重新查詢
經文:

路加福音 1:1-1:4

註釋:

四本福音書中,只有路加福音ê作者真清楚tī chit段踏話頭中就kā讀者講,伊寫chit本福音書ê方式──「tùi頭詳細考察過」,並且想「按照秩序」,以及寫chit本福音書ê主要目的──是beh hō͘讀者「知影所學ê道是正確ê」。

第1節mā hō͘咱知影,早期教會中已經有真chē人用文字記落來有關耶穌ê事蹟,真可惜chiah-ê資料無存留落來,若無,對咱認bat耶穌ê所講、所行一定koh khah有幫助。

經文:

路加福音 1:5-1:25

註釋:

就ná親像我teh紹介路加chit位作者寫作上ê特色ê時所講ê,作者歡喜使用「天使」kah「聖神」chit兩項ê資料。天使,是上帝ê使者,hō͘ 上帝差遣來kā人講上帝beh成就ê事。另外一方面,作者mā歡喜做歷史上ê考證,因為án-ne,一開始就kā咱講發生ê時代背景,伊提起「希律王統治猶大ê時chūn」,簡單ê一句話,卻講明時間是tī主前卅七年到主後四年。請注意,chit位希律王,一般lóng kā伊稱做「大希律」,對猶太人來講,伊siōng大ê貢獻恐驚就是替猶太人修建耶路撒冷聖殿,以及各種公共設施,並且對救濟貧困ê猶太人真用心。伊ê家族後來mā被部分猶太人擁護,親像希律黨派ê人,就是用擁護希律家族繼續統治猶太人地區á得名。

A. 第13節,「約翰」這是希伯來名,意思是「上帝是仁慈ê」。(以後導讀部分lóng會kā伊稱做「行洗禮約翰」,來區別耶穌ê門徒約翰。)

B. 第15節提起約翰出世後就馬上被歸類做「離俗人」(和合本用「拿細耳人」,請參考舊約聖經民數記六:1—21)。類似無kiáⁿ,後來tī祈禱中祈求上帝賜 hō͘伊kiáⁿ,並得tio̍h應允ê,父母常kā伊奉獻成做「離俗人」,聖經中有bē少chit種例,如先知撒母耳(撒母耳記上一:20—22)、參孫(士師記十三:2— 7)。

C. Chit節mā提起約翰一出世會hō͘「聖神充滿」,作者用chit句話teh表示,約翰以後ê工作lóng是聖神teh主導,kah耶穌tùi約旦河受洗後ê情形仝款(參考路加福音三:22)。 這說明一件真重要ê認bat:為福音所做ê事工lóng是聖神ê事工,m̄是人ê能力成就上帝ê事,是聖神藉tio̍h人彰顯上帝ê能力。

D. 第19節特別提起chit位天使名叫「加百列」,chit-ê名mā出現tī但以理書第八章16節。聖經只有兩個地方提起天使ê名,其一tī-chia,另外一處tī舊約但以理書第十章13節「天使長米迦勒」。



經文:

路加福音 1:26-1:38

註釋:

仝款是天使加百列,伊奉差遣去向撒加利亞傳達上帝ê信息,半年後mā去向馬利亞宣佈上帝ê旨意。二者之間siōng大ê差別是,撒迦利亞kah伊ê bó͘伊利莎白兩人「lóng已經老了」(一:7),á馬利亞卻是iáu未結婚ê cha-bó͘-gín-á。

A. 第35節作者koh一pái提起「聖神」kā降臨tī馬利亞身上,這表示馬利亞身上所成就ê事,m̄是伊家己ê能力,卻是tùi上帝來親自ê作為。

B. 第37節是kui本聖經beh kā咱講ê信息之一 ──tī上帝無一件事是做bē到ê。因為上帝是創造ê上帝,宇宙萬物ê性命lóngtùi上帝來ê創造,上帝ē-tàng tùi「無」到創造「有」,mā ē-tàng hō͘「有」成做「無」。換句話講,無上帝,所有ê一切lóng會歸tī「無」。

C. 一般人siōng-kài困擾ê問題是:處女怎樣ē-tàng有娠生kiáⁿ?有ê人甚至講,如果chit件事無法度hō͘ in理性ê答案,伊就無法度接受基督教ê信仰。Chit種想法並m̄是「對」á是「不 對」ê問題,問題ê癥結是:怎樣了解宗教信仰ê問題。信仰ê事,並無全然thang用理性明白ê,ná親像「愛」mā是án-ne。上帝如果ē-tàng從來m̄-bat有ê中間創造「有」, á beh tùi一個處女ê身上降落聖神有娠,koh有甚麼無法度ê事?

D. 基督教ê信仰基礎tī耶穌koh活,m̄是tī伊ê降生。就ná同使徒保羅所講ê:「基督若無koh 活,阮所傳ê是空虛無實,lín ê 信mā 是空空。(全民版)」(哥林多前書十五:14)因此,早期ê基督徒無人會想談起耶穌降生ê事,mā無人會注意tio̍h耶穌降生ê由來,siōng早寫成ê馬可福音書就無記載關於耶穌降生ê事蹟。
經文:

路加福音 1:39-1:56

註釋:

第41節koh一pái看tio̍h作者用「聖神充滿」,表明上帝奇妙ê作為發生tī chit兩位被天使預知teh beh生嬰á ê婦女身上。聖神所代表ê是:上帝親自在作工,m̄是人ê能力,是上帝ê。

第46到56節chit篇「馬利亞尊主頌」一直是基督教會久長以來siōng歡喜頌讚ê詩歌。Mā是路加福音頭前兩章中,四首詩歌中ê一首(另三首是:一:68— 79,二:14,二:29—32)。Chit首詩歌充分說明耶穌將來傳道工作中所beh扮演ê角色。

經文:

路加福音 1:57-1:80

註釋:

行洗禮約翰ê出世,chiah解除撒迦利亞因為心中懷疑所帶來ê「懲罰──啞口」,伊一開嘴就是頌讚上帝ê恩典。

A. 第68到79節,就是撒迦利亞頌讚ê詩歌。因為chìn前有天使ê預言告知,所以撒迦利亞知影伊ê gín-á約翰將來所beh扮演ê角色,以及工作,因為án-ne,chit首詩歌mā是teh表明伊對家己ê gín-á約翰ê認知,親像第76節形容約翰是「至koân上帝ê先知」,á tī第32節天使kā馬利亞講中,形容耶穌kā「hông稱做至koân上帝ê Kiáⁿ」,這 明顯ê講出in兩人之間ê位階無仝。Kah後來行洗禮約翰對詢問伊身分ê人,伊lóng真清楚講出家己是替chit位「至koân上帝ê Kiáⁿ」脫鞋á mā不配(路加福音三:16)。

B. 傳福音工作ê人,就是一定tio̍h先清楚家己ê角色,知影家己ê使命。絕對無法度hō͘家己「成做」上帝,這是非常重要ê認bat。

C. 看,行洗禮約翰是tòa tī「曠野」,koh tī「曠野」直到伊出來傳福音。曠野,這是訓練一個人順服tī上帝ê旨意siōng好ê場所。Ná親像摩西hō͘ 上帝呼召beh去埃及帶以色列人出埃及ê時,上帝kā伊帶到「曠野」,用長到四十年ê時間訓練伊hō͘伊完成被賦予 ê任務。

經文:

路加福音 2:1-2:7

註釋:

咱koh一pái看tio̍h作者路加真清楚交帶耶穌出世時代背景──羅馬皇帝奧古斯都,以及敘利亞總督居里扭。

A. 羅馬帝國之所以命令所有被統治區ê人民tio̍h辦理戶口登記,主要ê目的有二:其一是為tio̍h beh徵稅,這是凡年滿十四歲ê人lóng得納人頭稅,直到年滿六十五歲。另外一個是 徵兵,m̄-koh,猶太人m̄免服兵役,因為in ê叛亂事件siuⁿ chē,徵猶太人去服兵役,等於提供in武器仝款ê危險。M̄-koh,猶太人bat為tio̍h beh抗拒chit種「人頭稅」,有過 「叛亂」,結果iáu是hō͘鎮壓了落來。

B. 因為居里扭是tī主前六年到四年,kah主後六年到九年擔任敘利亞ê總督,因為án-ne,如果這是第一pái進行戶口普查,án-ne,耶穌應該是tī主前六年到四年之間降生chiah-tio̍h。 C. 作者路加特別提起耶穌降生ê所在是tī馬槽,原因是客棧已經客滿。原來回鄉去登報戶口ê人滿多ê。馬槽,用腳頭u想mā知這是馬隻teh歇睏ê所在,mā是馬夫過瞑ê所在, 耶穌就tī chiah-nih卑賤ê所在降生人間。

經文:

路加福音 2:8-2:21

註釋:

Kah馬太福音所記述ê tú好顛倒ê所在,是馬太福音講幾位東方星象家因為注意觀察,發見到耶穌降生ê星出現,因為án-ne開始chhōe而來到耶路撒冷。路 加福音soah講上帝差遣天使去kā hiah-ê夜間露宿tī曠野ê顧羊人講,hō͘ in知影耶穌已經降生tī伯利恆。這提供真好ê思考空間,to̍h是受過良好教育ê人,一定tio̍h家己去chhōe,m̄-koh,卑微ê人,上帝自然會設法hō͘ in知影怎樣認bat救主。

A. 天使Tī chit段經文中扮演真重要ê角色,m̄-nā是通知顧羊人耶穌降生ê好消息,mā是o-ló上帝ê拯救恩典降臨ê歌手。

B. 第17節hō͘咱看tio̍h顧羊人看見耶穌後,就kā天使kā in講ê事「kā大家講」。看,作者路加筆下siōng卑微ê顧羊人,mā知影beh kā in得tio̍h ê信息傳hō͘別人,並且歌頌o-ló上帝。

C. 第21節講八天後,耶穌接受割禮,這是猶太人ê傳統(創世記十七:11—12),表明in kah上帝之間有立約ê關係。

經文:

路加福音 2:22-2:38

註釋:

第22節講「按照摩西律法ê規定,潔淨ê日期滿了」,這是根據利未記第十二章1到4節ê規定,馬利亞前後總共有四十工ê時間,是tī「無清氣」ê時期內,chit段期間內,bē-tàng進入聖殿,mā bē-tàng觸摸任何聖物。Koh講,根據摩西律法ê規定,大kiáⁿ一定tio̍h獻hō͘上帝(出埃及記十三:12—13),因為án-ne,象徵 ê方式是帶tio̍h gín-á到聖殿去,用「五塊銀á」贖tńg來(請看民數記十八: 15—16)。

A. Chit段經文hō͘咱看tio̍h聖神做工tī西面ê身上,hō͘伊thang一看見耶穌就知影上帝ê拯救已經來臨。這mā teh說明一件信仰上真重要ê認bat:人ē-tàng明白上帝ê救恩,m̄是人ê能力,卻是聖神ê感動得tio̍h ê。

B. 第36節ê女先知安娜,伊名ê意思是「恩慈」。伊可能tī約瑟kah馬利亞帶耶穌到聖殿去完成一定tio̍h ê手續ê時,見tio̍h耶穌,á看出耶穌就是上帝所差遣到世間來ê救主。因為án-ne,伊就極力地宣講有關耶穌ê事。可惜後來福音書lóng無koh一pái提起關係伊kah西面ê事。

經文:

路加福音 2:39-2:52

註釋:

有關耶穌童年ê記事,路加福音算是tī福音書中記載siōng chē而且詳細ê,m̄-koh mā只是到chit章就結束loh。Tùi十二歲以後,一直到第三章23節講「耶穌開始傳道ê時chūn,年紀約三十歲」止,chit段青少年時代ê記事四本福音書lóng欠缺。

A. 照猶太人ê規定,兒童ê教育是tùi家庭開始,á負責chit項教育工作ê是老母。伊一定tio̍h教導gín-á認bat摩西律法,mā講解以色列民族ê歷史。

B. 第41節講「耶穌ê父母每年lóng上耶路撒冷去守Pôaⁿ過節」,這差不多就是猶太人ê習慣,mā是in siōng大ê心願。

C. 十二歲,tī猶太人是結束兒童ê時期,tùi十三歲開始就beh盡猶太人ê責任,加入猶太教ê組織,以及負擔聖殿稅。因為án-ne,十二歲thang講是非常重要ê一年,因為chit年 父母帶gín-á到聖殿去ê時chūn,猶太人ê經學教師lóng會測試chiah-ê gín-á對摩西律法ê認bat jōa-chē?對家己民族ê歷史了解夠無夠?In tùi chia thang分辨出gín-á ê父母是m̄是盡 了責任教導gín-á。

D. 第49節ē-tàng看出耶穌tī小小年紀就已經知影伊kah上帝之間ê特殊關係。M̄-koh,伊無因為án-ne就真隨便家己tī世間ê生活,顛倒,是「事事lóng順從」約瑟kah馬利亞ê教導。

經文:

路加福音 3:1-3:20

註釋:

