重新查詢
經文:

哈巴谷書 1:1-1:17

註釋:

Chit章kah第二章仝款,lóng是先知哈巴谷向上帝提出問題,續落來由上帝回答問題。先知哈巴谷tī chit章裡提出兩個問題,一是上帝為甚麼會允准強暴ê人tī社會中猖獗,hō͘善良ê人民受tio̍h極大ê痛苦?為甚麼上帝會允准pháiⁿ人欺壓義人?二是為甚麼上帝會允准巴比倫欺負以色列人民?m̄-koh上帝並無直接回答先知哈巴谷ê問題,卻是hō͘先知哈巴谷koh khah清楚,敵人巴比倫ê兇殘,對以色列人民確實帶來非常大ê傷害。

    第1節,chia一開始就講哈巴谷是一位「先知」。

    甚麼是「先知」?chit-ê名詞tī《現代中文譯本》後面ê「名詞淺註」中án-ne寫:「是以色列宗教家ê一種,其職份是向人民傳達上帝ê信息á是代上帝發言。先知ê職責無lóng是預言,siōng重要ê事以上帝ê旨意教導當代ê人,hō͘ in歸向上帝。」在列王紀上第廿二章14節,記載先知米該雅所講ê話:「我指永生ê上主chiù-chōa,上主對我講甚麼,我就講甚麼。」這就是所講ê「先知」ê意思。

    「哈巴谷」,chit-ê名tī希伯來文ê字根有「抱」ê意思。如果咱tùi chit本經冊來看,就會看tio̍h先知哈巴谷真正是人如其名仝款,伊擁有一粒憂國憂民ê心,「抱」tio̍h伊ê以色列同胞,希望ē-tàng得tio̍h上帝ê相攬。伊ê信息中一再teh hoah上帝,ài相攬祂揀選ê子民。

    第2節,真清楚chit節講出了kui本哈巴谷書ê中心:期待上帝回應祈禱者ê聲音。先知哈巴谷chìn前向上帝祈禱些甚麼,咱已經m̄知,m̄-koh chia伊teh詢問上帝,iáu koh khah「呼求jōa久」chiah會得tio̍h上帝ê「垂聽」?上帝chiah會救in「脫離強暴」?這表示伊á是講猶大國已經面臨外族侵犯ê苦難。In呼求上帝卻無聽tio̍h上帝ê回應,mā是性命中siōng大ê苦難。

    第3節,chia先知哈巴谷提出了真chē造成性命苦難ê現象,伊講kui個社會充滿tio̍h「毀壞、強暴,四界lóng是phah鬥、冤家」。為甚麼會有chit種現象出現?這真清楚講出當時kui個南國猶大ê社會紀律嚴重敗壞,ná親像先知阿摩司所描述主前第八世紀ê北國以色列仝款亂(參考阿摩司書二:6—8、四:1、五:10—13、六:4—7)。

    第4節,tùi chit句「正義永遠bē-tàng伸張」,就thang看出當時ê社會已經失去上帝ê教示,tùi án-ne chiah會有chiah-ê失去公義,pháiⁿ人欺壓好人ê敗壞風紀之行為出現。

    tī先知哈巴谷ê看法裡,chiah-ê敗壞風紀ê社會行為,上帝一定lóng知影,m̄-koh伊bē明白上帝怎樣會允准chit種事?當弱勢者被欺負ê時,in啼哭ê聲音一定會傳到上帝ê耳中,而上帝怎樣會允准苦難者繼續被欺負?這就是伊tī第2節大聲音對上帝提出ê疑問。

