重新查詢  A+放大  A-縮小
經文：

約翰福音 1:1-1:18

註釋:

Chit段經文ē-sái講是約翰福音書ê「序言」，作者開始用「道」來講述耶穌ê特質、心思、意念lóng ná親像是上帝。所以第14節thang講是kui本約翰福音書ê中心思想：道成做人，tòa tī咱中間充滿tio̍h恩典kah真理。

Koh講，作者ài用「光明」kah「烏暗」這相對ê存在，表明上帝救恩kah罪惡ê對比。

「道」chit-ê字，m̄是kan-taⁿ停止tī理性ê思考，mā是一種行動ê氣力。作者tī第四節講：「道本身有活命，chit-ê活命是人類ê 光。(全民版)」換句話講，「道」本身就是一股創造ê氣力ê存在。
經文：

約翰福音 1:19-1:28

註釋:

四本福音書lóng紹介過行洗禮約翰，m̄-koh以約翰福音紹介kah siōng-kài詳細。比較特別ê所在tī第19節，行洗禮約翰已經傳道一段時間了，而且一定震撼了耶路撒冷當局，in因此派人去進行了解行洗禮約翰ê身分。

A. Tùi第19 kah 24節ē-tàng看出，來詢問、調查行洗禮約翰身分ê有兩組人，一組是祭司，另外一組是法利賽人。In之所以想了解行洗禮約翰ê身分，主要原因是「猶太地區kah 耶路撒冷ê 民眾lóng 去約翰hia，告白家己ê 罪。約翰就tī 約旦河kā in 洗禮。(全民版)」（馬可福音一：5），這必然造成極大ê轟動。

B. 作者tī第28節kā咱講，發生chit件事ê地點是tī「約旦河對岸ê伯大尼」，這地方距離耶路撒冷無遠。
經文：

約翰福音 1:29-1:34

註釋:

Cit段經文講行洗禮約翰teh為耶穌見證，講祂就是「上帝ê Kiáⁿ」。Tio̍h注意第29節，行洗禮約翰講耶穌是「上帝ê羊羔，除掉世人ê罪ê」，這是kah 猶太人宰殺Pôaⁿ過節羊羔ê觀念有密切關係，因為Pôaⁿ過節羊羔所代表ê是救贖ê意思。M̄-koh，mā可能是teh表示受難ê羊羔一般，ná親像以賽亞書第五十三章所描述ê受難 ê奴僕。
經文：

約翰福音 1:35-1:42

註釋:

約翰福音書kah頭前三本福音書siōng大ê無仝ê所在，就是認為耶穌是kah行洗禮約翰同時傳福音，m̄是tī行洗禮約翰入監了後，耶穌chiah開始出來傳福音ê事 工。Koh講，行洗禮約翰kā耶穌紹介hō͘家己ê門徒，其中有一位是彼得ê小弟安得烈，然後由伊紹介彼得認bat耶穌，chit點mā kah其他三本福音書無仝。

行洗禮約翰真清楚家己ê角色，所以伊一看見耶穌，就馬上kā家己ê門徒講，mā hō͘家己ê門徒去跟tòe耶穌，chit種態度chiah是傳福音siōng基本ê要件，因為咱就是beh見證耶穌是救主，咱m̄是主角，耶穌chiah是。
經文：

約翰福音 1:43-1:53

註釋:

有真chē人認為chit位拿但業就是耶穌12門徒中ê「巴多羅買」，m̄-koh，到目前為止，無確切ê資料thang佐證。前三本福音書mā無耶穌「呼召」 腓力ê記載，只有約翰福音chia記載耶穌呼召伊，ná親像馬可福音記載耶穌呼召彼得兄弟、雅各兄弟，kah稅吏利未仝款。腓力跟tòe耶穌後，馬上將家己對耶穌ê認bat介 紹hō͘家己ê朋友。這是真有意思ê一件事，mā是咱tio̍h學習ê福音事工，kā咱所認bat ê耶穌，kā家己ê好朋友講，福音就是án-ne傳開ê。
經文：

約翰福音 2:1-2:12

註釋:

迦拿婚姻ê宴席，耶穌hō͘水變成酒ê神跡故事，一直是hō͘人歡喜ài講。請注意，福音書中記載耶穌ài用婚姻ê宴席做上帝國比喻ê材料。如果 chit-ê婚姻ê宴席mā有chit-ê隱喻ê話，上帝國就是用上帝做中心，án-ne就koh khah清楚了，人m̄是上帝國ê主人，上帝chiah是。所以人不要求上帝做甚麼事，只有交託、順服， 上帝家己會phah算，mā知影該作甚麼。因為上帝國談ê是上帝ê主權。
經文：

約翰福音 2:13-2:25

註釋:

Chit段記載耶穌潔淨聖殿ê故事，四本福音書lóng有記載，m̄-koh，約翰福音書所記載ê siōng-kài特別。作者清楚指出地點是tī「聖殿外院」（to̍h是外邦人 院），而且販賣ê包括牛、羊、粉鳥，mā有兌換銀錢ê商人。而且耶穌是對賣粉鳥ê人講，「Mài kā阮老父ê聖殿當做市場」，市場是做seng-lí買賣ê所在，商場鬼扛鬼ê pián仙á屢見不鮮，m̄-koh，聖殿是teh敬拜上帝ê所在，怎樣ē-tàng有án-ne態度？

注意第19 節，耶穌講in chit種行踏已經kā聖殿「拆毀」了，m̄-koh伊ài tī「三工之內」kā它重建起來，chit種講法真清楚m̄是指外型ê聖殿建築，卻是人內心對上帝敬拜ê意思。如果 無真誠ê內心敬拜上帝，即使koh再súi、堂皇ê建築物mā是枉然。M̄-koh，耶穌講伊ài tī「三工之內」重建聖殿ê chit句話，卻成做伊後來被猶太人宗教領袖chhōe人作假見 證陷害ê理由之一（馬可福音十四：58）。
經文：

約翰福音 3:1-3:21

註釋:

尼哥德慕是猶太人siōng koân議會ê成員（和合本用「猶太人ê官」，意指為議會成員），mā是法利賽派ê人。伊利用暗時來chhōe耶穌，並且表示伊知影耶 穌是「tùi上帝hia來ê教師」，koh認定耶穌所行ê神跡是因為有上帝ê同在。Án-ne看起來，chit位屬tī法利賽派ê尼哥德慕，顯然kah前三本福音書所描述ê法利賽人不 太仝款。比較特別ê所在，是伊稱呼耶穌「老師」（猶太人kā它稱做「拉比」）。換句話講，這表示伊對耶穌是相當尊崇ê態度，若無伊bē tī耶穌死後帶三十公斤 ê「沒藥kah沉香混合ê香料」beh去裹耶穌ê身軀（約翰福音十九：39）。

A. 耶穌一下看見伊就直接講tio̍h「重生」ê問題。M̄-koh，尼哥德慕顯然對「重生」ê了解無仝款；tī伊ê認bat裡，「重生」是koh一pái tńg來到老母ê腹肚裡生出來。M̄-koh，耶穌談「重生」，是teh指性命ê重新koh再造ê意思。因為chit-ê「重」有「頂面」ê意思。

使徒保羅是kā耶穌「重生」ê意思表達siōng清楚ê人，伊講：「無論甚麼人，若kah 基督結聯，就是新創造ê 人；舊ê tāi-chì 已經過去，taⁿ lóng 變做新ê。(全民版)」（哥林多後書五：17a）

B. 耶穌chit種回答，其實就是teh kā XX 講尼哥德慕，神跡m̄是siōng重要ê，重要ê乃是人心靈ê潔淨chiah重要。人看見神跡，卻無一定看見上帝ê旨意，m̄-koh，心靈潔淨ê人， 會明白上帝ê旨意。Ná親像耶穌tī山頂寶訓中所講ê：「心肝清氣ê 人實在有福氣，因為in 會見tio̍h 上帝！(全民版)」（馬太福音五：8）

C. 第5節應該是chit段談話ê中心，講tio̍h一個人「若無法度tùi水kah聖神重生，就無法度成做上帝國ê子民。」水，這是teh指洗禮、潔淨ê意思。聖神，是上帝感動人ê心ê氣力。 Tùi約翰行洗禮開始，咱看tio̍h伊一再呼籲人tio̍h接受洗禮ê時，一定tio̍h用真實ê心悔改。所以悔改ê人chiah會得tio̍h聖神ê感化，chit種人才ē-tàng成做上帝國ê子民。

D. Tùi第14到21節，耶穌進一步解釋伊家己ê角色，就是成做上帝kah人之間ê橋樑，為tio̍h是beh hō͘人因為伊看見上帝拯救ê疼已經降臨tī人間。
經文：

約翰福音 3:22-3:36

註釋:

第22節講耶穌tī猶大地區為人行洗禮，m̄-koh，tī第四章2節，koh作了澄清講：「其實耶穌家己無kā 人洗禮，是祂ê 門徒teh kā 人洗禮。(全民版)」Chit段經文mā hō͘咱看tio̍h約翰福音書kah頭前三本福音書siōng大ê區別，就是約翰福音ê作者認為耶穌kah行洗禮約翰是同時teh傳道，á前三本福音書lóng講行洗禮約翰入監後，耶穌chiah開 始伊ê傳道工作。

第27節是重要ê一節，因為chit節thang看tio̍h行洗禮約翰真清楚家己ê角色，mā hō͘咱看tio̍h伊對耶穌ê身分真清楚，bē因為耶穌ê名聲、眾望贏過伊，就嫉妒，á是無歡喜。無。「我m̄是基督；我不過是奉差遣作伊ê前驅。」chit句話mā thang講是行洗禮約翰ê信仰告白。
經文：

約翰福音 4:1-4:41

註釋:

第四章是約翰福音tī編輯上真典型ê一章，作者歡喜記述耶穌所講ê話，kah前三本福音書ê作者偏重耶穌所做ê事工無仝。約翰福音ê作者常常是kā耶穌所做ê事kah伊所講ê話混合編做伙，而且以伊講過ê話為主軸。

A. 第1節thang看出法利賽人開始注意耶穌ê行動，因為in已經發見耶穌ê影響力khah贏過行洗禮約翰。

B. 第8到9節提供hō͘咱真好ê資料──撒馬利亞人kah猶太人彼此無來往。這是因為歷史ê因素使然。主要是猶太人看bē起撒馬利亞人，認為in ê血統不純，甚至kā In看做是「無清氣」ê人，只要in the̍h過、摸過ê物件lóng看做無清氣ê，這就是為甚麼chit-ê撒馬利亞女人感覺非常奇怪，耶穌怎樣會向伊討水lim ê原因。Mā tùi chit節thang了解耶穌講「好ê撒馬利亞人」ê比喻之用心à。

