重新查詢
經文:

列王紀下 1:1-1:8

註釋:

Chit章是繼續上卷第廿二章51到53節簡略紹介亞哈王ê kiáⁿ亞哈謝繼任為王了後,伊棄sak上帝ê記事。

Chit段經文描述以色列ê王亞哈謝kah先知以利亞之間ê衝突。原因是以色列ê王一再帶領人民去拜偶像神明,棄sak上帝。

第1節,chit節開始就講亞哈王往生後,摩押國就趁機會背叛北國以色列ê統治。摩押國是tī大衛時代成做以色列ê附庸國(參考撒母耳記下八:2)。後來,摩押每年tio̍h向以色列進貢十萬隻小羊kah十萬隻公綿羊ê毛。摩押王米沙敢公然背叛北國以色列ê統治(參考列王記下三:4—5),可見以色列目前ê情況是teh衰微中。

第2到4節,亞哈ê kiáⁿ亞哈謝繼任為王後,因為不慎tùi王宮頂上ê陽台摔落來而受tio̍h重傷。伊派人去求問非利士人五大城市之一ê以革倫神明「巴力‧西卜」,看是m̄是ē-tàng康復。Chit-ê神明tī新約福音書中被稱做「鬼王」別西卜(參考馬可福音三:22)。Chit-ê神明mā是tī迦南地ê人民siōng歡喜崇拜ê神,hông稱做「胡蠅王」,in認為這神明真有能力,thang醫百病。Tùi第2節thang看出以色列人民背叛上帝ê情形是非常嚴重ê,連國王出狀況lóng去詢問非利士人ê神明,hit人民就koh-khah免講à。M̄-koh上帝ài先知以利亞去質問亞哈謝派去ê奴僕,為甚麼無問上帝,卻去問非利士人ê神明。並且ài先知以利亞直接就kā亞哈謝ê奴僕講亞哈謝「一定會死」。上帝忠實ê奴僕先知,無論是jōa-ni̍h-á危險,只要上帝命令出來,就一定tio̍h照án-ne去做。以利亞確實遵照上帝ê命令去kā亞哈謝ê奴僕講。

第5到8節,亞哈謝ê奴僕聽tio̍h先知以利亞所講ê話,就知影大事不妙,就án-ne隨時tńg來宮廷去秉告hō͘亞哈謝王。亞哈謝問奴僕所遇tio̍h ê人是生做「甚麼款ê」。當奴僕回答講chit-ê人「穿插獸皮外袍,束tio̍h皮帶」。Chia ê「獸皮外袍」,iáu有另外一個意思,是teh指伊ê身上有真chē毛,這是伊ê特徵。當亞哈謝一聽tio̍h這特殊記號,隨時就知影是上帝忠實ê奴僕以利亞。

Koh講,先知以利亞ê打扮,說明伊是屬tī頂真離俗派ê先知。伊ê chit種打扮後來就成做頂真、離俗派修士ê生活樣式,過非常簡樸ê生活。新約時代ê行洗禮約翰mā kah先知以利亞仝款,食草蜢、野蜜,穿駱駝毛ê衫褲(參考馬可福音一:6)。

經文:

列王紀下 1:9-1:18

註釋:

Chit段經文講述亞哈謝ê心真剛硬,認為只要kā先知以利亞關tī監獄中,伊所講ê預言就bē實現。

第9到10節,亞哈謝王決定派人去緝拿先知以利亞。真可能認為若是kā先知以利亞掠起來,就ē-tàng強迫伊改變所講ê預言。亞哈謝chit種舉動,ná親像伊ê老父亞哈王,認為kā上帝忠實奴僕米該雅關tī監獄裡,伊所預言pháiⁿ ê結果就會失去效力仝款。M̄-koh伊無想tio̍h,chit pái派去掠先知以利亞ê軍官kah五十個隨從,lóng被先知以利亞祈求上帝tùi天頂降落大火燒死,就ná親像伊kah亞哈ê假先知tī迦密山頂對決仝款,先知以利亞祈求上帝tùi天頂降落大火燒掉tī祭壇上ê牲祭仝款。

第11到12節,亞哈謝並無因為chiah-ê去掠先知以利亞ê官兵被天頂降落ê大火燒死有改變,伊m̄相信上帝。因為án-ne,決定koh一pái差派另外一個軍官mā仝款是帶領五十個隨從去掠先知以利亞。這表示亞哈謝ê心中根本就m̄相信上帝有chiah-ni̍h大ê能力。

第13到14節,這是亞哈謝第三pái仝款派出一個軍官帶領五十個隨從去掠the̍h先知以利亞。M̄-koh chit pái受派ê軍官真清楚知影,絕對bē-tàng輕視上帝忠實ê奴僕先知以利亞。因伊所代表ê就是上帝。前兩pái受亞哈謝差派去掠先知以利亞ê軍官kah士兵,lóng是用極端無禮ê態度「命令」先知以利亞。結果in lóng遇tio̍h被火燒死ê厄運。因為án-ne,chit位軍官用懇切地ê語句請求先知以利亞「憐憫」伊kah伊ê部下,救in ê性命。M̄-thang像過去兩pái hit種,祈求上帝天頂降落大火燒死in。

第15到16節,tī上帝命令先知以利亞跟tòe chit-ê軍官tńg來王宮去ê時,先知以利亞chiah跟tòe去王宮。M̄-koh先知以利亞並無因為án-ne有任何驚惶,伊照樣當tio̍h以色列王亞哈謝ê面,講出上帝ê受氣,「一定」會hō͘伊死去。因為伊m̄信上帝,而且帶領人民棄sak上帝。

第17到18節,ná親像先知以利亞所預言ê,亞哈謝果然死去。亞哈謝無kiáⁿthang繼承王位,改由伊ê小弟約何蘭繼承王位。這大約是tī主前852年左右。

經文:

列王紀下 2:1-2:18

註釋:

Chit章主要記載上帝忠實奴僕先知以利亞離開人間,hō͘ 上帝接tńg來天家,以及伊ê學生以利沙續接伊ê工作之情形。

Mā是tùi chit章開始,一直到第八章15節止,lóng是記載有關以利沙ê事蹟。

Chit段經文記載先知以利亞hō͘ 上帝接tńg來天家ê經過,同時記載以利沙繼承以利亞為先知工作ê一段重要記事。Tī chit段經文中,thang看tio̍h先知以利亞怎樣訓練先知以利沙,前後三pái,伊lóng tio̍h以利沙停止跟tòe伊。Ná親像耶穌mā是án-ne,對hiah-ê想beh跟tòe伊ê人講:「狐狸有孔,空中ê飛鳥有巢,獨獨人子連khòa 頭殼ê 所在都無。(全民版)」(路加福音九:58)有人則因為聽tio̍h耶穌傳講ê道理感覺真oh接受而離開(參考約翰福音六:66)。Tùi chia ē-tàng看出先知以利沙有非常堅定ê信心,堅持beh跟tòe先知以利亞去,結果伊成功地完成了chit段長途ê旅途訓練,mā完成了伊ê心願──成做先知以利亞ê繼承人,同時得tio̍h上帝賞賜hō͘伊ná親像先知以利亞ê能力。

第1到2節,chia提起先知以利亞身邊有一個跟隨者以利沙。照列王記上第十九章16節ê記載,上帝bat命令先知以利亞膏立「亞伯‧米何拉人沙法ê kiáⁿ以利沙接替」伊作先知。chit-má作者講上帝beh「用旋風接以利亞升天」,這mā是聖經中所有先知siōng特別ê一位。當in兩人tùi「吉甲」出發,tī路上ê時chūn,先知以利亞就ài伊ê子弟以利沙mài跟tòe伊去,伊接獲上帝ê命令,beh去伯特利。Chia mā是上帝向雅各顯現ê所在(參考創世記廿八:10—19)。M̄-koh以利沙堅持beh跟tòe以利亞到伯特利去。

第3到4節,chia講「有一陣伯特利ê先知」,這表示chit地區有一個「先知學校」。In kah-ná lóng聽tio̍h上帝beh接先知以利亞tńg來天家ê信息。因為án-ne,in向以利沙提出chit-ê問題。M̄-koh以利沙並無想beh談chit-ê tāi-chì。Á先知以利亞第二pái要求以利沙停止跟tòe。M̄-koh以利沙堅持beh繼續跟tòe伊。

第5到6節,這是第二pái有一陣來自「耶利哥ê先知」,這表示tī耶利哥mā有「先知學校」ê設立。Koh再對照第7節、第15節來看,知影chit群先知共計有「五十名」之多。In向以利沙提出kah伯特利hit群先知仝款ê問題。以利沙ê回應mā仝款,無想beh談chit-ê tāi-chì。就tī chia,先知以利亞koh一pái ài以利沙停止跟tòe。M̄-koh以利沙lóng是用真堅定ê語氣表示一定會跟tòe,絕對bē離開。

第7到8節,chia講有「五十個先知kah in到約旦河」,tùi第15節知影chiah-ê先知是tùi耶利哥出來ê。Tī chia講先知以利亞以伊ê外袍打擊約旦河,河水就分開,伊kah子弟以利沙行過約旦河,這mā teh表示這是tī五十個先知ê面前發生ê神跡,in lóng親目看tio̍h。

第9到10節,先知以利亞看見以利沙堅持跟tòe伊,就án-ne問伊tī hō͘ 上帝接tńg來天家chìn前,ē-tàng為伊做甚麼tāi-chì?以利沙祈求先知以利亞ē-tàng kā能力加倍hō͘伊。因為伊beh繼承先知以利亞ê工作。M̄-koh先知以利亞知影,伊身上ê能力並m̄是伊家己ê,卻是上帝賞賜ê。因為án-ne,伊真清楚回答he是「真oh答應ê要求」。M̄-koh伊hō͘以利沙一個記號,就是若伊ē-tàng看見伊升天,就表示伊身上有chit種能力。

第11到14節,就tī in一面行一面談話ê時,忽然tùi天頂降落一台火馬拉tio̍h ê火焰車,kā先知以利亞接tio̍h天頂去,這mā為後來先知瑪拉基tī預言終末審判來臨ê時,上帝beh先差派先知以利亞來臨ê記事,留落來一個伏筆(參考瑪拉基書四:5)。

當以利沙看見此景象ê時,ná mā表示伊身上已經擁有先知以利亞ê能力à。伊kā家己ê衫褲拆裂做兩半,表示不捨老師先知以利亞離開伊,mā同時kā先知以利亞身上lak落來ê hit件獸皮外袍拾起來,伊用chit件獸皮外袍打擊約旦河,果然河水就分開,然後伊koh行過河底到對岸去。Tī歷代ê先知中有án-ne能力ê人,除了摩西、約書亞外,koh來就是先知以利亞,續落來就是以利沙。

