重新查詢
經文:

傳道書 1:1-1:18

註釋:

Chit章一開始就提出作者對性命ê觀點,mā預先為chit本冊提出共同主題—空虛。作者認為tī chit世間其實並無新ê事,一切lóng像kui個宇宙星辰一般,性命lóng是án-ne周而復始ê循環。

Chit章thang分做兩個段落,一是第1到11節,chit段經文除了紹介本經卷作者外,mā kā本冊卷ê內容做簡介。因為án-ne,本段經文mā ē-sái講是chit本冊卷ê序言。二是第12到17節,Tī chit段經文中一再強調ê主題是:追求屬tī人間世間ê智慧、事物等,結果lóng會是白忙一場。

第1節,「tī耶路撒冷做王」,tùi大衛王開始,到所羅門了後ê耶羅波安,直到西底家末代國王為止,只要是猶大王lóng是tī耶路撒冷作統治者。因為án-ne,並無確定chit位作者是甚麼人。「傳道者ê語錄」,chia ê「傳道者」一詞tī本冊卷中共計出現七pái(參考一:1、2、12、七:27、十二:8、9、10)。Chit-ê詞mā thang當做是「老師」,動詞有含「聚集」ê意思。「語錄」帶有用堅定ê語氣teh指導聽者得tio̍h正確á是清楚ê方向ê意思(參考十二:9),因為án-ne,chit句「傳道者ê語錄」ê意思,thang講是老師teh為問題chhōe答案(參考七:27)ài幫助有giâu疑ê人。

第2節,「空虛」,chit-ê詞ē-sái講是kui本傳道者ê中心題旨,tī本卷中共出現35次。此字原本是teh指tī清早看見空氣中ê霧氣,當陽光出現ê瞬間,會tī chiah-ê霧氣看見súi、鮮豔ê光彩,m̄-koh霧氣真緊to̍h消失phah m̄見去。作者講「人生空虛,一切lóng是空虛」,chit種句型是漸進、加強語氣,表示性命中一再出現「空虛」ê各種經歷。

第3節,tùi chit節到第9節chit段經文中,一再出現「日頭下腳」一詞,而tī kui本傳道書中,共計出現29次。所謂「日頭下腳」,表示tī人生存ê實況範圍á是性命ê極限之內。Koh講,所謂「日頭下腳」mā teh表示無隱藏ê所在,即使tī隱密ê所在,mā會hō͘發見。「操作勞碌」,chit-ê「勞碌」一詞,mā構成chit本經冊ê重要用詞,共計出現22次。除了表示身軀ê勞苦(參考詩篇一二七:1),mā thang講是心靈上ê痛苦(參考詩篇廿五:18)。「益處」,原本是商業上ê用詞,表示「利息」、「獲利」,mā thang做「滿足」。

第4到7節,chit段經文thang用一個常聽見ê詞句來表示,就是「周而復始」。其實,這四節mā是teh強化第2到3節所講ê勞苦終生,所得tio̍h ê最後lóng tio̍h歸還原處。所謂「一代過去,一代koh來」,這是teh指性命ê一種週期,bē停止。「世界」mā thang表示「大地」,而「日頭」、「風」、「江河」等,lóng以一定ê規律tī振動、運轉,in存在ê定律bē改變,mā bē消失。Chia用「koh再tùi hia出來」、「循環無停」、「歸回原發ê所在」等用詞,kah第4節所提起ê「世界總是仝款」仝款ê意思,表示kui個上帝所創造ê宇宙lóng是不斷循環,包括人ê性命mā是仝款,一代續落來一代,包括人在內ê kui個世界並無會停止。因為一停落來,就是末日來臨à。

第8節,「萬事」,是teh指第4到7節所提起ê一切,作者用「人」、「日頭」、「風」,kah「水」來表示。「厭倦」,chit-ê詞mā表示「乾燥」、「無味」,á是「困乏」ê意思,mā表示已經習認為常,無甚麼感覺。因為án-ne無法度講述完整性命ê感受,因為有「目chiu金金看,看不飽;耳聽,聽不足」,性命lóng是感覺有欠缺,無法度完全滿足心意,而這mā是一種痛苦á是「空虛」。

第9到10節,ná親像第4到7節所提起ê,一切lóng會照原訂ê規律繼續無停ê運轉,而且是周而復始。因為án-ne,以前「發生過ê事iáu beh發生;做過ê事iáu koh khah koh做」,表示就是因為án-ne,chiah會hō͘人感覺性命ê空虛。當人自認為發見新鮮事ê時chūn,phah開歷史ê資料來看,會發見原來過去已經有人做過à。特別是tī性命ê旅程中,人會發見死亡時刻圍tī身邊,而且揮之m̄去,chit時chūn chiah會感受tio̍h家己ê軟弱kah有限,而且無法度超越自身ê瓶頸kah界限。

第11節,chit節是相對句型,用「往昔ê事」kah「今後發生ê事」做對照。Á「無人追念」kah「mā無人記tiâu」,是仝款ê意思。Chit節表示性命ê時間是過得hiah-ni̍h快,一下就lóng bē有人去懷念,因為世事替換ê siuⁿ緊,來不及詳細看,koh有另外一種事、物出現。人真緊to̍h會bē記得今á日發生ê事,即使是非常有名望ê人mā是仝款,時間一久就無koh有人記tiâu(參考九:5)。

第12節,chit位傳道者講伊「tī耶路撒冷做過以色列ê王」,chit句話kah第1節所講ê仝款。因為伊bat擁有君王ê榮耀kah富貴,因為án-ne,伊thang tùi真chē智者身上學習tio̍h一般人所學習bē-tio̍h ê事物,包括智慧在內。

第13節,chit位傳道者「決心用智慧探求,考察天下發生ê一切事」,表示chit位君王真認真teh走chhōe想明白「天下所發生ê一切事」,就chit點來講,chit位有君王身分ê傳道者算是bē-bái ê一位。M̄-koh伊發見「上帝hō͘人類ê擔子是jōa-ni̍h-á沉重」,chia所講ê「沉重」,mā thang表示無法度了解,對tī真chē bē明白ê事物,即使追求、探索beh知究竟,結果lóng是白忙一場。M̄-koh身為君王,koh一定tio̍h明白一切chiah ē-tàng治理好國家,卻發見無法度知影事故發生ê原因,心情tùi án-ne「沉重」起來。

第14節,chit位君王「觀察了世間ê一切事」,伊發見所有ê「一切lóng是空虛,等於捕風」,因為「風」是掠bē-tio̍h ê,因為án-ne,等於虛無,mā就是「空虛」ê意思。這「捕風」一詞共計出現9次(參考一:17、二:11、17、26、四:4、6、16、六:9)。

第15節,chit節真可能是古代ê諺語。Chit句「彎曲ê物件無法度變直」,這表示既定ê事實是無法度改變ê。Á「無存在ê事物無法度數算」,chia所講ê「無法度數算」ê物,就ná海邊ê細沙,天頂ê星辰hiah-nih-chē。意思是人ê能力,是無法度改變已經存在ê現象,特別是人所ē-tàng承載ê氣力非常有限。

第16節,這是一句出tī示巴女王o-ló所羅門王ê話(參考列王記上十:7),認為伊「比任何一個統治過耶路撒冷ê人lóng有智慧」,而列王記作者mā認為所羅門王是「比世間任何一國ê君王koh khah富有,koh khah聰明。全世界ê人lóng想覲見所羅門,beh聽上帝賜hō͘伊ê智慧ê話」(參考列王記上十:23—24)。

第17到18節,mā因為án-ne,chit位有智慧ê君王「決心辨明智慧kah愚昧,知識kah狂妄」之間ê差別,m̄-koh結果ná親像一般世人勞碌仝款,lóng是「捕風」,白做無益而已。作者有一個深切ê體驗,就是學jú chē,想jú chē,結果發見苦惱mā jú chē。假使是án-ne,結果iáu是仝款,是空虛、捕風。

經文:

傳道書 2:1-2:26

註釋:

Chit章作者感覺一切lóng是空虛ê時,想beh有所改變ê方式是選擇「享樂」來突破性命ê侷限,而伊所講ê享樂是teh指感官上ê享受。

第1到3節,傳道者ê心內已經決定beh án-ne做,就是親身去體會tio̍h底「享樂」、「享福」對性命ê意義是甚麼,結果家己ná親像小丑仝款,hō͘人看起來就想beh發笑。表示會失去分辨能力,「享樂lóng無益處」,無得tio̍h想beh得tio̍h ê。就án-ne想beh「藉酒自娛,走chhōe快樂」,因為「酒」thang hō͘人目nih-á bē記得苦惱,可能hō͘人感覺興奮,á是hō͘身軀減輕痛苦感覺舒暢。M̄-koh ná親像俗語所講ê「借酒澆愁,愁koh khah愁」。

第4到8節,作者想用建造花園ê方式,改變生活環境,希望用chit種方式來hō͘家己快樂。伊建造富麗堂皇ê建築物,ná親像皇宮一般。而且iáu栽種葡萄樹,而且「修造庭院果園,種植各種果子樹」,並「挖掘水池,灌溉樹木」,這lóng teh表示chit-ê人若m̄是一個大財主,就是一個君王。有chiah-ni̍h堂皇ê大厝kah廣大ê庭園,就需要有人來幫忙整理。因為án-ne,chit-ê人就去買來真chē「男女婢隸」來協助整理看管。Tùi第8節ê描述來看,chit位大財主真親像所羅門王,因為伊有一千個嬪妃(參考列王記上十一:3)。M̄-koh卻因為有chiah-ni̍h chē ê財富kah嬪妃,hō͘伊棄sak了上帝,án-ne並無值得。因為離開上帝,人就會「隨心所欲」到最後會喪失一切。

第9到11節,chit位君王á是大財主,確實是真富有,伊ê富有「強大,贏過任何在耶路撒冷tòa過ê人」,並且自認「頭尾有智慧」。Chit-ê自認真有智慧ê君王á是財主,kā身上ê財富用來「盡情享受,無受拘束」,伊認為chiah-ê錢lóng是家己辛勞得tio̍h ê,應該hō͘家己好好á享受,這是一種對家己辛勞得來ê「報酬」,ná親像第4到8節所描述ê一切,án-ne看起來,全部所做所為lóng是理所當然。M̄-koh當伊「回顧」觀察ê時,便發見「家己ê成就,思想所付出ê辛勞」lóng白費,因為伊「領悟到一切lóng是虛空,lóng是捕風」。就án-ne伊講「日頭下腳ê一切lóng無益處」,chit句話koh一pái tńg來到了第一章3節所提起ê。因為所有ê物件lóng會變化、摧毀、消失。

第12節,「一個君王所ē-tàng做ê,lóng是用往ê君王所做過ê」,chit句話回應第一章9到10節。意思是無甚麼是新ê,lóng是舊ê。Chia thang看tio̍h一個自認真有智慧ê君王,所ē-tàng做ê事mā m̄是甚麼新事,án-ne,伊ê智慧koh算是甚麼?kah狂妄、愚昧koh差jōa-chē?其實是仝款ê。

第13到14節,chit兩節用智慧kah愚笨作比較khah。真正「智慧」是會「贏過愚昧」,至少智慧者會知影人ê性命有限,需要上帝ê扶持,比起「愚笨ê人卻tī黑暗中摸索」,是beh好過千倍。聖經作者ài用「光明」kah「烏暗」來說明性命ê兩種結果,就是生kah死。Tī chia作者講聰明人kah愚笨ê人,結果lóng仝款。原因就是人lóng會死,無任何人ē-tàng用家己ê方法hō͘ 性命延長、bē死(參考路加福音十二:25)。其實兩個之間ê差別是:

聰明人因為看見可能會面臨死亡而操心,會想出所有ê辦法beh脫離;而愚昧人卻是因為無敏感度,á是根本就是無知。M̄-koh兩個ê結局果lóng仝款面對死亡。

第15節,「愚昧人ê遭遇mā是我ê遭遇」,因為作者自認真有智慧(參考第9節),m̄-koh tī chia卻真清楚指出,任何人lóng一定tio̍h面對死亡ê來臨,這tú好是傳道書ê中心題旨:死亡,是上帝賞賜hō͘人類siōng公平ê禮物。作者tī-chia koh加上一句,儘管是聰明,只要想tio̍h死亡,就bē感覺聰明對性命有甚麼特別「益處」à。因為án-ne,伊講「一切lóng是空虛」,表示人對死亡根本就無法度掌握,mā無法度制止,只有ē-tàng眼睜睜地看tio̍h它ê來臨。

第16節,chit節回應了第一章11節。Chit節講出第14到16節所提起ê,只要是死亡,大家lóng仝款ê,無任何人例外。這真清楚講tio̍h「無論是智是愚,lóng tio̍h死去」,無任何人ē-tàng因為聰明有例外。

第17節,chit節回應了第3節所提起ê,作者teh追求智慧ê驅使心之下,開始走chhōe性命ê意義,m̄-koh結果卻發見死亡罩tiâu tī每一個人ê性命,hō͘人消耗真chē時間teh思考án怎避免死亡,事實卻是人永遠脫離死亡ê威脅。

第18到19節,chit兩節是作者對性命ê省思。人一生「辛勞」lóng是會累積「財富」(m̄-nā是thang數ê金錢,mā包括才能、知識、性命經歷等無形ê財富),因為「無法度m̄ kā一切留hō͘後人」,chiah-ê累積ê財富會由甚麼人繼承?koh khah重要ê,繼承ê是「智」者,á是「愚」笨ê人?這只有上帝知影。因為人看起來聰明ê,往往是上帝眼中ê愚昧者。

第20到21節,chit兩節thang參考路加福音第十二章16到20節。Chia提起「智慧、知識、技能」等三樣,總括代表ê意義就是智慧。經文中提起m̄-koh雖然擁有chiah-ê,m̄-koh,kah得tio̍h遺產ê人互相比較,心內iáu是真m̄甘願,因為得tio̍h遺產ê人是不勞而獲。

第22到23節,「操心、辛苦、勞碌」等用詞lóng指仝款ê意思。因為勞碌ê結果仝款是「痛苦愁煩」,結果致使「夜夜bē-tàng安寧」,表示身心lóng受tio̍h痛苦。

第24到25節,作者tī chit三節講出性命siōng基礎ê要件就是:性命需要有上帝ê參與,只有án-ne,chiah是得tio̍h幸福ê泉源。作者強調只有tī「上帝ê旨意」之下,人「ē-tàng lim食,享受伊辛勞ê成果」,án-ne chiah算是siōng大ê「幸福」。第25節ê「若m̄是出tī上帝」,chit句話mā ē-sái講是kui本傳道書ê中心思想,講出一切lóng是出tī上帝ê賞賜,若無,人即使勞碌一生累積真chē財富,性命mā無法度滿足。Ē-tàng享受食ê、lim ê,其實lóng是tùi上帝來賞賜ê結果。因為án-ne,tio̍h用感恩ê心來回應,而且會知影珍惜,因為這一切lóng是上帝賞賜,這mā是為甚麼祖先lóng會警告kiáⁿ孫bē-tàng暴殄天物ê原因。

第26節,chit節是相對句。「智慧、知識,kah喜樂」chiah-ê lóng是上帝賞賜ê恩典。Chit種恩典是賞賜hō͘ hiah-ê屬tī上帝「歡喜ê人」。相對ê,上帝所無歡喜ê人,就是「罪人」,mā就是只知影想tio̍h家己享受,卻bē記得上帝恩典ê人。Chit種人,無論累積jōa-chē,最後lóng會親像捕風仝款,一無所有。

經文:

傳道書 3:1-3:22

註釋:

Tī第一到二章先紹介chit位傳道者自認真有智慧,ē-tàng掌控性命,m̄-koh家己卻發見無論án怎努力,甚至更換生活方式,結果lóng失敗。Chit時chūn,傳道者開始tùi生活kah自然界ê定律來反省,koh khah明明確知影性命無法度靠家己ê氣力改變,因為伊發見其中是用上帝ê「律」tī運行。

Chit章thang分做兩個段落,一是第1到8節,傳道者認為每件事lóng有上帝ê計畫kah時間表。二是第9到22節,ài人學會曉謙卑,知影家己ê有限kah脆弱。

第1節,傳道者講「天下萬象lóng 有它ê 期, 萬項事lóng 有它ê 時。(全民版)」,作者認為會án-ne有「定期」出現,是因為時間是上帝所創造ê,因為án-ne,時間mā tī上帝ê掌握中,人ê氣力無法度改變上帝ê時間表。所謂「性命ê時間表」就是án-ne體會出來ê。

第2到8節,tùi第2節開始到第8節,作者用十四則例,講出廿八個「ê時」,說明規律ê重要性,而且tī chit廿八個規律中,lóng是用相對詞表達。

「生有時,死有時」,這真清楚講出性命ê出現kah消失,lóng有上帝ê旨意。

Tùi chit句「栽種有時,拔除有時」開始,到第3節ê「拆毀」kah「建造」,lóng是teh描寫人類行為ê兩極性。「栽種」,這ē-tàng指掖種。每一種作物lóng有其生長時間,tī無適當ê時間掖種,植物成長ê效果就會變差,甚至無法度生長,因為無仝ê季節,氣候ê變化mā無仝。「拔除」,就是teh指收割。果子提早收成,成熟度會不足,m̄-koh太晚採收則會過熟而落果,甚至腐爛。

「殺害」kah「醫」是對應型態,同第2節ê「生」kah「死」之間ê差別仝款。「殺害」,這是teh指殺害性命,可能kah戰爭有關係。當戰爭出現,就會有「拆毀」ê景象出現,m̄-koh「拆毀」了後mā時常會有「建造」,ná親像耶路撒冷城kah聖殿,tī主前586年被拆毀,然後koh重新「建造」起來。「醫」是teh指救治破病á是受傷者,hō͘伊免tī死亡。戰爭後ê修復工作繼續不斷來teh進行。人類ê愚昧tú親像是án-ne顯示出來,發動戰爭破壞,然後chiah來透過醫修復。

「啼哭」kah「歡笑」對應,然後用「哀慟」kah「舞蹈」對應。Chiah-ê lóng kah人ê感情、感受等有密切關係,是屬tī人ê情感。

第5節提起ê事是比較khah無容易明白ê一節。原文本是teh指「hiat tàn」石頭kah「堆聚」石頭,可能是teh指一種遊戲,á是耕田整地?á是親像《現代中文》譯本ê「同房」kah「分房」?m̄-koh chit種「hiat tàn石頭」kah「堆聚石頭」mā用來形容拆毀kah重建ê工作;拆毀已經不堪使用ê厝,然後建造新ê厝,mā就是hiat tàn kah堆聚石頭ê意思。M̄-koh chit種hiat tàn kah堆聚之景象,mā常見teh相刣ê時chūn,摧毀敵方ê建築物、橋樑,á是任何障礙物。M̄-koh當佔領者為tio̍h beh防衛,就需要堆聚石頭為障礙,來預防止敵方進攻。

另外一方面是tī巴勒斯坦地區真重視婚姻,舉行婚禮通常lóng是kui個村落ê大事。因為án-ne,所有少年人會聚集同心協力為teh beh新婚ê男子建造新ê厝,當新婚夫婦進新ê厝,就ná親像台灣俗語所講ê「進洞房」,因為án-ne mā會描寫為「同房」。「分房」則是teh指長大ê gín-á結婚成家,就是tùi父母「分房」出來。「親燒熱」kah「冷淡」,前者講出熱情歡迎ê狀態,而後者講出人之間產生「距離」,mā就是分房後ê情景。

「chhōe」原本是teh指「獲取」,tú好kah「遺失」相對應,kah「保存」kah「棄sak」是仝款ê意思。

「拆裂」kah「縫補」是鮮明ê對應句。以色列人民tī親人往生ê時,會用拆裂衫褲ê方式來表示哀傷(參考創世記三十七:34)。拆裂衫褲mā teh表示卑賤ná親像癩koê病人仝款,是人見人厭ê對象(參考利未記十三:45)。「拆裂」,mā ē-tàng用來表示「分裂」ê意思(參考列王記上十一:30—31)。「縫補」mā當做遮掩ê意思,ná親像人犯罪了後,發見家己赤身露體,就趕緊the̍h無花果樹ê樹葉遮掩家己(參考創世記三:7)。相對tī頭前ê「拆裂」表示分開、分裂,tī chia mā thang用來當做「復合」ê意思(參考以西結書三十七:17—19、22)。續落來ê「緘默」kah「言談」,mā是相對字詞。「緘默」mā常用來表示悲痛哀傷到極點(參考約伯記二:13,耶利米哀歌三:28)。「言談」,指ê是高談論闊,滔滔不絶ê講話。

「疼」kah「恨」就ná親像「戰爭」kah「和平」,lóng是屬tī相對ê詞。Chia ê「疼」kah「恨」,並無kā重點khǹg-tī私人層面,而比較khah是關係民族、部落,甚至是國家kah國家之間ê關係。Án-ne,kah下半句ê「戰爭」kah「和平」就thang對稱。「戰爭」kah「和平」,tī人類ê歷史上一直重演。

第9節,「一切ê勞苦」,指ê是頭前2到8節所敘述ê,說明一切lóng有上帝ê旨意在其中,既然án-ne,作者反問人「一切ê勞苦有甚麼路用neh」?是teh指人bē明白chiah-ê事ê緣由。Chit時,就會感嘆人ê勞苦意義何在?

