍h阻礙。

三是「時機未到」,鬼認為上帝審判ê末日iáu未到。表示in iáu ē-tàng繼續危害人ê性命。

「豬」tī摩西律法中認為是屬tī無清氣ê動物,bē-tàng食用(參考利未記十一:7)。無清氣ê豬,kah hō͘鬼附身來tòa tī墓穴ê人tú好是相配,lóng是屬tī無清氣ê。馬可福音第五章14節講chiah-ê豬隻總共約有兩千隻,這確實是真大ê數目,應該是屬tī社區ê共同財產。Chiah-ê鬼請求耶穌hō͘ in tùi這兩人身上出來了後,進入豬群中。等於是in想beh tńg來到仝款是屬tī「無清氣」ê動物,án-ne in ē-tàng附體存在。結果chiah-ê豬群tùi án-ne衝入去湖中淹死。

湖,tī猶太人文化中是屬tī鬼生存ê所在,mā是會危害性命ê氣力。Tī chia teh暗示chiah-ê鬼tńg來到in所khiā起ê所在。M̄-koh,加大拉ê人並無因為chit兩個hō͘鬼附身ê人得tio̍h醫來感謝耶穌,顛倒是hiah-ê人看見chit件事ê反應是相當驚惶(參考馬可福音五:15),in要求耶穌離開in ê所在。



經文:

馬太福音 9:1-9:8

註釋:

耶穌醫人ê病,通常是因為當事人對耶穌有相當ê信心。M̄-koh mā有真chē pái,是因為病患周圍ê人ê信心,hō͘耶穌施行醫ê能力。親像tī第八章1到10節,記載一位羅馬軍官為tio̍h伊ê奴僕破病,來求耶穌醫,伊kan-taⁿ求耶穌賜hō͘伊一句「醫」就有夠,耶穌聽真讚嘆chit位羅馬軍官ê信心。

chit-má chit段經文ê chit-ê半遂病人,就是因為別人kā伊扛到耶穌面前來求醫,耶穌看出chiah-ê人ê信心á醫好chit-ê人ê病。有堅定信心ê人,m̄-nā對家己有幫助,mā會對同齊生活ê人有利益。

馬太福音tī記載上有省略描述chiah-ê朋友怎樣kā chit-ê半遂病人抬到耶穌面前ê過程,tī馬可福音第二章1到5節kah路加福音第五章17到20節等等,lóng有真詳細ê描述,講chiah-ê人是kā病人抬到厝頂,拆開厝頂了後,kā半遂病人縋落到耶穌面前。In chit種舉動大大感動耶穌。

Chiah-ê經學教師認為耶穌醫chit-ê病人所講「你ê罪得tio̍h赦免à」chit句話,有褻瀆上帝之嫌。因為猶太人久長以來認為只有上帝chiah有權赦免人ê罪(參考以賽亞書四十三:25)。

福音書作者ài用「耶穌知影in teh想甚麼」chit種句型來表示,耶穌有特殊能力,ē-tàng知影人ê心思意念(參考馬太福音十二:25、十六:8、廿二:18,馬可福音八:17,路加福音六:8、九:47,約翰福音六:15),á這是上帝chiah有ê能力。



經文:

馬太福音 9:9-9:13

註釋:

馬太福音講chit位抽稅ê人名叫馬太,tī馬可kah路加福音書lóng講是「利未」。Tī第十章3節記載耶穌門徒ê名單中mā是用「抽稅ê人馬太」,伊原本是一個猶太人眼中ê罪人(參考路加福音十九:7),竟然會hō͘耶穌接納成做門徒,這是jōa-ni̍h-á大ê恩典ah!

「抽稅ê kah pháiⁿ人」,chia所講ê「pháiⁿ人」真可能指ê是妓女,á是tī猶太人社會中,不時hō͘人認為是無贊成法利賽人hit種嚴謹守祖先傳統ê人。

Tī第13節,馬太福音作者引用了何西阿書第六章6節ê經文,強調懷tio̍h憐憫ê心,比遵行kāu枝葉ê祭祀禮儀koh khah重要。這表示對社會上hō͘人鄙視(siùⁿ)、討厭ê人,tio̍h存憐恤ê心來看待。


經文:

馬太福音 9:14-9:17

註釋:

禁食,這原本是真嚴肅ê一項信仰行為,是人teh表示謙卑、懺悔、悲傷ê態度。Tī舊約摩西時代規定每年贖罪節ê時chūn,全國人民lóng tio̍h禁食(參考利未記十六:29—34)。主前586年以色列人民亡國tī巴比倫帝國後,in增加禁食ê次數到四次(參考撒迦利亞八:19)。到耶穌ê時代,有敬虔派ê猶太人每一個禮拜禁食兩pái(參考路加十八:12)。禁食,應該是人內心ê一種省思,m̄是用來比較個人信仰ê層次高低á是好bái ê方式(參考馬太六:16—18)。

耶穌tī第15節用婚姻ê關係譬喻。猶太人ê婚宴長到七工,he是件大事,甚至tú結婚ê cha-po͘人,一年內lóng thang免除公務kah兵役(參考申命記廿四:5)。耶穌tī-chia隱喻家己就是新郎,伊當teh辦婚宴,當然m̄免禁食。

「日子teh beh到」,這是teh指審判ê時刻to̍h是teh beh來臨,新郎會hō͘掠去,表示伊受難了後,會有大ê迫害出現,hit時chūn,哀傷ê時刻mā會來臨,hit時就一定tio̍h禁食。

第16到17節是猶太人流行ê諺語。古時chūn ê布因為需要先浸過水了後chiah ē-tàng做成衫褲。新布,是teh指iáu未浸過水ê,用新布來補舊衫褲,一定會ná補ná大孔。裝酒ê皮袋mā是án-ne。

「Ài kā新酒裝tī新皮袋裡;án-ne,兩項lóng會保全。」馬太福音記載耶穌chit句話,真清楚teh說明舊ê kah新ê tio̍h分明,án-ne兩種lóng會保存落來。



經文:

馬太福音 9:18-9:26

註釋:

Chit段經文kā兩則醫ê神跡編輯做伙。會堂ê主管,tī猶太人社會中lóng受尊崇。M̄-koh伊深信耶穌有特殊能力ē-tàng醫伊ê cha-bó͘-kiáⁿ。

猶太人ê習俗是死後先埋葬,了後chiah通知親友。因為耶穌到伊ê厝有小khóa延遲,當伊到ê時chūn,葉魯ê cha-bó͘-kiáⁿ已經往生á準備ài出殯à。M̄-koh耶穌認為葉魯ê cha-bó͘-kiáⁿ並無死,只是「睏去à」,大家lóng感覺耶穌講chit種話真好笑。因為明明是死去,chiah會請出殯ê鼓吹手來準備出殯ê事宜。耶穌進入這女孩ê臥室,拉起伊ê手,這女孩就koh活起來。

馬可福音第五章42節講這女孩當時是12歲。這年齡tú好kah致使延緩到葉魯家去ê一位患有血漏症ê cha-bó͘人患病時間仝款,lóng是12年。摩西律法認為患chit種病ê cha-bó͘人是無清氣ê(參考利未記十五:25—30),無法度參加任何聚會,mā無法度kah任何人有接觸。因為án-ne,chit種cha-bó͘人通常會hō͘隔離出來,免得kah伊有接觸ê人lóng成做無清氣。可見chit-ê cha-bó͘人ê生活是非常痛苦ê。

「衣角」,這是猶太cha-po͘人衫褲邊緣上所縫製ê繸子,用來提醒以色列人民tio̍h會記得遵守上帝一切誡命(參考民數記十五:37—41)。當chit-ê cha-bó͘人伸手摸tio̍h耶穌ê衣角ê時,tùi耶穌ê身上就有能力散發出來(參考馬可福音五:30),醫好chit-ê cha-bó͘人ê病。馬太福音第十四章36節就有án-ne記載講,有病ê人只要一摸耶穌外袍ê衣角,身上ê病lóng好了,這lóng teh說明耶穌身上有特殊能力。



經文:

馬太福音 9:27-9:31

註釋:

所謂「大衛ê kiáⁿ」,指ê是拯救者(彌賽亞)ê意思,這是根據先知以賽亞書第十一章1節、耶利米書第廿三章5、6節ê預言延伸來ê。Chit兩個人雖然chheⁿ-mê,m̄-koh,in ê心無chheⁿ-mê。In可能只聽tio̍h耶穌ê故事,就相信耶穌就是先知所預言ê救主,結果得tio̍h醫。

馬太福音提供chit種特別醫ê資料,會強調「兩個人」,主要teh強調這是有公開見證者(參考申命記十九:15),ná親像tī加大拉tú-tio̍h兩個被大群鬼附身ê人仝款。

如果盲人聽tio̍h耶穌來ê消息,就會大聲叫耶穌是「大衛ê kiáⁿ」,目金ê人應該會koh khah清楚chiah-tio̍h。

「阮信」,這是一句性命ê告白,耶穌mā因為án-ne「成全」in所期待ê,ná親像伊成全了羅馬軍官所祈求ê仝款(參考馬太福音八:13)。

「Mài kā chit項事kā任何人講」,耶穌án-ne交帶chit兩個tú hông醫好ê盲人,ná親像祂mā bat吩咐hit位癩ko病被醫好ê人(參考八:4)。M̄-koh,chit兩個人並無照耶穌ê吩咐,in四界去傳揚耶穌tī in身上所做ê事,ná親像馬可福音第一章45節所記載hit位癩ko病得tio̍h醫ê病人仝款,四界宣揚耶穌為伊所做奇妙醫ê事,m̄-koh,反tńg影響了耶穌ê工作。



經文:

馬太福音 9:32-9:33

註釋:

「Hō͘鬼附身ê啞巴」,福音書作者ài用「鬼附身」來形容病症之嚴重,已經大大超過當時醫生醫能力ê範圍。因為án-ne,當時ê人看見chit種病被醫好了後,in ê反應就是「從來m̄-bat有見過chit種事」。

先知以賽亞書第廿九章18、19節án-ne講:「Hit 日,臭耳聾ê 會聽tio̍h 冊內ê話,chheⁿ-mê-.ê ê 目睭會tùi 濛霧烏暗中得tio̍h 看見。19 謙卑ê 人會因為上主來加添in ê 歡喜;世間ê sàn-chhiah 人會因為以色列ê 聖ê 來快樂。(全民版)」Αń-ne,馬太福音ê作者teh描述耶穌ē-tàng有chit種力量醫chheⁿ-mê、聾啞ê人,甚至hō͘死人koh活,祂(耶穌)就是先知所預言ê彌賽亞。



經文:

馬太福音 9:35-10:1

註釋:

Chit段經文ê重點就tī第36節所講ê:「當祂看見一陣群ê人,動起憐憫ê心;因為in孤苦無助,像無牧者ê羊群一般。」

「動起憐憫ê心」,mā是kui本聖經teh紹介上帝拯救工作ê一個主要原因,是上帝看見人類ê苦難,祂生出憐憫、憐憫ê心,展開拯救ê工作。

馬太福音作者以耶穌四界傳福音kah醫醫病人ê時,發見一:群眾ná親像無牧羊人看顧、養飼ê羊。二:等待收割ê莊稼真chē,m̄-koh收割ê工人少,接落去經文tio̍h敘述耶穌揀選門徒來協助傳福音事工ê原因。




經文:

馬太福音 10:2-10:4

註釋:

馬太福音直接就講述耶穌「召集祂ê十二個門徒做伙」,並且列出chit十二位「使徒」ê名單,然後隨時tī第5節講差派in出去傳福音,為tio̍h beh hō͘祂ê門徒tī福音事工上進行順利,耶穌mā「賜hō͘ in驅逐邪靈kah醫各種病症ê權力」。

第1節用「門徒」,第2節用「使徒」,前者表示「學習者」,後者表示「受差派」。前者是tī耶穌時代所用ê名詞,後者是早期教會使用。「十二」,其實有含以色列民族「十二支派」ê意思。

「巴多羅買」,真可能就是約翰福音第一章46節所提起ê「拿但業」。

「收稅ê馬太」,mā就是馬可kah路加chit二本福音書所講ê「利未」。

「激進黨」,這是當時猶太人社會ê一種政治黨派,kah「希律黨」ê人tī政治理念上顛倒。Chit字ê希伯來文是「Kama」,mā就是「狂熱者」(zealous)ê意思。

「出賣耶穌ê加略人猶大」,三本福音書lóng kā它編排tī十二門徒之後,而且lóng強調「出賣耶穌ê」,表示chit-ê名單是tī耶穌死後chiah出現ê(參考馬可福音三:19,路加福音六:16)。


經文:

馬太福音 10:5-10:15

註釋:

只有馬太福音記載耶穌吩咐祂ê門徒mài到外邦人地區,而且iáu強調mài進入撒馬利亞人ê城市。Chit種吩咐一再引起討論。因為耶穌家己mā進入撒馬利亞人ê城市,而且iáu tòa兩工,hō͘真chē撒馬利亞人信了伊(參考約翰福音四:40—41)。耶穌mā bat進入外邦人ê城市,而且行了神跡奇事(參考馬太福音十五:21—28)。祂koh活了後,交帶門徒tio̍h往普天下去傳福音(參考馬太福音廿八:18—20)。因為án-ne,到底是tī甚麼情況之下會有chit種禁令出現,真oh理解。有可能kah第7節所提起ê「天國teh beh實現ā」有關,表示時間真緊迫,只好先tùi上帝ê子民以色列ê kiáⁿ孫開始chit件福音事工。

福音事工siōng重要ê態度,就是「白白得tio̍h,mā tio̍h白白hō͘人」,使徒保羅mā強調講上帝是「白白賜恩典」,hō͘人得tio̍h耶穌拯救ê恩典(參考羅馬書三:24)。

第9到10節thang看出傳福音ê範圍真細,平常生活所需要ê只要有人接待就bē有缺乏。猶太人koh有一種風俗,歡喜接待出外ê人,因為可能因為án-ne接待tio̍h天使(參考希伯來書十三:2)。
「願lín平安。」這是一句祝福,平安是teh指享受上帝賞賜ê福氣,心靈ê安息ê意思(參考馬太福音十一:28—30)。

第15節thang參考創世記第十九章。


經文:

馬太福音 10:16-10:25

註釋:

Chit段經文講述門徒受差派出去傳福音一定tio̍h ài有ê認bat,mā說明傳福音ài有犧牲性命ê準備,這講出傳福音並m̄是一件容易á是輕鬆ê事。Tùi chia想起耶穌吩咐門徒m̄免帶任何身外之物,也kah chit種會面臨苦難ê事有關。

「Kā羊送入去狼群中」,表示必定會有性命ê危險。Chit種情形tī基督教會歷史上,發生真chē傳道者殉難ê事件,就證實了耶穌chit句話。

傳福音所ài面對ê是人,而且是罪惡jú深ê人,jú需要福音ê信息。因為án-ne,靈巧、猛醒親像「蛇」乃是必要ê。M̄-koh,靈巧、機警並m̄是用來欺騙別人,á是圖謀私利,卻是知影怎樣chiah ē-tàng kā福音ê信息傳達出去。Koh講,傳福音ê人koh khah需要抱tio̍h善良ê心。

第17到20節已經講出早期教會信徒tú-tio̍h ê困境背景,就是受tio̍h猶太教徒ê迫害。Chia所講ê「法庭」,是teh指猶太人ê地方公會組織,由維護猶太會堂紀律ê委員會組成,人數大約二十三名,專門teh處理宗教kah民間ê事務。「鞭phah」,這mā是公會對被告判刑ê懲罰之一種。耶穌受猶太人siōng koân議會審問後mā受tio̍h類似ê懲罰(參考馬太福音廿六:67)。使徒保羅bat受tio̍h chit種待遇(參考哥林多後書十一:24)。

第18節thang對照第五章11到12節,回應第16節所講ê一定tio̍h靈巧ná蛇。另外一方面,上帝會賜福hō͘祂ê奴僕,hō͘伊明白上帝ê旨意。

第21到23節,除了來自猶太宗教眾領袖ê壓迫外,koh khah嚴肅ê是來家己厝己ê厝內人。第22節ê「忍耐到底」,是teh指面對一切迫害、苦難,猶原bē改變心志,堅持為福音無惜犧牲任何代價ê意思。

第23節所謂「行遍以色列ê城市」,這應該是teh指巴勒斯坦地區ê範圍,表示耶穌koh再臨ê時間會真緊,chit點早期教會深信無疑。

對早期教會受迫害ê信徒來講,第24到25節是真安慰,因為耶穌mā受tio̍h殘酷ê迫害釘死tī十字架頂。因為án-ne,當耶穌ê門徒(á是基督徒)來講,tú-tio̍h迫害時想看耶穌,án-ne就無甚麼好感覺委屈ê。

「別西卜」,這是猶太所指稱ê「鬼王」(參考馬可福音三:22),mā是teh指魔鬼、撒旦ê意思。


經文:

馬太福音 10:26-10:31

註釋:

第26節是當時猶太社會ê諺語,意思是teh指人真有限,無法度隱藏家己ê身分,因為上帝是無所不在ê,祂真清楚人ê一切行為,是性命真正ê主宰。人只有ē-tàng殺害身軀,卻對靈魂lóng無辦法。Chia講「靈魂」kah「肉體」並m̄是分開,卻是講kui個性命包含chit兩個部分,而且只有上帝chiah有權柄處置人性命中ê chit兩個部分。

「雀鳥á」,這是當時鳥類中hông看做siōng卑微ê。Ná親像人頭殼頂ê頭毛仝款,有時lak頭毛,人mā bē致意,m̄-koh tī上帝眼中,祂ê手所創造之物,祂lóng珍惜看顧。人因為有上帝ê形像(參考創世記一:26),因為án-ne,受託付來管理上帝所造ê萬物。Mā因為chit-ê緣故,人比一切萬物有koh khah特殊ê使命,這是第31節所提起ê,主要teh安慰、鼓勵為tio̍h福音受tio̍h迫害ê人。


經文:

馬太福音 10:32-10:33

註釋:

「認」,意思是teh指結連做伙,無法度分開ê。參考約翰福音第十四章6到7節講ê,無認bat耶穌,就無法度認bat天父。另外mā thang參考路加福音第九章26節。

經文:

馬太福音 10:34-10:39

註釋:

這是一段真oh理解ê經文。天使傳報耶穌降生ê信息ê時,是帶「和平」hō͘ chit世界(參考路加福音二:14b)。先知以賽亞講有一個為咱出世ê嬰á,伊會是一位「和平ê君王」(參考以賽亞書九:6)。M̄-koh chia耶穌卻講祂無帶來「和平」,卻是帶「刀劍」,而且會引起厝內人á是親朋好友之間ê紛爭。其實,chit段經文mā講出早期基督徒選擇信仰時所tú-tio̍h ê現實問題,有時嚴重ê情況ná親像戰爭仝款,是生死ê問題,甚至關係tio̍h kui個家庭ê存亡,因為羅馬帝國後來施行迫害基督徒ê政策,就是採用連坐法,只要發見一個家庭裡有人信耶穌,連帶ê kui個家庭lóng會受tio̍h懲罰。

做一個人決定beh跟tòe耶穌ê時,就一定tio̍h先量家己是m̄是願意giâ起十字架,這是必要ê先決條件,若無,就真oh繼續。因為跟tòe耶穌是為tio̍h beh傳福音,這福音是上帝拯救ê信息(參考羅馬書一:16)。M̄-koh傳福音可能會為性命帶來苦難,這tī早期ê教會一再發生,tī近代ê極權國家mā是án-ne。



經文:

馬太福音 10:40-10:42

註釋:

