以斯拉記 1:1-1:11

註釋:

歷代志下第三十六章22到23節有記載，波斯皇帝塞魯士命令，beh hō͘以色列人民tńg來到耶路撒冷去，伊並且beh為以色列人民建造一座殿宇。Á以斯拉記第一章開始就寫tio̍h：「當波斯王古列元年，因為beh 應驗上主託耶利米所講ê 話，上主就激動波斯王古列 ê 心，hō͘ 伊宣布 tī 全國。(全民版)」án-ne看起來，以斯拉記thang講是歷代志經冊ê續篇，是記載有關以色列人民回鄉，以及in重新tńg來到以耶路撒冷為宗教信仰中心，kah in ê信仰生活之情形。

重新tńg去故鄉巴勒斯坦了後，in kā它改稱做「猶大」，並m̄是只有猶大支族ê人，卻是全體以色列民族。M̄-koh因為早tī主前721年，北國以色列被亞述帝國消滅，北部支族ê以色列人民大多數受賣到各地去做奴隸，人口大量減少。Á南國猶大是tī主前586年被巴比倫帝國hō͘消滅，m̄-koh南國ê以色列人民是hông集體掠到巴比倫去做奴隸，in是生活tī類似集中營ê迦巴魯河邊地區（參考以西結書一：1）。因為án-ne，當ē-tàng tńg去故鄉ê時，絕大多數ê人lóng是猶大支族，其他支族ê人已經是零零san-san無chē。因為án-ne，tùi巴比倫tńg去故鄉ê人，後來就lóng hông稱做猶大人á是猶太人）。

第1節，chit節講「波斯皇帝塞魯士登基ê第一年」，就是tī主前538年，mā就是伊ê軍隊tī主前539年10月攻落巴比倫後，取代巴比倫統治巴勒斯坦。Án-ne，亞述帝國之內mā有bē少以色列人民當年被俘擄後，就khiā起tī亞述統治區之內，taⁿ mā lóng tī巴比倫帝國統治之下。

塞魯士皇帝統治波斯ê時間是主前559到530年，mā是創立波斯王朝ê第一位皇帝。伊ē-sái講是以色列民族被外族統治ê時代，siōng好款待以色列民族ê統治者。Mā因為án-ne，連先知以賽亞lóng稱伊為上帝ê奴僕，beh替上帝「牧養」子民，並且「執行旨意」（參考以賽亞書四十四：28），甚至認為塞魯士就是上帝所膏立ê君王（參考以賽亞書四十五：1）。伊ê出現，早tī先知耶利米ê預言中，講以色列民族kā tī巴比倫經過「七十年」ê奴隸生活，然後上帝會消滅巴比倫chit-ê國家（參考耶利米書廿五：12—14）。Tùi chit章mā thang看出，kui個歷史改變ê背後，lóng有上帝ê手teh主導tio̍h。祂帶領順服祂旨意ê子民行過siōng艱辛ê路途，同時，mā懲罰hiah-ê棄sak祂ê子民。

第2到4節，chit段經文是有關波斯皇帝所下ê詔書ê內容，kah第六章2到5節所記載ê無仝。其實這是兩種無仝ê文字；前者是用以色列人民被俘虜到巴比倫時代所用ê希伯來文寫ê，後者是用in ê母語亞蘭文寫做ê，而且留落來存為官方檔案資料ê路用。主要內容是關係重建耶路撒冷聖殿，hō͘伊成做敬拜ê所在。

    Tī chit份詔書中，siōng特別ê所在是塞魯士皇帝mā承認耶和華上帝是伊ê上帝，對伊啟示應該做ê事，就是beh差遣塞魯士皇帝幫助以色列人民tńg去故鄉，重建荒廢ê家園，並且重建敬拜上帝ê聖殿。Koh講，chit份詔書mā提起ài波斯ê子民：「如果tī流亡ê子民中，有需要幫助chiah ē-tàng tńg去ê，厝邊會幫助in，hō͘ in金銀、物件、cheng-seⁿ，mā tio̍h為耶路撒冷ê上帝聖殿獻上自願祭。」這ná親像當年摩西帶領以色列人民tio̍h離開埃及ê時，摩西tio̍h以色列人民「向埃及人索取金銀首飾kah衫褲」，用chit種方式「以色列人帶走了埃及人ê財富」（參考出埃及記十二：35—36）。這表明一個真重要ê隱喻：以色列人民m̄是奴隸。因為奴隸無法度帶走任何物件。In是有尊嚴ê族群，因為án-ne，離開ê時是富足ê，m̄是空手tńg去。	

第5到6節，講tio̍h m̄-nā皇帝塞魯士好款待in，因為án-ne，伊ê波斯人民mā聽從皇帝塞魯士ê命令，好款待以色列人民，紛紛the̍h「值錢ê禮物hō͘ in，另外iáu有自願為聖殿奉獻ê禮物」。

不過，tī祖先出埃及ê時，in是用「索取」ê方式，mā就是講因為有大災難發生tī埃及，埃及人並m̄是心甘情願地主動the̍h出來hō͘ in。會án-ne hō͘以色列人民，為tio̍h是beh ài in趕緊離開埃及，免得繼續帶來災禍。M̄-koh chit-má ê波斯人是自願地幫助出錢、出力幫助in重回家鄉。第5節chia特別提起猶大kah便雅憫ê族長，是因為chit兩個支族是南國猶大ê人民。可能北方ê以色列人民已經hō͘ in寄居地ê人同化得真嚴重，因為án-ne，談論「以色列」chit-ê名詞kah-ná有jú來jú遙遠ê感覺。另外一方面，猶大乃是以色列十二支族中siōng大族，人口siōng chē，而且早已經kā西緬支族ê人併入其中，而且集體被巴比倫掠去khiā起tī集中營區中，因為án-ne，當波斯取代巴比倫ê時，就直接以「猶大」teh代表全部以色列民族。

「祭司kah利未人」，in就是專門teh負責耶路撒冷聖殿祭祀禮儀工作ê宗教師。chit-má波斯皇帝塞魯士講beh幫助in回鄉重建耶路撒冷聖殿，因為án-ne，in mā tī第一批回鄉浪潮中，而這第一批ê行動，真可能就是tī主前537年7月開始（參考三：1）。

