約珥書 1:1-1:20

註釋:

Tùi第一章2節開始直到第二章17節，chit段經文lóng是提起一個重要主題，就是有關上帝審判ê日子來臨，kah草蜢帶來ê災難。Tī第一章提起ê草蜢災難，lóng teh隱喻上帝teh-beh嚴厲懲罰悖逆ê子民。先知約珥用chit種方式teh呼籲猶大ê以色列人民tio̍h知影趕緊悔改歸向上帝，若無，當上帝審判ê日子臨到，就只有ē-tàng哀嚎慘叫而已。

第1節，ná親像俄巴底亞、約拿、那鴻、哈巴谷、瑪拉基等先知ê情形仝款，都無詳細紹介chiah-ê先知ê身世背景，只有一句簡單ê描講述，上帝ê話臨到某某人，á是某某人ê kiáⁿ。Mā因為án-ne，tio̍h明白chiah-ê眾先知ê身世背景，就一定tio̍h tùi in所講ê信息中來認bat。Chia講先知約珥是「比土珥ê kiáⁿ」。M̄-koh chit位「比土珥」ê名只出現tī chia。Á約珥chit-ê名字ê意思是teh指：耶和華是上帝。

Chit節雖然無說明先知約珥ê背景，m̄-koh卻講出一句先知文獻siōng典型ê話語：「上主hō͘某某人ê信息。」chit種用句tú好說明一件事：先知所傳講ê信息是上帝hō͘伊ê，m̄是先知家己歡喜講甚麼就講甚麼。

第2到3節，先知約珥真嚴肅地提出警告，特別指定當時ê序大beh聽上帝ê話，而in ê「子女」們mā ài認真聽從上帝ê話語，koh khah重要ê，chiah-ê tùi上帝來ê話語m̄是只有流傳一代、兩代，而是beh流傳到「世世代代」。

Koh講，chia連續出現「聽pah」，而且是「tio̍h注意聽」等詞，這是對伊ná時代ê一種呼籲，ài in注意聽上帝ê聲音。

第4節，約珥chit位先知siōng特別ê所在，就是伊用草蜢來做譬喻，說明上帝懲罰祂ê選民ê時，敵人ná親像草蜢一般ê來到，hō͘人無法度抵擋，mā m̄知該怎樣辦？草蜢，這m̄是人會驚惶ê昆蟲。M̄-koh，當牠聚集起來ê時，即使是tī今á日án-ne科技發達ê時代，mā束手無策。先知約珥tī chia連續提起四種草蜢ê名稱，而且lóng hō͘了chit四種草蜢一種特有ê「毀滅」角色。Mā有學者認為chit四種草蜢，其實就是草蜢成長過程ê四個階段。Tùi「剪蝗」到「隊蝗」；koh再tùi「隊蝗」到「踊蝗」；然後tùi「踊蝗」到「毀蝗」等。

先知約珥tī chia mā是án-ne，伊用草蜢當做譬喻ê題材，而且講得非常生動，因為草蜢是以色列人民非常熟悉ê昆蟲，tī in祖先出埃及chìn前，埃及境內bat發生蝗災，造成農作物受tio̍h嚴重傷害，hō͘埃及ê經濟受創甚厲，差不多無法度承受（參考出埃及記十：14—15）。現tī先知約珥用以色列人民siōng-kài熟悉ê歷史材料來傳達上帝ê信息，對以色列人民來講，thang真緊to̍h進入狀況。

先知約珥teh描述chiah-ê災難ê時，已經真清楚teh說明災難來臨ê時，m̄是人所ē-tàng料想得tio̍h ê，m̄-nā速度非常緊，而且一下á就佈滿kui片大地，即使人看見滿天飛舞ê草蜢，以及佈滿kui片農地、樹林ê草蜢ê時，只有ē-tàng仰天長嘆，完全lóng無抵擋ê能力。

	第5節，tú好就是tī回應第4節ê災難。Chia談起「酒醉」、「嗜酒」ê人，即使酒醒起來，mā是無法度理解到底發生甚麼事。因為án-ne，先知約珥就呼喊chiah-ê酒醉ê人，tī「清醒」後，就beh開始「啼哭」à。因為家園，特別是「葡萄園被毀了」。Tio̍h注意ê，Tī聖經中通常會用葡萄園來譬喻以色列民族。

	第6節，先知約珥kā草蜢用來譬喻家己ê國家已經陷入了非常危險ê狀況中，伊用「草蜢」chit-ê詞來形容chiah-ê來侵犯ê敵人，然後講in ê數目chē到ná親像草蜢仝款「bē-tàng勝數」。M̄-nā án-ne，chiah-ê來攻擊ê敵人，lóng帶有ná親像獅般銳利ê「嘴齒」。Chiah-ê lóng tī kā以色列人民講如果in不趕緊醒悟過來，所beh面臨ê就是徹底毀滅。