    Tùi第5節到第11節,lóng是上帝回答先知哈巴谷ê詢問。Tī第5到7節ê經文中,上帝講beh「做一件事」,hō͘南國猶大人民聽mā「bē相信」ê行動,kan-taⁿ會「真驚奇」。就是上帝beh hō͘「凶猛、殘暴ê巴比倫人強盛起來」,而且是會「橫跨世界,征服別人ê土地」,in ê行動「目中無人」,chit點真親像先知耶利米ê信息所講ê仝款(參考耶利米書廿五:9)。這真清楚表示:上帝beh興起巴比倫當做懲罰家己子民ê器具,chit點是南國猶大人民聽lóng無法度相信ê事。

    第8到10節,chit段經文thang koh khah清楚看tio̍h巴比倫帝國勢力之強,已經是無任何國家ē-tàng防禦、抵擋。上帝hō͘先知哈巴谷ê啟示中,hō͘伊知影巴比倫帝國會像「豹」、「豺狼」、「la̍h-hio̍h」等動物一般ê凶猛,而且速度之快,hō͘所有ê人來不及「防禦」,而且就算能事先防禦mā「抵擋不住」in ê入侵。巴比倫軍隊tùi phah敗ê國家所俘虜ê人「像砂粒hiah-ni̍h chē」,chiah-ê lóng teh形容巴比倫帝國差不多摧毀、phah敗伊所經過ê國家、族群。

    為甚麼會án-ne?若tùi先知耶利米ê信息就thang看出,是因為南國猶大人民一再悖逆上帝ê話,拒絕聽從上帝差派ê奴僕先知所傳達ê信息所致(參考耶利米書七:13、廿五:3、4、廿六:4、三十五:15、17、四十四:5)。Chiah-ê lóng說明tī猶大人民ê心中根本to̍h無上帝,á是根本就無kā敬拜上帝當做一回事。

    第11節,chia講出了巴比倫帝國有兩種特徵,第一是伊ê勢力真強大,ná親像秋風掃落葉仝款,所經過ê所在lóng勢如破竹一般,會khah緊去得mā快,ná親像第8節所提起ê,像「豹」、「豺狼」、「la̍h-hio̍h」等凶猛動物仝款lóng是用速度快獵殺比in弱小動物出名。第二是巴比倫帝國因為國勢甚強,就bē記得什麼人是性命ê主,而kā家己當做是神明般ê藐視hiah-ê被伊欺負ê族群。後來先知以賽亞就bat預言巴比倫帝國會hō͘上帝所唾棄(參考以賽亞書十四:14—15),並且hō͘伊mā仝款受tio̍h過去伊強盛ê時對待他國ê殘暴手段(參考以賽亞書十四:16—21)。

    上帝án-ne啟示先知哈巴谷,有一個真重要ê用意,beh hō͘伊知影:上帝ē-tàng興起敵人來懲罰以色列人,m̄-koh並無表示hō͘上帝揀選ê奴僕就ē-tàng想beh án怎to̍h án怎,而是beh遵從上帝ê旨意做tāi-chì。巴比倫帝國雖然hō͘上帝揀選,它卻無遵行上帝ê旨意,而且koh khah嚴重ê是iáu kā家己當做神明一般beh kah上帝對抗。因為án-ne,上帝最後á是kā巴比倫帝國kā它摧毀ā。

    第12節,chit節開始是先知哈巴谷koh一pái回應上帝ê話。
    伊先講述上帝創造ê偉大,祂chiah是性命ê主,是保護者。類似chit種o-ló、歌頌上帝ê詞句mā不時出現tī聖經中(參考詩篇三十一:14、六十三:1、九十:2、九十一:2、一一八:28、一四○:6、一四三:10,以賽亞書廿五:1)。

    Koh講,先知哈巴谷並無反對上帝興起巴比倫帝國來懲罰家己ê同胞,這真親像先知耶利米仝款,認為巴比倫帝國ê興起,是因為上帝ê旨意,重新揀選巴比倫帝國ê皇帝尼布甲尼撒王作為祂ê「奴僕」(參考耶利米書廿五:9)。