Chit兩節是chit章有關差派門徒出去傳福音ê一個總結。Tī揀選門徒了後,耶穌差派十二使徒出去傳福音,並hō͘ in知影可能會tú-tio̍h ê各種問題。耶穌tī第34到39節講tio̍h真正ê問題,講人ê仇敵是家己ê厝內人。然後tī chia回應好款待所有為福音事工奉獻心力ê人,lóng會kah傳福音ê人仝款得tio̍h上帝ê獎賞。換句話講:傳福音kah協助傳福音ê人,即使是接待、支援等等,lóng是上帝所獎賞ê對象。因為只要是福音事工,就是參與上帝救人性命ê工作。Thang kā chit段經文kah第廿五章31到46節對照來看。

經文:

馬太福音 11:1-11:15

註釋:

「耶穌指示十二個門徒ê話講soah了後」,chit句話是耶穌言論ê第二段ê結束。

有關行洗禮約翰派門徒去問耶穌身分ê事。Tī第四章12節bat提起行洗禮約翰因為批評希律亂倫ê事á被關tī監獄裡。伊雖然tī監獄裡,iáu teh關心「彌賽亞」來臨ê事。因為不時聽tio̍h門徒來傳達耶穌傳福音、醫病ê事,因為án-ne,koh再派門徒去問耶穌,是有「koh一pái確認」ê用意。

第4到6節,耶穌ê回答是真具體ê,祂ài行洗禮約翰ê門徒kā「所聽見、所看tio̍h ê」tńg去向行洗禮約翰報告。祂引用以賽亞書第廿九章18節,以及第三十五章5到6節ê經文,先知以賽亞書ê預言中提起以色列人民重新得tio̍h拯救ê日子來臨時,就是:「Chheⁿ-mê-.ê ē-tàng看,臭耳聾ê ē-tàng聽,跛腳ê ē-tàng像鹿跳躍,啞口ē-tàng歌唱。曠野會chhèng出大水;荒漠會流出甘泉。」Μā thang將chit段預言對照以賽亞書第六十一章1到2節。耶穌beh hō͘行洗禮約翰ê學生清楚,祂就是以色列人民期待甚久ê拯救者、彌賽亞。

第7到11節,chit段經文講tio̍h人真正ê問題,是無清楚家己看tio̍h甚麼?Á是別人看tio̍h甚麼?如果無屬靈ê眼光,人所看tio̍h ê iáu是表面ê。除非有上帝ê啟示,若無,人所看tio̍h ê iáu是膚淺ê現象。

耶穌引用瑪拉基書第三章1節所記載ê預言,耶穌真清楚teh表示行洗禮約翰就是hit位teh beh來ê先知以利亞,án-ne,耶穌就是in所期待ê彌賽亞。

第11節提起有關行洗禮約翰tī天國裡是siōng卑微,m̄-koh伊卻比以往任何一位先知lóng khah偉大,原因是伊看tio̍h耶穌。M̄-koh耶穌是開創天國信息者,ná親像行洗禮約翰家己所講ê,伊連beh為chit位拯救者tháu鞋帶、the̍h鞋á mā不配(參考馬太福音三:11)。

第12節有真chē種解釋:一是有人誤kā天國當做地上ê政治王國一般,用各種方式想beh奪取。因為án-ne會劇烈用盡各種方法想beh佔有。Tùi教會歷史來看,chit種解釋真接近。二是kā基督教會看做是地上ê天國,真chē人想beh佔有教會ê地位。三是確實有認bat天國,想beh入去,卻需付出相當ê代價,甚至會ná親像第十章34到39節所講ê,連家己ê厝內人mā隔絕關係。

經文:

馬太福音 11:16-11:19

註釋:

譬喻當時ê世代,耶穌bat指出祂ê世代是一個「jōa-ni̍h邪惡、jōa-ni̍h不忠」ê時代,因為大家kan-taⁿ想beh看神跡,卻對神跡顯示出來ê意義一再輕視(參考馬太福音十二:39)。祂甚至明確指出無神跡thang看,因為hit-ê時代真正真「邪惡、淫亂」(參考馬太福音十六:1—4)。

耶穌基督用兩種生活中一再看tio̍h ê景況來譬喻;一是婚禮,另外一個是喪禮。祂特別指出這是用細漢gín-á tī街路邊sńg「辦家伙á」ê來譬喻頂面所講ê兩種禮儀。說明人一方面teh期待拯救ê來臨,m̄-koh心內卻並m̄是真正án-ne想,卻是kā它當做遊戲、好sńg ê態度,就bē認真看chit-ê tāi-chì。

第18節,行洗禮約翰是屬tī頂真、苦行ê傳道者,伊kah門徒不時會禁食祈禱(參考馬可福音二:18)。M̄-koh in講行洗禮約翰明明是hō͘鬼附身ê人,因為一般人bē án-ne teh過生活。
第19節,論到耶穌,講祂並無親像行洗禮約翰hit種ê聖潔,m̄-nā無禁食,甚至iáu允准祂ê門徒tī安息日摘麥穗,koh jôe麥穗食(參考路加福音六:1),mā不時kah抽稅ê人、pháiⁿ人做伙(參考馬可福音二:15—16,路加福音十九:7)。基本上,批評耶穌ê猶太人只知影chhōe孔縫,用一大堆理由,只是無想beh認真去明白上帝拯救ê信息。



經文:

馬太福音 11:20-11:24

註釋:

Chit段kah前段有密切關係,m̄信ê猶太人,lóng是chhōe出真chē拒絕救恩ê理由,這tú好說明猶太人拒絕ê態度,即使看tio̍h真chē神跡iáu是m̄信,iáu繼續teh走chhōe神跡顯現(參考馬太福音十二:38、十六:1)。

「伯賽大」、「哥拉汛」,這是設tī加利利河邊ê村鎮。耶穌bat tī伯賽大醫好一位chheⁿ-mê人(參考馬可福音八:22—26)。M̄-koh福音書並無記載有關耶穌基督tī哥拉汛傳福音ê事蹟。

「泰爾kah西頓」,這是兩座外邦人ê城鎮,kah伯賽大、哥拉汛chit兩個猶太人ê村落tī信仰態度上tú好成對比。因為án-ne,所得tio̍h ê審判結果mā會有差別。

「所多瑪」kah迦百農mā成對比ê狀況;前者tī創世記第十九章,he是一個罪惡貫滿ê城市,迦百農是耶穌siōng早行神跡、傳福音ê城鎮。甚至連耶穌家己家鄉ê人mā知影祂tī迦百農行過真chē神跡(參考路加福音四:23)。M̄-koh,看見ê神跡雖然chē,信心照常冷淡,懷疑ê態度猶原無減輕。




經文:

馬太福音 11:25-11:27

註釋:

Chit兩節thang參考哥林多前書第一章18到25節,以人ê聰明想beh明白上帝ê旨意是愚戇ê想法(mā thang參考以賽亞書廿九:14)。只有謙卑ê人chiah會明白上帝ê神跡每工發生tī伊ê性命中。

第27節是耶穌明確講出祂kah上帝之間ê特殊關係──父kah Kiáⁿ。


經文:

馬太福音 11:28-11:30

註釋:

「枷擔」是teh指重擔。古早時ê枷擔,是teh指套tī牛、馬頷頸,用來駕馭牛馬犁田用ê,mā是象徵一種性命ê鎖枷。性命ê苦難,ná親像一種重大ê枷擔hē tī人ê性命中,mā ná親像一種重擔,hō͘人無法度承受仝款。M̄-koh,耶穌講tī祂內面,人性命ê chiah-ê鎖枷lóng會減去,性命無koh是鎖枷,mā無koh是重ê擔,卻是輕省ê。

經文:

馬太福音 12:1-12:8

註釋:

有關安息日ê問題,mā是耶穌傳福音過程中,不時tú-tio̍h 猶太宗教領袖強力反抗ê問題。照申命記第廿三章24到25節規定:腹肚iau ê人,thang tī經過別人麥田ê時,摘麥穗來食,m̄-koh無法度the̍h鐮刀割;經過葡萄園時,mā thang摘葡萄來食,m̄-koh無法度裝tī籃á裡帶走。其實,耶穌ê門徒腹肚iau,摘麥穗來食並無錯,in會hō͘法利賽人指責ê原因是,in摘了麥穗後koh用手搓tio̍h食(參考路加福音六:1),因為án-nehō͘人認為是違反安息日ê規定,就是違背十誡中ê第四誡,照摩西律法是beh判處死刑ê(參考出埃及記三十一:14—15)。

第3到5節,耶穌提出一個歷史背景,是記載tī撒母耳記上第廿一章1到6節記載大衛王tī逃難ê時chūn,mā食祭壇上獻祭用ê餅,he是只有祭司chiah ē-tàng食ê。耶穌ê意思是:如果大衛王不守摩西ê律法,為甚麼眾宗教領袖無譴責。當安息日lóng一定tio̍h遵守ê時chūn,祭司卻thang為了獻祭宰殺公羊,更換祭壇上ê祭品,chiah-ê舉動mā是teh做工,mā是違反安息日ê規定,kah原本十誡規定ê全體守安息日之精神無仝。

第6到7節,這是耶穌第二pái引用何西阿書第六章6節ê經文,第一pái是馬太福音第九章13節。伊強調tio̍h用上帝ê慈愛看人性命ê需要,khah贏過遵守kāu枝葉ê宗教禮儀koh khah能符合上帝對祂子民ê教導。一個人如果是為tio̍h止飢來食物件,無遵行宗教禮儀ê限制繼續iau落去,是ē-tàng被接受ê。

第8節,thang參考馬可福音第二章27節,thang看出上帝設立安息日主要ê目的,是為tio̍h beh hō͘人ê性命會得thang延續之本意有密切關係。因為án-ne,安息日就是上帝賜福hō͘人ê一種特別恩典。上帝賜福既然是為tio̍h延續人ê性命,腹肚iau乃是對人性命ê威脅,án-ne,當人iau餓難耐ê時chūn,食物件止飢,mā等於是teh回應上帝賞賜性命ê疼。耶穌tī-chia強調:安息日siōng主要是表明上帝對人ê賜福。



經文:

馬太福音 12:9-12:14

註釋:

Kah前一段仝款,lóng是有關安息日引發ê問題。耶穌tī當時已經受tio̍h一般大眾ê喜愛,因為伊ê講道kah經學教師無仝,hō͘人認為有權威(參考馬太福音七:29)。因為án-ne,每pái安息日耶穌去會堂ê時,大家就歡喜請伊講解聖經。作者路加就是講耶穌去會堂「教導人」(參考路加福音六:6)。

猶太人ê會堂,這是主前586年南國猶大被巴比倫帝國滅亡,以色列人民被俘虜到巴比倫去做奴隸後,tī俘虜營生活中發展出來ê一種聚會方式。規定只要有十個以上結過婚ê cha-po͘人就ē-tàng成立一間會堂。因為in已經無法度koh再tńg來到耶路撒冷聖殿去敬拜上帝了,所以用chit種方式來取代。會堂ê主要功能是讀聖經kah祈禱,kah過去聖殿ê主要功能是獻祭大大無仝。過去tī聖殿ê祭司,漸漸轉變成會堂ê教師,教導受掠ê民眾學習聖經上帝ê話。Mā因為會堂推動研讀聖經、教導聖經,chiah有保存猶太人耶和華宗教ê信仰ē-tàng到taⁿ無變。主前538年,波斯帝國取代了巴比倫帝國,波斯皇帝塞魯士決定tháu放所有以色列人民tńg去故鄉重建家園,以色列人民開始tùi各地回鄉,chit種tī異鄉成立ê會堂型態m̄-nā無廢除,反tńg是被存留落來。Mā因為會堂ê聚會,致使in ê信仰會得thang長存落來,甚至tī第二次大戰期間,真成功地tī集中營,以及真chē寄居國延續落去。

第10節講chit-ê人「一隻手lian去à」,照規定,chit種病是屬tī「慢性病」,因為án-ne,是ē-tàng等到安息日過了後,mā就是日頭落山後chiah治療。M̄-koh,chiah-ê宗教領袖卻想beh利用chit-ê機會chhōe碴,因為án-ne故意提出「安息日醫病是m̄是違法」chit-ê問題來問耶穌。

第11到13節,耶穌以羊作比較提出問題。羊,這是猶太人siōng常用ê獻祭牲禮,mā是猶太人siōng重要ê經濟物件之一。如果有羊tú好tī安息日掉落tī坑洞中,即使是tī安息日也tio̍h kā羊救起來,然後帶去獻祭,祭司mā會分tio̍h一部分ê羊肉。如果kā羊賣了,mā有kā所得ê十分之一帶去奉獻,án-ne聖殿koh有收入。因為án-ne,宗教領袖lóng會同意就算是安息日也tio̍h kā掉落坑洞中ê羊救起來。M̄-koh,對tī破病等待救助ê人,chiah-ê宗教領袖顯然並無用同理心看待。既然動物lóng ē-tàng馬上救起來,為甚麼人破病了無法度馬上救治?這mā是為甚麼耶穌會用「人比羊khah貴重」chit句話來回應ê原因。

「Kā手伸直!」這是一句命令語,chit-ê人mā tòe耶穌ê命令伸出手,結果就馬上得tio̍h醫。

第14節,因為耶穌公然tī會堂裡違反安息日ê規定,tī chiah-ê法利賽人眼中,耶穌ê醫舉動,就是teh藐視摩西律法ê尊嚴。因為án-ne,chiah-ê宗教領袖決定kā耶穌殺害。



經文:

馬太福音 12:15-12:21

註釋:

耶穌並無想beh kah宗教領袖起正面衝突,主要原因是伊並m̄是為tio̍h án-ne來到世間,伊是為傳天國ê福音而來。M̄-koh群眾愛耶穌,這mā是hō͘眾宗教領袖一再感覺頭殼痛,kah m̄知應該án怎下手殺害耶穌ê原因(參考馬太福音廿一:46-廿六:5)。

真chē群眾來跟tòe耶穌,伊「醫好in所有ê疾病」,簡單ê一句話,講出當時民眾歡喜來跟tòe耶穌,主要ê原因iáu是在tī伊ē-tàng醫病,而且醫各種ê疾病。

第16節講耶穌一再要求被醫ê人mài kā消息傳揚出去(參考八:4、九:30)。

第17到21節是引用以賽亞書第四十二章1到4節奴僕ê詩歌。

第18節kah耶穌tī接受行洗禮約翰洗禮了後,tùi天頂傳落來ê聲音仝款(參考三:17)。上帝揀選ê奴僕ài beh宣告上帝審判ê主權。

第19節,說明上帝奴僕有謙卑ê態度kah隱忍ê毅力,m̄-koh絕對bē受限制tī強權á是妥協,真正福音並無需要大肆廣告、吹噓。

第20到21節,主要teh說明耶穌雖然被猶太人所拒絕,m̄-koh卻被外邦人所接受,因為伊是「萬民」ê救主(參考路加福音二:10)。Koh講,即使人用盡一切辦法想beh阻擋上帝ê信息,mā無法度抵擋。因為福音乃是上帝ê大能,就是為tio̍h beh拯救一切仰望上帝救恩ê人(參考羅馬書一:16)。


經文:

馬太福音 12:22-12:32

註釋:

耶穌有一般人無法度明白ê氣力,路加福音作者講,he是因為「主ê能力kah耶穌同在,hō͘伊ē-tàng醫好病人」(參考路加福音五:17)。當福音書作者用「hō͘鬼附身」,chit句話續落來某一種疾病時,主要是teh形容chit-ê人ê病已經嚴重到超越當時ê醫療能力。因為án-ne,當人kā chheⁿ-mê koh啞口ê病人chhōa來走chhōe耶穌ê醫ê時,tī一般人看起來,he是無可能得tio̍h醫ê,m̄-koh耶穌卻醫好chit-ê病人。

第23節ê「群眾lóng tio̍h驚kah gāng去」,這是福音書不時出現ê詞句,形容耶穌有非常大ê能力,ē-tàng醫好各種疑難雜症(參考八:27、九:8、33、十五:31、廿一:20)。

「大衛ê kiáⁿ」,tī第一章1節ê開場白就已經提起過,是teh形容耶穌就是上帝差派到世間ê拯救者(參考以賽亞書十一:1、11)。

第24到32節,描述耶穌因為受tio̍h群眾o-ló,mā有人認為耶穌可能就是in等待甚久ê「大衛ê kiáⁿ」,tùi án-ne引起當時猶太人社會有影響力ê法利賽人非常不滿。In想tio̍h beh消滅群眾對耶穌ê期待,á kā耶穌形容是hō͘鬼王別西卜附身ê。意思是teh指耶穌身上ê能力並m̄是tùi上帝來,卻是hō͘鬼附身,而且hō͘鬼王所附身,chiah有能力趕走真chē鬼。

第25到26節,耶穌講一個簡短ê譬喻。Tī chit-ê chìn前,作者先講耶穌知影chiah-ê法利賽人心中teh想甚麼,福音書作者用chit種筆法是teh隱喻:耶穌kah上帝仝款,ē-tàng知影人內心ê意念(參考撒母耳記上十六:7,耶利米書十七:10)。

耶穌譬喻是用法利賽人用「鬼王」chit位號,耶穌回應是:如果此言當真,án-ne,鬼mā有它ê國度ê組織系統。鬼王必定會為tio̍h維護組織ê秩序,bē家己先破壞組織。

第27節,chit節看tio̍h法利賽人ê子弟mā趕鬼。如果in mā教導子弟趕鬼,án-ne,in ê能力豈m̄是比鬼王iáu koh khah大。M̄-koh耶穌趕鬼並無親像法利賽人需要念類似用咒語ê方式,伊kan-taⁿ用簡單一句話就ē-tàng kā鬼趕離人ê身上,mā因為án-ne chiah hō͘當時ê猶太人tio̍h驚kah gāng去(參考馬可福音一:23—28)。因為上帝ê靈kah耶穌同在,mā藉tio̍h chit種方式hō͘民眾看見上帝來到人間(第28 節)。

第29節,chia用「武士」teh代表鬼,「財物」表示鬼所控制ê對象。

第30節,信仰無所謂中間、phú色地帶,he是性命ê選擇,一定tio̍h明確。

第31到32節,褻瀆聖靈,是teh指明明知影實況,卻故意用污辱ê方式表示。耶穌指責法利賽人明明知影伊ê氣力是tùi上帝來ê靈,m̄-koh chiah-ê法利賽人卻故意講耶穌是hō͘鬼王別西卜附身,這是污穢聖靈ê神聖,是bē-tàng原諒ê罪過。







經文:

馬太福音 12:33-12:37

註釋:

耶穌用當時流行ê俗語,清楚地表達出善kah惡之間ê差別,伊指出法利賽人tī信仰上ê基本認知有問題,chiah會án-ne。

第34節thang比較馬太福音第三章7節,行洗禮約翰bat稱呼hiah-ê想beh接受伊洗禮ê法利賽人kah撒都該人為「毒蛇」。蛇,tī創世記第三章1節被當做是siōng狡猾ê受造物,mā是誘惑人犯罪ê氣力。毒蛇,則表示koh khah厲害。

第35節thang對照第33節看。一個人是m̄是善良,thang tùi伊外在ê行為舉止看出來。因為外在行為kah內心ê意念相配合。

第36到37節,講話mā會列入審判ê證據。換句話講話不誠實,mā等於是害人,甚至會誘惑人棄sak上帝。Tī審判ê日子來臨ê時,大家lóng beh向上帝交帳,而且會赤the̍h-the̍h呈現tī上帝面前,無任何thang隱藏ê空間(參考希伯來書四:13)。


經文:

馬太福音 12:38-12:42

註釋:

猶太人一向就是ài看神跡(參考哥林多前書一:22),因為án-ne,雖然耶穌tī迦百農城行了真chē神跡奇事,甚至包括hō͘死人koh活、癩ko病得醫等,m̄-koh in iáu是向耶穌要求看神跡。每pái耶穌行了神跡奇事了後,in lóng會讚賞、驚kah gāng去。M̄-koh發出驚嘆聲了後,心底iáu是m̄相信。Tī第十一章16節,耶穌真感嘆地問講:ài the̍h甚麼譬喻chit-ê世代?伊講伊ê世代對伊傳講ê天國信息並無反應。chit-má伊進一步講,伊ê世代根本就無甚麼神跡thang看,因為人ê心若是對上帝不忠實,即使有神跡hō͘ in看見,mā是枉然,因為in iáu是bē相信。

經學教師kah法利賽人,chit兩種人lóng是當時猶太社會菁英ê領導階層。In來要求耶穌顯現神跡hō͘ in看,並m̄是心存好意,這mā是為甚麼耶穌ê回應是「這時代ê人jōa-ni̍h-á邪惡、jōa-ni̍h-á不忠」ê原因。In是表面上想beh看神跡,內心是想beh chhōe碴好陷害耶穌。

第39節,chia所講ê「不忠」,意思是teh指人ê心中無kā創造ê獨一上帝看做是唯一ê上帝。中文《和合本》用「邪惡淫亂ê世代」,就是teh指tio̍h人ê心中有其它ê上帝ê意思。猶太人tùi祖先傳承落來ê觀念:上帝是以色列民族ê丈夫,in是上帝ê bó͘,是有夫妻之間ê關係(參考以西結書十六:8,耶利米書三十一:32,何西阿書二:19—20,以賽亞書六十二:4—5)。因為án-ne,chia ài beh表達ê意思是:當時猶太人對上帝並m̄是忠實,ná親像bó͘對丈夫無夠忠實仝款。Chiah-ê宗教領袖是表面上看起來虔誠,其實內心並m̄是ná親像外表hit種,只是虛假ê外表而已。

Tī chit段經文內底,耶穌特別指出約拿 ê記事來譬喻,約拿 ê神跡是猶太人人人知ê故事,就是記載人tùi犯罪到悔改。尼尼微城ê人民是外邦人,m̄-koh in聽tio̍h上帝ê信息,就趕緊悔改認罪、歸正了,上帝因為án-ne赦免in。M̄-koh猶太人是上帝ê選民,而且一再親目看見神跡,親耳聽見耶穌傳達天國信息,in卻iáu硬心m̄相信。

「人子也tio̍h在地ê深處三工三暝」,耶穌用chit句話來隱喻伊teh beh受難死tī十字架頂,m̄-koh三工後會koh活。Ná親像約拿被大魚吞入腹肚中三工,結果出來後hō͘外邦ê尼尼微城人因聽信福音來悔改得救。耶穌chit種譬喻已經teh kā chiah-ê宗教領袖講,除非in悔改,若無上帝拯救ê信息,會傳到外邦人中間去。

第42節是用對比ê方式來形容,南方ê女王是teh指示巴女王,伊為tio̍h beh親目見識所羅門王ê智慧,無惜千里跋涉(參考列王紀上十:1—10)來訪問。chit-má有一位比所羅門王koh khah有智慧者出現tī猶太人ê目chiu前,in卻是拒絕注意聽。



經文:

馬太福音 12:43-12:45

註釋:

Chit段經文用邪靈koh一pái tńg來寄居tī chit-ê時代ê人ê身上,tú好回應了前一段法利賽人kah經學教師一再teh走chhōe神跡ê心態上。值得注意ê,是chia用「帶tńg來七個比伊koh khah邪惡ê靈來」,chia ê「七」,表示koh khah chē、koh khah大、koh khah厲害。換句話講,人心ê墮落是jú來jú嚴重à。

經文:

馬太福音 12:46-12:50

註釋:

「甚麼人是我ê老母?甚麼人是我ê兄弟?」有人認為耶穌講出chit種話真奇怪,其實,如果咱認真思考chit段經文,應該不難看tio̍h這基督教信仰精華ê所在。人kah人ê關係,若是限定tī血緣ê關係上,hit種ê世界kah社會是真狹隘ê。其實,種族ê衝突常常是tùi血緣關係ê擴大á產生ê,歷史上兄弟拚房ê例俯拾to̍h是。kā chit段話用來比較路加福音第十章25到37節,耶穌所講好ê「撒馬利亞人」譬喻,就會清楚其中奧秘à。

耶穌強調「實行天父ê旨意」,就有親密ê親屬關係,有ná一家人一般ê親密。天父上帝ê旨意,就是teh指上帝ê疼。有愛ê所在,人kah人ê關係會phah破文化、歷史、地理、習俗等等ê限制。


經文:

馬太福音 13:1-13:9

註釋:

馬太福音第十三章是非常出名ê一章,總共記載耶穌所講ê七個天國譬喻。Mā是馬太福音耶穌言論集ê第二段。Tī chit七個譬喻中有兩個譬喻是經過解釋ê,包括掖種籽ê譬喻,以及掖稗á ê譬喻。

第1到2節,有「一大陣人」來到耶穌腳前,in lóng想beh聽耶穌講天國ê信息,m̄-koh必定mā有人是想beh來走chhōe耶穌ê醫。為tio̍h beh hō͘大家lóng ē-tàng看見伊,伊hō͘群眾khiā-tī岸邊ê草地上,伊搭上船,向(ǹg)岸邊ê群眾傳講上帝國度ê信息。

第3到8節,猶太人ê田是旱田,掖種時通常會kā種籽khǹg tī袋子裡,然後kā袋子khǹg tī驢ê尻川斗兩pêng,tī袋á底ê角頭剪孔,án-ne趕驢上田去掖種ê時,種籽就會跟tòe驢行路搖一下搖一下掖出來,不過,chit種方式掖出來ê種籽bē真規則,時常會ka-la̍uh tī「路邊」,所講ê「路邊」就是類似台灣水田中ê田岸。

第二種是掖tī「淺土ê石頭á地上」,這是kah巴勒斯坦ê地質有關,當地石頭真chē。In平時真少整地撿石頭,tī第七年安息年休耕過了後chiah整地。淺土ê石頭á土地,根真oh深入土地。

第三種是掖tī「刺phè」中,這是teh指草叢ê意思。猶太人平時mā真少有除草ê習慣,chiah-ê草長大就是chia所講ê刺phè。通常mā仝款是tī第七年安息年過了後,beh重新掖種ê時,chiah會進行除草ê農務。因為án-ne,chiah-ê刺phè草叢會影響tio̍h掖tī其蔭下ê種籽成長。

第四種是掖tī「好土」ê種籽,chiah-ê種籽會成長kah非常chán。Siōng koân ē-tàng達tio̍h「一百倍」。M̄-koh好ê土需要排除刺phè、石頭。換句話講,好ê土是需要用時間去整理,mā就是施肥整地。

Tī猶太人觀念中:五á是十ê倍數lóng是真好ê。這是因為in看上帝造人ê時,一隻手有五根chéng頭á,兩隻手有十隻chéng頭á,因為án-ne六十倍、á是三十倍lóng是真好ê收成,á一百倍意思就是代表siōng完美ê狀態。



經文:

馬太福音 13:10-13:17

註釋:

耶穌講譬喻應該是beh hō͘ 大家明白ê,m̄是故意beh隱藏甚麼。門徒卻因為聽m̄-bat就來問耶穌,chit種情形發生過幾nā pái,親像第十五章15節,in mā是請耶穌解釋譬喻ê意思。

「譬喻」是teh指「故事」、「證明」、「說明」ê意思。

「天國ê奧秘」,這是有關上帝主權ê事,chit種主權就是審判kah拯救ê工作。奧秘是只有tī上帝啟示之下,人才ē-tàng了解。使徒保羅講,上帝透過耶穌已經向聽從伊ê人顯明chit-ê奧秘ā(參考歌羅西書一:26)。Tī chia耶穌對門徒講,chit-ê上帝主權ê奧秘已經啟示hō͘門徒à。

第12節,表示門徒接受chit款天國ê信息kan-taⁿ會jú來jú chē,因為in一直緊跟tòe耶穌ê身邊,聽伊傳講天國ê信息。M̄-koh相對ê,是hiah-ê拒絕聽從ê人,到最後會喪失所有ê一切。

第13節說明耶穌用譬喻教導民眾,原本ê用意是beh hō͘ in一聽就明白,而且願意繼續聽從。M̄-koh hiah-ê心硬ê人,就算聽mā無用,即使親目看見mā bē相信。對chiah-ê人只有ē-tàng等待上帝ê審判。

第14到15節是引用以賽亞書第六章9到10節beh表示ê:人根本無想beh聽天國ê信息,即使是聽mā放hòng-hòng,chiah會變成chit種結果。

第16到17節,成做耶穌ê門徒siōng大ê榮幸,就是親目看見,mā親耳聽見天國ê信息,koh khah重要ê,就是上帝ê kiáⁿ耶穌親自啟示in明白天國ê信息。古早時ê先知連chit種機會都無。



經文:

馬太福音 13:18-13:23

註釋:

Chit段經文是teh解釋第3到9節ê譬喻。其實thang án-ne了解:耶穌所講ê譬喻本身,就已經真清楚了,伊會用譬喻ê主要目的,就是beh hō͘人一聽就明白,á ē-tàng趕緊接受天國福音ê信息。為甚麼需要解釋,可能是當福音傳到外邦去後,因為外邦地區有kóa環境kah巴勒斯坦境內ê情況無仝。因為án-ne,雖然是簡單ê掖種譬喻,卻有kā它解釋ê必要。

Koh講,mā tùi chit段解釋經文中看tio̍h早期教會ê信徒,有kóa人雖然傳承信仰,卻無好好á耕耘,kā信仰當做一種生活點綴,無認真追求。Mā因為án-ne,信仰ê根基真脆弱,容易受tio̍h誘惑。M̄-koh有kóa信徒卻非常堅定,就ná親像掖tī肥土地上ê種籽仝款,生長kah非常好。


經文:

馬太福音 13:24-13:30

註釋:

Chit段天國ê譬喻只有馬太福音有保存落來。

基本上,天國ê信息ná親像「好ê種籽」。因為天國就是上帝拯救ê信息,lóng是siōng好ê。kā chit種siōng好ê種籽「掖tī田裡」,真自然會期待有好ê收成。

第25節講tio̍h當田裡ê主人teh「睏ê時chūn」,表示無法度預防ê情況下。敵人來進行破壞,是kā「稗á」掖tī麥á中間。「稗á」是一種有毒ê草本植物,樣式kah麥á真類似,如果m̄是相當內行ê人是分辨bē出來ê。Koh講,chit種植物如果kah麥á掖做伙,它ê根會kah麥á ê根糾結做伙,因為án-ne就算是行家發見稗á時mā bē去馬上拔除它,因為會傷tio̍h麥á ê根。

第26到27節,奴僕因為是teh睏,所以m̄知甚麼人做chit件破壞ê事。不過主人真清楚會來破壞麥田ê人,就是「敵人」。

第28到29節,奴僕問主人是m̄是beh kā稗á除掉?主人認為tio̍h過一kóa時間koh再處理。因為chit-má麥á kah稗á ê根部是纏連做伙,若是kā稗á拔除,恐驚mā傷害到麥á。

第30節,「收割ê時chūn」,這就是時機成熟時刻來到,自然就beh kā兩種lóng同齊收割,kā稗á除掉,kā麥á收起來。




經文:

馬太福音 13:31-13:32

註釋:

「芥菜種」,chit種芥菜tī巴勒斯坦地方真普遍,尤其是tī約旦河邊真chē。Chit種芥菜長大起來約有十五尺高,m̄-koh種籽卻是非常細粒。這是一種強烈對比ê譬喻方式,講hit種細小ê種籽卻會發出hiah-ni̍h koân ê植物(chia用「它成做一叢樹」),表示無法度想像會tio̍h,而且iáu ē-tàng hō͘真chē小鳥來做窩。表示天國ê氣力大大超過人ē-tàng想像會tio̍h ê。

經文:

馬太福音 13:33-13:43

註釋:

「麵酵」,是一種發了酵ê麵團,卻thang用來當做新麵ê酵母。Kah芥菜種仝款,小小ê種籽卻ē-tàng長大成樹。麵團mā是án-ne,只要一點點麵酵就ē-tàng hō͘四十公升ê麵團發了起來。表示其中蘊含ê氣力是大大超過人ê想像kah估計。

Chit段經文teh解釋第24到30節有關稗á ê譬喻。解釋ê方式,就是kā「敵人」譬喻成魔鬼,是專門tehteh誘惑人棄sak上帝ê氣力。最後ê審判會kā它棄sak tī「火裡燒」。聖經ài用「火」來形容審判ê工作。

Tī火爐裡「哀哭,咬牙切齒」,表示tī火爐裡並m̄是死亡,卻是受痛苦ê刑罰。相對ê是「義人」tī上帝審判中,卻會看見性命ê亮光。Chia ê「義人」是teh指聽從福音信息ê人。


經文:

馬太福音 13:44-13:46

註釋:

Chit-ê譬喻mā是馬太福音特有ê資料。

古代中東地帶有人ài kā財寶埋tī土腳(參考馬太福音廿五:25),án-ne ē-tàng防止盜賊、土匪來搶劫。譬喻說明當人發見天國ê奧秘,就kah-ná發見寶貝仝款,寧可付出koh khah chē ê代價來換天國ê奧秘,就ná親像人發見一塊藏有財寶ê土地,mā會想出所有ê辦法買hit塊土地。

Chit段譬喻mā是馬太福音特有ê資料。

「貴重ê珍珠」,kah第44節所講埋有財寶ê土地是內容仝款ê譬喻。

經文:

馬太福音 13:47-13:50

註釋:

Chit-ê譬喻mā是馬太福音特有ê資料。

Ná親像頭前第二個譬喻中ê麥á kah稗á,天國是beh區分好ê,kah pháiⁿ ê。

「Tùi好人中kā pháiⁿ人分別出來」,表示tī當今ê世界中,pháiⁿ人lóng是深藏tī好人中間,hō͘人無容易發覺。M̄-koh當審判ê日子來臨ê時,pháiⁿ人一定會hō͘發見,並且分別出來。Pháiⁿ人kah稗á仝款,tio̍h tàn入去火爐裡燒毀。

經文:

馬太福音 13:51-13:52

註釋:

Chit兩節是頂面所講天國譬喻ê總結。Hō͘耶穌感覺欣慰ê是眾門徒lóng表示了解伊所講ê譬喻。

由頂面所講天國譬喻中,thang看見一個重要ê信息:有終末ê審判。而且當上帝進行審判ê時,「好」kah「pháiⁿ」會分得非常清楚,而且一定真嚴厲懲罰「pháiⁿ」ê部分。

Tùi「庫房裡搬出新kah舊ê物件來」,表示真正屬tī天國子民ê人,無論是過去ê,á是新ê,耶穌lóng會hō͘ in新ê意義。

經文:

馬太福音 13:53-13:58

註釋:

為甚麼拿撒勒ê人會m̄相信耶穌?真有可能是受tio̍h耶穌出身ê家庭背景所影響!tio̍h注意,上帝tī拯救ê工作上,是超越人間chit種榮華富貴ê背景。

Chia列出了耶穌厝裡ê兄弟名單,後來chit位雅各(m̄是門徒)tī早期教會中扮演相當有影響力ê角色(參考使徒行傳十五:12—21,加拉太書二:12)。


經文:

馬太福音 14:1-14:12

註釋:

行洗禮約翰ê死,kah伊「Tiāⁿ-tiāⁿ指責希律」王犯淫亂罪有關,因為in bó͘ iáu tī-.teh ê時chūn,竟然去娶小弟腓力ê bó͘希羅底做bó͘。希羅底比希律koh khah恨行洗禮約翰,因為án-ne,伊利用希律生日宴會,設計cha-bó͘-kiáⁿ跳舞,得tio̍h希律王ê報賞,結果因為án-ne要求希律殺害行洗禮約翰。M̄-koh希律王並無因為án-ne心安,卻是擔心行洗禮約翰已經koh活(參考馬可福音六:16)。




經文:

馬太福音 14:13-14:21

註釋:

第13到14節,耶穌ê名聲早to̍h傳遍加利利各鄉鎮,因為án-ne,無論耶穌行到toh位,lóng是有一大陣民眾tùi各地蜂擁來chhōe伊,跟tòe伊,想beh聽伊傳講上帝國度ê信息。耶穌看見in中間有破病ê人,伊就生出憐憫ê心,醫好in。有時耶穌看tio̍h群眾渴望聽tio̍h天國信息,mā是仝款生出「惻隱ê心」(參考馬太福音九:36)。

五餅二魚ê神跡,是唯一Tī四本福音書中lóng有記載ê一件神跡。

以色列人民計算人口ê標準是只有算cha-po͘人,而且是beh年滿二十歲以上ê cha-po͘人才算(參考出埃及記三十八:26)。Chit-pái享受耶穌用五餅二魚食到飽ê總人數,一定大大超過五千人,因為tī第21節特別強調講「除了婦女kah gín-á,約有五千」。M̄-nā án-ne,而且是有chhun落來ê碎屑「裝滿了十二個籃子」。Chit種籃子是猶太人外出時隨身帶ê。

經文:

馬太福音 14:22-14:33

註釋:

耶穌「家己上山去祈禱」,伊不時離開眾人去向上帝祈禱。伊並無帶門徒同齊去,卻是ài in先上船過湖到對岸。

這mā是耶穌第二pái tī加利利湖tú-tio̍h大風引起湖面ê水波浪顛簸ê記事,照約翰福音第六章18節ê資料,hit時mā是「狂風大作,浪濤翻騰」,第一pái是伊kah門徒同船(參考馬太福音八:25)。Chit-pái耶穌無搭船,是門徒先坐船過湖,船行真慢,耶穌卻是用行走tī水面ê方式jiok-tio̍h門徒。因為是暗時,伊ê門徒看bē清楚是耶穌soahtio̍h驚kah gāng去,認為是看見鬼魂。馬太福音作者ê chit種筆法,mā是teh說明門徒對耶穌ê認bat無chē,in bē記得耶穌有能力行各式各種ê神跡。

馬太福音siōng特別ê所在,是tī第28到31節記載彼得mā想學耶穌行走tī水面,耶穌應允hō͘伊有chit種力量,結果伊「一看見風勢猛烈,心內驚惶」,就「開始沉落去」,伊大聲叫耶穌救伊。耶穌講伊「信心siuⁿ過細」。這kah第八章23到27節所記載ê情節類似。



經文:

馬太福音 14:34-14:36

註釋:

短短兩節,強調耶穌身上充滿tio̍h特別能力,只要有人摸tio̍h伊ê衫á裾ê鬚,所有ê病lóng ē-tàng得tio̍h醫。Chìn前一位患tio̍h十二年血漏病ê cha-bó͘人就是一個見證(參考八:20—21、十二:15)。

經文:

馬太福音 15:1-15:20

註釋:

Tī耶穌ê教導中,伊對tāi-chì ê看法kah工作ê態度,引起眾猶太人領袖極大不滿,伊醫病ê方式mā hō͘人認為有褻瀆上帝之嫌(參考九:3),in認為耶穌本身是一個教師,怎樣ē-tàng無教導門徒學習禁食,特別是tī安息日ê誡命上,竟然敢公然違背律法,做出這夠額致使判處死刑ê行為(參考出埃及記三十一:14),m̄-koh耶穌用強koh有力ê回應阻擋in ê質疑,因為án-ne,in開始計畫beh殺害耶穌。