C. 雖然耶穌對伊講ê話，並m̄是伊會了解ê，m̄-koh，chit位撒馬利亞ê cha-bó͘人卻是一個渴望得tio̍h「活水」ê，伊ê心靈渴慕tio̍h性命ê泉水。

D. 耶穌kā chit位撒馬利亞ê cha-bó͘人講，敬拜上帝，siōng重要ê m̄是地點，卻是真實、敬虔ê心靈。任何宗教信仰lóng仝款，如果無誠實、敬虔ê心靈，走去所講ê宗教聖地敬拜，mā是枉然。Chit對今á日ê基督徒mā是真好ê教示。

E. 傳福音ê工作其實無需要甚麼大學問，重要ê是真真實地kā耶穌紹介hō͘咱所認bat ê人知影，án-ne就有夠。看，chit位撒馬利亞ê cha-bó͘人，就是án-ne做，伊kā鎮上ê 人講耶穌kā伊「所做ê事lóng講出來」，結果hō͘真chē人lóng相信了耶穌。這mā是咱常講ê「分享信仰ê經驗」，就是siōng好ê傳福音方式。
經文：

約翰福音 4:42-4:54

註釋:

Tī第45節講加利利人歡迎耶穌，主要原因是in tī耶路撒冷ê時chūn，看見耶穌tī「節期中所做ê一切事」。照第二章23節ê記載，耶穌bat tī耶路撒冷行過神跡。Án-ne看起來，加利利人是因為耶穌ê神跡來歡迎祂，m̄是因為耶穌所傳講ê信息來信祂，這kah頭前ê撒馬利亞庄頭ê人，因為聽耶穌所傳講ê信 息，就相信伊（四：41），確實有真大ê差別。

A. 第46節只有講是一位官員，並無講是甚麼位階，真可能是希律手下ê高官。Chit段故事mā thang比較馬太福音第八章5到13節，kah路加福音第七章1到10節。

B. 「若m̄是看見神跡奇事，lín lóng是m̄信。」chit句話講出當時ê人ê信心真脆弱，mā顯示出chit位官員ê問題。耶穌並無跟tòe伊去in-tau，只hō͘伊一句話：「去，你ê兒 子會活ê！」佳哉，chit位羅馬官員「信了耶穌ê話就tńg去」。神跡mā是án-ne發生，就是無懷疑，堅定ê相信，就必定會發生。

C. 約翰福音ê作者一再ài beh表達一個主題：耶穌ê話本身就是性命ê氣力；祂 ê話ē-tàng hō͘水變成酒（二：1—10），也ē-tàng hō͘病了而且倒tī水池邊達卅八年久ê病人tùi擔架 上起來行（五：1—8）。Chit位官員ê gín-á，耶穌只hō͘一句話，就好起來。這就是約翰福音ê作者所beh kā咱講ê信息：聽耶穌ê話，性命會得tio̍h重生。因為伊ê 話，就是親像神跡一般ê神奇。
經文：

約翰福音 5:1-5:18

註釋:

約翰福音書kah前三本福音書無仝ê所在，就是chit本福音書時常提起耶穌到耶路撒冷去，á前三本福音書則講耶穌是tī傳道工作到最後一禮拜ê時，chiah到耶路撒冷城去。Án-ne看起來，tī約翰福音書ê寫法，耶穌ê傳道工作是行遍包括加利利在內ê kui個猶大地區。

A. 「畢士大」chit-ê名ê意思是：憐憫之屋。這可能kah池水動了ê時chūn，先下水ê病人會得tio̍h醫有關，而且tī chia聚集了真chē等待醫ê病人（3節）。

B. Kui個故事ê重點是tī第7節，chit-ê病了卅八年ê病人，並無因為行動比別人慢，伊對lian去ê性命失去信心，伊kā耶穌講tī水動ê時chūn，即使是無人幫助伊，伊iáu 是「想落去」，因此耶穌醫好伊。一個人對家己ê性命有信心，這是siōng重要ê。如果一個人連家己lóng無了信心，ná koh怎樣ē-tàng期待神跡出現？無可能！
經文：

約翰福音 5:19-5:29

註釋:

因為「猶太人ê領袖決意beh殺害」耶穌，除了耶穌破壞安息日ê誡命外，koh khah是kā家己看做是上帝ê kiáⁿ（18節）。所以耶穌開始有進一步ê「答辯」。

Tī chit段經文中，咱注意tio̍h耶穌強調ê幾點：
A. 祂m̄是憑tio̍h家己ê能力做事，卻是上帝ê旨意。
B. 祂就是上帝tī世間ê全權代表，信靠祂，就是信上帝。
C. tī祂ê身上，人thang看tio̍h koh活ê性命。
經文：

約翰福音 5:30-5:47

註釋:

Chit段經文真特別，因為耶穌提起行洗禮約翰，原因是早期行洗禮約翰影響真大，真chē人kā伊看做是先知，甚至是siōng偉大ê先知。雖然行洗禮約翰bat kā伊ê學生講耶穌就是「上帝ê羊羔」（一：36），甚至講家己「我m̄是基督，只不過是受派來做祂ê先鋒。』(全民版)」（三：28）而已，m̄-koh，耶穌卻明白kā當時ê人講，祂並無需要行洗禮約翰替祂作證，祂家己ê工作就ē-tàng證明家己是上帝所差遣到世起來ê亮光，上帝家己會為祂做證。

A. 耶穌進一步指出chiah-ê想beh kā祂殺害ê猶太人宗教領袖，只是teh裝飾表面，並m̄是實在認bat上帝ê救恩，所以in ê信仰並m̄是實在ê。

B. 猶太人siōng相信摩西，chiah-ê宗教領袖koh khah是惟有摩西是in ê準則，m̄-koh，耶穌卻kā-in講，連摩西lóng為伊作證！
經文：

約翰福音 6:1-6:15

註釋:

這是四本福音書唯一lóng有記載ê神跡──五餅二魚。約翰福音書siōng特別ê所在，是提供奉獻五餅二魚ê是一個gín-á，而且餅是「大麥餅」，chit種餅通 常是hō͘家畜、禽等動物食用，除非真sàn-chhiah ê人家，若無一般人並無食chit種餅。所以chhun落來ê食物mā只有餅，可能就是「大麥餅」ê緣故。請注意第14到15節， 大家看tio̍h耶穌行chit種神跡，認為祂就是大家所期待hit位teh beh來ê先知──拯救者如摩西（參考申命記十八： 18），因此beh擁戴祂當王，m̄-koh，耶穌拒絕，家己避開到偏僻ê所在去。
經文：

約翰福音 6:16-6:21

註釋:

即使是對加利利海相當老道ê彼得等四位掠魚出身ê門徒，對這突如其來ê狂風大湧，mā是hō͘不上力。Á當耶穌出現tī水面上時，in原本甚是驚惶，當in知影是耶穌後，chiah歡歡喜喜接祂上船。約翰福音ê作者kā重點hē tī最後一句：「船馬上達tio̍h目的地。」用來表示有耶穌tī船頂，in ē-tàng排除狂風巨浪ê衝擊。
經文：

約翰福音 6:22-6:71

註釋:

Ná親像咱一再提起過ê，眾人並無因為耶穌所行ê神跡á相信耶穌，大家「歡喜看」神跡，並m̄是tùi神跡ê出現學習認bat上帝ê慈愛kah救恩。耶 穌就真不細jī地指出眾人chhōe伊ê真實問題，結果in就露出了馬腳，要求耶穌koh再行神跡hō͘ in看（30節），m̄-koh，耶穌並無án-ne做。因為伊m̄是為tio̍h行神跡而來到世界。

A. 福音事工就是聖神teh做工，這是非常清楚ê，看，耶穌講：「若m̄是ná差我來ê老父吸引人，無人ē-tàng到我chia來。」伊無因為群眾聚集chhōe伊，就將家己pôaⁿ過了應有ê角色。

B. 就ná同在井邊kah撒馬利亞ê女人談話ê情形一般，當耶穌講祂就是活水時，ná女人聽m̄-bat，現在耶穌對眾人講伊是性命ê食糧時，眾人mā是不明其意，甚至連門徒mā lóng感覺耶穌ê「教導太難了，什麼人聽得入去neh？」

C. 第63節應該是Chit篇講道ê重點：「hō͘人性命ê聖神，肉體是無濟tī事ê。我kā lín講ê話就是賜性命ê靈。」

D.咱看tio̍h有人因為感覺耶穌ê教導siuⁿ oh得理解á離開祂。今á日mā有真chē人原本是基督ê信徒，後來mā離開了，原因kah當時ê人跟tòe耶穌ê情形差不多，多數ê人lóng是 歡喜看神跡，聽簡單ê道理，總感覺信仰無需要花siuⁿ-chē ê功夫，mā mài費siuⁿ-chē ê精神，希望進天國ê事，像買「麥當勞」仝款簡單siōng好。M̄-koh，信仰不是án-ne，基督教ê信仰需要咱用心、用力、用精神去追求。
經文：

約翰福音 7:1-7:24

註釋:

當有跟隨者離開耶穌伊去ê時chūn，連伊ê兄弟mā對耶穌m̄信任，甚至認為伊是為tio̍h beh出名。耶穌講：「先知tī 家己ê故鄉bē 受尊重。」(全民版)」（四：44）chit句話mā thang用tī伊家己ê厝內人身上。

A. Tòa棚節，這是猶太人三大慶祝節期（Pôaⁿ過節、五旬節、Tòa棚節）之一，這是teh慶祝收割ê活動，時間是tī九月kah十月之間。凡是成年男子tī chit-ê三節期lóng一定tio̍h beh去耶路撒冷朝聖。Chit節期mā是teh記念以色列人民ê祖先bat tī曠野漂流四十年之久，雖然居無定所，lóng是tī帳棚中過日子，m̄-koh，in得tio̍h上帝特別ê恩典á會得thang生存落去（請參考利未記廿三：33—43）。

B. Chit章mā是討論有關耶穌身分ê一章。Tī第12到15節，雖然所記載ê kah前三本福音書所記載耶穌問門徒hiah-ê人對伊ê了解ê內容無仝，m̄-koh，chit段經文則提起大家想 知影耶穌到底是甚麼人，tī第26到27節、40到42節mā提起。咱koh一pái看tio̍h耶穌真清楚表明，伊之所以有hō͘人感覺「真無仝款」ê教導，乃是因為這教導是來自 上帝。約翰福音ê作者一再hō͘咱看tio̍h耶穌ê態度：表明伊kah上帝之間bē-tàng分開ê關係。
經文：

約翰福音 7:25-7:36

註釋:

雖然宗教眾領袖一直想beh掠耶穌，m̄-koh第30節講無人下手掠耶穌，原因是「時刻iáu未到」。前三本福音書to̍h án-ne講chiah-ê宗教領袖是驚眾人，因 為眾人歡喜聽耶穌ê講道（參考馬可福音十一：18、十二：12、十四：2）。第34節是耶穌teh預言祂teh beh受害ê話。
經文：

約翰福音 7:37-7:53

註釋:

耶穌對撒馬利亞女人講過ê話，tī chia koh對眾人大聲講了一pái，m̄-koh，人iáu是無法度理解「活水」ê意義，甚至為tio̍h伊，眾人iáu因此起了紛爭。

加利利，這tī當時以耶路撒冷做中心ê猶太人眼中，是一個偏遠小鎮，無受重視ê地區，in受tio̍h先知彌迦ê預言影響（請參考彌迦書五：2），認為基督無可能出tī加利利chit種偏遠小鎮，in甚至認為加利利連出世先知lóng有困難（52節）。
經文：

約翰福音 8:1-8:11

註釋:

Chit段經文是大家真熟悉ê一個故事。
A.聽tio̍h 耶穌教示ê 人lóng 感覺真奇妙，因為祂ê 教示真有權威，無親像hiah-ê 經學教師。(全民版)（馬可福音一：22）。因此，經學教師kah法利賽人就想beh chhōe耶穌ê話柄來陷害伊，想beh贏tńg來in失去ê尊嚴pah。

B. 猶太人有三種罪是死刑：一是拜偶像，二是殺死人，三是姦淫。Chit-ê cha-bó͘人既然「是teh行淫ê時hông掠tio̍h ê」，依法是死刑無疑。M̄-koh，in無直接kā伊送去議會審判，故意帶來chhōe耶穌問意見，而且tī眾人面前問，顯然是有意思beh chhōe渣ê。

C. 第7節，耶穌反問ê chit句話ē-sái講是chit項事件siōng中心ê經文，因為照聖經ê教示，tī上帝ê眼中，所有ê人lóng是罪人（請參考詩篇十四：2—3），莫怪當耶穌提出「甚麼人無犯過罪，甚麼人就先the̍h石頭phah伊」這意見時，大家lóng一個一個行了，而且「tùi年紀siōng大ê先行」。
經文：

約翰福音 8:12-8:20

註釋:

Ná親像頭前我講過ê，約翰福音編輯ê特色，就是歡喜記錄耶穌ê言論。Á chit-má耶穌發表chit段言論ê地點應該是tī聖殿（2節），而且處理一位因 為行淫被掠tio̍h ê cha-bó͘人ê事件，所以可能是tī聖殿ê cha-bó͘人院，chia mā是khǹg奉獻箱ê所在，只要是猶太人lóng thang聚集tī-chia，mā是聖殿中hiah-ê人siōng歡喜聚集ê所在，因為一 般婦女是無法度進入「男人院」ê。

A. Tī聖殿中ê每一個院（包括外邦人院、女人院、男人院、祭壇、到聖所等）lóng一定tio̍h點燈到隔工早起天亮之時（請參考出埃及記廿七：20—21）。所以當耶穌講「我是世界ê光」chit句話時，對猶太人來講，he是相當深刻，而且會感受tio̍h震撼ê。

B. 第13節，當chiah-ê宗教領袖質問耶穌「家己作證」無法度成立時，chit句話mā是根據申命記第十九章15節：「一個證人不足以定人ê罪；至少ài有兩個以上ê證人才thang定人ê罪。」（比較本段第17節）耶穌ê回答是上帝就是伊ê證人。

C. 問題是當時ê人lóng kā耶穌ê出身看kah真低，認為伊就是出tī拿撒勒木匠約瑟ê家庭，無甚麼顯赫ê家世背景，mā無拜過名師學習經典（約翰福音七： 15）。所以in實在無清楚耶穌chit種講法所代表ê意義。
經文：

約翰福音 8:21-8:30

註釋:

第25節ê「你到底是甚麼人？」實在問得好，chit句話充分顯示in對耶穌ê生份。即使伊行過真chē神跡，講過真chē上帝國ê信息，in iáu是問講： 「你到底是甚麼人？」這就kah馬可福音第四章35到41節，耶穌行風湧平靜ê神跡了後，門徒tī非常驚惶中所講ê「chit-ê人究竟是甚麼人，連風湧mā聽從伊！」chit句話一 樣，即使是親目chiu金金看見，mā是仝款提出chit種問題。其實咱kám m̄是mā不時teh問chit種問題？

A. 因為耶穌並m̄是屬tī人ê世界，伊是tùi上帝來ê。人一定tio̍h相信伊，chiah ē-tàng看見上帝ê拯救。

B. 第30節thang講是四本福音書共同想beh kā咱講ê，就是宗教領袖即使聽，mā m̄信耶穌ê話，m̄-koh，一般人民卻聽就會相信。
經文：

約翰福音 8:31-8:47

註釋:

約翰福音ê作者siōng大ê努力，就是beh kā咱講一個主要信息：耶穌來自上帝，信靠伊，就是信靠上帝，因為伊是上帝所差遣來ê。伊tùi上帝領受真理，á上帝ê真理ē-tàng hō͘人ê性命得tio̍h真實ê自由。人是有罪ê人，有罪ê人無真理thang講。Á耶穌teh傳揚ê就是上帝ê信息，因此，伊會講：「我是道路、真理、活命。若m̄ 是通過我，無人ē-tàng 去到天父hia。(全民版)」（約翰福音十四：6）
經文：

約翰福音 8:48-8:59

註釋:

當耶穌對hiah-ê信伊ê猶太人講in並m̄是真實認bat伊，並且指出in ê問題，是因為屬tī「魔鬼ê kiáⁿ」時，in kah-ná起受氣。認為耶穌是「撒馬利亞人， 並且有鬼附身」，chit句話ê意思真特別，因為當時講一個人是「撒馬利亞人」時，意思就是講chit-ê人「bē見笑」、「無信而且不忠」ê人，因為猶太人認為撒馬利亞人對上帝不忠實，kah外國人結婚，污穢了上帝揀選ê恩典。撒馬利亞人另外一個含意是teh指「混血ê人」，tī猶太人眼中是「無清氣」ê族群。

In指耶穌是hō͘ 鬼附身，tī前三本福音書中，記載猶太人領袖看tio̍h耶穌醫病、趕鬼ê神跡後，看tio̍h眾人lóng用欣慕ê眼光teh回應耶穌ê疼時，馬上就tī眾人面前講 耶穌是「靠鬼王別西卜趕鬼ê」（馬可福音三：22）。chit-má耶穌被指有鬼附身，是因為伊強調「永遠不死」ê性命，以及伊講家己比亞伯拉罕koh khah偉大，甚至koh khah早 存在。Chit種講法tī當時ê人聽起來當然無法度接受，莫怪in m̄-nā認為伊是hō͘ 鬼附身，而且kā伊ê講法當做是褻瀆了祖先ê榮耀，所以想beh the̍h石頭phah伊。其實第58 節mā是teh反應第一章1節所講ê：「宇宙被造以前，道已經存在。道kah上帝同在；道就是上帝。」
經文：

約翰福音 9:1-9:41

註釋:

Chit章是用「一個生落來就chheⁿ-mê人」被耶穌醫好做基礎，談論ê主題是：心盲、chheⁿ-mê之間ê差別。輔佐chit-ê主題是守安息日ê問題。Thang kā這 個主題kah馬太福音第六章22到23節ê經文相對照；馬太福音ê經文講：「目睭親像人身軀ê 燈。你ê 目睭若金，全身軀就光。 你ê 目睭若花，全身軀就暗。你內面ê 光若暗，hit-ê 烏暗是gōa-ni̍h-á 厲害！(全民版)」一個心盲ê人，siōng大ê特色就是只看表面，m̄知tùi表面看tio̍h ê現象所beh表明ê內在意義。Á一個心眼明亮 ê人，伊會一看tio̍h呈現出來ê現象，馬上就看出所beh說明ê信息。

A. chiah-ê宗教眾領袖致意ê是守安息日ê規律為甚麼無遵守，卻bē記得安息日原來ê意義是甚麼？一個生落來就靠乞食生存ê人，不bat有人關心過伊生活ê苦難景況，chit-má卻因為耶穌tī安息日ê時chūn醫好伊，受tio̍h宗教眾領袖ê注意，這豈m̄是真荒謬ê態度？

B. 為甚麼耶穌會講chit-ê生落來就失明ê人，「是beh tī伊身上彰顯上帝ê作為？」這是一個大家lóng會真自然詢問ê問題，mā是siōng難回答ê問題。其實這kah作者寫作ê方 式（筆法）有關；tī前三本福音書表達耶穌看見身軀ê殘缺受苦ê人，就生出「憐憫」ê心，然後醫好病人（請參考馬太福音二十：34，馬可福音一：41）。 約翰福音ê作者是用「榮耀上帝」做主題，描述耶穌對苦難者ê憐憫態度，所以無論耶穌行甚麼神跡，lóng是teh表達耶穌「是tùi上帝hia來ê」（本章33節）、是 「上帝有所賞賜」（三：27），所以作者用chit種方式teh描寫耶穌回答門徒ê詢問。

C. Chit位生落來就chheⁿ-mê了後被醫好ê人，有一個真值得咱注意ê所在，就是伊tī面對宗教眾領袖咄咄逼人ê詢問，並無驚惶，反tńg是koh khah堅定。伊tùi回答「m̄知」 耶穌人tī tó位（12節），到「伊是一位先知」（17節），進一步koh講「Chit-ê 人若m̄ 是tùi 上帝hia 來，就無可能做chit 款tāi-chì。(全民版)」（33節），chit種回答就是一個真大ê見證。最後伊遇tio̍h耶穌，就向耶穌下拜（38節）。信仰需要像án-ne成長，若無，就會失去承受上帝tī咱性命中賞賜 恩典ê意義。
經文：

約翰福音 10:1-10:21

註釋:

猶太人是遊牧民族，因此，真自然tek kā上帝kah in ê關係，比喻成「顧羊人」kah「羊群」。Tī舊約聖經中chit種例真chē，親像先知以賽亞講上帝「祂beh 親像牧者顧祂ê 羊群，祂會用手âⁿ-óa 羊á-kiáⁿ，kā 牠抱tī 胸前，慢慢á chhōa hiah-ê hō͘ 羊á suh奶ê。(全民版)」（以賽亞四十：11）。先知以西結講上帝「會親自chhōe tńg來祂ê羊群。牧人怎樣chhōe tńg來失散ê羊，上帝mā會 tio̍h照樣chhōe tńg來祂ê羊。」「你看，我，我beh 本身去chhōe 我ê 羊，來chhōe kah tio̍h(全民版)」。（以西結卅四：11、15）耶穌tī伊ê比喻中，mā提起顧羊人kah迷失ê羊ê比喻（路加福音十五：4—7），伊選召門徒投入傳福音ê 工作，是因為「祂一下看tio̍h hiah-ê 群眾，就可憐in，因為in 困苦四散，親像羊群無牧者。(全民版)」（馬太福音九：36）現在伊講家己就是「好ê牧人」，而且「願意為羊群捨命」（11節）。