    第13節,是先知哈巴谷提出ê疑問。伊認為即使是興起巴比倫帝國,mā無法度hō͘伊lóng無節制地kā好人kah pháiⁿ人同齊綁做伙。先知哈巴谷問上帝,如果上帝真正公義,怎樣ē-tàng允准無公義ê事發生?如果上帝興起巴比倫帝國來懲罰以色列人,是因為以色列人行無公義ê事。Án-ne,現在巴比倫人比以色列人iáu koh khah無公義,上帝又ài怎樣講?伊beh問上帝既然知影巴比倫帝國會「毀滅比家己公正ê人ê時」,上帝怎樣thang kah-ná lóng m̄知道仝款,若無「為甚麼不講話neh」?

    第14到15節,先知哈巴谷用「海裡ê魚」kah地上ê「爬蟲」來形容猶大ê人民,ná親像一陣無目標mā無人帶領而任人宰割ê族群。認為巴比倫人用殘酷ê刑具「鈎子」、「網」來對待in,in痛苦,m̄-koh巴比倫人卻teh「歡呼」。

    第16節,chit節thang參考耶利米書第十六章18節,先知耶利米就bat傳出上帝beh懲罰巴比倫帝國ê原因之一,就是in認為家己ê武力真強,是因為有強大ê武器裝備,甚至kā chiah-ê武器裝備當做神明一般ê kā它膜拜。現在chia mā是án-ne,先知哈巴谷向上帝控訴巴比倫人並無因為上帝揀選in當奴僕來懲罰猶大人民而敬拜上帝,反卻是kā in用來迫害猶大人民ê殘酷工具—漁網,當做神明teh膜拜。

   Láu有另外一種講法,是chia講「向網獻祭」,chit句話mā thang解釋巴比倫人kā掠到ê俘虜,當做牲禮仝款,獻tī祭壇起來酬謝in ê神明。Á in ê神明可能就是in ê皇帝,á是其他偶像神明。

    第17節,先知哈巴谷問上帝:是m̄是beh繼續hō͘猶大人民受tio̍h án-ne殘酷ê對待?伊講「使用刀劍」,指ê是ná親像討海人用刀á teh宰殺魚á仝款,一屑á都留情。

經文:

哈巴谷書 2:1-2:20

註釋:

Tī第一章記載先知哈巴谷一再地問上帝為甚麼都無回答伊祈禱ê聲音。伊ê問題是向上帝祈禱控訴hiah-ê tī國內欺負善良人民ê惡人,伊kā上帝講講chiah-ê人一再「毀壞、強暴、四界lóng是phah鬥、冤家」,連律法lóng the̍h chiah-ê惡徒無辦法(參考一:3—4)。先知哈巴谷án-ne祈禱ê主要目的,當然是希望上帝會趕緊出手好好á懲罰chiah-ê邪惡ê人,thang hō͘猶大王國ê社會ē-tàng看tio̍h正義、秩序、良知。Mā ǹg望因為án-ne看tio̍h國家、社會生存ê ǹg望。

M̄-koh先知哈巴谷失望了;伊失望,因為上帝真慢chiah回應伊ê祈禱,而koh khah hō͘伊失望ê,是上帝回應ê內容竟然m̄是伸手打擊á是懲罰hiah-ê為非作pháiⁿ ê惡人,反tńg是beh差遣猶大國ê仇敵—巴比倫帝國,作為祂ê奴僕,來懲罰猶大kah人民。而且koh khah hō͘先知哈巴谷受不了ê是,若巴比倫帝國來是懲罰以色列人中hiah-ê做邪惡ê tāi-chì ê人,ná佳哉。M̄是,巴比倫帝國來到in中間,竟然是對kui個國家、社會,mā就是講,無論好人á是pháiⁿ人,lóng一併迫害、欺負。先知哈巴谷問上帝講怎樣會是án-ne?是m̄是上帝太聖潔了,因為án-ne「絕對m̄看罪惡」?最後,伊真艱苦心問上帝,是m̄是beh hō͘巴比倫帝國ê軍隊繼續用殘酷ê手段對待以色列人,伊問上帝講:「伊kám thang piàⁿ 空伊ê 網,恬恬刣死列國ê 人mā 無保惜??(全民版)」(一:17)