猶太人流傳落來飯前洗手ê規定,原本是tùi祭司上祭壇獻祭前一定tio̍h有動作,表示in ê雙手是潔淨ê。M̄-koh經過一段時間,chit種傳統附加了真chē新ê禮儀、動作,chit-má是擴大到所有ê人飯前lóng tio̍h洗手。耶穌ê門徒並無照chit種規矩,因為án-ne,chiah-ê宗教領袖來質問耶穌為甚麼無照傳統ê規定。

耶穌回應ê方式是用十誡中ê律法規定,人人lóng tio̍h孝敬父母,m̄-koh,後來chiah-ê經學教師kah法利賽人教導民眾講,beh獻hō͘上帝ê禮物,比照顧父母生活上ê所需koh khah重要,因有人kā原本beh hō͘父母ê生活物件the̍h去獻祭,照律法規定獻祭物件又ài分出一部分供養祭司。耶穌tī-chia用以賽亞書第廿九章13節做回應,認為in表面上看起來是敬拜上帝,內心並m̄是真正親像án-ne。仝款,in只是表面遵行祖先傳統,內心並m̄是真正án-ne。

Chit段經文是針對法利賽人聽耶穌tī前一段回應猶太宗教領袖指責祂ê門徒食飯前無洗手ê事,感覺相當「不服」,tī chit段經文耶穌進一步解釋,並且強調講人內心ê意念,chiah是真正影響一個人是m̄是潔淨,m̄是tùi外表是m̄是潔淨來判斷。

第13節是簡單ê譬喻。「天父所栽種ê植物」,這是teh指以色列人民是上帝所栽種ê葡萄樹(參考詩篇八十:8,以賽亞書五:1—7、六十:21、六十一:3),m̄-koh若是無結出好ê果子,就會hō͘連根拔起。耶穌用chit種方式teh強調:上帝栽種ê是人,m̄是栽種律法、規矩。

第14節是另外一個譬喻。「chheⁿ-mê」,等於失去目睭ê人,chit種人無可能引chhōa人行正確ê路。耶穌án-ne講,已經teh暗喻chiah-ê猶太人宗教領袖有ná chheⁿ-mê-.ê,聽從in chit種引chhōa,bē有穩健ê腳步。

彼得來問chit兩個譬喻ê意思,kah馬太福音第十三章10節門徒來問譬喻ê意思仝款。第16到20節是耶穌進一步解釋第11節ê譬喻。耶穌清楚指出,內心ê惡念chiah是hō͘人無清氣ê主要因素,kah有洗手á無一點á關係mā無。





經文:

馬太福音 15:21-15:28

註釋:

泰爾kah西頓是外邦人khiā起ê城鎮,設tī加利利湖西北方,mā是一個商業港口城市。這mā是比較oh得理解ê一段經文,因為tī耶穌從來m̄-bat拒絕求救tī伊ê人,chit種行為kah耶穌過去hō͘人ê認bat不相符。

第23到24節chit兩節是馬太福音特有ê資料。Chit兩節mā反應出早期教會ê情況,就是外邦人加入教會,受tio̍h猶太人基督徒強烈ê反對。

第25節chit位迦南ê女人是屬tī外邦人,伊會稱呼耶穌為「主ah,大衛ê kiáⁿ」所表示ê意義就真特別,因為chit句話表示伊承認耶穌是救主,是彌賽亞。如果一個外邦ê女子會認bat耶穌是救主,án-ne,猶太人kiám無應該koh khah認bat耶穌!

第26節是一句流行tī當時猶太人社會ê諺語,mā講出當時ê加利利人kah地中海沿岸地區外邦人之間ê關係緊張,是因為加利利人不時看見in生產ê糧食被運往泰爾kah西頓去供應當地ê需要,m̄-koh身為產地ê加利利卻不時有缺乏、不足ê狀況(參考使徒行傳十二:20)。

第27到28節講出這外邦女人對耶穌ê信心,tú好kah跟tòe耶穌ê門徒成強烈ê對比,門徒常被耶穌講是信心不足(參考六:30、八:26、十四:31、十六:8、十七:20)。
經文:

馬太福音 15:29-15:31

註釋:

Chit種概述ê經文tī馬太福音第四章23到24節、第八章16節mā出現過。

Chit段話ê背景若參考舊約以賽亞書第廿九章18到19節ê經文,就會清楚馬太福音作者ê用心,伊就是beh hō͘猶太人知影耶穌乃是舊約先知所預言ê彌賽亞。

Tio̍h注意ê是tùi第31節chit句「o-ló以色列ê上帝」,講出耶穌「到加利利湖邊」,並m̄是到猶太人khiā起ê社區,卻是外邦人khiā起ê鄉鎮,tú好反應前一段chit位迦南女子對耶穌有信心ê反應。表示耶穌所行ê神蹟,tī外邦人看起來mā lóng會不由得稱頌上帝ê恩典。
經文:

馬太福音 15:32-15:39

註釋:

這是另外一件神蹟(參考十六:9—10)。請注意,猶太人對「七」ê數字觀念是含有「完整」、「圓滿」ê意思。Koh講,chia所講ê chhun落來ê籃子,是一種大型ê籃子,是kah使徒行傳第九章25節所用ê「大籃子」仝款,m̄-koh kah第十四章20節剩餘ê十二個小籃子無仝款,he是一般猶太人外出時tòe身攜帶ê籃子。Mā是仝款「除了婦女kah gín-á,有四千人」食飽,表示超過四千人食飽。Á這「四」數字,隱喻tio̍h包含了世上所有ê人。這mā反應了前段所敘述ê,外邦人mā會得tio̍h耶穌hō͘ in ê福音信息。
經文:

馬太福音 16:1-16:4

註釋:

這是馬太福音第二pái記載猶太人領袖來要求耶穌顯示神跡hō͘ in看,第一pái是tī第十二章38到42節。

「撒都該人」乃是猶太人ê一種宗教領導階級,tùi in延伸出來ê,就是祭司。In m̄是無看過耶穌行神跡,「法利賽人」iáu bat因為看見耶穌行神跡,á冤枉耶穌是óa靠鬼王ê氣力趕鬼(參考馬太福音十二:24)。耶穌當然清楚知影in ê計謀,指責in既然會曉觀察氣候ê變化,mā應該會明白「時代ê兆頭」。這兆頭是teh指耶穌所行各種神跡奇事,kah伊所傳天國信息帶來ê新意義。因為án-ne,耶穌進一步講當時是一個「邪惡、淫亂」ê時代,chit兩個詞lóng teh表示in對上帝無夠忠實,án-ne當然無法度看見神跡。


經文:

馬太福音 16:5-16:12

註釋:

耶穌形容法利賽人kah撒都該人是「酵母」,這是真嚴厲ê評語。因為酵母,是teh指一種已經敗壞 ê物件。耶穌用酵母比擬chit兩種人,表示in真虛假,只是外表好看,內面空洞、不實在,甚至是已經發酸敗壞 ê。

第8到10節,耶穌對tī門徒煩惱bē記得帶餅ê事,講in是「信心siuⁿ過細」,因為in lóng bat看見耶穌用「五塊餅二尾魚」分hō͘超過五千人食飽,而且後來koh bat用「七個餅」hō͘四千餘人食飽,tī chit-ê兩則神跡中m̄-nā人人食飽,而且lóng有chhun。

第11到12節,耶穌ài門徒mài學習頂面所講chit兩種猶太人領袖,kan-taⁿ會看tio̍h外表,á是重視外表之物,卻bē記得tī chiah-ê神跡ê背後所表明ê意義。


經文:

馬太福音 16:13-16:20

註釋:

Chit段經文對基督教會歷史有真大ê影響。

「該撒利亞‧腓立比」這城,是希律腓力王為tio̍h beh感念羅馬皇帝á建造ê城。Tī chia耶穌問祂ê門徒兩個問題:一是一般人講祂是甚麼人?另外一個是ài門徒講in認為祂是甚麼人?

第14節是猶太人民間teh議論ê耶穌,包括一是「行洗禮約翰」,m̄-koh伊已經被希律王安提帕王殺死去。第二是「以利亞」,伊是舊約聖經中hō͘人認為偉大ê先知,無死,hō͘ 上帝接tńg去天頂。第三是「耶利米」,伊mā是以色列人民認為偉大ê先知之一,m̄-koh從來m̄-bat有人提起伊kah彌賽亞ê預言有關。四是「先知中ê一位」,這是kah申命記第十八章15 kah 18節摩西ê預言有關,會有一位新ê先知來臨。

第15節,耶穌問門徒in對伊ê認bat。彼得回答:「你是基督,是永遠活ê上帝ê Kiáⁿ。」chia「永遠活ê上帝」,表示創造萬物ê上帝chiah是永恆ê。

第17到20節,chit段耶穌所講是馬太福音書特有ê資料,影響教會歷史甚巨。
第17節,耶穌認為彼得是「有福」ê人,意指伊比別人koh khah有福氣,因為伊得tio̍htùi天父來ê「啟示」ê真理。

第18到19節,chit段經文是羅馬天主教會siōng看重ê經文,in自認是tùi彼得傳承來ê,而且得tio̍h「天國ê鎖匙」。有真長ê一段時間,羅馬天主教會強調:人若想beh得救,就一定tio̍h透過in教會。宗教改革後kā chit種看法改正過來,認為得救乃是上帝絕對ê恩典,是上帝ê主權,m̄是由人決定ê。

Koh講,chia ê「教會」,只有tī馬太福音出現,另外一處tī第十八章17節。「彼得,是石磐」,這是亞蘭語,發音是「磯法」(參考約翰福音一:42)。Chia講教會tio̍h建造tī「石磐頂」,是teh指教會beh建立ê基礎就是第16節彼得所宣告ê耶穌「是基督,是永遠活ê上帝ê Kiáⁿ」chit-ê信仰告白。

第20節,耶穌禁止祂ê門徒kā chit件宣告祂是基督ê事kā任何人講,因為若公開宣告,必定會受tio̍h猶太宗教眾領袖ê刁難,反tńg會影響福音事工ê宣揚。


經文:

馬太福音 16:21-16:28

註釋:

這是馬太福音第一pái記載耶穌預言受難ê記事。

「長老、祭司長,kah經學教師」,chit三股力量組成猶太人siōng koân議會「三和林」(Sanhedrin)。耶穌提醒門徒祂會tī chit-ê siōng koân議會ê權勢之下受難,m̄-koh,「第三工會koh活」。

「koh活」就是超越死亡ê意思。
值得注意ê是:耶穌嚴詞指責彼得想beh阻止祂ê動作,講彼得ê動作是「撒旦」,是「絆腳石」,「是人ê想法」。Kah伊原本宣告耶穌是「基督,是永遠活ê上帝ê Kiáⁿ」á被耶穌讚賞,完全顛倒。

第24到28節,耶穌ài門徒好好á想看為甚麼beh跟tòe祂。Koh講,chia祂強調beh跟tòe祂,就一定tio̍h giâ起家己ê「十字架」來跟tòe,á「十字架」表示ê意義就是苦難。耶穌ài跟tòe祂ê門徒好好á深思chit件事。若是感覺家己無法度承受十字架ê苦難,tī iáu未到耶路撒冷chìn前,後悔iáu會赴。

早期教會ê時代,若公開宣告是耶穌ê信徒,就會面臨受掠入獄,甚至送入競技場受死ê威脅。


經文:

馬太福音 17:1-17:13

註釋:

Chit段耶穌帶彼得、雅各kah約翰等三人上山去祈禱(參考路加福音九:28)。

第2節描述耶穌變形像,包括「面貌像日頭仝款明亮,衫褲mā像光仝款潔白」,chiah-ê用詞lóng teh表明性命ê記號。

第3節,chia出現「摩西kah以利亞」。「摩西」是teh代表律法,á「先知」是teh代表上帝ê話。Chit兩個詞連做伙teh代表舊約聖經ê意思。Chia用「以利亞」,teh代表先知。Á根據瑪拉基書第四章5節ê記載,若是先知以利亞出現,表示上帝審判ê大日子to̍h是teh beh來臨,mā就是基督(彌賽亞)拯救日子來到ê時chūn。

第4節,「帳棚」,這是teh指以色列人出埃及tī曠野漂流時代khiā起ê帳棚。表明上帝kah以色列人民同在ê意思(參考利未記廿三:43,掖母耳記下七:6)。

第5節,「雲彩罩tiâu」表明ê意思是上帝臨在。出埃及記kah民數記一再用chit種方式來說明上帝降臨tī以色列人民中間。雲中出現聲音對這三位門徒講話,ài beh門徒聽從上帝所揀選、所kah意ê kiáⁿ—耶穌。

耶穌ài in tī伊「tùi死裡koh活以前」,mài kā chit件事對kā任何人講,原因是若in宣告,kan-taⁿ會遇tio̍h猶太人領袖ê逼迫,bē有任何幫助。耶穌mā hō͘這三位門徒知影行洗禮約翰,就是teh代表先知以利亞,á耶穌就是猶太人期待真久ê拯救者—彌賽亞。



經文:

馬太福音 17:14-17:21

註釋:

Chit-ê gín-á患ê病是hō͘ 鬼附身致使患tio̍h「癲癇病」。第15節是gín-á ê老父描述伊gín-á ê病況。

第16節,耶穌bat賦予祂ê門徒有「驅逐邪靈kah醫各種病症ê權力」(參考馬太福音十:1),m̄-koh chit-má眾門徒卻「無法度醫好」chit-ê gín-á ê病。若是對照第20節來看,原來門徒chit-pái ê醫病失敗,是因為in無信心。有kóa古卷加上第21節講:「講到chit-ê種鬼,只有靠禁食、祈禱chiah趕得出去。」án-ne看起來,chiah-ê門徒真可能因為過去趕鬼lóng成功,就認為家己真有能力,á bē記得需要透過禁食祈禱,懇求上帝賞賜力量,結果chit-pái chiah會失敗。

第19到20節,chit兩節thang看出門徒mā bē了解為甚麼過去成功,chit-má卻失敗。In問耶穌所得tio̍h ê答案是in ê信心太小,連一粒細小ê「芥菜種籽」lóng khah輸。

經文:

馬太福音 17:22-17:23

註釋:

這是耶穌第二pái預言伊teh beh受難。

第22節所提起ê「人子」,tī馬太福音中耶穌siōng常用chit-ê詞來代表伊家己。這「人子」一詞,tī亞蘭文是teh指「人」á是「我」。耶穌用chit-ê詞來表示家己kah使命,這使命kah伊ê死kah koh活有關係。

第23節chia講門徒聽「非常憂愁」,是因為in bē明白。

經文:

馬太福音 17:24-17:27

註釋:

照摩西律法規定,每一個年滿二十歲以上ê cha-po͘人lóng tio̍h繳納聖殿稅(參考出埃及記三十:13—14),繳納ê稅額是兩個銀幣,這是當時兩工ê工資。

M̄-koh tī新約時代,猶太人規定凡hit年滿十三歲以上ê男子,就一定tio̍h負擔聖殿ê維護責任,繳交聖殿稅就是其中ê一項,á年滿二十歲ê男子iáu一定tio̍h擔起保護社稷安全ê義務。因為án-ne,繳聖殿稅ê規定tī耶穌時代是無論男女,tùi年滿十三歲就tio̍h繳納,而且直到死去chiah免繳,這kah本來ê律法規定已經有差別。

第25節,耶穌確實有依規定繳納聖殿稅。伊無特權,kah大家lóng仝款tio̍h繳納,祂mā tio̍h教彼得mài去冒犯chiah-ê掌控聖殿權威ê人,並m̄是因為驚,卻是無想beh被套上莫須有ê罪名。

經文:

馬太福音 18:1-18:5

註釋:

「Tī天國甚麼人siōng大?」這確實是一個真有意思ê問題。天國ê意思就是teh指上帝ê主權,á是講上帝teh管理。Tī án-ne ê所在,會想tio̍h甚麼人大甚麼人細ê問題,就是表明對上帝主權認bat有錯誤。

第2到4節,耶穌是用細漢gín-á做教材。祂kā門徒講「除非lín 回轉,變成親像細漢gín-á」,chit句話真清楚表明人tio̍h以純潔ê心歸向上帝,á是講以「謙卑」懺悔ê態度tńg來到上帝面前,chiah ē-tàng成做「天國ê子民」,chit種人chiah是「siōng大」ê人。

第5節,為tio̍h耶穌á接納一個hō͘人看輕ná親像gín-á hit種無地位、卑微ê人,就是接納耶穌;接納耶穌,就是接納上帝(參考馬可福音九:37)。

經文:

馬太福音 18:6-18:9

註釋:

Chit段經文續接前一段ê「細漢gín-á」,tī chia耶穌用「無tap-sap」,表示任何人tī上帝面前lóng是貴重ê性命,上帝絕對bē輕忽。兩個lóng是強調每一個性命ê得救,tī上帝看起來lóng是非常重要。相對ê,若是因為hō͘ hit-ê卑微如細漢gín-á ê人「棄sak」耶穌,he會是件真嚴重ê事。因為耶穌是上帝差派到世間ê拯救者。

第8到9節,是非常鮮明ê相對話句,用得tio̍h永恆性命做主軸來比較。如果人因為失去一隻手á是一隻腳á是一隻目睭,卻ē-tàng因為án-ne soah得tio̍h永恆性命,就應該tio̍h kā阻礙人得救ê氣力隔絕、棄sak。這是一種選擇,信仰就是性命ê選擇。

經文:

馬太福音 18:10-18:11

註釋:

Tùi第1節開始到第14節,lóng有一個共同主題就是「無tap-sap」ê人,tùi細漢gín-á到無tap-sap ê人。chit-má則強調tī人看起來siōng「無tap-sap ê人」ê身上,mā有天使teh替上帝看顧tio̍h。

猶太人深信tī每一個細漢gín-á ê身上lóng有一位天使teh守護。

有ê古卷加上第11節寫tio̍h:「因為人子來ê目的是beh拯救失喪ê人。」

經文:

馬太福音 18:12-18:14

註釋:

耶穌用「一百」比「一」,極大ê對比來形容「一」是屬tī「無tap-sap」。「一百隻羊」,基本上chiah-ni̍h大ê數目m̄是一個人ê財產,卻是一個社區共有ê。因為án-ne,bē只有一個人放牧,卻是kúi-nā位顧羊人同時看顧羊群。

第12節講顧羊人發見有一隻羊失迷tī「山野」,伊會「放下hit九十九隻」,去「chhōe hit隻失迷ê羊」,chit位去chhōe失迷之羊ê顧羊人,應該是siōng有經驗ê牧者。其他ê顧羊人照顧其餘九十九隻羊。

第13節,當chit位顧羊人chhōe-tio̍h失迷ê hit隻羊後,會真歡喜ê hō͘所有人知影。

經文:

馬太福音 18:15-18:17

註釋:

「得罪」ê另外一個意思,是teh指「犯罪」。耶穌教導門徒kah民眾,tī chit種情形下bē-tàng公開指責,tio̍h私底下勸勉。這thang hō͘親朋好友得tio̍h尊嚴á願意改過歸正。

第16節,若是有拒絕勸勉ê,就「請其他一兩個人同齊去」,原因是摩西律法規定做見證者,至少有兩人以上chiah ē-tàng成立(參考申命記十九:15)。

第17節koh一pái出現「教會」一詞,mā tùi第16節thang看出,早期教會內部mā出現糾紛,需要有公正者來裁判,好維護教會ê秩序。

經文:

馬太福音 18:18-18:20

註釋:

第18節chi̍t句tī第十六章19節已經有出現過。chit-má是針對第17節所提起ê教會講ê,mā看出當時ê教會已經擁有真大ê權柄。

第19節提起「兩個人」,ná親像第16節所提起ê共同見證ê意思,是同齊「同心合意」,chit-ê詞thang參考使徒行傳第二章46節、第四章32節等等,lóng teh說明一個重要ê基本觀念:用真實ê心靈敬拜上帝,就算人真少,上帝mā bē輕忽,因為tī上帝眼中,重要ê m̄是tī數字ê chē少,是tī心靈ê真誠(參考約翰福音四:24)。