第7到8節，chit兩節thang參考列王記下第廿四章13節、第廿五章13到17節、以及歷代志下第三十六章10節、第三十六章18節等等經文lóng有記載講，巴比倫軍隊攻入耶路撒冷ê時，洗劫了聖殿真chē貴重ê器具。In帶走chiah-ê聖殿器物，主要就是帶tńg來khǹg tī巴比倫人ê神廟中，供俸hō͘ in所崇拜ê神明，表示in ê神phah敗以色列人民ê上帝ê意思。M̄-koh chit-má，波斯皇帝塞魯士消滅巴比倫帝國了後，決定釋放以色列人民回鄉tńg去重建家園kah聖殿，伊就kā chiah-ê擄自耶路撒冷聖殿ê貴重器物，全部lóng the̍h hō͘ chiah-ê準備回鄉tńg去ê猶大人民。為tio̍h beh表示真誠心意，塞魯士iáu特別派皇家財政大臣米提利達，由伊親自kā所有ê聖殿物件lóng點交hō͘「猶大省長設巴薩」帶tńg來到耶路撒冷。「設巴薩」chit-ê名是波斯名，是塞魯士皇帝所任命ê猶大省省長（參考五：14）。

第9到11節，這是一份簡單ê清單，說明所有聖殿貴重ê器物共計有「五千四百件」，設巴薩kā chiah-ê器皿lóng帶tńg來到耶路撒冷。

以斯拉記 2:1-2:70

註釋:

Chit章主要是記錄tùi巴比倫tńg去故鄉耶路撒冷kah猶大ê宗族名單總人數，這第一批人數共計有四萬二千三百六十名。另外iáu有男女奴僕是七千三百三十七名，以及男女歌手二百名。Tī尼希米記第七章mā有一份仝款ê名單。不過兩份名單中ê領袖人物無仝；tī以斯拉記只記載十一名，尼希米記則記載十二名，有意表明he是「十二支派」ê意思。Koh講，chit份名單所提供ê人數mā kah尼希米記第七章所提供ê數目無仝。

第1到2節，tùi chia看tio̍h真chē人tùi開始就準備回鄉。Chia mā提供了所羅巴伯等十一位領袖人物ê名單。若是對照尼希米記第七章7節ê名單，mā á是發見有差別，而且尼希米記提供ê名單是十二名，多了一位「拿哈瑪尼」，其他人名ê差別，真可能是kah拼音ê方式有關。

第3到20節，chit份名單主要是用家族單位記錄落來參與回鄉行列ê人數。

第21到35節，chit份名單是用祖籍，mā就是khiā起ê城市當做登錄基準。

第36到54節，chit段真重要，說明回鄉行列中，有一陣人是專為tio̍h重建聖殿而加入。In是祭司kah利未族人，以及聖殿ê工別人族。Thang án-ne瞭解：kui個亡國事件所beh說明ê意義是棄sak上帝所帶來ê結果。因為án-ne，回鄉siōng重要ê工作之一，就是beh重建信仰。Á tī in看起來，重建信仰ê第一步就是重建耶路撒冷聖殿，hō͘伊成做敬拜ê中心。希望透過聖殿，koh一pái連結以色列民族，並且tńg來到上帝ê面前。

第55到58節，chia特別提起「所羅門奴僕」ê宗族，以及「聖殿工人」ê後代，kā chit兩族群連結做伙，原因是當以色列人民進入迦南地了後，無消滅ê迦南人。Chiah-ê人包括有亞摩利人、赫人、比利洗人、希未人，kah耶布斯人等，所羅門kā in徵召當勞工，參與建造耶路撒冷聖殿ê工作（參考列王記上九：20-21）。Chiah-ê人真可能lóng是懷有特別ê技能。人數有「三百九十二人」。

第59到60節，有趣味ê是tī chia有一陣人，in是「無法度證明家己是以色列人ê後代」。M̄-koh卻參與猶大人民回鄉ê行列，這真親像當年出埃及ê時，mā有一陣外族人kah以色列人民同行（參考出埃及記十二：38）。Á chit-má chiah-ê人共計有「六百五十二名」。

第61到63節，chit段經文是講tio̍h有關一kóa chhōe bē-tio̍h族譜來證明in是屬tī祭司家族ê人，in是哈巴雅、哈哥斯、巴西萊等。因為án-ne，無法度參與祭司ê工作。因為摩西律法有真嚴格規定，「若m̄是亞倫ê後代絕對bē-tàng到祭壇向上主燒香」（參考民數記十六：40）。因為tī摩西時代，bat發生過「可拉事件」。等到祭司透過「烏陵kah土明」來證明in確實ē-tàng參與祭司ê行列chiah thang。

第64到67節，chit段經文除了提供總人數外，mā提供了運輸用ê動物，包括馬、騾、駱駝，kah驢á等。Chit對回鄉交通有真大ê幫助。

第68到69節，chia真清楚說明in tńg到了故鄉耶路撒冷，而且到已經被燒毀ê聖殿舊址，必定是看見變成廢墟ê聖殿，beh tī hit-ê荒廢ê土地頂面重建聖殿，帶有非常特別ê性命意義。因為án-ne，真chē族長lóng紛紛獻上「自願祭」ê禮物，回鄉ê民眾mā熱烈參與捐獻，共計有chē kah「金子五百公斤，銀á兩千八百公斤，iáu有一百件hō͘祭司ê禮服」等。Tùi chia mā thang看tio̍h chit群回鄉ê猶太人並m̄是sàn-chhiah者，應該thang講是經濟富裕ê人。因為án-ne，chiah會有第65節所提起ê「男女奴僕」chē kah「七千三百三十七名」，佔kui個回鄉人數ê「四萬二千三百六十名」是六比一，應該是真koân ê比例。

第70節，chit節mā大略說明回鄉後，chiah-ê無仝家族kah族群，就各自tńg去家己ê故鄉、城鎮。Á祭司kah利未人，mā有一部ê人是tòa tī耶路撒冷。

以斯拉記 3:1-3:13

註釋:

Chit章主要teh說明tńg去故鄉耶路撒冷ê猶大人民，in怎樣重新開始敬拜ê禮儀。無聖殿ê日子，in先tùi起造祭壇開始，mā就是先tī一個簡單ê所在開始敬拜上主，m̄-koh一切獻祭禮儀lóng遵照摩西律法ê指示。

第1到2節，「七月」，這是teh指主前537年，mā就是in回鄉ê hit年。In已經回鄉，而且已tī家己ê家鄉安頓了後，就「同心一意」去耶路撒冷聚集，為tio̍h是beh討論有關重建聖殿ê事。當in聚集後，就tī耶書亞、所羅巴伯等領袖ê帶領下，決定先起造祭壇敬拜上帝。