	第7節，則清楚講出chiah-ê ná親像草蜢來襲ê敵人，會徹底破壞所有農作物，毀滅kui個國家。Chit種破壞是全面性ê，葡萄園會hō͘毀壞，無花果樹被食光，甚至連樹幹lóng遇tio̍h剝皮ê慘狀。如果一叢樹木ê皮被剝掉，chit叢樹就會死去。

	葡萄、無花果、橄欖、石榴等chit四種果子樹lóng是teh代表上帝kah伊子民之間ê特殊關係。

第8節，先知約珥提出ê第一種會哀傷、悲歎ê人，就是hiah-ê年紀小chiah tú訂婚ê「少女」，in會失去「未婚夫」。先知約珥用chit種方式來譬喻，以色列會面臨ê慘劇，就ná仝一個chiah訂婚iáu未嫁去夫家ê少女仝款，為tio̍h死去ê未婚夫痛哭哀嚎ê悲慘狀況仝款。

第9節，這是先知約珥提起會哀傷ê第二種人，就是聖殿ê眾祭司。M̄-nā tī chia提起，mā tī第13節koh提起。

聖殿ê獻祭是非常重要ê宗教信仰禮儀。每工早暗祭司lóng tio̍h上聖殿去獻祭hō͘上帝，包括燒祭kah素祭。現在一切農作物lóng枯焦死了，厝內所飼養ê家禽動物mā無法度得tio̍h食物，完全無法度獻祭。一般來講，若是人面臨災難，soah koh無法度藉tio̍h信仰到聖殿獻祭得tio̍h心靈ê平安ê時，心中ê無安全kah失落感必定會koh khah嚴重。Á chit時ê祭司必定會心中艱苦心、哀傷至極。

第10節，chit節koh一pái提起草蜢過了後帶來土地ê大災難，一切lóng已經成做荒涼之地。Tī第7節則提起葡萄樹、無花果樹，chia提起葡萄樹kah橄欖樹。橄欖樹tī巴勒斯坦ê重要性thang講kan-taⁿ次tī葡萄樹而已，m̄-nā果子thang食用，也ē-tàng用來提煉橄欖油，而且ē-tàng用上等ê橄欖油製造專為聖殿點燈用ê油（參考出埃及記三十：24），iáu thang用來製成藥品、化妝品。Chit節mā thang看tio̍h當「田野荒涼」ê時，土地就會悲歎、哀愁。
Án-ne tùi第7到10節看tio̍h chit四種teh象徵以色列人民kah上帝之間親密關係ê果子樹，有三種已經枯焦死了，如果koh加上第12節，就會看tio̍h連石榴mā仝款枯焦死，án-ne就表示以色列人民kah上帝之間ê關係已經完全斷了，án-ne chiah是siōng大ê悲哀ah！

    第11到12節，chit節先知約珥提出會「悲傷」、「哀號」ê第三種人，就是作穡人們。作穡人，in ē-sái講是聖經時代siōng有社會生產力ê人，mā是當時社會siōng大力量ê代表。Chit種族群會悲傷，án-ne就表示m̄是個人ê問題，卻是kui個社會已經陷入非常嚴重ê狀態中。Chia講一切農作物包括有大麥、小麥、葡萄、無花果、石榴、棕樹、蘋果樹等一切果子樹lóng因為草蜢ê侵襲lóng「lian去」死去而且是毀滅殆盡。

第13節，chia進一步呼籲眾祭司「beh穿麻衣痛哭」。穿麻衣，這是非常嚴肅ê一件事，表示厝內有至親ê人過世。現在則祭司穿麻衣到聖殿內去「整瞑痛哭」，表示極度ê哀傷。In是teh代表全體以色列人民到聖殿內去向上帝懺悔，祈求上帝ê憐憫kah赦免。

第14節，頭前有祭司穿麻衣整瞑啼哭，現在則是beh全體猶大ê以色列人民lóng禁食，iáu koh khah舉行聚會。以色列人民每年lóng有一個節日就是beh án-ne過ê，he就是贖罪日。照摩西律法ê規定，tī贖罪日一定tio̍h「禁食，tio̍h聚集敬拜上主」（參考利未記廿三：26—27）。無錯，就是因為以色列人民犯嚴重ê罪行，引起上帝極大ê忿怒chiah會有chit種結果。因為án-ne，chit項聚會乃是全國性ê公開聚會，要求長老kah全國人民lóng一定tio̍h參加禁食、祈禱、懺悔ê聚會，thang講kah「贖罪日」ê聚會完全仝款。

第15節，所謂「上主ê日子」，chit句子tī chia經冊共出現五次（參考另外四界是二：1、11、31、三：14）。是teh指上帝審判ê時chūn到à。先知約珥提醒以色列人民，上帝ê日子來臨，mā就是災難降臨ê時刻。

聖經中提起「上主ê日子」ê時，通常表示兩種意義，一是teh指上帝審判ê日子。無論對以色列人民á是任何族群lóng是仝款ê。二是teh指上帝子民得tio̍h拯救ê日子，因為上帝伸出祂全能ê手，拯救祂ê子民脫離災難，hō͘祂ê子民得tio̍h應該有ê榮耀（參考以賽亞書四十六：13）。

