重新查詢
經文:

以斯帖記 1:1-1:12

註釋:

以斯帖記ê背景是用亞哈隨魯王在位期間發生ê事。伊是波斯帝國第四任國王。Chit章講tī一pái重大ê盛會中,亞哈隨魯王想beh紹介伊súi ê皇后hō͘眾來賓認bat,m̄-koh王后華實蒂卻拒絕,這等於是m̄ hō͘亞哈隨魯王面子。因為án-ne,亞哈隨魯王廢了王后華實蒂,並kā伊phah入冷宮。同時聽從幕僚ê建議,重新甄選新ê王后。

Chit段經文記載波斯帝國ê亞哈隨魯王在位第三年,特別tī王宮ê花園舉行一pái盛大ê宴會,伊想beh利用chit-ê機會,紹介伊súi ê王后hō͘所有來參加歡宴ê國民認bat,結果王后卻拒絕出來kah人民認bat,chit件事hō͘國王非常憤怒。

第1到2節,chia先提起kui本經冊ê年代背景,就是tī亞哈隨魯王在位ê時代。伊是波斯帝國第四任國王。統治ê時期是tī主前485到465年。伊是繼承老父大流士一世ê王位。伊ê希臘文ê名是「薛西斯」一世(Xerxes I)。Chit-ê名mā表示出伊統治之下ê豐功偉業,因為名ê意思是「王族英雄」ê意思。Tùi第2節thang看出伊統治之下ê版圖範圍非常真闊,直到印度、古實之地。Tio̍h注意ê是chia講「印度」,並m̄是指今á日ê印度,卻是指今á日ê巴基斯坦,是印度河流經ê所在。第2節講「一百二十七個省份」,比較正確ê講法是「一百二十七個縣」。當時ê巴勒斯坦是屬tī亞哈隨魯王統治下ê第五個省。

第3到4節,「亞哈隨魯王在位ê第三年」,就是主前483年。伊tī王宮ê花園為所有貴族kah行政官員舉行了大宴會。時間長到「整整六個月」。

第5到8節,亞哈隨魯王確實是一個真特別ê君王,伊m̄-nā宴請所有貴族kah行政官員,了後隨時koh邀請首都書珊全城ê男子,無論是甚麼身分,全部lóng到王宮中ê花園參加盛宴。Chit段經文mā描述tī伊執政ê時代國家非常富裕,tùi花園ê設施就thang看出來。Á伊為tio̍h表明是真誠beh宴請全城cha-po͘人,iáu特別kā王宮為國王特別釀造ê酒the̍h出來宴客,hō͘大家隨意盡情teh lim。Tùi伊舉行chit種盛宴來看,thang看出伊ê主要目的是teh向全國重要領袖、代表展寶國勢,以強化伊ê統治權威。這thang tùi伊舉辦ê皇宮盛宴時間長到「六個月」看出來,mā thang看出chit-ê時代是波斯帝國siōng興盛ê時代,因為koh過一百五十年,mā就是主前335年,波斯帝國就被希臘帝國取代à。Chit點mā說明聖經作者一再強調ê,如果m̄是kā榮耀歸hō͘上帝,只一味地誇耀家己ê才能,上帝會kā chiah-ê賞賜收tńg來,ná親像所羅門王誇耀伊ê財富,tī伊死後,以色列國就分裂了仝款,所羅門王誇耀家己財富ê方式,就是建造非常堂皇ê宮殿,iáu娶chē kah一千個嬪妃。

第6節提起「藍、白、紫」等顏色,chiah-ê顏色lóng是當時波斯人看做尊貴、莊嚴ê色彩(參考八:15)。

第9節,chit節講「王后華實蒂mā為婦女舉辦宴會」,chit項舉動有點á奇怪,因為按照當時ê風俗,除非有國王ê命令á是允准,若無,王后beh舉行chit種宴會是一項禁忌。

    第10到12節,chit段經文講盛宴ê第七工,chia ê「第七工」,應該是teh指宴請書珊城內所有ê cha-po͘人。因為lim酒真chē而且愉快,就án-ne亞哈隨魯王真想紹介伊súi ê王后hō͘所有來賓認bat。伊派出七個太監去邀請,無想tio̍h七個太監lóng 回報王后華實蒂拒絕國王ê chit項美意,莫怪亞哈隨魯王非常受氣,因為這明明是就是tī侮辱伊仝款。到底是甚麼原因hō͘王后敢公然拒絕國王ê邀請?這確實是真oh理解。

經文:

以斯帖記 1:13-1:22

註釋:

Chit段經文講述為tio̍h chit件事,亞哈隨魯王特別召開重要會議,詢問該怎樣處理chit件事。結果chiah-ê國王顧問是建議kā王后phah入冷宮,重新甄選新ê王后。

第13到15節,chia講「徵詢專家ê意見」,chia ê「專家」,就是teh指國王身邊ê幕僚團,á是智囊團。Á chiah-ê lóng是宮廷中ê重要大臣,共計有七個。伊問chiah-ê大臣該怎樣處置王后拒絕伊ê邀請ê事件看法。Tùi第7節出現「盛會ê第七工」、「七個太監」,到第14節ê「七個大臣」,thang看tio̍h這「七」ê數字一再出現。Chit-ê數字Tī聖經上有特殊意義,指ê是「完美」、「神聖」ê意思。換句話講,亞哈隨魯王身邊ê這七位參謀,確實lóng是真有智慧、謀略ê專家。另外mā teh說明亞哈隨魯王處理chit件事ê時,並m̄是一時衝動,卻是設想非常周到。

