耶利米哀歌 1:1-1:11

註釋:

這是五首哀歌ê第一首，背景是南國猶大被巴比倫滅亡ê慘狀。詩人透過耶路撒冷過去繁榮ê景象，kah taⁿ被滅亡後淒涼如廢墟般ê景象對照，講出敵人侵入了後掠奪所有一切，致使城內人民iau餓ê悲慘畫面。

對tī chit首詩歌ê背景有兩種講法，一種是認為發生tī 597年，這就是約雅斤在位年間，巴比倫攻陷耶路撒冷，伊kah伊ê厝內人lóng被掠到巴比倫去，同時受掠ê重要人物iáu有一萬八千人，而且聖殿內所有ê寶貴物件mā lóng hông掠奪（參考列王記下廿四：8—17，歷代志下三十六：9—10）。另外一種看法是認為這是發生tī主前586年，mā就是tī西底家治理ê時代，巴比倫chit pái的確kā猶大完全滅亡，並kā所有chhun落來ê猶大國菁英俘擄伊去，並且kā耶路撒冷城kah聖殿lóng摧毀殆盡，西底家王ê厝內人lóng慘死tī伊目睭前，而且伊被挖出目睭，帶到巴比倫（參考列王記下廿五：1—21）。後來以色列人民kā耶路撒冷城kah聖殿被摧毀ê這日子當做是禁食日（參考撒迦利亞書八：18—20）。

    Tùi第3節就thang知影chit首哀歌是teh為南國猶大ê滅亡啼哭，因為以色列人民已經被巴比倫帝國ê軍隊俘虜去做奴隸，詩人寫落來chit首詩歌，ē-sái講是悼念，mā是發出心中ê哀嘆。

第1節，詩人tī chit節用「孤伶伶」、「像寡婦」、「諸省之后」等名詞來形容「過去人煙稠密ê城市」，其實就是tī指耶路撒冷kah附近ê城市，chit-má已經成做廢墟了，因為居民已經lóng被俘虜伊去，有幸ē-tàng逃難ê mā m̄敢tńg來。Chit節詩歌mā有含真強烈ê質疑地意味，koh再問為甚麼會án-ne？到底是發生甚麼事。

第2到3節，講出猶大ê以色列人民亡國後ê悲哀──連避難ê所在mā無。另外一方面mā道出一個事實：昔日以色列人民背叛上帝，去敬奉偶像神明，taⁿ chiah-ê神明m̄-nā無法度庇護in，連原本信誓旦旦講beh幫助in ê埃及、摩押、以東、亞捫、泰爾，kah西頓等等chiah-ê「盟友」，最後mā一時風駛一時船，無來幫助in抵抗巴比倫（參考耶利米書廿七：3），結果猶大人民只有ē-tàng「被迫離開家鄉」，hông掠去巴比倫做奴隸（參考列王記下廿五：1—21）。雖然有bē少人逃難到埃及，m̄-koh mā無法度因為án-ne得tio̍h安居ê所在，ná親像先知耶利米傳出ê信息所講ê，即使in逃到埃及mā bē有平安，因為he m̄是上帝ê旨意（參考耶利米書四十二：15─17）。

第4節，chit節講出過去人來來去去ê鬧熱景象，taⁿ都無了。因為通往耶路撒冷城ê道路lóng被巴比倫軍隊hō͘包圍了，就bē koh再有人會去聖殿朝聖「過節」，mā無koh唱o-ló詩歌，換做「哀歌」，耶路撒冷城為沒落ê城市。

	第5節，chit節講出猶大亡國。巴比倫成做支配tio̍h in ê一切，除了俘擄猶大人民到「遠方」（指巴比倫）過「受苦」ê日子，mā因為in「作惡多端」，上帝用chit種方式來懲罰in。另外巴比倫王iáu派出新ê總督基大利管理in（參考列王記下廿五：22）。

    第6到7節，chit兩節詩歌講出耶路撒冷已經ná親像廢墟。當巴比倫圍困hit-ê城ê時，城內是因嚴重缺乏糧食而鬧嚴重飢荒，俘擄in ê巴比倫軍隊kah人民lóng譏笑in，甚至會問in ê上帝tī tó位（參考詩篇四十二：3）。

    第7節，chit節thang參考頭前第2到3節ê解釋。

    第8節，「赤身露體，受人輕蔑」，這表示耶路撒冷已經被巴比倫搜刮殆盡，所有thang有生產動力ê人、動物lóng hông掠去巴比倫了。Chhun落來ê就是hiah-ê「siōng窮苦ê人」，in lóng是身無分文，甚至衣不蔽體ê貧困者。In只有ē-tàng hō͘人「侮辱」，mā m̄敢公開「露面」。

	第9節，這是重要ê一節詩歌。Chia描寫以色列人民teh過去「盟友」lóng棄伊tī無顧了後，tī面臨敵人侵入搜刮一切所有ê時，伊chiah想tio̍h beh來走chhōe上帝ê「憐憫」。Iáu好伊想tio̍h tńg來走chhōe上帝，chiah為in帶來最後ê一絲希望。