第10節,「咱負荷沉重ê擔子」,表示上帝並無hō͘人知影頂面所講chiah-ê景況,hō͘人感嘆性命ê空虛、辛勞,卻lóng無所得。

第11節,chit節是chit章經文ê中心,講出上帝創造án-ne有「秩序」ê生存環境,人ê問題是無法度清楚明白上帝ê用意。上帝「為萬事特定適當ê時間」,這是tùi創世記第一章所記載有關上帝創造時間ê記事來看,說明有特定ê時間teh運轉,而且是運轉得非常穩定。就tī chiah-ê繼續無停ê時間運轉之下,傳道書作者講這是創造主上帝為tio̍h beh hō͘人有「永恆ê意識」,知影上帝teh掌管一切,m̄-koh並m̄是ài人完全明白。這mā表示人真oh明白上帝ê旨意,除非有上帝親自啟示。

第12到13節,傳道者改變一個生活態度,既然無法度成做永恆ê主宰,只有ē-tàng目nih-á存在ê時,倒不如退一步tńg來掠tiâu chit-má ê每一刻。「lim食,享受辛勞ê成果」,這是人手上所ē-tàng掠tiâu、掌握ê,無法度放棄,因為chiah-ê lóng是「上帝ê恩賜」。因為án-ne,ē-tàng享受這目nih-á ê辛勞成果,mā是一種幸福(參考二:24)。

第14節,當人kah創造萬物ê上帝相比,人是jōa-ni̍h-á ê渺小、不足、脆弱、有限。Á相對tī上帝,祂是「永遠長存」。因為tī上帝手中,無過去、chit-má,á是將來。因為祂是永恆ê主宰,無受時間、空間ê限制。有限ê人根本無法度改變永恆ê上帝所創造ê一切。

第15節,chit節真清楚講出以前發生過ê事,chit-má koh繼續發生,在世間無新鮮事,原來這是「上帝hō͘仝款ê事重複出現」,是有上帝ê旨意在其中,m̄是無緣無故。

第16節,chit節mā是約伯記ê主要議題:為甚麼好人會受苦難?相對ê問題是:為甚麼作惡ê人飛黃騰達?作者發見在應該有「公道kah正義」ê所在,卻出現「邪惡」。伊講:「tī chit世間,應該有公道kah正義ê所在,反tńg有邪惡」,chit句話講出人對無合理ê事物有無力感。用聖經作者普遍ê話語,就是「罪惡」。Tī無公義ê社會中,chit種罪惡siōng明顯出現ê所在就是法庭,法庭內出現無公義ê審判。

第17節,「是好人,是pháiⁿ人,上帝lóng tio̍h審判」,chit句話thang參考啟示錄第二十章12節。「每件tāi-chì,每種行為lóng有特定ê時間」,chit句話thang參考本章第2到8節。表示每一件事lóng有上帝參與其中。因為án-ne,bē-sái公義、不守公道,lóng會成做hō͘ 上帝嚴厲懲罰ê原因。

第18節,「上帝teh考驗咱」,為tio̍h是幫助人koh khah明白,而且願意順服上帝ê旨意。「人不比獸高明」,chit句話表示人常違背上帝ê旨意,反tńg其他受造物lóng會聽從。

第19節,chit節緊接上句話,說明kui個受造物lóng有仝款結果,因為án-ne,人不比其它受造物koh khah偉大,mā不比其它受造物koh khah聰明,而且siōng後面對ê結果仝款,lóng有死亡teh thèng候。

第20節,thang參考創世記第二章7節、19節等等。人kah獸類lóng是用地上土粉造出來ê,mā「lóng tio̍h歸回土粉」。

第21節,chit節清楚表明審判ê主權tī上帝,m̄是人。因為人是受造物,無審判性命ê權柄,只有上帝chiah有審判萬物ê主權。

第22節,作者koh一pái強調,人ē-tàng「享受伊辛勞ê成果」是siōng好ê事,mā是上帝賞賜hō͘人ê「運命」,這就是享受,chit種句話重複出現(參考五:18、九:9)。



經文:

傳道書 4:1-4:16

註釋:

Chit章看起來khah無一個明確ê主題,m̄-koh脫離不了本來所傳達ê主題:tī日頭下腳,一切lóng是空虛。

第1到3節,ná親像頭前已經有提過ê,傳道書ê作者無可能是所羅門王,因為chit段經文講tio̍h社會無公義ê事,擁有權勢者對弱勢者ê欺壓,hō͘傳道者認為若beh án-ne受苦,倒不如無出世。

「欺壓」,這是teh指強者對弱者ê壓迫。通常是teh指tī財物上ê勒索、奪取。M̄-koh卻因為得bē-tio̍h救助kah伸冤,因為án-ne,傳道者認為若án-ne,則「死去ê人」反tńg是「比活teh ê人幸福chē了」。雖然是án-ne ê講法,傳道者mā提出相對ê看法,是活teh總比死去iáu koh khah強(參考傳道書九:4)。原因是活teh ê人,iáu有平反ê機會,若是死去ê人就無。不過傳道者認為性命siōng痛苦ê事,就是看見痛苦,卻無法度伸手救助,因為án-ne,傳道者認為án-ne無出世反tńg khah好,因為無出世就bē tú-tio̍h chiah-ê事。

第4到6節,傳道者講無需要因看tio̍h別人飛黃騰達就心生羨慕,因為名利財富真緊to̍h會過去。Chia講「功名」,是teh指因聰明帶來ê成就,m̄-koh tī chiah-ê讚賞ê背後,卻mā會隱藏tio̍h眾人ê嫉妒,若án-ne,勞碌ê結果並m̄是為人帶來甘甜kah歡喜ê感受,顛倒,是ná親像「捕風」仝款,盡感空虛。作者引用一句流行tī當時ê俗語,就是「愚戇人遊手好閒,hō͘家己餓死。」chit句話說明愚戇ê人pîn-tōaⁿ到極點,bē有任何利益thang講。Chia ê「餓死」,表示傷害家己。Á第6節ê論點tú好介tī第4 kah第5節之間。雖然是只「the̍h一小kā而心安理得」,就bē親像第4節所講ê,只知影「勞碌工作」thàn取koh khah chē,結果是一無所得。

第7節,chit節ê「koh看見」,kah第1節ê「觀察」、第4節ê「發見」,lóng是teh指tī「日頭下腳」看kah非常清楚ê現象。

第8節,「無kiáⁿ,mā無兄弟」,chit-ê人是「孑然一身」,chiah-ê用詞lóng teh表示伊ê財產無論累積起來有jōa-chē,lóng bē有家己親人繼承。這表示就算伊thàn取非常chē,到最後iáu是beh留hō͘別人。Á chia提起「kui工勞碌,從來bē滿足」,chit點chiah是傳道者所beh傳達ê中心信息。一個人若是bē滿足,伊必定bē tī工作中得tio̍h快樂,卻是一種貪婪ê表現。

第9到12節,傳道者Tī chit段經文中用正面ê語氣講tio̍h伙伴關係。

Chia講「因為兩個人合作效果koh khah好」,表示兩個人同齊工作「效果koh khah好」,表示是一種報償,mā有含上帝賞賜ê意思(參考詩篇一二七:3)。
兩個人ē-tàng互相扶持,chiah bē容易「跋倒」。Chia「跋倒」一詞是teh指跌落溝渠、深坑,表示會致使性命危險ê狀況下。Mā thang表示判斷失誤,一個人出現失誤ê機率比兩個人合作思考ê失誤率高。

「兩個人同睡彼此lóng暖kah」,這thang做夫妻ê譬喻,mā ē-tàng指旅行ê路程中,有一個伴侶,m̄-nā安全,koh ē-tàng互相取暖。Chit句話mā用來形容tī tú-tio̍h逆境ê時,有人陪同,總比一個人孤獨好。

「兩個人合力thang抵抗一個人ê打擊」,這是teh指外出tú-tio̍h盜賊侵襲,兩個人就ē-tàng聯手抵抗。「三股合成ê索á是無容易chhoah斷ê」,這是一句流行ê俗語,tī各種民族中lóng有。表示團結ê氣力大。

第13到14節,chia講tio̍h君王出身ê背景,kah伊ê家世並m̄是有絕對關係。M̄-koh kah上帝有密切關係。通常「出身貧寒」ê人真容易被社會忽視。M̄-koh智慧並m̄是來自富裕ê家庭,á是皇宮貴族,卻是tùi上帝來賞賜。上帝hō͘貧寒者有智慧,伊就ē-tàng突破sàn-chhiah ê限制。Á真正有智慧ê人mā bē受tio̍h牢獄之災ê侷限。Ná親像約瑟仝款。「年老ê時chūn愚昧,m̄肯接受忠言」,chit種人往往會做出「晚節不保」ê事來。因為人年老ê時,往往思路遲鈍。

第15節,「中間有一個少年人會起來代替舊王」,這是世間ê定律,俗語所講ê「長江後浪推前浪」,表示人ê各種能力、體力、智力lóng會跟tòe年齡ê增長而退化,新一代ê活動力會jú來jú強盛,終其尾取而代之。傳道者用chit種方式teh說明:無論人過去jōa-ni̍h-á有能力建立真chē基業,總有一工iáu是會hō͘新一代所取代。

第16節,傳道者tī chit節做個總結。無論是jōa-ni̍h-á偉大ê君王,「統治無數ê人民」,m̄-koh只要伊一死情況總會改變。尤其是tī政治上,統治者一死,所有過去統治ê對象lóng會改變。

經文:

傳道書 5:1-5:20

註釋:

Chit章講tio̍h有關信仰ê問題。真少人會注意tio̍h宗教信仰ê問題,一直環繞tī人性命中,無法度分開。特別是tī以色列民族,宗教信仰是一切ê中心,in m̄-nā以宗教信仰成做kui個民族立國ê基礎,mā用宗教信仰建構人kah人之間ê關係。Tī chit章中,ē-tàng看出傳道者表達一個真重要ê觀念:正直kah單純,是敬畏上帝ê基礎。若是無敬畏上帝ê心,人所有ê一切,m̄-nā無利益,反tńg有害,甚至可能延禍到下一代。

    第1節,「你到上帝ê殿去,tio̍h小心。」chia所謂「上帝ê殿」,是teh指敬拜上帝ê場所。M̄-koh kui個大地lóng是上帝創造ê,而且祂是無所不在ê上帝。因為án-ne,無論任何地方,lóng ē-tàng成做敬拜上帝ê殿。Chit-ê意思是任何地點、時刻,lóng tio̍h心存敬畏。「tio̍h安靜學習,贏過hiah-ê不明是非ê愚戇人去獻祭」,chit句話已經清楚表明,到敬拜上帝ê所在siōng重要是注意聽上帝ê話語。 

第2節,「開嘴以前tio̍h先想看māi」,所謂「開嘴」,意思是teh指祈禱。祈禱是kah上帝講話,bē隨便講講了事,這是非常錯誤ê心態。「m̄-thang chhìn-chhái向上帝下願」,chit句話thang參考箴言第二十章25節。Á「用不着喋喋不休」,意思是teh指話真chē。Á這mā是耶穌所講ê,祈禱無需要án-ne(參考馬太福音六:7)。

第3節,chit節其實就是tī談祈禱應該有ê態度。「事務繁多,惡夢mā chē」,chia所講ê「事務繁多」,是teh指人心ê bē滿足,想beh tī物慾生活上追求koh khah chē,chit種人,最後只有hō͘家己心神耗費koh khah chē,而結局惡夢連連。另外一方面,「事務繁多」mā是teh指心不專心斟酌,卻是心有旁騖,chit種祈禱m̄-nā bē有結果,反tńg是一種對上帝ê不敬。「言語chē,就容易顯出愚戇」,有敬虔心靈ê人,祈禱ê時並無會刻意講真chē話,因為伊深知上帝會垂聽敬畏並敬拜祂ê人ê祈禱(參考約翰福音九:31)。

第4到5節,chit節thang參考申命記第廿三章21到23節。聖經記載幾則下願koh還願ê故事,親像:雅各(參考創世記廿八:20—22、三十五:6—7、14);先知撒母耳ê老母哈娜(參考撒母耳記上一:11、24—28);士師耶弗伊(參考士師記十一:30—31、34—40)等,lóng tī說明向上帝下願,就一定tio̍h還願,án-ne chiah是正確ê下願態度。若是不真實ê下願,倒「不如不下願」來得實在。