另外一點，chit段經文中mā出現福音書作者共同ê特點，就是 耶穌常用「對比」ê方式教導人；親像chit段經文就是用「好」ê牧人kah「無好」ê牧人作對比，「好」ê牧人會甘願為羊捨命，甚至hō͘伊ê羊群得tio̍h「豐豐富富」ê 性命。M̄-koh，「無好」ê牧人，ná親像「雇工」仝款，危險一到，就逃走了，甚至koh khah惡劣ê是像「賊」「是強盜」，只知影偷、毀壞。
經文：

約翰福音 10:22-10:42

註釋:

Hiah-ê人一直想beh知影耶穌真正身分，因為伊聽見耶穌ê教導真無仝款，看見伊行神跡真有能力，m̄-koh，卻m̄知伊到底是m̄是彌賽亞。其實，真正teh注意耶穌言行舉止ê人，會tùi耶穌ê身上看tio̍h伊榮耀ê身分，ná親像路加福音記載耶穌回答行洗禮約翰ê門徒來詢問伊身分ê問題仝款，耶穌ài in「Kā所看見所聽見 ê」tńg去kā行洗禮約翰講（路加福音七：22）。Ná親像hit位生落來就chheⁿ-mê人仝款，看見耶穌後，就相信了耶穌。所以真正ê問題並m̄是在tī耶穌tńg來不回答身分ê問 題，卻是在tī懷疑kah相信ê問題。Tī chit二項之間，人tio̍h用甚麼態度去認bat耶穌？Chit-ê chiah是問題。福音書ê作者不時記載hiah-ê被社會所鄙視（siùⁿ）ê人，甚至外邦人，lóng是聽 到就相信耶穌是彌賽亞、救主（請參考馬太福音十五：21—28，馬可福音五：27，路加福音七：3），惟有自認真有學問、飽讀經冊ê宗教領袖phah死lóng m̄相信伊。

想看看，咱是屬tī toh一陣人？相信？á是懷疑？kan-taⁿ想beh看神跡，á是聽見、讀tio̍h、看見就相信？m̄-thang bē記得，耶穌kā咱講慈悲ê上帝，就是差派伊來拯救咱性命ê，記tiâu chit點，免得咱mā淪落tī kan-taⁿ想beh chhōe出耶穌ê身分，卻bē記得祂tī咱性命中所賞賜ê極大恩惠。
經文：

約翰福音 11:1-11:57

註釋:

這mā是福音書中三個hō͘死人koh活ê神跡，一是耶穌hō͘會堂主管葉魯ê cha-bó͘-kiáⁿ tùi死裡koh活起來（馬可福音五：35—43），二是tī拿因城，耶穌hō͘一位寡婦ê獨生kiáⁿ tùi死裡koh活（路加福音七：11—15），第三個神跡就是chit段。

A. chit一章是用耶穌hō͘已經死去ê拉撒路，tùi死裡koh活ê神跡編撰結構起來ê。看，我頭前講過，約翰福音ê作者是以「tio̍h榮耀上帝」（4、40節）描述耶穌行神跡ê 意義。耶穌有醫治病人、趕鬼、hō͘死人koh活ê能力，就是來自「上帝ê賞賜」（三：27）。傳福音ê工作就是beh有chit種認bat，ē-tàng hō͘一個人信主耶穌，m̄是因人 ê能力jōa好，á是有甚麼特權，卻是上帝ê賞賜，是上帝ê聖神感動人ê心chiah ē-tàng達成。

B. 第35節「耶穌哭了」，這就是福音書ê作者真重要ê見證──耶穌是確確實實成做人，kah咱人仝款；伊會受氣，mā會歡喜，會痛心、mā會啼哭。

C. 當拉撒路ê阿姊馬大認為tī末日，已經死去ê小弟會koh活時，耶穌回答卻無是án-ne，是「活teh信我ê人一定bē死」。馬大一聽，馬上就表示伊相信耶穌就是「基 督，是上帝ê kiáⁿ兒」。這就是福音書作者一再beh kā咱講ê，chiah-ê當時社會hō͘瞧不起ê族群──特別是女性，對耶穌有絕對ê信心。

D. 第45節講真chē猶太人看見神跡就相信了耶穌，m̄-koh，iáu是有真chē人m̄信，chiah-ê人主要就是宗教領袖，in iáu為tio̍h耶穌hō͘死人tùi死內底koh活ê神跡開會，tī會中竟然講：「若是hō͘祂án-ne舞搞落去，大家lóng信祂，羅馬人會來擄奪咱ê聖殿kah民族ê！」這thang hō͘咱明白，in m̄信ê問題，並無在tī耶穌行神跡á無，in所關心ê是 「聖殿」ê保存kah民族ê興衰。M̄-koh，人若是對上帝無信心，即使有保存siōng美麗ê建築物，mā是枉然。

E. 第49到50節tio̍h kah第十八章13到14節同齊看。

F. 看，in想beh殺害耶穌，並m̄是耶穌無行神跡hō͘ in看，連死人lóng koh活ê神跡mā已經顯現在in面前了，in iáu是m̄信，ná親像作者tī第十二章37節所講ê：「伊 雖然tī in面向前行過真chē神跡，in iáu是m̄信伊。」因為in所考慮ê，m̄是耶穌ê真正身分，卻是in既得ê利益──政治權力、利益，會因耶穌所帶來天國信 息遭遇tio̍h消滅，án-ne chiah是擔憂ê問題。
經文：

約翰福音 12:1-12:8

註釋:

Tùi第十二章開始，約翰福音kah頭前三本福音書有契合──Pôaⁿ過節前一禮拜，耶穌進入耶路撒冷。Tī chit-ê chìn前，約翰福音所記載耶穌ê傳道工作，lóng是加利利kah耶路撒冷兩地來tńg來奔走傳上帝國信息。

A. 約翰福音ê作者認為用極珍貴ê純nah噠香油膏耶穌ê，是拉撒路ê阿姊馬利亞，chit種寫法表示伊是用感謝ê心來報答耶穌對伊家庭ê疼。

B. 比較特別ê所在是，約翰福音ê作者認為出賣耶穌ê猶大是一個對錢財有貪婪之心ê人。Chit種寫法強化了猶大出賣耶穌是為tio̍h錢ê緣故ê論證。
經文：

約翰福音 12:9-12:11

註釋:

Chiah-ê宗教領袖真正殘忍至極，in想beh kā拉撒路mā刣死，用chit種類似「刣死人滅口」ê方式，thang堵塞眾人teh傳頌耶穌hō͘拉撒路tùi死內底koh活ê神跡。真hō͘人懷疑in ê信仰是甚麼內容！莫怪馬太福音ê作者會收集真chē耶穌譴責chiah-ê宗教領袖是真chē災禍ê原因（請參考馬太福音第十三章）。
經文：

約翰福音 12:12-12:19

註釋:

約翰福音ê作者特別強調眾人用迎接君王、英雄凱旋ê方式，迎接耶穌進入耶路撒冷。

A. 第13節the̍h棕樹枝迎接耶穌入城，這mā是基督教會「棕樹節」ê由來，就是受難週ê第一工。Chit節ê頌讚詩句是採用詩篇第一一八篇26節，原本是用來歌頌戰爭 勝利ê。通常tī感恩節日ê時chūn用chit首詩。原文用亞蘭語「和散那」，意思是「耶和華ah，求拯救！」後來tī歌頌o-ló上帝ê時，成做「感謝上帝ê拯救」。

B. 第15節是引用舊約撒迦利亞書第九章9節ê經文。是先知預言tī he將來得tio̍h拯救ê日子，hiah-ê人beh歌頌上帝ê話。

C. 第18節thang比較第十一章47到48節，就會koh khah清楚in beh除掉耶穌ê原因。
經文：

約翰福音 12:20-12:26

註釋:

這是約翰福音真特別ê一段資料，講tio̍h希臘人mā想beh見耶穌。Chiah-ê希臘人真可能就是hiah-ê已經歸化猶太教ê外國人，in mā會tī Pôaⁿ過節chit種重要節期tńg來到耶路撒冷去朝聖。可能是tī聖殿中聽tio̍h耶穌ê言論，á是tùi群眾中得tio̍h關係耶穌ê種種事蹟，因此想beh見耶穌。

第24到25節，koh hō͘咱看tio̍h耶穌對性命ê看法──無「死」ê性命觀。這mā是基督教信仰ê siōng大特色，性命是無死亡ê，是永生ê。只要咱願意kā性命奉獻出來，性命就會滋生不息，永續落去。
經文：

約翰福音 12:27-12:50

註釋:

Chit段經文thang講是耶穌tī預言家己ê死to̍h是teh beh來臨。第35節mā是作者siōng ài用ê話句──光kah烏暗。光teh表明ê就是耶穌菑v，烏暗則說明 撒旦掌權，為tio̍h是beh hō͘人拒絕上帝ê救恩。伊ài群眾好好á把握機會，知影伊就是tùi上帝來ê光。Ná親像本冊ê起頭作者所講ê，雖然烏暗beh掌權，m̄-koh，當「Chit-ê 光照tī 烏暗中，m̄ -koh，烏暗m̄ 接納光。(全民版)」（一：5）仝款。

A. 第38節是引用自舊約以賽亞書第五十三章1節，第40節則引用自以賽亞書第六章10節。

B. 注意第41節，這mā是福音書共同ê特點，說明舊約先知ê預言，就是teh為耶穌ê來臨準備ê。Mā就是講，舊約預言新約，新約就是實現舊約ê預言，á耶穌就是新約ê記號。
經文：

約翰福音 13:1-13:30

註釋:

這是一段真出名ê故事──耶穌為門徒洗腳。福音書ê作者一再kā咱講，耶穌知影人ê心思意念（馬可福音二：6—8、十二：15，路加福音六：8），ná親像現在祂mā知影猶大beh出賣祂仝款。

A. 洗腳，這是中東地區ê風俗，因為當時ê人通常lóng是穿一種類似涼鞋ê便鞋，路上灰塵真chē，á是雨天就真容易hō͘腳沾滿了泥巴。因此，差不多每一個家庭ê門口lóng會放 置水缸，án-ne進入房屋chìn前就ē-tàng先kā腳洗清氣。Á接待人客siōng熱情ê方式，就是beh厝裡ê僕人出來替人客洗腳（請參考路加福音七：44），á是替人客擦乾腳上 ê水。耶穌tī chia扮演ê角色tú好是一個卑微ê僕人所ài做ê工作。這mā就是使徒保羅teh描述ê耶穌：「祂顛倒piàⁿ 空家己，取奴僕ê 身分出世做人，成做人ê 形體出現。(全民版)」（腓立比書二：7）