第16節，chit節值得注意，第一句講「農作物被毀了」，這是teh指物質生活上開始有嚴重ê欠缺。簡單ê一句話，mā teh說明人類即使有koh再大ê能力，對tī這tùi上帝來懲罰造成ê災難，真正是lóng無招架餘力。Chit節ê第二句話是「上帝ê聖殿無歡樂」，這是teh指宗教心靈層面ê乾渴。人tī物質生活上缺乏ê時，若是心靈ē-tàng滿足，mā會hō͘因為物質缺乏所帶來ê痛苦得tio̍h減輕，甚至會甘之如飴。M̄-koh若是宗教心靈sàn-chhiah，即使擁有koh khah chē ê財富，人永遠bē感覺滿足。先知阿摩司就有一段真美ê話語形容chit種問題（參考阿摩司書八：11—12）。申命記ê作者真清楚說明，即使tī無任何食物ê曠野，mā會因有上帝ê話而得tio̍h性命ê滿足（參考申命記八：3—4）。

第17到18節，chit兩節lóng是teh描述災難過了後ê殘破景象，包括農田荒廢，致使穀倉幾成廢墟之態，而cheng-seⁿ為tio̍h beh chhōe食物四界亂竄，甚至發出悲鳴ê叫聲。Chiah-ê lóng tī說明上帝忿怒ê懲罰。

第19到20節，chit兩節ē-sái講是先知約珥為以色列同胞向上帝ê哀求。注意第19節ê「火」kah「火燄」chit兩個字，指ê是上帝極大ê受氣tú親像大火仝款火燒tio̍h。Chit種火燒ê火、火燄，hō͘人lóng m̄敢接近。M̄-nā是人需要上帝息怒，連家禽動物如牛、羊等lóng發出哀鳴ê聲音，teh向上帝懇求息怒，因為溪水乾涸，草原lóng無了，in mā陷入性命ê困境中。

約珥書 2:1-2:17

註釋:

Chit章thang分做兩個段落，一是第1到17節，這是繼續第一章提起ê草蜢帶來ê重大災害。二是第18到32節，提起一個中心主題：上帝koh一pái憐憫悖逆ê子民，只要呼求上帝ê名，lóng會得tio̍h上帝ê拯救。

    絕大多數ê先知lóng有一個共同ê心境，就是憂國憂民。原因是in tùi上帝領受ê信息，主要目的是ài以色列人民會記得上帝ê教導，m̄-thang棄sak上帝。In信息ê中心思想是：棄sak上帝ê教導，等於是自取滅亡。因為上帝chiah是性命ê主宰，mā是一個國家、民族歷史ê中心。顛倒地，若是bē記得上帝拯救ê恩典，等於是藐視上帝ê教導仝款，會帶hō͘以色列民族生存ê危險。因為án-ne，先知運動中lóng會一再提醒以色列人民tio̍h注意，無論環境jōa-ni̍h-á惡化，一定會謹記上帝ê教示，對上帝beh忠實，絕對bē-tàng有兩樣ê心思，chit種教導m̄-nā tī家己ê心中，mā tio̍h教導代代kiáⁿ孫謹守上帝ê話語（參考申命記六：4—9）。

	先知約珥傳達ê信息中不時提起「上主ê日子」。伊一再提醒以色列同胞ài beh特別注意「上主ê日子」teh beh來到，而且這日子一來到，必定是非常悽慘，因為會有上帝降落ê災難臨到。Thang án-ne了解：當上帝ài先知出來傳達chit種警告ê信息ê時，就已經teh表示上帝對犯罪ê選民已經容忍到某一個個程度à。上帝是一個慈悲ê上帝，祂所期待ê就是chiah-ê被揀選ê族群會趕緊悔改、歸向祂。先知約珥ê信息就有chit種特色，所以，當伊傳出上帝teh beh以大災難來懲罰以色列人民ê時，另外一方面伊mā替以色列同胞祈求上帝，伊kā上帝講災難確實非常嚴重。言下ê意思，是期待上帝ē-tàng koh再hō͘以色列同胞一個喘氣、悔改ê機會。

    第1節，這是第二pái提起「上主ê日子」，mā就是審判ê時chūn teh要到à。先知約珥呼籲大家lóng tio̍h用「顫抖」ê心面對上帝ê審判。Chia提起「錫安」，意思是teh指耶路撒冷ê某一個座山，teh代表上帝khiā起ê所在。

    第2到3節，先知約珥真清楚講，這日子乃是「烏暗陰森」、「烏雲濃霧」ê日子。這kah先知阿摩司所提出ê警告仝款（參考阿摩司書五：18）。原來chit兩個表示烏暗ê景況，lóng是kah大片ê草蜢來臨有關。先知約珥講草蜢無來chìn前in ê厝園美麗像伊甸園，taⁿ因為草蜢過境變成「荒涼ê曠野」，而且蝗災嚴重到「甚麼lóng無放過」。