經文:

馬太福音 18:21-18:35

註釋:

猶太人對「七」ê觀念真特別,認為有神聖、完美ê意思。當耶穌講beh赦免人「七十個七pái」ê時chūn,表達ê意思是:這是一門永無止境ê信仰功課。

第23到34節是一則「天國」ê譬喻。

第23節「結賬」chit-ê詞,表示天國是有審判ê。Á「君王」就是teh指上帝,因為天國就是用上帝做中心。

「債務」表示虧欠上帝ê疼。上帝有「寬容」ê心,hō͘人thang「免了」所欠ê債。M̄-koh上帝chit種「寬容」kah「免了」ê舉動,lóng因為祂ê「慈心」。上帝mā希望所有ê人學習祂chit種慈愛ê樣式(參考路加福音六:36)。

第28到30節,chit-ê欠君王債務真chē ê人,竟然無學tio̍h君王對伊寬厚、仁慈ê心,伊用惡質ê手段對待欠伊債務、而且仝款是「奴僕」ê「伙伴」,m̄-nā無「寬容」伊,koh kā伊關tī「監獄」中。

第31節講有人會向上帝報告chit種冤屈、不公平ê待遇。Á上帝是一個公義ê審判者,祂一定會以祂ê標準kah條件來量每一個人。

第32到34節講出上帝重新審判chit-ê欠債koh khah chē(mā是得tio̍h koh khah chē恩典ê人)ê人,kā伊關入監獄中,無koh寬容伊。

第35節,chit節經文thang參考路加福音第六章37到38節。「tùi心內赦免」,表示真心誠意ê態度。

經文:

馬太福音 19:1-19:2

註釋:

「耶穌講soah了後chiah-」,這是馬太福音作者tī每篇言論集結束後,必定用chit句話來表明(參考七:28、十一:1、十三:53)。

「離開加利利,tńg來約旦河對岸ê猶太地區」,chit句話說明兩種情形:一是chia「tńg來」一字真關鍵,表示耶穌mā bat tī猶太地區真chē pái,chit點tī約翰福音記載真清楚,m̄-koh tī馬太福音並無記載伊有去過耶路撒冷á是猶太地區傳福音事工ê記錄。二是耶穌開始tī猶太地區,特別是tī耶路撒冷一帶傳福音ê事工(參考十九:1—廿七:66)。

第2節,耶穌每到一個地方,人群lóng是會tòe來kheh tī伊身邊,mā chhōa病人來求祂醫,祂lóng伸手醫in。



經文:

馬太福音 19:3-19:12

註釋:

法利賽人koh再chhōe問題來問耶穌,主要是想beh「陷害」伊。Chit-pái in提出關係離婚ê事。

第3節,「咱ê律法」這是引用ê背景是申命記第廿四章1節ê律法規定。

第4到6節,耶穌以創世記第二章21到24節ê經文背景來回答,並且強調講「上帝所配合 ê,人bē-tàng拆開」,表示休棄bó͘,並m̄是上帝所喜樂ê事。

第7到8節,chiah-ê法利賽人並m̄是m̄知創世記創造ê故事,卻是故意beh問為甚麼摩西會訂定申命記第廿四章1節chit種律法。耶穌認為是以色列人民「心腸siuⁿ硬」,這是teh指in聽不下上帝ê教導,棄sak上帝ê心真強。
第9節,耶穌堅持對婚姻ê看法,認為除非有發見「不貞」ê行為。Chit種不貞mā包括cha-po͘人對bó͘ ê態度,因為夫妻是同等ê。不貞等於「犯了姦淫」罪。

第10到12節,門徒聽耶穌ê回答了後,有反應,認為án-ne「無結婚,倒好」。Á耶穌認為是m̄是結婚,並m̄是「人人lóng ē-tàng接受」,需要上帝「特別恩賜ê人才ē-tàng接受」,這是特別有毅力ê人才有辦法。

「出世to̍h無適合結婚ê」,這是teh指先天性bē-tàng ê人、經過閹割ê人,另外有kóa人是為tio̍h beh專心傳天國福音á無結婚,親像有kóa宗教系統ê神職人員就是án-ne。

經文:

馬太福音 19:13-19:15

註釋:

細漢gín-á tī猶太人社會ná親像女人仝款,無社會地位,常被疏忽、鄙視,屬tī弱勢族群。M̄-koh耶穌tī第十八章1到5節ê天國比喻中,已經有用細漢gín-á來作教材,beh hō͘大家kah細漢gín-á學。

當「有人chhōa gín-á來見耶穌,beh請耶穌hō͘ in按手祈禱」,chia ê「按手」,是teh指祝福ê意思。Ē-sái講是門徒卻「責備hiah-ê人」,可見in對耶穌ê教導並無清楚,chiah會有做出chit種舉動。

第14節,耶穌講「天國ê子民to̍h是像」chiah-ê細漢gín-á仝款ê人,chit句話mā koh一pái回應了第十八章3到4節耶穌所講ê話。
經文:

馬太福音 19:16-19:30

註釋:

來問耶穌有關「永恆ê性命」chit-ê問題ê人,伊是一個財主。伊來問耶穌「我該做甚麼善事chiah ē-tàng得tio̍h永恆ê性命」,意思是有甚麼具體ê好行為thang chhōe。

第17節,耶穌ài伊遵守「誡命」to̍h ē-sái得tio̍h。Chia ê「誡命」,就是上帝ê教導。Chit-ê人想tio̍h清楚到底是toh一kóa誡命。

第18到19節,耶穌用十誡來回應,意思是只要確實kā十誡實踐出來to̍h ē-sái。

第19節ê b句引以利未記第十九章18節b句ê教導「tio̍h疼厝邊,親像疼家己仝款」。Tī馬太福音第廿二章38到39節,耶穌kā愛上帝kah疼厝邊分列為第一kah第二誡命。換句話講,愛上帝,就是tùi疼厝邊開始做起。

第20節,chit-ê有錢人認為chiah-ê誡命伊lóng有盡到責任à。

第21節ê「beh達tio̍h koh khah完全ê地步」chit句話,耶穌ê意思是祂並無完全盡到責任。Chia耶穌ài財主若想beh盡到責任,就是kā伊ê「產業」lóng賣掉,然後「Kā錢捐hō͘ sàn-chhiah人」,án-ne伊就會有「財寶積存在天頂」,當伊完成chiah-ê工作了後,chiah來跟tòe祂。其實耶穌是teh kā chit-ê財主講,伊並無實踐誡命所講「疼厝邊」。

耶穌chiah-ê指引,hō͘ chit-ê少年財主失望到極點,「垂頭喪氣地行離開」,主要原因是「伊非常富有」。這說明財富成做伊得tio̍h永恆性命ê絆腳石。
第23節,「有錢人beh成做天國ê子民jōa-ni̍h-á難nah!」chit句話ē-tàng對照馬太福音第六章24節,錢財確實是會hō͘人失迷方向,甚至錯誤地kā它當做神仝款看待。耶穌認為一定tio̍h tī chit二項之間做出明確ê選擇。

第24節,「比駱駝穿過針眼iáu koh khah困難」,駱駝是龐大ê陸上動物。針,是家庭生活用具裡siōng細小ê。kā chit兩個用來對比,清楚講出困難度極大。表明人若想beh用靠累積ê錢財進入天國,是絕對無可能ê事。

第25到26節,「人是無法度,m̄-koh tī上帝,事事lóng ē-tàng。」這是一句真值得深思而且tio̍h謹記在心ê話語。

第27節,彼得koh一pái發言,表示伊kah其他門徒lóng「放下一切來跟tòe」耶穌了,án-ne in會「得tio̍h甚麼」?

第28到29節,耶穌回答講有「百倍」ê報償。Chia所講ê「百倍」,是teh指完美ê境界,就是「永恆ê性命」,tú好是chit位財主想beh走chhōe卻得bē-tio̍h ê。

第30節,「chit-má做tāi先ê人,真chē會變做路尾;chit-má做路尾ê人,會變做tāi先。」,這是一句俗語,tùi猶太gín-á ê舞蹈引伸出來,眾細kiáⁿ會圍成圓kho͘-á跳舞,轉了一個方向,原本帶頭跳ê人,會變成最後一個,本來是最後一個,會變成tāi先ê。耶穌延伸意思是一個人若是ē-tàng轉向正確ê路徑,性命就會變kah無仝款。暗示chit-ê財主只要轉個方向就對à。可惜,伊無。


經文:

馬太福音 20:1-20:16

註釋:

這是一則天國ê譬喻。天國ê事,tio̍h用「上帝ê主權」當做認bat ê基礎。
第2節,chit節已經真明確地提起主人kah工人之間有「約」。這「約」是每工hō͘工人「一塊銀幣」,是當時一工ê工資。

第3到4節,「會hō͘ lín公道ê工資」。「公道」kah第5節講主人「照樣」ê作法,chiah-ê lóng teh表明「約」ê意義。所以當發工資ê時chūn,主人對hiah-ê teh報怨ê工人所回答就是用in「同意」(第13節)chit-ê約來答覆。
第6到7節,「無人雇用阮」,表示chiah-ê人已面臨生存ê危機,chit種危機可能連帶影響tio̍h伊ê kui個家庭ê基本生活所需要ê。葡萄園主人mā請in入園去工作。

第8節,「beh暗á ê時chūn」發工資,這是摩西律法ê規定(參考申命記廿四:15)。Á第9節ê tùi最後來ê工人先領工資,tú好是第16節ê寫照。

第10到15節,先進入葡萄園工作ê工人,工作ê時間mā是siōng長,m̄-koh領ê工資kah最後chiah進入葡萄園工作一個小時ê工人仝款,因為án-ne,in有真大ê不滿。Á主人ê回答說明一個中心認知:有約在先。上帝是照約束來進行,天國就是照約束領賞。Koh講,既然是天國ê事,上帝就有絕對ê主權。

經文:

馬太福音 20:17-20:19

註釋:

這是耶穌第三pái預言祂teh beh tī耶路撒冷受難。第19節所講ê「外邦人」,是teh指羅馬統治者彼拉多,而且只有馬太福音明確指出耶穌teh beh面臨「釘十字架」ê死刑。M̄-koh三pái預言受難lóng強調「第三工,祂會koh活」chit-ê重大信息。

經文:

馬太福音 20:20-20:28

註釋:

馬太福音ê作者tī chia寫出「西庇太ê bó͘ chhōa兩個kiáⁿ來見耶穌」,馬可福音ê作者真清楚指出是雅各kah約翰兩兄弟(參考馬可福音十:35)。

第21到22節,「tī你做王ê時chūn」,in認為耶穌teh beh進入耶路撒冷去得tio̍h王位。耶穌認為祂ê門徒並無清楚家己teh講kóa甚麼,á是求甚麼。伊提醒in進入耶路撒冷是去lim「苦杯」,表示死tī十字架頂ê苦難。M̄-koh雅各kah約翰lóng回應講in「ē-tàng」lim。後來,雅各果然是門徒中第一個lim下苦杯ê人(參考使徒行傳十二:1—2)。

第23節,耶穌強調祂ê國度是屬tī上帝ê國度(參考約翰福音十八:36)。因為án-ne,只有上帝chiah有權決定hō͘甚麼人坐tó一個位置。

第24節,有爭奪,就會有紛爭;有紛爭,就會有「惱怒」ê現象出現。

第25到28節,耶穌ài門徒學習「奴僕」ê角色,ná親像祂來到chit世界,mā是親像奴僕仝款來「侍候人」(參考腓立比書二:7),而且「為tio̍h救贖眾人á獻出家己ê性命」。

重點tī第26節:「ē-sái講是,lín卻無是án-ne。」chit句話chiah是kui個事件ê主軸。基督教會是一個信仰團契,就一定tio̍h kah一般ê團體無仝,á跟tòe耶穌ê人如果對權位有企圖心,he就是無明白耶穌ê教示。

經文:

馬太福音 20:29-20:34

註釋:

「耶利哥」是接近耶路撒冷ê城市。Chit兩個盲人從來m̄-bat看過耶穌行神跡奇事,in極加是聽tio̍h大街小巷中關係耶穌ê各種傳說故事,包括所行ê神跡,以及祂ê教示。M̄-koh只有因為án-ne伊就知影耶穌就是「大衛ê kiáⁿ」,確信耶穌有能力thang醫in chheⁿ-mê ê目睭。Chit句「大衛ê kiáⁿ」表示拯救者ê意思。相對tī真chē人親目看見、親耳聽見,卻iáu是m̄信,尤其是hiah-ê猶太人領袖koh khah是án-ne。

當耶穌問in有甚麼期待時,in ê回答真清楚表示希望「目睭ē-tàng看見」。

第34節,這是馬太福音第三pái提起耶穌「動起憐憫ê心」(參考九:36、十四:14),然後伸手摸了in ê目睭,就hō͘ in馬上ē-tàng看見。

經文:

馬太福音 21:1-21:11

註釋:

接近耶路撒冷chìn前,耶穌先派兩個門徒入去頭前庄頭借用「一匹驢kah一匹驢á-kiáⁿ」。若是有人問kah為何牽驢,就講是「主beh用in」,這是耶穌kah驢ê主人ê約定暗語。

第4到5節,是引用撒迦利亞書第九章9節ê經文。所無仝ê,是撒迦利亞書只有講一匹驢,m̄-koh tī馬太福音卻是講有兩匹驢。

第6到8節,古早人用穿插來表示身分,因為án-ne kā家己ê衫褲舖tī驢á ê尻脊骿頂hō͘耶穌騎,á是舖tī路上hō͘耶穌騎驢過去,lóng是teh表示放低家己ê身分,願意順服ê意思(參考列王紀下九:13)。

第8節講有人剉「樹枝鋪tī路上」,這是早期以色列人民慶祝Tòa棚節時ê方式(參考利未記廿三:40)。約翰福音第十二章13節特別指明民眾是the̍h棕樹枝,因為án-ne,教會歷史上就kā它稱做「棕樹節」,chit工mā是受難週ê第一工。

第9節,chit句「頌讚歸tī大衛ê kiáⁿ」,意思是講「求上帝chit-má拯救」ê意思。第二句「願上帝賜福hō͘奉主名來ê hit位」,chit句是引用詩篇第一一八篇26節。

第10到11節,耶路撒冷城朝聖ê民眾紛紛詢問是甚麼人來à,顯然詢問ê人真chē是tùi外國回鄉朝聖ê僑民。認bat耶穌ê群眾回答:「伊是加利利省拿撒勒ê先知耶穌。」chia特別用「先知」來稱呼耶穌,kah-ná有意思beh表明耶穌就是申命記第十八章15到18節,摩西轉達上帝所預備hit位beh來帶領猶太人ê先知。

經文:

馬太福音 21:12-21:13

註釋:

第12節講「耶穌進入聖殿」,參考約翰福音第二章14節就會清楚,he是指聖殿ê外院,是所有民眾thang聚集ê所在。Tī chit-ê外院ê所在設有兌換錢幣kah販賣粉鳥ê攤位,為tio̍h方便外地tńg來ê猶太僑民到聖殿獻祭kah奉獻時ê需要,chiah-ê攤位lóng是由聖殿ê祭司teh掌管。耶穌會kā chiah-ê攤販lóng推倒,是因為祂認為chiah-ê攤販有欺騙ê行為,已經污衊了聖殿ê聖潔,hō͘聖殿變成「賊窩」。伊引用以賽亞書第五十六章7節,認為聖殿原本是beh「作祈禱ê殿」,這表示聖殿是kah上帝對話ê所在,怎樣ē-tàng有欺騙ê心á是行為?若此,ná會敢koh進入聖殿面對上帝?

經文:

馬太福音 21:14-21:17

註釋:

第14節,chit節thang參考第十九章2節。

第15節thang清楚看出當時tī聖殿握有權柄ê「祭司長kah經學教師」心中ê「惱怒」,其實就是嫉妒,因為民眾對耶穌ê喜愛大大超過對in ê肯定。Mā因為án-ne,in m̄敢公然掠耶穌,深驚激起群眾受氣(參考馬太福音廿一:46)。

Chiah-ê宗教領袖問耶穌是m̄是有聽見兒童kah民眾呼喊ê聲音?耶穌用詩篇第八篇2節詩人描述連嬰á lóng會歌頌上帝ê偉大。其實,耶穌已經teh隱喻一個重要信息:連tī聖殿裡ê細漢gín-á看見耶穌所行ê神跡奇事,lóng會認出祂就是tùi上帝來,卻只有chiah-ê宗教領袖硬是m̄信。

經文:

馬太福音 21:18-21:22

註釋:

馬太福音作者ài用果子樹結果子來詮釋實際行動kah信仰之間ê親密關係(參考三:8、十二:33—35、十三:23、廿一:19、33)等。

無花果樹通常是tī每年六到八月時chūn結果子,它ê特色是葉ákah果子是同時開出來。因為án-ne,只要看tio̍h葉á,就必定會chhōe-tio̍h果子,chit-má ê時間是大約三、四月間,應該m̄是無花果結果子ê時間,卻會發出葉á來,表示這棵無花果樹已經有問題。

第19節,耶穌指這棵無花果樹講「永遠bē koh再結果子」chit種話,結果chit-ê無花果樹就「馬上枯乾去」。

第20節,門徒「tio̍h驚kah gāng去」,in問這棵無花果樹「為甚麼會馬上枯乾」?In想問ê是「咱kám mā ē-tàng有chit種能力」,kah耶穌原本beh講ê,無結出好果子ê樹會hō͘砍掉(參考路加福音十三:7,約翰福音十五:2、6),已經有cheng差。因為án-ne,耶穌ê回應是「只要有信心」,祂祂所做ê,門徒mā ē-tàng做,chit種回應mā是馬太福音第七章7節所教導ê。

經文:

馬太福音 21:23-21:27

註釋:

耶穌ē-tàng tī聖殿裡教導群眾,是因為民眾對祂ê教導有高度ê肯定,而且耶穌ê教導hō͘群眾感覺有權威,這mā致使猶太人ê眾領袖對祂相當不滿,因為án-ne,in對耶穌提出有關權威ê問題。

第23節講耶穌當時正teh教導民眾。因為án-ne,當chiah-ê領袖來問祂「憑甚麼權柄做chiah-ê事」ê時,可能是teh指:一是teh指祂無祭司長同意,怎樣ē-tàng tī聖殿公然做教師ê工作?因為耶穌m̄是經學教師。二是teh指祂kā tī耶路撒冷聖殿ê攤販lóng趕走。祂m̄是祭司,mā m̄是聖殿管理階層ê人,甚麼人hō͘祂chit-ê權柄?