需要注意ê是,以利沙是m̄是ē-tàng成做先知,這m̄是用先知學校(親像第3、第5、第7節等等),á是「師徒」之間ê相授thang成事,因為真正先知是上帝ê奴僕,是上帝親自揀選ê。這就是先知以利亞kā以利沙講,伊唯一thang hō͘伊ê是hō͘伊知影上帝ê旨意,這旨意是透過「記號──親目看見伊被接到天頂去」(第10節),就表示伊已經hō͘ 上帝所揀選。

第15到18節,這五十個來自耶利哥ê先知,因為親目看見發生tī in目睭前ê神跡,ē-sái講是in懷疑先知以利亞並m̄是tńg去到天頂,而可能是hō͘上帝ê旋風吹到「山頂á是山谷裡」。因為án-ne,in kā以利沙講tio̍h去chhōe先知以利亞。雖然以利沙阻止in,in iáu是beh去,結果是甚麼都無chhōe tio̍h。不過in lóng因為親目看見以利沙ē-tàng分開約旦河ê河水,而確信先知以利亞ê能力已經tī以利沙身上à。


經文:

列王紀下 2:19-2:25

註釋:

Chit段經文主要說明耶利哥城ê水質無好,後來有一座名叫「以利沙水泉」之由來,就是因為以利沙用一把鹽改變chit-ê城ê水質而得名。Chit-ê神跡說明兩件主要ê內容:以利沙已經繼承先知以利亞ê氣力。Koh講,照利未記第二章13節ê記載,鹽mā teh表示kah上帝之間立約ê關係。

第19到22節,因為以利沙繼承先知以利亞ê能力,而且有五十個來自耶利哥ê先知親目看見作見證。因為án-ne hit-ê城ê人見以利沙,kā伊講hit-ê城ê水無好,致使土地貧瘠,這mā說明hit-ê城ê人生活陷入困境。以利沙用一個新碗加上點鹽,伊kā chiah-ê碗中ê鹽khǹg入水中,tùi án-ne了後,該水泉出來ê水一直真「純淨」。鹽,本身就有消毒作用。M̄-koh ná親像頭前所提起過ê,「鹽」mā teh代表kah上帝立「忠實」ê「約」ê意思。 

第23到25節,chit段經文ê背景是發生tī前往伯特利途中。若kā它對照第一章9到12節,就會看tio̍h列王記編撰者想beh表達一個重要信息:以利沙確實是擁有先知以利亞ê能力。

第23節講背景是以利沙前往伯特利ê途中,可能是伊繼承先知以利亞ê使命後,受tio̍h伯特利居民ê排斥,因為hit-ê城已經tī耶羅波安ê引chhōa下,敬拜偶像神明成做in生活ê一部分。In無意愛上帝ê先知時常kā伊譴責in所拜ê是偶像神明,是虛假ê神。Koh講,以色列人民認為長頭毛chiah是上帝賜福ê記號。chit-má先知以利沙卻是禿頭,因為án-ne,伯特利城ê少年人出來對伊叫囂講:「禿子,滾開!」這是非常藐視ê態度,而藐視上帝ê奴僕,等於是teh褻瀆上帝ê神聖仝款嚴重。
  
第24節講以利沙以非常憤怒ê目睭瞪in,並且奉上主ê名詛咒in,結果chiah-ê少年人lóng受tio̍h嚴厲ê懲罰,被母熊裂碎。來便利膨椅發出咒詛之效力,ná親像先知以利亞對hiah-ê亞哈謝派去掠伊ê無禮貌官兵仝款有效力。這lóng tī說明以利沙確實是傳承先知以利亞ê角色kah使命。

經文:

列王紀下 3:1-3:19

註釋:

Chit章主要teh說明摩押人想beh脫離以色列統治ê一場重要戰爭。編撰者tī chit章所描述ê以利沙,真親像先知米該雅仝款,對國家beh戰爭ê事提出上帝ê信息。

Chit段經文講述因為摩押beh脫離以色列ê統治,而引發以色列王約何蘭決定出兵鎮壓。伊邀請猶大王約沙法聯合出兵。M̄-koh當in出兵遇tio̍h困境ê時,約沙法王建議詢問上帝ê先知,想beh知影上帝ê旨意。這kah列王記上第廿二章記載約沙法tī出兵chìn前,就先詢問上帝ê旨意,真無相仝。

第1到3節,這是列王記編撰者真典型ê句型,先說明chit位統治ê君王在位統治jōa-chē年,了後,就是講chit-ê君王「做上帝看做邪惡ê事」,用chit種句話來形容一個悖逆上帝旨意ê君王。不過,chia講約何蘭王比起伊ê「父親和母親耶洗碧」,伊是真chēà。因為mā kā老父亞哈為tio̍h拜巴力所建造ê神柱除掉,可惜,伊並無帶領以色列人民tńg來歸到上帝面前,敬拜上帝。

第4到8節,chia thang參考第一章1節,有提起亞哈王往生後,摩押國背叛以色列。Á chit-má是以色列王約何蘭決定beh出兵鎮壓摩押。伊邀請南國猶大王約沙法mā同時派兵同齊去攻打。約沙法ê回答ná親像伊當年回答亞哈準備出兵去攻打敘利亞仝款。因為攻打ê路線beh經過以東,而當時ê以東mā是tī以色列ê統治之下,因為án-ne,mā等於是kā以東mā拉入仝一個戰線中。

第9到10節,這三國盟軍因為補給品不足,尤其是缺水嚴重,chit對出征ê軍隊來講,是真大ê困境,如過繼續落去,必定會hō͘摩押phah敗。

第11到13節,chit時chūn,猶大王約沙法認為應該tio̍h詢問上帝ê先知,thang知影上帝ê旨意為何。這kah頂pái伊建議亞哈王tī出兵chìn前,先問先知,chit pái顯然慢了真chē。以色列王約何蘭有一個臣僕提醒in,有一個先知以利亞ê助手以利沙,是上帝ê奴僕先知。約沙法相信只要是上帝ê先知,一定有上帝ê信息thang聽。就án-ne chit三個王就聯合去chhōe以利沙。Á以利沙真清楚ê回應in,拒絕hō͘ in信息。伊特別對以色列王約何蘭講,ài伊tńg去問伊ê父親和母親ê先知,意思是講王宮中尚且有真chē宮廷養ê先知,thang去問in。Chit句話ê意思是以利沙teh表示,伊kah in無任何關係,拒絕回答ê意思。約何蘭聽了後,真謙卑向以利沙表示,伊寧可聽從上帝ê奴僕先知ê信息。

第14到19節,以利沙聽了後,就kí上帝ê名表示,伊會回應,並m̄是因為約何蘭王ê緣故,卻是因為約沙法ê關係。因為伊是忠實tī上帝ê君王。伊就tī一位琴師ê奏樂聲中開始講出上帝hō͘ in ê信息,chit-ê信息包括:一是in siōng需要水,上帝會補足hō͘ in,kui個山谷kā充滿夠額ê水,hō͘ in ê軍隊kah牛羊cheng-seⁿ lim。二是上帝會幫助in phah敗摩押人。三是ài in kā摩押人ê田園lóng hō͘ in徹底損pháiⁿ。

經文:

列王紀下 3:20-3:27

註釋:

Chit段經文描述以利沙對in所ê預言lóng一一實現à。這mā說明只要是上帝忠實ê奴僕先知所傳達ê話,就是真實ê,是thang信ê。

第20節,chit節koh一pái說明以利沙確實是上帝ê奴僕先知。因為伊傳達ê信息實現à。

第21到23節,全摩押城ê人,不分老少lóng全部集合起來對抗以色列、猶大,kah以東三國ê聯軍。這mā表示in想beh脫離以色列轄制ê心是真堅定ê。M̄-koh因為山谷充滿上帝引進ê水,tī陽光照射下,hō͘ in掠做是這三國聯軍teh互相殘殺。就án-ne就全軍進攻。

第24到25節,m̄-koh無想tio̍h進攻ê摩押軍隊反tńg被以色列等聯軍反擊tńg去。聯軍趁勝追擊。In一方面進攻,一方面kā所經過ê良田lóng破壞,堆置了石頭,hō͘田園無法度繼續種作,同時hō͘河渠mā無法度蓄水備用。

第26到27節,摩押王見「大勢已去」,本想帶七百個配劍ê兵刣出重圍,來方便到敘利亞去避難,m̄-koh並無成功,因為伊ê城被三軍聯合包圍。伊用一種奇特ê方式,mā就是摩押人ê宗教禮儀,kā家己ê大kiáⁿ刣死當做獻祭,kā屍體掛tī城牆頂獻hō͘摩押ê神明,這hō͘三國聯軍ê官兵看tio̍h lóng非常驚惶,因為án-ne,就撤兵tńg去。Á摩押mā因為án-ne而得tio̍h解圍ê機會。這mā teh表示chit pái ê征討是失敗ê,而且影響真大,因為後來ê以東mā是án-ne背叛了猶大而獨立(參考列王記下八:20)。

為甚麼會變成án-ne?真可能是因為以利沙kah-ná無跟tòe in去相戰,卻是tī講完預言後,就離開in。Chit段故事說明以色列、猶大kah以東ê國家統帥,並無帶領人民真正相信上帝ê奴僕以利沙傳出ê信息。因為án-ne,到à最後,當摩押人「用大kiáⁿ當牲祭」tī城牆頂獻hō͘ in ê神明ê時,反tńg hō͘以色列人民恐慌到驚惶而退tńg來家己國家去。

經文:

列王紀下 4:1-4:8

註釋:

Tùi第四章開始,一直到第八章15節止,lóng是teh記載有關先知以利沙ê事蹟。其實,tī先知以利沙ê身上,thang看tio̍h先知以利亞ê影像。

第四章是記載先知以利沙所行ê幾項神跡,chiah-ê記事lóng tī說明以利沙是一個真盡責ê先知,無hō͘先知以利亞傳承hō͘伊ê使命而失去光輝。

Chit段故事讀起來並無生份,真親像列王記上第十七章8到16節,記載先知以利亞tī撒勒法一位寡婦ê厝,經歷只chhun一點油kah一把麵粉ê事件。Tī先知以利亞ê祝福下,hit位寡婦ê厝tī非常嚴重饑荒ê時代,就靠tio̍h hiah-ê chhun落來ê一點油kah一把麵粉,活到「上主落雨ê hit一工,罐裡ê麵粉用不完,瓶裡ê油mā用不盡」(參考列王記上十七:14)。chit-má chit段經文是記載以利沙hō͘一位寡婦厝裡所chhun落來ê一小瓶橄欖油,源源不斷來流出來,裝滿所有容器,賣油得tio̍h ê錢,m̄-nā thang還伊ê丈夫所留落來ê債務,而且iáu有chhun落來ê錢夠額母kiáⁿ同齊過活。