Chia ê「污穢」一詞，mā teh表明in過去故意犯罪而惹上帝受氣。In穿插「污穢」不潔ê衫褲，表示in雕刻偶像kah建造祭拜偶像ê祭壇ê行為等於污穢了家己kah上帝之間神聖ê關係。

	第10節，chit節講出猶大滅亡，耶路撒冷城破，巴比倫軍隊進入聖殿kah王宮，kah所有官員ê厝去搜刮財寶（參考列王記下廿五：8—10）。Á耶路撒冷聖殿原本有規定外邦人是m̄准進入ê，m̄-koh chit-má巴比倫軍隊chiah不管chiah-ê。In進入聖殿內搜刮所有敬拜上帝用ê物件，運tńg來巴比倫去供奉tī in神明前，表示he是戰利品。

	第11節，chit節講出巴比倫軍隊圍困耶路撒冷城一年gōa，就是城內嚴重缺乏糧食，為tio̍h beh止飢，人民甚至無惜煮家己ê kiáⁿ來充飢（參考耶利米哀歌二：20、四：10），以求性命ē-tàng「苟延殘喘」落去，chit時chūn，in chiah想beh呼求上帝「俯視」in「悲慘」ê境遇，伸手救助in。

耶利米哀歌 1:12-1:22

註釋:

Chit段詩歌是用擬人化ê方式來描述耶路撒冷所遭遇ê慘況，而且真特別ê所在，lóng是用第一人稱ê「我」來表達。Chit段詩歌siōng大ê特色是無抱怨，而且承認家己犯錯誤。

    第12節，chit節講出亡國了後tú-tio̍h ê慘狀，m̄-koh卻無得tio̍h任何憐憫ê意思。詩人深信這是因為上帝發出ê「震怒」ê結果。

	第13到15節，Tī chit段詩歌中，詩人用「火燒」、「羅網」、「絆倒」、「棄sak」、「被壓得筋疲力竭」、「無力量」、掛tī頷頸上ê「枷擔」、「踩踏葡萄仝款」等詞來形容以色列人民所受ê苦難。「火」是teh指戰爭；「羅網」代表災難纏身無法度脫離；「枷擔」代表「失去自由」；「踩踏葡萄」是teh指遇tio̍h報復、被踐踏ê意思。Chiah-ê lóng是上帝透過猶大人民ê仇敵來懲罰in ê一種方式。

	Tī第14節thang參考詩篇第九十篇8節，詩人講上帝清楚人所犯ê一切罪過，無甚麼ē-tàng隱瞞上帝對人ê鑒察，koh khah值得注意ê是上帝會kā人ê chiah-ê過犯同齊核算，這mā是希伯來書第四章13節作者所講ê，每一個人lóng tio̍h赤the̍h-the̍h面對上帝ê審判。

	第16到18節，chit節thang參考第2節、第9節。無人願意á是ē-tàng安慰猶大人民所受tio̍h ê苦難，因為chiah-ê災難是tùi上帝來，是上帝對「違背伊命令」ê猶大子民所施行ê審判kah懲罰。Chia詩人講這懲罰是teh顯明上帝ê「公義」，這表示上帝bē冤枉人。Á「青年男女受掠去了」，chit句話表示國家、民族ê未來跟tòe消滅了。   
 
	第19到20節，chia thang看tio̍h耶路撒冷城內「iau餓」ê嚴重性，有ê人是因為iau餓死tī「街上」，mā有ê人是死tī「厝內」，而會面臨死亡ê人不分階級，包括祭司kah領袖lóng仝款。就算街上因為發生「凶刣」而無出門，mā仝款會活活餓死tī厝裡

	第21到22節，tī chit兩節中，詩人á是知影有án-ne ê一工，上帝「應允ê日子」，mā就是憐憫、赦免ê日子會來臨，hit時上帝就會伸手救助in脫離苦難。Hit時，上帝mā會懲罰chiah-ê因為phah贏而侮辱上帝bē-tàng ê仇敵，包括巴比倫kā tùi聖殿掠去聖物排tī in ê廟宇中供奉等chit種行為，上帝一定會追究到底，上帝懲罰猶大子民ê罪，mā會懲罰巴比倫人ê罪。

耶利米哀歌 2:1-2:10

註釋:

這是第二首詩歌，mā是談及耶路撒冷毀滅ê情形，描述ê內容比第一首詩歌iáu koh khah詳細。

Chit段詩歌是作者親目看見耶路撒冷城淪陷、被毀壞ê景況。Ná親像頭前已經敘述過ê，上帝親手懲罰猶大悖逆ê子民，是一點mā不手軟。因為每pái祂差派先知，祂忠實ê奴僕去傳達信息，猶大人民lóng是m̄聽，反tńg一再拒絕聽從上帝奴僕先知ê話。因為án-ne，chiah會引起上帝極大ê忿怒，用嚴厲ê手腕懲罰in，希望in ē-tàng悔改認罪。