咱koh一pái看tio̍h作者路加提供詳細ê史料,kah伊tī本冊開始所講ê「詳細查考過」ê態度有關。

A. 第2節講行洗禮約翰tī曠野受tio̍h上帝ê呼召出來傳福音。Chit節回應第一章80 節講ê:「伊tòa tī曠野,直到伊tī以色列人中公開活動ê時chūn。」

B. kā第3節行洗禮約翰所傳揚ê「tio̍h悔改,接受洗禮,上帝就赦免lín ê罪」chit句話,比較第8節「tio̍h用行為證明lín已經悔改」,ē-tàng看出悔改m̄是思想ê模式,mā m̄是靜態ê,卻是有具體ê行動表現tī生活、工作中。

C. 作者路加提供siōng特別ê資料是,來接受洗禮ê人包括一般民眾,iáu有抽稅ê、兵丁。這kah馬太福音講起來接受洗禮ê人是「真chē法利賽人kah撒都該人」(馬太福音 三:7)真無仝款。作者路加所關心ê是當時社會siōng看bē起ê對象,chiah-ê人卻lóng知影tio̍h悔改,並且表明願意用行為來證明in真心悔改,因為án-ne,in lóng異口同聲teh問行洗禮約翰:「咱該做甚麼?」,真心悔改ê人chiah會問chit-ê問題。

經文:

路加福音 3:21-3:38

註釋:

前三本福音書lóng以行洗禮約翰為耶穌行洗禮當做伊工作ê結束。路加福音真清楚講耶穌出來傳福音ê時chūn,年紀約三十歲。

A. 第21節講耶穌tī「祈禱」ê時chūn,「天開了」,這是象徵性ê講法,teh表示上帝kah耶穌之間親密ê關係。作者mā常常描述耶穌是用「祈禱」做伊工作中ê主要力量(請參考五:16、六:12、九:18、28、29、十一:1、廿二:32、41、廿三:34、46)。

B. 路加福音書所寫耶穌ê族譜kah馬太福音書所記載ê無仝;路加福音是寫到亞當──人類ê始祖。作者有意用chit種方式表明:所有ê人lóng是來自仝一個家族,無猶太人 kah外邦人ê分。Á耶穌降生就是為tio̍h所有ê人(二:10)。Koh講,作者路加mā比較重視「確實性」,伊是根據自然法則編寫族譜,mā就是甚麼人kah甚麼人生ê gín-á,就寫ná 個人ê傳承,無一定tio̍h如馬太福音因為是為猶太人寫ê,所以mā重視「兄終弟kah」ê關係。第三點:路加khah強調ê是:耶穌就kah咱一般人仝款,祂就kah咱做伙生活,因為án-ne,伊講chit份族譜是「tī人ê眼中」來看,就是一般人ê看法。

經文:

路加福音 4:1-4:13

註釋:

咱有看tio̍h聖神teh做工。「四十」,這是一個表示「完整」ê數目,親像:摩西tī曠野生活了四十年後,接受呼召去帶領以色列民族出埃及;koh以色列民族tī曠野 漂流了四十年後,chiah會得thang進入迦南。Thang kā「四十」當做真正數目,mā thang kā它當做一個人ē-tàng容忍iau餓ê siōng koân層次。路加kā一個人siōng koân ê境界就是宗教心靈,因 此,伊kā魔鬼帶耶穌到「聖殿ê siōng koân處」排tī第三pái ê誘惑,tī chit-ê階段是beh對上帝挑戰,hō͘人感覺家己「會親像上帝」(參考創世記三:5)仝款ê偉大。

第13節講魔鬼是「暫ê時」離開耶穌。Mā就是講,魔鬼並無離開,它iáu teh chhōe機會,隨時會對耶穌下手誘惑。

經文:

路加福音 4:14-4:30

註釋:

耶穌tùi出世到工作,聖神lóng tī伊身上kah伊同齊同工,這是路加寫此福音書siōng大ê特色之一。

A. 路加福音tī編寫上就真無仝款,伊kā耶穌開始工作ê第一件事,就是tńg來到家己ê故鄉拿撒勒,這真清楚teh說明:是因為猶太人拒絕耶穌,ná親像耶穌ê鄉親拒絕耶穌 仝款,因為án-ne福音chiah會往外邦人中傳開來。馬太福音則以耶穌醫好一位患癩ko病患當做開始傳福音工作ê第一件事,有意用chit種方式表明:耶穌來到世間,就是beh 調kah人kah人之間ê距離,進一步koh hō͘人kah上帝ê距離ē-tàng修好。馬可福音則以耶穌tī會堂醫好一位被污靈附身ê人開始伊傳福音ê工作(一:21—28),這teh表示ê是,耶穌來到世間,就是beh清除人心中ê污穢,hō͘人ē-tàng以潔淨ê心,tńg來到上帝ê面前。

B. 路加福音mā是記載耶穌被鄉親拿撒勒人拒絕ê經過siōng詳細。因為耶穌所讀ê經文是用賽亞書第六十一章1到2節,伊並且tī讀完後做一個結論講,先知ê預言已經應驗ā(21節)。換句話講,耶穌是kā拿撒勒人講,舊約先知所預言ê,已經tī伊ê身上應驗了,伊就是in所期待已久ê彌賽亞。Mā因為án-ne,hō͘拿撒勒人無法度接受,尤 其是當耶穌tī第26到27節所引用ê譬喻中,lóng是teh o-ló外邦人ê信心ê時,in非常受氣,想beh kā耶穌活活地處死,m̄-koh,耶穌行個「神跡」,「tùi容地tùi人群中行 出去。」

經文:

路加福音 4:31-4:44

註釋:

因為家己ê鄉親拿撒勒人拒絕伊,因為án-ne,耶穌chiah轉往迦百農城去。以後耶穌就是用此城做伊傳福音ê中心地區。

A. 作者路加kā趕出污鬼神跡ê重點khǹg tī第35節「污鬼tī大家面前kā hit人摔倒……一點á mā無傷害伊」,chit節經文teh表明:耶穌ê醫能力,大大超過人所ē-tàng理解kah想 像之外。Mā因為伊有án-ne特殊ê醫能力,因為án-ne,tī安息日ê時間一過(日頭落山ê時chūn,表示已經是過了安息日ê時間,猶太人算時間是tùi下晡六點日頭落山ê時開 始算起),大家就kā真chē病患帶來chhōe耶穌,希望伊ē-tàng醫in。耶穌無拒絕,伊是一一醫好in ê病。

B. 第43節說明耶穌到世間來,並m̄是為tio̍h beh行神跡、醫病,卻是為tio̍h beh「傳揚有關上帝主權(上帝國度ê意思)ê福音」,chit種認bat是真重要ê。因為án-ne,明白上帝國度ê信息,比身軀ê疾病得tio̍h醫koh khah重要。

經文:

路加福音 5:1-0:11

註釋:

五:1—11節,路加福音是描寫彼得兄弟kah約翰兄弟兩對兄弟跟tòe耶穌ê經過siōng詳細ê。作者以非常特殊ê筆法,將彼得之所以決定「放下所有ê,跟tòe了耶 穌」,是因為伊親身經驗到耶穌tī伊身上ê奇妙作為。請注意chit段掠魚ê經驗,mā是後來約翰福音ê作者teh描寫koh活了後ê耶穌,顯chit-má門徒面前ê時,彼得ê反應kah這 次掠魚ê經驗相當接近(請參考約翰福音廿一:3—7)。
  chit段掠魚ê故事,mā kā我講 們:一個人beh跟tòe耶穌,m̄是beh帶家己ê經驗、chiah ē-tàng,á是beh認清耶穌到底是甚麼人,chit點chiah重要。彼得兄弟kah約翰兄弟lóng是掠魚ê專家,m̄-koh,tī耶穌面前chiah-ê chiah 幹、專長,並無一定是有用,除非有順服ê心,願意聽主耶穌ê指示「拋網」。福音ê事工m̄是靠咱人家己ê經驗、才tiāu,是因為謙卑ê心,以主耶穌ê話為主, án-ne chiah重要。
經文:

路加福音 5:1-5:11

註釋:

路加福音是描寫彼得兄弟kah約翰兄弟兩對兄弟跟tòe耶穌ê經過siōng詳細ê。作者以非常特殊ê筆法,將彼得之所以決定「放下所有ê,跟tòe了耶 穌」,是因為伊親身經驗到耶穌tī伊身上ê奇妙作為。請注意chit段掠魚ê經驗,mā是後來約翰福音ê作者teh描寫koh活了後ê耶穌,顯chit-má門徒面前ê時,彼得ê反應kah這 次掠魚ê經驗相當接近(請參考約翰福音廿一:3—7)。

Chit段掠魚ê故事,mā kā咱講:一個人beh跟tòe耶穌,m̄是帶家己ê經驗、chiah ē-tàng,是tio̍h認清耶穌到底是甚麼人,chit點chiah重要。彼得兄弟kah約翰兄弟lóng是掠魚ê專家,m̄-koh,tī耶穌面前chiah-ê chiah 幹、專長,並無一定是有用,除非有順服ê心,願意聽主耶穌ê指示「拋網」。福音ê事工m̄是靠咱人家己ê經驗、才tiāu,是因為謙卑ê心,以主耶穌ê話為主, án-ne chiah重要。



經文:

路加福音 5:12-5:16

註釋:

路加是一位醫生,伊描寫chit位癩ko病患者ê病況是「全身 長了癩ko」,這表示伊ê癩ko病況嚴重。依規定,伊是無法度tòa tī城裡ê(利未記十三:46),á chit-má伊卻出現tī城裡,有可能是因為知影耶穌ê能力thang幫助伊得醫,因為耶穌ê名聲早已經遠播(四:37)。透過醫chit位病況嚴重ê癩ko病患,耶穌ê名聲koh khah響亮,因為chit種病tī當時是人見人驚ê ná親像今á日ê「愛滋病」 仝款。

當人群lóng想beh tùi伊得tio̍h醫ê時,á是當人群lóng聚集來chhōe伊ê時,咱看tio̍h耶穌「退到偏僻ê所在去祈禱」à。這是非常重要ê信仰功課,因為祈禱乃是力量ê來源。Ē-tàng醫、行神跡,並m̄是人家己ê氣力,卻是tùi上帝來ê能力。降生成做人ê耶穌,伊需要上帝ê能力充滿伊身上。

經文:

路加福音 5:17-5:26

註釋:

作者路加連續記載猶太人宗教眾領袖對耶穌ê不滿kah反擊;in除了講伊亂講話外,mā對伊呼召抽稅ê人來做門徒相當有意見,同時對伊無教導門徒禁食ê事mā看不過去,並且因為伊tī安息日mā醫醫病人,氣kah忍受bē tiâu,決定beh「對付耶穌」。

請注意,chiah-ê宗教領袖是來自包括當時猶太宗教siōng權威之地──耶路撒冷。M̄-koh,人ê權威怎樣ē-tàng kah上帝ê能力相比neh?作者路加用「主ê能力kah 耶穌同在,hō͘伊ē-tàng醫好病人」chit句話,kā耶穌kui個傳福音工作中,siōng重要ê能力來源說明清楚。Mā因為耶穌知影有上主ê能力kah伊同在,所以伊用「朋友,你ê罪蒙 赦免了」chit句話來醫chit位半遂病人。有上主ê能力同在,即使是一句話,mā是創造性命ê氣力。

A. Koh講,耶穌因為有上主ê能力同在,因此ē-tàng「看穿」chiah-ê宗教眾領袖ê「念頭」,雖然in是彼此私下議論著耶穌所講ê話,m̄-koh,卻無法度逃避聖神ê能力「看穿」人ê心。

B. 第25節真值得咱注意,chit-ê半遂病人一聽耶穌ài伊giâ起伊ê床tńg去厝裡ê時chūn,伊無憢疑,卻是「馬上當tio̍h大家面前起來,the̍h起家己所躺臥ê床tńg去厝裡」,這就完 成了神跡。換句話講,神跡是tī無一絲á憢疑ê情況下發生ê。有懷疑心ê人,永遠看bē-tio̍h神跡。這就是為甚麼猶太人一再看見神跡,卻iáu一再要求想beh看神跡,其 實,in是存懷疑ê心。



經文:

路加福音 5:27-5:32

註釋:

猶太人kā妓女、抽稅ê人、賊á chit三種人看做 是「罪人」。抽稅ê人,是替羅馬政府徵收稅賦ê工作者。因為in過去常常超收稅額,而且又koh是替羅馬政府工作,hō͘猶太人非常討厭。有真長ê一段時間,猶太人為tio̍h beh 抵抗羅馬政府徵收「人頭稅」,bat發起抗繳稅金ê運動,被羅馬政府當做叛亂鎮壓,結果死傷慘重。請注意,耶穌後來就是hō͘猶太人宗教領袖用「煽動」人民抗稅ê 罪名告到彼拉多hia去ê(路加福音廿三:2、5)。可見in對抽稅ê人chit種人是jōa-ni̍h-á ê討厭。

A. taⁿ,耶穌m̄-nā呼召抽稅ê人利未當祂ê門徒,iáu參加利未為伊舉辦ê盛大宴席,莫怪in會感覺真oh受。

B. 「召pháiⁿ人悔改」,chit句話kah馬可福音「召pháiⁿ人」已經有真大ê cheng差。基本上,馬可福音ê作者認為所有ê人lóng是有罪ê人,lóng需要悔改。M̄-koh,路加kā chit句話加上 「悔改」二字,kah-ná hō͘人有種感覺:某一kóa人是好人,thang m̄免悔改。作者kah-ná beh解釋耶穌之所以到抽稅ê人利未ê厝去做客,而且kah真chē抽稅ê同齊食、lim,是有原因ê,為tio̍h是beh呼召in悔改。