第16到20節,tī chiah-ê幕僚中,有一位名叫「米慕干」ê大臣,伊提出對這事件ê看法。伊認為王后華實蒂chit種行為,m̄-nā是侮辱了國王,mā是侮辱了全國人民。特別是若án-ne消息是傳出去,一定會震撼kui個波斯帝國全國ê婦女,認為國王連王后lóng管不à。伊認為華實蒂chit種行為,會為kui個波斯帝國ê社會帶來不安,會顛倒了原本以男性為主體ê社會結構,因為án-ne,伊建議國王下一道御旨,照當時律法ê規定,只要國王下御旨而且一經頒佈,就「永遠bē得更改」(參考八:8,但以理書六:8)。Á chit份御旨主要內容有三項:罷黜華實蒂ê王后頭銜。另chhōe其他cha-bó͘-gín-á來取代王后ê位置。全國婦女一定tio̍h尊敬丈夫,因為丈夫tī厝裡是主、有絕對ê權威。為tio̍h hō͘ chit份御旨hō͘所有ê人lóng知影,iáu用了真chē無仝ê語言頒佈。

第21到22節,米慕干ê chit項建議,得tio̍h亞哈隨魯王kah其他六位大臣ê同意,大家lóng認為是非常好ê意見。因為án-ne,國王ê御旨就án-ne用真chē種文字公告發出hō͘全國一百二十七個省份。

經文:

以斯帖記 2:1-2:23

註釋:

Chit章主要teh說明以斯帖án怎被選進王宮,以及後來被亞哈隨魯王選做王后ê經過。這別是Tī chit章經文中,iáu提起末底改因為發見有人密謀beh殺害亞哈隨魯王ê事,透過以斯帖ê警告而救了亞哈隨魯王ê性命,chit點mā成做後來以斯帖tī王面前得tio̍h特別寵愛ê原因。

	第1到4節,chit段經文是teh回應第一章19到20節,亞哈隨魯王聽從伊幕僚ê建議,下了一道「御旨」kā本來ê王后華實蒂「廢」掉。Á第1節ê「後來」如果對照第16節ê「亞哈隨魯做王ê第七年十月」,he是主前479年,因為亞哈隨魯王是tī主前486年登基ê。Tī第一章3節講王后華實蒂被罷黜是tī亞哈隨魯王登基ê第三年,he就是主前482年。Án-ne真清楚,「後來」mā就是經過四年ê時間。這四年ê時間中,亞哈隨魯王一直是「單身」,主要原因是tī 482年到479年這四年之間,lóng tī kah希臘帝國相戰,無閒戰事。Koh講,波斯帝國有傳統,就是國王出征ê時chūn,王后beh陪伴tī身邊,chit-má因為無王后侍衛tī邊á,hō͘伊想起了華實蒂。這mā就是亞哈隨魯王身邊幕僚真聰明ê所在,當時如果無建議亞哈隨魯王頒佈御旨,chit-má恐驚就有災難來臨。因為若是亞哈隨魯王想tio̍h beh kā華實蒂hō͘ chhōe tńg來,恐驚報復懲罰chiah-ê提建議ê臣僚是bē避免ê。M̄-koh既然國王頒佈ê「御旨」,就無可能挽回。

     Chit-má知影國王想起被罷黜ê王后華實蒂,chiah-ê幕僚就趕緊提新ê建議,重新公開徵選美女入宮,並選出一位國王歡喜ê王后。亞哈隨魯王接受chit種建議。

    第5到7節,chia提起「末底改」,chit-ê名若參考撒母耳記上第九章1節、撒母耳記下第十六章5節ê資料就thang發見,伊是以色列第一代國王掃羅ê親戚。真可能因為chit-ê緣故,hō͘伊ē-tàng tī波斯王宮中謀得一份重要官職。

M̄-koh若是對照以斯帖記第二章6節ê資料有問題,因為chia講伊是hō͘巴比倫王尼布甲尼撒所俘虜ê猶大國王耶哥尼雅kah猶太人中ê一位,而tùi列王記下第廿四章7到17節ê資料知影,he是tī主前597年。Án-ne,距離亞哈隨魯王徵選王后ê主前479年代已經距離將近120年。如果講末底改chit-má是四十歲(因為伊是用斯帖ê養父),則時間上真無對tâng。這mā就是tī〈認bat  以斯帖記chit本經冊〉文中所講ê,作者寫chit本冊ê主要目的,m̄是tī歷史,卻是teh紹介「普珥節」chit-ê節日ê由來,透過紹介chit節日beh hō͘大家知影上帝是怎樣憐憫、照顧以色列民族ê。不過mā thang án-ne瞭解,就是便雅憫中有「基士kah示每」ê kiáⁿ孫,遷徙到書珊定居。

    Chia提起「以斯帖」是末底改ê堂妹,chit-ê名可能是tùi巴比倫ê女神「伊絲塔」(Ishtar)來ê,ná親像末底改ê名可能是由巴比倫ê神明「瑪niâ杜客」(Marduk)來ê仝款。當時ê猶太人取巴比倫ê名並m̄是甚麼稀奇ê事,因為in是奴隸,名若m̄是來自主人所hō͘(參考創世記四十一:45),就可能是tī巴比倫出世ê猶太人新生代。不過chia mā強調以斯帖有希伯來人ê名「哈大沙」,chit-ê名真有意思,是teh指「番石榴樹」,而先知以賽亞ê信息中bat引用「番石榴樹」來譬喻上帝ê拯救(參考以賽亞書四十一:19、五十五:13)。Chia講以斯帖是孤女,被末底改扶養長大ná親像家己ê cha-bó͘-kiáⁿ。

