哈該書 1:1-1:15

註釋:

Tī十二位小先知中，有六位teh做品中lóng有先紹介chiah-ê先知ê背景，chiah-ê有紹介ê就是何西阿、阿摩司、彌迦、西番雅、哈該，以及撒迦利亞等。有另外六位是無紹介身世背景ê，就是先知約珥、俄巴底亞、約拿、那鴻、哈巴谷、瑪拉基等。有紹介身世背景thang幫助咱了解作者寫作時代ê社會情況，進一步koh khah清楚明白冊中ê信息意義。

	哈該書hō͘咱清楚知影伊ê時代就是tùi巴比倫被波斯帝國釋放回鄉tńg來後ê時代了，而且是參與重建聖殿ê工作。第一章就是談起回鄉後ê以色列人民對重建聖殿ê工作態度並m̄是真積極地，而先知哈該傳出上帝ê話kā以色列人民講一定tio̍h趕緊kā聖殿重建完成，因為聖殿是凝聚以色列人民siōng重要ê一股力量。伊甚至提出警告，若是疏忽了聖殿ê重建，就算擁有一切財富mā會重蹈亡國ê覆轍，所有ê一切lóng會喪失。

    第1節，「大流士做波斯皇帝ê第二年六月一日」，這應該是tī主前520年8月29日。

「哈該」，chit-ê名ê意思是「節慶」。以色列人民teh號名通常lóng kah出世ê背景有密切關係。

作者講先知哈該傳達上帝信息hō͘「撒拉鐵ê kiáⁿ兒猶大省長所羅巴伯和約撒達ê kiáⁿ兒大祭司約書亞」。In兩人lóng是猶太人，而且kah波斯皇室ê關係真好，chiah會被任命為官員。所羅巴伯是掌管政治事務，而大祭司約書亞則管理宗教事務。Tùi chia thang看tio̍h一個重要ê史料，就是所羅巴伯和大祭司約書亞（tī以斯拉記是用「耶書亞」chit-ê名字）這兩人lóng是tī第一批回鄉ê行列。

    第2節，上帝啟示hō͘先知哈該chit種信息。原來tī chit批回鄉ê以色列人民中間有人認為「chit-má m̄是重建聖殿ê時chūn」，chia用ê是「chiah-ê人民」之詞，卻m̄是用「我ê子民」，原因chiah-ê人民雖然表面上看起來是用色列人民，m̄-koh in ê心已經無koh是用上帝為性命ê中心，chit種人民kah上帝原本所揀選ê以色列人民是無仝款ê。

	第3到8節，這是上帝hō͘先知哈該轉達hō͘以色列人民ê第一段信息。第4節真清楚指出上帝ê「聖殿荒廢tio̍h」，而in各自卻tòa tī「華麗ê厝」，意思是teh指有裝潢美麗ê天花板。這表示in並m̄是無錢蓋聖殿，因為in家己ê居家lóng裝潢得真堂皇。這顯明了in tī信仰上，無koh是用上帝為中心。所以先知哈該講上帝ài in好好á「檢討」chit種信仰態度。這「檢討」一詞tī第7節koh一pái出現，真清楚ài chiah-ê回鄉ê以色列人民省思上帝tī in性命中ê地位。

	先知哈該傳出上帝回應以色列人民chit種態度ê信息是：若是in繼續án-ne落去，無論怎樣努力，lóng會是白費心力，因為若無上帝賜福，就算「播種」真chē，收成卻真少；有衫褲穿mā bē暖活；有飯食mā bē飽等等，chiah-ê teh表示失去上帝，等於是失去一切。Chia講「工資無夠維持生活」，tī中文《和合本》、天主教《思高聖經學會曉版本》，以及《台語漢字本》等lóng仝款記載為「thàn來ê工錢khǹg入破漏ê袋子中」，這意思真清楚，指即使工作thàn到工錢mā會失落，ná親像褲袋有破洞仝款。先知哈該kā以色列人民講，應該趕緊重建聖殿，因為有聖殿，in就會重新聚集做伙敬拜上帝，chiah會重新拾回過去kah上帝之間親密ê關係。