這第二章thang分做兩個部分,第一是tùi第1到4節,先知哈巴谷表示一定會等到上帝回答伊祈禱ê聲音,結果上帝有回應,而且ài伊kā所聽tio̍h ê寫落來。第二部分是tùi第5到20節,是上帝回應ê內容,真清楚講出上帝會懲罰巴比倫帝國,因為in做無應該做ê事。作為上帝揀選ê奴僕應該就是án-ne,m̄-nā是beh傳出chit種信息,mā是beh hō͘ hiah-ê受困ê人、有殘缺ê人、被冤屈ê人ē-tàng得tio̍h氣力、補足、伸冤ê機會,卻m̄是加重chiah-ê原本已經受苦ê人陷入koh khah大ê苦難,chit點是一定tio̍h清楚ê。

第1節,chia提起「瞭望臺」並m̄是實在ê一個瞭望臺,卻是象徵性ê講法,因為先知ê另外一個象徵身分,就是khiā tī瞭望臺上ê守望者,伊ê責任就是beh kā所看tio̍h ê景況忠實地傳達出來。現tī先知哈巴谷講beh上守望ê「瞭望臺」去看māi上帝beh伊「講甚麼」,看上帝beh「怎樣回答」伊所提出ê問題。

第2節,現在上帝開始回答伊ê問題。事(tāi)先是beh先知哈巴谷kā聽tio̍h ê信息「清楚寫tī板上」。而且是清楚寫落來,好「hō͘人一看就讀得出來」。

第3節,chit節上帝預告祂teh beh ài beh進行ê計畫,m̄-koh無提供確實ê時間,只要先知哈巴谷「等tio̍h」,而且真清楚kā伊講,「tāi-chì一定發生,而且bē耽延」,因為「時chūn就beh到à」。

第4節,「義人會因為忠信而得性命」chit句話非常重要,使徒保羅bat引用chit節經文,m̄-nā tī伊寫hō͘羅馬教會ê書信中,mā tī伊寫hō͘加拉太教會ê書信中mā引用chit節經文(參考羅馬書一:17,加拉太書三:11)。M̄-nā án-ne,連希伯來書ê作者mā引用chit節經文(參考希伯來書十:38)。

上帝hō͘先知哈巴谷ê信息就是「忠信」,這mā是kui本聖經重要信息之一。所講「忠信」,指ê是beh對上帝存忠實ê信心,m̄-thang有懷疑。
另外一方面,chit節mā提起另外一個重要信息,就是「邪惡ê人bē-tàng活teh」。所講「邪惡ê人」,意思就是對上帝無忠實,無kā上帝當做性命ê主宰者,á是去拜偶像神明者。Ná親像頭前已經講過,巴比倫帝國ê毀滅是它ê皇帝kā家己當做神明,想beh kah上帝比高低(參考以賽亞書十四:14—15)。Á tī巴比倫帝國chìn前ê亞述帝國皇帝mā仝款有chit種問題(參考列王記下十八:35),上帝絕對bē允准chit種國王á是領導者存在。

第5節,tùi chit節開始直到第20節止,先知哈巴谷傳出ê信中,有五個災禍,作者tī chia lóng用「受災了」來形容,包括tī第6節、第9節、第12節、第15節、第19節等等。

第5節,上帝ê話真清楚告地訴先知哈巴谷,人siōng大ê問題就是貪婪。使徒保羅講貪婪就是拜偶像(參考以弗所書五:5,歌羅西書三:5)。伊mā講貪財是萬惡之源(參考提摩太前書六:10)。