    第8到9節,以斯帖mā是因為生做súi好看,而被徵選入宮交hō͘太監希該負責管理。Chia特別強調講希該歡喜以斯帖,hō͘伊特別ê食物,kah siōng好ê房間,然後koh派出七個宮女來侍候伊,chiah-ê說明lóng teh表示以斯帖真可能被選上為王后。

    第10到11節,末底改忠告以斯帖m̄-thang暴露家己ê「種族kah親屬關係」,原因是末底改tī王宮中得tio̍h官職,而以斯帖是以色列人,若是hō͘發見chit種「奴隸ê身分」,真可能tī選后ê時chūn,就會hō͘當時巴比倫帝國鄙視(siùⁿ)以色列民族ê中間,hō͘淘汰了,甚至真可能就會hō͘王宮中ê大臣hō͘私下帶走成做細姨。因為án-ne,mài暴露身分,mā是一種必要ê保護性命措施。

    Koh講,根據波斯ê律法,王后一定tio̍h tùi六大聯盟中選擇,猶太人本來就是in ê奴隸,是無可能被選做王后。M̄-koh,隱藏了猶太人ê身分,卻一定tio̍h面對違反猶太人宗教信仰傳統上ê禁忌,特別是lim食等問題。第9節講負責照料以斯帖ê太監希該供給以斯帖「特殊ê食物」,真可能就有猶太人認為「無清氣ê食物」tī其中,伊就無法度拒絕(參考但以理書一:3—16)。

    第12到14節,chit段經文描述早期社會王宮選嬪妃ê規矩,真親像kā súi ê cha-bó͘-gín-á當做「裝飾品」仝款看待。準備一年之久,只不過是為tio̍h hō͘國王看一pái而已,如果國王無koh欣賞,則chit位cha-bó͘-gín-á kā一世人tī王宮中守活寡à。Chia並無講總共有jōa-chē cha-bó͘-gín-á被徵選入宮去hō͘亞哈隨魯王親自評審,m̄-koh根據猶太史學家約瑟夫(Flavis Joshephus)ê講法,總共有四百名súi ê少女被徵選入宮。Mā有人講每一工一位,連續四年,án-ne,總共有一千四百六十名。無論王宮食、lim、穿、tòa等是jōa-ni̍h-á高貴、爽快,chit句「無機會koh再tńg來到王hia」,已經說明若是無被選上王后,就會tòa tī冷宮一世人,這會是真痛苦ê事。

    第15到18節,chia特別提起以斯帖ê老父是「亞比亥」,m̄-koh卻都無提供koh khah詳細ê資料。M̄-koh ná親像頭前第7節所提起ê,是末底改kā伊扶養長大ê。Tī第15節、第17節等等節所講ê,以斯帖有特殊ê氣質,m̄-nā亞哈隨魯王「喜愛伊贏過其他任何少女」,包括太監希該,以及每一個見過以斯帖ê人lóng喜愛伊,án-ne chiah是重點,mā是後來伊雖然表明家己是猶太人ê身分,國王mā不減對伊ê喜愛(參考七:3—4)。當伊被國王選上王后後,亞哈隨魯王對伊是疼惜至極,m̄-nā為伊舉行盛大ê宴會,iáu特別邀請所有貴族kah行政官員參加喜宴(參考一:3),koh khah重要ê是為tio̍h ē-tàng娶以斯帖為王后,國王iáu特別宣佈全國放假一工(mā thang講是減稅、á是釋放奴隸、豁免債務等),並且頒發禮物hō͘人民,這ná親像今á日ê嘉年華會,表示全國lóng因為án-ne喜慶洋洋。

第19到20節,chit兩節回應了第10節,講以斯帖聽從末底改ê忠告,都無kā家己ê種族身分以及伊kah末底改ê親屬關係洩露出來。其實,作者就一再強調末底改對以斯帖ê影響力,mā是teh說明chit本以斯帖記,真正要角應該是末底改,卻m̄是用斯帖,而ná親像路得記真正重要ê人物m̄是路得,卻是伊ê ta-ke拿娥美。

Koh講,第19節tī中文《和合本》ê翻譯是:「第二pái招聚處女ê時chūn,末底改坐tī朝門。」這表示有可能舉行二次ê徵選美女活動,而以斯帖是tī第一pái入選?á是第二pái?是m̄是有第二pái ê選美大會等等chiah-ê lóng有討論ê空間。

第21到23節,chit段經文是為第六章預留伏筆。Tùi第19節mā thang看出末底改可能kah chit pái謀刣亞哈隨魯王ê事件有關係,因為「次經──以斯帖補篇」就記載講,chit兩個太監因為嫉妒末底改升官,而決定謀刣國王,而太監希該卻是對以斯帖愛護有加,這jōa-chē lóng說明宮廷內鬥ê背景。Á chit件策劃殺害亞哈隨魯王ê計謀,被末底改發見kā以斯帖講,koh再由以斯帖轉告國王,經過調查屬時chūn,國王下令kā兩位計謀者處死刑,這mā同時提升末底改tī王宮ê地位,以斯帖同時加倍受tio̍h國王ê寵愛。



經文:

以斯帖記 3:1-3:15

註釋:

Chit章講述亞哈隨魯王身邊siōng重要ê一個官員,就是宰相哈曼。因為亞哈隨魯王bat下令所有官員看見哈曼lóng tio̍h跪拜,這就成做猶太人ê大課題。Chit章經文mā同時引伸出一個值得思考ê問題,就是末底改一方面要求以斯帖m̄-thang吐露家己猶太人ê背景,m̄-koh伊卻向人表明家己是猶太人,而且為tio̍h宗教信仰ê理由拒絕向宰相哈曼跪拜,而以斯帖卻因為隱藏猶太人ê身分,hō͘伊一定tio̍h放棄本來宗教信仰上 ê忌諱。其實,末底改真正原因並m̄是因為宗教信仰上ê理由,而拒絕向哈曼跪拜,卻是以色列民族kah亞瑪力族人之間久長以來ê仇恨,只是hō͘哈曼掠tio̍h chit-ê機會,而計畫利用國王ê權勢,beh對以色列人民進行滅族ê計畫。Chit章就是記落來後來亞哈隨魯王因為聽從哈曼ê建議,beh kā所有猶太人刣死留落來ê前言。