第1節,踏話頭就紹介「有一個寡婦,伊丈夫是先知中ê一員」,m̄-koh並無記明chit位先知是甚麼人。只知影chit位先知已經往生,可能因為án-ne hō͘厝裡因積欠債務而hō͘生活陷入極大ê困境。Chia講債主來ài kā chit-ê寡婦ê「兩個kiáⁿ帶去做奴隸」,好償iáu先知所留落來ê債。摩西律法是允准人因為積欠債務而賣身為奴償還債務,m̄-koh有規定年限是六年,tī第七年一定tio̍h恢復伊ê自由(參考出埃及記廿一:2—3、7)。為tio̍h án-ne,chit-ê寡婦去chhōe以利沙幫忙。

第2到4節,以利沙ài chit-ê寡婦去左鄰右舍借容器,並且ài她關ân門窗,然後kā厝裡chhun落來ê「一小瓶橄欖油」倒入chiah-ê容器中,hō͘每一個容器lóng裝滿。

第5到7節,chit-ê寡婦照以利沙ê話去做,果然所有厝裡kah厝邊借來ê容器lóng裝滿橄欖油,以利沙ài chit-ê寡婦kā chiah-ê橄欖油the̍h去賣,所得tio̍h ê錢去償還債務外,伊講「chhun落來ê錢夠額」chit-ê寡婦kah兩個kiáⁿ過生活ê需要。這ná親像先知以利亞hō͘撒勒法ê寡婦,厝裡chhun落來ê一點油thang tī hit-ê飢荒時代,一直滴不完仝款。

這說明一個非常重要ê信息:聽從上帝忠實奴僕先知ê話,等於聽從上帝ê話。Á聽從上帝ê話,就永遠bē缺乏,而且iáu會有chhun。


經文:

列王紀下 4:9-4:37

註釋:

Chit段經文thang對照第十七章8到24節,有關先知以利亞hō͘撒勒法ê寡婦ê獨生kiáⁿkoh活ê記事。當時先知以利亞是伏tī已經死去ê gín-á ê身上,結果hō͘ gín-á koh活起來。chit-má以利沙mā是用仝款ê方法,結果這書念婦人ê gín-á mā koh活起來。

只是chit件神跡kah先知以利亞行神跡ê對象有別;這書念ê婦女是一個有錢人,而且m̄是寡婦。先知以利亞tī撒勒法tú-tio̍h ê chit-ê寡婦,是kā kiáⁿ ê死怪罪到先知以利亞身上,認為是因為以利亞到伊ê厝,chiah hō͘上帝「記起」伊ê罪,致使伊ê kiáⁿ死去(參考列王記上十七:18)。Chia則說明chit位有錢ê書念婦女是一個真聰明ê人,伊知影上帝ê奴僕先知以利沙必定會幫助伊ê kiáⁿ tùi死裡koh活起來,因為伊原本bē有gín-á,是先知以利沙為tio̍h beh酬謝伊好款待伊,而祈求上帝賞賜hō͘伊ê。因為án-ne,chit-ê cha-bó͘人想ê是:原本是無可能ê事,既然tī先知以利沙ê身上顯現出神跡奇事,chit-mágín-á死去,只要去chhōe先知以利沙就對à。果然,真正親像chit位書念婦女所期待ê,伊ê gín-á有復活起來。

第8到10節,chia提起一個有錢ê書念婦人,伊因為邀請以利沙食飯後,而且以利沙每pái去書念lóng會去chhōe伊,結果hō͘這書念ê婦人發見,以利沙是「聖ê神ê人」,chit-ê意思是teh指以利沙是一個分別為聖ê人,á是講伊是一個和平常ê人無仝款ê人。因為án-ne,伊建議丈夫tī樓頂加起一間小厝,hō͘以利沙以後來到伊家拜訪ê時,thang有一個thang tòa ê所在。

第11到13節,以利沙為tio̍h beh感謝chit位婦人對伊ê好款待。因為án-ne,伊問chit-ê婦人ē-tàng為伊做甚麼事,thang做回報。M̄-koh chit-ê婦人ê回應是「甚麼lóng m̄欠缺」。

第14到17節,以利沙ê奴僕基哈西提意見,hō͘以利沙知影chit-ê婦人雖然富有,m̄-koh丈夫已經年老,ē-sái講是in都無kiáⁿ。以利沙聽了後,隨時ài基哈西請chit-ê婦人來見以利沙,以利沙hō͘ chit-ê婦人知影,一年後ê chit時,伊「會抱一個kiáⁿ」,chit種應允對chit-ê婦人來講,根本是無可能實現ê事。因為án-ne,當伊聽tio̍h以利沙án-ne講ê時,第一個反應是認為以利沙欺騙伊,m̄-koh以利沙無加講甚麼。結果一年後ná親像以利沙所預言ê,chit-ê婦人真正生落來了一個kiáⁿ。

第18到27節,chit段經文描述經過幾年後,chit-ê婦人ê gín-á忽然感覺劇烈頭殼痛,無jōa久就往生。Chit-ê婦人kā chit-ê kiáⁿ抱入去起hō͘以利沙tòa ê房間,然後ài丈夫替伊準備好勢驢á hō͘伊趕去chhōe以利沙。雖然丈夫bat提醒伊可能會chhōe bē-tio̍h先知,m̄-koh伊堅持beh去chhōe以利沙,而且吩咐奴僕,加快腳步,除非伊講,若無,途中絕對m̄-thang慢落來。以利沙遠遠就看見chit-ê婦人,並且派伊ê奴僕基哈西去詢問伊是m̄是一切安好。當伊來到以利沙面前,就趕緊抱tio̍h以利沙ê腳。

Tī第23節chia,婦人ê丈夫提醒講「今á日既m̄是安息日,mā m̄是初一」,意思是teh指這兩工以色列人民lóng一定tio̍h停止工作,好專心敬拜上帝(請參考出埃及記十六:23;二十:9—10,民數記廿八:11—15,尤其是每年七月初一tio̍h koh khah特別,利未記廿三:23—25,民數記廿九:1—6)。因為án-ne若是,tī chit兩個時間裡到聖殿á是聚會ê場合,比較容易chhōe-tio̍h先知。若m̄是頂面所講時間想beh chhōe-tio̍h先知是真困難ê。Ē-sái講是chit位書念ê婦女則真有信心一定會chhōe-tio̍h以利沙。因為伊知影以利沙是神ê人,必定知影伊所tú-tio̍h ê困境。

第28到31節,以利沙一聽chit-ê婦人kā伊講,伊無向伊求過kiáⁿ,á是對生育懷有過任何希望,意思真清楚,是以利沙主動為伊向上帝求而得tio̍h kiáⁿ,m̄-koh taⁿ這希望koh破滅à。以利沙隨時吩咐伊ê奴僕基哈西先去the̍h伊手上ê柺á khǹg tī gín-á面上,然後伊kah chit-ê婦人mā出發去書念ê厝。M̄-koh基哈西回報以利沙講,gín-á並無koh活起來。Tī第30節chit-ê婦人講「絕對bē離開」以利沙,chit種堅持,ná親像福音書中hit位敘利亞ê腓尼基ê cha-bó͘-gín-á為伊ê cha-bó͘-kiáⁿ求耶穌基督ê醫仝款(參考馬可福音七:24—27)。結果伊得tio̍h了所beh ê,伊ê gín-á koh活起來。

第32到37節,ná親像以利亞幫助撒勒法hit位寡婦ê kiáⁿkoh活起來仝款,chia以利沙mā用仝款ê動作「伏tī gín-á身上」,就án-ne,chit-ê gín-á「連phah了七個噴嚏,目睭就thí開來à」,然後kā gín-á交hō͘ chit-ê婦人,hō͘ chit-ê婦人非常感激地跪tī以利沙腳前,面伏地,然後帶koh活ê gín-á離開。

經文:

列王紀下 4:38-4:44

註釋:

Chit段經文連續提起兩則有關以利沙所行ê lim食神跡。Tī饑荒ê時代,ē-tàng chhōe-tio̍h瓜藤野果mā真無容易,m̄-koh he卻是有含劇毒ê野菜。麵粉本身並無去毒ê功能,只是顯明先知以利沙有chit種能力,thang kā有毒ê食物去毒清氣。Koh講,少量ê餅,卻thang hō͘真chē先知lóng食飽,這mā顯示出以利沙身上充滿tio̍h伊ê老師先知以利亞傳承tùi上帝賞賜hō͘伊ê能力。

第38到41節,chit件神跡ê地點是tī吉甲。

Tùi chit段經文thang看見以利沙有開「先知課程」teh授課。有一陣學生kah伊做伙。同時mā看見tī全國lóng鬧飢荒ê時代,原本無甚麼食物thang食,只有ē-tàng lim湯。M̄-koh有人稻田裡「採野菜」,he是「野瓜藤」,以利沙m̄知he是有毒ê野瓜,就kā它切片後khǹg入鍋á裡跟tòe湯煮,結果chiah發見he是有毒ê野瓜,大家lóng m̄敢食。以利沙就hō͘人the̍h來一kóa麵粉,kā它丟入鍋裡,就án-ne解除了這野瓜ê毒素,成做thang lim食ê瓜湯。

以利沙用chit點兒麵粉所行ê神跡,tú好kah列王記上第十七章記載先知以利亞tī撒勒法寡婦厝裡只chhun一把麵粉所行神跡仝款,tī he飢荒ê年代,因為這一把麵粉解除了iau餓ê危機。

第42到44節,這是第二個神跡,以利沙用二十個餅,行了hō͘一百個先知thang食飽ê神跡。

Chit件神跡ê地點不詳,m̄-koh有一人是tùi「巴力‧沙利沙」來ê。這地點是設tī約帕北面約廿四公里ê沙崙平原。Chit-ê人帶來「二十個餅,是用當年初熟ê大麥做ê」,正確ê態度,應該是kā初熟ê大麥獻hō͘上帝,然後由祭司分享(參考出埃及記廿三:19a、三十四:26a)。M̄-koh會the̍h來hō͘以利沙,mā thang看出當時ê北國以色列,已經無利未人當祭司。Chit-ê人可能是kā以利沙kah伊ê門徒當做是祭司看待。

當以利沙接tio̍h這二十個餅ê時,伊吩咐奴僕kā chit二十個餅分hō͘先知食,m̄-koh奴僕提醒伊chiah二十個餅無夠一百個人食,mā tùi chia看tio̍h先知以利沙已經收了一百個門徒,這ná親像一間先知學校。M̄-koh以利沙吩咐奴僕講:「儘管hō͘ in食pah,因為上主講,in beh食飽,而且iáu有chhun落來ê。」chit句話真熟悉,ná親像耶穌用五餅二魚hō͘超過五千人食飽koh有chhun落來ê仝款(參考約翰福音六:11—13)。果然,以利沙ê奴僕遵照伊ê意思kā chit二十個餅分發hō͘一百個先知食,結果是「大家lóng食飽了,而且iáu有chhun落來ê」。