第6節,chia第一pái提起「有災禍à」,指ê是巴比倫是一個貪婪ê國家。因為第5節講tio̍h貪婪者征服了真chē國家,並且kā別人ê物件獨占。M̄-nā án-ne,而且視像第5節所講ê,「征服了一個koh一個國家」,卻iáu bē滿足。

第7到8節,chit兩節已經講出了哈巴谷書siōng中心ê思想:貪婪ê行為kā會kah報復ê懲罰連結做伙。人用甚麼方式貪取得tio̍h ê財富,mā會仝款ê方式hō͘人用來對付伊。

注意tùi第7節開始,是用第二人稱ê「你」來講述chit-ê宰壓別人ê對象。顯然先知哈巴谷已經得tio̍h上帝清楚ê指示,ài伊傳話hō͘當時ê統治者巴比倫帝國,hō͘該國統治者知影in所做ê惡質行為,m̄-nā bē koh再hông稱做上帝ê奴僕,反tńg會hō͘ in成做上帝忿怒、而且beh直接懲罰ê對象。因為án-ne,用「你」來表示。

第9節,這是第二pái講「受災了」。Chia繼續談起無妥當得tio̍h ê財富,tī chia特別指出是tùi搶劫得來ê,這是上帝所不允准ê行為。雖然因搶劫而擁有真chē財富,m̄-koh卻驚惶、心內不安,因為án-ne,會kā家己ê厝建造tī高高ê堡壘上,並且有森嚴ê警衛保護tio̍h,chiah-ê人認為án-ne會真安全。

第10節,講上帝認為chit種想法是真愚戇ê,因為上帝若是beh懲罰,任你怎樣躲避、警戒森嚴lóng是無用ê。Chia提起有真chē國家會倒拋,即使有真嚴密ê戒備mā是無用,kan-taⁿ會增加侮辱家己ê機會而已。

第11節,chit節指出chiah-ê tùi搶奪tio̍h來ê財富,用來建造美麗堂皇ê厝,結果tī上帝審判ê日子來到ê時,chiah-ê富麗堂皇ê厝,就會倒落來而且壓tī chiah-ê厝內享福ê人ê身上。Chia用「牆上ê石頭」kah「棟梁」chit兩個名詞,lóng是建造堅固、美麗厝必要ê建材。無論chiah-ê建材jōa好,á是會hō͘上帝摧毀,而且是成做懲罰ê刑具。

    第12到13節,這是第三pái提起「受災了」。Chia提起「凶刣立邑」,意思用人ê血建造起來ê城市。表示tī攻進一個城市ê時,大屠殺hit-ê城ê居民,然後kā之佔領獨占。Chia所用ê「血」字,是用複數名詞,因為án-ne,thang講是大屠殺ê意思,á是刣死無thang數計ê人ê性命。M̄-koh即使án-ne mā bē安寧,因為上帝beh hō͘ chiah-ê lóng ná親像被大火吞食一般,最後lóng會「付之一炬」,消失殆盡。

    第14節,chit節是引用以賽亞書第十一章9節ê詩歌。主要teh說明上帝是公義ê神,伊毀滅邪惡者以殘酷手段建立起來ê血腥城市,來彰顯祂ê榮耀。

第15到17節,這是第四pái提起「受災了」。Chia提起巴比倫人怎樣侮辱、戲謔hō͘伊統治之下ê人民(參考詩篇一三七:1—3)。M̄-koh仝款ê情形mā會倒拋tńg來到巴比倫人ê身上,包括ná親像剉黎巴嫩山林ê樹木,現在m̄-nā chiah-ê剉者會hō͘ phut倒,連hiah-ê原本被嚇(heⁿh)驚而逃走ê動物,mā lóng會成做tńg來嚇pháiⁿ chiah-ê bat欺負in ê人。

    第18節,chit節講出真正ê問題,m̄-nā是tī猶大人民身上,mā tī巴比倫人身上,lóng是一陣拜偶像ê人民,當tāi-chì發生ê時,想beh chhōe神明庇護,結果lóng是空忙一場,因為虛假ê神明是「連話lóng bē講」,koh kā怎樣回應拜伊ê人民ê祈求?不可能。