第6節,chit節主要teh說明講話一定tio̍h有所約束,m̄-thang隨便講褻瀆上帝ê話。因為上帝是審判者,祂鑒察人ê心思意念。Á人ê話,往往是tùi心內意念發出來。換句話講話一定tio̍h誠實。若無,kan-taⁿ會「招惹上帝ê忿怒」。

第7節,chit節是整段頭前六節經文ê總結,傳道者用「敬畏上帝」chit句話做結尾。如論是做事、講話,lóng一定tio̍h用敬畏上帝ê心,mā就是一定tio̍h用誠實做基礎,án-ne chiah ē-tàng留存永遠。

第8節,chit節thang參考第四章1節。作者真清楚,有權勢ê人會用伊ê權勢來迫害人民,chit款tāi-chì自古以來,人ê世界並無因為教育普及有改變,反tńg因為知識koh khah chē,欺壓貧困人民ê手段koh khah細膩,有真chē「官官相護」ê事件,因為án-ne,看見chit類ê事mā「免得驚奇」。

第9節,「甚至君王mā óa靠田地ê出產來供應」,chit句話真清楚說明欺壓農民ê結果,是傷害家己而已。因為有農民chiah有食物。因為án-ne,好ê君王會重視土地公平正義。Tī chia mā thang kā「田地」看做是「國家」。換句話講,侵佔別人ê國家,kan-taⁿ會為家己帶來損失,bē有任何利益。

第10節,「貪愛錢財ê人總m̄知足」,使徒保羅講chit種行為就是「拜偶像」(參考以弗所書五:5,歌羅西書三:5),而貪財是萬惡ê根源(參考提摩太前書六:10)。「貪」這字ê另外一面,就是自私。Á「羨慕財富」ê人,chiah會kā性命耗費teh追求財富,結果就算是財富滿滿,卻得bē-tio̍h上帝ê賜福(參考路加福音十二:20),chit種性命mā是「空虛」。

第11節,chit節講出一般人看「富有」,就是óa靠伊食飯ê人真chē,m̄-koh真正富有,是tùi性命ê知足建構起來。卻m̄是tùi數字jōa-chē來判斷。

第12節,chit節thang參考傳道書第四章4節。「勞工」kah「有錢人」,是相對ê人物。前者是靠家己ê勞力thàn錢,卻ē-tàng心安理得「睏kah香甜」。相對ê,有錢人若是用不正當手段奪取、欺壓別人得tio̍h財富,這kan-taⁿ會為家己帶來koh khah chē ê煩惱、愁苦,甚至「無法度成眠」。

第13節,這是「累積財富」對人ê性命所帶來ê災「害」,無任何益處。這mā是俗語所講ê:財富chē,並無一定是福氣。

第14節,「經營不善」,指ê是災害帶來ê結果。Chit種災害,是teh指人用不正當手段奪tio̍h來ê,表面上看起來thang hō͘下代kiáⁿ孫得tio̍h真chē,結果卻「喪失一切」,甚至會遺害後代。

第15到16節,chit兩節thang參考約伯記第一章21節,提摩太前書第六章7到8節。性命是tī上帝手中,上帝hō͘人空手出世,mā hō͘人空手tńg去。人ê性命是來自土粉,mā會tńg來歸土粉(參考詩篇九十:3,傳道書三:20)。

第17節,「烏暗、悲愁、操心、病痛,kah怨恨」,chiah-ê用詞ê意思lóng仝款,是teh指人tī所經歷性命ê苦難(參考詩篇九十:10)。

第18到19節,「上帝所賜目nih-á ê一生」,chit句話thang參考詩篇第三十九篇5節、第九十篇9節。作者認為人活teh ê日子裡,ē-tàng「lim食,享受tī日頭下腳辛勞得來ê成果」,就是性命siōng大ê幸福(參考傳道書二:24)。因為上帝賞賜性命hō͘人,就是beh hō͘人享受ê。Kah-ná tī伊甸園中,人thang享受園內所有ê一切。

第20節,續落去tī第19節,既然是tùi上帝來ê恩賜,即使性命是「目nih-á」,mā m̄免「煩惱」,意思是teh指m̄免擔心夜間會睏bē去。

經文:

傳道書 6:1-6:12

註釋:

Chit章是用對比ê方式看性命ê意義,傳道者提起兩組對照:其一是富者kah貧困者;其二是長壽kah夭折làu胎ê胎兒,兩個之間tùi外表看起來雖有差別,m̄-koh最後ê結果卻lóng仝款ài面對死亡ê來臨,chit點mā是kui本傳道書ê主旨之一。

第1到2節,「我發見」,這kah「我看見」是仝款ê意思。「重重地壓」,這壓力其實就是teh指「榮譽、財富、產業,kah伊想beh ê一切」等,chiah-ê tī任何時代lóng會hō͘人認為是siōng好ê性命禮物,mā teh代表是來自「上帝賜福」。聖經beh表達ê一個信念:一個人擁有chiah-ê,lóng是tùi上帝來ê賞賜。既是tùi上帝來賞賜,就是好。M̄-koh若是上帝賜福hō͘人擁有頂面所講chiah-ê,而「m̄ hō͘伊享受,卻hō͘生份人享受」,這說明性命ê主宰者是上帝,m̄是人家己。換句話講,人若擁有chiah-ê世人看做siōng珍貴ê物,卻無法度享受,chit種性命是空虛ê,因為kah上帝賞賜ê本意無仝。表示人雖然擁有chiah-ê珍貴ê物,卻kah上帝疏遠à。

第3到4節,chit節thang參考申命記第十一章21節;詩篇第一二七篇3到5節等等經文。Chit節thang看tio̍h傳道書作者tī chia所提起ê,to̍h是聖經作者一向teh標榜ê siōng大福氣,ná親像頭前所提起ê,kah上帝連結做伙,chiah ē-tàng享受上帝所賞賜ê一切,若無,即使生湠chē-chē,享長壽,mā lóng是空虛ê。

Chia ê「死後koh bē-tàng安葬」,意思是無人會因為chit-ê人過世感覺悲傷,mā bē想好好á ê幫伊辦後事,甚至是期待chit-ê人早日離開世間。Chit種人,通常lóng是極權統治者,á是kan-taⁿ會剝削貧困勞工ê大財主(參考耶利米書廿二:18—19)。傳道者講,若是有頂面所講chiah-ê景況,he chiah是真正悲哀,khah輸「一個làu胎ê胎兒」來得好。

第5節,第4節是正面語法,chit節則用反面ê語句講述。描述胎兒「無見過陽光」,kah第4節ê「消失tī黑暗中」,仝款ê意思。因為tī日頭下腳,所看見ê勞碌lóng是空虛、捕風。「無知覺」,表示伊完全bē受tio̍h人間ê不幸所影響。M̄-koh「至少得tio̍h安息」,表示無煩惱mā bē被攪擾,á是m̄免koh再擔心任何事ê發生。

第6節,chit節是用來對照無出世活tī chit世間ê胎兒。Chit節有一個假設性ê前置詞「假設」、「如果」。「活了兩千年」,回應第3節所提起ê「在世長壽」。其實,真實ê世界並無人ē-tàng án-ne長壽,「兩千年」只是用來表示一段非常久ê時間。傳道者認為無論性命長á是短,甚至像被墮掉ê胎兒,lóng仝款,結果lóng是會死亡(參考傳道書三:19—20)。傳道者用chit種方式teh表達:ē-tàng真實享受上帝所賜ê恩典,性命chiah有意義。

第7節,「人為家己ê口腹勞碌」,chit句話ná親像台灣俗語所講ê「活teh為圖謀三餐勞碌」,á是常聽ê「開門七件事—柴、米、油、鹽、醬、醋、茶」。M̄-koh「卻永遠填不滿腹肚」,表示追求口腹之慾會hō͘性命感覺飽足是一種錯誤ê觀念。

第8節,chia用「聰明人」kah「愚戇人」對比。Chia真清楚指出chit兩種人lóng只是無閒終生,卻無好好á享受上帝賞賜ê恩典,án-ne,in之間koh有甚麼差別。Chia講「叫sàn-chhiah人知影怎樣kah人來往」,這「來往」ê意思thang指出兩個面向:一是sàn-chhiah人並無有時間去學習有錢人ê生活禮節;二是叫sàn-chhiah人去面對性命困境並無意義。因為in是連為tio̍h beh飽足三餐勞碌lóng已經來不及à。

第9節,傳道者kā性命ê重點khǹg tī第9節:滿足。這是性命圓滿siōng好ê解釋。「ē-tàng滿足tī家己所有ê,khah贏過貪得無饜」,這是相對句型,說明追求心靈ê滿足,chiah是有智慧ê人。Á智慧是tùi認bat上帝得tio̍h(參考詩篇一一一:10,箴言一:7、九:10)。Chit句話kah俗語:「一鳥tī手,比兩鳥tī樹koh khah好。」是仝款ê意思。

第10到11節,「已經發生ê事是早to̍h命定了」,chia ê「命定」,原本用ê字是「亞當」,意思是teh指上帝用土粉造出來ê人。既然是土粉,表示性命就是有所限制,無法度超出上帝所創造ê範圍,mā就是性命最後lóng會有仝款ê終結—歸tī土粉(參考創世記三:19,傳道書三:20、五:15)。「人無法度kah比伊強大ê抗辯」,chia ê「強大」者,是teh指上帝。人想beh kah上帝抗辯?he是無可能ê。因為「jú抗辯,jú感覺無益,對家己mā無好處」,約伯ê經歷是真好ê例。上帝用約伯記第三十八到四十一章回應約伯ê申訴後,約伯後siōng感覺非常見笑而向上帝講出懺悔ê話(參考四十二:1—6)。

第12節,「目nih-á」、「空虛」、「影兒飛逝」等等chiah-ê用詞,lóng teh表示人ê有限kah脆弱。人想beh tī chiah-ni̍h短促ê性命旅程中,清楚辨識性命ê「價值」,確實真oh。如果tī人活teh ê日子lóng無法度掌握siōng重要、siōng有意義ê事,án-ne,人koh怎樣ē-tàng知影死後會發生ê事?