第3節，這是比較困擾ê問題，m̄知為甚麼in會「驚惶當地ê居民」？所謂當地ê居民，就是hiah-ê原住民，mā就是早to̍h tī in chìn前就khiā起tī迦南地ê人，in後來因為以色列人民攻入，並且佔領迦南地，而成做奴隸，á是hō͘ in變成「順民」。M̄-koh因為巴比倫帝國ê侵入，hō͘ in成做被「解放ê子民」。Taⁿ看tio̍h in tńg去，是m̄是對in抱tio̍h報復之心？有可能是in過去無好款待原住民，chit-má家己mā成做波斯統治下ê「順民」，地位仝款，驚惶就koh khah明顯。因為長到半世紀，in ê身分是hō͘巴比倫俘虜ê奴隸，地位顯然比chiah-ê無被俘虜ê原住民低。另外一點，chiah-ê人mā可能m̄是迦南地ê原住民，卻是被亞述帝國á是巴比倫帝國tùi外地引入來，beh kah以色列民族「通婚」ê族群，想beh藉這消滅以色列民族家己認為是「聖潔子民」ê優越感（參考十：2—4）。

第4到6節，chit段經文講回鄉了後ê以色列人民，in lóng真敬虔地遵守摩西律法所規定ê禮儀守節期，而且mā照規定獻祭。雖然in iáu未開始建造聖殿，m̄-koh已經有祭壇，就先tùi獻祭ê事辦理，一點mā不含糊。

第7到9節，chit段經文描寫回鄉ê以色列人民開始進行建造聖殿ê工程。因為建造聖殿乃是非常神聖ê大事，因為án-ne，包括祭司、利未人lóng全部投入建造聖殿ê計畫。而且是所有二十歲以上ê利未人lóng被派來監督重建聖殿ê工程。

Chit pái建造聖殿ê地點就是tī原本聖殿ê所在，mā就是tī原址重建，而且以當年所羅門建造ê聖殿規格，當做koh一pái重建ê根據。第7節講in進口黎巴嫩ê香柏樹，kah所羅門當年仝款，in用民生物件向泰爾kah西頓人換來黎巴嫩ê香柏木，然後經過海運輾轉經過約帕運到耶路撒冷聖殿ê所在地址，可見建造聖殿ê工作必定需要一段真久長ê時間chiah ē-tàng完成，除了先進行奠基工作外，koh來就是久長ê施工。M̄-koh拖延聖殿ê重建是無好ê現象，tùi先知哈該ê作品就thang看出chit種問題（參考哈該書一：2—5）。

第10到11節，記載聖殿建造是tùi奠基禮拜開始，禮拜是非常隆重地照大衛時代傳落來ê o-ló上帝之禮儀方式舉行。

第12到13節，chit兩節thang看出in渴望重建聖殿ê迫切kah使命感。特別是對tī hiah-ê被俘虜ê人，尤其是bat親目見證過去聖殿榮耀ê老年人來講，taⁿ koh一pái看見重建聖殿工程開始，必定感觸真深。對chiah-ê人來講，重建聖殿mā是一種贖罪ê心，in希望ē-tàng因為án-ne hō͘ kiáⁿ孫tī信仰上ê態度ē-tàng koh khah敬虔，mā期待ē-tàng因為án-ne得tio̍h上帝ê憐憫，脫離伊族順民ê身分。

以斯拉記 4:1-4:10

註釋:

Tùi chit章開始，一直到尼希米記lóng是關係建造聖殿過程中，發生ê kúi-nā pái衝突。其實，就是因為有chit章所提起ê衝突，chiah會koh khah明白為甚麼tùi第七章了後，以斯拉記會用hiah-ni̍h長ê篇幅描寫以斯拉積極介入異族通婚ê事，伊強烈要求若是通婚ê對象，無願意歸向上帝，就一定tio̍h離開，就是因為建造聖殿ê事被阻礙而延誤。

Chit段經文是記載有關回鄉重建聖殿ê猶大kah便雅憫之仇敵，mā表示beh參與重建聖殿ê工作，m̄-koh tī被拒絕了後，就想出所有ê辦法上冊波斯皇帝亞達薛西，控告hiah-ê m̄ hō͘ in參與重建聖殿ê人。

第1到2節，chia提起「猶大kah便雅憫人ê仇敵」，這是teh指非猶太人，mā m̄是北國ê以色列人民。In就是亞述帝國是tī主前721年攻陷北國以色列首府撒馬利亞，亞述皇帝以撒哈頓（主前681到669年），tùi米索波大米kah亞蘭，以及附近國家、族群，進行人口遷徙進入撒馬利亞（參考列王記下十七：24），然後強迫通婚，生落來ê kiáⁿ孫hông稱做「撒馬利亞人」，後來被猶太人看做是「無清氣」ê民族，禁止in進入聖殿參與敬拜，mā m̄ kah in互相來往（參考約翰福音四：9）。Chia所指ê「仇敵」就是chiah-ê hông稱做「撒馬利亞人」ê人。In tī巴比倫時代tùi撒馬利亞遷入耶路撒冷，in講自從來到這地了後，lóng「一直向上帝獻祭」。In雖然kah猶太人仝款敬拜「耶和華上帝」，m̄-koh iáu繼續敬拜傳統ê神明。換句話講，in只是kā耶和華上帝當做多一位神明敬拜而已，kah猶太人á是整體ê以色列民族之「獨一ê耶和華上帝」之宗教信仰完全無仝，án-ne chiah是chiah-ê猶太宗教眾領袖拒絕in參與建造聖殿ê原因。

第3到5節，所羅巴伯和耶書亞以及族長眾代表並無同意in加入，in表示是遵照波斯皇帝ê指示，beh家己重建聖殿ê工程。就án-ne chiah-ê人就發起koh khah chē人來阻止chiah-ê回鄉ê人重建聖殿工程ê進行，m̄-nā恐嚇猶太人，m̄ hō͘ in參與建造聖殿，iáu用siōng不清氣ê手段，就是o͘-se波斯ê所在官員，阻擾了建造聖殿ê工程。這就是第5節所講ê，tùi塞魯士執政開始，直到大流士時代，mā就是tùi主前536年開始動工，到chit-má已經足足拖延了長到十六年時間（主前520年），重建聖殿ê工程就án-ne繼續被拖延tio̍h（第24節）。這mā是先知哈該所講ê，聖殿建築ê工程已經因為án-ne teh要荒廢了（參考哈該書一：4）， 