第1到2節，chit兩節kah第一章1節仝款，提出ê問題是「詢問」：為甚麼會發生án-ne hō͘人大tio̍h驚ê事件？如果上帝「連家己ê聖殿mā棄sak了」，ná iáu有甚麼bē放手ê？當然無，上帝對犯罪累累ê猶大是「一點á lóng m̄憐惜」，上帝決定hō͘猶大chit-ê「國家kah它ê眾領袖蒙羞受辱」，因為chiah-ê人過去就是tī聖殿侮辱上帝，kui個國家ê人民lóng用拜偶像來侮辱上帝。chit-má上帝mā用仝款侮辱ê方式來回應in。

    第3到5節，chit段經文koh一pái提起上帝摧毀猶大kah人民ê情形，就是用祂大受氣ê「火燄」，ài kā所有ê「一切lóng燒毀了」，包括聖殿kah宮殿，以及貴族ê厝等等lóng成做「廢墟」，這mā是後來耶路撒冷kah聖殿ê結果（參考列王記下廿五：9）。Á逃亡ê人，上帝hō͘敵人射出弓箭刣滅in，chiah-ê弓箭就teh代表上帝ê「怒火」。

第6到7節，chit兩節詩歌講述過去ê耶路撒冷城kah聖殿，kah chit-má ê景象對照起來，差不多是完全顛倒；過去以色列人民聚集tī聖殿，為tio̍h是beh敬拜上帝，tī節期來臨ê時，聚集tī聖殿歡呼歌唱。M̄-koh chit-má上帝拒絕chiah-ê歡呼ê聲音，koh khah將聖殿摧毀，hō͘以色列人民根本無法度聚集做伙。過去節慶ê時，「君王kah祭司」會帶領人民向上帝獻祭，m̄-koh chit-má，上帝kā聖殿lóng摧毀了，就無得獻祭了，因為上帝無歡喜in ê獻祭。情景換做另外一種景象，就是敵人進入聖殿，tī拆毀「祭壇kah聖所」kah「宮殿」了後，in聚集tī「上主ê殿宇內」，歡喜得像teh過節仝款「歡呼喧嚷」，chit種歡呼ê聲音當然m̄是teh o-ló上帝，卻是搶奪勝利品了後發出ê聲音。

	第8到10節，chit段詩歌teh描述巴比倫軍隊拆毀耶路撒冷城牆，傾斜ê情形thang用「準繩」來測量。這情景ná親像先知阿摩司所講ê，上帝是用「鉛垂線」來量傾斜ê城牆（參考阿摩司書七：7—9）。無論是「準繩」á是「鉛垂線」，lóng是teh表示上帝ê懲罰是真準確ê，一點mā不冤枉、不含糊，上帝既然beh懲罰，就bē草草了事，卻是確實地執行徹底毀滅ê工作。

	過去原本tī耶路撒冷聖殿ê外院lóng會有人傳授教導摩西律法ê規矩，chit-má是「無人講授律法」，連先知mā得bē-tio̍h「tùi上帝來ê異象」。換句話講，in就算想beh開始學習上帝ê話語，mā無機會了。因為in ê「君王kah貴族lóng被放ta̍k」，俘掠到巴比倫去了。真chē「父老」而且是「身穿麻衣，頭蒙塵埃」，恬恬「坐tī土腳」，用chit種方式來舉哀，而少女只有ē-tàng「垂頭喪氣地坦覆 (thán-phak）tī土腳」表示心中極大ê哀痛。

耶利米哀歌 2:11-2:22

註釋:

Chit段詩歌是teh描述巴比倫軍隊圍困耶路撒冷城期間，城內痛苦ê景況。

	第11到12節，chit兩節講tio̍h耶路撒冷城內飢荒ê嚴重性，人民已經到à因iau餓而「失明」、心靈受創嚴重ê地步，而且「兒童kah嬰á tī街路上昏倒」，甚至有ê一直向老母哀求ē-tàng得tio̍h食物，m̄-koh結果是只有ē-tàng倒tī「老母懷裡慢慢á死去」，這通常是hiah-ê iáu tī哺乳中ê嬰á á是幼年ê孩童。

	第13到14節，chit兩節thang參考耶利米書第廿七章14節到第廿八章9節，清楚描述先知耶利米譴責hiah-ê專門傳達假信息ê假眾先知。In ê信息m̄-nā對人民lóng無好處，顛倒ê，是引誘hiah-ê人拒絕聽從上帝ê警告，因為in kan-taⁿ會講取悅人ê話，講ê lóng是「白賊」，無勸導人民「悔改」，結果是帶hō͘人民koh khah大ê災禍，而且chit種災禍是大到「像大洋無邊無際」，已經m̄是人ê能力ē-tàng解決。