經文:

列王紀下 5:1-5:19

註釋:

Chit章記載有關以利沙醫患癩ko病ê敘利亞乃幔將軍ê事蹟,tī舊約聖經中ē-sái講是一則非常頂港有名聲下港有出名ê故事,mā是以利沙所行ê神跡中,siōng-kài大家所歡喜ài講ê神跡。

Chit段經文講述敘利亞乃幔將軍患tio̍h癩ko病,因為厝裡有一個tùi以色列擄來當女婢ê細漢cha-bó͘-gín-á,經過chit-ê女婢ê建議,伊講以色列ê先知以利沙thang醫伊。伊聽從了chit位以色列小女婢ê話,身上ê癩ko病因為án-ne得tio̍h痊癒。

第1到4節,tī第1節就記載「因為上主bat藉tio̍h伊hō͘敘利亞軍隊獲勝」chit句話,koh再對照列王記上第十九章15節,上帝ài先知以利亞到大馬士革去「膏立哈薛作敘利亞王」,說明列王記作者ê想法,上帝乃是所有族群ê上帝,m̄-nā是以色列人民ê上帝而已。Chit種觀念tī先知運動中一再出現,上帝會差遣亞述帝國成做奴僕,替祂打擊選民以色列背叛行為(參考以賽亞書十:5—6,耶利米書第廿一章、廿五:9)。

癩ko病,這是以色列人民看做siōng危險ê病,甚至認為這是一種「天譴病」,是上帝ê懲罰,無可能得醫。而且照摩西律法規定,一定tio̍h Kā chit種人tùi社區中隔離出來,因為是無清氣ê記號(參考利未記十三:45—46)。

Chit-ê以色列少女知影主人患tio̍h án-ne ê病症,就向女主人建議,去chhōe「撒馬利亞ê hit-ê先知」,真堅定ê語氣講「伊一定會醫好伊ê癩ko病」。Chit位以色列女婢會án-ne建議,一定是聽過以利沙所行ê神跡。因為án-ne,乃幔將軍聽了後,就去面見國王報告chit-ê tāi-chì。

第5到7節,敘利亞王聽了後,就寫封phoe hō͘ 乃幔帶,chit張phoe是beh以色列國王幫忙醫乃幔將軍ê癩ko病。然後家己準備「三萬塊銀á,六千塊金子,kah十套衫褲」當做禮物。這確實是一筆龐大ê禮金,就án-ne去見以色列國王。國王一phah開敘利亞王ê信,就嚇到差不多崩潰。因為伊深知影chit種天譴病,除了上帝以外,無任何人ē-tàng醫好。M̄-koh soah koh驚敘利亞王藉口伊無醫好乃幔將軍ê病,而派軍隊來攻打以色列。

第8到12節,以利沙聽tio̍h國王án-ne悲傷就拆裂衫褲,就派人去kā國王講,ài乃幔將軍去chhōe伊。原因是beh hō͘ 乃幔將軍知影,tī以色列「有一個先知」,chit句話已經teh表明,敘利亞若想beh侵犯以色列,ài beh特別小心,因為chit位以色列先知會kā上帝ê旨意帶hō͘以色列人民。上帝是以色列人民ê保護者。Á當乃幔將軍來到以利沙ê厝門口ê時,伊並無去開門,卻是叫奴僕去kā乃幔將軍講,ài伊直接去約旦河「洗七pái」,án-ne病就會好起來。乃幔將軍對以利沙用chit種態度回應伊,感覺非常憤怒,伊認為至少先知也tio̍h出來接見伊,tī伊身上行個宗教禮儀。Koh講,伊認為若是去約旦河洗七pái,不如tī家己國家敘利亞ê「亞罷拿河kah法珥河」lóng會比約旦河來得清氣。伊顯然bē記得先知ê話,代表ê是上帝ê信息。Kah河水是m̄是潔淨無關係。

第13到15節,佳哉,乃幔身邊有一個奴僕勸伊m̄-thang受氣,tio̍h聽從先知ê話。何況只是去約旦河洗洗就會潔淨,就án-ne 乃幔將軍聽chit-ê奴僕ê話,就去約旦河洗七pái。果然,伊身上ê癩ko病全lóng消除,而且iáu帶所有跟tòe ê奴僕去見以利沙,並且見證講「全世界只tī以色列有上帝,無別ê」。伊ê chit句話其實mā teh說明先知teh代表上帝ê旨意。伊同時請以利沙kā禮物收下。其實,乃幔將軍kah伊ê奴僕所講ê話,kah實際行動等,lóng teh反應以色列國王kah人民比起chit位乃幔將軍kah伊ê奴僕lóng iáu koh khah hâm-bān。因為上帝揀選ê以色列人民並無聽從上帝忠實奴僕先知ê話語,m̄-koh外邦人卻聽從。

第16到19節a句,以利沙堅持拒絕接受乃幔將軍所beh贈送ê厚禮酬金。因為伊只是負責傳達上帝ê話語。為tio̍h án-ne,乃幔將軍請求以利沙hō͘伊帶兩袋ê以色列土tńg來敘利亞去。伊決定只敬拜chit位透過先知傳達hō͘伊消息、醫好伊ê癩ko病ê神。第17節mā說明古代人對神ê觀念,in認為tio̍h beh敬拜in所認bat ê神,就一定tio̍h kah該神所掌管ê土地連做伙,mā就是該神所khiā起ê土地。因為án-ne,乃幔將軍beh帶tńg來以色列ê土,為tio̍h是beh做敬拜ê路用。M̄-koh伊mā清楚知影,家己無辦法拒絕陪伴國王去拜敘利亞ê「臨門」神明。其實,伊chit種態度是矛盾ê,既然認為以利沙ê chit位神明是真實ê,而且伊講bē向任何神明獻祭,chit-má koh講伊有困難,是為tio̍h beh陪國王去膜拜臨門神明,而這是為tio̍h政治ê理由ê需要。就án-ne,以利沙祝福伊,乃幔將軍就án-ne離開tńg去厝裡。

經文:

列王紀下 5:20-5:27

註釋:

Chit段經文描述以利沙ê奴僕基哈西,因為不誠實、貪婪,結果原本tī乃幔將軍身上ê癩ko就轉移到伊ê身上,m̄-nā án-ne,先知iáu講這癩ko會傳到下一代ê身上。

第19節b句到22節,基哈西認為伊ê主人以利沙拒絕乃幔將軍ê酬勞,是錯誤ê。因為án-ne,伊決定暗地裡跟tòe 乃幔將軍去,beh向伊索取酬勞。M̄-koh伊對乃幔將軍講白賊,講是伊ê主人以利沙派伊去為兩個tùi以法蓮山區來ê先知ê需要,希望有「三千塊銀á kah兩套衫褲」。雖然chit種數量比起乃幔將軍原本準備beh送hō͘以利沙ê「三萬塊銀á,六千塊金子,kah十套衫褲」少了真chē,m̄-koh基本上,基哈西chit種行為就是欺騙、貪財。

第23到24節,乃幔將軍無多問,á是講甚麼,伊就直接the̍h出比基哈西所講ê「三千塊銀á」多一倍ê「六千塊銀á」,khǹg tī兩個袋子中,以及兩套衫褲,叫家己ê奴僕扛tio̍h kah基哈西tńg去。

第25到27節,上帝ê奴僕以利沙當然知影chit件事。因為上帝ê靈會啟示伊,hō͘伊知影奴僕基哈西暗中所做非法而且欺騙ê事。Koh khah嚴重ê,是當以利沙問基哈西去做kóa甚麼事ê時,若是基哈西趕緊悔改認罪,有可能iáu有機會得tio̍h赦免。M̄-koh伊卻iáu認為以利沙m̄知實情,一再講白賊。結果hō͘伊ê主人以利沙詛咒,基哈西家己kah後代kiáⁿ孫lóng會得tio̍h癩ko病,這是嚴重懲罰,因為基哈西kah主人以利沙lóng是上帝ê奴僕,就一定tio̍h絕對誠實,若無,上帝ê懲罰是嚴重ê。


經文:

列王紀下 6:1-6:7

註釋:

Tùi chit章開始,直到第七章止,列王記作者用三個神跡描述tī以利沙充滿tio̍h上帝賞賜ê靈,hō͘伊m̄-nā會行神跡奇事,mā會預先知影teh beh發生ê事等,chiah-ê lóng tī說明以利沙真正是上帝忠實ê奴僕。

這是一段簡略描述以利沙有行神跡奇事ê異能。列王記作者teh描述以利沙ê記事中,伊ê能力真特別,大到ē-tàng hō͘死人koh活,而tī chia是連掉tī水裡ê斧頭lóng thang重新拾起來。

第1到2節,tùi chit兩節thang清楚看出早期以色列社會有所講ê「先知學校」之類ê團體,當時tī伯特利(參考二:5)、耶利哥(參考二:15)、吉甲(參考四:38)等地lóng有chit種先知群體,其中有ê先知「學員」已經結了婚(參考四:1)。

Chit兩節講有一陣以利沙帶領ê學生向伊抱怨,講in khiā起ê所在太小,in想beh擴建,因為án-ne想tio̍h約旦河邊去phut些木材搭建房舍,以利沙同意了in ê請求。

第3到5節,以利沙陪in去。結果teh 剉木材ê時,有一個人因為無小心kā借來ê斧頭hō͘掉到水裡去,只有ē-tàng向老師以利沙求助。

第6到7節,以利沙用另一條樹枝tàn入去水裡,hit支ka-la̍uh水裡ê斧頭就家己浮出水面來。

這看起來kah-ná一件微小ê神跡,卻講出以利沙tī先知以利亞了後,tī以色列人民中間有極大ê影響力,mā因為án-ne,跟tòe伊ê學生就jú來jú chē。

經文:

列王紀下 6:8-6:23

註釋:

Chit段記事tī歷史上真oh chhōe出明確資料,因為Tī chit段經文中,lóng只有提起敘利亞王kah以色列王,卻都無提起這國王ê名,mā無講出兩國準備交戰ê地點。M̄-koh chit段經文主要teh說明:上帝忠實ê奴僕以利沙,有能力thang知影人tī暗中所講ê話。Á聖經kā咱講,只有上帝chiah有chit種能力。因為án-ne,這mā teh表示,上帝賞賜hō͘以利沙有特別ê能力,hō͘伊ē-tàng知影敘利亞王暗中進行ê謀略,án-ne,以利沙kā chit件事hō͘以色列國王知影,tùi án-ne躲過一劫。