B. 為甚麼耶穌beh án-ne做？原因真可能kah chit件事有關，就是tī往耶路撒冷ê途中，門徒一直lóng tī爭tio̍h什麼人比較大，chit件事路加福音比較特別，講門徒kah耶穌同齊守Pôaⁿ過節晚 餐ê時chūn iáu teh爭（廿二：24），因此，伊就利用ná機會the̍h水替眾門徒洗腳，並用án-ne卑微ê角色教導in，ài in「mā應該彼此洗腳」。

C. 請注意，耶穌mā替猶大洗腳ah！因為tī第30節記載猶大是tī耶穌為伊洗過腳後chiah離開ê。這就hō͘咱thang思考真chē事，一是耶穌替猶大洗腳，mā是希望猶大ē-tàng tńg來心 轉意。伊koh一pái提供了機會，可惜猶大並無pái脫撒但ê誘惑。Koh講，耶穌並無因為猶大án-ne對待伊，就馬上拒絕伊，á是當眾拆破伊ê真面目，伊希望用chit種方式 轉變猶大ê念頭，結果iáu是失敗了。三是耶穌已經講出了「ná kah我同齊食飯ê人竟用腳踢我」（比較詩篇四十一：9）án-ne重ê話，m̄-koh並無喚醒猶大ê心，可見一 個人如果被撒但附身，想beh挽tńg來有時lóng真oh neh。

D. 第9到10節，當彼得要求耶穌連伊ê手、頭lóng tio̍h洗ê時chūn，耶穌講只要洗腳。洗腳是siōng基本ê，m̄-koh，身軀就一定tio̍h家己去洗。Ná親像洗禮是siōng基本ê信仰告白，á是接受基督教信仰ê siōng早階，其他就一定tio̍h家己來，總無法度家己lóng m̄做，lóng beh靠別人ah。
36. 十三：21—30節，當猶大iáu是不醒悟ê時chūn，耶穌koh一pái用公開宣告ê方式，主要目的iáu是希望猶大ē-tàng tńg來轉心意。Tùi第26節ē-tàng看出猶大顯然是坐tī耶穌ê身旁 無遠，chiah ē-tàng真輕易地the̍h ùn過佐料ê餅hō͘猶大。Koh講，比較第27到29節，耶穌對猶大講「你ài做ê，快去做pah」，其他門徒顯然並無清楚耶穌對猶大講了些甚麼， án-ne看起來，耶穌是非常貼近猶大ê耳邊講chit-ê話，mā thang證明猶大是坐tī耶穌身邊。

第30節講猶大出去ê時chūn，「to̍h是烏夜」，這是約翰福音書作者siōng歡喜用ê筆法，作者用「烏夜」表明「罪惡」，á是「惡勢力」ê猖獗。相對ê，用「日時頭」表明「光明」ê意思。
經文：

約翰福音 13:31-13:38

註釋:

Kui本約翰福音書ê重點就是tī第34節，上帝疼咱，chiah會將祂ê獨生愛子耶穌賜hō͘咱，主要目的就是ài咱mā會彼此相疼。基督教ê信仰 就是tùi chia開始ê。如果無愛，就無法度見證上帝拯救ê信息。約翰一書ê作者án-ne講：「親愛ê 兄弟姊妹，咱tio̍h 相疼，因為疼是tùi 上帝來ê。有疼心ê 人是上帝ê kiáⁿ 兒，mā bat 上帝。 8 無疼心ê 人m̄ -bat 上帝，因為上帝是疼。(全民版)」（約翰一書四：7—8）

38.Tùi第十四 章開始到第十七章等四章，lóng是記載耶穌對門徒所講ê話。我tī前面「讀約翰福音書」乙文中mā講過，約翰福音書ê特色就是歡喜記載耶穌ê言論，對耶穌所做ê事 工並無啥重視，這kah頭前三本福音書差異真大。因為頭前三本福音書是偏重耶穌所做過ê事工，對伊ê言論記錄並無啥多。

A. chit段話mā是tī最後ê暗頓（Pôaⁿ過節ê暗頓）中講ê，這mā是約翰福音書siōng大ê特色，因為tī前面三本福音書lóng無記載耶穌tī最後暗頓講甚麼話，除了講tio̍h關於「聖 餐」ê事外，其他差不多lóng未記載。M̄-koh，約翰福音書ê作者卻用長到四章ê篇幅記載耶穌對眾門徒ê諄諄教導。比較特色ê所在是，chit段教導中，伊真清楚kā xx講門 徒們，性命是有ǹg望ê，並且是bē孤單ê，á chit種ǹg望kah充滿性命之力，是上帝tùi天起來ê賞賜。

B. 耶穌會án-ne kā門徒講們chiah-ê話，siōng主要ê原因是伊知影家己teh beh受掠受難，因此，當祂對門徒講「Lín中間有一個人beh出賣我」 ê時chūn，必定tī門徒中間造成真大ê大tio̍h驚kah騷動。然後祂繼續對門徒講祂beh去一個所在，是in無法度跟tòe祂去ê，chit-ê話mā必然引起眾門徒ê憂慮。因此，祂開始講出真chē安慰、鼓勵門徒ê話。
經文：

約翰福音 14:1-14:14

註釋:

Tùi第十四章開始到第十七章等四章，lóng是記載耶穌對門徒所講ê話。我tī頭前「讀約翰福音書」文中mā講過，約翰福音書ê特色就是歡喜記載耶穌ê言論，對耶穌所做ê事 工並無啥重視，這kah頭前三本福音書差別真大。因為頭前三本福音書是偏重耶穌所做過ê事工，對伊ê言論記錄並無啥多。

A. chit段話mā是tī最後ê暗頓（Pôaⁿ過節ê暗頓）中講ê，這mā是約翰福音書siōng大ê特色，因為tī頭前三本福音書lóng無記載耶穌tī最後晚餐講甚麼話，除了講tio̍h關係「聖餐」ê事外，其他差不多lóng未記載。M̄-koh，約翰福音書ê作者卻用長到四章ê篇幅記載耶穌對眾門徒ê諄諄教導。比較特色ê所在是，chit段教導中，伊真清楚kā眾門徒講，性命是有ǹg望ê，並且是bē孤單ê，á chit種ǹg望kah充滿性命之力，是上帝tùi天起來ê賞賜。

B. 耶穌會án-ne kā門徒講們chiah-ê話，siōng主要ê原因是伊知影家己teh beh受掠受難，所以當祂對門徒講「Lín中間有一個人beh出賣我」 ê時chūn，必定tī門徒中間造成真大ê大tio̍h驚kah騷動。然後祂繼續對門徒講祂beh去一個所在，是in無法度跟tòe祂去ê，chit-ê話mā一定引起眾門徒ê煩惱。所以祂開始講出真chē安慰、鼓勵門徒ê話。

Tī chit-ê四章中間，每一章lóng有它特別強調ê內容：
A. 第十四章，一、祂一再強調疼祂ê人，就beh遵守祂ê命令（第15、21、23、24、31節）。二、祂kā咱講，奉祂ê名，無論求甚麼，祂lóng會成全（第 13、14 節）。三、祂去了後，iáu會koh再tńg來，去是為咱預備地方ê（第3、18、28節）。四、祂kah天父之間ê關係親密結合做伙，認bat祂，就是認bat天父。祂tī天父生 命裡，天父mā tī祂內面（第7、10、11、23節）。

B. 第十五章，一、以葡萄樹做譬喻描述祂kah咱之間ê關係。二、天父──耶穌──咱，這三者之間結聯做伙。三、特別提起，奉祂ê名，無論向天父求甚麼，天父定會賜hō͘咱（16節）。

C. 第十六章，一、祂koh一pái提起祂teh beh離開tńg去天父ê所在，並且用真慎重ê語句講：「到hit 日，lín bē koh 問我甚麼。我實在kā lín 講，lín 奉我ê 名對天父所求 ê，祂 lóng 會賞賜 hō͘ lín。(全民版)（ 23節）二、koh一pái強調祂kah咱是結合做伙，藉tio̍h祂，天父mā kah咱結合做伙。

D. 第十七章，是耶穌基督ê祈禱文，總共有26節。Mā是四本福音書中siōng長ê一篇祈禱文。Thang分做三部分，就是先為家己祈禱（1到4節），koh講為門徒代禱（5到19節），最後是為所有信ê人祈禱（ 20到26節）。

十四：1—14節，耶穌對門徒siōng大ê應允就是伊去了後，iáu會koh再tńg來。Chit點一直是基督教會堅持基督耶穌會koh再臨ê主要ê因素，因為這是耶穌親嘴講ê。當伊beh升天ê時chūn，mā「有兩個穿白衫ê人khiā tī門徒身邊」，對門徒講：「加利利人，lín ná 會khiā tī chia teh看天？ Chit 位離開lín 受接上天ê耶穌，lín 看祂án-ne 上天， 祂mā 會照án-ne koh 來。(全民版)」（使徒行傳一：11）問題是甚麼時chūn chiah是耶穌會koh來臨ê時刻？是koh活了後neh？iáu是tī人死去ê時chūn？á是世界末日ê時刻？chit-ê直是真 gōa人想beh知影ê，m̄-koh，耶穌並無說明。

A. 多馬，這是門徒中hō͘咱印象深刻ê一位，因為伊bat講beh親手摸到耶穌，chiah beh相信耶穌是真正koh活（約翰福音二十：24—25）。伊問耶穌，既然m̄知耶穌beh去ê所在，「怎樣會知影hit條路？」懷疑，並m̄是錯誤，重要ê是會提出來，á m̄是隱藏tī心內不講。另外一點，對懷疑siōng好ê解惑方式，就是chhōe，努力chhōe。耶 穌講chhōe必定會chhōe-tio̍h。如果kan-taⁿ會懷疑，卻m̄知chhōe，懷疑永遠bē解開，答案bē家己出現。

B. 「我是道路、真理、性命；若m̄是藉tio̍h我，無人ē-tàng到老父hia去。」這thang講是耶穌對門徒，mā是對咱siōng重要ê宣告。Mā就是頭前我講過，耶穌一再強調ê，認識伊，就是認bat上帝仝款。Chit句話mā表明耶穌kah上帝之間有bē-tàng分ê關係。其實在猶太人ê觀念中，所謂真理、道路kah性命是聯做伙ê，無法度分開。Mā就是講，有 真理ê所在，chiah有性命thang講，因為真理是人性命生存之道。詩人án-ne寫講：「上主ah，求祢kā 祢ê 道路指示我，我beh 照祢ê 真理來行；hō͘ 我用專一 ê 心敬畏祢 ê 名。(全民版)」（詩篇八十六：11）咱thang tùi詩篇中看tio̍h真chē類似ê詩句，lóng是寫tio̍h上帝就是真理，祂ê話就是性命ê亮光（一一九：105），是性命ê道路（十六：11）。耶穌用chit句「若m̄是藉tio̍h我，無人ē-tàng到老父hia去」，已經明白地講出，伊就是上帝tī世上ê記號。就是ná條通往上帝之家ê道路。