	第15到16節，chit兩節thang參考列王記上第九章7到9節。當所羅門完成聖殿奉獻hō͘上帝ê時，上帝就bat警告建造聖殿ê所羅門王，如果伊ê kiáⁿ孫不聽從上帝ê教示，聖殿就會成做hiah-ê人譏笑ê記號。Taⁿ，chit件事應驗ā，因為耶路撒冷城已破，聖殿被焚燬了，因為án-ne，看見ê人lóng teh嘲（sau）笑，特別是以色列民族ê仇敵看見koh khah是暢死，in認為期待已久ê日子「終其尾到à」。

	第17到18節，chit兩節提起會有chit種日子來臨，是因為上帝對猶大人民ê懲罰，而且這並m̄是臨時發生，卻是上帝早有計畫。只teh等待猶大人民悔改，m̄-koh in無。chit-má只有ê，就是為chiah-ê出現tī目睭前ê災難啼哭而已。

第19到20節，thang參考第四章10節，耶利米書第十九章9節。可見iau餓ê嚴重程度，已經達tio̍h無法度形容ê地步，看見「cha-bó͘人teh食家己心愛ê嬰á」，而且「祭司kah先知tī主ê聖殿內被刣」，chiah-ê lóng tī說明為tio̍h iau餓ê嚴重kah慘狀。

	第21到22節，tùi chit兩節thang看出巴比倫軍隊進入耶路撒冷進行殘酷ê刣戮行為，差不多就是大屠殺，無論是「老年人少年人」、「青年男女」lóng仝款，「無人ē-tàng逃脫」。

耶利米哀歌 3:1-3:33

註釋:

Chit章是第三首哀歌，mā是chit本經冊中siōng長ê一章，共有66節。Thang分做三個段落，就是第1到39節；第40到47節；第48到66節。M̄-koh thang kā第一段落分做兩段，就是第1到21節；第22到39節，án-ne讀起來mā會真順，而且主題mā清楚。Chit首詩歌ê特色，是每三節是用一個字母，án-ne廿二個希伯來文字母，tú好六十六節。

Chit段詩歌主要是先知耶利米ê自述，講述家己心內ê痛苦，因為伊傳講ê信息無人beh聽。M̄-nā án-ne，伊ê同胞iáu責備伊，講伊叛國，並掠伊，kā伊關tī監獄裡（參考耶利米書三十七：13—16）。Tī耶利米書第二十章、第廿六章、第三十八章等，lóng記載伊心中ê痛，以及被折磨ê情況，thang看tio̍h伊bat有過面臨死亡ê威脅，因為án-ne，伊ê心境對上帝ê ǹg望差不多beh消失。

Tī chit段經文中，詩人用「我」、「伊」ê時，lóng是單數teh表達。因為án-ne，有學者認為這是屬tī先知耶利米ê心靈世界，伊teh向上帝告白心內ê痛苦kah ǹg望。

    第1到3節，這若是屬tī先知耶利米ê告白，伊表示chit-má真正「體驗tio̍h痛苦」，而且chit種痛苦是tùi上帝來，而且是一再tú-tio̍h到「打擊」。伊ná親像hō͘上帝「趕入烏暗中」，m̄知應該án怎離開，只有ē-tàng「jú陷jú深」。

    第4到6節，chia提起ê m̄-nā是心靈ê創傷，而且是肉體ê折磨，m̄-nā是「皮肉破裂」，甚至連「骨頭」mā被「at斷」。Chia講伊被「強迫」tòa tī「幽暗中」，這是teh指伊被關入枯井中，這口井「井內無水，只有淤泥」（參考耶利米書三十八：6）。

    第7到9節，chia講先知耶利米被用「鐵鍊捆縛」tio̍h，這mā是古代對待囚犯ê一種方式，即使關tī監獄mā bē卸落來。無論伊怎樣呼求上帝，m̄-koh上帝lóng置之不理，拒絕聽伊呼求ê聲音。這mā隱喻tio̍h上帝bat kā先知耶利米講，ài伊m̄-thang koh再為猶大人民祈禱，因為上帝拒絕聽in祈禱ê聲音（參考耶利米書十四：11—12、十五：1）。

	第10到12節，chit三節真清楚講tio̍h巴比倫帝國ná親像一隻iau餓ê「熊」，mā向一隻iau餓已久ê「獅」，mā像獵人看見獵物ê時會「彎弓搭箭」，準備射向「箭靶」。

    第13到15節，準備ê弓箭已經射出，而且是非常準確地射中，結果倒落去ê時，成做大家ê笑柄。就是先知耶利米被關入監牢中仝款，民眾teh譏笑伊，hiah-ê假先知koh khah是。Á先知耶利米則痛苦到極點，伊講「受盡災禍」ná親像lim下「苦酒」一般ê艱苦心。