經文:

傳道書 7:1-7:29

註釋:

Tùi第七章開始到第九章中,作者kā重點khǹg tī「好名譽」,以及「生」kah「死」chit兩個主題上。Tī第七章則真親像箴言仝款,傳道書作者收集一連串ê諺語,tùi chiah-ê諺語mā thang看出社會中共同ê基本性命價值kah態度。

第1到6節,傳道者lóng是用相對詞句,而且是比較khah性ê字「贏過」來表達作者對性命價值ê判斷,án-ne容易hō͘讀者清楚思路ê方向。

「好名譽贏過珍貴ê香水」;香水灑tī人ê身上,通常會往下流,m̄-koh,好ê名譽卻會往上提升,而且傳播ê範圍會擴大。而且,香水ê氣味kan-taⁿ會teh霧ê附近散發,m̄-koh好ê名譽卻會傳播到超越人ē-tàng想像ê所在。「死ê日子贏過出世ê日子」,chit句khǹg tī chit節下半,tú好回應ê上半句所講ê。因為一個人死去,chiah ē-tàng評斷出伊ê名譽,所謂「蓋棺定論」。一個人可能活teh ê日子非常風光,m̄-koh tī死後卻無得tio̍h好ê名聲,伊生前ê風光景象,ná親像霧tī全身ê香膏油一般,香味四溢,m̄-koh卻khah輸好ê名聲thang繼續久長。Chit種現象tùi獨裁者身上thang看tio̍h chit種見證,反tńg是被獨裁者陷害ê義人,往往名垂青史。

「有喪事」kah「有宴會」,成對比ê現象。去前者ê厝,贏過去後者ê厝,tī下半句作者解釋了原因,因為到喪家去,會hō͘人tùi迷糊中醒悟過來,知影無論家己jōa-ni̍h-á有權勢,總有án-ne ê一工,iáu是仝款會死亡。

「憂愁贏過歡樂」,原因是憂愁ē-sái「心智koh khah敏銳」,因為tī苦難中會hō͘人對性命ê理解koh khah深刻。人類共同ê性命經歷,是因為tú-tio̍h苦難,chiah會對性命有koh khah深刻ê體驗,teh詮釋對性命ê意義ê時就koh khah有影響力。

第4節ê「愚戇人」kah「明智人」是相對ê。「歡樂」是目nih-á ê,ná親像詩人所講ê,人ê一生即使活到八十歲,所得tio̍h ê「只是勞苦愁煩」(參考詩篇九十:10)。明智ê人會清楚知影「壽命有限」,當人知影家己ê性命有限ê時,就會曉珍惜、把握,bē浪費時間tī hiah-ê不必要ê事物上。

第5節講「明智人ê責備」必定是真實,chit種責備比kan-taⁿ會講諂媚ê話koh khah有益tī性命。因為「愚戇人ê讚揚」就是teh指諂媚ê話,he kan-taⁿ會hō͘人失迷、陷入墮落ê網中,一點幫助mā無。

第6節是流行tī中東地帶ê一句諺語。古ê時中東地帶因為chē屬荒野地帶,刺phè chē,普遍被當做柴火,火燒得緊,耐燒熱點低,而且火燒時常會發生真大ê爆裂聲。因為án-ne,有chit句諺語是用來形容「虛假」、「不實在」,意思是講:一個人kan-taⁿ會講,bē做。

第7節,「欺詐」kah「o͘-se」是仝款ê意思。做一個人看起來真「明智」,m̄-koh伊卻無用「明智」來幫助人,顛倒,卻用來「欺詐別人」,chit種人就是「愚戇人」。仝款ê,一個人接受「o͘-se」,kan-taⁿ會「損pháiⁿ家己ê品格」。Chia ê「品格」,所代表ê是一個人ê「德性」。

第8節,「tāi-chì ê終局贏過開端」,原因是「終局」ē-tàng看出成果。「忍耐贏過傲慢」,chia ê「忍耐」有含謙卑ê意思。若án-ne,謙卑相對tī「傲慢」。Á傲慢人ê心中無上帝(參考詩篇十四:1)。Chit種人ê性命會親像無根ê樹,真緊lian去,mā ná親像糠粃被風吹散,消失無蹤(參考詩篇一:4)。

第9節,chit節thang參考哥林多前書第十三章4到7節。Chia ê「受氣」,是teh指tùi性命經歷ê困擾中所發出「憤怒」(參考傳道書一:18、二:23)。

第10節,chit節thang參考以賽亞書第四十三章18節。如果講「往昔ê日子」比chit-má好,表示chit-má是退步ê,等於承認家己無長進。

第11到12節,chit兩節是tī回應第10節所講ê「往昔ê日子」。因為chia講「有性命ê人」,就是teh指chit-má活teh ê人。Á chit-má活teh ê人「應該有智慧」,表示活teh ê人應該清楚家己kah性命ê主上帝之間ê關係。「產業」,表示財富ê意思。舊約聖經ài用「產業」表示kah上帝有密切關係ê對象。Án-ne講起來,「產業」mā是teh表示一個kah上帝有約ê關係ê對象。Chit種人,應該是屬tī認bat上帝救恩ê人。所以認bat上帝ê人,會知影上帝就tī伊身邊teh庇護伊,hō͘伊無koh驚惶敵人á是威脅性命ê人侵犯。因為有智慧ê人,會知影怎樣óa靠上帝來擊退威脅性命ê氣力,而這絕對m̄是用「金錢」thang換來得tio̍h ê。

第13節,thang參考第一章15節a句。

第14節,「喜樂kah患難lóng出tī上帝」,這表示性命ê生á是死,lóng是tī上帝ê旨意中進行。「將來beh發生ê事甚麼人ē-tàng預知?」chit句話thang參考以賽亞書第四十一章22到23節、26節、第四十三章9節。一個真正認bat上帝ê人,就會知影每件事ê背後lóng有上帝奇妙ê旨意在其中。M̄-koh人永遠無法度預先明白上帝ê旨意。

第15節,tùi chit節開始,傳道者koh開始探討一個不時hō͘人討論ê性命問題:為甚麼好人lóng是tú-tio̍h真chē困境,而pháiⁿ人卻是萬事順利,甚至飛黃騰達?約伯記作者提出chit種問題,詩篇第七十三篇ê詩人mā有chit種問題。其實,傳道書作者beh表明一個基本認bat:性命掌握tī上帝手中,甚麼人作惡?甚麼人行善?上帝非常清楚,人行善á是行惡kah壽命長短無直接關係,也kah性命ê境遇無直接關連。一般箴言lóng是講善有善報、惡有惡報,m̄-koh tī chia傳道書作者卻提出無仝ê看法,mā是伊tùi「觀察了真chē事」了後ê心得而發見,chit種善有善報、惡有惡報並m̄是性命ê定律,實際上mā會發生「好人行善,反tńg早死,pháiⁿ人作惡,倒享長壽」,tī詩篇第七十三篇mā有chit種見解。M̄-koh先知以西結提出無相仝ê看法,認為上帝是希望hō͘ hiah-ê作惡ê人有機會悔改(參考以西結書三十三:11),因為祂是慈悲ê上帝。

第16節,chia所謂「行善過度」,意思是teh指人自認為tī善事頂面lóng做kah比別人chē koh好,án-ne,真容易掉落tī自認為義ê陷阱中。「自作聰明」,這是siōng容易hō͘家己受傷害ê愚戇者chiah會有ê表現。

第17節,「pháiⁿ」kah「狂妄」,這lóng是一種罪ê表現。二者lóng顯示出心中根本to̍h無上帝chiah會有chit種心態。

第18節,「兩種極端」,是teh指第16到17節。「只要敬畏上帝」,是teh指心中隨時lóng認定上帝chiah是性命ê主宰,án-ne,人teh做任何事情ê時lóng會謹慎,m̄敢誇耀家己ê才華、能力,mā bē愚昧到自認為真聰明。

第19節,「智慧hō͘人ê幫助」,因為智慧是teh指認bat上帝。認bat上帝ê人所得tio̍h ê氣力,是thang「贏過十個長官對城市ê貢獻」。

第20節,chit節thang參考列王記上第八章46節ê「無人不犯罪ê」chit句話。約伯記第十五章14到16節,以及箴言第二十章9節lóng有類似ê話。詩篇ê詩人甚至講,tī上帝眼中,世間無一個「行善ê人」(參考詩篇十四:3)。台灣俗語有類似ê話:「鼻孔朝下,無一個好人。」

第21到22節,「m̄-thang kā別人ê話lóng khǹg tī心上」,chit-ê話是teh指別人ê批評,甚至是有損尊嚴ê話。就聽tio̍h來自奴僕ê侮辱ê時,tú好講出主人必定有嚴重ê錯誤。仝款ê,當咱想beh侮辱別人ê時,mā tio̍h提醒家己bat有過受侮辱ê心境。

第23節,「用我ê智慧」,表示人用家己所知影ê一切,想beh追求真實tùi上帝來賞賜ê智慧,m̄-koh卻發見家己所知影ê真有限,而且發見智慧kah人ê距離「真遠」。

第24節,「甚麼人ē-tàng探測性命ê意義?」這並m̄是人ê智慧所ē-tàng理解ê,因為性命是上帝創造ê,太奧秘à。因為án-ne,只有tńg來到上帝裡chiah有辦法知影。

第25節,傳道者講伊原本是想beh「走chhōe智慧」來解答心中ê giâu疑,結果m̄-nā無chhōe-tio̍h智慧,反tńg「發見邪惡是無知,愚昧是瘋狂」。

第26節,「有kóa cha-bó͘人比死亡驚人」,這是teh指in會誘惑cha-po͘人去做違背上帝旨意ê事,ná親像tī伊甸園中,cha-bó͘人誘惑cha-po͘人kah伊同齊食上帝禁食ê果子仝款。只有「蒙上帝歡喜ê人ē-tàng逃脫」,意思是teh指tī上帝面前khiā立會tiâu,á是hō͘ 上帝看做是義人ê人,因為上帝會賞賜hō͘ chit種人有智慧,知影怎樣抗拒cha-bó͘人ê誘惑,而脫離災難。

第27節,傳道者會án-ne講,因為伊是經過一段時間思考chiah「一點一點發見出來ê」。「tī千名男子中,我thang chhōe-tio̍h一個可敬佩ê,m̄-koh tī cha-bó͘-gín-á中,一個mā chhōe bē-tio̍h」,chit句話ê意思,其實是teh指cha-po͘人kah cha-bó͘人lóng仝款,chhōe bē-tio̍h有智慧ê人。Cha-po͘人用「一千」比「一」,表示少到可憐,差不多不存在。Á cha-bó͘人mā仝款,世間差不多看bē-tio̍h真正有智慧ê cha-bó͘-gín-á。

第29節,chit節ê意思是teh指:上帝創造人kah萬物ê時,原本只希望人用祂賦予 ê形像,好好á管理世界,m̄-koh人卻m̄知滿足,hō͘原本單純ê世界因為人ê私beh而變kah一團混亂。

經文:

傳道書 8:1-8:17

註釋:

Chit章koh一pái講tio̍h性命kah能力ê有限,這是人ê所認為人ê特徵,任何人都無甚麼差別,活在世間ê日子ē-tàng用各式各種ê權勢、能力、財富威嚇別人,m̄-koh結果lóng仝款,甚麼mā帶bē走。

第1節,「只有明智人」指ê是「智慧者真少ê意思。「智慧hō͘伊面有光彩」,chit句話講出一個真正認bat上帝ê人,ná親像人ê面上容光煥發,hō͘別人看tio̍h ê時mā會得tio̍h性命ê ǹg望。摩西tī山頂面見上帝了後,落山來ê時就是滿面光彩(參考出埃及記三十四:29—35)。詩人講上帝ê話ná親像性命ê亮光(參考詩篇一一九:105),hō͘知影而且認bat ê人性命ê道路bē行偏。

第2節,chit節koh一pái提起君王ê問題,就是m̄-thang隨便去違抗「王ê命令」,而是beh「遵守」。Chit種講法,是古代國王繼任ê時,lóng會向上帝chiù-chōa,beh遵守上帝ê道,而人民mā會chiù-chōa表示擁戴。這就是講「m̄-thang隨便向上帝下願」,既然已經chiù-chōa下願beh án-ne做,就一定tio̍h照所下ê願án-ne去做。類似chit種觀念mā tī使徒保羅寫hō͘羅馬教會ê書信中出現,m̄-koh m̄-thang bē記得使徒保羅會án-ne強調,是建構tī統治者有照上帝ê旨意做tāi-chì(參考羅馬書十三:1—7)。Koh講,使徒保羅chit種努力,伊想beh hō͘羅馬統治者知影:基督徒並無親像猶太領導階層ê人所毀謗ê,基督徒lóng是作惡ê份子,卻是遵守國家規矩ê良好公民,chit點chiah是伊寫該段話語ê主要用意。