C. 其實,咱lóng需要悔改,m̄是只有所謂ê「pháiⁿ人」Chiah需要,tī上帝ê標準下,咱lóng是有罪ê人。詩篇ê作者講:「上主tùi 天àⁿ 落來看世間人,beh 看有明理ê,á是有走chhōe 上帝ê 人á 無。In ê 行為歪chhoa̍h,lóng 變做污穢;無人行好,連kah 一個都無。(全民版)」(詩篇十四:2—3)

經文:

路加福音 5:33-5:39

註釋:

Tùi福音書裡咱會感受tio̍h作者們所收集到ê耶穌語錄中,新kah舊之間ê對立真強,親像tī馬太福音第五到七章,á是馬可福音第二章27 節,耶穌講:「安息日是為tio̍h 人來設立,m̄ 是人為tio̍h 安息日來創造。。(全民版)」Chit種話,tī當時ê猶太人社會差不多ná親像春雷一般,phah醒了當時ê人tùi宗教眾領袖所領受tio̍h ê傳統 教示。莫怪伊到會堂去教導人ê時chūn,「聽tio̍h 耶穌教示ê 人lóng 感覺真奇妙,因為祂ê 教示真有權威,無親像hiah-ê 經學教師。(全民版)」(馬可福音一:22)

A. 現在chit段經文就是一個真特別ê例,傳統上,猶太人歡喜以禁食來表示家己ê敬虔,經學教師á是法利賽人mā常常用禁食祈禱方式來訓練家己ê學生。行洗禮約翰bat這 樣做,m̄-koh,耶穌卻kā伊家己比喻成做喜宴中ê「新郎」。猶太人當然知影tī喜宴中,新郎kah新娘tī結婚ê一個月內是siōng特權,新郎甚至thang tī hit段期間內m̄免去相刣」。

B. 請注意路加chit位作者凸顯出ê點tī第36節,chia伊用「撕破新衫褲」「補tī舊衣上」,明顯講出án-ne做是兩敗俱傷ê愚戇動作。Koh講,第38節mā是作者路加真特 別ê所在,伊指出人lóng是習慣舊ê,常常致意識內底認為舊ê比較好,就kah-ná一個人lim了陳酒了後,bē koh再想lim新ê酒仝款。伊án-ne講mā是teh暗示家己將bē受tio̍h當時 社會ê接受,因為講究傳統,甚至ê時常kā傳統當做法典ê法利賽人,就是對耶穌相當ê「感冒」。


經文:

路加福音 6:1-6:11

註釋:

Chit段經文記載兩則關係安息日ê問題;前則關係安息日食物件,路加福音強調耶穌ê門徒是「用手搓tio̍h食」,這明顯是有具體ê動作,違反in 對安息日ê定義:「不准製造食物。」in án-ne解釋安息日,真可能kah in tī曠野拾(khioh)嗎哪 ê經驗有關係(請參考出埃及記十六:22—30)。M̄-koh,如果人iau餓 ê時chūn lóng bē-sái食物件(請參考馬太福音十二:1),án-ne,人ê性命m̄-nā無法度得tio̍h安息,反tńg是加添苦難à。

A. 後者是關係安息日醫病ê行為。猶太人並m̄是反對安息日醫病,卻是對非緊急ê病,一定tio̍h等到安息日過了後chiah thang,急診並無tī chia受限。問題是chit-ê手枯乾ê人,並無 是急診,卻是慢性病,因為án-ne,這就被列入tī慢性病範圍,無法度tī安息日接受治療。M̄-koh,tī耶穌ê看法裡m̄是án-ne,特別是作者路加提醒咱,chit-ê人是正手枯乾,真 可能造成伊tī謀生上ê困難,甚至是維持生活ê氣力。耶穌一下看tio̍h chit種情景,伊第一個反應就是憐憫伊,並且醫好伊。結果引發法利賽人大大ê不滿,in決定beh「對付」耶穌。

B. 作者路加koh一pái提醒咱,耶穌有聖神力量ê同在,因為án-neē-tàng「知影」法利賽人心中ê「念頭」。

經文:

路加福音 6:12-6:16

註釋:

Tī揀選門徒chit件事頂面,路加真特別地講耶穌是「到山頂祈禱」,而且「tī hia整夜祈禱上帝」,然後chiah tùi真chē跟隨者中揀選出12位門徒來。祈禱,一直是耶穌傳道事工中真重要ê功課。這mā是今á日基督徒siōng需要學習ê信仰功課,特別是傳道者koh khah需要chit種操練。

Chit份名單當然是tī後來早期教會定稿ê順位。十二,這mā反映出有意kah舊約以色列ê十二支派對稱,表明新約ê十二門徒,ná親像「新時代」ê「新以色列」仝款。彼得lóng是排行第一,出賣耶穌ê加略人猶大lóng是排tī最後,而且iáu koh khah加上「出賣耶穌ê」chit種話句。

經文:

路加福音 6:17-6:49

註釋:

Tùi第17節開始,到本章ê最後一節(49節),thang講是路加福音內底耶穌言論集ê部分。Tùi第20節來看,chit段經文是耶穌對門徒訓練ê講詞,類似馬太福音第五 到七章仝款,m̄-koh kah馬太福音無仝ê所在是:馬太福音講是tī山頂ê教示,路加福音soah講是tùi山頂落來了後。因為án-ne,mā有人稱chit段是「平原寶訓」。

A. 作者路加tī第19節koh一pái提起耶穌ē-tàng醫人ê病,是因為聖神ê氣力充滿伊ê身上。

B. 第20到26節,chit段經文thang分做兩部分,一是第20節到23節,二是第
24到26節。這兩段經文所講ê是相對ê。路加chit位醫生真可能因為跟tòe使徒保羅四 處去傳福音,看tio̍h真chē貧困ê人,in渴望得tio̍h福音大大超過hiah-ê富有ê人,因為án-ne,伊用非常實在ê語句講:「sàn-chhiah ê人jōa-ni̍h-á有福ah;lín是上帝國度ê子民!」chia所講ê「sàn-chhiah」,是真正tī物質上、財產上貧困ê人。這kah馬太福音所講ê「靈性貧乏」(五:3)是無仝款ê。

C. 如果咱tio̍h用一句話形容耶穌傳福音ê主題,án-ne用「上帝國度ê福音」(á是講「天國ê福音」)就對à。上帝國度就是用上帝做中心,以上帝為性命ê主。Án-ne,標 準就一定tio̍h khǹg tī上帝ê準則起來看。因為án-ne,第36節ê chit句:「Lín tio̍h仁慈,tú親像lín ê天父是仁慈ê。」應該是基督徒siōng koân ê行為準則。人世間ê準則往往lóng是相對 ê;你疼我,我mā愛你;你無疼我,我mā bē愛你。M̄-koh,tī chia卻tio̍h用「上帝ê仁慈」之標準來看ê時,情形就完全無仝款了;因為tùi上帝ê眼光看人,lóng是不值得 愛ê人,因為所有ê人lóng是罪人,ē-sái講是上帝iáu是hit種愛咱。既然咱lóng是無完美、有罪ê人,án-ne,咱iáu有甚麼資格去評斷別人ê好á是pháiⁿ?咱所beh學習ê功課就是赦免、原諒、赦免別人。這mā是主禱文裡耶穌所教導咱ê。

D. 信仰m̄是口號,mā m̄是專講理論ê。信仰是具體ê行動表現。聽耶穌ê教示,就beh確實地去遵行chiah算,而且確實地去遵行一定tio̍h是「心甘情願」,這是福音事工siōng基本 應該有ê態度,ná親像一叢樹ê好、pháiⁿ,看它結果ê情形就ē-tàng知影。Mā像一個人kā厝起tī怎樣ê地基上,這lóng是真實在ê,無法度造假。

經文:

路加福音 7:1-7:10

註釋:

Chit段經文中lóng是馬可福音所無記載ê資料,siōng特別ê資料是tī第七章36到50節,chit段長到14節經文中所記載關係一位婦人用香油膏耶穌ê故事,雖然tī其他四本福音書lóng有記載,m̄-koh,路加福音ê寫法kah提供ê內容則全然無仝。

作者路加siōng歡喜寫外邦人tī信仰上美好ê見證,chit位羅馬軍官是「聽tio̍h耶穌ê事」,就託人去請求耶穌幫助醫伊ê奴僕ê病。福音書ê作者用外邦人「聽tio̍h耶穌ê事」chit句話來表示in對耶穌ê絕對信賴,kah猶太人對耶穌ê排斥、懷疑ê態度真無相仝。

長老,這是猶太人社區中lóng受尊敬ê長者,ê時常幫助排解社區中ê紛爭。Chit位羅馬軍官根據家己ê經驗,mā相信伊所聽tio̍h關係耶穌ê能力,因為án-ne,後來改變態度,只要求耶穌下一個命令就ē-tàngà。

Chit位羅馬軍官因為kah猶太人關係真好,深知猶太人bē進入外邦人ê厝,因為án-ne,請求耶穌到in-tau去,是為難了耶穌(雖然耶穌並無憢疑跟tòe差來chhōe伊ê人前去),後來伊只請求耶穌賜一句命令,深信án-ne就有夠。

想看māi,咱比chit位羅馬軍官ê信心加出jōa-chē?我常常發見老信徒比初代信徒ê信心koh khah少。

經文:

路加福音 7:11-7:17

註釋:

Chit-ê 拿因城ê故事是路加福音特有ê資料,mā是福音書中記載耶穌hō͘三個死去者koh活ê其中一個。請注意,重點在tī這是「寡婦ê獨生kiáⁿ」,換 句話講,chit-ê獨生kiáⁿ死去,對chit-ê寡婦來講明明是等於判伊以後生活進入siōng悽慘ê景況,因為伊會因失去gín-á,無法度繼承先夫留落來ê產業,一定去當乞丐維生,這mā 就是耶穌「看tio̍h hit-ê寡婦,心內充滿了悲憫」ê原因。
經文:

路加福音 7:18-7:35

註釋:

行洗禮約翰雖然人是tī監獄中,m̄-koh,祂ê門徒lóng會kā有關耶穌ê事kā伊講,因為án-ne,伊差派門徒去見耶穌,並且問tio̍h有關耶穌身分ê事。

A. Chit段故事ê重點是tī第21節,作者路加用「tú好tī he時chūn耶穌醫好真chē患病、患疫症,kah邪靈附身ê人,並且hō͘真chē chheⁿ-mê-.ê重見光明」chit節經文,kā耶穌彌賽亞ê身分描述出來。

B. 先知以賽亞預言hit位to̍h是teh beh來臨ê拯救者是:「Hit 時,chheⁿ-mê 人ê 目睭會開,臭耳聾ê 耳孔會利。Hit 時,跛腳ê 會tiô 跳親像鹿;啞口ê 舌會唱歌。因為水chhèng 出tī 曠野;溪流chhèng 出tī 沙漠。(全民版)」(以賽亞書卅五:5—6)

C. 因為án-ne,當行洗禮約翰ê門徒來問耶穌ê身分ê時,耶穌ê回答真清楚:「Lín tńg去,kā lín所看見所聽tio̍h ê報告約翰。」無m̄-tio̍h,kā家己親目看見ê上帝奇妙ê恩典傳述出來,就是teh見證福音。

D. 請注意第29到30節,這是相對句,一般群眾,尤其是收稅ê人(chit種人kah妓女、賊á,tī猶太人看做是「罪人」),卻願意聽耶穌傳講上帝國度ê信息,m̄-koh,宗教領袖則拒絕,in甚至mā拒絕行洗禮約翰ê洗禮。

經文:

路加福音 7:36-7:50

註釋:

Chit-ê故事kah其他三本福音書(馬太福音廿六:6—13節,馬可福音十四:3—9節,約翰福音十二:1—12節)所記載ê真類似,m̄-koh,kui個 故事ê細節卻是大無相仝;一則,邀請耶穌食飯ê人是一位名叫西門ê法利賽人。二則,帶香油膏耶穌ê cha-bó͘人,顯然是一個「妓女」(罪人)。三則,耶穌特別為tio̍h這 cha-bó͘人所作ê事,設譬喻教導西門,mā指出西門並無真心誠意地接待耶穌。

A. Chit-ê cha-bó͘人為甚麼會án-ne做?有人講伊就是當teh行淫ê時被掠tio̍h ê hit位cha-bó͘人,因為耶穌解圍而來感謝耶穌ê。不過伊是帶tio̍h感恩ê心用香油膏耶穌,是thang tùi她ê舉動中看出。

B. 若是比較馬可福音書ê記載,chit位法利賽人西門,bat患過癩ko病,chit種病被猶太人判做「無清氣」,因為án-ne mā「bat」是一個「罪人」,因為無法度參加聚會敬拜上帝。 taⁿ被耶穌醫好,卻bē記得家己bat mā有過被看做是「罪人」,倒反tńg來看tio̍h chit位「bat」是「罪人」(妓女)ê cha-bó͘人。