    第16到18節，tùi chit三節mā thang看出受折磨ê慘狀，包括「面被按tī土腳擦」，然後「嘴齒」mā被用石子「磨斷」，性命中體驗tio̍h ê lóng是「痛苦」，tī短短歲月中，對上帝ê期待lóng完全消失了。

	第19到21節，因為身心lóng受tio̍h嚴重創傷，因為án-ne，所有記憶中，lóng是一種「心靈」ê負擔。Ē-sái講是即使是án-ne，á是心存ǹg望。

	這是第三章ê第二首詩，mā是一首信仰告白ê詩，kah前一首詩歌ê內涵完全無仝，是一首非常好ê詩歌，用來表明對上帝絕對ê忠實、óa靠。

Tī chit首詩歌中，作者開始用「複數」ê「阮」來代表示以色列人民。作者肯定上帝是一個「慈愛永遠bē斷絕」ê上帝，mā是一個「憐憫永遠bē止息」ê上帝，並且是「滿有仁慈，bē久長拒絕」人懺悔、認罪ê上帝。

第22到24節，目前一首詩歌講性命不存有任何希望ê時，chit首詩歌卻講beh對上帝有ǹg望，因為祂ê「慈愛永遠bē斷絕」、「憐憫永遠bē止息」，詩人講ài kā所有ê希望「寄託」tī上帝手中。

第25到27節，詩人非常確定一件事：只要走chhōe上帝ê人，上帝一定會「施恩」hō͘ chit種人。伊呼籲所有走chhōe上帝ê人會「耐心thèng候」上帝ê「救恩」。Chia所講ê「枷擔」，指ê是重稅ê負擔、戰爭ê驚惶、sàn-chhiah困苦ê生活，以及各種重大災難等等。

第28到30節，chit三節是teh回應第27節所提起ê「枷擔」。因為án-ne，tī第27節講「應該tī少年ê時學習負枷擔」，原因是「性命tú-tio̍h痛苦ê時chūn」，tī少年ê時經歷過，就會成做老人ê智慧kah冠冕。因為「縱然受鞭phah凌辱」，也ē-tàng有堅強ê毅力「忍受」落來。

	第31到33節，chit三節談起上帝ê特性，就是「滿有仁慈」（參考詩篇一○三：8），而且有「堅定不移」ê疼。因為án-ne，性命有痛苦，he絕對m̄是上帝存心beh án-ne對待敬畏祂ê人，卻是一種訓練。

耶利米哀歌 3:34-3:48

註釋:

第34到36節，chit三節lóng用「主必關懷」來形容上帝ê特性；公義ê上帝絕對bē hō͘無公義ê事繼續發生，á是袖手旁觀，mā bē對冤屈ê事有看kah-ná無看tio̍h，聽tio̍h被欺壓者哀哭ê聲音koh khah bē聽而不聞。Chit位公義ê上帝一定會為受冤屈ê伸冤，並且為hiah-ê tú-tio̍h迫害ê人討回公道。這mā是詩篇ê詩人所講ê，上帝一定會看顧hiah-ê因為被冤屈而入監獄受苦ê人，上帝必定會垂聽in haiⁿ-haiⁿ叫ê聲音（參考詩篇六十九：33）。耶穌出來傳福音ê信息ê時，就bat引用先知以賽亞ê信息，講beh hō͘「受掠ê，得釋放」，hō͘「受欺壓ê，得自由」（參考路加福音四：18，以賽亞書四十二：7）。

第37到39節，chit段詩歌thang參考箴言第十六章33節。如俗語所講ê：「謀事在人，成事在天。」

哀歌ê詩人講：「是福是禍，lóng出tī至高者ê命令。」chit句話mā teh隱喻，巴比倫帝國會chiah-ni̍h興盛，必定有上帝ê旨意，並m̄是它有甚麼本等thang成就ná此龐（pâng）大帝國ê勢力。相對ê來講，猶大會hō͘滅亡必定有上帝特別ê旨意，應該是kah它犯罪「受懲罰」有密切關係，若無，bē致使發生chiah-ni̍h重大ê事件。因為án-ne，受苦難，第一個tio̍h反省ê是家己，卻m̄是一味地「埋怨」上帝。

第40到42節，ná親像第39節所講ê，受懲罰，必定kah人犯罪有密切關係。因為án-ne，「該檢討家己ê行為」是m̄是有真正「歸回上主」，卻m̄是一直埋怨上帝。Siōng好ê方式，就是「phah開心門，向天頂ê上帝祈求」，á是允准以透過chit種方式，向上帝陳述家己ê過錯，祈求上帝ê「赦免」chiah是正確之道。