C. 第13到14節，耶穌重複講用祂ê名向上帝祈求，必定會有所得。因為祂就是祈禱ê保證者。這就是咱今á日祈禱ê時chūn，奉靠主耶穌ê名求ê原因。
經文：

約翰福音 14:15-14:31

註釋:

Tī第16節「慰助者」（和合本用「保惠師」），tī希臘文原本指ê是律法顧問ê意思，á是「辯護者」ê意思。Tī約翰一書二章1節，作者用 chit-ê字指「慰助者」就是koh活ê耶穌基督。Á tī第17節特別指明這「慰助者」就是「真理ê靈」。所謂「真理ê靈」，是teh指聖神ê意思。換句話講，聖神是幫助人 認bat上帝ê主要源頭。這mā就是基督教信仰所講ê，一個人ē-tàng認bat耶穌，是因為聖神作工ê結果，m̄是人ê氣力ē-tàng hō͘人認bat上帝tī基督耶穌裡ê救恩。

A. 第15、21、23、24節lóng提起「遵守耶穌ê話」，就是愛伊ê人。這是真重要ê信仰功課。明白耶穌ê話，並且依照伊ê話去行，án-ne chiah ē-tàng得tio̍h伊tī上帝面前 ê保證，因為伊就是咱性命ê「慰助者」（保惠師）。咱tùi第十四章中thang看tio̍h耶穌一再強調遵循伊ê話去行ê重要性；第15節：「Lín若愛我，就beh遵守我 ê命令。」第21節：「凡接受我ê命令並且遵守ê人，就是愛我ê人。」第23節：「愛我ê人lóng會遵守我ê話。」第24節：「無愛我ê人就不遵守我ê話。」 第31節：「為tio̍h beh世人知影我愛我ê老父，所以我遵行伊所命令ê一切。」耶穌bat講過：「遵照上
帝旨意ê 人就是我ê 兄弟、姊妹kah 老母。(全民版)」（馬可福音三：35）咱thang講，kui本聖經lóng是提醒咱一點：遵行上帝ê話，確確實實地遵行上帝ê教示。無論是tī舊約á是新約，lóng是以chit-ê主題作為編輯ê主要主軸。

B. 第27節是真重要ê一節，耶穌講伊留落來「平安」，伊留落來ê「平安」kah世人所留ê平安無仝款。為甚麼？tī希伯來文，「平安」指ê是有含祝福ê意思。包括了 「健康」kah「財富」、「長壽」kah「喜樂」、「和睦」kah「美滿」等等。Tī希臘文它指ê是「無戰爭」，á是「停止戰爭」ê意思。所以咱看tio̍h希伯來文所講 ê「平安」意思比較廣闊。M̄-koh，請注意，耶穌tī chia所講ê「平安」，是teh kí上帝國講ê。所謂上帝國，是teh指用上帝做中心ê所在。Án-ne講起來，一個人ê性命若是 用上帝做中心，伊ê性命就是kah上帝結合做伙ê。Mā就是講伊ê性命裡有上帝同在，無論經過怎樣ê境遇，á是tú-tio̍h怎樣ê困境，lóng會有上帝ê同在。Chit種性命，是贏過死亡ê性命，是超越死亡ê氣力，因為tī上帝ê內面，無死亡，只有永生。因為上帝是性命ê創造者，永恆性命之主。
經文：

約翰福音 15:1-15:17

註釋:

Tī巴勒斯坦有四種出名ê果子，就是葡萄、無花果、橄欖、石榴。其中葡萄、無花果是猶太人siōng ài用來比喻in kah上帝之間ê關係。所以當耶穌提起葡萄樹ê時chūn，門徒真清楚he是指甚麼講ê。

A. 耶穌koh一pái說明上帝──祂──咱三者之間ê關係。Ân-ân結連tī耶穌基督性命裡，就是活tī上帝ê救恩中。

B. 請注意耶穌tī chia特別講「真」葡萄樹。為甚麼tio̍h用「真」？「真」就是kah「假」是相對ê。先知以賽亞kah耶利米lóng bat指責以色列人民ná親像變了種ê「葡萄」，kah原 本上帝所揀選ê上等ê品種無仝款（以賽亞書五：4，耶利米書二：21）。這mā teh暗示了耶穌teh譴責猶太人眾領袖ê虛假（請參考馬太福音第廿三章）。

C. 第11到17節，耶穌真清楚講tio̍h跟tòe祂ê人，性命會有喜樂，mā是極大ê祝福。因為tī伊ê內面將tùi「奴僕」ê身分提升到「朋友」ê親密關係。

D. 第16節是真值得重視ê一節，chit節mā是一個有確實認bat信仰ê人lóng會用ê告白。Ná親像我頭前講過ê，救恩m̄是óa靠人ê能力，是óa靠聖神ê氣力。所以做一個人確實認bat信仰後，伊就會講，伊是hō͘ 上帝所揀選，m̄是伊揀選上帝。是上帝chhōe-tio̍h伊，m̄是伊chhōe-tio̍h上帝。
經文：

約翰福音 15:18-15:27

註釋:

Chit段經文tú好kah前一段相對；將第18到25節kah第11到17節相對照看，就會發見在前一段講tio̍h跟tòe耶穌ê人ê喜樂，á後段經文則kā所有ê跟隨者講會tú-tio̍h ê迫害──被世人所憎恨。而且所遇tio̍h ê憎恨是「無緣無故」ê。

第26到27節koh一pái提起「慰助者」就是真理ê靈。
經文：

約翰福音 16:1-16:15

註釋:

第1節ē-sái講是這章ê結語。耶穌真清楚kā祂ê門徒講，in mā會受難。請mài看輕第2節所講ê「被趕出會堂」chit句話，一個猶太人被趕出 會堂，等於是判tùi社區生活中驅逐出去仝款。Tī猶太人ê社會裡，只有「無清氣」ê人，á是「罪人」chiah會被趕出會堂。chit-má是連跟tòe耶穌ê門徒mā會hō͘列入chit種 「烏名單」中。
　　　
Chia講tio̍h「真理ê聖神」（慰助者）會來臨。祂來，主要是建立公義ê審判（10 節）。Koh講，真理ê聖神mā將成做耶穌工作ê續接者，繼續教導門徒認bat真理，明白上帝ê旨意（12到15節）。
經文：

約翰福音 16:16-16:24

註釋:

Chit段經文是耶穌真具體地講出祂teh beh受難ê來臨。第22到23節講tio̍h苦難雖然會來臨，m̄-koh，續落來苦難了後就有喜樂，ná親像一個有娠ê婦女生 產了後，對新性命ê出生發出喜樂ê聲音仝款。Koh活其實就是一個新ê性命重新開始。使徒保羅講：「無論甚麼人，若kah 基督結聯，就是新創造ê 人；舊ê tāi-chì 已經過去，taⁿ lóng 變做新ê。(全民版)」（哥林多後書五：17）其意在此。
經文：

約翰福音 16:25-16:33

註釋:

Tùi第23節 開始，到第33節，耶穌一再kā門徒講，克服頭前所講到ê苦難ê方法，一是奉祂ê名祈禱。Chit點mā是約翰福音書ê主題信息之一。二是kah耶穌親密地結連做伙，就會享受平安。祂koh一pái用「上帝──我──門徒（咱）」chit種關係來說明。三是勇敢，因為耶穌已經贏過苦難。基督教信仰就是幫助咱有夠額ê信心kah勇氣，hō͘咱ê性命tī逆境中無失去正確ê方向。基督徒之所以m̄驚死亡，á是對死亡無koh有驚惶，原因就是因耶穌已經tùi死裡koh活，伊戰勝了死亡對性命ê威脅。
經文：

約翰福音 17:1-17:26

註釋:

Chit一章ē-sái講是耶穌siōng長ê一篇祈禱文。Tī前面三本福音書中，lóng記載耶穌tī帶領門徒用完Pôaⁿ過節暗頓了後，chhōa in到客西馬尼園去，並且tī hia耶穌家己離開門徒向天父祈禱。M̄-koh，約翰福音書ê作者tī chia記載ê雖然m̄是客西 馬尼園ê祈禱，卻是tī Pôaⁿ過節暗頓中ê祈禱。咱知影耶穌bat教導祂ê門徒怎樣祈禱，ná mā是大家所熟悉ê「主禱文」。Á chit篇祈禱文是福音書中siōng長ê一篇，mā是 siōng好ê一篇值得咱學習ê祈禱文。Thang分做三個段落：

A. 一是第1到8節，伊向上帝祈禱。請注意在chit段經文中，連續出現五次ê「榮耀」chit-ê字眼，而且lóng是kah「上帝」結連做伙。長老教會創會者約翰‧加niâ文就是強 調講：「Kā一切榮耀lóng歸hō͘上帝。」有罪ê人ê身上實在是無甚麼好榮耀ê，除了上帝ê恩典、憐憫外，人thang提起ê榮耀ê tāi-chì，lóng是來自上帝ê賞賜。另外tio̍h注意ê是，榮耀mā是kah苦難連結做伙。這苦難就是十字架。咱知影上帝後來kā苦難ê十字架變成榮耀ê記號。

B. 二是第9到19節，耶穌為祂ê門徒kah跟tòe者祈禱。跟tòe耶穌ê門徒，現在除了彼得等十一個人外（猶大已經去進行賣耶穌ê勾當了），尚且有真chē位是tùi加利利就 跟tòe耶穌來到耶路撒冷ê婦女，mā有bē少民眾（請參考路加福音廿三：48）。Chiah-ê人可能就是teh指第6節所講ê「hiah-ê tùi世界選召出來付託」ê人。請注意第15 節，耶穌ê代禱中並m̄是祈求上帝kā chiah-ê跟tòe者tùi chit世界帶走，卻是祈求上帝「hō͘ in脫離ná邪惡者」。Chit句話充分說明chit-ê世界就是一個苦難ê世界，m̄-koh，跟tòe耶穌 ê人m̄是tio̍h離開苦難ê世界，á是beh有夠額ê力量pái脫邪惡者ê誘惑。這ná親像耶穌teh教導門徒ê「主禱文」中所講ê：「求祢 m̄ -thang hō͘ 阮陷落 tī 擔當 bē起ê 試煉。求祢救阮脫離hit-ê pháiⁿ-ê。(全民版)」（馬太福音六：13）