第3節,chit節講出tú-tio̍h「隨意做tāi-chì」ê國王、領導者、領袖、統治者,siōng好ê方式,就是「離開伊」,因為不離開chit種「隨意做tāi-chì」ê國王,等於是kah伊仝伴,mā就是「留tī危險ê地位上」,意思是跟tòe作惡ê國王á是統治者是真危險ê事。因為in任意殺害人,跟tòe tī in身邊ê人mā會hō͘家己陷入犯下隨意殺害人ê網中而m̄知。

第4到5節,「王ê話有權威」,表示chit-ê國王是一個獨裁者,chiah會「無人ē-tàng抗拒伊」chit種場面出現。M̄-koh chit種君王kan-taⁿ會帶hō͘人民koh khah chē ê痛苦,hō͘人民過悲慘ê生活,而bē帶hō͘人民幸福kah快樂。會認bat國王ê命令,就會知影怎樣避開禍患,án-ne就有性命ê「安全」。Koh講,chia mā講出tī一個獨裁者體制下beh生存,就一定tio̍h清楚知影chit位統治者命令之真實用意是甚麼,án-ne chiah ē-tàng保存性命免tī不必要ê苦難。這mā是「聰明人知影做事ê適當時機kah方法」。

第6到7節,「適當ê時間kah方法」,這是上帝賞賜hō͘人ê機會,m̄-koh真正會掠tiâu chit-ê機會ê人,m̄是家己有甚麼能力,原因是人ê智慧kah能力非常有限ê,除非是有上帝啟示chiah ē-tàng得tio̍h。即使是位居高官顯要mā仝款,「無人知影將來beh發生甚麼事」,因為只有上帝chiah知影(參考以賽亞書四十一:4、26、四十二:9、四十四:7、四十五:21、四十八:3、6)。
第8到10節,lóng是講tio̍h有權勢者kah hiah-ê無權勢ê被統治者之間ê差別,mā有意提出hō͘有權勢ê統治者知影警戒。

「無人ē-tàng bē死,mābē-tàng決定家己ê死期」,ná親像頭前已經提起過ê,傳道書作者歡喜講tio̍h性命死亡ê事,基本上,傳道書作者想beh kā所有讀者講對性命應具備ê基本認知:性命會面臨死亡。無論是hiah-ê擁有極大權勢者mā是仝款,lóng會因為死亡而消失,即使後代對伊歌功頌德mā仝款。統治者kah被統治者之間ê差別;前者就是teh指「一kóa人有權力」ê人,而後者就是「tī in下底受苦」ê人。傳道者講無論生前擁有jōa-chē權力,甚至是hoah起hoah倒風雲,mā仝款會死。M̄-koh chiah-ê作惡ê人,平時表面上看起來kah-ná真有信仰ê款,因為án-ne,死後就被kah in同齊敬拜ê人o-ló,講in是生前jōa-ni̍h-á敬虔,chit-má死後一定會升天去享受上帝hō͘ in ê尊榮kah喜樂。其實,這lóng是虛假ê o-ló,tī上帝ê面前並無一定真實。

第11節,傳道者認為就是「因為罪無馬上受tio̍h懲罰」,chiah會hō͘ hiah-ê作惡ê人「án-ne大膽犯罪」。Mā就是一般人所講ê,無隨時出現應該有ê報應,所以chiah hō͘作惡ê人膽敢繼續囂張枉法,作奸犯科。會án-ne有chit種想法,可能是有兩種觀念形成:一是認為上帝慈悲,bē輕易受氣,koh有豐盛ê慈愛(參考出埃及記三十四:6—7,詩篇一○三:8—10)。二是ná親像使徒保羅所講ê,人知影上帝仁慈,故意不悔改,執意繼續作惡(參考羅馬書二:4),這是一種輕視上帝恩典ê態度。

第12節,「犯罪百次」,表示chē到無法度thang數。M̄-koh chit種人卻是「享長壽」,這其實真不公平。M̄-koh「享長壽」並無一定就是福氣。Chit-ê意思是teh指作惡ê人jú享長壽,伊所犯ê罪惡jú深重,對chit-ê人有甚麼好處?傳道者確信,真正hō͘人感受tio̍h性命ê快樂,是因為「敬畏上帝」,chit種人必定會體驗tio̍h「事事亨通」,chia ê「亨通」,是teh指甘甜、美好。這表示心中敬畏上帝ê人,伊做事lóng會有上帝同行、帶領。儘管行過ê路徑真艱困,卻充滿tio̍h活力。

第13節,一般lóng希望如chit節所講ê,作惡ê人,真緊to̍h會消失,á是性命會夭折。事實上並m̄是án-ne。卻是tú好kah第12節所提起ê仝款,惡人是享長壽。只有一點是真正,就是作惡ê人,是bē敬畏上帝ê。就是因為in心中根本to̍h無上帝。

第14節,chit節是對偶句型。傳道者講出性命ê無奈,kah無法度理解ê真實現象:就是該臨到惡人ê報應,卻tī好人ê身上看見;而tī好人身上應該有ê報答,卻teh做惡ê人ê身上出現。因為án-ne,作者講這是無法度明白ê事,是真「空虛」ê事。

第15節,傳道者提出chit種解決方法:「應該享樂。」理由只有一點:這是上帝賞賜hō͘人「目nih-á ê性命中勞碌所應得ê一點享受」。作者chit種觀點mā有另外一個用意,m̄-thang kā所得累積起來留hō͘下一代,因為並m̄知繼承者是明智者,á是愚戇者(參考二:18—19)。

第16到17節,ná親像頭前所提過ê,作惡ê人享長壽,而且tī第14節所提過ê現象,傳道者真想明白,希望ē-tàng用家己所有ê智慧、認知去了解,m̄-koh卻是老想bē出一個所以然來。M̄-nā án-ne,想beh「明白上帝ê作為」,卻mā總是bē明白,窮盡所有力量想beh知影「日頭下腳所發生ê事,mā chhōe bē-tio̍h答案」,這就是性命ê奧秘,只有上帝chiah知影。M̄-koh人對上帝ê認知卻是真少。

經文:

傳道書 9:1-9:18

註釋:

Chit章有一個特色,就是傳道者用第一人稱來論述。另外在chit章ê主題內容有一個特別ê所在,就是作者一再強調真chē事物確實是真oh理解。因為án-ne,作者用「m̄知」、「無人知影」chit種句話來描述。其實,這mā是續接第八章17節所講ê「無法度明白」、「並m̄知」ê思想主軸,表示人ê能力實在是非常有限,beh了解性命ê問題真正真oh,人無法度知影上帝tī伊ê性命中有何旨意。

第1節,chit節講出kui章ê中心思想:一切lóng tī上帝ê支配下。Mā就是講上帝掌管一切ê性命,包括有智慧ê人kah義人。Chia所講ê「這一切」是teh指第八章16到17節所描述世間ê一切事,m̄-koh mā thang指頭前幾章經文中所提起有關性命ê事。

第2節,chia雖然無說明「仝款ê運命」是teh指甚麼,m̄-koh tùi第3到5節thang看出,所講tio̍h ê「運命」其實是teh指「死亡」。Chia作者用相對ê句型講出六組無仝ê人:

一是「義人á是邪惡人」,前者是teh指認bat上帝,mā kah上帝有和好關係者。後者是teh指m̄信上帝,而且心中根本就是無上帝,kan-taⁿ會照家己喜愛揀選óa靠ê對象,mā就是拜偶像者。

二是「好人á是pháiⁿ人」,這mā thang用「潔淨á是無清氣」來看,而潔淨á是無清氣所代表ê意義就是心地是m̄是純潔。

三是「虔誠ê á是不虔誠ê」,這是有關敬拜上帝ê態度是m̄是真心。

四是「獻祭ê á是不獻祭ê」,有獻祭ê人,表示ê是有敬拜上帝ê人,顛倒,無獻祭,就是代表輕視上帝ê人。

五是「好人ê遭遇無一定比罪人好」,chia所謂「好人」,指ê是根據上帝ê命令、規律做tāi-chì ê人。

六是「chiù-chōa ê」á是「無chiù-chōa ê」,chia ê「無chiù-chōa ê」,表示伊ê心中敬畏上帝,chit種人m̄敢隨便chiù-chōa。

作者用以上六組對照來說明一個事實:結果lóng仝款,一定tio̍h面對死亡,無甚麼分別。

第3節,「人人ê運命仝款」,chia ê運命指ê是性命終結來臨,mā就是死亡。作者講無論是甚麼人,包括hiah-ê「心內充滿邪惡kah狂妄」ê人mā是仝款,lóng會死亡。

第4節,傳道者雖然一再強調講死chiah是公平,m̄-koh伊iáu是強調活teh就是性命ê ǹg望。作者特別舉出「一條活teh ê狗比一頭死去ê獅好」為例,說明ē-tàng活teh chiah重要。Tī中東地帶,「狗」hō͘人看做siōng卑賤ê動物,mā hō͘人討厭(參考撒母耳記下十六:9,馬太福音十五:26,路加福音十六:21)。M̄-koh即使是án-ne,活teh ê狗就有機會改變別人對牠ê看法。

Á「獅」,原本不時被形容是萬獸之王(參考箴言三十:30)。M̄-koh傳道者講,就算是án-ne凶猛,人見人驚ê萬獸之王,只要一死,就是甚麼mā無。傳道者用「獅」kah「狗」做譬喻,mā是一種隱喻方式;獅thang代表有權力ê統治者,「狗」teh代表被統治,特別是hō͘殖民ê卑微人民。就算凶猛如獅般ê統治者若是死去,權勢會跟tòe消失。M̄-koh被看bē起如狗一般ê被統治之人民,只要活teh就有希望得tio̍h新ê性命,甚至取代chit位死去ê統治者。

第5節,「活teh ê人知影in會死」,chit句話講出智慧文學ê基礎,就是每一個人lóng知影家己會死,因為án-ne,當人知影死ê時刻來臨ê時,就會知影怎樣把握最後ê時間。「已死ê人甚麼lóng m̄知道」,這tú好kah活teh ê人成對比。「獎賞」kah「記念」,lóng tī指有限時間中間會hō͘世人推崇傳述ê,m̄-koh只有少數人而已,絕大多數ê人lóng會被忘ê chheng-khì-liu-liu。

第6節,「疼、恨,kah嫉妒」,chiah-ê無論是jōa-chē á是輕重,tī死去ê人身上所有ê「疼、恨,kah嫉妒」lóng會因為人ê死去而終止,唯一thang留落來hō͘後代ê只有疼而已(參考哥林多前書十三:8、13)。

第7節,chit節thang參考第二章24到26節、第三章12節、13節、22節、第五章18到20節、第八章15節等等,lóng是teh勸勉人應該tio̍h珍惜家己勞碌所得tio̍h ê,用來食、lim,而且是「快快樂樂」地享用,因為這是家己努力工作ê成果。Chia ê「去食飯」、「去lim酒」,原本ê意思是teh指「食你ê飯」、「lim你ê酒」,意思是去享受家己努力工作得tio̍h ê報酬。因為chiah-ê「飯」、「酒」並m̄是用偷、騙、奪取有ê。真正重要ê是「上帝已經歡喜接納你ê工作」,這是teh指用真實ê心tī勞碌ê工作上,án-ne chiah是上帝所歡喜ê事,mā chiah會帶有上帝ê賜福。