第8到10節,chia講出以利沙有特別ê能力,thang知影敘利亞王kah伊ê臣僕商議怎樣出兵攻打以色列ê城池。就án-ne伊派人送信hō͘以色列王,ài伊m̄-thang中了計謀。以色列王果然聽從以利沙ê話,而且是「仝款ê事發生kúi-nā-pái」,這表示敘利亞王試圖攻擊以色列真chē pái,m̄-koh都無成功,因為有以利沙ê協助。

第11到17節,敘利亞王感覺奇怪,每pái beh出兵á是偷襲,lóng hō͘以色列王知影,伊懷疑有內奸。M̄-koh臣僕kā伊講是以利沙先知知影人tī「睏房內私下講ê話」,這是非常特別ê神能之力。因為án-ne,敘利亞王就下令tio̍h掠以利沙。

「多坍」,chit-ê城離北國首都撒馬利亞城只有十八公里遠,而敘利亞ê軍隊ē-tàng phah到chia,tú好表示當時敘利亞ê軍力甚強,大大超過以色列ê國防力量。當伊ê學生看見敘利亞軍隊來包圍「多坍」想beh掠伊ê時,伊向上帝祈禱hō͘伊ê學生thang看見上帝差派來保護伊ê大軍,結果上帝垂聽以利沙ê祈禱,伊ê學生看見「山邊佈滿火焰車kah火馬,kā以利沙圍teh。這表示上帝kah以利沙之間有非常親密ê關係,上帝用chit種方式teh庇護以利沙。

第18到23節,當敘利亞出兵攻打多坍ê時chūn,以利沙koh向上帝祈禱,hō͘ chiah-ê軍隊「目睭失明」,果然chiah-ê敘利亞軍隊lóng失明,就án-ne,以利沙出來kā in講行m̄-tio̍h去路,伊帶chiah-ê目睭lóng chheⁿ-mê敘利亞軍人行入撒馬利亞城。然後以利沙koh祈禱上帝,開chiah-ê敘利亞軍人ê目睭,上帝koh垂聽伊ê祈禱。當chiah-ê軍人開了目睭了後,chiah發見in已經進入撒馬利亞城內,成做以色列ê俘虜。以色列王問以利沙,是m̄是ài kā chiah-ê敵人lóng總刣死?以利沙講bē-tàng,而且tio̍h hō͘ chiah-ê敘利亞軍人有「食物kah水,hō͘ in lim食;放in tńg來in ê王hia去」。以利沙用chit種方式,hō͘敘利亞tùi án-ne了後,m̄敢koh再侵犯以色列。原因是只要有以利沙tī teh,任何攻擊lóng會白做無功。Koh講,chit兩節經文mā作了真好ê啟示:好款待仇敵,是化解對敵、和平相處ê良藥。

經文:

列王紀下 6:24-7:2

註釋:

Tùi第24節開始,一直到第七章結束,lóng是談及有關敘利亞王便‧哈達率兵圍攻撒馬利亞城ê經過。因為包圍撒馬利亞城ê結果,致使城內缺糧嚴重,物價飄漲到人民根本無力購買,城內發生慘劇,有以色列人民甚至一定tio̍h交換kiáⁿ刣死煮來充飢。以色列國王認為chit項事一定kah以利沙有密切關係,因為án-ne beh去掠伊。Á以利沙則是beh以色列人民對上帝有絕對ê信心,而且伊講了預言,只要過一工,必定會有非常sio̍k ê糧食thang買賣。M̄-koh以色列王ê奴僕聽m̄-bat以利沙ê預言,用「he是無可能ê」chit句話回應以利沙。

第24到25節,chit件圍城事件大約是發生tī主前850年左右ê時代,撒馬利亞城因為被圍困來致使城內缺糧嚴重,物價飆漲人民無法度生存落去。

第26到29節,chit段經文描述城內悲慘ê情景,糧食缺乏ê嚴重,其程度已經到人民tio̍h彼此交換kiáⁿ刣死來充飢。這情景真親像主前587到586年間,巴比倫帝國圍困耶路撒冷ê情景仝款,耶利米哀歌第四章10節就有án-ne記載講:「慈心 ê cha-bó͘ 人 tio̍ h 親手煮她 ê kiáⁿ,我 ê 人民 ê cha-bó͘ -kiáⁿ tú-tio̍ h 毀滅ê 時,用chit-ê 做米糧。(全民版)」有一個母親因為án-ne向國王告狀,表示伊被隔壁ê cha-bó͘人欺騙,伊ê gín-á先被刣來食了,m̄-koh第二工隔壁ê cha-bó͘人卻拒絕交出伊ê kiáⁿ。

第30到32節,以色列王認為chit件事必定kah以利沙有關。因為án-ne,以色列王帶兵去掠以利沙。Ná親像頭前講過ê,以利沙真清楚chiah-ê君王心中ê計謀。因為án-ne,以利沙kah tī伊身邊ê一kóa長老提出警告,ài in bē-tàng hō͘ chiah-ê beh掠伊ê人入厝內。

第33節到第七章2節,原來以色列王因為城被敘利亞軍隊包圍,發生嚴重缺糧帶來ê危機,對上帝ê信心產生搖動。Á以利沙ài王一定會聽從上帝ê話,並且kā伊講隔工一定會有夠額ê食物出現,hō͘民眾m̄-nā thang買會tio̍h,而且負擔會起。雖然國王ê侍從m̄相信,m̄-koh以利沙卻信誓旦旦地講chit件事一定會發生。

經文:

列王紀下 7:3-7:13

註釋:

Chit段經文敘述上帝奇妙ê作為,就是hō͘包圍撒馬利亞城ê敘利亞軍隊,聽tio̍h類似大批軍隊進攻ê聲音而產生驚惶,丟下所有一切軍備逃離軍營,kan-taⁿ一夜ê時間,全部軍營連一個敘利亞士兵mā無。M̄-nā解除了撒馬利亞城內缺糧ê危機,mā應驗ā以利沙所預言ê,會有真sio̍k ê糧食thang買賣,而chit-ê消息ê 回報,卻是tùi四個準備向敘利亞軍營投降ê癩ko病人,因發見實況帶tńg來hō͘以色列王ê。

第3到8節,癩ko病人因為是hō͘隔離出來,生活ê需要一定tio̍h óa靠親友ê接濟chiah有辦法。M̄-koh因為撒馬利亞城內已經被敵軍敘利亞包圍,無親友供應in ê需要。因為án-ne,in準備去敘利亞軍營投降。In心內想,有可能án-ne可能得tio̍h食物thang充飢。M̄-koh無想tio̍h,當in來到敘利亞軍營ê時,竟然發見營中無任何一個人,m̄-koh卻充滿tio̍h真chē物件。原來是上帝用一件特殊ê神跡,kah第六章17節上帝差遣天兵神將(火焰車kah火馬)來干涉攪擾敘利亞軍隊仝款,hō͘敘利亞軍隊聽tio̍h有「大隊兵馬kah戰車前進ê聲音」,趕緊hiat-ka̍k所有ê裝備逃生,hō͘以色列軍隊根本無用一兵一卒,就白白得tio̍h一場勝利,而且得tio̍h敘利亞軍隊所有ê戰利品。

第8到10節,chit四個癩ko病人進入空蕩蕩ê敘利亞軍營,大肆搜刮一切財物,m̄-koh卻想tio̍h án-ne真可能為家己帶來嚴重懲罰,就án-ne趕緊tńg來撒馬利亞城內去通報chit段消息。

第11到13節,當守衛城牆ê兵丁kā chit四個癩ko病人ê通報hō͘以色列王知影後,伊kah臣僕iáu是擔心he是敘利亞軍隊ê詭計,想用chit種空城計活掠以色列軍隊kah人民,佔領撒馬利亞城。M̄-koh有國王幕僚認為橫直已經缺糧到必死ê情況,掠準án-ne,不如派人出城去探望實況。Chia講「chhun落來ê五匹馬」,mā thang講城內因為鬧飢荒,連戰馬lóng刣來充飢,taⁿ只chhun五匹馬而已,可見缺糧非常嚴重。

經文:

列王紀下 7:14-7:20

註釋:

Chit段經文講述chit幾個被派出去探視敘利亞軍營ê人回報,是kah chit四個癩ko病人所回報ê完全仝款。因為in是行到約旦河,沿路看tio̍h ê lóng是敘利亞軍隊散落tī途中ê一切物件。正應驗ā以利沙所講:in隔工,就ē-tàng用siōng sio̍k ê價錢,買tio̍h真chē糧食ê預言。

第14到16節,以色列王派出去探察敘利亞軍營ê人,行到約旦河,沿路除了看見敘利亞軍隊落走棄sak ê物件外,mā看bē-tio̍h任何一個敵軍留落來。因為án-ne,當in 回報chit-ê消息到撒馬利亞城內ê時,城內ê以色列人民差不多是傾城而出。Tú好應驗ā tī第1節以利沙bat對以色列王所講ê預言,in kā thang用一塊銀á買tio̍h三公斤siōng好ê小麥á是六公斤ê大麥。比起缺糧ê時,物價飆到兩百公克ê野蔥tio̍h賣到五塊銀á,明明是無法度相比。

第17到20節,chit段經文koh一pái說明以利沙ê預言應驗ā。因為走出城去the̍h敘利亞軍隊留落來ê物件ê以色列人民實在是siuⁿ chē,致使現場是一片混亂,國王只好派出伊ê侍從到城門口指揮秩序,結果卻被真kheh ê人群踩死,而這kah伊懷疑以利沙ê預言有關,因為伊m̄相信以利沙預言隔一工就ē-tàng有真sio̍k ê糧食thang買賣解除缺糧ê問題。以利沙bat講伊會親目看tio̍h不勞而獲ê糧食,卻食bē-tio̍h。

Chit段故事koh一pái說明一件事:真正hō͘軍隊獲勝ê,m̄是óa靠人ê能力,卻是tùi上帝來奇妙ê計畫。詩篇ê作者án-ne講:「君王bē-tàng 因為兵chē 就得tio̍h 救;勇士bē-tàng 因為氣力大就得tio̍h 救。Óa 靠馬,無一定會得tio̍h 救;靠大氣力mā 無一定ē-tàng 救人。上主ê 目睭看顧敬畏祂ê 人,照顧仰望祂ê 慈愛ê 人。祂會救in ê 性命脫離死亡,保存in ê 活命度過飢荒。(全民版)」(詩篇三十三:16—19)

經文:

列王紀下 8:1-8:6

註釋:

Chit章經文講述兩件kah以利沙有關ê事,包括伊警告書念ê婦人,ài她離開書念去躲避飢荒。Koh講,伊預言敘利亞大臣哈薛ē-tàng敘利亞王,這兩件事後來lóng應驗ā。最後一個段落特別提起「約蘭在位期間,以東背叛了猶大」,這mā說明猶大ê國勢已經明顯衰弱。