第19節,這是第五個「會受災」à。Chit節講出哈巴谷書信息ê中心之一,就是拜偶像神明ê結果,就是甚麼都無,甚至會失落所有ê一切。雖然chiah-ê偶像神明是用「金銀包糊tī」,he是無性命ê物件。

第20節,chit節tú好講出耶和華上帝kah chiah-ê虛假ê神明成一個鮮豔ê對比;前述ê假神,是無性命ê,即使人用盡siōng好ê方式拜它,mā是bē回答任何問題。M̄-koh tī聖殿中ê耶和華上m̄是án-ne,祂是一個有尊嚴ê上帝,因為án-ne,敬拜者lóng一定tio̍h用肅靜、頂真ê態度,因為真正神是bē-tàng侮謾、褻瀆ê。

經文:

哈巴谷書 3:1-3:19

註釋:

先知哈巴谷ê時代可能就是tī猶大王約雅敬ê時期(主前609~598年),hit時chūn ê南國猶大已經是搖搖beh墜、國勢非常危險,真chē人想辦法beh離開伊去,koh khah chē人則荒淫過日,根本就m̄知國家破碎、社會瓦解ê危險。Kui工所想ê就是án怎圖謀koh khah chē ê財富,以及sńg弄權術滿足家己ê私慾。這mā是為甚麼先知哈巴谷看了後,甚感痛心而向上帝祈禱控訴ê原因(參考一:3—4)。

不時會聽tio̍h一種講法,就是司法乃是維護一個社會正義最後ê防線。M̄-koh tī一個混亂不安ê社會,司法往往成做犯罪得幫凶,這mā是主前第八世紀ê先知阿摩司提出ê控訴內容之一,講tī伊hit-ê時代,司法已經無法度替人民伸張正義了(參考阿摩司書五:10、12—13、15),可惜ê是先知阿摩司ê呼聲並無得tio̍h當代人ê重視,甚至iáu有伯特利大祭司亞瑪謝警告伊、驅趕伊,ài伊離開tńg去厝裡(參考阿摩司書七:10—11)。M̄-koh真正ê問題並m̄是先知阿摩司講出危言聳聽ê話,伊是傳出上帝真實ê信息,m̄-koh人民並無接受,甚至拒絕伊ê勸勉。結果,北國以色列就tī主前721年被亞述帝國滅亡à。

	司法,是維護社會秩序ê氣力。M̄-koh執法者若是無信仰ê良知,就真容易陷入知法犯法ê危險中。先知哈巴谷ê時代mā像先知阿摩司時代所發生ê類似司法官貪污ê問題出現。這就是tī本冊第一章4節伊所講ê:「律法無力量,無作用;正義永遠bē-tàng伸張。Pháiⁿ人欺壓義人,正義被歪曲à。」先知哈巴谷只好走chhōe上帝ê協助,伊kā chiah-ê不應該發生ê事全盤向上帝控訴。	

	第三章標題上寫「哈巴谷ê祈禱」,其實只有第2節chiah是伊ê祈禱詞,其它ê應該是先知哈巴谷tùi歷史ê回顧提出ê勸勉,mā thang講是先知哈巴谷ê信仰告白,伊kā家己所認bat歷史中ê上帝見證出來。

	第1到2節,「祈禱」,這是kah上帝對話。一個人beh kah上帝保持美好ê關係,siōng好ê方式就是祈禱。心中有上帝ê人,一定會祈禱。拒絕祈禱,á是無祈禱ê人,不可能kah上帝維持良好ê互動關係。向上帝祈禱,siōng基本ê要件,就是tùi誠實開始。