第6到11節，「亞哈隨魯王」，chit-ê名是應該是亞達薛西一世，伊是tī主前486到465年執政，而第7節ê「亞達薛西皇帝」，應該是tī主前464到423年。緊接第8節koh有省長利宏kah省書記伸帥mā共同擬了一封控告ê信hō͘亞達薛西皇帝，加上第9到10節所提起ê人物kah代表，就thang清楚看見chit項重建耶路撒冷城圍牆ê工程受tio̍h非常大ê阻力。Tùi第四章8節開始，直到第六章18節，以及第七章12到26節等等經文，thang講全部lóng是用亞蘭文寫ê。M̄-koh早tī in時代，聖殿已經重建完成à。會有chit種記事出現，應該是kah耶路撒冷城圍牆ê事件有關，因為這kah建造聖殿ê年代大約相差將近一個世紀，無可能是tī in ê時代阻止聖殿主體工程。Chit點tùi第24節ê「直到波斯皇帝大流士土正ê第二年」，mā就是主前519年chiah koh重新啟動建造聖殿工程。

以斯拉記 4:11-4:24

註釋:

這是頂面所講chiah-ê反對猶太人重建聖殿ê所在人物所寫hō͘波斯皇帝ê奏本內容，以及皇帝答覆in申訴ê內容。

第11到12節，開始就說明in是khiā起tī「河西省ê居民」beh上書皇帝。Chia ê「河西省」，指ê是巴勒斯坦、亞蘭、腓尼基等地。Mā就是幼發拉底河以外地區lóng thang kā它稱做「河西省」ê範圍。In講ná耶路撒冷ê猶太人當teh興建看起來非常可惡ê「城」，而且就teh要完工à。這mā就是頭前提起ê，in控訴ê並m̄是聖殿，卻是針對耶路撒冷城ê圍牆。

第13到14節，in控告ê主要理由，認為猶太人若是kā耶路撒冷城圍牆造好，就會拒絕繳稅，án-ne會影響tio̍h國庫ê收入。In自認是公務員，有義務檢舉chiah-ê不法ê行為。Thang tùi chia看tio̍h以色列人重建耶路撒冷城牆ê事件，hō͘ in看做是圖謀獨立，想背叛ê舉動。

第15到16節，in認為過去tòa tī耶路撒冷城ê居民lóng是真叛逆ê，真oh管轄。這mā是為甚麼頂pái入侵者會kā hit-ê城拆毀。In相信若是隨在chit-ê城ê居民kā hit-ê城重建起來，就真oh控制à。意思是teh指趁chit-má in iáu未完成，趕緊阻止chit項工程ê進行。Tio̍h注意ê，in是上奏文提醒皇帝，ài伊查閱過去先王ê記錄，卻m̄是去實地調查。

第17到23節，chit段經文是亞達薛西皇帝ê回覆講in所上呈ê奏本已經有翻譯hō͘伊知影à。伊mā下令調查，m̄-koh chit種調查卻是根據in上奏ê查閱先王記錄，卻m̄是去實地調查。Teh過去記錄上lóng有記載hit-ê城ê人，自古以來就反叛王權，而且「充滿造反kah搗亂ê人」。M̄-koh伊卻mā承認先王bat統治過，而且徵收過各種稅捐，這表示in ê奏文中提起可能抽bē-tio̍h稅，會影響tio̍h國庫收入ê收法並無真實chiah-tio̍h。M̄-koh亞達薛西皇帝卻iáu是下令tio̍h阻止hit-ê城ê重建，直到伊下令thang重建ê時chiah thang koh再繼續。

注意第23節特別提醒是由亞達薛西皇帝下命令，beh「用武力逼kah猶太人停工」。尼希米書第一章3節講：「Hiah-ê 受掠ê tńg 來所chhun 落來留teh ê 人，tī 省內tú-tio̍h大患難，受凌辱，而且耶路撒冷ê 城牆受拆毀，城門 hō͘ 火燒燒去。(全民版)」可見是因為有士兵軍隊（武力ê意思）參與chit-ê tāi-chì，單是暴民無可能án-ne順利達成，因為猶太人必定會全力維護。

第24節應該是銜接第5節後面chiah-tio̍h。頭前已經有提過，chit項重建聖殿工程被阻止了長到十六年時間。

以斯拉記 5:1-5:17

註釋:

Chit章主要teh說明猶太人koh開始進行重建聖殿ê工作，卻koh一pái tú-tio̍h阻擾。M̄-koh chit pái開始有無仝ê轉變，原因是出現傳出ài in繼續建造聖殿ê人，就是先知哈該kah易多ê kiáⁿ撒迦利亞。既然上帝ê奴僕傳出信息，表示上帝必定會處理chiah-ê障礙，ná親像第5節所講「上帝看顧猶太人ê父老領袖」，祂hō͘波斯chiah-ê告狀ê官員想beh等到皇帝回覆命令後chiah開始進行必要ê干涉攪擾行動。Koh講，mā因為上帝會處理chiah-ê障礙，因為án-ne，「chit項工程進行得非常慎重，koh真順利。」

第1到2節，一開始就提起哈該kah撒迦利亞chit兩位先知，in是奉上帝ê名向tòa tī猶大kah耶路撒冷ê猶太人傳講信息，表示in有得tio̍htùi上帝來ê啟示。Á回鄉ê猶太人領袖中，所羅巴伯和耶書亞聽tio̍h了chit兩位先知傳達ê上帝信息，就án-ne重新啟開建造聖殿ê工程，這就是kah第一章24節提起「重建耶路撒冷聖殿ê工程被迫停止」ê事有關。Thang理解先知哈該年紀khah長，撒迦利亞少年，因為án-ne，伊輔佐年老ê先知哈該。

第3到5節，就tī hit時chūn，波斯帝國ê河西省長kah伊ê幕僚聽tio̍h猶太人又ài動工重建聖殿，就問in是甚麼人下令in thang做chit件事？Mā向in討所有幫助重建聖殿ê名單，準備向皇帝報告chit件事。就tī chit時chūn，因為是上帝ài in重建聖殿，因為án-ne，上帝mā hō͘波斯官員無隨時採取行動去阻止，而是beh等待皇帝ê回覆。