Chit件記事應該是發生tī基哈西感染癩ko病chìn前,因為後來基哈西已經被以利沙詛咒會生長癩ko病,而且連帶ê伊ê厝內人lóng仝款會長癩ko病。若án-ne,伊無可能隨便出入王宮á是tī公眾面前。

Koh講,chia所提起ê七年飢荒,真可能kah第四章38節ê「全國遭遇饑荒」相關。因為án-ne,應該kā chit段經文編排tī第四章37節後面,以利沙為tio̍h beh感謝chit位書念ê婦人對伊ê好款待,kā伊講饑荒ê日子teh beh來臨, ài伊到外國去避難,án-ne,讀起來會koh khah順暢。

第1到2節,tī chia用「bat kā人講」,表示chiah-ê記事並m̄是照年代ê前後編撰ê。以利沙kā人講過gín-á bat hō͘伊救活起來ê書念婦女, ài她離開書念「到別ê所在去tòa」,因為書念會有七年ê飢荒。Chit-ê cha-bó͘人聽從以利沙ê話,kah全家到非利士去,而且一tòa就是七年。這已經清楚說明一件事:tī社會上地位卑微ê cha-bó͘人,會聽從上帝忠實奴僕先知ê話語。

第3到5節,tī he七年期間,chit-ê cha-bó͘人ê財產包括房屋kah田地lóng被人侵佔。伊去見王,請求國王主持公道。就tī he ê時,看見基哈西tī國王面前,因為國王詢問伊關係以利沙所行神跡奇事ê事。可見當時以利沙所行神跡已經tī以色列人民中間廣為傳開。Á巧ê是基哈西當teh向國王描述以利沙hō͘一個婦女ê kiáⁿ tùi死裡koh活起來,tú好這書念婦女到國王hia,伊成做神跡ê見證者。

第6節,國王詢問了後,命令臣僕kā屬tī這書念婦女ê財產lóng還hō͘伊。

Chit件記事主要teh說明先知hō͘ in chit位書念婦女ê信息,伊lóng確實遵照去做。聽從上帝忠實奴僕先知ê話,m̄-nā bē有任何損失,而且iáu會tī非常困境ê環境下,kā性命有保存落來。聽從上帝忠實奴僕ê聲音,就ná親像聽從上帝ê信息仝款,chit種人一定會得tio̍h上帝眷顧,chit-ê書念ê婦人就是siōng好ê見證者。

經文:

列王紀下 8:7-8:15

註釋:

這是有關以利沙預言敘利亞會發生政變ê事。Kui個故事ê中心經文是tī第10到11節,chit兩節經文說明原本並無會因為小病來死ê敘利亞王便‧哈達,卻因為伊ê大臣哈薛計謀篡位而被謀刣死亡。以利沙早看出tī哈薛受命去詢問以利沙有關國王便‧哈達ê病況ê時,心中就已經生出篡奪王位ê計謀à。Á發生這事件ê年代是tī主前842年左右,哈薛掌敘利亞王權到主前816年。

第7到9節,真可能是kah 乃幔將軍癩ko病得tio̍h以利沙治癒ê事有關,敘利亞人對以利沙ê事lóng真熟悉而且敬佩伊。因為án-ne,當伊到敘利亞去ê時,因為國王便‧哈達知影了,就趕緊派大臣哈薛帶貴重ê禮物去見以利沙,詢問伊ê病況是m̄是會好轉ê事。

    第10到13節,以利沙除了kā哈薛講敘利亞王便‧哈達一定會死。M̄-koh伊ài哈薛tńg去就講「一定會好」。續落來,以利沙卻用流目屎表明另外一件事會發生,就是哈薛會繼承王位,並且會是一個真殘酷ê國王。哈薛否認chit件事。

第14到15節,果然,以利沙ê預言實現à。哈薛確實是一個殘酷ê領導者,伊tńg來到王宮去,就用毯子kā原本iáu bē致使死ê國王hō͘活活悶死,家己就當了敘利亞王。

經文:

列王紀下 8:16-8:29

註釋:

Chit段經文中描述兩個猶大王,其一是約沙法ê kiáⁿ約蘭繼任為王(第16到24節),另外一個是約蘭ê kiáⁿ亞哈謝繼任為王(第25到29節)。

第16到19節,chit段經文真清楚講chit-ê猶大王約蘭,是約沙法ê kiáⁿ,伊繼承老父ê王位,而老父是一個真敬畏上帝ê君王,伊無kā老父ê好hō͘繼承落來,反tńg是去娶一個m̄-nā會殺害先知,mā會養假先知ê以色列王亞哈ê cha-bó͘-kiáⁿ,就ē-tàng知影伊必定會受tio̍h bó͘ ê影響而棄sak上帝。這就是列王記作者所講ê伊「做以色列諸王所做、上主看做邪惡ê事」,只因為上帝無願意hō͘大衛ê後裔毀滅,而hō͘伊ē-tàng繼續掌權。

第20到24節,chit句「約蘭在位期間,以東背叛了猶大,成做獨立ê國家」,就ē-tàng看出來約蘭無得tio̍h上帝ê賜福,致使頂一代傳承落來ê產業失去。M̄-nā以東獨立,連立拿城mā失守。Chit座立拿城原本是約書亞分配給祭司khiā起ê城市(參考約書亞記廿一:13)。照歷代志下第廿一章18到20節ê記載,約蘭因為生一場腸病,痛苦來死。M̄-koh伊死ê時chūn,並無人為伊哀傷。

第25到27節,chit三節記載約蘭死後,伊ê kiáⁿ亞哈謝繼任王位。伊mā像in父親仝款,學習北國以色列亞哈王做上帝看做「邪惡ê事」,kan-taⁿ統治一年ê時間就往生à。

第28到29節,tī亞哈王時代,bat kah約沙法有盟約,同齊beh出兵去攻打敘利亞,想kā祖先ê城市基列ê拉末奪回來,m̄-koh亞哈失敗了,並且因為án-ne戰死戰場。chit-má換in ê後代亞哈謝也kah以色列王約何蘭聯合出兵,去phah哈薛。仝款ê,約何蘭受傷tńg去耶斯列養傷。亞哈謝去探望伊。

經文:

列王紀下 9:1-9:13

註釋:

第九到十章lóng是記載有關以色列新ê王耶戶被膏立ê經過,以及伊當政時代ê以色列政情。照列王記上第十九章16節ê記載,膏立寧示ê孫á耶戶為以色列ê王ê chit項工作,原本是上帝ài先知以利亞去執行ê。M̄-koh先知以利亞iáu未達成chit項任務,就被接tńg來天頂à。chit-má由先知以利沙執行,而先知以利沙是派伊ê學生去執行chit項任務。

Chit章siōng主要是teh說明tī以利沙時代,上帝藉tio̍h耶戶ê手,徹底kā亞哈王朝除掉,連同南國猶大kah北國以色列ê兩個王,lóng因為kah亞哈有親屬關係,以及亞哈ê bó͘耶洗碧等,lóng tī同一時候被耶戶hō͘除掉。這就應驗ā上帝藉tio̍h先知以利亞所講ê預言實現了(參考列王記上廿一:19、23)。

Chit段經文記載以利沙派門徒去膏立耶戶為以色列王ê經過。原因是kah北國以色列王亞哈ê bó͘耶洗碧殺害上帝ê奴僕先知。因為án-ne,亞哈ê後代會為tio̍h án-ne付出代價。因為所有亞哈kah伊kiáⁿ ê chiah-ê惡質行踏lóng是「因為耶洗碧ê煽動」造成ê(參考列王記上廿一:25),特別是teh拜偶像ê事頂面koh-khah是án-ne。

第1到3節,chia所謂「少年ê先知」,指ê就是以利沙ê門徒。以利沙準備一瓶橄欖油ài伊ê學生到基列ê拉末去chhōe「寧示ê孫á耶戶」,ài伊膏立耶戶「作以色列ê王」,了後,就beh趕緊逃離hit所在。

第4到10節,chit-ê少年ê先知就án-ne去chhōe-tio̍h耶戶,hit時耶戶正kah一kóa軍官teh開會。M̄-koh伊照以利沙ê吩咐,帶耶戶到另外一間無人ê房間,tī hia膏立耶戶作以色列ê王,並對伊講,ài伊去刣死亞哈ê kiáⁿ mā就是約何蘭。Tio̍h用亞哈對待耶羅波安kah巴沙王ê家族hit種來對待亞哈ê家族。這mā說明上帝確實是會「報應」ê。其實,chit-ê少年ê先知所傳達ê信息,是kā以前先知以利亞對亞哈王所講ê話重述了一pái(參考列王記上廿一:21—23)。Mā可能tī先知「學校」訓練課程中,已經kā上帝託先知所預言ê事列入了「教科書」中,列為傳承使命ê功課。伊mā同時傳達一個非常重要信息:chit種徹底剷除亞哈ê家族iáu koh khah包括伊ê bó͘耶洗碧在內。這少年ê先知照以利沙ê交帶,完成chit項膏立kah交帶ê話後,就趕緊逃離hit所在。

第11到13節,因為耶戶是臨時被這少年ê先知帶離會議ê會場,當伊tńg來到軍官會議現場ê時,其他ê軍官問伊到底是甚麼事?伊就kā伊被膏立為以色列王ê事kā in講,結果,chiah-ê同事馬上就kā in各自ê衫褲鋪tī台階頂面層,hō͘耶戶khiā tī頂面,然後大聲hoah講:「耶戶做王à!」以chit-má ê話來講,這等於是政變。Chit種kā衫褲鋪tī台階頂面ê行動,後來tī新約福音記載耶穌騎驢á進入耶路撒冷ê時,門徒kah群眾mā有類似ê舉動(參考馬可福音十一:7—8)。

經文:

列王紀下 9:14-9:26

註釋:

Chit段經文敘述耶戶怎樣進行叛變ê軍事行動。伊hō͘以色列王約何蘭lóng無防備之下,殺害約何蘭,並且奪取伊ê王位。

第14到16節,chit段經文真清楚講出耶戶確定進行叛亂ê工作,而且ài擁護伊ê部下絕對bē-tàng tùi基列ê拉末離開去耶斯列通風報信。Á hit時,ná親像第八章28到29節所提起ê,約何蘭因為kah敘利亞相戰受傷,當teh耶斯列療傷,而猶大王亞哈謝因為kah以色列ê約何蘭聯盟出兵,因為án-ne,伊tú好mā去探望。