第1到6節,chia講哈曼宰相是「亞甲人」,chit族就是舊約聖經中一直對敵以色列民族ê亞瑪力人。先知撒母耳時代bat一再吩咐掃羅tio̍h消滅chit族人,原因是以色列人出埃及ê時,亞瑪力人bat對敵in(參考撒母耳記上十五:1—9,申命記廿五:17—19)。因為哈曼是亞瑪力人ê kiáⁿ孫,末底改是猶太人ê kiáⁿ孫,而這兩族ê人koh有世仇背景,因為án-ne,當哈曼掌實權,而且權位比末底改高過真chē ê時,伊掠tiâu末底改boài向伊跪拜ê機會,展開報復ê計畫─beh刣死波斯帝國統治區內所有ê猶太人,這就是滅族ê大行動。

第7節,chia講「亞哈隨魯王統治ê第十二年」,mā是用斯帖為后了後ê第五年,時間應該是tī主前474年。「正月」,大約是tī五、六月間。哈曼用抽籤方式ài beh進行chit項對以色列人民進行滅族ê計畫。Chit種抽籤ê方式tī亞甲文就是稱做「普珥」,結果卻變成猶太人慶祝「重生」ê嘉年華會節期。值得注意ê是第7節提起tùi開始抽籤到決定beh執行ê時間,有長到十一個月ê緩衝期,這mā就是用斯帖後來有機會利用兩pái邀請國王食飯ê美好場合,m̄-nā替猶太民族解救被刣滅ê危機,iáu因為án-ne hō͘哈曼ka-la̍uh tī家己ê陷阱裡。

    第8到9節,為tio̍h beh進行chit項滅族計畫,哈曼向亞哈隨魯王提出ê報告中,總共提出三個要點:

一是有一個民族雖然散居tī波斯境內,m̄-koh卻無被同化。

二是in m̄遵守國家律法。

三是消滅chit-ê民族,thang為國家增加財富收入高達三十四萬公斤ê銀á。Chit-ê稅收對照當時波斯全國一年總稅收五十一萬公斤銀á來看,這筆收入確實佔全國稅收ê五分之三多。哈曼siōng奸巧ê所在,就是無說明是toh一個民族。

    第10到11節,亞哈隨魯王聽馬上就kā家己ê手指交hō͘哈曼,ài伊去執行。手指代表權威、印記。注意第11節國王對哈曼講ê話:「Chit-ê 錢 hō͘ 你,hit-ê 人民 mā hō͘ 你,照你所看做是好 ê kā in 處置。(全民版)」 Chit句並m̄是講錢kah人lóng tio̍h hō͘哈曼,卻是講該繳納國庫ê,就繳納歸公,而teh執行上應該用ê人kah該支付ê費用就beh用。Á chiah-ê無被同化ê人則隨在哈曼處置。

    第12到14節,哈曼認為伊已經掠tio̍h一個重要ê契機,tio̍h好好á執行消滅猶太人ê計畫,這就是beh tī一工內kā所有ê猶太人,不管男女老幼,lóng刣了了滅盡,而且沒收財產。哈曼用國王交hō͘伊ê手指蓋tī發出ê公文,而且用chē種語文寫落來ê通告,beh tī全國各地「亞達月」,mā就是十二月13日hit工,執行消滅以色列人民ê命令。

第15節,chit節是siōng殘酷ê鏡頭,當首都人民知影chit-ê消息後,隨時有「不安」ê反應,in雖然m̄是猶太人,m̄-koh,猶太人kah in生活做伙,而且tùi巴比倫帝國tī主前538年轉到波斯帝國手中ê主前479年,至少mā kah in同齊生活了六十年,有kóa人已經kah in分bē開了,甚至通婚ê人mā bē少。因為án-ne,當消息傳出後,自然會引起動盪不安。M̄-koh相對ê,國王kah宰相哈曼卻是「坐teh相對lim酒」作樂。


經文:

以斯帖記 4:1-4:17

註釋:

Chit章提起因為亞哈隨魯王允准哈曼chit項消滅猶太人ê建議,已經引起所有猶太人,以及kah猶太人有關係ê人大大恐慌。末底改為tio̍h chit件事設法kah以斯帖見面,ài伊趕緊向國王進言阻止chit件事。末底改hō͘以斯帖知影,伊之所以ē-tàng當上王后,就是為tio̍h阻止chit件大屠殺ê事件而預備ê。

    第1到3節,m̄-nā是末底改,卻是所有接tio̍h哈曼下令執行消滅猶太人chit件政令消息ê猶太人,聽tio̍h chit-ê消息ê猶太人lóng大大悲痛哀傷,而且哀傷ê聲音已經tùi書珊擴大到波斯帝國境內所有猶太人ê社區。In有ê禁食、啼哭、哀號,甚至是「披上麻衣,倒tī灰裡」,chiah-ê lóng是teh表示心內非常艱苦心之狀(參考創世記三十七:34,撒母耳記下一:11,但以理書九:3)。末底改mā用chit種方式來到王宮門口,伊無入去,因為穿麻衣是bē-tàng進入王宮ê。M̄-koh伊chit種穿插必定會引起宮女ê注意而轉達此消息hō͘以斯帖知影,希望ē-tàng kā猶太人teh beh遭遇ê滅種消息,透過以斯帖chhōe-tio̍h改變ê機會。