	先知哈巴谷講「聽見」上帝ê「作為,心中就充滿敬畏」,這是伊tùi回顧歷史腳跡,發見上帝tī以色列民族ê歷史上行了真chē偉大神跡奇事,mā因為án-ne,伊chiah會講心中充滿tio̍h敬畏。這偉大神跡就是帶領in祖先行出埃及過紅海,進入曠野漂流,然後到應允之地迦南。因為án-ne,伊祈求上帝koh一pái「重新」顯示chit種大能,並tī忿怒ê中間顯示出上帝ê「憐憫」。因為伊相信,只要上帝koh一pái顯現過去發生tī in祖先中ê神奇作為,猶
大人民看tio̍h一定會悔改,án-ne就ē-tàng得tio̍h上帝ê憐憫kah赦免。

	第3到4節,thang參考申命記第三十三章2節。

    「以東」、「巴蘭山」,chiah-ê lóng tī說明上帝出現ê所在。上帝出現ê時特有ê現象,就是有極大ê「榮耀」出現,hō͘人無法度正面去看。另外chit種「榮耀」mā teh表示強烈ê亮光,帶hō͘ kui片大地lóng充滿tio̍h性命ê活力。

    另外一方面,chia teh講上帝ê榮耀ê時,mā有另外一個意思,是teh表明上帝kah以色列人民訂立永遠ê「約」。聖經ê作者teh強調上帝kah人立約ê時,是用祂ê榮耀來立約。因為án-ne,kah上帝立約就是一種極大ê榮耀。

	第5節,chit節teh述說以色列人民進入曠野了後,因為悖逆上帝ê旨意遇tio̍h ê災難,包括有因為「瘟疫」帶來ê大量「死亡」。

	第6節,chit節所描述ê內容tú好說明上帝出現ê時,kui個大地反應ê態度。Tī出埃及記第十九章16到22節記載上帝出現tī以色列人民面前ê時ê景況,是「雷電交加,一朵密雲tī山頂出現,號角聲大tân」。作者講上帝用「雷」響聲音回答摩西所講ê話。莫怪以色列「全體人民猛烈phi̍h-phi̍h-chhoah」,因為會驚惶。先知哈巴谷tī chia強調,即使是tī人看起來是永遠存在ê山丘高嶺,只要上帝命令一出,山丘馬上就會倒落來。換句話講,除了上帝以外,無任何受造物thang「永恆」存在tio̍h。

	第7節ê「古珊」kah「米甸」,這是teh指Tī曠野中兩支非常凶悍ê遊牧民族,m̄-koh無論in jōa-ni̍h-á強猛,若是連高山峻嶺聽tio̍h上帝ê聲音mā會崩塌,hit人koh算甚麼?m̄-nā會驚惶,koh khah是一聽tio̍h上帝來到就全身pi̍h-pi̍h-chhoah。因為上帝來到,就是beh審判、懲罰。

第8節,chit節開始提起河流kah海洋有異樣,現在看tio̍h河川海洋會造成大災難,in認為必定是因為上帝發出受氣ê緣故。

Koh講,當上帝帶領以色列人出埃及時,就是用雲柱帶領以色列人(參考出埃及記十三:21、十四:19—20),保護tio̍h in。Koh khah奇妙ê是,上帝透過雲柱遮tòa埃及精銳部隊ê目睭,hō͘ in根本看bē清楚紅海海水分開ê實況,致使部隊進入海中ê時chūn,發生混亂,結果hō͘埃及精銳部隊全軍覆無(參考出埃及記十四:24—25、28),這就是此節經文所講ê,上帝hō͘祂ê子民tī戰爭中獲勝。

第9節,「hō͘河流裂開大地」,chit句話beh tùi上帝ê創造來看,tī創世記第一章就記載上帝用水分開大地kah海洋。仝款ê,tī以色列人ê眼中,只有上帝chiah有chit種能力,hō͘河流穿過大地,而且河流之深,非人ê能力所ē-tàng挖掘出來。其實,chit句話mā teh說明當埃及人teh敬拜尼羅河神ê時chūn,in卻m̄知河流就是tùi上帝來ê創造。