第24到25節,耶穌知影chiah-ê領袖中間有真chē人對行洗禮約翰ê權柄並無認同,m̄-koh民眾卻是hō͘ 伊真koân ê肯定。就án-ne祂反問in án怎面對行洗禮約翰ê權柄問題。Á這to̍h是in ê中間意見有分歧ê事,in m̄敢tī耶穌面前公開出來。

Á真正ê問題是第26節,chiah-ê猶太人領袖只驚群眾。In m̄驚上帝,mā m̄驚人。因為án-ne,in回答耶穌,講in m̄知行洗禮約翰ê權柄tùi tó位來。耶穌mā藉這拒絕回答in。

經文:

馬太福音 21:28-21:32

註釋:

這是馬太福音特有ê資料,mā是一則鮮明ê譬喻。

第28到30節中,耶穌以兩個kiáⁿ做譬喻,第一個kiáⁿ聽老父ê吩咐後,當場講「m̄去」,m̄-koh後來後悔,就照老父ê吩咐去做。第二個kiáⁿ是對老父ê吩咐講「好」,結果並無去。

顯然地,第二個kiáⁿ ê態度,就是猶太人宗教領袖ê縮影,kan-taⁿ會講,bē做(參考馬太福音廿三:3)。

第31節,beh「成做天國ê子民」,就是beh遵照上帝ê指示去做。因為天國就是用上帝做中心,聽從上帝ê指示。

第32節是耶穌對這譬喻ê解釋,表示「抽稅ê kah娼妓」,原本是被拒絕進入葡萄園ê對象,卻因為後來聽行洗禮約翰傳出ê信息,照所「指示」ê去做。M̄-koh,chiah-ê宗教領袖原本就應該去做ê,卻是拒絕á是無去做,án-ne講起來,抽稅ê人kah娼妓比in koh khah快成做天國ê子民。

經文:

馬太福音 21:33-21:46

註釋:

Tùi chit-ê比喻thang看出耶穌kah猶太宗教領袖之間ê衝突真大。耶穌用chit段葡萄園比喻來講述chiah-ê宗教領袖心態上thang議論ê所在,就是in有竊據上帝主權ê心思意念。

第33節,是採用以賽亞書第五章2節有關主人開墾葡萄園ê詩歌為背景。

第34節,葡萄園主人外出去旅行前,將葡萄園出租。依照利未記第十九章23到25節ê記載,開墾新種ê果子樹,前三年收成ê果子lóng tio̍h當做無清氣ê,第四年ê收成是屬tī上帝ê初熟果子,第五年chiah是屬tī家己ê。因此,chia講「到à葡萄成熟ê季節」,mā就是第五年收成ê時,beh去收租金。Chia指出葡萄園主人「應得ê分額」,意思是in之間有契約關係。

第35到39節,chit段經文是佃戶ê心態就是想beh霸佔hit-ê葡萄園,因此,對主人派僕人去收租金,m̄-nā m̄ hō͘,koh kā收租ê僕人殺害。最後主人只好派出家己ê kiáⁿ去收租金,結果iáu是仝款遇tio̍h殺害。Kui個比喻ê中心經文是tī第38節,佃戶想beh「奪取」園主ê產業,自命為園主。

第40到41節,真清楚,園主一定會採取行動,嚴厲懲罰chiah-ê惡劣ê佃戶。然後收tńg來葡萄園,轉租hō͘「ē-tàng按時交租ê佃戶」。

第42節,chit節是引用詩篇第一一八篇22到23節ê詩歌,表示人所看bē起ê上帝ê僕人,tī上帝手中卻是siōng貴重ê。

第43到44節,耶穌指出chiah-ê猶太宗教眾領袖,根本就無份tī上帝國度,因為in kah想beh奪取葡萄園ê惡佃戶仝款。

第45到46節,chiah-ê宗教領袖聽了後,非常受氣,因為in知影chit-ê比喻就是teh講in,而且kā in比喻為無得救希望ê對象,in感覺lóng受侮辱,因此,想beh掠耶穌。因為he是tī聖殿範圍內,in ē-tàng直接掠,koh送去siōng koân議會審判,m̄-koh in m̄敢án-ne做,原因是當時tú-tn̄g Pôaⁿ過節,耶路撒冷城內人潮真kheh,特別是群眾lóng愛耶穌,而且認為伊是「先知」,萬一掠耶穌引發群眾情緒激盪á失控,in會受tio̍h羅馬政府ê嚴厲懲罰。因此,m̄敢出手掠。

經文:

馬太福音 22:1-22:14

註釋:

這是一段無jōa容易bat ê譬喻,有可能是來自兩個譬喻(第2-10節、第11-13節)合併做伙ê,mā有可能是原始資料有遺漏,hō͘ chit-ê譬喻讀起來有點á銜接bē起來。

第2節,chit節提起天國kah-ná國王為kiáⁿ辦婚姻ê宴席,chit種用婚宴來解釋天國ê譬喻,tī第廿五章1到13節koh一pái出現。

第3節,因為是國王娶媳婦ê婚宴,lóng會事先邀請賓客,á被邀請ê賓客應該感覺相當榮幸chiah-tio̍h。「ē-sái講是in無願意來」,chit句話表示受邀請ê賓客根本就看bē起國王。

第4到6節,國王就án-ne「koh再差派另外一批奴僕」,並且宣告宴席已經準備好勢,kan-taⁿ teh等賓客來就坐。M̄-koh受邀請ê賓客m̄-nā拒絕參加,koh chhōe出真chē理由推辭,koh khah嚴重ê是無愛來參加,mā就án-ne m̄來,koh phah國王派去ê奴僕,甚至kā國王ê奴僕刣死。Chit種譬喻真親像第廿一章33到39節ê園主kā葡萄園租hō͘佃戶仝款。

第7節,國王對賓客ê態度大忿怒,決定採取制裁行動,這說明天國是有審判ê。Á國王teh代表上帝kah受邀請賓客(上帝子民)之間ê關係。

第8到10節,因為本來賓客ê惡質態度,致使改變國王ê決定。伊ài beh奴僕去街á,只要「看tio̍h ê人,無論好bái lóng請來」,chit句話kah第十三章47到48節ê拋網之譬喻類似。M̄-koh mā因為無論「好bái」lóng邀請入席,chiah會繼續下列ê審判。

「hō͘喜堂上人客坐滿」,這原本是天國辦宴席ê本意。M̄-koh卻因為本來被邀請ê賓客m̄-chhap,chiah會改變原本計畫,改去街路邀請所有tú-tio̍h ê人來參加宴席。

第11到13節,chit段真可能是另外一個譬喻,不過mā有可能是續接第10節所講ê,只要去街á看tio̍h人就邀請入來,了後chiah來分別。

「無穿喜宴ê禮服」,表示對國王ê邀請態度輕視。因為án-ne,到國王問in ê時chūn,chiah-ê輕視國王邀請ê人,答bē出話來。國王對chit種鄙視(siùⁿ)伊邀請ê人,會採取嚴厲ê懲罰。表示鄙視(siùⁿ)上帝恩典ê人,上帝bē寬待、赦免。
譬喻ê重點是tī第14節所講ê,被邀請ê人未必lóng是經過揀選ê人,如果kā chit節kah第十三章47到50節經文相對照來看就會koh khah清楚明白,該段經文講,天國ná親像拋網tī湖裡,然後kā所有撈起來ê魚分類,kā好ê hē tī桶裡,pháiⁿ ê棄sak。這說明天國有分別為聖ê要件。

經文:

馬太福音 22:15-22:22

註釋:

所謂「希律黨」,這是猶太人ê政治黨派之一,另外一個kah此黨派對立ê就是「激進黨」(《和合本》譯做「奮銳黨」)。希律黨ê人支持希律ê家族統治猶太,chit種看法tú好kah激進黨ê人所持ê觀點完全顛倒,in是堅持一定tio̍h由猶太人自治。一般講起來,法利賽人是激進黨派ê主要份子,因為án-ne,希律黨派kah法利賽人tī政治理念上thang講差不多是南轅北轍。M̄-kohtaⁿ卻為tio̍h beh除掉耶穌chiah結合做伙,這已經m̄是第一pái,卻是第二pái。第一pái是馬可福音提供ê資料,講耶穌tī會堂裡醫一位手枯乾ê人後,in就共謀chit種計劃(參考馬可福音三:6)。

第16節,chit節tú好表明chiah-ê猶太人社會領袖ê虛假,in雖然開嘴講o-ló耶穌,m̄-koh並m̄是真心誠意講chiah-ê,主要目地是想beh「陷害」耶穌。

第17節,「向羅馬皇帝納稅是m̄是違背咱ê律法」,chia ê「稅」是teh指羅馬政府徵收ê人頭稅,cha-po͘人只要hit年滿十四歲,就一定tio̍h繳稅到六十五歲,á cha-bó͘人滿十二歲以上就tio̍h開始繳納,mā是到六十五歲chiah停止。激進黨派ê人不時發動抗繳,因為in認為若繳納chit種稅,等於表示順服羅馬帝國ê統治權,in認為只有上帝chiah是in惟一ê君王。Mā因為án-ne,激進黨派ê人不時被羅馬政府認為是叛亂份子。因為án-ne,若是耶穌認為該繳,激進黨派ê人就會講耶穌承認羅馬皇帝是伊ê王。M̄-koh若是講bē合律法,希律黨派ê人就會向羅馬政府控告伊,表示伊反對羅馬政府,是叛亂份子。後來in就是向彼拉多指控耶穌鼓動民眾抗繳稅金(參考路加福音廿三:2、5)。

第18到19節,耶穌有特別能力,會知影隱藏tī人內心深處ê想法。因為án-ne,指責in是「假冒為善ê人」,然後ài in the̍h一個「納稅用ê銀幣」hō͘伊看。Chit種銀幣無法度the̍h去聖殿奉獻。Ná親像第20節所講ê,銀幣頂面有該撒ê雕像tī頂面,hō͘人認為是偶像。M̄-koh羅馬政府只收chit種銀幣。

第21到22節,耶穌回答ê chit句話,表示政府ê物件kah上帝ê是無仝ê,二者無法度混淆。這致使in原本想好beh陷害耶穌ê計謀因為án-ne破解,in只好離開。


經文:

馬太福音 22:23-22:33

註釋:

Tī閱讀chit段經文chìn前,siōng好先讀申命記第廿五章5到10節經文,mā就是所講ê「利未拉特婚姻條例」。該律法原本是beh hō͘兄弟負起責任,關心家庭陷入困境ê兄弟來設。因為若是無生兒女,失去丈夫ê寡婦就無法度繼承財產,對寡婦來講是生活會陷入困境。

撒都該人m̄-nā m̄相信koh活,in mā m̄相信天使、聖靈(參考使徒行傳廿三:8),in mā不接受先知ê書信,只相信摩西五經而已。

撒都該人mā用譬喻方式來問耶穌,若「兄弟七人」,前後lóng是娶仝一個cha-bó͘人,若是有koh活,hit-ê cha-bó͘人會是甚麼人ê bó͘?這「七」,表示到最後實在是無人ē-tàng koh再娶hit位寡婦。

第29到32節,「m̄知上帝ê權能」,表示tī人看起來真困難、無解,m̄-koh tī上帝卻事事lóng ē-tàng(參考馬太福音十九:26)。Koh活ê事是上帝teh掌管,上帝hō͘死人koh活並m̄是甚麼大不了ê事。Koh講,上帝ài怎樣管理「天頂ê天使」ê事,mā m̄是人ê能力ē-tàng理解。

「亞伯拉罕ê上帝、以撒ê上帝、雅各ê上帝」,chit句話主要teh表示上帝是永恆ê上帝。人有限ê性命無法度了解。

經文:

馬太福音 22:34-22:40

註釋:

「律法教師」用摩西律法來問耶穌,顯然就是beh「陷害」耶穌,存心不良。

第37節,耶穌根據申命記第六章5節來回答,á chit節被看做是聖經中siōng重要ê經文,因為án-ne,第38節隨時講是第一重要ê誡命。

第39節,「tio̍h疼厝邊,親像疼家己仝款」ê教示是根據利未記第十九章18節ê經文引伸出來。耶穌講這是第二重要ê誡命。

第40節,「摩西全部ê律法kah先知ê教示」,chit句話指ê就是kui本舊約聖經。

經文:

馬太福音 22:41-22:46

註釋:

頭前連續三pái lóng是猶太人領袖來向耶穌挑戰,想beh陷害耶穌。chit-má chia則換做耶穌提問向in挑戰。

耶穌提出「基督」是「甚麼人ê kiáⁿ孫」?猶太人根據先知ê預言,認為基督一定是「大衛ê kiáⁿ孫」(參考以賽亞書十一:1,耶利米書廿三:5)。

第43到44節,耶穌引用詩篇第一一○篇1節作題材,問in怎樣解釋chit段詩歌?基督就是拯救者ê意思。祂藉tio̍h大衛ê kiáⁿ孫出世tī人類歷史中間,kah咱共同生活做伙。因為án-ne,tùi人ê角度看,伊是大衛ê kiáⁿ孫。無錯!m̄-koh,拯救者就是上帝本身,連大衛王mā一定tio̍h臣服tī祂腳下。

第45節,耶穌ài beh強調ê是:bē-tàng kan-taⁿ用字面上ê詞來解釋聖經, tio̍h知影聖經字面背後所beh表達ê意義。基督固然是tùi大衛ê kiáⁿ孫出來,he是上帝差派ê拯救者藉tio̍h人ê家庭降生到世界上,chit位拯救者當然是比大衛koh khah偉大。當時有人kā耶穌稱做「大衛ê kiáⁿ」,m̄-koh並無表示耶穌是一般人,卻是超越大衛ê地位。只是chiah-ê猶太人領袖無願意承認而已。

經文:

馬太福音 23:1-23:12

註釋:

Chit段經文是馬太福音作者tī編輯手路特別ê所在之一,連續記載耶穌指責經學教師kah法利賽人ê「七」種問題,mā teh暗示 in ê問題非常嚴重,差不多到à無法度諒解ê狀態。Á耶穌chit段敘述in ê問題是講hō͘「群眾kah祂ê門徒」聽ê。

第2到3節,耶穌承認經學教師kah法利賽人teh教導摩西律法上有權威,tio̍h聽從,m̄-koh mài學習in ê行為。因為in「kan-taⁿ會講,bē做」。

第4節,耶穌指出in kan-taⁿ會kā摩西律法加上真chē傳統風俗,加重了人民學習ê困難。

第5到7節,講出chiah-ê領袖愛面子,真虛假。

第8到10節,猶太人不時kā「老師」、「導師」、「老父」三詞交替使用。耶穌tī chia kā它釐清,hō͘民眾kah門徒知影mài混淆。大家應該彼此成做學習ê老師,tùi救主來學習犧牲性命救贖別人ê疼,mā學習認bat只有一位賞賜ê天父。

第11到12節,thang參考馬太福音第二十章26節,腓立比書第二章7到9節。耶穌koh一pái強調會謙卑家己做奴僕ê角色來服侍別人,chit種人會hō͘人尊崇,á上帝一定會高舉伊, 

經文:

馬太福音 23:13-23:36

註釋:

Chit段經文敘述法利賽人kah經學教師ê真實問題,共計有七種,每一種ê起頭lóng是用「有災禍à」來說明in所做ê chiah-ê事,lóng會遇tio̍h上帝ê懲罰。

第一種:第13到14節,in阻礙別人進天國ê機會。

第二種:第15節,帶領外邦人信上帝,後kā chiah-ê加入ê新成員塑造ê比in koh khah慘,m̄-nā狂熱,而且心胸koh khah狹隘。所謂「加倍ê pháiⁿ」,chit句話mā表示法利賽人kah經學教師kā受tio̍h「加倍」ê懲罰。

第三種:第16到22節,in會用chiù-chōa來掩蓋(khàm)內心ê貪婪,表面上是teh向上帝chiù-chōa,事實上內心想ê是祭壇上ê貢品,chit種chiù-chōa明明就是teh褻瀆神聖ê上帝仝款。

第四種:第23到24節,是關係十分一ê奉獻固然重要,m̄-koh真正重要ê是對人ê ài有正義、仁慈、信實等品格,m̄-koh chiah-ê卻常hō͘ in故意疏忽。

第五種:第25到26節,kan-taⁿ知影做好表面ê工作,內心充滿tio̍h貪慾kah放縱ê念頭。

第六種:第27到28節,粉刷墳墓ê主要目的,是beh幫助人bē因為無看見墳墓á觸(tak)tio̍h變成無清氣ê人。因為根據民數記第十九章16節ê規定,觸(tak)tī墳墓邊就屬tī無清氣。這原本是件好事,m̄-koh in ná親像án-ne,只重視外表ê亮麗好看,m̄-koh in ê內心卻是pháiⁿ死ê身軀,是無性命ê軀體仝款,充滿tio̍h邪惡kah虛假,tú好顯示了伊kah墳墓內埋葬ê死人仝款,本身就是無清氣ê。

第七種:第29到33節,in修建先知ê墳墓,kah-ná真尊重先知,其實in卻繼續teh殺害先知。比起in ê祖先,in無好gōa chē。

以上七種lóng發生tī chiah-ê猶太人宗教領袖身上,而且繼續teh發生,並無改善。因為án-ne,耶穌用第34到36節做結語,用真嚴厲指責in chit種惡質行踏。

第35節ê「亞伯」,這是創世記第四章1到8節,被哥哥該隱無辜殺害。

「巴拉加ê kiáⁿ撒迦利亞」,chia tī記錄上有點á 錯誤,應該m̄是「巴拉加ê kiáⁿ」,卻是「耶何耶大ê kiáⁿ撒迦利亞」chiah-tio̍h(參考歷代志下廿四:20—22),是約阿施王執政ê時代,命令手下tī聖殿ê庭園裡用石頭kā伊phah死。

經文:

馬太福音 23:37-23:39

註釋:

耶路撒冷一直是猶太人ê宗教信仰中心,m̄-koh,對上帝ê奴僕卻是採取迫害ê態度,舊約時代ê先知受tio̍h chit款ê遭遇,耶穌最後mā是tī耶路撒冷被殺害。

第38節,預言聖殿會成做「拋荒無人tòa ê所在」,chit句話tī主後70年應驗,羅馬將軍提多kā它摧毀。時到taⁿ,聖殿iáu-kú iáu未重建,kan-taⁿ留落來一片「哭牆」(西牆)。

第39節,引用詩篇第一一八篇26節ê詩歌。「tùi-án-ni koh khah àn怎to見bē-tio̍h我」,chit句話表示終末ê時間teh beh來到。


經文:

馬太福音 24:1-24:2

註釋:

馬太福音tī編輯上有真特別ê手路,親像第五到七章,作者用連續三章ê篇幅kā耶穌ê言論彙集做伙;tī第十三章則用七個比喻講述天國;tī第廿三章是連續指責經學教師kah法利賽人ê七個問題;第廿四章作者用七個景況teh描述有關末日ê災難;第廿五章是用三個故事說明天國ê景況。

「耶穌tùi聖殿出來」,chit句話thang續接第廿一章23節ê「耶穌進入聖殿」,這中間lóng是馬太福音所收集ê耶穌教導之言論。

「聖殿ê建築」,這是大希律王tī主前20年開始擴建,經過46年ê時間chiah完成(參考約翰福音二:20)。完成後ê聖殿範圍比本來ê大三倍,而且裝潢kah koh khahsúi。M̄-koh耶穌講它ê「每一塊石頭lóng tio̍h被拆落來,無一塊石頭會留tī另外一塊頂面」,chit件事tī主後70年應驗,tú親像第廿三章38節所講ê,「殿宇會成做拋荒無人tòa ê所在」。

經文:

馬太福音 24:3-24:51

註釋:

第3節,耶穌預言聖殿會被拆毀了後,門徒私底落來問chit-ê tāi-chì「甚麼時chūn會發生」,因為一般猶太人認為,當耶路撒冷聖殿被拆毀ê時,mā表示末日就來到à。

Tùi第4節開始一直到第51節,耶穌連續講七個災難ê景況。

第一個是第4到14節:
有人會假借基督ê名,mā會有假先知出現來迷惑人,á戰爭、饑荒kah地動會無停地發生。先知耶利米teh描述上帝懲罰伊hit-ê邪惡ê時代ê方式,mā是用戰爭、饑荒kah瘟疫(參考耶利米書廿一:7、9、廿八:8、廿九:17—18、三十二:24、36)。M̄-nā án-ne,耶穌提醒祂ê門徒,in會受tio̍h迫害,甚至會hō͘殺害。M̄-koh耶穌強調當福音傳遍到全世界了後,世界ê路尾chiah會來到。

第二個是第15到22節:
Chit段經文用希臘帝國統治末期發生ê事件來講述末日ê景象。

Tī第15節ê chit句「可惡ê毀滅者」,一再出現tī但以理書中(參考九:27、十一:31、十二:11)。背景是發生tī主前167年ê事件,hit時是希臘ê安提阿哥四世衣匹法紐(Epiphanes)帶豬進入耶路撒冷聖殿到聖所ê祭壇獻祭,結果引起猶大家族裡ê馬加比挺身出面,伊帶領猶太人起來反抗希臘軍隊。後來tī主後40年,羅馬皇帝卡利古拉(Caligula,37--41)mā bat威脅猶太人講beh採取kah安提阿哥四世仝款ê行動褻瀆聖殿。因為án-ne,chit句話mā teh暗示,若有類似chit種景況發生,就是大災難koh teh beh來臨ê時刻。
Á tùi第16到18節thang清楚看出,指示tio̍h趕緊逃離災難。問題是這若是末日景象,tio̍h逃往去tó位?