第4到5節，chit兩節描述草蜢ê chē，以及侵襲ê嚴重性。Chit種攻擊ê嚴重性，ná親像勇猛ê軍隊猛烈攻擊仇敵仝款，無一絲á ê憐憫之心。Mā可能tī先知約珥ê時代bat發生過án-ne嚴重ê草蜢之災，伊用大家所熟悉ê災難經歷當做教材，希望ē-tàng因為án-ne喚醒以色列同胞知影，惹上帝ê忿怒，結果ná親像經歷過ê草蜢災難仝款，甚至可能iáu會koh khah嚴重。

第6節，如果講先知約珥ê時代，是tī主前第八世紀ê世代，thang想像當時亞述帝國對北國以色列ê威脅。Á是若是先知約珥ê時代是tī主前第六世紀ê時代，án-ne應該是巴比倫帝國ê時代，對當時m̄-nā是南國猶大ê以色列人民造成極大ê驚惶感，甚至連附近國家、族群lóng感受tio̍h仝款ê生存壓力，這thang tùi先知耶利米ê作品中看出來（thang參考耶利米書第四十六到四十九章）。若用約珥書第三章6節所提起ê希臘chit-ê帝國來看，hit-ê先知約珥就真有可能是tī希臘帝國時代。Chit種話，hō͘以色列人民一聽tio̍h就驚惶不安ê，應該是teh指希臘帝國à。

第7到10節，chit段經文lóng是用「牠」chit-ê代名詞，這是因為先知約珥是用草蜢來形容teh beh來攻擊以色列ê仇敵。Ná親像頭前所講ê，無論是toh一個時代，有能力攻擊以色列人民ê附近國家，就是chiah-ê足以hō͘ in受掠而且被販賣到奴隸市場上去受苦ê亞述、巴比倫、波斯、希臘等等chiah-ê大帝國。Chit段經文就是teh形容chiah-ê國家軍隊非常勇猛，明明是就是kah大批草蜢攻擊綠色田園仝款。

第10節ē-sái講是聖經中teh描述末日景象ê專門用語（參考以賽亞書十三：10，以西結書三十二：7，阿摩司書八：8—9）。先知阿摩司soah講ē-tàng hō͘天地變色ê，並m̄是自然界本身ê改變，koh khah m̄是人ê能力所及，卻是上帝hō͘伊án-ne（參考阿摩司書五：8）。用天地變色來形容末日來臨ê chit種講法，mā是用來說明人ê性命已經無法度照平時ê方式來應付à。因為天地lóng變色了，人kah萬物ê生存lóng teh beh面臨威脅。耶穌基督mā用chit種講法來警告伊ná時代ê猶太人（參考馬可福音十三：24—25）。

第11節，chit節真清楚講出，類似草蜢成群、有秩序，而且是一波波無停來攻擊，就是上帝ê懲罰。先知約珥tī chia形容上帝ê日子明明是就是一個「jōa-ni̍h-á驚人」ê日子，並m̄是個thang期待得tio̍h拯救ê日子。原因是人犯罪ê狀況非常嚴重，beh祈求得tio̍h上帝ê憐憫差不多是微乎其微。

第12到13節，先知約珥真清楚kā伊講ê同胞，悔改m̄是外表ê「禁食、啼哭、哀號」，á是「拆裂衫褲」等，chiah-ê lóng是外表ê現象，心內ê懺悔chiah是真正重要ê。因為上帝是看人心內ê上帝，m̄是看外表，tio̍h真心ê悔改，因為上帝是「有恩典，充滿憐憫；伊不輕易受氣，有豐盛ê慈愛」，會「隨時願意饒恕」人。這mā是kui本聖經ê信息（參考出埃及記三十四：6，詩篇一○三：6—10、八十六：15、一四五：8，約拿書四：2）。

第14節，chia ê「mā可能」，表示無人會明白、知影，因為上帝beh憐憫甚麼人，就憐憫甚麼人，m̄是根據人ê條件。赦免ê主權tī上帝，並m̄是tī人ê手中。Koh講，chit節所描述上帝ê賜福，tú好kah頭前所提起ê荒廢之田園、饑荒之現象呈現強烈對比；chia講tio̍h上帝ê賜福kā是豐富到夠額一切所需要，而且有chhun。Bē koh再像頭前所提起ê，祭司連beh獻祭ê物件都無，一切動物lóng飢渴到發出哀嚎ê聲音。

第15到17節，kah第1節ê吹號無仝。Chit所在「吹號」是ài大家趕緊悔改。「禁食」，mā是為tio̍h beh悔改ê緣故。Á chit種宣佈禁食ê規律就是由祭司來擔任，mā是由祭司帶領民眾來舉行認罪ê聚會，chit種聚會是全體民眾lóng需要參加，tùi siōng年長ê，到幼年年輕ê gín-á，就算抱tī懷中之嬰á mā beh同齊參加嚴肅ê禁食祈禱會。