第10節,chit節thang參考創世記第七章11到12節,上帝用大水淹滅大地所有ê一切。作者就是用上帝hō͘「地下深淵ê泉源lóng裂開,開天窗,天空所有ê水閘mā lóng phah開,傾盆大雨下了四十暝日」之久。

第11節,thang參考約書亞記第十章十二到十四節ê記載,約書亞帶領以色列人攻打亞摩利人獲勝了後,伊帶領以色列人向上帝獻上感謝ê祈禱中,就有祈禱上帝hō͘日頭停落來tī空中bē振動。當日頭停落來,月娘mā就跟tòe停落來。

第12到15節,tùi chit段詩歌thang看見先知哈巴谷想beh tùi歷史ê脈絡來說明,只要óa靠上帝ê手帶領、扶持,無論是甚麼強猛ê軍隊lóng無法度動。Chit段詩歌mā說明了上帝án怎帶領祂ê子民行出敵人侵犯ê危險。Chit段經文m̄-nā跨越了出埃及ê事件,而且是tī耶路撒冷被包圍ê時chūn,上帝ê手扶持了以色列人民,hō͘敵人因為án-ne受傷而退(參考列王記下十九:32—37)。

先知耶利米ê信息中就真清楚指出,上帝beh差遣使者phah敗強大ê巴比倫帝國,hō͘ in ê君王kah軍隊lóng無thang逃避,無論in建造ê堡壘jōa-ni̍h-á堅固,上帝一定會kā它摧毀,因為巴比倫帝國ê皇帝m̄-nā侮辱上帝ê子民,mā同時褻瀆了上帝ê神聖(參考耶利米書五十一:52—58)。

    第16節,為甚麼人聽見上帝ê聲音就會pi̍h-pi̍h-chhoah?因為一聽tio̍h上帝來臨ê聲音,就知影上帝ê審判已經來到,kui個人就倒ti7土腳à。就ná同在第三章2節所提起ê,一聽tio̍h上帝所行ê各種神跡奇事,就會生出敬畏ê心仝款,知影ná絕對m̄是隨便thang輕忽ê大事。仝款ê,聽tio̍h上帝來臨,mā期待祂ê拯救趕緊來到。以賽亞書第廿一章3到4節講先知以賽亞講上帝懲罰巴比倫帝國ê時,會像「旋風颳過沙漠,災難beh tùi恐怖ê所在來到」,當伊看見chit-ê連串慘酷ê景象」來臨ê時,心中開始有驚惶kah痛苦,伊講chit種痛苦ná親像一個臨盆ê產婦仝款。

	第17到18節,chit兩節ē-sái講是先知哈巴谷書siōng精華ê經文。

	葡萄樹、無花果樹、田地、羊群、牛群等,chiah-ê lóng是當時以色列人民siōng重要ê經濟動力。如果因為發生災難而失去所有ê chiah-ê物件,是m̄是iáu koh khah相信上帝?是m̄是iáu koh khah對上帝忠實?先知哈巴谷ê答案真清楚,he是肯定ê,而且是非常堅定。

第19節,上帝就是力量ê賞賜者。Á是講上帝乃是性命ê泉源,這ē-sái講是kui本聖經siōng重要ê信息。因為án-ne,tio̍h óa靠ê是上帝,卻m̄是因為有軍事武力ê關係,這mā是詩篇第三十三篇、第四十六篇ê作者所提供ê信息。

「像母鹿仝款腳步穩健」,「tī高山頂安穩行走」,chiah-ê lóng tī說明有上帝ê帶領之下,即使是經過崎嶇ê性命旅途,mā m̄免喪志餒志,因為上帝就是siōng好ê帶領者、保守者。「母鹿」,teh表示性命ê韌性,堅忍ê性命力tùi牠身上thang看出來。

重新查詢