C. 三是第20到26節，耶穌為所有接受信息ê人代禱。Tī chit段禱詞中，總共用了五次「合á為一」。Tùi chia thang思考一件事：「遵照上帝旨意ê 人就是我ê 兄弟、姊妹kah 老母。(全民版)」（馬可福音三：35）Chit句話真清楚講出tī信仰ê內面，大家lóng是一體ê，是「合á為一」ê一個大家庭。Tī真實ê信仰內面，是ē-tàng排除á是超越種族、文化、歷史、地理等等傳統ê障礙ê。
經文：

約翰福音 18:1-18:11

註釋:

Tùi第十八章開始，有關耶穌受掠受難ê事件，四本福音書lóng有詳細ê記載，m̄-koh，每一本ê記載lóng會有無仝。

十八：1—10節，第2節講猶大知影耶穌kah門徒聚集ê所在，chit點tú好mā thang解釋為甚麼猶大ē-tàng出賣耶穌ê理由。因為hiah-ê宗教領袖想beh掠耶穌，m̄-koh卻驚群眾（參考馬可福音十一：18、十二：12、十四：2）。所以in lóng希望ē-tàng chhōe一個人少、暗中ê機會。Á猶大就是提供chit種機會。

比較特別ê約翰福音書ê作者提起，去掠耶穌ê人包括羅馬兵丁，chit點顯然有kóa困擾，因為除非彼拉多同意，若無無jōa可能。M̄-koh，照四本福音書ê寫 法，彼拉多是一直lóng tī試beh tháu放耶穌，koh怎樣可能會派兵去掠耶穌？koh講，照第13節ê寫法，羅馬兵丁kā耶穌綁了起來後，是先送到前任大祭司長亞那之 處，mā koh khah無可能。因為án-ne就teh表示羅馬兵被猶太人差來使用。Á當時羅馬是統治者，bē是án-ne ê作法。

第10節提供真重要ê資料，就是彼得身上帶tio̍h彎刀，將祭司長ê奴僕馬勒古ê正pêng耳á削掉à。
經文：

約翰福音 18:12-18:27

註釋:

十八：12—27節，第14節thang參考約翰福音第十一章45到57節。

A. 咱tùi第19到24節中看tio̍h約翰福音書作者teh描述耶穌被審ê過程，kah頭前三本福音書真無仝款，tī chia作者寫tio̍h耶穌對tī大祭司ê盤問，lóng有提出答辯，這kah前三本福音書寫tio̍h「耶穌緘口，一言不發」（馬太福音廿六：63，馬可福音十四：61）真無仝款。

B. 第15節chia所講ê「另外一個門徒」到底是甚麼人？無人知影。有人講是約翰福音書ê作者，mā有人講是埋葬耶穌ê亞利馬太ê約瑟，因為伊mā是猶太人ê siōng koân法院ê 議員（路加福音廿三：51），因此kah大祭司熟悉。M̄-koh，mā有人講是猶大，因為伊是kah大祭司勾結出賣耶穌ê人，m̄-koh soah koh想beh知影議會怎樣審判耶穌，所以會想進去。
經文：

約翰福音 18:28-18:40

註釋:

第28節講猶太人眾領袖m̄敢進入彼拉多ê總督府，為tio̍h beh保 持潔淨ê身軀守Pôaⁿ過節ê暗頓。M̄-koh，in卻bē記得偷偷á做chit種違法ê審問，心中已經無清氣à。莫怪耶穌常指責in是虛假ê人，m̄是無原因。Mā thang tùi chia提供 ê資料想tio̍h，hit位羅馬ê軍官派人請求耶穌去為伊器重ê奴僕醫病時，後來koh派人去kā耶穌講m̄免了，只要耶穌「吩咐一聲」就ē-tàng，後來真正耶穌只出一聲，羅馬軍官ê奴僕就好了ê神跡（路加福音七：1—10），原因就是猶太人bē輕易地進入外邦人ê厝，免得家己mā變成無清氣ê人。

A. 第31節提供真重要ê資料，就是猶太人無處死ê刑罰權。Án-ne看起來，司提反ê死，有可能mā是得tio̍h羅馬當局ê同意chiah進行ê。

B. 約翰福音ê作者kā重點khǹg tī第37節，耶穌真清楚講tio̍h伊所建立ê國度是無仝tī chit世界ê國度。Bē-bái，因為耶穌傳福音ê中心信息就是「上帝國」。是用上帝做中心ê世界。
經文：

約翰福音 19:1-19:16

註釋:

約翰福音書ê作者kah路加福音書ê作者lóng真清楚講出彼拉多真想tháu放耶穌，並且bat三pái當眾宣告伊查bē出耶穌「有甚麼罪名」；to̍h是第十八章38節、第十九章4節、6節等等。

A. 約翰福音書kah頭前三本福音書無仝ê所在，乃是作者特別強調彼拉多想tháu放耶穌，所以伊先命hō͘伊ê兵丁鞭phah耶穌，希望用chit種方式換來tháu放耶穌ê可能性。M̄-koh 是，伊ê努力顯然無成功。因為宗教眾領袖真有計畫地利用群眾ê聲音，結果是群眾ê聲音蓋過公義ê審判（請參考路加福音廿三：23）。

B. 第2節chia講為耶穌穿上「紫色ê外袍」，比較正確ê應該是羅馬兵丁ê軍袍──深紅色ê棉袍（請參考馬太福音廿七：28）chiah-tio̍h。因為「紫色ê外袍」這tī當時 是相當貴重ê衣物，如果已經為耶穌戴上了用刺phè編織ê「冠冕」，頭ê邊額必定會流血，若是血滴落tī「紫色ê外袍」上，ná損失thang就大à。何況chit種「紫色ê外袍」恐驚在場ê人mā無可能有，即使包括彼拉多在內是m̄是有能力á是資格穿「紫色ê外袍」，lóng iáu有問題。

C. 約翰福音書ê作者認為彼拉多希望用鞭phah ê方式，ē-tàng消除á是減低群眾對耶穌ê恨意。所以當伊命令鞭phah耶穌後，koh帶耶穌出來hō͘群眾看，希望群眾看tio̍h被鞭phah得遍體鱗傷ê耶穌，會改變本來喊叫處死ê態度。

D. 鞭phah，這mā是真殘酷ê一種刑罰。Chit種鞭子是用獸皮製成，包獸骨á是鉛丸，phah tī人ê身上，差不多是皮肉綻裂，有ê人甚至會因此殘廢，koh khah嚴重ê是當場死去。猶太人規定siōng chē只有ē-tàng phah三十九下（請參考哥林多後書十一：24）。M̄-koh羅馬人並無chit種限制。

E. 第7節值得注意。Chit節說明in帶耶穌來chhōe彼拉多，是因為in無處人死刑ê權（十八：31）。M̄-koh，in卻無明確ê證據夠額判耶穌死刑，因為耶穌m̄是 現行犯（比如講污穢了聖殿ê神聖，á是污衊了摩西律法ê尊嚴）。所以in移送耶穌來彼拉多ê所在時，控告ê罪狀是相當政治性ê──煽動人民向羅馬皇帝納稅 （請參考路加福音廿三：2、5）。chit-má，in擔憂彼拉多因為tī政治上ê理由不足，beh tháu放耶穌，koh開始講耶穌冒犯了宗教上ê理由──褻瀆上帝。這mā是in原 本決定kā耶穌害死ê原因（請參考馬太福音廿六：65）。根據利未記第廿四章16節，chit種罪一定tio̍h用石頭phah死。

F. 第12節kah第15節，lóng thang看出猶太人宗教領袖為tio̍h beh除掉耶穌，已經會失去in本來ê信仰kah政治態度，tī信仰上，in堅持只有上帝chiah是in ê王（請參考士師記八：23，撒母耳記上八：7、十二：12）。Tī政治上，in一直teh走chhōe獨立運動，反對羅馬ê統治。
經文：

約翰福音 19:17-19:27

註釋:

彼拉多tī釘耶穌ê十字架頂寫了一塊牌á，寫「拿撒勒人耶穌，猶太人ê王」，而且用三種文字寫成ê，並拒絕猶太人宗教領袖ê修改意 見。請注意，chia講耶穌是「拿撒勒人」，其意思真清楚，指ê就是耶穌乃是個實實在在ê人，生活tī拿撒勒chit-ê小鄉鎮地方。

第24節是引用詩篇第廿二篇18節。
就tī chiah-ê最後ê時刻，耶穌kā祂ê老母馬利亞交託hō͘「伊所意愛ê門徒」。
經文：

約翰福音 19:28-19:30

註釋:

Chit段經文記載耶穌講了兩句話：「我口渴。」「成了！」chit句「我口渴」，引用自詩篇六十九篇21節，詩人teh向上帝走chhōe援助時，控訴仇敵 對待伊ê情況：「我餓了，in hō͘我毒藥；我渴了，in hō͘我酸醋。」「成了」，這是耶穌完成伊受上帝差遣到世界起來ê工作，已經完工。是用伊ê性命劃下句 點。

耶穌tī十字架上ê「七言」如下：
A. 路加福音第廿三章34節：「老父，赦免in，因為in m̄知家己teh做甚麼。」
B. 約翰福音第十九章26到27節：「老母，瞧，你ê kiáⁿ！」「瞧，你ê老母！」
C. 路加福音第廿三章43節：「今á日你tio̍h kah我同齊tī樂園裡。」
D. 馬可福音第十五章34節：「我ê上帝，我ê上帝，你為甚麼離棄我？」。
E. 約翰福音第十九章26節：「我口渴。」
F. 路加福音第廿三章46節：「老父，我kā家己ê靈魂交tī你ê手裡！」
G. 約翰福音第十九章27節：「成了！」
經文：

約翰福音 19:31-19:37

註釋:

Chit段經文是約翰福音特有ê資料。Chit段經文提供一個真重要ê信息：耶穌ná親像獻祭tī十字架上ê「羊羔」仝款，是完整ê獻祭。根據摩西ê 律法規定，獻祭用ê羊羔一定tio̍h無殘缺ê chiah thang（請參考利未記三：6、四：3、23、28、32、五：15、六：6）。耶穌是連一條骨頭mā無phah斷，這所beh傳達ê信息是：祂是完整ê獻祭tī十字架上，為人類ê罪，成做獻祭ê羊羔。

A. koh講，第36節chit句「骨頭連一條mā bē-tàng phah斷」，是採用出埃及記第十二章46 節有關食Pôaⁿ過節暗頓，規定準備ê小羊一定tio̍h是整隻完整，連骨頭lóng是好ê、無折斷ê。Chit間表示ê是：出埃及乃是性命ê再生，是新性命ê開始。耶穌tī十字架上ê死，等於hō͘咱得tio̍h一個新ê性命。