第19到21節,提起期待災難ê日子mài發生tī寒天,因為這kan-taⁿ會hō͘孕婦á是哺育嬰á ê老母加倍痛苦,可能in會走bē振動,á是連帶hō͘嬰á受害。Mā mài發生tī安息日,因為in驚違反安息日ê規定。

第22節,chit節提起上帝tī苦難中施恩典,hō͘苦難ê時間縮短,án-ne ē-tàng留落來koh khah chē殘存ê人民。

第三個是第23到28節:
Chit段經文主題hē tī假基督kah假先知ê出現。

第23 kah 27節kā第4到14節koh一pái提起假借基督kah先知ê名出現ê事件,表示迷惑人心ê事出現ê頻率非常高。
第28節,這是一句諺語,是引用約伯記第三十九章30節。意思是只要注意,就會看tio̍h teh beh發生á是已經發生ê事。

第四個是tī第29到31節:
Chia提起「人子」teh beh來臨,伊來臨ê時天象會出現變異,聖經作者ài用chit種天象變化來說明he是上帝出重手懲罰ê記號(參考以賽亞書十三:10、三十四:4,以西結書三十二:7,約珥書二:10,阿摩司書八:9)。「號角ê聲音tio̍h大tân」,這表示審判開始。

第五個是第32到35節:
耶穌用自然生態景象來教導門徒,ài in注意看hit-ê末日景象ê來臨,其實tùi生態環境ê變化就會明白,就kah-ná看無花果樹ê生長仝款,真平常無甚麼特別。

「就tī門口」,意思指時間迫切,真緊,而且隨時會來到。做好準備比猜測時間甚麼來到koh khah重要。

第35節,chit節thang參考以賽亞書第四十章8節。耶穌ài大家相信祂講ê話。

第六個tùi第36到44節:
Chit段經文ê中心詞字就是「警醒」,因為無人知影確實ê甚麼時chūn會來臨,就kah-ná「挪亞時代」mā是án-ne。另外一方面,無人知影甚麼人會hông拯救,á是甚麼人會hō͘留落來。會曉警醒ê人,知影隨時「準備好」,因為末日會tī人「料想bē到ê時chūn忽然來臨」。

第七個是第45到51節:
這是繼續前段警醒ê chit-ê主題,一個奴僕若是警醒,伊bē去猜測主人甚麼時會tńg來,因為主人隨時lóng可能會tńg來。當主人tī奴僕「料想bē到」ê時chūn tńg來ê時,看tio̍h奴僕頭尾非常忠實,主人一定會獎賞,m̄-koh對tī偷lán-si、不忠實ê奴僕,主人必定會用真嚴厲ê手路懲罰in。

注意,耶穌講天國ê譬喻ê時,會提起關係審判ê事,講末日ê問題mā是án-ne。


經文:

馬太福音 25:1-25:13

註釋:

Chit章用三個譬喻來說明天國,而且lóng kah終末ê審判有密切關係。Tī chit三個譬喻中ê第一kah第三個,lóng是馬太福音特有ê資料,第二個譬喻tī路加福音第十九章11到27節mā有記載。

kā天國譬喻成婚姻ê筵席mā是耶穌譬喻中ê一個特色(參考馬太福音廿二:1—14)。Koh講,耶穌譬喻ê另外一個特色,就是採用極鮮明ê對比,chit種譬喻ê主要目的是beh hō͘當時ê人一聽就馬上瞭解伊所講ê譬喻。

Chit-ê譬喻是講kā十個少女分做兩組,聰明ê五個一組,愚戇ê mā是五個一組。聰明者表示有準備,而且準備好迎接結婚ê新郎來到,thang加入慶賀ê人群中。耶穌就bat tī譬喻中隱喻祂就是新郎(參考九:15)。相對ê另外五個,就是愚戇ê,in因為準備無夠,thèng候新郎ê時間比預期延遲了,手上ê燈油耗盡了,想beh先向別人借來用,卻得bē-tio̍h。Kui個譬喻ê中心是強調chit種準備是無法度借用別人ê,mā無人ē-tàng幫忙,因為大家lóng擔心家己所預備ê無夠用。

Koh講,chia所講ê「聰明」ê cha-bó͘-gín-á kah「愚戇」ê cha-bó͘-gín-á,ná親像第七章24到27節所提起ê兩組人仝款,「聰明」ê意思是teh指會實踐所聽tio̍h ê教導ê人,相對ê,愚戇ê就是聽卻m̄去實踐ê人。

第13節,chit節是重複tio̍h第廿四章42節、44節、50節ê意思,lóng teh表示無人知影甚麼時間,審判ê末日會來臨。

經文:

馬太福音 25:14-25:30

註釋:

Chit段譬喻kah第廿四章45到51節ê譬喻類似,lóng是teh強調奴僕受主人ê交託管理家產。Tùi字面上看起來,chit段天國ê譬喻kah-ná是有三組人,其實只分兩組,ná親像前一個譬喻仝款,一組是「好koh可靠ê奴僕」,另外一組是「pháiⁿ koh lán-si ê奴僕」。耶穌teh講天國ê譬喻ê時,lóng是kah審判有關。

Kui個譬喻ê重點tī第15節所講ê,主人是按照奴僕ê「才tiāu」交託hō͘ in無仝ê工作量。

Chia講一個hō͘五千,另外一個hō͘兩千,第三個hō͘一千。第15節chia用「金幣」來表示,表示數目相當龐大。

第18節講出三個奴僕siōng大ê差別,就是前兩個lóng是領主人交帶ê金幣後,就「動身」、「馬上」去做seng-lí。只有hit位領一千ê,是tī土腳「挖一孔,kā主人ê錢埋起來」。

古早人,會為tio̍h安全ê緣故kā錢埋tī土腳(參考馬太福音十三:44),chit-ê領一千ê並無照家己有ê「才tiāu」去做seng-lí。而且當主人tńg來結賬ê時,伊iáu用了真chē理由(第24到25節)來辯解、推諉。如果講kā錢存hē tī銀行是siōng簡單ê方法,án-ne,這應該是任何人lóng做會到ê事,m̄-koh chit-ê奴僕則連chiah-ni̍h簡單ê事mā m̄做,iáu用真chē理由來推卸責任,he kan-taⁿ hō͘主人koh khah受氣而已,無khah-choa̍h。上帝交託hō͘你jōa-chē?這是每一個人tio̍h家己反省ê問題,m̄是別人ē-tàng過問ê。

第19節,chit節是天國譬喻ê中心思想,he就是主人會tńg來「結賬」,這表示審判。最後,主人判定hit-ê領一千ê奴僕是「pháiⁿ koh lán-si」,á頭前兩位被主人認為是「好koh可靠ê奴僕」,然後照in ê 才tiāu所努力之結果獎賞in,hō͘ in「管理」koh khah大ê數目。

第29到30節,是此譬喻ê結尾,說明只要盡心盡力努力,一定會有獎賞,áchit-ê獎賞會超過原本所有ê。相對ê,pîn-tōaⁿ ê人,上帝會連伊原本所有ê mā會失去。


經文:

馬太福音 25:31-25:46

註釋:

Chit段最後審判ê故事就kah頭前兩個譬喻仝款,mā是分做鮮明ê對比,重點teh強調無tap-sap ê事。Tī一般人看起來無tap-sap ê人á是事頂面,甚至人家己lóng bē記得ê事。M̄-koh,上帝記tiâu人所做ê每一件事。聖經作者講每一個人lóng有一本性命冊,身邊lóng有一位天使teh記錄你ê所講所行,chiah-ê lóng會成做將來上帝審判ê根據(參考腓立比書四:3,啟示錄二十:11—15)。

Chit段譬喻用「綿羊」kah「山羊」作題材,並無表示綿羊比較好,是因為tī巴勒斯坦地區早暗溫差大,日時頭放牧ê時hō͘ chit兩種羊做伙,m̄-koh到暗時會kā綿羊kah山羊分開,因為山羊需要燒火炭á是用草堆保暖。「正pêng」是teh指寵愛、祝福ê意思,相對tī「tò-pêng」,表明ê是失寵、詛咒。

經文:

馬太福音 26:1-26:5

註釋:

Chit章是記載耶穌受難ê故事。Tùi一個cha-bó͘人用香油膏抹伊,到kah門徒用Pôaⁿ過節暗頓後去客西馬尼園祈禱,然後被猶太人siōng koân議會掠去、審問等等。

這兩段經文lóng是kah猶大賣耶穌有關。Tī第1到5節中,耶穌koh一pái提醒門徒,祂會「被賣,被釘死tī十字架頂」,這是第二pái提醒(參考二十:19),mā是祂提起teh beh受難ê第四次。

第3到5節說明chiah-ê猶太人領袖確定beh除掉耶穌,m̄-koh驚引起群眾暴動。理由in真清楚,是民眾愛耶穌(參考廿一:8—11、15—16、46)。Tī Pôaⁿ過節期間,耶路撒冷城婦人人口會暴增到十倍以上,小khoá無注意,tī維安工作上就會失控。因為án-ne,in確定beh秘密進行chit項謀害ê tāi-chì。



經文:

馬太福音 26:6-26:13

註釋:

四本福音書lóng有記載有一個cha-bó͘人the̍h珍貴ê香油膏tī耶穌身上,只有路加福音ê資料比較特別(參考七:36—39)。

第6節提供chit件事發生tī伯大尼,是一位bat患癩ko病m̄-koh已經被耶穌醫好ê西門厝裡。

第7到9節講有一個cha-bó͘人the̍h來「一個玉瓶,貯滿珍貴ê香油膏」,馬可福音第十四章3到4節特別指出he是「純koh貴ê Ná-ta̍t芳油」,價值「三百gōa塊銀子」。伊kāchiah-ni̍h珍貴ê油膏倒tī耶穌ê「頭殼頂」,chit種舉動通常是聖經時代國王á是大祭司就任時chiah有ê。Thang看出耶穌tī chit位cha-bó͘ 人心中ê地位。門徒看tio̍h,無掠做當然,認為thang kā這瓶香油膏the̍h去賣,kā所得tio̍h ê錢用來賑濟sàn-chhiah人。

第10到13節,耶穌認為chit-ê cha-bó͘人知影伊teh beh受難,因為án-ne,特別用chit種方式來為伊ê安葬作準備。耶穌chit種回答已經teh表明,chit-ê cha-bó͘人知影耶穌teh beh受難,m̄-koh門徒並無清楚。Koh講,chit-ê cha-bó͘人為耶穌所做ê,kah加略人猶大所做ê事,呈現出來ê tú好完全顛倒。伊用多出猶大十倍價錢ê香油膏耶穌,相對ê是,猶大是用極低價出賣耶穌。

經文:

馬太福音 26:14-26:16

註釋:

猶太人領袖一心一意地設法beh掠耶穌,卻m̄知伊tī暗時bih tī tó位?tú好耶穌門徒加略人猶大提供了合作ê意願。馬太福音作者tī chia真清楚地表示,是猶大主動去chhōe chiah-ê猶太人領袖(第14節)。

第15節,「如果我kā耶穌交hō͘ lín,lín願意hō͘我甚麼?」chit句話充分顯示猶大確實是為tio̍h某種利益soah beh kā耶穌出賣。Á chia講猶太人領袖hō͘伊「三十塊銀幣」,chit-ê數目tú好是舊約時代一個奴隸ê價錢(參考出埃及記廿一:32)。Mā因為án-ne,一般lóng講猶大為tio̍h錢出賣耶穌。Chit點mā是約翰福音作者暗示猶大對錢ê喜愛,講伊是「賊」、「管錢,常盜用公款」(約翰福音十二:6)。

經文:

馬太福音 26:17-26:25

註釋:

「除酵節」,這是tùi Pôaⁿ過節隔工開始,共計有七工。因為Pôaⁿ過節mā一定tio̍h食無酵ê食物,因為án-ne,前後共計八天。Tùi猶太曆正月14日ê黃昏開始算是Pôaⁿ過節(參考利未記廿三:5—8)。

第18節,耶穌早已經安排好伊beh kah門徒守Pôaⁿ過節暗頓ê地點。因為án-ne,ài beh門徒「入城去見某某人」,in beh tī伊ê「厝裡守Pôaⁿ過節」。

第19到21節,「Lín中間有一個人ài beh出賣我」,chit句話mā是teh提醒猶大,耶穌真清楚伊心中ê企圖、計謀。希望伊ē-tàng即時回心轉意。
第22、25節,「一個一個問」耶穌,「m̄是我?」chit種寫法真清楚teh表明猶大mā是kah其他ê門徒仝款,伊mā來問耶穌。這真正是真諷刺ê行為。

第23到24節,耶穌真清楚用一個動作teh暗示hit-ê kah伊「同齊tī盤裡ùn餅食ê hit-ê人beh出賣」祂,m̄-koh門徒顯然無聽進chit句話。因為「同齊蘸餅食」,表示關係良好,可能每一個門徒lóng有仝款ê舉動,表明in kah耶穌親密結連做伙。M̄-koh耶穌tī-chia特別提醒in,做chit種出賣老師ê人,會面臨災禍。

經文:

馬太福音 26:26-26:30

註釋:

Chia所記載ê最後晚餐形式,kah Pôaⁿ過節暗頓ê規定已經無仝,卻是簡略了真chē,而且比較接近早期教會守聖餐ê樣式。使徒保羅tī哥林多前書第十一章23到25節mā寫落來當時聖餐ê狀況。

耶穌the̍h起「餅,先獻上感謝ê祈禱」,這是真典型ê Pôaⁿ過節暗頓之方式。M̄-koh耶穌已經kā chit-ê餅ê意義重新詮釋,講he是teh代表伊ê身軀。

「phâng起杯」,mā是仝款先感謝,伊講he是teh代表伊ê「血」。利未記第十七章11節講血teh代表性命,thang用來贖罪。當耶穌án-ne解釋時,已經teh表明伊beh犧牲性命來救贖人類ê罪à。

第30節講in「唱了一首詩」,通常是詩篇第一一三篇到一一八篇中ê一首。

經文:

馬太福音 26:31-26:35

註釋:

彼得有三pái否認伊kah耶穌之間有師徒關係,chit件事Tī四本福音書中lóng有記載。

第31節,耶穌引用撒迦利亞書第十三章7節ê經文,說明敵人會kā顧羊人掠去,羊群自然會四散去。伊用chit句經文來警告祂ê門徒,當伊受難時,眾門徒lóng會「棄sak」伊。

第32節,耶穌kah門徒有一個約定,當祂koh活了後,會比門徒「先去加利利」,表示伊會tī hia kah門徒會合。然後馬太福音tī第廿八章16節講十一個眾門徒確實是到加利利ê一座山頂去kah耶穌相會。馬可福音並無這續後ê經文,á路加福音則認為門徒一直留tī耶路撒冷,而且koh活了後ê耶穌基督mā是tī耶路撒冷顯現hō͘門徒看,然後chiah帶門徒到伯大尼,耶穌tī-hia升天(參考路加福音廿四:50),然後門徒tńg來到耶路撒冷(參考廿四:52)。約翰福音記載耶穌kah門徒lóng有去加利利,只是門徒認bē出伊就是koh活ê耶穌,直到耶穌kā門徒講怎樣掠魚,hit時,彼得chiah發見he是耶穌。

第33到35節,彼得雖然表示伊一定bē棄sak耶穌,耶穌卻真肯定地kā彼得講tī hit工暗時「雞啼以前」,伊會有「三pái」否認kah耶穌相識。M̄-koh彼得koh khah堅定地表示,就算是beh死,mā會kah耶穌同死,á bē否認祂。

經文:

馬太福音 26:36-26:46

註釋:

耶穌帶門徒離開耶路撒冷,到橄欖山中ê一座「客西馬尼園」去祈禱。所謂「客西馬尼園」,意思是teh指榨橄欖油ê所在。約翰福音講耶穌不時kah門徒來chia,mā因為án-ne,猶大chiah知影怎樣帶人去掠耶穌(參考約翰福音十八:2)。猶大若是無去通報chit-ê消息,猶太人領袖並m̄知耶穌kah門徒tī chia。

Ná親像chìn前仝款,耶穌只帶彼得kah「西庇太ê兩個kiáⁿ」mā就是雅各kah約翰,離開其他門徒到另外一個地方。路加福音講hit-ê距離大約有「hiat一粒石頭」遠(參考廿二:41)。然後伊koh離開in三個,獨自一個人坦覆 (thán-phak)tī土腳向上帝祈禱。

第38節,chit時ê耶穌心內真「憂傷,強強beh死去」,這是做一個人必定有ê心境,因為伊知影離受難ê時間jú來jú接近。

第39節,耶穌向上帝祈禱,mài hō͘祂lim hit-ê「苦杯」,這是teh指十字架ê死亡。M̄-koh伊iáu是清楚地表示,願意順服上帝ê「旨意」。伊án-ne祈禱,連續有三pái lóng仝款(參考第42、44節)。

耶穌每pái祈禱tńg來到chit三個門徒ê所在,結果看見in lóng睏去à。耶穌對彼得kah門徒講,tio̍h警醒祈禱,m̄-koh門徒確實真軟弱,連續三pái,耶穌tńg來到門徒hia,lóng是看見in睏去à(參考第40、43、45節)。就tī第三pái了後,耶穌kā門徒講,出賣伊ê人帶人來掠伊à。

經文:

馬太福音 26:47-26:56

註釋:

來掠耶穌ê人,是tùi猶太人siōng koân議會派出ê警衛,是猶大帶隊。這表示猶大知影怎樣來客西馬尼園chit-ê地點,就由伊帶隊,表示伊所提供ê消息確實可靠。

猶大用「chim」耶穌ê方式作暗號,hō͘來掠耶穌ê人看清楚。因為是深夜,若無注意,可能會掠m̄-tio̍h人。M̄-koh「親」吻耶穌,這原本是teh表示非常歡喜、喜愛ê方式,tī巴勒斯坦ê地區ê學生mā用chit種來表示對老師ê尊敬。

當猶大用chit種方式對耶穌表示熱情kah請安時,耶穌真清楚猶大所ài做ê是甚麼,伊就回應伊:「朋友,你想beh做ê,趕快做!」其實chit句話是teh kā猶大講:「你teh chhòng甚麼,我lóng真清楚,m̄免用chit種方式來偽裝。」