第17到20節,當耶戶親自率領軍隊前往耶斯列城ê時chūn,守望台頂ê守衛看tio̍h,就趕緊提出警告。Á約何蘭聽tio̍h了後,隨時派出騎兵去瞭解。結果chit-ê騎兵並無tńg來,因為被耶戶收留了起來。Mā就是耶戶m̄ hō͘ chit-ê出來瞭解實況ê騎兵tńg去通風報信。就án-ne守衛感覺奇怪,koh再警告。約何蘭koh一pái派出第二個騎兵出城去瞭解實況,chit-ê去ê人也kah第一個仝款。Chit-ê守衛者koh一pái警告。因為這表示若m̄是死tī敵方ê手裡,就是hō͘俘虜,若無,就是加入敵方ê行列。Chit-ê守衛非常盡責地提出koh khah清楚ê警告,講:「hit隊人ê首領kah-ná痟ê趕車,真親像耶戶。」

第21到22節,約何蘭一聽chit-ê消息,隨時表示家己親自去瞭解到底耶戶—伊ê部下,án怎會án-ne。而且亞哈謝mā tòe乘tio̍h家己ê馬車陪同前往。當in遇tio̍h了耶戶ê時,問耶戶是m̄是帶來平安?耶戶真清楚表示國家亂象一大堆,人民都無平安ê生活。

第23到26節,chit時chūn,約何蘭chiah清楚原來耶戶叛變à。因為án-ne,伊一面逃,一面向亞哈謝喊叫,講「反了」,表示這是叛變,ài亞哈謝趕緊逃離。M̄-koh當約何蘭teh逃離ê時,耶戶用盡所有ê氣力,射出弓箭,就án-ne射中伊ê背部,穿過心臟。就án-ne約何蘭死tī伊ê馬車上。耶戶下命令ài部下kā約何蘭ê屍體tàn tī拿伯ê田裡,這tú好應驗ā先知以利亞當年對亞哈所講ê話(參考列王記上廿一:19)。

經文:

列王紀下 9:27-9:37

註釋:

Chit段經文記載猶大王mā同時被耶戶殺害,而亞哈ê bó͘耶洗碧仝款死去。而且伊ê死mā應驗ā先知以利亞所預言ê,就是「狗ài tī耶斯列食伊ê屍體」(參考列王記廿一:23)。這lóng tī說明一點:上帝會報應,絕對會。

第27到29節,chit段經文記載耶戶並無hō͘亞哈謝逃離,伊iáu-koh tui-jiok伊,並且下命令部下kā亞哈謝刣死。結果tī靠近以伯蓮ê所在,亞哈謝被射成重傷,m̄-koh伊並無停止,卻是繼續奔馳,直到米吉多城chiah死tī hia。伊ê臣僕kā伊ê屍體運tńg來耶路撒冷,葬tī王室墳墓內。亞哈謝chiah統治猶大一年ê時間而已。

第30到31節,耶戶一到耶斯列,耶洗碧mā聽tio̍h了所發生ê事,知影耶戶叛亂,而且殺害伊ê kiáⁿ約何蘭,kah伊ê親戚猶大王亞哈謝。因為án-ne,心內mā清楚知影,叛將必定會來殺害伊。因為án-ne,伊iáu-koh打扮得真好看,tī王宮ê窗口,看見耶戶就大聲叫講:「你chit-ê心利,弒君ê兇手!你會帶來平安mah?」伊故意用「心利」來稱呼耶戶,就是因為心利bat殺害以色列王以拉,篡奪了王位(參考列王記上十六:10)。耶洗碧用「你chit-ê心利」來稱呼耶戶,意思真清楚koh明顯,表示伊是一個殺害君王篡奪王位ê人。

第32到33節,耶戶一聽,就beh王宮擁護伊ê人,就用實際行動表現出來,kā耶洗碧扔落來。果然,有兩三個宮廷官員就kā伊扔出窗外丟了落去,就án-ne耶洗碧死去。耶戶趕馬車滾過伊ê屍體,表示痛恨入骨。

第34到37節,án-ne,耶戶已經完全除掉了耶洗碧kah伊ê殘餘份子,mā除掉了亞哈王朝ê親人,伊進入王宮,這表示伊政變成功,正式成做以色列ê王。Chit時chūn,伊下命令kā耶洗碧ê屍體埋à。M̄-koh hiah-ê準備去收埋ê人回報講,只有chhōe-tio̍h耶洗碧ê頭骨kah手骨,這tú好應驗ā先知以利亞當年對伊講ê警語(參考列王記上廿一:23)。

經文:

列王紀下 10:1-10:17

註釋:

Chit章繼續teh描述耶戶得tio̍h北國以色列ê領導權了後,繼續tùi耶斯列前往首都撒馬利亞,並kā亞哈所有ê kiáⁿ孫lóng除掉,並且mā kā tī路上tú-tio̍h ê南國猶大亞哈謝之親戚mā仝款刣死。然後伊koh khah進一步kā hiah-ê隨從亞哈去拜偶像神明ê人民,以及神廟等偶像神明lóng摧毀。Chit種背叛、篡奪王位者,會kā前朝王家ê家族、親戚lóng殺害ê行為,tī古老社會時代一點mā不稀奇。因為chit種背叛者往往會有一種思維,認為若是無án-ne做,chiah-ê家族人員mā會設法奪回王權,然後採取報復ê行為。

Chit段經文是耶戶kā所有kah亞哈有關ê親人全部lóng殺害ê經過。因為耶戶政變ê時,人是tī基列ê拉末城,iáu未進入以色列首府ê撒馬利亞城。如果beh真正統治北國以色列就一定tio̍h進駐首府。因為án-ne,伊先發出訊息hō͘所有tī撒馬利亞ê達官顯要,ài王室ê眾將領、大臣lóng得表態支持甚麼人做王。因為伊弒王篡位ê事件已經震撼了宮廷,因為án-ne,無人敢表示反對,原因是擁護耶戶做王ê勢力已經真明顯,任何反抗á是不順從伊ê人lóng會有真慘ê落場。因為án-ne,大家紛紛表態支持伊,並遵從伊下ê命令,kā所認bat ê亞哈親族ê人lóng刣死。

第1到3節,chit時ê耶戶尚且tī耶斯列,伊準備ài進入首都撒馬利亞。M̄-koh首都有亞哈王朝ê禦林軍看守。伊就寫phoe hō͘ chiah-ê城內ê眾領袖,包括領袖(軍事將領)、長老(民間代表)、亞哈kiáⁿ孫ê監護人(亞哈kiáⁿ孫ê老師)等。伊tī phoe中ài in tùi亞哈ê親戚中選出能幹者出來做王。其實,chit種信tú好反應出耶戶是一個真有政治手腕ê人。因為伊刣死亞哈ê kiáⁿ約何蘭王ê事,早to̍h震撼了全國,特別是首都撒馬利亞。因為án-ne,看bat這信ê人lóng知影,耶戶並m̄是ài in推薦,卻是ài in公開表態是m̄是支持伊做王。

第4到5節,撒馬利亞城內ê chiah-ê達官顯要當然真清楚政治ê現實面,因為án-ne,大家lóng紛紛回應耶戶ê信,in向耶戶表態全力支持,而且願意服從伊ê一切指令,對伊忠誠。

第6到7節,chiah-ê人既然表態beh服從,耶戶就ài in kā亞哈ê「七十個kiáⁿ孫」全lóng刣死,而且為tio̍h beh證明確實án-ne做,koh kā chit七十個人ê頭lóng phut落來送到耶戶hia。這已經清楚說明chiah-ê人為tio̍h要求生存,只好跟tòe耶戶背叛in過去所扶持ê亞哈王朝。

第8到11節,就án-ne,耶戶kā chiah-ê殺害亞哈kiáⁿ孫ê責任全lóng承攬落來。伊並且kā亞哈tī「耶斯列ê親屬、官員、親密ê朋友,kah祭司,lóng總刣了了,一個mā無留落來」。這tú好應驗ā先知以利亞hō͘亞哈ê信息(參考列王記上廿一:21)。

第12到14節,chia講「猶大王亞哈謝ê幾個親屬」,beh去向耶洗碧太后ê眾太子kah王其餘ê厝屬請安」,這是「亞哈謝因為婚姻ê關係,成了亞哈王ê親戚」(參考列王記下八:27)。Tī剷除了所有亞哈王朝ê人馬、親族了後,耶戶就放心地前往首都撒馬利亞,準備去接收王權。Tī路上tú-tio̍h南國猶大王亞哈謝ê親戚,in因為mā是屬tī亞哈bó͘耶洗碧ê親族,m̄-koh in iáu未得tio̍h耶戶當teh全力剷除亞哈親族ê消息,想beh去耶斯列探望亞哈ê親族。因為耶戶mā kā亞哈謝王hō͘殺害,chiah-ê人必定iáu未得tio̍h消息。因為án-ne,耶戶tī chia下命令hō͘伊ê部下,ài in kā chiah-ê lóng刣死,這「四十二人」tī前往耶斯列ê途中全部lóng遇tio̍h殺害,「一個mā無留落來」。

第15到17節,chia提起「利甲ê kiáⁿ約拿達」,這是以色列民族中屬tī非常保守ê一個家族。當約拿達得tio̍h消息耶戶來到伊ê所在,伊就去迎接並且請安。耶戶問伊是忠誠tī伊。伊表示絕對忠誠。因為án-ne,耶戶就beh伊上車同齊去撒馬利亞,hō͘約拿達親目看tio̍h伊怎樣剷除亞哈ê親屬「一個mā無留落來」。

Án-ne,無論tī tó位,只要是亞哈ê親屬ê人,lóng全部被耶戶刣了了à。

經文:

列王紀下 10:18-10:36

註釋:

Chit段經文是記載耶戶開始進行剷除亞哈時代所建立ê巴力神明崇拜,伊tāi先下手處置ê對象,是hiah-ê kā巴力當做真神崇拜ê人民,有淡薄á有thâi雞儆猴ê用意在內,beh hō͘ hiah-ê想beh拜巴力ê人民懍neh。

第18到21節,作者真清楚講耶戶用「計謀」,為tio̍h是beh「刣死所有拜巴力ê人」。因為án-ne,伊ài撒馬利亞城內所有巴力ê信徒,特別是巴力ê先知、祭司等人lóng一定tio̍h出席。耶戶是假做講khah強化對巴力崇拜ê信仰,ài頂面所講chiah-ê人一定lóng得出席。就án-ne,chiah-ê巴力ê先知、祭司、眾信徒lóng聚集到巴力神廟。

第22到24節,耶戶帶利甲ê kiáⁿ約拿達mā進入巴力神廟中,koh一pái進行宣告,只有拜巴力ê人chiah thang tī廟宇內,而且為tio̍h防止濫刣無辜ê之故,伊特別命令chiah-ê信徒、祭司、眾先知lóng一定tio̍h穿祭祀巴力神明ê時ê衫褲,來當做辨識ê路用,因為伊已經埋伏了八十個殺手,準備ài殺害chiah-ê人。Á伊kah約拿達則假做帶頭祭拜巴力。