人豈m̄是常常án-ne:bē記得家己mā是罪人,kan-taⁿ會目睭亮睜睜ê看tio̍h別人ê罪。
經文:

路加福音 8:1-8:3

註釋:

路加福音siōng有意思ê就是chit三節,短短三節講出婦女tī耶穌傳道事工上ê貢獻。Á婦女tī當時ê社會地位一直是相當卑賤,卻是福音ê大功臣。

今á日ê教會mā是án-ne,眾姊妹tī事工上ê認真、投入,lóng比男性突出真chē。

經文:

路加福音 8:4-8:18

註釋:

Chit段掖種籽ê譬喻,作者路加只有講掖tī好土地ê,結出來ê果子是「百倍」。當時ê人看「百倍」乃是siōng完美ê境界。好ê種籽掖tī好ê土地,結果就是siōng完美ê。上帝國度就是án-ne ê完美,是性命ê siōng koân境界。

注意第15節,作者特別強調ē-tàng結出好ê果子,是因為「人聽信息,以良善kah誠實ê心持守它,恆心等待,直到它結出果子。」良善、誠實lóng是信仰ê基本要件,因為信仰是面對上帝對人內心ê呼召,無良善kah誠實做基礎,談基督教信仰是真空洞ê。

Koh講,上帝國度ê信息是beh hō͘大家lóng聽bat,而且無所謂秘密á是隱藏ê事,只要用心聽、注意聽,必定會明白上帝國度信息ê奧秘。因為án-ne,若有人kā你講真玄奧ê信息,hō͘你感覺迷惑、bē了解,你一定會小心,因為聖經ê信息是beh明白ê,無秘密thang講。
經文:

路加福音 8:19-8:21

註釋:

真正tī信仰入門ê人,會kā血緣ê關係看kah淡,因為伊知影上帝愛ê是所有ê人。重視族群、血緣關係ê人,傳bē出真正福音。宣教師就是ē-tàng突破chit種層次,chiah ē-tàng kā福音傳到世界各地,到完全無仝ê族群、膚色、文化ê地區去。
經文:

路加福音 8:22-8:25

註釋:

門徒跟tòe耶穌四界去傳福音,mā看過耶穌hō͘ 拿因城ê寡婦獨生kiáⁿ tùi死裡koh活,chit-má,當in tú-tio̍h大風湧打擊,非常危險ê時,看見耶穌平靜了風 浪,卻「koh稀奇koh驚駭,彼此講:『chit-ê人到底是甚麼人?』」chit種反應豈m̄是真奇怪?其實,咱豈m̄是án-ne,常常teh問耶穌是甚麼人。
經文:

路加福音 8:26-8:39

註釋:

Kui個故事ê重點是tī第28節,chit-ê hō͘ 鬼附身ê人所講:「至koân上帝ê kiáⁿ耶穌,你為甚麼beh干涉攪擾我?我求你mài折磨我!」上帝就是因 為看見人tī罪中受苦難,所以差派祂ê kiáⁿ來到人間,就是為tio̍h beh hō͘人tùi罪ê折磨中解脫出來。chit-má chit-ê hō͘ 鬼附身ê人soah要求耶穌「mài折磨」伊,chit句話tú好講出一個重要ê信息:鬼、撒旦、魔鬼等,就是阻礙上帝除去人類性命苦難ê氣力。當上帝運行祂ê慈愛拯救人ê時chūn,mā是鬼、撒旦等siōng痛苦ê時chūn。

Siōng美好傳福音ê方式,tī chiah-ê hō͘ 鬼附身ê人ê身上thang看見,伊kā耶穌為伊所做ê一切事「行遍全鎮,傳揚」出去。這mā是咱該做ê事,豈m̄是?

經文:

路加福音 8:40-8:56

註釋:

Chit段經文是耶穌醫兩位cha-bó͘人ê故事,其中一個小女孩chiah十二歲就往生,另外一位則患血崩十二年。兩個醫ê神跡以「十二年」親密結合起 來。Chit-ê小女孩mā是福音書中記載第二則死人koh活ê故事,主要teh說明:耶穌有hō͘人tùi死裡koh活ê能力,有án-ne能力ê,除了上帝之外,chhōe bē-tio̍h第二者。早期教會等 待耶穌koh再臨ê日子一工天過去,真chē人因為等待耶穌koh再臨未到就已往生,作者路kā它拿因城ê故事,kah chit段故事說明:即使是死去,mā m̄免驚惶,因為耶穌有chit種 能力,就親像上帝。M̄-nā án-ne,即使tī人看起來lóng無辦法ê病,像chit位血崩婦人般ê嚴重,只要「接觸」到耶穌,性命等於是重新koh再造仝款。

經文:

路加福音 9:1-9:6

註釋:

醫病kah趕鬼tī早期ê教會被看做是傳道工作中無法度欠缺ê,即使tī今á日,醫療服務ê工作mā是teh傳道事工中占有真重要ê份量。台灣ê宣教事工就是由馬雅各醫師以醫療服務開啟傳道事工ê。這kah今á日常常有真chē傳道者ài用祈禱醫病、趕鬼ê意義無仝款。

第5節「Kā腳上ê土粉mā跺掉」,這是猶太人ê風俗,表示chit-ê tāi-chì kah我無關ê意思。

經文:

路加福音 9:7-9:9

註釋:

路加福音對行洗禮約翰被刣死事件之記事寫了siōng少,重點在tī描述希律心中ê不安,並為第廿三章6—12節留伏筆。
經文:

路加福音 9:10-9:17

註釋:

四本福音書lóng有記載chit件「五餅二魚」ê神跡,對早期教會來講,同齊分享食物,乃是信仰生活siōng好ê見證,án-ne至少說明無論貧賤富貴,大家tī上帝ê國度裡lóng仝款。Kui個神跡ê重點在tī耶穌ê祝福,有上帝ê祝福,就會夠額有chhun。
經文:

路加福音 9:18-9:27

註釋:

路加福音kah馬可、馬太ê作者無仝ê所在是,作者講「耶穌單獨一個人teh祈禱」ê時chūn,門徒來chhōe伊,耶穌問in有關別人teh談論伊ê事。當彼得回答講耶穌是「上帝所立ê基督」了後,耶穌續落來提醒in有關祂teh beh受難ê事。

人若beh跟tòe耶穌,一定tio̍h「ta̍k工背負伊ê十字架」,十字架是羅馬政府用來嚴懲叛亂罪á是重刑犯用ê。換句話講,跟tòe耶穌,就beh有「每工」(從來m̄-bat間斷á是停止ê意思)準lóng受難──siōng嚴厲懲罰──ê準備,因為這是teh行天國之路,chit條路無好行。

經文:

路加福音 9:28-9:36

註釋:

這是一段不時被討論而且非常難解ê經文,因為彼得in怎樣會知影甚麼人是以利亞、摩西。這故事tī早期教會中普遍流傳tio̍h,chiah致使三本福音書lóng 有保存chit-ê資料,主要目的teh說明:耶穌就是舊約時代先知kah摩西律法所預言ê救贖主。山頂形像改變ê榮耀,mā teh說明耶穌就是上帝差派到世間來siōng大ê記號,如 同日頭ê光輝一般。
經文:

路加福音 9:37-9:48

註釋:

九:37—43a節,作者特別提醒chit-ê患病ê gín-á是一個「獨生 子」,對猶太人來講,chit-ê獨生ê gín-á是家庭siōng重要ê期待。馬太福音講chit-ê gín-á是患tio̍h「癲癇病」(馬太福音十七:15)。鬼,帶來各種奇形怪狀ê病痛,hō͘人ê 性命感覺無奈,mā受tio̍h摧殘。Hō͘摧殘人性命ê鬼、撒旦tùi人ê性命中離開,這是耶穌到世間來ê使命。

請注意第41節,「無信心」真容易帶來「腐敗」,咱ê生活世界顯示出來ê就是án-ne。


九:43b—48節,這是路加記載耶穌第二pái預言受難。重點tī第45節,強調門徒對耶穌ê受難ê tāi-chì,並bē了解,soah koh m̄敢問。In bē了解,thang tùi in teh「爭論究竟in中間什麼人siōng偉大」看會出來,如果in知影耶穌to̍h是teh beh tī耶路撒冷受難,什麼人大什麼人小koh有甚麼意義neh?恐驚早就有人趕緊離開了。

咱是m̄是mā kah chiah-ê門徒仝款,對聖經á是信仰ê事bē了解,soah koh m̄敢問傳道者、牧師,為甚麼?
經文:

路加福音 9:49-9:55

註釋:

這是兩則故事,m̄-koh卻講出一個中心信息:信仰hō͘咱有koh khah寬闊ê心,看kah咱無仝表達方式ê人。

前一soah講有人「藉tio̍h」耶穌ê名趕鬼,耶穌ài門徒mài阻止,因為有人如果因耶穌ê名,性命得tio̍h醫,he應該是一件美妙ê事ah。信耶穌無特權,信仰mā無專利,只有分享。

相對ê是後一則,有人拒絕接受耶穌,咱mā m̄免憤怒,tio̍h「替天行道」,m̄免án-ne,因為上帝自然會審判chit種事,免得咱tio̍h急。

經文:

路加福音 9:57-9:62

註釋:

Beh跟tòe耶穌,一定tio̍h先衡量一下家己ê需要,耶穌bē勉強人來跟tòe伊去傳福音,甚至對一kóa hō͘伊醫á想以跟tòe表示感恩ê人,耶穌mā是kā in講tńg去厝裡,將「上帝為你所做ê事」kā親友講(八:39)。耶穌無希望人chhōe了真chē理由作藉口,講beh「等待」父母過世後,á是等到家己ê事業告一段落後,chiah來 相信上帝國度ê信息,因為性命ê時間並無tī人ê手中,應當趁 iáu活teh,而且家己已經聽tio̍h天國福音ê時chūn,趕緊掠tiâu機會。
經文:

路加福音 10:1-10:24

註釋:

Chit段耶穌另外揀選72人投入傳福音ê記事,只出現tī路加福音。耶穌會koh再揀選chiah-ni̍h chē人參與傳福音ê事工,理由tī第2節「農作物真chē,á工人真少。」這mā講出早期教會tī福音事工上發展得真緊,欠缺福音事工ê同工相當嚴重。

A. 真實在傳上帝國度福音者,伊所代表ê,已經無koh是家己,卻是上帝ê使者,因為án-ne,耶穌勉勵祂ê門徒,別因為人ê拒絕艱苦心,上帝家己會處理chit種事(16 節),ná親像tī第九章51—55節中,對撒馬利亞庄頭拒絕耶穌ê時,耶穌ê反應仝款。

B. 傳福音ê工作,是屬tī上帝ê工作,mā是聖神teh工作,m̄是人ê能力強á無,因為án-ne,mā mài因為tī福音事工上有成就,就得意忘形,因為榮耀上帝ê名,hō͘上帝國度降臨tī人類世界,chiah是重要。

C. 「Tio̍h因lín ê名記錄tī天頂á歡樂」,kā chit句話比較腓立比書第三章13到14節:「我並無認為我已經得tio̍hchit-ê獎賞;我只專心一件事:就是bē記得背後,全力追求頭前ê事。我向(ǹg)目標直奔,為tio̍h beh得tio̍h獎賞:chit-ê獎賞就是屬天ê新性命,是上帝藉tio̍h基督耶穌呼召我去領受ê。」

經文:

路加福音 10:25-10:37

註釋:

Chit段出名ê「好撒馬利亞人」譬喻,自古到taⁿ一直teh基督教會內hō͘人歡喜ài講,甚至mā是真chē寓言故事取材ê資料。

A. 注意第27到28節,當chit位教律法教師回答出摩西律法ê精華ê時,耶穌回答伊,ài伊就按照所知影ê去行。M̄-koh,真正ê問題是「疼上帝」實在是真「抽象」ê, 人ài怎樣chiah ē-tàng確定是真正「疼上帝」?每一個人ê量標準mā無仝。重點tī「疼厝邊,親像疼家己仝款」chit句話,因為「疼厝邊」是thang表達tī人kah人之間ê互動關 係。耶穌故意用「撒馬利亞人」當做譬喻ê教材,mā是有原因ê,因為撒馬利亞人kah猶太人彼此之間無來往(約翰福音四:9),這是歷史ê仇恨,tī猶太人ê眼 中,撒馬利亞人根本就是「無清氣」ê人,無法度kah in接觸。Ē-sái講是,in所看bē起ê人,卻會救受傷ê人,á祭司、利未人(in lóng是teh負責祭典、禮儀,幫助人認 識、敬拜上帝ê宗教師)表面上看起來,in是「siōng愛」上帝ê人,卻對人受傷ê時ê苦難有看kah-ná無看tio̍h,這就無法度算是疼上帝,因為疼上帝kah愛人無法度分開。

B. 怎樣愛chiah是疼厝邊?thang參考約翰一書四章7—21節。

經文:

路加福音 10:38-10:42

註釋:

這mā是路加特有ê資料。Chit-ê故事hō͘真chē人替馬大叫屈,其實,這mā講出真chē基督徒ê問題:甚麼chiah是真正重要ê事?性命中有真chē hō͘咱忙亂、愁煩ê事,咱kám m̄是為tio̍h beh解決chiah-ê瑣碎、煩亂ê事,結果kā koh khah重要ê性命大事hō͘疏忽了,到頭來時chūn一到,chiah懊惱家己少年ê時,á是健壯ê時無好好á 把握。Chit-ê故事確實真值得咱koh一pái深思。