「上主ah，求你可憐你ê子民」，這是眾祭司tī嚴肅ê禁食祈禱會中所發出ê祈禱文。只有án-ne，敵人才bē提出「Lín ê上帝tī tó位？」chit種問題（參考詩篇四十二：10、七十九：10、一一五：2，彌迦書七：10）。

約珥書 2:18-2:32

註釋:

Tùi第18節開始，直到第三章結束，先知約珥傳達ê信息lóng是好ê、鼓勵ê，是帶來ǹg望ê好消息。Ná親像第二章17節所提起ê，先知約珥bat為tio̍h以色列人民可能面臨ê嚴厲懲罰而向上帝懇求，祈求上帝憐憫以色列人民，不beh hō͘以色列ê仇敵譏笑in講：「Lín ê上帝tī tó位？」現在則開始講tio̍h情況有極大ê轉變，這有一種可能性，就是以色列人民確實悔改。因為án-ne，上帝mā改變伊本來ê計畫，停止原本beh降落ê災難，而改為賜福氣kā in賜福。先知約珥真清楚強調，只要以色列人民知影悔改，而且真誠ê醒悟過來，是唯一ē-tàng得tio̍h上帝ê赦免、憐憫ê機會。

第18節，chit節ē-sái講是先知約珥信息ê一個重要轉捩點。Chia開始講上帝beh關心祂子民所khiā起ê「土地」，mā tio̍h「憐憫」祂ê子民。上帝ê憐憫，m̄-nā是移行災難，而且kā本來已經有ê災難修復，hō͘荒廢ê土地，koh一pái看tio̍h青翠綠葉，而且長滿果子，這就是第19節所描述ê景況。

第19節，chit節thang對照第一章10到12節所記載田園荒廢ê景況，是「五穀、美酒、橄欖油」都無了；現在則全lóng恢復生機，m̄-nā有收成，而且是thang滿足。Mā因為án-ne，無人敢koh再侮辱上帝ê子民。

第20節，thang對照第一章4節、第二章2到3節所描述ê災難中，hiah-ê非常有組織ê草蜢侵入，帶來ê是非常嚴重之災難，現在則tī上帝ê命令下，chiah-ê原本用來懲罰以色列人民ê草蜢，lóng kā「遠離」，á是hō͘上帝消滅殆盡。

Chit節提起chiah-ê「草蜢」之災難是來自「北方」。Tī先知以賽亞、耶利米kah以西結等經冊中，lóng是用「北方」來描述攻擊以色列人民ê仇敵（參考以賽亞書十四：31、四十一：25，耶利米書一：13、14、15、四：6、六：1、22、廿五：9，以西結書一：4），ná親像chiah-ê草蜢來自北方仝款。

第21節，chia講：「土地，你m̄ 免驚，tio̍h 歡喜快樂，因為上主行大事。(全民版)」為甚麼是對土地講話？這kah創世記第三章17到19節有關，tī該段經文中記載土地因為人犯罪而連帶受tio̍h懲罰。上帝懲罰人犯罪siōng直接ê方式，就是hō͘土地生產不出任何農作物、果子，án-ne人就會因為iau餓而知影謙卑悔改。M̄-koh相對ê，當上帝賜福人類ê時chūn，就是hō͘土地thang生產出豐盛ê穀物、果子等。上帝賜福土地，就等於是賜福人類仝款直接。

第22節，chit節一開始就呼teh-hoah「行獸ah，不要害驚」，thang對照第一章18到20節，提起家畜動物，以及荒野ê行獸lóng因為炕旱引起ê大火而逃命，koh tī非常乾渴時chūn，chhōe bē-tio̍h溪水thang lim，因為án-ne，in lóng發出哀嚎ê聲音。現在則是beh chiah-ê家禽動物行獸不要害驚，因為ná親像第23節所提起ê，會有適量ê春霖秋雨降落，hō͘「草場青翠青翠」，真自然tek「果子樹」就ē-tàng茂盛成長，特別是「無花果樹、葡萄樹」就會「結實纍纍」。

第23到24節，chit節描述上帝ê賜福。
Tī巴勒斯坦地區，通常每年十月到十一月是雨季，chit時chūn農民開始掖種，tú好下了khah-chē ê雨量滋潤苗栽ê需要。每年ê三到四月間，是炕旱ê季節，而chit-ê時chūn tú好是收成ê時chūn，siōng驚下大雨傷害農作物。因為án-ne，chia特別用「適量」，表示tú好滿足需要。適量表示非常好ê賜福，是永遠bē缺乏ê意思。

第25節，chit節thang參考第一章4節、第二章2到11節所描述ê，上帝差遣草蜢侵襲大地，造成嚴重災難帶來ê損失，現在上帝決定kā它全部「補償」過來。

Chia所用ê「補償」，舊約聖經中有幾個含意，一種是表明「賠償」ê意思（參考出埃及記廿二：2、7、9），另外一種表示上帝ê懲罰，是一種「加倍」ê懲罰，表示beh kā過去所hō͘ in ê，連本帶利ê收tńg來（參考耶利米書十六：18）。第三表示賜福，是上帝hō͘ in祂ê子民加倍ê賜福，彌補過去ê損失（參考撒母耳記下十二：8，約伯記四十二：10、以賽亞書六十一：7，撒迦利亞書九：2）。