第43到45節，chit三節講tio̍h上帝怎樣懲罰猶大kah人民。原因就是in ná親像第42節所講ê，並無承認「背叛犯罪」，koh khah m̄知tio̍h祈求上帝「赦免」。因為án-ne，上帝回應in ê方式，就是hō͘敵人巴比倫軍隊「tui-jiok」in，並且是in Tī痛苦中ê哀嚎聲音，hō͘上帝ê「密雲」hō͘「遮蔽」起來，上帝聽無看tio̍h in ê哭聲。原本「密雲」是上帝用來保護以色列人民免受災害ê（參考出埃及記十四：19—20），mā是上帝出現kah以色列人民、摩西對話ê方式（參考出埃及記十九：16—17；四十：34—38）。M̄-koh chit-má，上帝用「密雲」來隔離祂kah猶大ê以色列人民之間ê關係，hō͘ in原本thang被世人看做siōng榮耀ê族群，taⁿ反tńg變成被眾人唾棄ê對象，像「垃圾」仝款，人見人厭。

第46到48節，因為會失去上帝ê眷顧，過去所有ê光彩lóng會失去色澤。Tī失敗中只有被「仇敵嘲（sau）笑」，mā tī受掠做奴隸之地被敵人「戲弄」ê份。家鄉、故國已經被摧毀，猶大國無了，人民tī亡國中只有ē-tàng「tī危險驚惶中過日子」，因為隨時隨地lóng會有死亡ê可能。詩人親目睹「同胞所tú-tio̍h ê摧殘」，除了「目屎像江河湧流」外，完全bē-tàng為力。

耶利米哀歌 3:49-3:66

註釋:

Chit段詩歌ē-sái講是一首向上帝祈禱ê詩歌。Tī前一段詩歌lóng是用帶領群體會眾認罪ê哀歌，因chit首詩人用「阮」來表達。chit-má chit段詩歌則轉換做個人向上帝祈禱ê詩歌，用ê lóng是「我」。

第49到51節，詩人tī chia當做證人，伊向上帝哭訴，伊看見ê景象，就是「城中婦女ê遭遇」，心內「傷痛無停」，m̄-koh求上帝ē-tàng tùi天頂「垂顧」chiah-ê殘酷ê景象。

第52到54節，詩人繼續控訴敵人殘酷ê手段，就是「追捕」受難者，ná親像「追捕鳥á」，hō͘受難者ná親像驚弓之鳥，四界bih起來避難。M̄-koh mā無法度bih起來得過，因為敵人m̄-nā掠tiâu了受難者，而且是kā in「活活tàn入去陷阱」中，並且「用石頭塞tòa」逃生口，而井中ê水teh要「淹滅」，看起來死亡已經來到，詩人講無koh對性命存有任何希望了。

第55到57節，chia看tio̍h性命ê ǹg望，就是tī極大絕望中，上帝終其尾出聲，ài苦難ê子民「免驚」，因為上帝確實是「有聽tio̍h」in苦難ê呼聲。因為chiah-ê子民已經知影只有「求告」上帝ê名才能得tio̍h性命ê契機。這ná親像創世記第四章26節所講ê，塞特ê kiáⁿ以挪士開始求告上帝ê名仝款，後代因為án-ne而延續性命落來。

第58到60節，上帝既然聽見了呼求幫助ê聲音，就會出手救助。Chit位公義ê上帝一定會替受迫害者「伸冤」，並且會宣告受冤屈ê人「無罪」。因為上帝清楚知影chiah-ê迫害者是「怎樣陰險傷害」祂ê子民。

第61到63節，仇敵ê「辱罵」聲音，上帝會聽見；敵人「一切ê陰謀」上帝看kah非常清楚；敵人怎樣「設謀造計beh陷害」，上帝lóng了若指掌；in日瞑lóng tī「恥笑」，chit種譏諷ê聲音，上帝聽得非常清楚，因為án-ne，上帝必定會teh審判ê時一一the̍h出來算帳。

    第64到66節，chit三節mā是詩人ê心聲，伊懇求上帝「懲罰」chiah-ê仇敵，「照in ê行為報應in」，chit點mā是聖經一再強調ê觀念（參考詩篇廿八：4，以賽亞書五十九：18、六十五：7，耶利米書廿五：14，何西阿書四：9、十二：2）。聖經作者一再強調，上帝是會報應ê神。

耶利米哀歌 4:1-4:22

註釋:

Chit首詩ê特色，就是kā耶路撒冷過去ê光輝對照目前荒廢之景況，hō͘人感覺不勝噓唏；過去ê景象是閃爍如黃金，taⁿ卻黯然無光；過去是餐餐山珍海味，taⁿ是餓死街頭；過去過ê是奢侈生活，chit-má卻tī糞埽堆中chhōe食物；以前ê望族，chit-má則倒街頭ê街友；以前身軀碩壯，chit-má則因為缺乏食物而瘦骨如柴等等。Chit種對比，hō͘人一看就知影耶路撒冷已經是一個破碎ê城市，無koh是適合人繼續khiā起ê廢墟之地。