    第4到5節,以斯帖得tio̍h宮女kah太監ê轉述,只有講末底改穿麻衣,卻m̄知發生甚麼tāi-chì,雖然指派宮女送衫褲hō͘末底改,m̄-koh被拒絕。因為án-ne,以斯帖指派另外一位名叫哈伊革ê太監去問末底改到底是發生甚麼tāi-chì。

第6到9節,末底改kā kui個事件詳述hō͘哈伊革知影,並且提供了一份哈曼下達ê通告,chit份通告是有國王印á蓋Tī頂面,表示chit份通告是經過國王同意了後發出來。末底改希望以斯帖ē-tàng為家己ê同胞請命。當末底改án-ne kah哈伊革講述ê時,已經真清楚指出王后以斯帖就是猶太人à。就án-ne哈伊革就照末底改所講述ê一切轉述hō͘王后以斯帖知影。

    第10到11節,以斯帖kā伊tú-tio̍h ê困難hō͘太監哈伊革轉述hō͘末底改知影。原因是按當時波斯ê律法,無論任何人,若是無國王召喚而擅自入宮去見國王,he是會hō͘處死ê,chit-ê規定包括王后在內。Chit種律法基本上是進步ê,為tio̍h是beh防止王后á是其他宮廷內ê國王親屬隨意妨礙國王料理國事。除非國王向hit-ê無被蒙召見ê人伸出「金杖」,而國王已經有一個月時間無召見以斯帖à。因為án-ne,以斯帖講述了伊若是擅自去晉見國王會有性命ê危險。

    第12到14節,chit兩節mā是chit章siōng重要ê經節,當以斯帖表達了伊晉見國王ê困難了後,末底改真無客氣地警告以斯帖,伊之所以ē-tàng有今á日án-ne崇高ê地位,m̄是為tio̍h家己,卻是有上帝交託ê使命,為tio̍h是beh解救猶太人,hō͘族人免tī遭遇滅亡ê危機。Chit段經文mā顯示末底改siōng大ê信心,伊深信上帝必定會拯救猶太人,即使以斯帖不冒性命危險為猶太人解圍,上帝mā會出手拯救。M̄-koh以斯帖mā bē脫離被滅亡ê危險,m̄-nā是伊,包括伊ê家族在內,lóng必遇tio̍h滅亡。換句話講,哈曼chit項國家政策,是經過國王同意ê,若是全部猶太人lóng遇tio̍h滅亡,一定hō͘以斯帖mā被孤立起來。Án-ne伊mā真容易遇tio̍h陷害。

    第15到17節,人tī siōng軟弱ê時chūn,只有走chhōe上帝ê救助,這是非常重要ê認知。以斯帖知影家己ê處境,koh khah重要ê,伊知影這是kui個猶太人存亡ê關鍵時刻。因為án-ne,伊請人轉告hō͘末底改,ài伊去召見所有tòa tī書珊ê猶太人,請in替伊禁食祈禱「三工三暝m̄食不lim」,伊家己kah侍候ê宮女mā仝款m̄食不lim禁食祈禱,然後chiah去見國王,即使因為án-ne而面臨死亡,伊mā心甘情願。

Tio̍h注意ê是,chia ê「禁食祈禱」,kah頭前ê「禁食」致意義上並無相仝;頭前ê「禁食」,是哀傷、痛苦;chia ê「禁食祈禱」,為tio̍h是beh表明性命ê苦難,beh向上帝傾訴明白,mā有含深切ê懺悔之內涵,祈求上帝憐憫、赦免。「三工三暝」,thang參考約拿書第一章17節,表達一個重要ê時段。

末底改聽tio̍h以斯帖chit種回應了後,就隨時離開,去召集書珊城ê猶太人進行chit項為以斯帖ē-tàng順利晉見國王來禁食祈禱。

經文:

以斯帖記 5:1-5:14

註釋:

Chit章講出以斯帖ê聰明智慧,mā tùi chit章看出伊被選入宮必定kah伊tī chit方面表現出「脫俗」ê一面有關。伊懇求國王參加伊所設ê宴席,並同時邀請宰相哈曼陪國王出席。Chit章mā同時回應了第二章10節、20節,以斯帖ân-ân記tiâu末底改ê交帶,m̄-thang kā家己猶太人ê背景吐露出來ê功效,tī chia發揮出來。因為如果哈曼知影王后以斯帖是猶太人,伊就會設法阻止王后設宴接待國王。

另外,chit章描述以斯帖聰明、冷靜出眾ê所在,在tī伊無tī第一pái設宴ê時chūn講出主要ê目的,卻是tī koh一pái邀宴ê時chūn chiah講出來。可能是利用chit種方式,hō͘哈曼失去防衛ê心。

第1到3節,當經過三工ê禁食祈禱了後,以斯帖穿插正式服裝khiā tī王宮內院,面向(ǹg)國王ê寶座上之殿門。Án-ne,真緊就被國王發見而伸出金杖請王后以斯帖進入,並且tòe表示任何王后以斯帖所請求ê lóng tio̍h賜hō͘伊。國王表示就算以斯帖要求「王國ê一半」mā會「賜hō͘」伊,其實這並m̄是指真正beh賜伊王國ê一半,卻是表示一種深深ê疼護、疼惜ê意思。