B. 第37節是引用自撒迦利亞第十二章10節。Chit節經文是先知撒迦利亞teh預言有一工，大衛ê kiáⁿ孫kah耶路撒冷ê居民teh-beh重新建造，m̄-koh這一定tio̍h仰望hit位「被in刺死ê」。這已經teh說明耶穌就是án-ne應驗先知所講ê話，祂就是猶太人期待甚久ê彌賽亞。
經文：

約翰福音 19:38-19:42

註釋:

比較四本福音書，就會發見chit位「亞利馬太ê約瑟」，m̄-nā是耶穌ê門徒，mā是猶太人siōng koân議會（三和林）ê議員，mā是財主，甚受人民ê尊 敬。Koh khah重要ê是mā期待上帝主權ê來臨。路加福音書ê作者講伊「無附kah別人ê計謀kah行為」，á約翰福音ê作者則強調伊「因驚猶太人ê領袖，m̄敢公開」伊是 耶穌門徒ê身分。Án-ne看起來，kah-ná耶穌ê門徒m̄-nā十二個，卻是koh khah chē，其中包括數目不詳ê「未公開」者。

A. Koh講，約翰福音ê作者認為m̄-nā是亞利馬太ê約瑟去處理耶穌ê屍體，iáu有尼哥德慕。In帶三十公斤用沒藥kah沉香混合而成ê香料去處理耶穌ê屍體。

B. 第40節講「這是猶太人安葬ê規定」，chit種講法無jōa正確，因為會用香料處理屍體，以及用布將屍體包裹起來並m̄是猶太人ê風俗，是埃及人ê傳統風俗。Iáu有， 用三十公斤ê香料，mā m̄是一般人使用得起，只是因亞利馬太ê約瑟是「財主」chiah有辦法án-ne做。伊並且kā耶穌埋葬tī伊新處理過ê墓地，這是「無葬過人ê新墓 穴」，這表示亞利馬太ê約瑟為耶穌所做ê lóng是siōng好ê。
經文：

約翰福音 20:1-20:10

註釋:

抹大拉ê 馬利亞kah彼得lóng ē-tàng進入墳墓內，可見chit-ê墳墓ê洞穴相當大，夠額hō͘人進入。是甚麼人phah開擋tī墓穴ê大石頭？照馬太福音第廿八章2節ê記載，是「主ê天使tùi 天頂降落來，kā石頭滾開，坐Tī頂面」。四本福音書lóng記載抹大拉ê馬利亞等幾位婦女tāi先到墳墓去探墓ê。In去ê主要目的，是beh用香料抹耶穌ê屍體（請參考路加福音廿四：1）。

A. 看bē-tio̍h耶穌ê屍體，這是in tú-tio̍h ê事實。只有耶穌ê頭巾kah麻紗。換句話講，墳墓內是空ê，耶穌並無tī墳墓內面。

B. 值得深思ê問題是：墳墓是關不住koh活ê神跡，án-ne，用真chē精神、金錢tī墳墓上，有甚麼意義？
經文：

約翰福音 20:11-20:18

註釋:

約翰福音書ê作者提供特別資料──koh活ê耶穌親自顯現hō͘抹大拉ê馬利亞看見。

A. 四本福音書共同ê寫法是，koh活ê耶穌出現時，無人認bat伊。Lóng是當koh活ê耶穌開嘴叫出人ê名，á是做出某一個種動作，比如擘餅分hō͘門徒時，大家chiah想起原來 是耶穌。約翰福音chit段經文所記載關係koh活ê耶穌，顯現hō͘抹大拉ê馬利亞看見時，馬利亞並m̄-bat耶穌，當耶穌叫出伊ê名後，伊chiah清楚過來。

B. 請注意第17節，約翰福音書ê作者認為是koh活ê耶穌ài抹大拉ê馬利亞去kā伊講ê兄弟，m̄-koh抹大拉ê馬利亞則走去kā其他ê門徒講伊已經遇tio̍h koh活ê耶穌。 這kah頭前三本福音書lóng講有特別ê人，á是天使（馬太福音明確ê講是天使，廿八：5）出現，ài抹大拉ê馬利亞去轉告門徒這koh活ê消息。

C. 所以咱知影koh活ê耶穌，並m̄是人chhōe-tio̍h ê，卻是伊顯chit-má人ê面前，並且是伊親自啟示人明白伊、認bat koh活ê伊。
經文：

約翰福音 20:19-20:31

註釋:

四本福音書所描述有關耶穌koh活ê事蹟lóng有一個共同點：真奧秘。Ná親像約翰福音書ê作者所記載ê，當「門徒聚集做伙，門ân-ân地關tio̍h」， ē-sái講是，就tī chiah-ê時chūn，koh活ê耶穌忽然出現（19節）。換句話講，koh活ê耶穌ē-tàng穿過「ân-ân關teh」ê門。Á祂是怎樣入去ê？然後tī第26 節mā是仝款，「門關teh，ē-sái講是耶穌忽然顯現，khiā tī in中間」。這到底是一個怎樣ê身軀？真實ê？á是虛幻ê？如果是虛幻ê，祂ê手卻是thang觸摸ê。這是koh活ê siōng koân奧秘，大大超過咱人ê理解能力。M̄-koh，咱看tio̍h koh活ê耶穌kah門徒同齊食飯（路加福音廿四：30）。Á做門徒「認出伊來」ê時chūn，「耶穌忽然無看tio̍h 了」（路加福音廿四：30—31）。Koh活ê神跡說明一個真重要ê信息：上帝siōng偉大ê創造。Chit-ê偉大ê神跡m̄是用人ê知識、能力teh理解。是人ê心靈kah上帝ê 愛相對遇時，就會明白。這mā是信仰siōng重要ê關鍵。信仰m̄是完全靠理性推理就ē-tàng完全明白，它有koh khah重要ê部分：心靈ê功課。Chit點mā是咱ài認真學習ê部分。 Ná親像koh活ê耶穌對多馬所講ê話：「你因為看tio̍h我chiah信mah？hiah-ê無看見á信ê是jōa-ni̍h-á有福ah！」

A. 約翰福音書ê作者kā伊寫chit本冊ê主要目的tī第31節說明出來，為tio̍h「是ài lín信耶穌是基督，是上帝ê kiáⁿ，並且ài lín因信祂來得tio̍h性命。」kah馬可福音書ê作者寫法tú好顛倒，伊ê寫法是將該冊ê第一句話就清楚表明伊寫chit本冊ê主要目的：「上帝ê kiáⁿ，耶穌基督ê福音是án-ne開始ê。」然後chiah開始書寫耶穌ê事蹟。

B. 有真chē聖經學者認為約翰福音應該是到chit章ê 31節就結束loh。第21章真可能就是後來增加入去ê。

C. koh講，第30節mā hō͘咱知影，iáu有真chē有關耶穌ê事蹟tī早期教會中流傳tio̍h，這mā就是路加福音書ê作者tī hit-ê福音ê開場白中所講ê：「已經有kóa人從事寫作，報導tī咱中間所發生ê事。」可惜ê是，chiah-ê報導、流傳ê事蹟無紀錄落來，á是保存落來。若無，咱對耶穌ê事蹟ê認bat必定會koh khah豐富。
經文：

約翰福音 21:1-21:14

註釋:

Chit段經文是koh一pái記述有關耶穌koh活hō͘祂ê門徒看見ê經過。故事ê經過真像路加福音第五章1到11節，耶穌呼召彼得兄弟kah雅各兄弟ê情景。

A. 原先，耶穌被釘死tī十字架上後，包括彼得在內，「所有ê門徒lóng離棄耶穌，逃走了。」（馬可福音十五：50）眾門徒以彼得帶頭，koh tńg來到加利利去重操舊業── 掠魚。In kah-ná想用chit種方式忘掉耶穌被釘死tī十字架上ê悲傷，á是講心中ê極大失望。因為in bat棄sak一切所有ê跟tòe耶穌去了（路加福音五：11）。結 果耶穌被釘死tī十字架上。這不hō͘人失望chiah怪。M̄-koh，就tī chiah-ê時chūn，koh活ê耶穌顯現在in面前。

B. tùi第二十章kah chit一章記載有關耶穌koh活hō͘門徒看見ê記事來看，咱發現：眾門徒是tī生活、工作中，一再發現耶穌無死，祂是活活地tī in ê生活、工作中。

Mā thang講，in每一工ê生活、工作，到處lóng ē-tàng看tio̍h耶穌就tī in身邊，kah in同在。雖然耶穌是被釘死tī十字架上了，而且mā埋葬了。M̄-koh，tī門徒ê經驗中，耶穌卻是活活kah in做伙。連食飯lóng是án-ne感受。

C. 第14節講chit-pái是第三pái顯現。第一pái是tī第二十章19節，第二pái是tī第26 節。
經文：

約翰福音 21:15-21:19

註釋:

Chit段經文真緊hō͘咱想tio̍h彼得有三pái否認耶穌kah伊ê師徒關係。Chia koh活ê耶穌連續三pái詢問彼得「你疼我mah」chit-ê問題。Kah-ná有意思beh提醒伊：彼得ah，你iáu會否認我mah？

彼得ê回答是真堅定，ná親像耶穌teh預言伊會三pái否認ê時chūn，伊mā是用真堅定ê語氣對耶穌講：「我若tio̍h kah 祢做伙死，mā 絕對bē m̄ 認祢！(全民版)」（馬可福音十四：31）現在當耶穌第三pái koh再問彼得「你愛我mah」了後，作者講彼得「就難過起來」。因為chit種連續三pái ê詢問，而且mā thang理解chit三pái ê詢問，是嚴肅ê，因為 chit種詢問是有「性命之約」ê內涵tī內面。即使是咱聽起來mā會有無好ê感受。特別是chit段詢問是編排tī彼得kah其他門徒捕到真chē大魚ê事件了後，chit種「你愛我 mah」ê問話，mā是teh問講：「你kám ài我贏過chiah-ê大魚？」咱kā chit種情節換到今á日，如果咱ê seng-lí非常大，而且真好。當耶穌對咱án-ne問ê時chūn，咱會怎樣回答？
經文：

約翰福音 21:20-21:25

註釋:

到底作者所講ê「耶穌所意愛ê hit-ê門徒」是甚麼人？真chē人teh問。M̄-koh，我就是無夠額ê資料thang回答。第24節講出chit本福音書ê作者就是耶穌所意愛ê人。

廿一：25節，thang kā chit節比較第二十章30節，意思是仝款ê。今á日koh khah thang來證明chit位作者所講ê，描述、討論有關耶穌ê事ê冊，實在siuⁿ-chē、siuⁿ-chē。
重新查詢