第26節，chit節說明了性命中siōng大ê賜福，就是「飽餐足食」。Chit節mā thang對照第17節所提起ê，仇敵teh譏笑，並且iáu用自高ê口氣詢問in ê上帝tī tó位？現在無人敢chiah koh講chit種話了，因為上帝已經hō͘祂ê子民豐衣足食，而且有chhun。Koh khah重要ê，仇敵看tio̍h上帝ê子民lóng teh過真豐富ê生活，mā會相信以色列ê上帝並無離開祂ê子民。

第27節，chit節ē-sái講是約珥書siōng重要ê一節經文，chia提起「約」ê問題。聖經中teh表明上帝kah祂子民之間ê關係ê時，通常用兩種句型來表示，一是「我是上主—lín ê上帝」（參考出埃及記六：7、，利未記廿六：12，耶利米書七：23、十三：11，以西結書十一：20、三十六：28、撒迦利亞書八：8，瑪拉基書三：17）。除了上帝以外，無別ê上帝。因為chit位上帝是宇宙萬物ê創造者，祂是唯一ê。這mā是上帝kah祂ê子民立約ê基礎（參考出埃及記二十：3，申命記四：35，撒母耳記下廿二：32，列王記上八：60，列王記下五：15，詩篇十八：31，以賽亞書四十三：10、四十六：9））。Chit節詩歌mā清楚說明了以色列人民tī懺悔了後，向上帝表明in會忠實tī上帝，以上帝為in唯一ê救主。因為án-ne，上帝beh koh一pái照顧in，ná親像老父照顧、疼惜kiáⁿ仝款（參考詩篇一○三：11—12）。

    第28到29節，聖經中有kúi-nā pái提起上帝ê「靈」beh「piàⁿ落」tī祂ê僕人身上。現tī先知約珥tī chia講上帝ê靈會灌ak tī以色列人民中間，而且是不分年齡，無論「老年人」、「少年人」，甚至連「奴僕kah hō͘女」mā lóng會分享到上帝聖神ê同在，而充滿tio̍h「異象」。

Chia講「kiáⁿ會宣告」上帝ê信息，這意思是teh指每一個gín-á lóng會有上帝啟示ê話語thang聽得見。二是「老年人做奇異ê夢」，表示即使年紀真大，mā會繼續得tio̍h上帝奇妙ê啟示。因為「夢」講出上帝ê旨意kah計畫。三是「少年人看見異象」。「異象」說明上帝hō͘人ê啟示（參考創世記十五：、四十六：2，列王記下二十：10）。

先知約珥án-ne傳出信息，就是tī kā以色列人民講kah上帝之間有非常親密ê關係，上帝一再啟示in看見祂ê旨意，而in mā會遵行上帝ê旨意做tāi-chì。

第30到31節，chit兩節是有關末日審判來臨ê現象。Tī第一章15節有提起tī「上主ê日子快到à」，然後koh講「hit日子是jōa-ni̍h-á驚人ah」，chit種句話tī第二章10節、11節koh一pái提起。Tī第二章10節mā提起「日頭、月娘lóng昏暗，星辰mā無koh發光」，這kah此節所講ê日月lóng會變色是仝款ê意思。

第32節，先知約珥真清楚表明一個性命轉機，就是「凡呼求上帝ê名ê人lóng一定得救」。Chit點對任何時代ê人來講lóng是真重要ê信息。使徒保羅mā引用先知約珥ê chit句話（參考羅馬書十：13）。

約珥書 3:1-3:21

註釋:

當先知約珥呼籲伊ê同胞一定會確實悔改，來期待上帝ē-tàng赦免、赦免ê時，伊真清楚指出，上帝並無ài祂子民ê悔改只是外表上做做款式，卻是ài in真實地tùi心內ê悔改做起，這就ná親像teh拆裂心肝仝款（中文和合本用「beh拆裂心腸」，台語漢字本用「拆裂lín ê心」）。這kah大衛王犯罪了後懺悔ê時所講ê意思仝款；伊講：「上帝ah，祢所意愛ê祭就是憂傷ê心；憂傷痛悔ê 心，祢bē 看輕。(全民版)」（詩篇五十一：17）tī先知以賽亞講有chit種心境者，上帝一定會hō͘ chit種人重新得tio̍h性命ê「希望」（參考以賽亞書五十七：15）。

先知約珥ê呼籲了後，以色列人民確實有真具體ê回應，因為án-ne，先知約珥就傳出了上帝hō͘以色列人民非常美好ê信息做回應，chit-ê信息是上帝ê拯救kah憐憫。Tùi第二章18節開始直到第三章最後，lóng是án-ne ê信息。