第6到8節，河西省官員ê報告中，提起聖殿已經koh開始動工，而且用大ê石頭修建，而且工程進行得非常慎重koh順利。

第9到10節，chit兩節提起chiah-ê官員有詢問過甚麼人下令允准in重建，而且收集到à關係參與重建聖殿ê名單，呈報hō͘皇帝。

第11到16節，chit段經文是猶太人回答關係chiah-ê地方官員詢問ê內容。Tī chit段回答中，提起幾個重點：一是這間聖殿是上帝所同意in祖先建造ê。二是後來因為祖先得罪上帝，上帝hō͘巴比倫王來懲罰in，並kā聖殿毀壞。三是波斯王塞魯士起來取代巴比倫後，下令in重建此聖殿，並且kā過去所有被巴比倫搜刮ê聖殿貴重物件lóng歸還。四是主要規劃重建ê人就是設巴薩。

第17節，chiah-ê官員上冊皇帝，希望ē-tàng查閱皇室資料，看是m̄是真正bat同意in tī原地重建聖殿chit款tāi-chì。

以斯拉記 6:1-6:12

註釋:

Chit章siōng主要是記載波斯皇帝大流士tī接tio̍h屬下呈起來ê奏本後，馬頂下令查詢是m̄是過去塞魯士真正有下令，beh hō͘ chiah-ê猶太人建造耶路撒冷聖殿。結果發見chiâⁿ實有chit件事，因為án-ne，伊m̄-nā同意，而且iáu下令tio̍h協助建造聖殿ê工程。

Chit段經文說明後來確實有chhōe-tio̍h關係塞魯士皇帝同意猶太人tńg去故鄉，而且幫助重建聖殿ê記事。而且明文規定，任何君王á是人民若是想beh推翻chit件重建工程，lóng該受tio̍h懲罰。

第1到2節，當大流士皇帝接tio̍h頂面所講ê奏文後，隨時就下令調閱保存在巴比倫皇室ê資料，果然發見了一份資料。

第3到5節，chit份資料就是塞魯士執政ê第一年，就bat下令tio̍h重建耶路撒冷ê聖殿。連聖殿ê規模大細lóng列出來，並講beh kā巴比倫ê尼布甲尼撒王搜刮來ê聖殿金銀器皿lóng tio̍h還hō͘耶路撒冷聖殿，khǹg tńg去原來地方。

不過，chia提起ê規模之大細，卻kah列王記上第六章2節所講ê「聖殿ê內部長二十七公尺，寬九公尺，高十三公尺半」，koh tī「聖殿ê邊á kah後面，建造三層廂房，每一層高兩公尺兩公寸」，而且siōng下底一層ê廂房每間寬兩公尺兩公寸；中間ná層ê廂房寬兩公尺七公寸；頂面ná層ê廂房寬三公尺一公寸。每一層ê殿牆lóng比下底一層ê薄；án-ne，房間thang造tī牆上，免得kā樑木安khǹg tī牆裡」無仝款；chit份記錄是「二十七公尺高，二十七公尺寬」，而且tī「每三層石頭殼頂加上一層木材」。顯然chit-má所重建ê聖殿比原來所羅門時代所建造ê，tī底座上就縮小真chē。可能因為這是波斯ē-thang助in ê siōng大範圍。M̄-koh對tī被殖民ê人民來講，宗主國án-ne禮遇in，已經是上帝極大ê恩賜。

Iáu有，chit份皇室備忘錄裡記載重建聖殿ê「一切費用由國庫支付」，chit點tú好說明chit件重建ê事，m̄-nā beh允准，iáu koh khah由國庫支付費用，án-ne chiah是重點。Mā因為án-ne，大流士皇帝馬頂下命令ài所有官員傾力協助猶太人重建聖殿ê工程，這顯示伊尊重先皇帝ê決定。

第6到7節，大流士皇帝看tio̍h chit份歷史檔案資料，隨時就做出了重要決定：要地方官員遠離聖殿，m̄-thang干涉in重建ê工程。

第8到9節，伊同時下令chiah-ê官員tio̍h提供in所需要ê一切，包括獻祭用ê，以及祭司所需要ê一切lóng tio̍h盡所ē-tàng提供。

第10到12節，大流士皇帝認為只要幫助猶太人ē-tàng完成重建聖殿，就會hō͘ in ê上帝歡喜，in ê上帝mā會賜福hō͘大流士kah伊ê kiáⁿ孫。因為án-ne，不准有任何人刪改這道命令，任何想beh阻止ê人lóng該受tio̍h嚴厲ê懲罰。

Chit種命令tú好kah本來舉發猶太人重建聖殿而beh透過呈報皇帝hō͘伊停工ê構想tú好ē-tàng其反。這mā說明第五章5節所講「上帝看顧猶太人ê父老領袖」ê結果，因為有上帝幫助，chiah有超越障礙ê成果。

以斯拉記 6:13-6:22

註釋:

Chit段經文講tio̍h chiah-ê地方官員看tio̍h皇帝大流士下ê命令，就m̄敢阻止，á是teh協助工程ê進行上有任何怠慢ê所在，因為án-ne，致使重建工程真緊to̍h完成。Chit段經文mā同時提起回鄉tńg來ê猶太人，照規定守Pôaⁿ過節kah除酵節。

第13到15節，chit段經文講因為有波斯大流士皇帝頂面所講ê命令，並下令要地方官員tī重建工程上hō͘ in siōng大ê協助，因為án-ne，重建聖殿ê工程無koh像過去仝款受tio̍h阻擾，而且ē-tàng順利進行。因為án-ne，tī大流士在位ê第六年，mā就是主前516年ê 3月12日完成，距離第四章24節講ê「大流士統治ê第二年」繼續重建ê工作，án-ne共費ê時約三年半ê時間，而且tú好kah先知耶利米預言猶太人kā tī巴比倫做奴隸「七十年」（耶利米書廿五：11—12）相符。
第16到18節，ē-tàng完成聖殿ê建築，應該講對kui個以色列民族來講，lóng有非凡ê意義。因為án-ne，以色列人民，包括祭司、利未人，kah所有tùi巴比倫回鄉ê人lóng參加了「奉獻聖殿ê典禮」，這mā是in第二pái聖殿奉獻禮，第一pái是所羅門完成第一pái聖殿建造後（參考列王記上八：62—64）。當然kah所羅門時代舉行ê獻殿禮無法度相比，因為所羅門時代mā是以色列民族siōng顛峰ê世代，chit-má則tùi被俘虜之地tú tńg來，百廢待興，萬事待舉，無可能teh獻殿禮方面大肆鋪張，不過已經難能可貴ā，in有仝款ê心志表明對上帝ê忠心。Koh講，in mā同時恢復摩西律法冊上規定ê，kā祭司kah利未人重新組織起來，按照規定排班tī聖殿裡服事。