	第1到2節，「聖殿」是teh指耶路撒冷ê聖殿，而「錫安」則是teh指耶路撒冷。前者，thang tùi列王記上第六章、第七章15到50節等等看tio̍h建造整座聖殿ê情景，ē-sái講是「金碧輝煌」，聖殿內部差不多lóng是用純金打造起來ê。M̄-koh chit-má是「黯淡無光」，而且聖殿因為被火燒後，每塊石頭lóng被拆落來，ná親像chia所講ê「石頭堆積tī街路上」。當輝煌ê日子內，耶路撒冷ê青年hō͘人認為是siōng有性命力ê，m̄-koh chit-má卻是ná親像破碎ê「瓦器」仝款。

第3到5節，thang參考第二章11到12節、19節。

會發生chit種悲慘ê景況，是因為巴比倫軍隊圍困耶路撒冷城，致使城內食物嚴重缺乏。Á iau餓嚴重ê情況tùi第9到10節就thang看出。Chia詩人形容tī iau餓難耐ê情況下，人有時是比起野獸iáu不如，竟然m̄知該怎樣為子女生存所需要ê食物chhōe-tio̍h解決方法。飢荒，已經逼kah chiah-ê過去活tī奢華中ê人，taⁿ像落魄ê乞丐般，只有ē-tàng tī糞埽堆中chhōe食物。M̄-koh連chit-ê期待mā成做一種奢求。 

第6節，chit節特別提起「所多瑪」，kā hit-ê城變成廢墟ê情景來比並chit-má耶路撒冷，詩人耶路撒冷所受tio̍h ê懲罰，遠比所多瑪毀滅ê情形koh khah嚴重，所多瑪已經徹底毀滅，ná耶路撒冷就無法度想ná親像怎樣ê了。不過詩人強調ê是毀滅所多瑪是瞬間，而上帝若beh毀滅耶路撒冷mā是仝款，hō͘人措手不及。

第7到8節，chit兩節mā是一種對比句型，講述過去ê望族過ê生活非常優雅，m̄-nā「精力充沛」，而且是「體格強壯」。M̄-koh chit-má卻是「倒街頭，無人認bat」，這表示非常落魄，kah過去「潔白」ê皮膚完全無仝款了，chit-má是「面孔比煤炭iáu烏」，而且是「皮包骨頭，枯瘦如柴」。

第9到10節，chia講tio̍h耶路撒冷城內飢荒ê嚴重程度，已經到à為tio̍h要求生存，老母甚至一定tio̍h「煮家己ê gín-á食」（參考二：20）。若是對照第4節來看，真可能是嬰á因飢渴來死，老母為tio̍h beh生存落去，á是為tio̍h hō͘其他iáu活teh ê gín-á免tī餓死，只好kā死去ê嬰á煮充飢。

第11到13節，詩人承認會發生chiah-ê悲慘ê結果，是因為上帝發出「大受氣」，伊火燒ê「怒火」懲罰了耶路撒冷。比起耶路撒冷昔日ê光輝，kah chit-má荒廢ê景況，明明是hō͘人無法度相信，因為它原本有堅固ê城牆（參考耶利米書廿一：13），過去無任何「侵略者ē-tàng侵入」城門。M̄-koh當上帝一放手，就算有銅牆鐵壁mā無用。Á會發生chit種事，必定kah in棄sak上帝有密切關係，因為in ê「先知」kah「祭司」lóng犯罪，棄sak上帝了。

先知，原本是beh傳達上帝ê信息，m̄-koh in m̄-nā無傳出上帝ê信息，反tńg假借上帝ê名傳信息，koh khah嚴重ê是in「奉巴力神明ê名講預言」，hō͘上帝ê子民行入歧途（參考耶利米書廿三：13）。

第14到16節，過去chiah-ê猶大社會領導ê菁英，taⁿ像過街老鼠仝款，四界流竄，無人願意接納in，因為in過去ê惡行，taⁿ害得kui個國家lóng ná親像悲慘世界一般，因為án-ne，人民kā chiah-ê領導群當做像癩ko病人般m̄敢靠近，無任何人，á是國家願意收留in。因為知影收留in kan-taⁿ會帶來koh khah大ê災難，一點利益mā無。M̄-nā án-ne，連上帝lóng拒絕chiah-ê領袖、菁英，特別是祭司，koh khah是上帝所忿怒ê對象。因為in m̄-nā無帶領人民歸向上帝，siōng 可惡ê，是iáu帶領人民拜偶像。

第17到18節，chit兩節thang參考耶利米書第三十七章ê記載；事件是發生tī西底家作猶大王ê時chūn，mā就是主前597年。巴比倫軍隊來攻打耶路撒冷城ê時，埃及ê軍隊來援助猶大，hō͘巴比倫ê軍隊掉頭tńg去。埃及因為án-ne班師tńg來國。M̄-koh就tī chia ê時，巴比倫koh轉tńg來攻擊耶路撒冷，而chit pái埃及mā來不及派援軍來救助猶大。M̄-koh猶大ê領導群卻iáu teh苦苦期待埃及援軍來救助。M̄-koh chit時仇敵來à，大家知影「完了」，「終局到à」，國家teh beh毀滅ā。