悔改ê意義，就是kā罪惡改變成做良善，chit種人會得tio̍h上帝ê歡喜kah接納，chit點mā ē-sái講是kui本聖經ê中心主題。以色列人民必定是tī聽tio̍h先知約珥ê呼籲了後，有明確ê改變，chiah會hō͘上帝生出憐憫ê心，決定beh改變祂本來beh毀滅以色列ê計畫，換做賜福、赦免、憐憫，並且繼續接納以色列人民為祂ê子民，祂是以色列人民ê上帝。

第1節，chia開始就提起「上主ê日子」。Chit-ê詞句一再出現（參考一：15、二章：1、11、29、三：1、14、18），ē-tàng看出先知約珥對「上帝ê日子」chit-ê信息ê看重。通常tī先知文獻中，chit-ê詞句lóng是teh指上帝ê審判來臨之日，同時mā thang講是teh指上帝拯救、憐憫ê時刻。Tī先知約珥ê信息中mā是án-ne；伊tī第一章到二章17節chìn前，談起「上帝ê日子」，所beh表達ê信息lóng是kah上帝懲罰ê時刻來臨有關。Á tùi第二章18節了後到第三章結束，「上帝ê日子」lóng是kah上帝拯救ê恩典來臨有密切關係。

Chit節講上帝「beh hō͘猶大kah耶路撒冷重新繁榮起來」，chit句話thang對照第二章23節所提起「錫安ê人民，tio̍h歡樂」chit句話。「繁榮起來」有一個重要ê意義，就是有豐富ê性命力。Chit種性命力bē因為tú-tio̍h困境就埋怨、kiu-kiu，á是妥協，卻是會想beh盡一切辦法好好á生存落去，因為確信上帝必定會同在，mā會適ê時伸出援手救助。

第2到6節，chit節提起「審判谷」，意思是teh指「耶和華ê審判」。M̄-koh現今已經無法度確定這地點是tī tó位，m̄-koh真可能是teh指耶路撒冷城外南邊ê「欣嫩子谷」，chit-ê地mā是當時執行死刑á是傾倒垃圾ê所在。

為甚麼上帝beh集合萬國到chit-ê所在來？原因如下：

一是in侵佔了以色列土地，逼kah人民四散到外國去避難（第2節）。Chit款tāi-chì發生tī主前第八世紀ê亞述帝國，以及第六世紀巴比倫帝國，以及以後ê各種帝國，包括tī希臘帝國時代lóng是。

二是kā俘虜來ê以色列人民送到奴隸市場去販賣，á是分配到王公貴族ê府中去做奴隸，而koh khah嚴重ê是kā兒童—無論男女，lóng當做換取娛樂ê「商品」般販賣、兌換（第3節）。

三是掠奪了耶路撒冷聖殿內敬拜用ê聖器，並且kā chiah-ê敬拜上帝用ê聖器，the̍h去khǹg tī in廟裡供奉偶像神明，這是對上帝極大ê侮辱（第5節）。先知何西阿mā bat án-ne指控過in（參考何西阿書二：8）。

四是kā以色列人民販賣hō͘希臘人（第6節）。

先知約珥講述chiah-ê用意，就是tī說明上帝對chiah-ê嚴重ê錯誤行為lóng記載kah非常清楚，一點mā無容允有狡辯、逃避ê機會。這mā是teh顯明上帝公義審判ê特色。

注意第6節mā是tī前面提過ê，因為chia有談起希臘人ê問題，因為án-ne，有學者認為先知約珥ê時代應該是tī主前第三、四世紀時代。

第7節，chit節講上帝kā採取chit種報復ê方式，就是以chiah-ê大帝國對待上帝子民ê方法來對付in。這mā是一般所講ê「報應」。

第8節，先知約珥講上帝ê報復，就是hō͘ chiah-ê習慣海洋生活人，變成被賣者，in會hō͘賣hō͘ tī沙漠中遊行各地經商ê阿拉伯人（示巴族），án-ne，in ná親像以色列人民被綁tio̍h送上船賣去遠方仝款，現在換做in家己hō͘人綁tio̍h，被駱駝商隊ê人拖tio̍h，行過各地ê沙漠，仝款m̄知會hō͘賣到何方去做奴隸。

示巴人，這是阿拉伯人ê一支，聖經時代in tī商業上非常活躍。

Tùi第9節開始到最後，是先知約珥kah上帝之間交hō͘講話ê記錄。

    第9到10節，chit兩節是上帝ài先知約珥公開宣告，講上帝beh出征了，chiah-ê hō͘上帝點名ê國家好好á準備來對敵上帝pah。第10節提起上帝發起ê戰爭，tú好kah先知彌迦所講ê，以後be7 koh有相戰完全無仝（參考彌迦書四：3—4）；先知約珥是講beh chiah-ê對敵上帝ê國家、族群起來整軍備戰，上帝就beh派出祂ê軍隊來攻打in à。