第19到22節，這mā是in tùi奴隸之地tńg來後第一pái舉行Pôaⁿ過節祭典。Chit項祭典對猶太人來講有真特殊ê意義，因為表明in就ná親像早年祖先出埃及仝款，chit-má是tùi巴比倫奴隸之地被救出來，一定有真chē感觸chiah-tio̍h。注意第22 節ê「亞述皇帝對in友善」，是teh指「波斯皇帝」來講。

所有舉行Pôaⁿ過節kah除酵節ê禮儀，就是按照摩西律法上ê規定而行，值得注意ê，是第21節所講ê，m̄-nā是回鄉ê以色列人民守這重要節期，包括歸屬耶和華上帝ê外族，mā lóng參加這重大節期。

以斯拉記 7:1-7:10

註釋:

Tùi chit章開始直到第十章，lóng是記載經學教師、mā同時是祭司ê以斯拉ê tāi-chì跡。Tī第七到八chit兩章紹介伊ê任務，然後第九到十章，則紹介伊怎樣處理以色列人民墮落生活ê方式。

Chit段經文是紹介以斯拉ê身分背景。

第1到5節，這是有關以斯拉ê族譜。

Chia講以斯拉tī亞達薛西做波斯皇帝ê時chūn回鄉ê。這表示伊m̄是第一批回鄉ê人員。如果chit位亞達薛西皇帝是一世ê話，伊當皇帝ê時間是主前465到424年，而以斯拉是tī主前458年tńg去猶大。因為án-ne，thang確認以斯拉就是tī亞達薛西一世ê時代回鄉ê。

「以斯拉是西萊雅ê kiáⁿ」，m̄-koh根據列王記下第廿五章18到21節講，西萊雅tī主前587年被巴比倫護衛長尼布撒拉旦掠，並且處死。主前587年距離以斯拉tńg去耶路撒冷chìn前有一百三十一年ê cheng差，因為án-ne，chia講萊雅是用斯拉ê老父，並無正確。有一個可能是希伯來文ê「老父」，mā有另外一個意思是「祖先」ê意思。Á「kiáⁿ」ê希伯來文mā有「kiáⁿ孫」ê意思。

    第6到10節，這是一段真重要ê經文，說明以斯拉乃是一位飽學ê經學教師。因為耶路撒冷聖殿毀tī主前586年（參考列王記下第廿五章），聖殿內ê經卷lóng被火燒殆盡，因為án-ne，當猶太人淪亡tī巴比倫做奴隸ê時chūn，in重新口述所知ê經卷內容，mā可能有寫落來一kóa片段，mā有可能利用tī巴比倫ê日子繼續不斷ê口述，in tī回鄉了後，以斯拉趕緊訓練一批人投入tī「專心研究」，並且kā它用筆記錄落來，koh kā它用來教導人民，這就是聖經之所以被保存落來ê一個主要原因。Mā thang án-ne講，以斯拉對後代猶太教經典有bē-tàng磨滅ê貢獻，mā就是伊抄寫落來咱今á日讀ê舊約聖經。

以斯拉記 7:12-7:28

註釋:

Chit段經文是記載亞達薛西皇帝hō͘以斯拉ê詔書。因為tī第6節有記載因為以斯拉有上帝特別ê賜福，因為án-ne，伊要求皇帝亞達薛西ê每件事，皇帝lóng會答應伊，這mā表示亞達薛西kah以斯拉之間有真好ê互動關係。

第11到12節，chit兩節講亞達薛西皇帝肯定以斯拉tī研究摩西律法上ê成就。

第13到16節，chia提起另外一批回鄉潮。而且亞達薛西皇帝iáu派伊ê「七個參謀」跟tòe以斯拉同齊tńg來耶路撒冷kah猶大各去巡視，看in是m̄是有遵行摩西律法。M̄-nā án-ne，伊iáu託chiah-ê參謀帶去伊ê捐獻，做聖殿ê需要，並且講以斯拉tī波斯帝國統治區內所徵收ê錢，lóng是beh捐hō͘聖殿ê路用。

第17到20節，頂面所講ê錢，tio̍h用teh獻祭ê需要上，除此外，以斯拉thang kāchhun落來ê錢，用tī伊認為妥當ê所在。若有無夠，thang tùi波斯帝國ê國庫支付。

第21到24節，chit段經文講皇帝命令河西省ê財政官員，一定tio̍h全力幫助以斯拉，凡伊所需要ê經費lóng要編列出預算，mā訂出hō͘ in以斯拉ê siōng koân額度。Koh khah特別ê是亞達薛西皇帝hō͘參與聖殿服事ê人lóng全部免稅，連工人mā仝款免稅。

第25到26節，chit兩節等等於是皇帝任命以斯拉成做治理河西省ê總督仝款，賦予伊有極大ê行政裁量權。

第27到28節，是用斯拉對上帝ê o-ló，因為如果無「得tio̍h上帝ê幫助」（第9節），伊無可能án-ne順利完成頂面所講chiah-ê工作，特別是tī重新抄寫經卷ê工作上koh khah無可能。作者有意表示：亞達薛西皇帝對以斯拉抄寫舊約聖經ê工作有絕對ê貢獻。

以斯拉記 8:1-8:23

註釋:

Chit章kah第九章，除了第八章35到36節用「in」外，其餘lóng是用第一人稱來稱呼以斯拉，表示這是用斯拉ê手所留落來之資料。Chit章除了提供一份宗族領袖名單外，mā同時帶領大家用禁食祈禱來向上帝祈求伊ê憐憫kah帶領，hō͘大家tī tńg去家鄉ê途中ē-tàng享受平安，並且記錄伊手中所帶ê金子kah貴重器物lóng點交hō͘祭司kah利未人小心保管。

Chit段經文記載kah以斯拉同齊tńg去耶路撒冷ê宗族領袖名單，另外mā記載以斯拉mā召集利未人加入回鄉ê行列。Á tī出發chìn前，伊ài所有跟tòe beh回鄉ê以色列人民用禁食祈禱方式，祈求上帝帶領、庇護，hō͘ chit chōa大約四到五個月ê旅程thang順利平安。

第2到14節，chia提出ê一串名單，除了「約押宗族」外，其餘ê宗族其實在第二章3到15節裡，lóng thang chhōe-tio̍h。Chiah-ê宗族lóng是屬tī祭司家族。Koh講，tùi名單中thang看tio̍h，只有記載cha-po͘人，無cha-bó͘人ê名單，á是講數字，原因是婦女kah未滿二十歲ê兒童是bē計算tī名單中間。因為án-ne，正確ê數字應該比chia ê數目會加出真chē。