第4到8節,王后以斯帖真聰明,伊只表示家己準備真好ê宴席,beh宴請國王kah宰相哈曼。為tio̍h án-ne,亞哈隨魯王歡喜到極點,就召哈曼同齊前往。就tī宴席中,國王koh問以斯帖若是有任何請求,仝款提出「王國ê一半」,lóng會「願意hō͘」伊。M̄-koh王后以斯帖並無隨時就講出伊設此宴席ê主要用意kah目的。伊只表示希望國王會koh再允准隔工koh來一pái,tī隔工伊會講出有甚麼請求。意思是請國王hō͘伊一工ê時間考慮beh請求ê是甚麼。Chit種請求hō͘國王kah哈曼都無任何起疑ê心。

第9到13節,chit段經文描述哈曼tī王后以斯帖ê宴席了後,心情愉快地向所有親友,特別是家己ê bó͘細利斯展寶家己倍受王后寵愛。雖然伊mā表示看見末底改,卻無見tio̍h末底改向伊跪拜而心生討厭,m̄-koh因為有王后ê koh一pái邀請參加隔工kah國王同齊赴宴,伊認為王后án-ne寵愛伊,已經夠額彌補末底改boài向伊跪拜ê損失有餘。Á tùi哈曼án-ne得意ê心情,mā thang thang看出以斯帖設宴ê成功。

第14節,chit節講出真正ê問題出現tī哈曼ê親友,特別是伊ê bó͘細利斯。亞哈隨魯王前任ê bó͘王后華實蒂因驕傲不聽從國王ê話而被罷黜。chit-má則哈曼ê bó͘連同chiah-ê親友獻策hō͘哈曼,ài伊用殘酷絞刑台ê手段對付仇敵末底改。Kah以斯帖用「禁食祈禱」祈求上帝賜hō͘伊力量、智慧,kah設法beh救teh beh遭遇滅族危機ê態度,呈現了強烈ê對比,說明好ê幫助者,hō͘ koh khah chē人ê性命得tio̍h救助,反之,則殘害性命。哈曼接受chit種建議,就hō͘人造絞刑架,準備ài殺害末底改。

經文:

以斯帖記 6:1-6:13

註釋:

Chit章插入正teh進行ê故事中,m̄-koh卻為哈曼陷入家己所設ê羅網中,提出siōng好ê連接點。Chit章mā thang續接tī第二章23節後面,á是續接tī第三章15節後面。

    第1到2節,ē-sái講是kui個故事轉折發展ê主要中心,「hit工暗時,王睏bē去」,為甚麼伊會睏bē去?無人知影。M̄-koh卻暗示有一個奇妙ê氣力,這是人看bē-tio̍h ê手,mā就是上帝ê手正tī背後引chhōa tio̍h。Chit節ē-sái講是teh回應第四章13到14節,上帝對拯救祂ê子民有奇妙ê方法。

亞哈隨魯王tī睏bē去ê時,就命令臣僕kā官方ê史錄念hō͘伊聽,結果竟然聽tio̍h了末底改bat揭發叛亂謀害國王ê事件,而救了國王ê性命。因為án-ne,國王就詢問當時是m̄是有因為án-ne獎賞末底改?chiah發見當時完全無hō͘末底改任何獎賞。

第4到6節,兩件tú好ê事續接做伙。一是國王想beh問問宰相哈曼ê意見,看怎樣獎賞末底改。Á哈曼則想beh來請求國王同意kā末底改送上絞刑台處死。Tú好這兩件事同時做伙,主要teh說明上帝就是chiah-ni̍h有技巧來hō͘ tāi-chì khêng合做伙,hō͘完全無性命ǹg望ê子民,看見性命ê亮光,mā hō͘心思意念想beh陷害別人ê人,反tńg陷入家己所設計ê網羅中(參考詩篇三十五:7—8)。哈曼當然bē明白上帝已經介入chit件拯救祂子民ê工作中。伊心中iáu teh沾沾自喜,認為亞哈隨魯王會獎賞ê人一定是伊,無可能是別人。

第7到9節,因為哈曼m̄知國王是beh獎賞末底改,而認為是伊家己beh得獎賞,建議國王hō͘ chit位領受獎賞ê人siōng koân ê榮譽,就是:一是hō͘ chit-ê人穿王袍;二是chit-ê人所騎ê馬需要套上華麗ê籠頭套;三是由王ê大臣替chit-ê受賞ê人牽馬遊街。Án-ne hō͘民眾看見chit-ê人有國王hō͘ in ê siōng koân榮譽。

第10到11節,chit節真重要。因為亞哈隨魯王就照哈曼ê建議,kā所有chiah-ê榮譽hō͘末底改。並且iáu特別交帶由哈曼替末底改牽馬遊行。哈曼怎樣想mā想bē到會是án-ne ê結果。Koh khah重要ê,國王mā清楚知影末底改就是猶太人。因為án-ne,mā thang想像會tio̍h,tī國王眼中,猶太人並m̄是無好。Á哈曼當時向國王只有講有一個hō͘ in統治而且m̄遵守律法ê民族,並無說明伊指ê就是猶太人。

第12到13節,為tio̍h chit件事,hō͘哈曼感覺非常窩囊,伊垂頭喪氣地kā一切遭遇「一一kā bó͘細利斯kah所有朋友講」。伊ê bó͘ kah朋友lóng認為哈曼chit pái必定慘敗tī末底改面前。


經文:

以斯帖記 6:14-7:10

註釋:

這是用斯帖第二pái設宴席請亞哈隨魯王kah哈曼。就ná親像伊tī第一pái宴席中kā國王講ê,beh tī第二pái ê宴席中kā國王講伊ê請求,伊真正Tī chit pái宴席中向國王說明哈曼正策劃殘酷刣滅猶太人ê計畫。Chit時,國王chiah明白原來哈曼就是想beh害死所有猶太人ê人。