經文:

路加福音 11:1-11:13

註釋:

祈禱對猶太人來講,差不多就是生活ê一部分,因為án-ne,耶穌ê門徒會要求耶穌教導in祈禱,mā hō͘咱感覺奇怪,第1節講耶穌tī祈禱結束後,門徒來請教伊chit-ê問題。有可能是因為門徒常常看 到耶穌會獨自一個人tī偏僻ê所在祈禱,kah一般法利賽人無仝,á是有時因為聽耶穌teh祈禱ê時,kah in tī祈禱ê內容無仝款,因為án-ne,in想beh知影正確ê祈禱態度á是內 容。Chit篇出名ê「主禱文」,重點是teh榮耀上帝ê名。做一個人知影榮耀上帝ê聖名ê時,chiah會明白家己是jōa-ni̍h-á有限kah軟弱。

Koh講,耶穌mā teh教導門徒怎樣祈禱,續落來kā眾門徒講知影,上帝一定會聽人ê祈禱,重要ê是,祈禱一定tio̍h ài有耐心thèng候,tio̍h對上帝有絕對ê信心。耐心kah信心是祈禱ê基本要件。

經文:

路加福音 11:14-11:23

註釋:

當耶穌趕走一個啞口鬼後,有人講伊是「靠鬼王別西卜趕鬼ê」,chit種講法意思是teh指耶穌所行ê m̄是神跡,卻是「巫術」,如果chit項指控成 立,án-ne照摩西ê律法,in thang判處耶穌死刑(參考申命記十八:9—13)。M̄-koh,真正ê問題是,耶穌並m̄是靠別西卜趕鬼,伊所行ê是神跡。神跡乃是上帝 奇妙ê作為,mā因為是án-ne,chiah致使眾人驚kah gāng去,原因是in bat看過有人驅鬼過,卻kah耶穌行神跡ê情形無仝款。
經文:

路加福音 11:24-11:26

註釋:

Chit段經文mā thang講是teh解釋hiah-ê bat hō͘ 鬼附身á被醫好ê人,應該ê時刻保持儆醒ê心靈,若無真容易koh再被附身,若此,則情況會比以前koh khah嚴重。
經文:

路加福音 11:27-11:28

註釋:

Kā chit段話比較第八章19節,會幫助咱清楚耶穌所看重ê事,是人遵行上帝ê旨意。
經文:

路加福音 11:29-11:32

註釋:

猶太人希望看tio̍h神跡,m̄-koh,看了mā m̄信,大概是kā神跡看做像「魔術」In中間真chē人跟tòe耶穌四界去,mā看過真chē神跡,m̄-koh,in iáu是m̄信ah。其實,咱thang án-ne了解:無信心ê人,永遠看bē-tio̍h神跡,因為有懷疑就bē有神跡。
經文:

路加福音 11:33-11:36

註釋:

聖經作者ài用「光明」kah「烏暗」代表「善」kah「罪惡」。光,是為tio̍h beh hō͘人看會tio̍h,若無,就顯bē出它ê意義。仝款ê,基督徒tio̍h kah光仝款,hō͘別人看會tio̍h家己所行ê,確實是thang見證上帝拯救ê「善」。
經文:

路加福音 11:37-11:54

註釋:

整段經文ê中心點tī第38節,起因tī「法利賽人看見耶穌飯前不先洗手」,感覺驚kah gāng去。飯前洗手,這是猶太人生活風俗,m̄-koh這風俗富有相當 chiok厚ê宗教信仰內涵,in感覺人tī食飯前不洗手,會致使人內心ê污穢,m̄-koh,耶穌認為這是真虛假ê,伊認為真正hō͘人心污穢ê,是來自人ê心思意念,kah有無 洗手無關係(請參考馬可福音七:14—23)。因為án-ne,tùi第39節開始,耶穌指出chiah-ê宗教眾領袖徒有虛假ê外表(參考路加福音十三:1),並無真實ê內心。

經文:

路加福音 12:1-12:3

註釋:

第1節hō͘咱看tio̍h耶穌受歡迎ê程度,這mā是當時宗教眾領袖siōng-kài不安ê原因,in感受tio̍h耶穌對in ê權威造成威脅。

上帝察看人ê心思意念,無人ē-tàng隱瞞得了上帝ê眼目。台語有句俗語:「鴨蛋koh再密,mā有縫。」á是另外一句大家耳熟ê:「若beh人m̄知,除非己莫為。」

經文:

路加福音 12:4-12:12

註釋:

Chit段經文真可能是針對早期教會受tio̍h嚴厲迫害(參考使徒行傳八:1),眾信徒有人擔心,mā有人棄sak信仰(參考希伯來書六:4—6)。不 過,chit段話mā是耶穌為hiah-ê跟tòe伊ê群眾講ê,希望in明白惡勢力真正對人迫害ê,mā kan-taⁿ tī身軀,無法度kah tī性命ê本質,真正teh管理人性命ê,乃是上帝。Á tī上帝ê眼中,性命lóng是祂奇妙ê創造,無貴賤之分。任何殘害性命ê事,上帝lóng會計算。
經文:

路加福音 12:13-12:21

註釋:

這是路加特有ê資料,提醒咱知影性命ê價值並m̄是在tī thang計算ê財產。Koh講,hō͘咱知影,上帝chiah是性命ê主宰,人m̄是性命ê主。如果 無上帝ê同意,人所有ê努力,á是累積起來ê財富mā是枉然。請注意第21節,chit所在指ê「財富」,m̄-nā是物質ê,mā包括人ê chiah ē-tàng、學識、經歷、社會地位等等。

經文:

路加福音 12:22-12:34

註釋:

萬物tùi上帝來ê創造,上帝自然會管理妥當。人ê性命mā是上帝創造,m̄免擔心chiah-ê屬tī生存性命所需要ê,性命無在tī食、lim、穿,á在tī認bat上帝(參考出埃及記十六:17— 18,耶利米書九:23—24)。

有一句話值得大家參考,人ē-tàng帶到天頂去,只有一項:你hō͘別人ê「善」,其他ê lóng帶不上去。想看māi,家己hō͘別人chē少「善」,án-ne chiah重要。注意,「別人」是teh指hiah-ê生活tī貧困中ê人,m̄是家己ê厝內人。

經文:

路加福音 12:35-12:48

註釋:

「儆醒」,tī耶穌ê教示中一再提起咱tio̍h注意ê事,因為時間是tī上帝手中,咱m̄知甚麼時chūn上帝會伸手審判。當然,chit段經文通常hông用來解釋末日來臨ê時刻,只是無人知影hit-ê甚麼時chūn會來臨,因為只有上帝家己知影(參考馬可福音十三:32)。
經文:

路加福音 12:49-12:59

註釋:

信仰是性命ê問題,一定tio̍h真清楚作選擇,m̄是thang 搓圓ê態度。信仰mā需要「敏銳」ê眼光,知影兆頭ê出現,如同在看tio̍h天象變化一 樣。Koh講,信仰是beh hō͘性命得tio̍h和解,ná親像人kah所虧欠ê對象和解,chiah bē被關進監tiâu。仝款ê,耶穌來到世間,為tio̍h是beh hō͘咱kah上帝和解(請參考哥林多後書 五:19)。

經文:

路加福音 13:1-13:9

註釋:

Chit段經文mā是路加特有ê資料,hō͘咱知影,悔改是性命得救ê ǹg望。慈悲ê上帝hō͘咱真chē機會,如果無把握,時間一到,ná親像無結出果子ê果子樹仝款遇tio̍h砍除。
經文:

路加福音 13:10-13:17

註釋:

Chit段mā是路加特有ê資料,主要ê問題在tī守安息日ê態度。耶穌認為安息日應該hō͘苦難ê性命得tio̍h憐憫,這mā是上帝設立安息日ê本意。

經文:

路加福音 13:18-13:21

註釋:

芥菜種kah麵酵lóng是真細微ê體積á是量,m̄-koh,影響卻是siōng大ê,甚至是大到無法度估計。上帝國度ê影響力mā是án-ne,tī上帝奇妙作為下,即使是siōng微小ê「善」,mā會帶來極大ê影響。
經文:

路加福音 13:22-13:30

註釋:

一般人歡喜問chit種問題:「伊會得救?」á是「m̄信ê人會得救?」ná親像耶穌往耶路撒冷ê途中,有人問耶穌「得救ê人無chē 」án-ne ê問題仝款。其實,mài先問甚麼人會得救,á是無法度得救,這m̄是咱ê問題,真正beh先問ê問題是:「像我án-ne罪重ê人,上帝kám會救我?」á是án-ne講會比較好: 「主ah,求你赦免我,因為我實在不配進入你ê國。」用chit種態度來看chit段經文,有可能會比較容易明白。
經文:

路加福音 13:31-13:35

註釋:

耶穌會罵人oh,看,伊罵希律安提帕王是「狐狸」,比行洗禮約翰罵hiah-ê想beh接受伊洗禮ê法利賽人kah撒都該人是「毒蛇」細jī了些(參考馬太福音三:7)。大概是因為希律安提帕王刣死了行洗禮約翰,chiah hō͘耶穌用chit種口氣罵伊。

第33節,先知乃是「上帝ê代言人」ê意思,耶路撒冷既然是敬拜上帝ê中心,m̄-koh卻被宗教眾領袖把持,而且hō͘信仰ê內涵扭曲了,上帝ê奴僕有責任hō͘伊導正過來。

經文:

路加福音 14:1-14:6

註釋:

這是路加特有ê資料,mā是路加福音記載耶穌第三pái接受法利賽人食飯,前兩pái分別記載tī第七章36節,kah第十一章37節。福音書記載耶穌tī安息日醫病ê故事bē少,包括逐出污靈(馬可福音一:21—28),醫好一位手枯乾ê人(三:1—6),一個被邪靈附tio̍h長到18 年ê cha-bó͘人(路加福音十三:10—17),hō͘生落來就chheⁿ-mê-.ê人ē-tàng看見(約翰福音九:13)。

Chit-má是法利賽人tī厝裡邀請耶穌食飯,因為án-ne,這必定是食暗頓,暗頓一開動就過了安息日,án-ne in就ē-tàng溫燒熱爐灶,若無,就是違反安息日。Mā因為時間漸漸接 近過安息日ê時刻,chit-ê患水腫ê病人才有可能出現tī耶穌面前,期待耶穌ê醫。對耶穌來講,只要是苦難,即使是安息日mā tio̍h解救chit種性命苦難。

經文:

路加福音 14:7-14:14

註釋:

Chit段mā是只有路加chiah有ê資料,講出法利賽人ê虛假kah驕傲。第7到11節,提起「婚宴」,真緊hō͘咱聯想beh kah上帝國度ê宴席有關。上帝國度是用上帝為主,人tī以上帝為主ê宴席中,應該tio̍h知影怎樣謙卑,因為主人是上帝。

第12到14節提起án怎當一個好ê主人。法利賽人歡喜展寶社會地位,á是受人o-ló。M̄-koh,耶穌kā重點放tī上帝國度,上帝對人ê獎賞chiah是咱所beh追求ê,因 為上帝ê獎賞chiah是永遠ê,人ê獎賞lóng是目nih-á ê。使徒保羅講:「實際上,上帝看阮會堪得,chiah kā 福音交託阮,阮就照án-ne 來傳。M̄ 是 beh hō͘ 人歡喜,是 beh hō͘ 鑒察咱內心ê 上帝歡喜。(全民版)」(帖撒羅尼迦前書二:4)伊koh講:「ǹg 目標直直走,到得tio̍h 賞為止;就是上帝通過基督耶穌,召我去領受hit-ê tùi 頂面來ê 活命。(全民版)」(腓立比書三:14)



經文:

路加福音 14:15-14:24

註釋:

Chit段經文hō͘咱看tio̍h一件非常重要ê信息,是tī第22節,上帝國度永遠lóng「iáu有真chē空位」,這mā是為甚麼tio̍h差派門徒出去傳福音ê原因。另 外一點,有真chē人本來是thang tī上帝國度裡享受hit-ê美好筵席ê,卻因為chhōe了真chē ê藉口,結果會失去,in ê位置已經被別人取代。請注意,取代本來被約定ê人ê, 是hiah-ê「sàn-chhiah ê、殘廢ê、chheⁿ-mê-.ê、瘸腿ê」,chiah-ê人tī當時社會lóng是siōng可憐ê人,in生存ê方式是行乞。這mā是作者路加寫chit本福音書ê主要目的,beh hō͘當代社 會邊緣人看tio̍h福音。上帝國度絕對m̄是用錢、地位、身軀健康、名望、學經歷等thang進入ê,有時chiah-ê反tńg是阻礙了進入上帝國度ê機會neh。
經文:

路加福音 14:25-14:35

註釋:

Beh跟tòe耶穌傳福音,確實是一件真大ê性命挑戰,因為「透到永生ê 門真狹,hit 條路真pháiⁿ 行, chhōe-.tio̍h ê人真少。(全民版)」(馬太福音七: 14)既然門真窄,路koh難行,什麼人會歡喜neh?少kah會驚人,án-ne,beh傳chit種福音當然koh khah m̄是一件簡單ê tāi-chì了,除非有相當ê覺悟,mā tio̍h對性命有高超ê領悟,chiah ē-tàng「放棄一 切」。耶穌bē勉強人來跟tòe伊去傳福音,真正想beh傳福音ê人,會明白家己是為tio̍h甚麼。咱tī早期真chē宣教師ê身上看tio̍h耶穌所講ê,in確實是放棄了一切到 各地去見證福音ê信息。
經文:

路加福音 15:1-15:32

註釋:

第十五章ê主要背景tī第1節,法利賽人kah經學教師對耶穌kah 「抽稅ê人kah pháiⁿ人」做伙á埋怨,因為án-ne講出下列三個譬喻;包括chhōe tńg來失落ê一隻羊、chhōe獲失去ê一個銀幣、浪子koh一pái tńg來chhōe慈愛ê老父。Chit三個譬喻lóng有一個共同主 題:死去koh活、失去koh再得tio̍h ê喜樂,連天頂lóng參與了chit份喜樂。

A. 為tio̍h chhōe失迷ê羊tńg來,顧羊人並m̄是kā99隻放tio̍h不管,伊是託其他顧羊人看管,因為猶太人採社區制,羊群是社區顧羊人共同看管放牧。

B. 失落ê一個銀幣,真可能是chit-ê cha-bó͘人用真長ê時間積蓄起來ê,對一個sàn-chhiah ê cha-bó͘人來講,雖然只是一個小銀幣,mā是一大數目。何況十個銀幣thang串成一條phōa鍊,如果失落一個,等於失去一條phōa鍊,伊就無法度tī節期中戴tio̍h它。

C. Chhōe失落ê物件是án-ne用心,chhōe失落ê人,kám bē koh khah費神?Chit位慈愛ê老父並無停止chhōe gín-á,mā無放棄機會,伊是一直teh期待gín-á tńg來。當gín-á tńg來ê時,雖然是hit種落魄,伊看ê是失去koh再得tio̍h、死去koh活ê性命,án-ne chiah是kui個主題中心。



經文:

路加福音 16:1-16:18

註釋:

這確實是一段常hō͘人提出質問ê經文,án-ne「機警ê管家」不誠實ê作法對?如果tùi第14節看tńg來,chit-ê譬喻可能是teh講hō͘法利賽人「愛錢」聽ê,如果是tùi第十五章1到2 節看,則可能是對抽稅ê人有啟示作用。

A. 如果是對愛錢ê法利賽人,則耶穌講chit-ê譬喻,為tio̍h是beh希望in ē-tàng teh斂財ê時,多考慮一下hiah-ê貧困ê人ê需要,ē-tàng減輕貧困人ê負擔,就是上帝所喜樂ê事。

B. 假使對抽稅ê人來講,則徵稅已經tī猶太人中造成真大ê生活負擔,如果in ē-tàng減少稅額,mài超收,in會tī民眾中得tio̍h koh khah chē ê朋友。

C. Chit-ê財主累積錢財ê來路mā不明,因為án-ne,當chit-ê奴僕án-ne減輕欠債者ê負擔ê時,伊反tńg感覺奴僕比伊koh khah強。換句話講,kā不義得來ê錢財,扭轉過來,hō͘伊koh khah接近義ê層次,應該是ē-tàng接受ê。


經文:

路加福音 16:19-16:31

註釋:

這是路加福音書中出名ê一個譬喻故事,mā是非常頂港有名聲下港有出名ê一個故事。Tùi chit-ê故事,咱koh一pái看tio̍h耶穌譬喻ê特色:鮮豔ê對比──財主kah 乞丐tùi第19到21節就清楚描述出二者之間極大ê對比。Koh講,死後ê境遇完全相對,財主Tī痛苦ê陰間,乞丐tī快樂ê境界。請注意,chit-ê譬喻mā講tio̍h基督教信 仰ê基本認bat:永生。無「死亡」,只有「永生」,「永生」tī快樂、美好ê所在,以及「永生」Tī痛苦ê陰間。

經文:

路加福音 17:1-17:6

註釋:

Chit段經文ē-sái講是耶穌言論集ê一部分,路加福音無親像馬太福音書hit種kā耶穌ê言論彙集做伙。

A. 第1到4節,mā反映出早期教會ê現象,彼此之間發生爭執,致使有人離開教會。有kóa爭執實在是不必要ê,何況mā有kóa犯罪ê行為,真oh見證福音ê信息,親像貪 錢ê事、淫亂ê行為等。耶穌強調任何微小ê事lóng足以hō͘一個人棄sak信仰,仝款ê,任何微小ê疼心,mā 會hō͘人得tio̍h福音ê信息。

B. Ē-tàng赦免別人,kah勸勉人悔改,就ná親像是一個錢幣ê兩面,無法度分開。M̄-koh,beh赦免別人卻需要極大ê信心,因為勸勉人容易,beh赦免別人tio̍h需要相當ê信心chiah ē-tàng達成,因為án-ne,需要耶穌ê扶持幫忙。

經文:

路加福音 17:7-17:10

註釋:

古代ê人,當主人看tio̍h奴僕用心、認真工作ê時,伊會感動到家己替奴僕做些服務ê工作。路加福音第十二章37節:「主人tńg來,發見chiah-ê奴僕 警醒,in就實在有福氣!我實在kā lín講,主人tio̍h穿圍su裙,hō͘ in坐落來食飯,親自服侍in。」不過,這並m̄是所有ê主人lóng會án-ne,á即使主人願意án-ne,並m̄是表示奴僕ê角色thang隨時更換á是混淆,一定tio̍h認清家己ê角色,奴僕就是奴僕,chit點真重要。

Kā chit種觀念帶入咱ê身上,hō͘咱清楚家己就是人,是實實在在ê人,只要是人,就m̄是神,chit點弄清楚了,會明白人ê有限kah軟弱。

經文:

路加福音 17:11-17:19

註釋:

Chit段經文是路加福音特有ê資料,mā凸顯出作者路加非常重視外邦人──撒馬利亞人。四本福音書中,作者路加描述外邦人ê好處siōng chē,伊就是beh kā大家講:耶穌來到世間ê目的,m̄是kan-taⁿ tī為tio̍h猶太人,卻是為tio̍h所有ê人。作者路加真技巧地講出,會感謝上帝救贖恩典ê人,竟然m̄是猶太人,卻是撒馬利亞人,á這卻是猶太人所看bē起ê族群。

Koh講,請注意第19節,耶穌對chit-ê tńg來感恩ê撒馬利亞人講「你ê信心醫好你」chit句話,kah第八章48節記載耶穌對hit位摸耶穌衫á裾ê鬚hō͘血漏病得醫ê cha-bó͘人講ê仝款,這說明一件事:肉體得醫,並無表示人ê性命得tio̍h拯救。

經文:

路加福音 17:20-17:21

註釋:

法利賽人想beh知影上帝ê主權(上帝國度)甚麼時chūn來到,耶穌tī chia真清楚講,就「tī lín心內」。Chit句「tī lín心內」,mā thang是「tī lín中間」。換句話講,上帝ê主權(上帝國度)m̄是指某一個地區,á是某一個特別ê所在,卻是人心ê謙卑、順服tī上帝ê旨意kah教示。
經文:

路加福音 17:22-17:37

註釋:

這是一段kah末日ê景象有關,thang分做兩段落來看;第一段是第22到30節,chit段經文主題是:人子來臨ê日子。耶穌連續舉出幾個例講 明人子來臨ê時刻,lóng是無法度phah算得tio̍h ê。第二段是第31到37節,chit段經文是teh確認必定有審判,耶穌用「屍首tī tó位,禿鷹mā會聚tī hia」chit句當時非常流行 ê俗語,說明末日ê景象並m̄是遠tī人ê經驗之外,á是可見ê範圍之外。其實,只要細膩觀察生存ê四周圍,就會發見審判ê時刻離咱無遠。
經文:

路加福音 18:1-18:14

註釋:

Chit段經文lóng是teh談「祈禱」ê事,耶穌舉了兩個例說明祈禱ê意義。

A. 第1到8節,祈禱態度應該是堅持地、有信心地堅持落去。不過,mā m̄-thang bē記得箴言ê作者hō͘咱ê警語:「人隨便講:「這是聖物」。下願了後chiah 查問,這soah 成做伊家己ê 羅網。(全民版)」(箴言二十:25)

B. 第9到14節,祈禱是kah上帝講話,人面對上帝ê時,除了謙卑、認罪之外,實在chhōe bē-tio̍h koh khah好ê方法。Koh講,祈禱m̄是用來控訴別人ê罪惡,m̄-thang認為上帝「kah-ná」甚麼lóng m̄知,其實,祂知影咱所有ê一切。

經文:

路加福音 18:15-18:17

註釋:

咱lóng bat當過gín-á,mā不時接觸tio̍h gín-á,想看māi,in kah成人siōng大ê無仝是甚麼?In tī言行舉止上有甚麼特徵?當眾門徒爭tio̍h tio̍h坐大細位 置ê時chūn,耶穌就「chhōe一個細漢gín-á來,叫伊khiā tī in中間」,抱tio̍h gín-á kā門徒講們:「人若為tio̍h 我ê 名來接納一個chit 款gín-á ê,就是接納我;接納我ê 人,m̄ 是接納我,是接納差我來ê Hit 位。(全民版)」(馬可福音九:33—37)人lóng是歡喜看「大」、體面、位階高等等chit種人、事、物,耶穌教導咱ê卻m̄是án-ne。


經文:

路加福音 18:18-18:30

註釋:

有錢m̄是罪惡,這是thang理解ê。M̄-koh,想beh用錢得tio̍h「上帝國度ê子民」ê資格,則無門路,因為上帝國度m̄是資本家、有錢人ê囊中物,koh khah 危險ê是,錢iáu可能成做進入上帝國度ê絆腳石neh。Chit-ê富有ê財主,一方面講伊已謹守了誡命,另外一方面卻對賑濟sàn-chhiah人顯得困難。值得注意ê是,人往往會忽略了自 己得tio̍h錢財ê方法是m̄是正確。Koh講,有能力(包括錢財、知識)ê人tio̍h盡社會責任,缺乏chit種認bat,真可能hō͘家己成做壓搾別人ê人。
經文:

路加福音 18:31-18:34

註釋:

一般人無歡喜談死、苦難ê問題,耶穌卻是一再kā祂ê門徒講伊teh-beh受難、死ê事。M̄-koh,已經快接近耶路撒冷了,門徒對伊án-ne一再講tio̍h chit件事ê反應,iáu是「茫然無知」。基督教ê信仰如果m̄是tùi「苦難」去了解,mā會kah門徒仝款「茫然無知」。
經文:

路加福音 18:35-18:43

註釋:

Chheⁿ-mê,tī早期ê社會是靠乞食維生。M̄-koh,伊雖然是chheⁿ-mê,心卻無chheⁿ-mê,因為伊知影耶穌就是「大衛ê kiáⁿ孫」,意思是以色列人民期待已久ê拯 救者。隨時保持心靈ê儆醒,比甚麼lóng重要,若無,咱真可能是目睭亮晶晶看出事物ê貴賤,卻看bē出性命拯救ê源頭 ──耶穌──出現tī咱面前。
經文:

路加福音 19:1-19:10

註釋:

Ná親像我teh紹介路加福音書作者ê時所講ê,作者路加非常關心社會邊緣人,á是被當時猶太人所厭棄ê人,tī伊寫ê chit本福音書中,一再提起稅 吏、撒馬利亞人ê好。看,chit-má koh提起稅務長撒該,是一位看tio̍h耶穌、認bat耶穌後,知影改變家己ê人。注意,耶穌並無要求撒該放棄所有ê財產,mā無要求伊 像利未仝款去跟tòe伊。撒該只有kā財產ê一半分hō͘ sàn-chhiah人,而且表明願意以四倍賠償hō͘伊欺詐過ê人,耶穌就肯定了伊ê作法,並且講「救恩」降臨tī撒該ê厝。
經文:

路加福音 19:11-19:27

註釋:

仝款ê譬喻,tī馬太福音用「產業」,tī chia是用「城」。Tī chia ê主人是貴族,伊是「teh beh被封做王」,因為án-ne,主人ê背景一定kah權勢有密 切關係。Koh講,當主前四年,希律大帝死ê時chūn,kā財產分hō͘伊ê gín-á,其中巴勒斯坦地是分hō͘亞基老王,m̄-koh是án-ne繼承一定tio̍h先得tio̍h羅馬皇帝ê同意。Hit時chūn,猶太 人因為無歡喜亞基老王,因為án-ne mā派代表去羅馬晉見皇帝,要求mài同意亞基老王ê任命案。後來羅馬皇帝iáu是准了亞基老王當統治者,只是無hō͘伊「國王」ê名 號。因為án-ne,當耶穌teh講chit-ê譬喻ê時,猶太人真緊to̍h會想tio̍h是teh講亞基老王ê事件。