第19到20節，詩人形容巴比倫帝國ná親像la̍h-hio̍h一般ê凶猛（參考耶利米書四十八：40，以西結書十七：3），有時mā ná親像「tī山頂tui-jiok」獵物，á是tī「曠野埋伏等待」ê「獅」仝款（參考耶利米書四十九：19）。結果猶大王西底家m̄-nā被掠tio̍h（參考耶利米書五十二：1—11），國家mā因為án-ne宣告滅亡。

第21到22節，chia詩人mā警告以東人別幸災樂禍，因為發生tī猶大ê災難，mā會發生tī以東，in bē好gōa chē。先知耶利米就傳出上帝beh用巴比倫懲罰in（參考耶利米書四十九：7—12）。

耶利米哀歌 5:1-5:22

註釋:

Chit章ê詩歌主要teh描述淪陷後ê耶路撒冷城，以及猶大ê以色列人民所tú-tio̍h ê生活苦境。

第1到3節，詩人向上帝哭訴，祈求上帝看顧in所受ê「恥辱」，m̄-nā in ê土地（產業）lóng落tī「生份人」（指巴比倫人）手中，in ê房舍mā被侵入掠奪。因為cha-po͘人lóng去參戰死去，á是受掠伊去，結果到處可見孤兒寡婦。

第4到6節，chit三節講tio̍h因為戰敗，hiah-ê人想beh得tio̍h食物比登天iáu難，連siōng基本ê水，lóng「得付錢」chiah有ê lim，其它ê食物koh khah免講了。In甚至hông掠去做奴隸，像牛馬一般被驅趕，m̄-koh無歇睏喘氣ê機會，直到thiám死為止。Hiah-ê逃往「埃及」kah「亞述」ê人，認為會真安全，其實in m̄-tio̍h去，因為國家phah敗仗，無論gōa chē避難，lóng會hō͘人看bē起，bē比較khah安全。先知耶利米就bat苦勸chiah-ê想beh去埃及避難ê同胞，tio̍h放棄chit種想法，因為這是上帝tī懲罰猶大人民。因為án-ne，in無論怎樣逃都無用。上帝會用「戰爭、飢荒、瘟疫」等方式重罰in（參考四十四：27）。注意第6節所講ê「亞述人」應該是「巴比倫人」之誤。

第7節，thang對照第16節，就會看見記載有明顯無仝；前者講犯罪ê是來自祖先，後者承認家己mā犯罪。Koh再對照耶利米書第十六章11到12節：「上主án-ne講：『lín ê祖先背叛我去膜拜服事別ê神明。In棄sak了我，不聽從我ê教示。M̄-koh，lín比in koh khah 可惡。Lín一直為家己頑劣ê心思所趕逐，不聽從我。』」這真清楚ē-tàng看出，並m̄是因為祖先ê罪過延禍下一代，卻是in tī苦難中iáu缺乏反省chiah會有chit種想法。

	第8到14節，chit段經文是teh描述亡國後，猶大人遭遇ê苦難，慘狀真是hō͘人不忍目睹；包括受人奴役（第8節），iau餓kah破病（第9到10節），妻女被姦污、強暴（第11節），領袖、菁英被刑求（第12節），少年一代受折磨（第13節），少年人喪生了（因phah敗仗），因為án-ne，無koh有人彈琴奏樂等等。

	第13節ê「推磨」，這是古代奴役á是僕婢siōng普遍ê工作。

	第14節提起「老人無koh坐tī城門口」。城門口是古代ê法庭，「老人」通常lóng是teh指社區ê長老階級者，á是有公信力權威ê長者。Taⁿ無法度koh再tī城門口審斷人民公案，表示in已經失去司法權，無koh擁有家己ê律法制度。

    第15到18節，chit段詩歌講出in心中充滿悲痛，過去ê榮耀確定已經失落，無koh有任何「華冠」thang彰顯榮耀。只有ê就是悲傷啼哭到雙眼霧霧無清。過去繁榮ê錫安，taⁿ只chhun「狐狸tī廢墟中徘徊」tio̍h。因為kui個耶路撒冷已經成做一座死城。

	第19到22節，詩人表達了強烈ê信仰毅力，即使tī chiah-ni̍h惡質ê困境中，á是相信上帝會拯救in，相信上帝chiah是真正ê主宰、統治者。伊m̄相信上帝會真正「永遠拒絕」祂ê子民，mā m̄相信上帝ê「忿怒永遠bē止息」，不，詩人相信上帝一定會看顧祂ê子民所tú-tio̍h án-ne悲慘ê境遇。

第22節詩句ê結尾ná親像kui卷哀歌ê起頭以「詢問」提出「為甚麼」（參考一：1），tī結束ê時用「詢問」提出「kám講」作結束。