第六章14節到第七章1到2節,因為頂pái王后以斯帖有邀約亞哈隨魯王kah宰相哈曼赴伊準備ê宴席,chit時chūn,王宮ê太監來催促哈曼趕緊赴約去。就tī宴席中,國王koh一pái向以斯帖表示願意hō͘伊所求ê,仝款是講「王國ê一半」,mā願意賞賜hō͘伊。Án-ne重複三pái,lóng只teh表示一個意義:國王對王后以斯帖ê疼真深。

第3到4節,做國王koh一pái表示beh賞賜hō͘以斯帖所求ê時,伊掠tiâu chit-ê機會,懇求國王饒了伊kah同胞ê性命。Tī第4節以斯帖真聰明地表示:身為奴隸ê猶太人並無祈求赦免ê資格,thang接受被賣做奴隸而mài被刣。Koh講,伊kā家己kah猶太同胞結合做伙,mā因為án-ne,tī-chia重要關頭,伊吐露出家己隱藏甚久ê猶太人身分。

第5到6節,國王大大tio̍h驚,竟然有chit種事。Chit時chūn ê國王因為深teh疼以斯帖,已經不在乎伊是m̄是為猶太人à。因為án-ne,國王就問以斯帖是甚麼人敢做chit件事?以斯帖就當tio̍h國王ê面指出是哈曼。Á哈曼因為無防衛ê心,只一心一意想beh謀害猶太人kah末底改,結果當以斯帖拆破伊ê陰謀ê時,反tńg束手無策致使驚惶失態措地m̄知án怎是好。

第7到10節,國王聽了後,非常憤怒地khiā起來行到花園去。Á chit時ê哈曼卻為tio̍h beh祈求王后以斯帖替伊向國王求情,竟然「伏tī以斯帖躺靠ê長椅上」,tú好被入門來ê亞哈隨魯王看tio̍h,認為哈曼想beh輕侮王后以斯帖而受氣koh khah盛。Chit時,koh有太監舉發哈曼tī厝裡造一座絞刑架,是為tio̍h beh吊死救國王性命ê末底改,這koh khah加添了國王ê受氣。就án-ne,國王下令kā哈曼吊死tī伊家己設計ê絞刑架頂。

經文:

以斯帖記 8:1-8:17

註釋:

第八到九章19節是描述猶太人怎樣倒拋beh殺害in ê人。

第八章講tio̍h亞哈隨魯王tī以斯帖ê懇求之下,設法改變原本已經發出ê御旨,he就是由末底改用王ê名義重新發出一份御旨,並蓋上王ê印á,chit份御旨通告所有ê猶太人thang阻止起來,若tú-tio̍h攻擊ê時,lóng thang隨時反擊,甚至thang刣死來攻擊猶太人ê人,kah奪取in ê財產。就án-ne,猶太人ē-tàng避免被殺害滅絕ê危機。

第1到2節,chia講以斯帖chit時chiah kā國王講以斯帖是伊ê親屬。Á國王確實深teh疼以斯帖,伊沒收哈曼所有財產,kā它贈送hō͘以斯帖。然後以斯帖委任末底改管理。Koh講,國王kā哈曼手上ê國王手指取落來(參考三:10),改戴tī末底改ê手上,án-ne,末底改tùi án-ne了後,ē-tàng被得tio̍h允准thang進入王宮晉見國王。

第3到6節,以斯帖趁此機會向國王哭訴哈曼ê計畫,就是beh滅絕所有猶太人。因為án-ne,伊請求國王收tńg來哈曼用伊ê名義發出chit項大屠殺ê御旨。因為猶太人是伊ê同胞。

第7到8節,chit兩節thang參考第一章19節、第三章 12節,chiah-ê經文lóng有說明波斯帝國時代,國王發出御旨了後,是無法度更改ê。亞哈隨魯王聽以斯帖ê提醒了後,伊mā表示無法度更改頂pái發出ê御旨。M̄-koh為tio̍h beh平衡頂pái御旨可能帶來大屠殺猶太人ê危機,伊hō͘末底改koh一pái用伊ê名義發出御旨,而且tòe末底改ê意思發出,這表示只要末底改認為妥當ê方式,就照伊ê意思用國王名義發出新ê御旨。

第9到10節,「西灣月」,意思是teh指三月,這是聖經中kan-taⁿ有提起ê一pái。末底改緊急發出國王御旨hō͘所有屬下一百二十七個省ê省長kah行政官員。通告是用各省ê方言kah猶太人ê語文寫ê,án-ne所有猶太人kah所有波斯帝國屬下ê人民lóng thang清楚知影chit項御旨ê意思。而且chit件御旨是用特急件發出。

	第11到14節,chit項御旨hō͘ in猶太人thang武裝起來,抵抗所有beh刣滅kah欺負in ê外族人,m̄-nā án-ne,甚至thang奪取in ê財物kah殺害in ê厝內人。Tú好kah本來哈曼計畫beh刣滅猶太人ê策略仝款,只是chit-má改成猶太人thang án-ne對付外族人。

    第15到17節,末底改所穿ê服裝是當時波斯帝國看起來siōng尊貴ê服飾,包括藍色、白色、紫色等。Tī原本哈曼ài beh進行大屠殺猶太人ê日子,chit-má卻變成猶太人免遭大屠殺,而且ē-tàng公然武裝報復仇敵ê日子,因為án-ne,in tùi原本悲傷、哀哭、披上麻衣、倒tī灰裡ê慘狀,變成「充滿歡喜快樂,歡宴放假來慶祝」。有真chē當地ê人lóng因為驚惶猶太人而紛紛加入猶太籍。這mā是猶太人從來無想tio̍h ê事。

經文:

以斯帖記 9:1-9:19

註釋:

Chit章說明猶太人並無因為得tio̍h國王名義發出ê御旨只專tī保護家己族人,卻是進一步大屠殺其他族人,反tńg藉機刣死in ê仇人,結果竟刣死共計七萬五千人。然後舉行慶祝會,大家hō͘贈禮物。並且kā chit慶祝ê日子定名為「普珥節」,hō͘後代kiáⁿ孫知影記念chit節日。

Chit段資料是真值得深思ê記事。當hiah-ê想beh屠殺猶太人ê亞甲人,已經會失去機會無法度進行in本來beh執行哈曼滅絕猶太人ê計畫,chit時ê猶太人m̄-nā無寬容ê心,反tńg是進行殘酷ê報復行動。Chit種舉動絕對m̄是聖經ê教示。

第1到5節,早先哈曼頒下國王御旨,是beh tī十二月十三hit工進行大屠殺猶太人,m̄-koh hit工m̄-nā無人趕執行chit項御旨,因為新ê御旨已經出現,hō͘猶太人thang組織起來對抗任何來欺負in ê人。有組織,就會hō͘想beh欺負in ê人驚惶。其實,ná親像第3節所講ê,tùi上到下ê所有官員lóng幫助猶太人,因為in看見末底改已經擁有真大ê權勢,大家lóng驚伊。這mā hō͘猶太人「thang隨心所beh對待in ê仇敵」,進一步koh屠殺仇敵亞甲人。

第6到10節,chia講猶太人單單tī首都書珊就刣死五百人,包括kā哈曼ê十個家族lóng殺害à。

第11到12節,因為書珊城是首都,刣死五百人ê後,呈報到國王hia。國王mā相信其他城市mā仝款bē少。因為án-ne,伊問以斯帖iáu beh甚麼?其實,國王chit句話已經teh表示應該停止à。

第13到15節,m̄-koh以斯帖並無想beh停止,伊想beh繼續報復。伊要求國王kā哈曼ê十個kiáⁿ屍體掛tī絞刑台頂示眾做警戒。書珊城ê猶太人koh繼續殺害三百個亞甲人。

第16到17節,chia講除了書珊城,其他城市ê猶太人mā組織起來殺害仇敵,就án-ne總共刣死七萬五千名。這是名符其實ê大屠殺,因為單單一工就刣死chiah-ni̍h chē人。

雖然出埃及記第廿一章23到25節記載摩西律法中允准「以眼還眼、以牙還牙」ê報復行為,m̄-koh,tī新約中耶穌基督ê教示非常重要:「M̄ -koh, 我kā lín 講,tio̍h 疼lín ê 對敵,tio̍h 替迫害lín ê 人祈禱。 Lín 若án-ne 做,就會成做天父ê kiáⁿ 兒,因為祂 hō͘ 日頭照 pháiⁿ 人 kah 好人,mā 為tio̍h 義人kah 不義ê 人落雨。(全民版)」(馬太福音五:44—45)。伊ê教導是「bē-tàng向欺負lín ê人報復」(參考馬太福音五:39)。雖然tī第10、15、16節等等三節lóng強調猶太人並無奪取仇敵ê財物,m̄-koh這並無表示in ê心地有jōa好,in仝款是殘酷ê。

第18到19節,chit兩節說明有兩種慶祝普珥節ê傳統,一是書珊城ê人tī亞達月十五日慶祝,而其他村鎮則tī亞達月十四日舉行。Lóng仝款是歡樂lim食,而且彼此互相贈送禮物,就kah-ná teh舉行嘉年華會仝款。

經文:

以斯帖記 9:20-10:3

註釋:

Chit段經文lóng是記載有關末底改kah以斯帖怎樣強調遵守普珥節ê重要性,因為hi̍t節日是為tio̍h記念猶太人tùi死亡ê邊緣得tio̍h重生ê機會。真可能是因為有人並m̄遵守chit節期,所以chiah需要由以斯帖用王后ê權威寫phoe支持末底改ê呼籲。

第20到23節,chia講末底改kā chit件事ê經過lóng記錄落來,並且發信hō͘全亞哈隨魯王所統治之下ê猶太人,ài in每年ê亞達月十四到十五這兩工確實遵守chit節日,當做記念猶太人tùi原本可能被滅絕,變成ē-tàng消滅想beh滅絕in ê敵人而生存落來,並且beh利用chit-ê節日救助sàn-chhiah人。

第24到28節,因為當時哈曼是用「抽籤」來決定時間,而抽籤chit種動作就叫「普珥」。因為án-ne,猶太人ê每一個家庭lóng tio̍h世世代代遵守chit節日,並且kā它稱做「普珥節」。Mā thang án-ne講,kui本以斯帖記就是beh說明普珥節由來之歷史背景。

第29到32節,chit段經文koh一pái說明末底改發信hō͘全國猶太人一定tio̍h遵守外,另外以斯帖mā以伊ê名義kah末底改ê名義共同發信,ài猶太人遵守這普珥節ê節日。因為普珥節tī摩西律法中並無提起。因為án-ne,chit節日ē-sái講是猶太人遵守律法外ê另外一個傳統節日,到taⁿ iáu-koh繼續tio̍h。

第十章1到3節,第1節清楚說明tī亞哈隨魯王ê時代,國勢iáu是真強,足以強徵各地附庸國ê人民為伊服勞役。Á第2節則說明波斯帝國mā是真重視史料ê王國,這tùi第二章23節、第六章1節等等經文lóng thang看tio̍h波斯王朝對史料ê重視。第3節提起末底改事實上已經取代了哈曼成做亞哈隨魯王身邊ê要臣,mā就是宰相,深受猶太人ê尊崇,因為伊hō͘猶太人免tī被滅絕。

重新查詢