第51節講有一個人拔刀出來「向大祭司ê奴僕砍去,kā伊ê一個耳á削掉」,chit-ê gia̍h刀ê人就是彼得,á hō͘伊削掉耳áê奴僕名叫「馬勒古」(參考約翰福音十八:10)。M̄-koh耶穌隨時kā馬勒古ê耳á醫好(參考路加福音廿二:51)。耶穌禁止門徒用武力ê方式處理tāi-chì。耶穌責備彼得chit種行為,ài伊kā刀收起來,伊講gia̍h刀ê人,「一定會tī刀下喪命」,這mā真清楚講tio̍h用武力ê方式,並無解決問題。耶穌mā責備hiah-ê帶tio̍h刀棒來掠伊ê人,是kā伊當做「暴徒」看。

第56節,chia講tio̍h「聖經上所講」,這可能是引用以賽亞書第五十三章12節。

果然,ná親像耶穌chìn前預言ê,就tī chit時chūn,祂ê眾門徒lóng「逃走」去à。

馬太福音第廿六章57節到第廿八章20節

經文:

馬太福音 26:57-26:68

註釋:

當時ê大祭司是該亞法,伊mā是猶太人siōng koân議會ê主席,議會是由包括大祭司在內共計有71名議員組成,chiah-ê議員是由經學教師、祭司、長老等代表,議會名稱「三kah林」(Sanhedrin)。除了bē-tàng tī夜間審問案件外,開會應該是tī耶路撒冷聖殿區域內ê一個名叫「掘石」(Hall of Hewn stone)ê大廳中開會審問。因為án-ne,ē-tàng看出chiah-ê猶太人領袖明明知影he是錯誤 ê行為,卻為tio̍h beh殺害耶穌不擇手段。

第58節是為第69到75節有關彼得三pái否認、伊kah耶穌之間ê師生關係先作一個前言交帶,mā表示所有門徒lóng離開,m̄-koh彼得是「跟tòe耶穌,來到大祭司ê庭園」。伊混tī警衛中間,想beh知影耶穌受掠了後會有怎樣ê發展。伊就是tī chia被認出來kah耶穌有關係ê。

第59到61節,chiah-ê猶太人領袖竟然是「chhōe假證據控告耶穌」,這是真無應該ê事,因為已經違背十誡ê第九誡,莫怪耶穌會用先知以賽亞ê 話kā in譴責,講in雖然口口聲聲講上帝,m̄-koh,心確實是遠離了上帝(參考馬太福音十五:7—9)。In雖然努力chhōe證據,iáu是chhōe bē出來,最後有「兩個人上前指稱」耶穌ê罪狀,講伊ē-tàng「拆毀上帝ê聖殿,三工內koh kā它重建起來」,chit句話是耶穌tī潔淨聖殿所講(參考約翰福音二:19)。

第62到63節,耶穌「默不作聲」,chit種態度mā是伊差派門徒出去傳福音ê時,hō͘門徒ê交帶(參考馬太福音十:19—20),chit種方式mā是受難奴僕呈現出來ê特點(參考以賽亞書五十三:7)。

「我指永遠活ê上帝ê名命令你chiù-chōa」,這是一句真嚴肅,因為一定tio̍h用chiù-chōa來講話,á猶太人chiù-chōa,一定tio̍h用上帝ê名chiù-chōa,表示上帝深深知影人內心ê意念。M̄-koh諷刺ê是出tī大祭司ê口。

「你是m̄是基督、上帝ê Kiáⁿ?」chit對耶穌來講是一個攸關生死ê問題。如果耶穌講「m̄是」,就無甚麼問題。如果講「是」,ná伊隨時會hōng判做褻瀆上帝,thang處死刑(參考利未記廿四:16)。

「這是你講ê」,chit句話原本ê意思是「你講ê是」,表示耶穌用肯定ê語句回答「是」。然後伊舉出但以理書第七章13節,以及詩篇第一一○篇1節當做回答,耶穌表示家己就是tùi天頂beh降落來審判世界ê。

第65到66節,大祭司一聽tio̍h耶穌chit種回答,心中認定耶穌已經陷落in設計ê陷阱中à。雖然表面上看起來伊用「撕裂了家己ê衫褲」來表示極大悲痛ê意思,其實內心應該是非常歡喜ê。伊講耶穌「侮辱了上帝」連續講了兩pái,表示大家lóng m̄免koh再懷疑,耶穌真正講出褻瀆上帝ê話。就án-ne,大家lóng講「伊該死」,就án-ne,in完成了久長以來就想beh除掉耶穌ê ǹg望。
第68節,chit節真清楚描述猶太人眾領袖怎樣侮辱耶穌,mā thang看出in心中確實是痛恨耶穌到極點。


經文:

馬太福音 26:69-26:75

註釋:

Chit段記載彼得連續三pái否認kah耶穌之間ê師徒關係,而且連家己是「加利利人」mā否認。

第69到72節,chit段經文中講有兩個婢女前後lóng認出彼得是kah耶穌有關係。「加利利人耶穌」,這表示tī加利利地區傳天國信息、行神跡奇事ê耶穌。Á「拿撒勒ê耶穌」,表示伊確實是一個真實ê人,生活tī拿撒勒hit-ê小鄉村。M̄-koh這兩pái彼得lóng極力否認伊kah耶穌有任何關係,m̄-nā án-ne,伊iáu用「chiù-chōa」ê方式來否認。

第73節,koh有另外一個人出來指證彼得確實是kah耶穌仝伴ê人,因為伊ê加利利人「口音」hō͘人認出來伊就是加利利人。

第74到75節,chit節講出彼得ê軟弱,伊明明是講白賊,iáu敢the̍h上帝ê名來chiù-chōa,這是真無應該ê事。因為既然tio̍h用上帝ê名chiù-chōa,就一定tio̍h誠實ê講出來。如果無,就等於是teh亂使用上帝ê名,等於是做違背十誡之第三誡。當彼得tú用講白賊來chiù-chōa ê時,「雞啼了」,chit-ê叫,mā叫醒了彼得ê心靈,伊因為án-ne soah感覺見笑、艱苦心,行出去「痛哭起來」。

經文:

馬太福音 27:1-27:2

註釋:

猶太人領袖決定beh處死耶穌,m̄-koh,in無處死ê權柄,因為耶穌m̄是現行犯,á是tī聖殿裡違反律法。因為án-ne,一定tio̍h送交hō͘羅馬當局審判同意,chiah ē-tàng判處死刑(參考約翰福音十八:31)。In「商議」好,決定beh kā耶穌「處死」。

Koh講,已經到清早時間,若是不趕緊kā耶穌移送hō͘彼拉多,萬一被民眾知影in掠了耶穌,恐驚引起koh khah大ê麻煩。

經文:

馬太福音 27:3-27:10

註釋:

除了馬太福音有記載猶大ê死亡,其它三本福音書lóng無記載。另外,tī使徒行傳第一章18到20節mā有記載。M̄-koh所記載猶大死亡ê經過,kah馬太福音並m̄是完全仝款。

第3到4節,chit兩節mā是引起討論ê經文,kah-ná猶大並m̄是真正為tio̍h貪愛錢財chiah出賣耶穌,kah-ná另外有隱情ê款。伊kā三十塊銀子帶tńg去見祭司長kah長老,表示伊做殺害「無辜ê命」,á這是上帝所無法度允准ê事。M̄-koh chiah-ê宗教領袖拒絕接受伊想退tńg來ê錢,因為hiah-ê錢沾滿了無辜ê血。In ài猶大家己去承擔chit種罪。Ē-sái講是tī第24節,猶太人卻因為chiah-ê宗教領袖ê煽動,表示願意承擔落來。其實,siōng需要承擔chit種罪狀ê,就是chiah-ê宗教領袖。

第5節,chia講猶大是吊tāu自殺,á使徒行傳第一章18節講伊是因為「墜下,五臟逬裂來死」。

第6到8節,chia kah使徒行傳第一章記載ê仝款,就是猶大所得tio̍h ê這筆出賣耶穌ê錢,後來就是買了一塊當做埋葬出外人ê墳地,稱做「血田」。
第9到10節,chit兩節其實引用撒迦利亞書第十一章13節。M̄-koh馬太福音作者特別指出是先知耶利米ê話。無錯,先知耶利米有買過一塊田地(參考耶利米書三十二:6—15)。不過耶利米書第十九章1到13節ē-tàng反應chit段馬太福音chit兩節經文ê意義。

經文:

馬太福音 27:11-27:14

註釋:

馬太福音簡略地敘述耶穌tī彼拉多面前受審,強調耶穌iáu是仝款,拒絕回答任何問題。Chit件事hō͘彼拉多感覺非常奇怪。為甚麼耶穌不回答?因為耶穌真清楚知影,所有控告伊ê罪名lóng m̄是事實。

當彼拉多問伊「是猶太人ê王mah」?耶穌ê回答就是真簡潔有力:「這是你講ê。」chit句話mā有兩種意思:一是「無錯,我是猶太人ê王。」另外一種意思是:「你講看,我是m̄是?」

Tùi第12節來看,chiah-ê宗教領袖顯然iáu控告了耶穌真chē罪狀,m̄-koh馬太福音作者並無記錄出來。

經文:

馬太福音 27:15-27:26

註釋:

已經無資料thang chhōe出甚麼時開始,羅馬統治當局會tī猶太人過Pôaⁿ過節ê時,tháu放一個死刑犯hō͘ in。

第16到18節,chia講tú好有一個「出名ê囚犯叫『耶穌』巴拉巴」,馬可福音第十五章7節講伊是tī參與「暴亂」中thâi人。因為án-ne,彼拉多希望tháu放耶穌,取代kā原本就該處死ê叛亂份子chit位「巴拉巴」。馬太kah馬可chit兩本福音書lóng強調,認為彼拉多清楚知影chiah-ê猶太人領袖是因為嫉妒耶穌chiah beh害死耶穌。

第19節,chit節是馬太福音特有ê資料,說明耶穌的確是無辜ê。彼拉多ê bó͘因為作惡夢,夢tio̍h關係耶穌被謀害ê事。因為án-ne,伊希望彼拉多「mài管」,意思是希望伊tháu放耶穌。

第20到21節,koh khah清楚chiah-ê猶太人領袖就是一再傳播假消息,hō͘民眾陷入錯誤 ê認知中。這等於是kah作假見證陷害人仝款。In明明知影bē-tàng,卻一再án-ne做。彼拉多無辦法,只好順tio̍h民眾ê喊叫聲,tháu放巴拉巴。

第22到23節,民眾m̄-nā beh處死耶穌,iáu特別指明tio̍h kā耶穌釘死十字架,這tú好是耶穌tī第三pái預言家己teh beh tī耶路撒冷受難時,有講過會hō͘人釘死十字架(參考馬太福音二十:19)。

第24到25節,chit兩節mā是馬太福音特有ê資料,mā回應了第19節彼拉多ê bó͘警告丈夫ê話。彼拉多用「洗手」表示伊kah判耶穌死刑無關。另外一方面mā說明民眾ê呼聲贏過彼拉多該堅持ê公義審判。Á第25節民眾表示願意為chit件流無辜ê血付出代價,承擔罪責。

第26節,彼拉多做出判決,tháu放巴拉巴,然後「鞭phah」耶穌,這tú好是耶穌ê預言提起ê事(參考馬太福音二十:19)。

經文:

馬太福音 27:27-27:31

註釋:

這就是當時一個人beh被釘十字架chìn前受tio̍h侮辱ê情景。

第28節,「深紅色ê棉袍」,這真可能是向羅馬軍官借用,m̄-koh khah可能是用紙糊起來染紅色ê。

第29節,兵丁the̍h「藤條」,這是蘆葦ê莖,kā它當做象徵國王ê權杖。然後koh再用chit支蘆葦ê莖phah耶穌ê頭。

第30到31節,羅馬士兵用極盡侮辱耶穌ê方式,這通常lóng是teh對待被判釘十字架死刑ê囚犯,teh執行chìn前會tú-tio̍h ê經歷,為tio̍h是beh hō͘囚犯感覺自卑到極點。

經文:

馬太福音 27:32-27:44

註釋:

第32節,當時ê羅馬軍人,有權強迫被統治ê人民做義務工作(參考馬太福音五:41)。古利奈ê西門是tī-chiateh看耶穌giâ十字架去受刑,伊卻因為án-ne soah被「強迫」替耶穌背上十字架。

第33到34節,「各各他」,可能是專門teh執行十字架之刑ê刑場。Chit種「攙tio̍h苦膽ê酒」,可能是有麻醉ê功效,m̄-koh耶穌m̄ lim。

第35到36節,kā受刑人身上ê物件歸hō͘執行者,這是一種風俗。Mā是詩篇第廿二篇18節詩歌所提起ê。

第37節,十字架頂ê牌á竟然是寫tio̍h:「猶太人ê王耶穌。」認真講起來這mā對猶太人極大ê諷刺,因為表示被彼拉多釘死tī十字架頂ê人,m̄是一般人,卻是猶太人ê王。

第38節,chia所講ê「暴徒」,mā thang當做強盜。

第39到44節,民眾lóng tī譏笑耶穌,而且kā耶穌teh講in毀壞聖殿,伊tio̍h用三工重建起來,當做笑話來諷刺伊。In m̄知耶穌ài做ê是一場心靈改革,而且是beh用伊ê死來完成。

Chit句「tùi十字架頂落來」,就kah-ná魔鬼teh試探耶穌ê時所講ê,ài祂tùi聖殿siōng koân ê所在跳落來仝款(參考馬太福音四:6)。大家lóng teh譏笑耶穌,連hit-ê被釘十字架ê「暴徒」mā是án-ne。這ná親像耶穌tī十字架頂所講ê,in m̄知家己teh做甚麼(參考路加福廿三:34)。

經文:

馬太福音 27:45-27:56

註釋:

馬太福音只記載耶穌tī十字架頂講「我ê上帝,我ê上帝,你為甚麼棄sak我」chit句而已。Chit句話是引用詩篇第廿二篇1節a句。罪,siōng大ê特徵,就是hō͘人kah上帝隔離。耶穌是背負tio̍h人類ê罪死tī十字架頂,mā因為背負ê罪極重,感覺就是kah上帝隔離。

第50節講耶穌「koh大喊一聲,氣就斷了」,chia作者並無說明ná大喊一聲講ê是甚麼內容,約翰福音第十九章30節講伊喊「成了」了後「氣就斷了」。

第51到53節,聖殿裡ê「帳帷」,這是隔開到聖所kah祭司院ê布簾,忽然「tùi上到下裂做兩半」,這是有象徵性ê意義,表示因為耶穌ê死,hō͘人kah上帝之間原本ê隔閡,重新修復(參考希伯來書十:19—20)。

Chit段經文是馬太福音特有ê資料,講tio̍h原本已經往生ê聖徒,lóng因為耶穌ê死,tùi墳墓中koh活起來。

第54節,軍官kah士兵看見此景lóng非常驚惶,因為in從來m̄-bat看過chit種景象,tùi án-ne lóng同聲見證耶穌「真正是上帝ê Kiáⁿ!」

第55到56節,只有留落來看耶穌被釘十字架ê,是一kóa「婦女」,in是「tùi加利利跟tòe耶穌來服事祂ê」。Chiah-ê婦女一直是耶穌傳福音事工支持ê主力。In無逃走,而且守tī墳墓邊(參考第61節)。

經文:

馬太福音 27:57-27:61

註釋:

馬太福音作者講chit位安葬耶穌ê亞利馬太ê約瑟,伊既是財主,mā是「耶穌ê門徒」。伊mā是猶太人siōng koân議會ê議員(參考馬可福音十五:43),過去可能因為驚猶太人kā in趕出會堂,á m̄敢公開承認kah耶穌ê關係(參考約翰福音十二:42)。當伊向彼拉多請求收殮耶穌ê身軀時,真緊to̍h得tio̍h允准。然後伊kā家己新買來鑿成ê墓穴當做耶穌安葬ê路用。

第59節,約瑟用「清氣ê麻紗包裹」耶穌ê身軀,約翰福音第十九章39節講伊kah尼哥德慕同齊用30公斤重ê香料,抹tī麻紗頂糊tī耶穌ê身軀。

猶太人ê墳墓是鑿磅空而成,因為án-ne,封守墳墓ê方式,是用另外一塊大石頭擋teh磅空ê洞口。抹大拉ê馬利亞kah另外一個馬利亞同齊守tiâu墳墓。

經文:

馬太福音 27:62-27:66

註釋:

猶太人領袖驚耶穌koh活,因為án-ne,除了石頭擋teh墳墓外,in另外chiah-koh請求彼拉多「下令嚴密守護墳墓」。In強調這至少tio̍h過三工,因為三工後身軀就會腐爛,依in ê看法,三工後就bē有死人koh活ê可能性出現。M̄-koh in bē記得拉撒路是tī墳墓中四工,而且身軀lóng腐爛臭à(參考約翰福音十一:39),m̄-koh耶穌iáu是hō͘伊koh活起來。Chiah-ê猶太人領袖ê請求得tio̍h彼拉多ê同意,m̄-nā帶封條去貼tī石頭殼頂,而且派兵看守。M̄-koh koh活是上帝奇妙ê作為,豈是人ê氣力阻擋會tiâu?

經文:

馬太福音 28:1-28:9

註釋:

是婦女tāi先看tio̍h koh活ê主耶穌,m̄是門徒。而且iáu是in kā耶穌koh活ê信息傳達hō͘眾門徒知影ê。

「強烈ê地動」發生,「主ê天使tùi天頂降落來」,天使「Kā石頭滾開」。「容貌像sìh-nà」以及潔白ê衫褲,這真親像耶穌chhōa三個門徒上山去祈禱ê時,耶穌變形像ê樣式(參考馬太福音十七:5)。

第5到7節,這是天使對chit兩位馬利亞講,ài in去kā門徒講耶穌已經koh活,而且beh tī加利利kah in相會。耶穌被釘十字架ê時chūn,門徒先走。M̄-koh,chiah-ê婦女是留落來,而且看守到耶穌死去,被埋葬。門徒iáu teh bih起來ê時,眾婦女則勇敢去探墓,結果in tāi先知影耶穌koh活ê大好消息,兩個之間cheng差好大ah!

第8到10節,koh活ê耶穌親自顯現hō͘ chit兩位婦女看,koh一pái叮嚀in去kā門徒講。Tio̍h注意第9節,chia講婦女「攬耶穌ê腳拜祂」,表示koh活ê耶穌是實體ê koh活,m̄是虛幻ê,á是一般人所講ê只有「靈魂」。


經文:

馬太福音 28:11-28:15

註釋:

第11到12節,除了婦女看見墳墓發生ê大事,連顧守ê兵丁mā看見。因為án-ne,有人去通報猶太人領袖,chiah-ê猶太人the̍h錢o͘-se羅馬ê兵丁。

第13到14節,chiah-ê猶太人領袖m̄-nā tī害死耶穌ê事頂面作假見證,連耶穌koh活ê chit件大事mā是仝款,用錢財o͘-se ê方式想beh阻止上帝奇妙ê神跡傳揚出去,可見in心中根本to̍h無上帝。

第15節,羅馬兵丁原本就是愛錢財贏過事實,因為án-ne,in聽從了chiah-ê猶太人領袖ê話。M̄-koh上帝ê神跡並無是án-ne就ē-tàng擋teh bē傳出去。

經文:

馬太福音 28:16-28:20

註釋:

門徒照耶穌kah in ê約束,tńg去加利利相會,chia並無說明是tó一座山,mā有可能是耶穌變形像ê hit座山。

第17節,chit節講tio̍h in一看見耶穌就拜祂,m̄-koh tī in中間有人iáu是「心內giâu疑」。怎樣會án-ne?Á chit種giâu疑一直到五旬節聖靈降臨ê時chiah全部清醒起來。

第18到20節,這是耶穌hō͘門徒ê使命,ài in去世界各地宣揚福音,帶領人來受洗。Chit種講法已經是早期基督教會帶領人來加入信仰團契之規矩,一定tio̍h受洗chiah算。

重新查詢