A. Chit-ê譬喻kah馬太福音無仝ê所在,馬太福音是按照每一個人ê能力分配,chia是奴僕有十個,每一個人分配仝款ê額數── 一個金幣。

B. 仝款ê錢,有ê奴僕thàn了十倍,有ê五倍,有ê是原封無振動用手巾á kā它包起來。

C. kā錢用手巾á包裹起來ê奴僕,真正ê問題是tī第21節,chhōe了藉口來說明伊無去做seng-lí ê理由。M̄-koh,基本上是主人分配給所有ê奴僕lóng仝款一個金幣,而且thàn十倍、五倍ê lóng受tio̍h肯定。換句話講,主人要求ê m̄是thàn多á是少,卻是知影kā主人所交託ê使用出來。

D. 上帝hō͘咱每一個人lóng有才能,至少每一個人lóng有共同ê基本chiah ē-tàng,m̄-the̍h出來用ê人,即使chhōe了真chē藉口,mā bē得tio̍h上帝ê認同。

經文:

路加福音 19:28-19:48

註釋:

Tùi chia開始記載耶穌進入耶路撒冷城。

A. 第30節講這頭驢是「無人騎過ê驢á-kiáⁿ」,猶太人傳統上是iáu未用過ê牲畜只作為獻hō͘上帝用(民數記十九:2,申命記廿一:3),因為án-ne,作者teh暗示 chit隻驢ê主人ê用心,ná親像hit位the̍h極珍貴ê油抹耶穌ê cha-bó͘人仝款,hō͘耶穌用ê,lóng是siōng-kài珍貴、好ê。

B. 法利賽人對群眾kah眾門徒án-ne擁戴耶穌顯然真食味ê款,in甚至認為是耶穌門徒teh「鼓動」群眾án-ne做,因為án-neài耶穌禁止眾門徒呼喊。通常tī chit時chūn是吟唱詩篇 一一八篇,真可能tī法利賽人聽來感覺刺耳,因為chit首詩ê第25節講:「上主ah,taⁿ 求祢拯救!上主 ah,taⁿ求祢 hō͘ 阮發達!(全民版)」如果群眾繼續唱chit種 詩,kám m̄是等於teh肯定耶穌就是救主,這是法利賽人所無法度接受ê。

C. 群眾ê歡呼並無hō͘耶穌ê心盲,因為伊清楚知影到耶路撒冷ê主要目的是甚麼。人常常tī群眾ê歡呼聲中麻痺à,mā混淆家己ê良知。看,耶穌進入耶路撒冷 城第一件事,就是為hit-ê城哀哭。為甚麼耶穌會為hit-ê城哭?有可能是因為伊知影hit-ê城teh beh面臨ê災難(主後七十年,羅馬提多將軍帶兵進入,並且摧毀了聖殿),mā有 可能是為hit-ê城無悔改,一再迫害上帝奴僕──耶穌家己teh beh面臨被判死刑──ê事艱苦心á啼哭。Koh講,猶太人一直teh想ê,lóng是政治上ê解脫,卻bē記得人ê心若無 改變,即使是一個獨立ê政治體制,mā是枉然。因為人心若棄sak上帝,就算擁有政治上ê自主,真緊to̍h會遇tio̍h毀滅ê運命。

D. 潔淨聖殿ê事件tī四福音書lóng有記載,可見chit件事一直流傳tī猶太人中間。Ná親像頭前所敘述ê,人心ê污穢,致使宗教聖地mā會遇tio̍h污染。Á耶穌潔淨聖殿ê事,當時無任何宗教領袖敢出來阻擋,原因是in本身就是污染ê源頭,因為án-ne,只有ē-tàng tī事後設計beh kā祂謀害。


經文:

路加福音 20:1-20:18

註釋:

第二十章lóng是猶太人領袖對耶穌潔淨聖殿後ê連續反撲;in深深知影如果不趕快解決耶穌,án-ne落去,bē koh再有好日子kah財源ê利益。

Tāi先來chhōe耶穌並向伊提出問題ê是猶太人siōng koân議會ê代表──祭司長、經學教師、長老。因為猶太人siōng koân議會──三和林 (Sanhedrin),乃是猶太人siōng koân ê權利中心,因為án-ne,in向耶穌提出「甚麼人hō͘你這權」ê問題,是thang理解ê。In ê問題是:無in授權,耶穌怎樣ē-tàng以 án-ne方式潔淨聖殿,即使聖後面有問題,mā輪bē-tio̍h耶穌來整理,in thang決定怎樣處置。換句話講,耶穌chit種行踏明明是就是hō͘猶太人siōng koân議會失去權威à。

其實,信仰ê事應該講是無所謂「權威」thang講,因為這是對上帝ê疼ê回應。M̄-koh,信仰如果失去表達上帝ê疼,he chiah是有問題。Tī聖殿裡作買賣,而且腳手lóng m̄清氣,這已經無「上帝ê疼」thang講à。

路加福音因為是寫hō͘外邦人看ê,因為án-ne,記載chit-ê譬喻ê開始無親像馬可福音hit種,引用先知以賽亞所描述ê葡萄園景況,直接就講「有一個人開墾了一個葡萄園」。

A. 第9節講chit-ê主人「tī外面tòa一段時間」,這表示葡萄園ê佃戶確實tùi葡萄園收益bē少,夠額繳納hō͘園主ê租稅。

B. 第16節thang講是chit-ê譬喻ê中心,講tio̍h園主一定會採取懲罰ê手段對付hiah-ê惡質ê佃戶,á懲罰siōng具體ê方式,就是「轉租hō͘別人」。對猶太人一再自喻為上帝ê葡萄園來講,chit種「轉租hō͘別人」確實是真大ê侮辱。M̄-koh對外邦人來講卻是真大ê恩典kah喜樂。

經文:

路加福音 20:19-20:26

註釋:

Kui個陷阱是真真明顯出tī偽造,第20節講「in買收了一kóa人,假做善意,向耶穌提出問題」,chiah-ê宗教領袖並無因為家己ê角色kah工作 ê關係,á koh khah謹慎家己ê行為,án-ne chiah是問題ê中心,因為十誡ê第九誡真清楚講「bē-tàng作假干證陷害人」,in án-ne教導人,家己卻違反所教導ê事。

怎樣chiah ē-tàng親像耶穌所講ê「Kā該撒ê物件hō͘該撒,kā上帝ê物件hō͘上帝」?這實在是一門真重要ê功課。

經文:

路加福音 20:27-20:40

註釋:

撒都該人來見耶穌,in是屬tī祭司階級ê貴族,耶路撒冷聖殿主要就是由in負責管理,包括祭典,以及維持聖殿ê「神聖」,in mā 是猶太人siōng koân議會ê成員之一。

Tī in ê觀念中,koh活ê信仰是荒謬ê。因為án-ne,in採用摩西律法規定ê「兄終弟kah」(參考申命記廿五:5— 10),設計chit-ê問題來問耶穌。耶穌ê回答真清楚,ài撒都該人知影,以人ê看法teh看上帝ê工作,cheng差是真遠ê。人ê性命是上帝所造,mā是上帝teh管理,因 此,koh活了後ê性命mā是上帝teh管理。有一點是真重要ê:koh活ê世界,並m̄是現今世間ê延伸,卻是完全屬tī上帝ê。


經文:

路加福音 20:41-20:44

註釋:

猶太人一直kā「大衛ê kiáⁿ孫」看做是beh koh來臨ê彌賽亞,而且chit位彌賽亞是一位屬tī「政治」領域ê,伊ê來臨,是beh重建以色列帝國,ná親像大 衛王朝一般。M̄-koh,耶穌tī chia真清楚kā in講,真正彌賽亞並m̄是屬tī大衛ê kiáⁿ孫,卻是大衛ê主。換句話講,耶穌beh hō͘ in知影,真正彌賽亞並m̄是teh建立一個政治王國,á是beh帶領人tńg來到上帝ê國。
經文:

路加福音 20:45-20:47

註釋:

雖然只是短短幾節經文,卻mā道出了宗教眾領袖lah-sap ê一面──虛假,而且koh貪婪。siōng無應該ê是「吞食寡婦ê家產」。Tī先知ê作品中,咱thang看tio̍h先知一再呼籲tio̍h好款待寡婦、孤兒,因為in生活壓力比一般人koh khah艱困。M̄-koh,chiah-ê宗教領袖卻常常教導 人講,供應hō͘拉比(通常經學教師lóng hông稱做「拉比」──老師ê意思),是siōng美好ê信仰見證,koh khah甚者會講:疼拉比,ná親像獻牲祭hō͘上帝仝款。Chit種教導真容易感 動婦女捐出錢財,包括了寡婦在內。其實chit種教導是teh欺騙人。雖然聖經mā教導講beh「愛人如己」,m̄-koh,人絕對無法度kā家己比作上帝。
經文:

路加福音 21:1-21:4

註釋:

所謂「sàn-chhiah寡婦」,指ê是hiah-ê失落了丈夫,而且koh無留落來gín-á ê婦女,伊mā因為án-ne無法度繼承先夫所留落來落來ê財產,除非丈夫ê兄弟á是近親願意kah伊 同房,替伊丈夫留落來後代,chiah ē-tàng得tio̍h遺產。若無,伊只有ē-tàng靠乞食維生,生活一定相當清苦(參考舊約路得記)。M̄-koh,chit-êsàn-chhiah寡婦即使tī he樣清苦ê生活中,mā會 「全部ê生活費用lóng獻上了」,chit種信心chiah是咱tio̍h學習ê功課,不因生活苦,對上帝有怨言;mā不因貧困,減少奉獻ê心志。Chia咱mā看tio̍h奉獻真實ê意義, 在tī內心ê敬虔,無在tī數字ê chē少。
經文:

路加福音 21:5-21:6

註釋:

請注意第5節,作者路加講聖殿 用「精美ê石頭kah iáu願ê禮物裝飾成ê」,所謂「iáu願ê禮物」,是teh指猶太人為tio̍h表示感謝上帝,獻上siōng精緻ê禮物裝飾tī聖殿門口處。因為án-ne,一般人會看tio̍h聖殿精 美ê外表,卻忽略了信仰ê本質並無tī chiah-ê外表ê裝飾,á在內心ê誠實,甚至信仰koh khah需要實踐出上帝ê公義(慈愛),若無,就bē有意義thang講。
經文:

路加福音 21:7-21:38

註釋:

Lóng是講tio̍h關係末日ê預言。可能是kah耶穌提起聖殿會「被拆落來」ê事件有關。Tī chit段經文中,其中心ê題旨在tī「hit日子」(hit時chūn),mā 就是舊約聖經先知一再提醒ê「耶和華日子」。原本這日子tī以色列民族期待ê是大得勝ê日子,是上帝hō͘以色列民族統治萬國ê日子。M̄-koh,先知早已經提起「hit日 子」kā是上帝對祂ê子民──以色列人民──審判ê日子,是災難,m̄是祝福(參考阿摩司書五:18—20)。

Koh講,chit段經文mā提醒大家一定tio̍h用「儆醒ê心」隨時準備上帝ê日子來臨。保持「純潔」ê心靈,遠比數算上帝ê日子是甚麼時chūn koh khah重要。


經文:

路加福音 22:1-22:6

註釋:

第廿二、廿三章,是記載有關耶穌受難ê事件。Tī chit-ê兩章中,有關受掠kah審問ê經過,寫得真詳細,作者路加mā提供了幾件比較特殊ê資料;包括耶穌ài門徒「無刀ê,賣掉衫褲去買一支」(廿二:35—38),審問耶穌ê時chūn,彼拉多koh kā耶穌轉移hō͘希律審問(廿三:6—12),siōng特別ê所在是,作者路加kā眾門徒爭 論甚麼人大甚麼人小ê事件,編排tī耶穌kah門徒守最後晚餐ê時chūn發生(廿二:24—30),充分顯示出作者路加ê用心。

廿二:1—5節,除酵節,長到一禮拜之久,tī chit-ê一禮拜中lóng bē-sái食帶有酵ê食物,tī當時為tio̍h是beh表示兩種意義:(1)出埃及ê行動是非常神聖ê,因為án-ne,不 thang食用帶有不潔ê食物(酵,被看做是無清氣ê食物),以色列人用chit種方式teh表明聖潔ê意思。(2)出埃及後tio̍h快速趕路,而且第一階段就beh行三工ê路程(參考 出埃及記三:18、五:3、八:27),chiah會停留,因為án-ne,食不含酵ê麵包,比較ē-tàng支撐khah久ê時間。

「撒旦進入加略人猶大ê心」,chit句話ê意思是:猶大hō͘撒旦chhōe-tio̍h了機會。這是作者路加非常特別ê看法。人若beh防止犯罪,siōng好ê方法就是mài hō͘撒旦有機會,mā就是mài有pháiⁿ念頭,尤其是試探上帝ê念頭。Tī主禱文裡有一句話:「m̄-thang hō͘阮tú-tio̍h承擔bē起ê考驗。」其意就是祈禱上帝, mài hō͘阮陷入試探上帝ê罪惡中。人siōng大ê罪過就是想beh試探上帝,á是講想beh kah上帝爭位置,這是咱承擔bē起ê考驗,絕對m̄-thang有chit種念頭產生。猶大賣耶穌,這是伊所承擔bē起ê 事,m̄-koh,伊卻hō͘撒旦得tio̍h機會。想看māi,咱是m̄是mā會kah伊仝款?