第11到12節，chit兩節看起來ná親像天頂ê天軍beh kah地上ê聯軍開始phah起來仝款。先知約珥一方面tio̍h以色列四周圍ê國家、民族lóng集合到「審判谷」來聚集，另外一方面，伊mā祈禱上帝差遣天軍降臨來kah chiah-ê國家相戰。其實，先知約珥chit段話已經講出一個重要ê信息：

chiah-ê列強國家並無悔改，若無，in一聽講先知約珥ài in到上帝審判ê所在去，就會知影he是懲罰時刻來臨à，聰明ê人會馬上悔改歸向上帝，來期待得tio̍h上帝ê赦免kah憐憫。

第12節下半句ê「上主beh tī hia開庭」進行審判ê工作，這mā表示上帝ê軍隊已經戰贏chiah-ê驕傲國家ê軍隊，chiah會開庭審判chiah-ê現代人所講ê「戰犯」。

第13節，chia用作穡人teh收割ê情景來形容上帝審判ê款，這ná親像tī第一章kah第二章所描述ê，上帝差遣草蜢過境仝款，摧毀了所有ê農作物仝款。現在上帝ê審判ná親像作穡人the̍h鐮刀teh收割成熟ê粟á仝款，雙手收割ê動作非常俐落，hit種輕快有力，而且收得非常清氣。同時mā用葡萄收成了後，送入去壓酒池去壓汁、kek酒。Chia用「滿溢出來」，表示葡萄豐收。先知約珥用chit種句話teh描述上帝ê軍隊確實是大獲勝利。而且上帝是用非常嚴厲ê方式審判hiah-ê邪惡者，先知約珥形容上帝ê審判ná親像榨壓葡萄ê方式，bē漏掉任何一粒葡萄般ê來審判chiah-ê邪惡者。

第14節「成千上萬」，這表示聚集ê人數相當chē ê意思。

第15節，這是常看tio̍h ê句話，lóng是用來形容末日來臨ê景象，像第二章10節、31節等等，表示情況是已經到à非常嚴重ê程度à。

第16節，chit節tú好講出「上帝ê日子」另外一個意義就是以色列人民得拯救ê日子，hiah-ê邪惡ê國家、族群受審判ê時刻。現在上帝beh tùi耶路撒冷發出非常忿怒ê「怒吼」聲音。上帝怒吼ê聲音足以hō͘「天地lóng顫抖」，而且聲音之大ná親像出埃及記ê作者用「雷轟」聲音來表示上帝ê出現（參考出埃及記十九：16—19，詩篇七十七：17—19，以賽亞書廿九：6）。「雷轟」表示表示上帝ê忿怒，beh懲罰背逆ê子民kah邪惡ê國家、民族，mā teh表示上帝beh來拯救祂ê子民脫離敵人ê手。

第17節，「你就知影我是上主」，chit句話不時出現tī上帝施行神跡奇事，彰顯祂奇妙ê作為了後。值得注意ê是：當上帝彰顯祂ê神跡奇事異能ê時，有兩個情況ē-tàng看出來，一是上帝施行大能ê手拯救祂ê子民脫離苦難。其二是上帝出手重重地懲罰對敵祂ê人。Koh講，chit節koh一pái強化耶路撒冷城ê重要性，認為he是上帝khiā起ê所在，上帝必定會為tio̍h祂ê榮耀而保護它，hō͘ hit-ê城永遠屹立不搖。Tī以色列人民ê認知中，耶路撒冷城就是「上帝ê城」（參考詩篇四十六：、四十八：1）。In甚至稱耶路撒冷城為「聖城」（參考以賽亞書四十八：2、五十二：1）。

第18節，chit節回應第17節所講ê耶路撒冷城乃是上帝之城ê意義。先知約珥teh描述一個美麗景象：只要有上帝同在ê所在，就ná親像是伊甸園仝款ê美麗，hō͘人看了lóng會垂涎（參考創世記三：8—14）。

Chit節講「有一條泉水beh tùi上主ê聖殿流出來」，chit句話thang參考以西結書第四十七章1節。「泉水」，這是teh代表永恆性命ê記號，hō͘人永遠ê性命bē飢渴。

第19到20節，上帝beh懲罰ê對象m̄-nā是「埃及」、「以東」而已，mā包括第4節提起ê泰爾、西頓、非利士等等chiah-ê國家、族群，上帝一定會懲罰chiah-ê欺壓別人ê國家。這mā是tī第7節所講ê，上帝beh照in對待別人ê方式，反tńg來對待in。這就是俗語所講ê：「以其人ê道iáu治其人ê身。」

第21節，相對tī第20節所描述ê，耶路撒冷kā成做一個繁榮ê城市，因為有上帝ê慈愛teh照顧tio̍h hit-ê城。Chit種「人煙稠密」，tú好kah主前586年被巴比倫帝國摧毀了後，hit-ê城幾呈廢墟ê狀態，完全顛倒。Tī上帝賜福之下，hit-ê城kā成做一個人人歡喜khiā起ê城市。