第8節,這是續接上節所提起ê,用tùi勞碌所得tio̍h ê錢來買衫褲穿,mā會顯示出是上帝賞賜ê記號。Á「塗芬芳ê髮油」,是teh表示尊貴。作者khah強調,這m̄是虛有ê外表,卻是一種tùi工作得tio̍h酬勞帶來ê歡喜,hō͘性命充滿活力、歡喜ê記號。

第9節,tī第四章9到12節提起兩個人共享ê歡喜ê時,清楚提起夫妻共同勞碌所得tio̍h ê,就應該用來「共享人生ê喜樂」。因為夫妻是性命共同體。

第10節,tùi chit節就thang看出傳道者一再強調ê理念,就是「無論作甚麼事,lóng tio̍h努力做」,只有án-ne chiah ē-tàng心安理得享受勞碌ê成果。傳道者tī chia beh表明一個重要ê性命觀念:工作是一種性命ê表徵,並不在tī從事甚麼工作chiah有意義,只要有工作,性命就有活teh ê意義。若無,當人死亡到「陰間」ê時,chiah-ê thang呈顯出性命意義ê表徵就消失à。
第11節,傳道者tī chia舉出五個例來說明真chē tāi-chì kah現象,是kah一般傳統ê了解無相仝ê:

(1)「真gâu賽跑ê人並無一定得獎」,意思是teh指人就算勞碌一生,並無一定會得tio̍h ê報酬。

(2)「勇士無一定phah贏」,因為這包括真chē外在因素,並m̄是軍事武力強就一定會phah贏,因為性命是tī上帝手中。Ná親像一支勇猛ê軍隊,mā tio̍h有上帝ê應允chiah ē-tàngphah贏,chit種歷史資料真chē。

(3)「聰明人無一定有飯食」,chia ê「有飯食」ê意思,是teh指過好日子。

(4)「機智ê人無一定富有」,chia ê「機智」,表示反應靈敏ê人,ná親像商場上ê seng-lí人。

(5)「能幹ê人無一定居高位」,這例tī現實ê政治環境中koh khah是俯拾to̍h是。

第12節,「人m̄知家己ê時運」,chia ê「ê時運」,表示無論是甚麼事,都無人ē-tàng事先料得準。Ná親像「魚」á是「鳥」,chit兩種動物lóng是siōng機警kah靈敏ê,m̄-koh in mā可能陷入魚網、網羅中,koh khah何況人mā會常tī「phah算無到ê時chūn」,「忽然陷tī惡運中」,這就是所謂出乎意料之外ê事一再出現tī人生活ê境遇中。

第13到15節,傳道者講伊發見一件真有意思ê事,然後舉出chit-ê例:「小城被一個強國ê王攻擊,伊圍困hit-ê城,準備破城」,這tī一般看起來lóng是絕望ê時刻,m̄-koh「城裡有一個居民,伊真窮,卻真有智慧,ē-tàng救hit-ê城」,因為伊窮,hō͘伊hō͘人疏忽了結果是hit-ê城滅亡à。

M̄-koh請注意,chit句「ē-sái講是無想tio̍h伊」,mā thang翻譯成:「伊救了hit-ê城,ē-sái講是無人記念伊。」而《希伯來文》聖經是用chit種句話:「如果hit-ê城ê人民看重sàn-chhiah人ê話,伊á是允准以解救hit-ê城。」因為這sàn-chhiah人有智慧,伊ē-tàng掌握關鍵拯救全城,m̄-koh無人注意伊,會願意聽伊ê意見。Thang參考撒母耳記下第二十章記載一則事件,就是有一個cha-bó͘人救了伊khiā起ê「亞伯‧伯‧瑪迦」chit座城。

第16節,這是一句箴言,接近俗語所講ê:「人微言輕。」真實ê智慧thang扭轉乾坤,mā thang改變歷史轉向。M̄-koh卻因為人微言輕而被忽略,因為一般人看ê,lóng是外表ê身分地位,卻bē記得真實ê智慧,往往kah家世背景無關。

第17節,「聽明智人幾句小聲ê話」,chia ê「小聲」mā thang當做「安靜無聲」ê意思,表示明智ê人會用心平氣kah ê方式說明事故kah原理。真正有智慧ê人,bē大聲吆lim。相對ê,是有權有勢ê人,往往講話teh代表權威,而伊ê屬下往往是會大聲叫ê愚戇人。

第18節,「智慧會比武器有koh khah大ê成就」,chit句話thang參考詩篇第三十三篇16到18節。因為智慧就是力量。其實,有智慧ê人mā會改變武器,科技就是一個例。Chit句「一個罪人ē-tàng挫敗真chē好事」,chia ê「罪人」表示一個心中無上帝ê人,kan-taⁿ會óa靠家己ê能力,結果反tńg是pháiⁿ了大事。

經文:

傳道書 10:1-10:20

註釋:

Chit章收集了真chē古老箴言,而chiah-ê箴言iáu不外乎teh突顯智慧者kah愚戇者之間ê差別。聖經一再提醒,智慧就是認bat上帝,而認bat上帝ê人,必定會知影人ê有限kah不足,而學會曉謙卑。相對ê,愚戇ê就是m̄-bat上帝ê人,chit種人siōng大ê特徵,就是kā家己當做神,若無,就是認為家己ê氣力,thang征服天下,hō͘人屈服。

第1節,「死胡蠅hō͘整瓶香水發臭」,chit句話ná親像第九章18節ê b句所講ê。Chit節ná親像俗語所講ê:「一粒老鼠屎,pháiⁿ了一鍋粥。」

第2節,「正直」原本意思是teh指「正pêng」,而「偏差」chit-ê詞,指ê是「tò-pêng」。Tī以色列文化傳統上有chit種看法:認為正pêng代表ê是良善、尊貴、美好,而tò-pêng teh代表邪惡、錯誤、卑賤。「行為」thang做為心思意念ê解釋。

第3節,只要小khóa注意,就ē-tàng看出甚麼人是愚戇人。因為愚戇人往往滔滔不絕地講個無停,不管知影á是m̄知,lóng會表示意見。

第4節,chit節thang參考箴言第廿五章15節、第十六章14節。「當權者生你ê氣」,表示臣僕有錯誤,á是當掌權者發性地ê時,「m̄免離開崗位」,原因是受氣ê一方往往無一定是正確ê一方,而且受氣時常會hō͘人失去正確ê判斷。Chit節mā teh表示:受氣當頭,任何解釋並無容易被接受。只有tī心平氣kah之下,chiah ē-tàng注意聽。

第5節,chit節koh一pái提起傳道者看見「不公道ê事,是統治者造成ê錯誤」,因為是統治者,mā是擁有決定國家大事ê權力者,因為án-ne,chit種人造成ê錯誤,ē-sái全民受tio̍h傷害。

第6到7節,chit兩節續接第5節所提起ê統治者造成之大錯誤,就是顛倒了兩種事實,傳道者tī chia講「不公道」,表示反常,kah一般原本建構起來ê社會秩序大無相仝。Chit兩節其實mā回應了第九章11到12節所提起ê現象,就是有能力ê人,無一定ē-tàng成做領導者。Chit種「不公道」ê事,tī傳道書中一再提起(參考三:16、四:1—3、13—16、五:8—9、八:9—11)。Tī chia,傳道者特別提起幾種現象:

(a)愚戇人居高位、掌大權,尤其是掌握經濟大權。

(b)顛倒職場倫理ê現象。

(c)chiah-ê現象tī一個講究商場利益ê世界來講,並m̄是甚麼新鮮事,只要有利益thang thàn,chit種現象就會一再發生。

第8到9節,chit兩節提起四種情形,lóng是hō͘人感觸真深ê事:
一是「挖陷阱ê,家己掉入去」,原本是beh用來陷害別人ê,結果是害了家己。Chit種句話tī詩篇中一再出現(參考詩篇七:15、九:15、十:2、三十五:8、五十七:6、一四一:10)。

二是「拆圍牆ê,被蛇咬了」,原本是beh改變疆界,á是擴大範圍,真有可能是teh指侵犯別人ê土地,就會遇tio̍h致命ê攻擊。

三是「開鑿石頭ê,被石頭壓傷」,這真可能像挖掘隧道,就常發生被石頭砸傷ê事件,一點mā不足為奇。

四是「剉木柴ê,被木頭phah傷」,這tī古代社會以木柴為主要生火材料,因phut柴受傷mā是真常見ê事。

傳道者主要teh表示:任何時chūn,無論做任何事,lóng可能有意想bē到ê事會跟tòe發生。

第10節,「斧子鈍了不磨,就tio̍h費koh khah大ê氣力。」chit句話ná親像俗語所講ê:「工beh善其事,必先利其器。」這已經是一種生活常識。Ná親像「聰明人」辦tāi-chì,lóng是會chìn前「籌畫」妥當了後chiah進行。

第11節,「蛇」,是上帝所創造ê物中siōng奸巧ê動物。傳道者講,若是beh成做「弄蛇ê」,一定會先學會曉控制蛇,若無,被牠咬了後,就無得sńgà。Chia ê「蛇」,thang用來譬喻若有特別會營鑽、貪圖私利ê人。Beh對付chit種人,就需要先想好,然後隨時出手。

第12到14節,chit三節lóng談及真正智慧者,知影怎樣小心謹慎講話。Ná親像俗語所講ê:「君子一言,駟馬難追。」講話ná親像潑出去ê水仝款,是收bē tńg來ê。傳道者khah強調對性命ê事m̄-thang立論siuⁿ chē,因為無人thang預言將來會發生ê事。

第15節,chit節是一句流行tī中東ê俗語。表示一個人若是連siōng基本ê事lóng無清楚,koh怎樣ē-tàng幫助別人?強調失迷性命方向ê人是真thang悲ê。這mā譬喻一個國王á是統治者,若是m̄知怎樣帶領一個國家行向正確ê方向,到最後就是hō͘人民無閒終生,卻是白忙一場。

第16到17節,chit兩節提起一個愚戇ê國家領導者是「國家ê大不幸」。相對ê,若君王是一個智者,he就是「國家ê大幸」。Chia所提起ê「君王年輕」,並m̄是指年齡,卻是指無知、bē-tàng、無感,mā thang講是幼稚到極點。有chit種君王,伊身邊ê寵臣就會「通宵宴樂」亂了綱紀,致使國政荒廢,受害ê就是國民。Á「君王辦事果斷」,表示真有辨識能力,知影該怎樣做出有利tī國民、社會ê決策。伊身邊ê「臣僕照時進食,ē-tàng節制,不酒狂」,這三項lóng是代表忠實ê臣僕會認真辦好ê政事。

第18節,「厝漏m̄修,soah致使厝頂裂縫,厝宅倒落來」,這是teh指用「厝宅」譬喻國家政事,形容一個國家像一個家庭所khiā起ê厝。若是一個khiā起ê屋子已經有破洞,卻iáu m̄知該怎樣補修,到最後kan-taⁿ會hō͘厝瓦解、倒落來。Chit種屋主就是「pîn-tōaⁿ人」,若是針對國政來講,國家出問題卻m̄知趕緊修改、革新,chit種君王就是「昏君」。