經文:

路加福音 22:7-22:13

註釋:

只有路加福音記載耶穌差派彼得kah約翰去準備Pôaⁿ過節ê暗頓。Hit-ê the̍h水瓶ê人,應該是用「水瓶」作為暗號,好hō͘耶穌會得thang kah伊ê跟隨者同齊用Pôaⁿ過節ê暗頓。Tùi第 12、13節ē-tàng看出這是經過事先安排ê,真可能是因為耶穌知影猶太人宗教領袖想beh謀害伊,所以,伊無想beh公開,因為án-ne暗中進行chit-ê tāi-chì,á猶大卻tùi án-ne chhōe-tio̍h機會, 因為伊thang提供耶穌kah跟隨者守Pôaⁿ過節暗頓ê地點。
經文:

路加福音 22:14-22:23

註釋:

Chit段經文thang分做兩部分,其一是第14到18節,這部分可能就是本來ê傳統──Pôaⁿ過節ê暗頓。其二是第19到20節,這部分chiah是後來延伸出來所講ê「聖餐」。Pôaⁿ過節ê 暗頓thang講是每一個猶太人lóng會遵守,而且真嚴肅ê態度teh遵守ê宴席。第16節是重點,chit節耶穌koh一pái暗示這是最後ê暗頓,mā可能門徒聽tio̍h ê認為是古老時代tio̍h行出埃及ê「真正行動」neh,因為in一直認為耶穌就beh像摩西帶領in行出羅馬帝國ê統治、管轄。In無想tio̍h這會是受難前ê最後一餐,若無,in bē tī chit時iáu teh爭論甚麼人大、甚麼人小。

經文:

路加福音 22:24-22:30

註釋:

門徒tī chit時chūn爭論什麼人大、什麼人小,確實對超過 jú節暗頓á是耶穌kah門徒最後ê暗頓來講,lóng是極大ê諷刺。Chit段經文mā是路加福音siōng特別ê編輯之一,因為作者將chit段經文編排tī此,koh khah說明了門徒確實bē明白 耶穌受難ê意義,就ná同作者tī耶穌第三pái對門徒預言teh beh受難ê時chūn,用「門徒 tùi chiah-ê tāi-chì lóng bē 了解,chiah-ê 話 hō͘ in 感覺莫名奇妙。(全民版)」(路加福音十八:34)來描 述眾門徒確實是m̄知影耶穌受難ê意義。

咱mā thang tùi chia思考chit種問題:tī基督教會內,如果發生爭論位置ê事件,就是無清楚受難ê信仰意義。Á基督教ê信仰是tùi受難入門ê,無明白受難ê意義,就無法度明白koh活ê信息。無明白koh活ê信息,就是bē曉得基督教信仰ê真諦。


經文:

路加福音 22:31-22:34

註釋:

看,作者路加koh一pái用「撒旦」來試探彼得à。換句話講,撒旦已經擾亂了彼得ê心,ná親像作穡人teh the̍h篩á篩粟á仝款,原本作穡人篩粟á是beh kā pháiⁿ ê除掉,m̄-koh,tī chia卻是beh攪局,m̄-koh,耶穌會為彼得代禱。看,人是hit種ê軟弱,á耶穌對人性ê弱點則相當清楚。祈禱是抵擋誘惑siōng好ê氣力來源。
經文:

路加福音 22:35-22:38

註釋:

這是一段真oh解說ê經文,為甚麼耶穌會ài beh門徒「賣衫褲去買刀」?這是真奇怪ê事。用兩支刀beh當做防範受難,á是拒捕,lóng無夠額來抵抗beh掠耶穌ê人ê武力。He倒底是怎樣一回事,耶穌會ài beh門徒賣衫褲買刀?有一種可能,就是當耶穌tī預言祂teh beh受難ê時,門徒開始討論怎樣對付,chit時耶穌kā門徒講,如 果驚惶被掠,不如去買刀來自衛做門徒講身上有兩支刀ê時,耶穌就講「有夠」,意思是這是無甚麼用ê,因為tī耶穌ê言行中,ē-tàng看出武力m̄是解決問題ê 基礎,惟有愛chiah ē-tàng化解人kah人之間ê仇恨。
經文:

路加福音 22:39-22:46

註釋:

馬可福音kā咱講, 耶穌帶門徒去祈禱ê地點是tī橄欖山ê「客西馬尼園」,這原本是一個「搾油池」,可見以前是採收橄欖kah搾油ê所在。第39節ê「照常」二字,講出in進入耶城 後,常常前往chit所在聚會,mā因為án-ne,猶大chiah知影tio̍h chhōa人來chit所在掠耶穌。第43到44節,是路加福音特有ê資料,作者ài用ê「天使」資料koh一pái出現。祈禱是得tio̍h力 量ê來源,做一個人ê耶穌,需要上帝ê氣力幫助伊承受án-ne十字架ê苦難。祈禱mā是人抵擋誘惑siōng好ê方式。
經文:

路加福音 22:47-22:53

註釋:

「猶大,你用chim嘴來出賣人子?」耶穌早就知影猶大ê計畫,tī-chia,伊koh一pái提醒猶大,希望伊ē-tàng清醒起來,m̄-koh,就ná親像作者chìn前講過ê,「撒旦入去tī hit-ê 叫做加略ê 猶大,伊是十二使徒ê 一個。(全民版)」(廿二:3),chit時ê猶大已經會失去排拒撒旦誘惑ê氣力。

即使tī最後ê時刻,耶穌mā koh一pái hō͘猶大機會,m̄-koh,伊kā chit-ê這機會失去。咱是m̄是有掠tiâu chit-ê最後ê機會?Á是咱已經被撒旦掩蓋了良知,繼續出賣耶穌ê勾當?


經文:

路加福音 22:54-22:62

註釋:

彼得否認耶穌ê事件,一直teh基督教會內被傳述著,馬可福音kah路加福音lóng特別強調彼得連家己是加利利人ê指控mā否認!(馬可福音十 四:70—71,路加福音廿二:59—60)路加福音重點khǹg tī第61節,當彼得iáu tī否認伊kah耶穌ê關係ê時chūn,耶穌反過頭來「注目看」伊,換句話講,彼得 否認耶穌ê舉動,耶穌bat親目看teh伊。看,這是jōa-ni̍h-á特別ê一幕ah。當咱teh「出賣」耶穌ê時chūn,有無看tio̍h主耶穌就tī邊á teh「注目看」咱?
經文:

路加福音 22:63-22:71

註釋:

福音書teh描述chiah-ê宗教眾領袖控告耶穌ê任何罪名,伊lóng拒絕回答,m̄-koh,當in問tio̍h kah伊kah上帝ê關係ê時,耶穌ê回答lóng是肯定講「是」。 「你是上帝ê Kiáⁿ」chit句話對猶太人來講,thang講答案是絕對肯定ê,in本來就是自認是上帝ê Kiáⁿ,即使今á日ê基督徒mā會是án-ne ê回答,chiah-ê宗教領袖用chit-ê 問題問伊,只是想beh chhōe出耶穌teh回答ê時,會有甚麼特殊ê講法,結果in如心所願地聽tio̍h chit句「tùi taⁿ以後,人子會坐tī全能上帝ê正pêng」,這表示耶穌m̄-nā是單純ê 是「上帝ê Kiáⁿ」,koh khah是上帝差派到世間來ê彌賽亞,chit點chiah是宗教眾領袖所無法度接受ê。
經文:

路加福音 23:1-23:12

註釋:

宗教ê問題,羅馬政府一向hō͘ in猶太人有真大ê自主權,猶太人ê宗教眾領袖mā知影,如果用「宗教」ê理由控告耶穌,羅馬政府ē-tàng免chhap in。因為án-ne,in早就設計好tio̍h用「政治性」ê理由控告耶穌,tùi in設計提出「向羅馬皇帝該撒納稅是m̄是違背咱ê律法」這問題,就已經知影in ài ê是「政治上ê理由」。taⁿin kā耶穌押送到彼拉多面前,控告ê理由就是chiah-ni̍h政治化──煽動人民,反對向皇上納稅。In一再強調耶穌是四界煽動人民neh。M̄-koh,如果耶 穌真正煽動人民,拒絕繳稅,羅馬政府早就會知影,因為tùi稅收是m̄是正常就ē-tàng看出,顯然並無chit種情況發生。因為án-ne,當in用這理由控告耶穌ê時,彼拉多用 「查bē出chit-ê人有甚麼罪狀」回答in。

A. 第6到12節是路加福音特有ê資料;tī第九章9節,作者bat作了一pái伏筆,講希律「一直想見耶穌」,chit-má有機會,伊看tio̍h耶穌,m̄-koh,並bē真正ê想認bat耶 穌,伊就kah一般猶太人仝款,ài看「神跡」而已。Mā可能伊mā kah一般猶太人仝款,lóng kā耶穌所行ê神跡奇事當做「變魔術」般看鬧熱ê態度Koh講,希律並m̄是真 ê想看耶穌,伊iáu bat想過beh刣耶穌(路加福音十三:31)。

B. 第12節是重點,原本交惡ê彼拉多kah希律因為審問耶穌ê緣故,tùi-án-ni修好à。這就ná親像法利賽人為tio̍h beh除掉耶穌,無惜家己ê立場á去kah希律黨人勾結設計耶穌仝款(馬可福音三:6、十二: 13)。

經文:

路加福音 23:13-23:25

註釋:

第22、23節是作者強調ê,彼拉多連續三pái對群眾宣告查bē出耶穌有任何罪狀。M̄-koh,群眾ê聲音贏過公義kah良知,這就是撒旦「我ta̍k 日kah lín tī 聖殿,lín 無下手kā 我掠;m̄ -koh,chit-má 是lín 當紅ê 時,mā 是烏暗teh 掌權ê 時。(全民版)」(廿二:53)ê明確記號。可見beh維護良知kah公義,mā m̄是一件簡單ê事,需要相當ê信心kah勇氣neh。

經文:

路加福音 23:26-23:43

註釋:

第34節mā是路加福音特有ê資料,作者一再表明上帝是一個慈悲ê天父,伊對tī人一再犯罪,是一再容忍、赦免。咱thang講kui本路加福音就是teh紹介上帝是一個滿腹慈悲ê天父,ná親像第十五章所紹介ê hit位慈悲ê老父仝款,對悖逆ê kiáⁿtńg來,lóng m̄計較chìn前所犯ê過錯。看,耶穌已經hông釘十字架à,iáu是teh祈求天父赦免人民ê無知。這mā是基督教信仰所beh紹介hō͘大家ê上帝。
經文:

路加福音 23:44-23:56

註釋:

第46節「老父,我kā家己ê靈魂交tī你手裡!」mā是路加福音特有ê資料,chit句話是引用自詩篇第卅一篇5節,詩篇ê作者講上帝會拯救願意kā家己交託tī上帝手中ê人。

作者mā強調亞利馬太ê約瑟雖然是猶太人siōng koân議會(Sanhedrin「三和林」)ê成員,m̄-koh,伊kah其他ê議員無仝,因為伊無附kah in ê計謀,意思就是對tī謀害耶穌ê行為,約瑟是持反對立場ê。這tī異口同聲ê環境中beh án-ne堅持,卻m̄是一件簡單ê事。

經文:

路加福音 24:1-24:12

註釋:

「Lín為甚麼tī死人中teh chhōe活人?」這是路加福音描述「兩個衫褲發光ê人」對hiah-ê遠tùi加利利跟tòe耶穌來到耶路撒冷,而且親目看tio̍h伊被釘十字 架,以及被安葬後chiah tńg去準備香料beh去墳墓內抹耶穌身軀ê婦女所講,chit句話mā thang講是kui個koh活神跡siōng重要ê一句話,tī四本福音書中,chit句話siōng有特 色,因為真正koh活ê人,bē活tī死人中間。換句話講,死ê人,當然chhōe bē-tio̍h活人。人若是因為罪帶來ê性命是死ê,怎樣ē-tàng chhōe-tio̍htùi上帝來ê koh活性命?無可能!

無人會相信koh活ê神跡,因為這是大大超過人類ê性命經驗。這mā就是講因為罪á帶來性命死亡ê人,是無法度了解上帝奇妙作為ê。

經文:

路加福音 24:13-24:53

註釋:

M̄是人chhōe-tio̍h koh活ê主耶穌,卻是koh活ê主耶穌親自向人顯現,chit點認bat是非常重要ê。人ê能力無法度看tio̍h koh活ê神跡,除非koh活ê主耶穌親 自向伊所呼召ê人啟示出來。以馬忤斯ê路上經驗說明chit件事,tī大馬士革途中ê掃羅mā是án-ne ê經驗(參考使徒行傳九:3—6)。如果無koh活ê主耶穌親自啟 示,即使是koh活ê主耶穌khiā tī人ê身邊,人mā是無法度認bat出來。因為án-ne,koh活ê神跡m̄是靠人家己ê能力所ē-tàng辨識,卻是賜hō͘ koh活性命ê上帝親自開啟人ê心靈chiah ē-tàng得到。

第47、52節,作者lóng提起耶路撒冷,這mā是路加kah馬可福音作者觀點上差別ê所在;路加福音強調宣教ê中心tī耶路撒冷,m̄-koh,馬可福音ê作者認為beh tńg去到加利利去看耶穌tī hia所做、所講ê一切。


重新查詢