第9到11節，chit段經文是先知哈該傳出ê第二段信息，mā是上帝警告ê信息。第9節所講ê比第6節所講ê koh khah嚴重，m̄-nā「歉收」，而且是kā kan-taⁿ有ê收成帶tńg來儲存在倉庫裡，mā會hō͘上帝用風「吹掉」。Chia「吹掉」一詞，意思就是teh指腐pháiⁿ無法度食用。Koh講，上帝mā hō͘天不落雨，大地炕旱，土地長bē出五穀，án-ne一來，連帶ê是所有ê cheng-seⁿ、動物等lóng會欠缺糧食，無法度活teh。因為in只無閒「建造家己ê房屋」，卻隨在「聖殿荒廢」，表示in對上帝ê輕視，完全bē記得in ē-tàng tńg去故鄉，lóng是因為上帝極大恩典。

    第12到13節，chia講「所羅巴伯、約書亞，kah所有tùi巴比倫流亡回國來ê人民」聽了了後，就「遵照」上帝ê「命令去做」。「遵照」ê意思是teh指「敬畏ê心」，是teh指in知影tio̍h用上帝做中心，這表示in有改變，決定改正過來。所以上帝ài先知哈該轉達kā in賜福ê信息是「答應」beh kah以色列人民同在。Chit句話tī哈該書連續出現三pái（參考二：4、5）。

    第14到15節，chia koh一pái提起時間是tī「大流士做皇帝ê第二年六月二十四日」，這是主前520年9月21日。人民領袖「所羅巴伯、大祭司約書亞，以及所有流亡tńg來ê人民」就開始進行「重建聖殿」ê工程。

哈該書 2:1-2:23

註釋:

Chit章記載先知哈該鼓勵參與chit項重建聖殿工作ê人民領袖kah所有以色列人民。只要in kā聖殿重建完成，耶路撒冷會恢復過去ê繁榮。M̄-koh若是無用真心實意ê態度重建聖殿kah獻祭，所有一切lóng會成做污穢ê記號，chit點mā是先知信息中一再提醒ê事。

第1節，chia提起主前520年ê「七月二十一日」，mā就是「10月17日」。這時間mā ē-sái講是猶太人三大節期中ê第三個節期—Tòa棚節。

Tòa棚節，koh名「收藏節」（參考出埃及記廿三：16b），這是收割五穀、果子等農作物了後，準備過冬ê時chūn，對以色列人民來講是歡喜ê節期。因為chit節期有連續長到七工ê慶祝。Tī這節期中，大家會lim酒歡樂。

第2到5節，chit段經文是上帝ài先知哈該轉告hō͘大家ê信息。上帝ài in回想過去ê耶路撒冷聖殿是「jōa-ni̍h-á華麗」，而chit-má「看起來m̄是一文不值mah」？chia ài beh特別注意ê是先知哈該並m̄是講上帝要求in kā聖殿建造成ná親像所羅門王時代仝款華美，因為論財力、人力lóng無法度kah當時相提並論。伊是teh鼓勵以色列人民，m̄-thang因為chit-má能力有限就自卑。因為上帝並m̄是teh看外表ê美，而是beh看心內是m̄是真正尊崇上帝為性命ê主，án-ne chiah是siōng重要ê事。

會有chit種信息，真可能是因為以色列人民心中有不安、驚惶。In驚無能力kā聖殿蓋得像所羅門王時代hit種美輪美奐。確實，in無chit種能力，雖講tī in beh回鄉ê時chūn，波斯帝國皇帝塞魯士bat kā當年巴比倫帝國tùi聖殿搜刮ê所有一切財寶lóng歸還hō͘回鄉ê以色列人民。M̄-koh hiah-ê只不過是敬拜用ê器具而已，即使koh加上其他ê財寶，in ê財力mā無法度kah當年所羅門王相比。所以先知哈該一再鼓勵in tio̍h「剛強，tio̍h努力工作」，不要害驚，因為上帝會kah in「同在」，會幫助in、帶領in。

第6節，chit節到第9節ê經文是先知哈該傳出hō͘伊轉達ê信息。
Chit節「震動天地，搖撼海洋kah陸地」，chiah-ê lóng teh表明上帝ê審判來臨必定有ê現象，而時間真緊to̍h beh來臨。

第7節，chit節thang參考以賽亞書第六十章9節。Tùi先知以賽亞chit段詩歌thang看出，siōng主要是上帝恢復了耶路撒冷ê榮耀了後，就會有真chē seng-lí人客旅，以及來自世界各地ê朝聖者，到chia敬拜上帝。Án-ne，就會有koh khah chē ê資金湧入。這mā teh表明：聖殿ê美，並m̄是因為裝潢美麗，卻是講有真chē人來敬拜上帝，hō͘聖殿內充滿tio̍h朝聖者歌頌ê聲音，這就是一種榮耀ê記號。