第15到20節，chit段經文中記載以斯拉發見少了利未族人。因為án-ne，就召集九個領袖來，請in去chhōe易多，由伊協助chhōe利未人來參與chit項tńg來故鄉重建聖殿ê行列，chiah有真chē利未人kah建造聖殿ê工人加入。

第21到23節，chit段經文真重要，說明chit chōa tńg去故鄉耶路撒冷ê路程是艱辛ê，因為án-ne，以斯拉ài大家kah伊同齊用「禁食」ê方式，大家謙卑tī上帝面前祈禱，祈求上帝tī旅程中帶領。以斯拉認為向波斯皇帝請求派出一隊騎兵保護in，免得受tio̍h強盜搶劫、侵害chit件事，是一件見笑ê行為，因為既然祈求上帝庇護，就beh相信上帝一定會án-ne垂聽in ê祈禱。果然，in就是tī以斯拉chit種堅持下，信靠上帝。M̄-koh有kóa人iáu是有軟弱而一直認為應該靠波斯ê部隊庇護chiah-tio̍h。

以斯拉記 8:24-8:36

註釋:

Chit段經文記載以斯拉kah伊同行ê祭司、利未人lóng平安tńg到耶路撒冷。Á伊委託管理財物ê同工確實真忠心，hō͘保管ê金銀等貴重器物lóng如數點交hō͘管理聖殿ê負責人。

第24到27節，以斯拉選出十二位祭司代表，然後kā波斯皇帝kah官員交hō͘伊ê金紫、銀á，kah歸還 ê聖殿器皿lóng經過磅秤kah點交hō͘ in保管。

第28到30節，以斯拉ài chit十二位祭司代表妥善保管chiah-ê聖殿ê物件，交帶in來到耶路撒冷後，mā tio̍h像chit-má án-ne，一定tio̍h經過磅秤了後，轉交hō͘祭司kah利未ê領袖，用chit種方式來表示非常忠心，都無貪婪ê念頭。因為chiah-ê lóng是屬tī上帝ê物件。

第31到34節，果然，上帝垂聽以斯拉kah所有同行ê祭司、利未人ê祈禱，hō͘ in chit群回鄉者lóng順利平安tńg到耶路撒冷。歇睏了三工了後，第四工，chiah-ê負責保管聖殿器物ê十二位祭司代表，就kā它經過磅秤了後，點交完成，並且詳細記錄數字。

第35到36節，為tio̍h beh感謝上帝，以斯拉mā帶領in到耶路撒冷聖殿去進行獻祭ê禮儀，伊mā同時kā皇帝hō͘伊ê詔書交hō͘河西省長kah官員，án-ne，波斯ê所在官員就清楚知影，tio̍h照皇帝ê命令，協助以色列人民敬拜上帝ê事務，表示bē-tàng koh再有任何干涉攪擾in ê事發生。

以斯拉記 9:1-9:15

註釋:

Chit章主要是記載以斯拉為人民所犯ê錯誤獻上ê祈禱文。真正ê問題並m̄是通婚ê問題，卻是因通婚來致使以色列人民跟tòe去拜當地ê偶像神明，án-ne chiah是第1節所講ê「做仝款可惡ê事」ê意思。Á koh khah嚴重ê是連人民ê領袖mā án-ne，無堅持信仰ê原則，chit種事例kā引發連串ê問題，包括帶外族人進入聖殿參與祭祀禮儀，這會hō͘人認為污穢了聖殿ê聖潔、神聖，連帶影響tio̍h hiah-ê遵守聖潔禮儀ê人ê心靈平靜。

第1到2節，chia提起以色列人民ê宗教領袖帶獳「做仝款可惡ê事」，這是teh指「以色列人民、祭司，kah利未人」，in並無kah迦南地ê人「隔離」出來，卻是家己á是家己ê kiáⁿ孫lóng kah chiah-ê外族人通婚。因為這是違背摩西律法ê行為，原因是in會藉tio̍h通婚，致使對耶和華上帝ê忠實心靈降低á是減弱（參考出埃及記三十四：16）。

第3到5節，chia講以斯拉聽tio̍h chit-ê消息，痛心到極點，因為án-ne，伊用「拆裂衫褲，koh拔頭毛kah鬍鬚」，來表示伊心中ê悲憤。這「拔頭毛kah鬍鬚」chit種動作，是聖經中唯一ê一pái，用來表示心內非常痛苦ê方式。尼希米ê作法則拔掉hiah-ê娶外族人做bó͘、背叛上帝ê人ê頭毛（參考尼希米記十三：25）。以斯拉ê反應會án-ne激烈，是因為過去會亡國，就是以色列人民棄sak上帝，跟tòe外族人去拜偶像ê結果。伊知影上帝會對付chiah-ê tùi奴隸之地巴比倫tńg去ê以色列人民，若是in koh一pái悖逆上帝旨意ê話，一定會受tio̍h嚴厲懲罰。就án-ne，以斯拉teh獻晚祭ê時chūn，伊無換衫褲，iáu-koh穿插拆裂ê衫褲跪落來向上帝祈禱。

第6到9節，chit段以斯拉向上帝祈禱ê內容，主要是認罪。以斯拉承認回鄉ê以色列人民án-ne做，是得罪上帝ê行為。伊表示過去以色列人民kah祭司kah王等官員會hō͘擄，就是因為得罪上帝所帶來ê結果。M̄-koh即使án-ne，上帝iáu是憐憫，hō͘以色列人民中間留落來一kóa殘存ê子民thang脫離束縛，重見光明。chit-má iáu hō͘波斯皇帝好款待以色列人民，hō͘ in thang tńg去故鄉重建毀壞ê聖殿，並且hō͘ khiā起猶大kah耶路撒冷ê人民thang得tio̍h安全。

第10到12節，chia以斯拉講chit-má竟然違背先知警告過ê話，就是bē-tàng重犯過去kah外族人通婚致使棄sak上帝ê事。摩西律法有真清楚規定禁止kah外族人通婚，原因是beh防止in因為án-ne而棄sak上帝，跟tòe去拜別ê神明（參考申命記七：3—4）。以斯拉tńg來到故鄉後，siōng致意ê就是tī耶路撒冷kah猶大地區，大力推動全民重新tńg來遵守摩西ê律法，而且伊是親自教導民眾認bat kah遵守實行摩西律法（參考以斯拉記七：10）。