第19節,tī第18節講國家重臣kah君王lóng是pîn-tōaⁿ者、昏君、蠢臣, án-ne,chit節就是teh指chiah-ê官員kan-taⁿ會食、lim,享樂,卻m̄知民間疾苦。因為無論是大宴小宴,lóng會開銷國家公帑,致使稅金加重,人民koh khah苦而已。

第20節,chit節講出獨裁者統治下ê國家常有ê現象,就是用重罰箝制人民ê思想言論,認為án-ne限制人民「bē-tàng批評君王,連心內埋怨mā bē-tàng」,就算tī「睏房內mā bē-tàng」講出口,認為án-ne是天衣無縫ê禁令,m̄-koh「空中ê飛鳥可能kā你ê話傳播出去」,這真清楚表示:絕對有人會kā chiah-ê迫害ê記事留落來,流傳hō͘ koh khah chē人知影。所謂「即使tī睏房內mā bē-tàng」,表示連身邊siōng親密ê人mā bē-tàng信任。Chit款tāi-chì通常會發生tī極權、獨裁者統治之下chiah會發生。

經文:

傳道書 11:1-11:10

註釋:

Chit章mā是由真chē諺語所組成,是kah生活有密切關係,m̄-koh主題mā不外乎是論到人對性命ê認知有限,因為án-ne,做kóa預防是有幫助ê。

第1節,「Kā你ê錢投資teh對外貿易上」,原本希伯來文是teh指「糧食掖tī水面」,tī《中文和合本》、天主教《思高版本》、《呂振中教授版本》,以及《台語漢字本》lóng是採用chit種譯文。Thang án-ne理解:古早時,糧食就是資產,農村社會甚至會用糧包(chhek-á-pau)當標會ê籌碼。若án-ne,則《現代中文譯本》翻譯做「錢」並m̄是錯誤。若是「糧食」,thang譬喻做「錢」、「資產」,則「對外貿易」,就是teh指做買賣seng-lí。

第2節,「ài tī有khah好無仝ê所在投資」,ná親像第1節所提起ê,若是kā糧食、財產分配到需要ê所在去,ná親像chia所講ê「khǹg tī有khah好無仝ê所在」。「因為你m̄知tī chit世間會遇tio̍h甚麼惡運」,表示人對性命ê掌控能力非常薄弱。Mā thang講人對未來ê事所知有限,tio̍h適度分散風險,ná親像俗語所講ê「m̄-thang kā雞卵khǹg tī仝一個籃á裡」。

第3節,chit節意思是teh指該會怎樣,就會怎樣,m̄是用人ê能力ē-tàng阻擋,因為每件事ê背後,lóng會隱藏tio̍h上帝奇妙ê旨意。

第4節,「等待風調雨順」,若是作穡人種田有chit種心態,伊就「永遠掖不了種」,án-ne就「永遠無法度收割」。這說明若是beh等到外在一切條件lóng好勢chiah ài做,án-ne就永遠做不了事。

第5節,性命是一種奧秘,是上帝奇妙ê創造,即使今á日醫學科技thang藉tio̍h儀器觀察胎兒tùi受孕到成熟出世ê成長過程,卻iáu無法度理解性命ê奧秘,koh怎樣ē-tàng知影上帝創造宇宙萬物ê奧秘?

第6節,「早起暗時lóng tio̍h掖種」,意思是teh指m̄-thang等待風kah日麗ê時chūn chiah掖種,因為m̄知hit種ê日子甚麼時chūn會來到。「m̄知早起掖ê是m̄是比暗時掖ê好」,chit句話真清楚說明世界á是生活ê環境怎樣變化,無人ē-tàng知影,只有勤奮工作chiah是正確ê性命態度。

第7節,chit節表示人活teh ê時chūn,ē-tàng「享受」性命ê時刻,就是幸福ê事。

第8節,「beh為每一年ê壽命感恩」,是teh指無論活jōa久,lóng是上帝賞賜ê恩典。因為除了上帝以外,無人ē-tàng預知未來會發生ê事。性命ê時間非常有限、thang數,m̄-koh死亡卻是永遠。

第9節,「少年」kah「青春」lóng是teh指性命中siōng具活力ê階段。「隨心所欲做你歡喜做ê事pah!」,這表示少年人真有理想、異象,而且有衝勁、活力。因為án-ne,thang放心儘管去做家己歡喜ê事。

「m̄-koh,tio̍h會記得,上帝beh按照你ê行為審判你。」這是一句真嚴肅ê警語。所謂「隨心所欲卻無超過矩」,就是chit-ê意思。因為上帝是審判者,祂是性命ê主宰。希伯來書第四章13節講,每件事lóng無法度隱瞞,而且每一個人lóng ài面對上帝ê審判。

第10節,「煩惱」,mā thang做「悲憤」、「惱怒」、「忿怒」等解釋。傳道者講年青ê歲月中,若是有chit種心境纏身,就會hō͘人感覺性命真「痛苦」,這等於是tī浪費性命仝款,結果就是「空虛」,甚麼mā無得tio̍h。

經文:

傳道書 12:1-12:14

註釋:

第十二章thang分做兩個段落,第一個段落是第1到8節,是延續第十一章9節後面對少年人ê勸言,chia koh一pái提醒m̄-thang bē記得上帝chiah是性命ê主宰。第二個段落是第9到14節,mā是傳道書ê結語。

第1節,「趁你少年ê時,ài會記得你ê創造主。」chia ê「趁」一詞,表示「掠tiâu」、「緊掠tiâu」,原因「少年」時間是目nih-á久,真緊to̍h會過去。Chit節意思是teh指宇宙萬物ê創造者上帝,祂是性命ê主宰,是審判者。Tio̍h趁少年有活力ê時,學習認bat chit位創造宇宙萬物ê主宰。

第2節,chia用「日頭、月娘、星辰」,以及「雲彩」,意思是teh指做一個人iáu活teh ê時chūn,千萬ài會記得第1節所講ê「創造主」。M̄-thang等到年老ā,chiah想beh chhōe上帝。

第3節,「手股頭會phi̍h-phi̍h-chhoah」、「腿無力」、「嘴齒只chhun幾支」、「目睭花,視線霧霧無清不清」等等,chiah-ê lóng teh形容一個人已經老態龍鍾,體力衰弱ê時chiah想beh來接近上帝,á是beh學習認bat上帝。

第4節,「你ê耳á聾了,聽無看tio̍h街上ê吵鬧;推磨á是歌唱聲音你聽bē-tio̍h。」這是人衰老ê現象,有時會連講話都無氣力,á是想beh講,卻m̄知該講kóa甚麼。Mā ē-sái講是臭耳lâng ê現象,聽無看tio̍h別人講話ê聲音,甚至連敲鑼phah鼓合tio̍h歌聲ê聲音,響亮如推磨一般mā是聽無看tio̍h。Chit種人,就算傳講上帝ê信息hō͘伊聽mā是枉然。「雀鳥á初唱,你就醒來」,表示睏眠真淺,睏bē去,天未光就醒起來;á是teh指耳鳴繼續無停,ná親像雀鳥á tī耳邊叫個無停。以現代人ê狀況來講,就是走病院ê頻率khah贏過去敬拜上帝。

第5節,「驚上高處,行路mā有危險」,意思是連beh行出門lóng會感覺無安全。「頭毛斑白,精力衰退,性慾斷絕,koh khah án怎都無法度挽回了」,chiah-ê話真清楚表示:chit時人已經是到à力不tùi心ê時。就算想beh學習,mā會感覺lóng無興趣thang講,á是聽bē落去à。Á「向(ǹg)最後ê歸宿地去」,表示行向死亡。Chit時chūn,「街上kā有哀號ê聲音」,表示送葬ê隊伍tī teh等待加入送殯ê行列,á是等待看chit種喪葬隊伍經過。

第6節,chit節講「銀鍊á」、「金燈臺」、「吊繩」、「水罐」等物件,chiah-ê原本都是串做伙,無法度分離ê,若是其中任何一件有損pháiⁿ、斷裂ê時,chiah-ê器皿就會失去功效。作者用chit種方式來形容:做一個人tī性命teh beh達tio̍h終點ê時,chiah想ài會記得性命ê創造主,確實是緩不濟急,無作用。

第7節,chit節為tio̍h án-ne段經文作一個總結,就是每一個人ê「身軀kā歸還土粉」,表示無論是甚麼款ê身世背景lóng仝款,人來自土粉,就iáu原tńg來到土粉去。「咱ê活氣會歸回賜性命ê上帝」,chit句話真清楚表示:tùi上帝來ê,就beh tńg來到上帝hia。

第8節,chit節應該是傳道書ê總結。Mā回應了chit本經冊siōng起頭連續出現兩pái ê「空虛,空虛」(參考一:2),表示這是真實ê結果,事實就是án-ne。當人ê性命結束ê時,一切lóng歸回原位,性命會tńg來到上帝ê所在。

第9節,指傳道者應該有ê特質,就是一位「明智者」,mā就是真實認bat上帝ê人。Chit種傳道者,伊會「教導」,mā會無停「研究」,並且去考證所流傳落來ê「格言」是m̄是真實。

第10節,chit節講出一個好ê傳道者,就是一個認真tī「走chhōe」真理ê人,而且是一個「忠實」、「真誠」ê人,ē-sái講是本身是一個傳道者siōng基本ê要件。

第11節,傳道者mā是一位傳講「明智」信息ê人。因為án-ne,伊所傳講ê信息lóng有「督責ê功效」,ná親像「顧羊人手中hit-ê帶刺ê牧棍」仝款,表示伊誠心ê教導,mā會hō͘聽tio̍h ê人感覺刺痛、艱苦心,m̄-koh這卻對性命有啟發作用。好koh認真正傳道者會編撰教材,而且chiah-ê教材會影響深遠。Bē因為社會環境變遷而改變,mā bē因為任何壓力就改變本來ê教導。M̄-koh所有頂面所講chiah-ê lóng是來自「人類ê大牧者上帝所賜ê」,換句話講,真正智慧ê語言,m̄是人家己有ê,真正智慧結晶,是上帝賞賜hō͘人ê禮物。

第12節,tùi chit節到第14節,表示作者想beh chiah koh講幾句話,因為án-ne,伊用「iáu有一件事你應該tio̍h注意」。傳道書作者表示天下有jōa大,就有jōa-chē ê冊thang寫。M̄-koh若想beh明日時頭下事,he是無可能ê事。如果有人想beh án-ne做,最後只會hō͘伊感覺心神俱疲,結果mā是一場空虛而已。

第13節,傳道者koh一pái tńg來到伊編撰此經冊ê時ê中心思想,mā是伊siōng想講ê話,伊講:「Chiah-ê tāi-chì lóng 已經聽了à;結尾就是tio̍h 敬畏上帝,謹慎遵守祂ê 誡命;這就是人ê 本份。(全民版)」換句話講,一個真實敬畏上帝ê人,會想tio̍h ê事,就是án怎實踐上帝ê命令。

第14節,作者強調做一個人是m̄是有kā上帝ê命令落實在生活á是工作中,上帝會清楚知影。無論咱做甚麼,「á是善á是惡,連hit-ê siōng隱秘ê事,上帝lóng tio̍h審判」,chit句話mā thang參考希伯來書第四章13節;馬太福音第十二章36到37節。表示無論是甚麼人,lóng需要面對上帝ê審判,無任何人ē-tàng例外。人若存 chit種認知,就會謹慎生活,注意家己在世間所做ê事kah所講ê話。

重新查詢