第8節，chit節是teh回應第7節所提起ê聖殿之榮耀。所講「金銀lóng是我ê」，這表明了人間看做siōng貴重ê物件，每仝款lóng是上帝所賞賜ê。是上帝賞賜ê，上帝mā有權收tńg來（參考約伯記一：21）。

第9節，chit節講出上帝hō͘ in以色列人民ê應允，上帝beh恢復耶路撒冷城ê榮光，hō͘聖殿比以前koh khah美麗好看，而且hō͘以色列人民過「安定ê生活」。

    第10節，chit節提起「大流士做皇帝ê第二年九月二十四日」，這時間是主前520年12月18日。離頂pái in回應上帝ê信息決定beh動工重建聖殿時間「六月二十四日」（參考一：15），有三個月時間à。就tī chit-ê時chūn，上帝ê話koh一pái臨到先知哈該，ài伊傳講hō͘以色列人民聽。

第11到12節，tùi第11到14節lóng提起兩個kah聖潔有關ê問題，這背景kah利未記第六章有關素祭，以及贖罪祭ê條例有關。

照摩西律法ê規定，所講ê「分別為聖ê祭肉」，這是teh指獻祭用ê。祭司會用伊ê衫褲包chit塊beh獻祭ê肉，然後kā之帶到祭壇獻祭hō͘上帝。如果祭司用來包祭肉ê衫褲接觸tio̍h其它ê物件，包括「餅、湯、酒、橄欖油，á是任何其他食物」ê時，是m̄是chiah-ê被tú-tio̍h、摸到ê物件mā會因為án-ne而成為「聖物」？

先知哈該會問眾祭司這問題，可能是當時有有人認為若是beh獻祭hō͘上帝ê物件，即使包tio̍h ê布巾、衫褲等，一tú-tio̍h其它ê物件，chiah-ê物件lóng會跟tòe成做「聖物」。換句話講，當時流傳tio̍h chit種「聖物」會有感染力ê功效。顯然chit種講法是kah利未記第六章27節所記載ê有關，認為只要「kah這牲祭接觸lóng會受tio̍h神聖威力ê傷害」。

其實，利未記tī提醒包獻祭用ê布，tio̍h看做是「聖布」，tio̍h保持chit塊布ê潔淨，m̄-thang koh再接觸tio̍h人á是任何其它物件，這全然是為tio̍h beh保持潔淨ê路用而已。

當然chiah-ê眾祭司lóng真清楚先知哈該問這問題ê意思，因為án-ne in ê回答真清楚，明白表示「無算」。意思是teh指分別為聖ê物件，並無會因為chit-ê物件接觸tio̍h其它ê物件，就連帶ê hō͘ chiah-ê被接觸tio̍h ê物件變kah神聖。

第13節，chia是哈該提問ê第二個問題。Chit-ê問題thang參考民數記第十九章11到13節，表示接觸tio̍h死人ê屍體就會無清氣長到七工之久。然後tī第22節講chit種人若是摸過ê物件mā是無清氣。這主要teh說明如果祭司無小心有觸(tak)tio̍h到無清氣ê物，特別是死去ê屍體，如果無經過潔淨禮儀ê處理過，伊koh接觸tio̍h其它ê物件，就會mā連帶ê hō͘其它ê物件mā被污染à。Chit種講法是非常符合衛生條件ê。M̄-koh tī摩西時代ê以色列人民kā它特別用來teh獻祭ê禮儀kah祭司人員潔淨ê規律上，就顯得非常有意義。一則，希望chiah-ê祭司lóng會保持潔淨ê身軀，án-ne teh獻祭ê工作上chiah會神聖。二是所有beh獻祭ê物件lóng一定tio̍h是潔淨ê。如果一個祭司ê手不清氣，伊所the̍h ê物件原本若是清氣ê，mā會因為祭司ê手不清氣而被污染à。