第13節，chit節真重要，以斯拉表示上帝ê恩典表現tī：以色列人民無論犯jōa大ê罪，上帝對in ê懲罰lóng是比in犯ê罪輕。Chit句話tú好說明上帝並無按照人所犯ê罪來懲罰，mā無因人所犯ê過錯而施行報應（參考詩篇一○三：10），m̄-koh chit句話mā teh表示上帝有豐富ê恩典，ē-sái講是人卻m̄知感恩，卻是一犯koh再犯。

第14到15節，就是因為上帝án-ne特別ê慈愛，以色列人民應該知影珍惜、感恩。M̄-koh chit-má tú好顛倒，m̄-nā m̄知感恩，iáu去做chit種惹怒上帝ê事。

Tùi chit篇懺悔文中，thang看出重點主要有兩點：一是提起有關「殘存ê人民」chit種觀念。Mā就是講以色列民族原本因為棄sak上帝可能致使亡國kah滅族，卻因為上帝ê憐憫，hō͘ in留落來「殘存之民」（第8節、第13節、第15節）。Á以色列民族會亡國，並m̄是政治、軍事ê問題，卻是因為in ê罪（第7節、第13節），而chit-ê罪ê主要內容就是棄sak上帝，去敬拜偶像神明（to̍h是聖經作者一再用ê「行可惡ê事」）。Chit種觀念lóng是延續申命記派作者ê觀點：對上帝beh絕對忠心（參考申命記六：5）。

以斯拉記 10:1-10:44

註釋:

Chit章主要說明tī以斯拉積極推動之下，以色列人民ê領袖怎樣用具體行動，來表明in燒熱烈回應革新ê運動，並且kā kah外族通婚來致使棄sak對耶和華上帝信仰ê民眾，願意離婚者ê名單開出來。Tùi名單中thang看tio̍h確實有民眾領袖tāi先棄sak了對上帝忠實ê信仰，而tī chiah-ê領袖中是包括祭司、利未人等家族ê人。因為chiah-ê人ê bó͘-kiáⁿ無願意kah in重頭tńg來耶和華ê信仰，忠實tī chit位帶領in重頭tńg來故鄉ê上帝。為tio̍h beh防止並挽救已經teh惡化中ê耶和華宗教信仰，in處理ê方式就是用離婚來斷絕繼續惡化ê信仰現象，m̄-nā tio̍h離開in ê bó͘，連kah外族bó͘所生ê kiáⁿ mā tio̍h同時放棄。

第1節，因為以斯拉為tio̍h chit件kah外族人通婚，致使棄sak上帝信仰ê事件，悲憤痛哭，甚至拆裂衫褲而俯扶tī聖殿頭前祈禱，hō͘真chē以色列民眾看tio̍h mā tòe艱苦心，in lóng來圍tī以斯拉身邊，跟tòe悲傷痛哭，表示懺悔、艱苦心。

第2到4節，chit段經文是以攔宗族ê代表示迦尼對以斯拉講ê話。伊表示這是以色列人民ê錯，而為tio̍h beh改正過來，in chiù-chōa beh送行外邦cha-bó͘人，以及kah外邦cha-bó͘人所生ê gín-á。M̄-nā án-ne，in beh堅守摩西律法。因為án-ne，只要以斯拉kā chit項革新運動付諸行動，in會全力支持。

第5到6節，就án-ne，以斯拉ài祭司、利未人，以及民間領袖chiù-chōa，保證一定照示迦尼ê建議去做，in lóng遵行了以斯拉ê chit項要求。為tio̍h chit件事，以斯拉到大祭司約哈難ê房間，tī hia伊禁食祈禱，向上帝表示心中ê哀傷。

第7到9節，這是非常嚴厲ê要求，chiah-ê民間ê領袖下令所有回鄉歸來ê民眾，lóng一定tio̍h tī三工之內到耶路撒冷聚集，若無，beh沒收in ê財產並kā in tùi猶大人民中驅逐當做懲罰。結果無人敢缺席，而且hit時chūn耶路撒冷下起大雨，koh冷，大家lóng因為án-ne而戰慄phi̍h-phi̍h-chhoah。

第10到11節，這是用斯拉對全體聚集ê民眾所講ê話，ài in棄sak hiah-ê引誘in棄sak上帝ê bó͘，m̄-thang koh再kah外族人來往。

第12到15節，民眾表示願意全力支持chit項革新運動。M̄-koh因為天氣冷koh落雨，而且beh處理chit種婚姻ê事，mā需要一kóa時間，因為án-ne，建議以斯拉kah民間領袖，hō͘代表kah審判官留tī耶路撒冷，hō͘民眾tńg去處理後，teh指定ê時間內來向chiah-ê領袖kah審判官報到。大家lóng贊成chit項建議，m̄-koh只有亞撒烏ê kiáⁿ約拿單kah特瓦ê kiáⁿ雅哈謝兩人反對，因為in背後有米冊蘭kah利未人沙比太ê支持。換句話講，beh推動chit項改革並m̄是真順利，iáu-koh有極大ê阻力。

第16到17節，為tio̍h beh徹底推動改革，以斯拉就接受頂面所講ê建議，並且tùi族長中選定了一kóa人來執行chit項改革，in先進行調查，看是甚麼人娶外族cha-bó͘-gín-á，並且跟tòe去拜偶像神明ê，kā chiah-ê人ê名lóng列出來。

第18到44節，chit段經文記載調查出來所有娶外族cha-bó͘-gín-á ê名單，並且記載in確實送行in ê bó͘-kiáⁿ。Chit份名單thang看tio̍h共計有十七名祭司、六名利未人，一名聖殿歌手，三名聖殿守門人，八十六名普通人，án-ne共計有一百一十三人。

Chit種舉動tī今á日是無法度被接受ê，m̄-koh對tī tú tùi巴比倫奴隸之地tńg去ê以色列人民來講，in是kā chit件事看做kui個民族生存ê基礎，如果無án-ne處理，in擔心kui個民族kā koh一pái面臨淪亡ê威脅。Mā因為chit種嚴厲手段，成做路得記、約拿書寫作ê背景，兩相對照是凸顯外族cha-bó͘-gín-á（路得）遠比上帝ê選民──以色列民族，koh khah遵守摩西ê律法，只要有人傳上帝ê信息hō͘ in，in mā會接受，並且願意悔改，ná親像約拿傳信息hō͘尼尼微城ê人民仝款。真正ê問題是上帝ê選民（以色列民族）家己隔絕外族，認為外族人是khiap-sì、lah-sap ê，不恥kah in為伍，án-ne chiah是真正ê問題所在。