Chit種問題是非常清楚ê，所以chiah-ê眾祭司ê回答mā是真清楚，就講「會」。

第14節，先知哈該對chit兩個問題做出ê結論。伊ê結論kah-ná m̄是真清楚，所以Tī聖經學界有無仝ê看法。

一是：當chiah-ê回鄉ê以色列人民想beh建造耶路撒冷聖殿ê時，有撒馬利亞人kah其他已經teh敬拜別ê偶像神明ê人mā表示願意參與建造聖殿，並且願意提供必要ê物件。以斯拉記第四章1到3節就有án-ne記載，講chiah-ê撒馬利亞人去見所羅巴伯和眾族長，表示in beh參加建造聖殿ê工程。M̄-koh卻被所羅巴伯、耶書亞，kah眾族長拒絕，in回答chiah-ê熱心ê撒馬利亞人講：「咱無需要lín ê幫助，來為上主—咱ê上帝建造聖殿。」（參考以斯拉記四：3）先知哈該ê chit段話真可能就是tī講，若hō͘ chiah-ê撒馬利亞人參與建造ê話，會hō͘聖殿被污染。所以拒絕in參與是對ê。Á另外一方面，mā teh提醒in，m̄-thang認為in因為建造聖殿就會比hiah-ê hō͘ in看做無清氣ê撒馬利亞人khah聖潔。In mā bē因為建造聖殿，就成做神聖ê族群，in一定tio̍h家己時時刻刻保持潔淨chiah是正確之道。

二是：當chiah-ê回鄉ê以色列人民決定beh建造聖殿ê時，卻猶原kah撒馬利亞人有往來，甚至向in購買建造聖殿ê用品。Á chiah-ê用品本身可能就是無清氣ê。所以如果使用chiah-ê無清氣ê用品，kan-taⁿ用手接觸就已經是無清氣ê了，chit-má koh用之來建造聖殿ê時，豈m̄是mā hō͘建造起來ê聖殿污穢了mah？

第15到19節，先知哈該ài chiah-ê回鄉ê以色列人民用重建聖殿chìn前ê景象，對照重建聖殿了後發生ê情景。第16到17節就是tī重建聖殿工程chìn前，mā ē-sái講是teh重複描述第一章9到11節所提起過ê經歷，in受tio̍h炕旱ê侵襲，m̄-nā收成無如所期待ê，而且是比所期待得tio̍h ê iáu-beh少。原因是無得tio̍h上帝ê賜福。現tī in tī「九月二十四日」chit工，in動工進行建造聖殿ê工程。先知哈該看做是非常重要ê一工，伊tio̍h用色列人民注意chit一工，因為chit一工kā成做一個重要ê分界嶺；chit一工了後，in teh beh開始有新ê現象出現。因為上帝kā kah in同在。In ê倉庫裡會有重新裝滿豐收得tio̍h ê一切。

第20節，「tī仝一工—九月二十四日」，mā就是重建聖殿ê日子，就tī chit工，上帝ê話koh一pái臨到先知哈該。
第21到22節，上帝ài先知哈該kā祂ê信息傳hō͘ chhōa以色列人民tńg來故鄉ê所羅巴伯，主要ê用意就是beh hō͘所羅巴伯知影，伊kā負起重建聖殿ê責任，並帶領以色列人民恢復昔日上帝kah in同在光輝ê日子。Beh hō͘「猶大省長所羅巴伯」看見上帝怎樣顛覆、摧毀過去欺負in ê人。Chit種信息是真大ê鼓勵，因為以色列人民回鄉ê mā不過只有五、六萬人而已，四面ê仇敵lóng虎視眈眈，連撒馬利亞人lóng會tī in想beh建造聖殿ê時chūn故意來chhōe孔縫，其他ê仇敵必定bē放過侵略in ê機會。所以當先知哈該對in講上帝beh親自為in抵擋仇敵ê時，對in來講確實是一個非常珍貴ê好消息。

第23節，chit節對以色列人民ê領袖所羅巴伯來講感受真無仝款，因為先知哈該講上帝看所羅巴伯是「奴僕」。通常chit-ê詞只用在先知ê身上，除非是真特別如巴比倫帝國ê皇帝尼布甲尼撒hō͘上帝呼召成做上帝ê「奴僕」（參考耶利米書廿五：9）。現tī上帝kā所羅巴伯看做「奴僕」，表示所羅巴伯tī上帝眼中有真無仝款ê身分。Chia《現代中文譯本》用「統治」，tī中文《和合本》用「印」chit-ê字。Chit-ê詞mā出現tī耶利米書第廿二章24節，上帝beh kā戴tī猶大王約雅斤手上ê「印á手指」摘除，這意思就是beh除掉約雅斤國王ê權威。古代社會用「印á手指」表示權威，á是證明身分ê路用。Án-ne，所羅巴伯hō͘上帝揀選成做有權威ê統治者，掌管tńg來國內後ê以色列人民。