第25到27節,果然,當伊kah約拿達tī祭祀典禮結束了後出來,就下命chiah-ê殺手進入廟內kā所有ê人lóng刣死。並且進一步kā所有ê神像lóng搬出來燒毀。

其實mā thang án-ne瞭解:耶戶chit種殘酷ê大屠殺動作,mā同時削弱了以色列ê國力,因為必定有真chē菁英mā tī chit pái ê屠殺中喪失性命。後來耶戶ê chit種大屠殺行為被先知何西阿嚴厲譴責。先知何西阿傳出上帝ê信息講:「Kā 伊號名叫做耶斯列;因為koh 一時á,我beh 辦耶戶ê 家tī 耶斯列刣人流血ê 罪,mā beh hō͘ 以色列 ê 子民 ê 國無去。(全民版)」(何西阿書一:4)原因可能是因為上帝以耶戶當做懲罰耶洗碧ê惡行,m̄-koh,耶戶並無好好á執行「上帝ê律法」,後來伊mā變了心像耶羅波安仝款帶領人民棄sak了上帝,去拜偶像。

第28到31節,雖然耶戶剷除了巴力偶像神明ê崇拜,m̄-koh家己卻無先潔淨家己,hō͘家己重頭tńg來耶和華上帝ê面前,伊是用開國元老耶羅波安ê模式,繼續帶領人民拜金牛,其實chit種金牛崇拜kah伊所剷除ê巴力神明是仝款ê,lóng是迦南人所看做生產ê神。因為án-ne,上帝並無應允hō͘伊ê後裔永遠統治北國以色列,卻是只有到第四代。

第32到36節,一pái政變後就開始大屠殺人民,對一個社會、國家、民族來講,並m̄是正確ê行為,一定會hō͘真chē無辜ê人受害,mā ē-sái真chē有識之士噤若寒蟬。Ná親像先知阿摩司所講ê::「通達ê 人看tio̍h chit 款時勢,伊會恬恬無講話,因為時勢真bái。(全民版)」(阿摩司書五:13)頭前講過,chit種大屠殺ê結果,就是國勢衰弱落來。Chia講上帝縮小了北國以色列ê版圖。Tī約旦河東岸ê土地,真chē所在被敘利亞佔領。耶戶就án-ne統治了北國以色列長到「二十八年」時間。

經文:

列王紀下 11:1-11:16

註釋:

第十一到十二章是紹介猶大王約阿施被按立,以及伊執政ê情景。Á第十一章mā是非常特別ê一章,特別提起猶大宮廷內太后亞伊利雅奪權ê經過,以及祭司耶何耶大án怎庇護kah按立年輕ê王子約阿施ê情景。

這是一段猶大王室政變奪權ê殘酷記事,描述亞哈謝王ê母親亞伊利雅親手beh毀壞王室ê基業。Mā thang án-ne講,伊想beh奪取王位,重建敬拜巴力神明ê宗教信仰。Chit點tú好kah耶戶teh進行ê摧毀偶像崇拜ê工作完全顛倒。耶戶會án-ne摧毀亞哈ê kiáⁿ約何蘭王朝,除了奪取王位外,iáu有一個主要目的,就是beh重建耶和華宗教ê信仰。因為án-ne,伊tī各地刣死敬拜巴力神明ê重要幹部,並且毀壞巴力神明ê殿。所以,當亞哈謝ê母親亞伊利雅(mā是亞哈ê cha-bó͘-kiáⁿ),一伊聽tio̍h家己ê kiáⁿ被刣死後,伊ê第一個反撲行動,就是先採取報復手段──剿滅猶大王室。M̄-koh,殺戮ê行為kan-taⁿ會帶來koh-khah chē ê報復á是殺戮,亞伊利雅最後mā是hō͘刣。

第1到3節,亞伊利雅聽tio̍h家己ê kiáⁿ被刣了後,第一個反應是反撲,伊下令處死「猶大王室全家」,好佳哉「亞哈謝ê kiáⁿ約阿施」chiah kan-taⁿ只有出世無jōa久,姑媽約示芭救了伊,kā伊匿tī「聖殿ê一間寢室」,chiah hō͘性命會保全落來,án-ne chiah達六年ê時間。

第4到8節,當約阿施七歲ê時,大祭司耶何耶大ài所有王室警衛kah王宮護衛官員lóng tī聖殿裡chiù-chōa,ài in用性命保護約阿施ê安全。不准有任何人企圖接近chiah年七歲ê王子約阿施。

第9到12節,照規定,軍隊進入聖殿bē-tàng帶武器。因為án-ne,當chiah-ê王室侍衛軍進入聖殿保護約阿施ê時,王室官員就the̍h當年大衛存khǹg tī聖殿理ê武器hō͘ chiah-ê侍衛,好保護尚且幼年ê王約阿施。然後耶何耶大就tī聖殿裡膏立約阿施為猶大ê王,kā王冠戴tī約阿施ê頭殼頂。因為是耶何耶大扶持伊做王,因為án-ne,耶何耶大對王ê影響力mā真深,伊mā thang講是「垂簾聽政」ê一位祭司。

第13到14節, 當亞伊利雅一聽tio̍h耶何耶大膏立約阿施為猶大王ê時,伊第一個反應是大喊「造反了」。這當然表示伊掌權七年ê王朝taⁿ大勢已去。

第15到16節,耶何耶大下令kā亞伊利雅tī王宮外面刣死,結束伊篡奪王位統治ê年代。

經文:

列王紀下 11:17-11:21

註釋:

Chit段經文簡略講述耶何耶大帶領猶大人民重頭tńg來敬拜上帝,並且當約阿施政權ê決策者。

第17到18節,耶何耶大帶領約阿施kah人民kah上帝立約,「beh做上主ê子民」,chit句話真清楚teh表明大祭司耶何耶大帶領猶大人民重新tńg來到上帝ê懷抱。M̄-nā清除巴力祭壇,mā kā hiah-ê巴力ê祭司馬坦刣死。

第19到21節,當一切就緒了後,耶何耶大kah王宮侍衛lóng護送chiah年紀kan-taⁿ七歲ê約阿施tńg來到耶路撒冷,坐上寶座,接受人民ê慶賀。當然chit時chūn ê攝政權lóng落tī大祭司耶何耶大ê手裡。

經文:

列王紀下 12:1-12:8

註釋:

Chit章記載猶大王約阿施執政ê經過,仝款ê記事,mā記載tī歷代志下第廿四章。作者主要teh說明大祭司耶何耶大輔政ê時代,lóng帶領猶大人民對上帝忠實。Á歷代志作者則強調tī耶何耶大往生後,約阿施王就棄sak上帝,koh tńg去拜巴力了,tùi chia mā thang知影列王記作者會tī chia為甚麼會講,當敘利亞王哈薛率兵來攻打耶路撒冷ê時,約阿施就趕緊kā聖殿裡所積存ê財寶lóng當做禮物送hō͘敘利亞王哈薛ê原因。

Chit段經文描寫約阿施命令眾祭司beh kā人民辦理獻祭ê錢,lóng存起來準備當做整修聖殿ê路用。

第1到3節,chia一開始就講約阿施共計統治猶大40年,這表示伊tī 47歲ê時就因為被殺害而往生(第21節)。作者講伊「一生做上主認為對ê事」,原因是伊自細漢就有大祭司耶何耶大「教導伊」。可惜ê是去除偶像崇拜ê工作並無徹底斬草除根,m̄-koh這mā說明拜偶像ê行為,已經深化tī猶大ê以色列人民性命裡。

第4到5節,約阿施有意修建聖殿,因為án-ne,伊下令所有祭司一定tio̍h好好á保管tio̍h人民獻祭ê時繳交ê費用,á是聖殿稅,á是奉獻hō͘祭司ê錢。

第6到8節,m̄-koh經過一段時間,整修工程iáu-koh無進展,chit時chūn,約阿施要求所有祭司kā整修聖殿ê錢lóng繳交出來,伊準備ài kā整修聖殿ê工作由王室來接手。

經文:

列王紀下 12:9-12:21

註釋:

Chit段經文描述整修聖殿ê工作,以及敘利亞王哈薛出兵beh來攻打猶大耶路撒冷ê情形,以及約阿施ê回應方式。

第9到12節,chit段經文說明大祭司耶何耶大怎樣帶領眾祭司kā猶大以色列人民奉獻ê錢,收存起來,並清楚點交hō͘王室整修聖殿ê負責人,然後主管整修聖殿ê人,kā chiah-ê錢用來支付hō͘所有整修工程ê人ê工資。

第13到14節,chit兩節真清楚講出猶大以色列人民奉獻ê錢,除了支付工資kah買整修用ê材料外,並無用來購置新ê器具,包括碗、銀杯、號筒,á是其他金銀器皿。

第15到16節,chia講kā奉獻hō͘聖殿ê錢,kah hō͘祭司ê錢分別清楚,而且所有工程人員lóng非常誠實、可靠,因為án-ne hō͘ chit項整修工程進行得非常順利。

第17到19節ê背景,如果對照歷代志下第廿四章17到22節,就會明白為甚麼比猶大國勢khah弱ê敘利亞敢來侵略,原因是因為tī祭司耶何耶大往生後,無人敢監督國王約阿施,致使伊身邊多了真chē引誘伊去敬拜巴力偶像神明ê人,雖然上帝派先知去警告伊kah chiah-ê幕僚,m̄-koh顯然地,約阿施kah伊身邊ê人lóng m̄聽從。上帝ê靈就支配大祭司耶何耶大ê kiáⁿ撒迦利亞去公開警告。結果約阿施tùi敬拜上帝、聽從上帝奴僕ê話ê君王,反tńg變成殺害上帝奴僕撒迦利亞ê君王,伊就tī聖殿ê庭園裡用石頭kā撒迦利亞活活phah死。因為án-ne,上帝無koh賜福伊,m̄ kah伊同在。列王記作者tī chia講敘利亞王哈薛率兵攻打非利士人ê城市迦特了後,隨時轉兵來攻打猶大,結果猶大phah敗仗,只好kā聖殿寶庫裡所有ê金子當做「禮物送hō͘哈薛王」,chiah hō͘哈薛帶兵撤離耶路撒冷tńg去。

第20到21節,chia講約阿施ê手下陰謀反叛。Kā伊刣死。照歷代志下第廿四章23到27節ê記載來看,in兩人殺害約阿施了後,猶大人民並無kā約阿施葬tī王室墳墓內,卻是葬tī耶路撒冷城裡,而且反叛ê軍官,一位是亞捫婦人ê kiáⁿ撒拔,另外一位是摩押婦人ê kiáⁿ約薩拔。列王記作者是講約阿施是tī伊帶軍隊kah敘利亞軍隊交戰失敗撤退ê時,hō͘伊手下ê兩名軍官刣死,這兩名密謀反叛ê軍官,一位名叫約撒甲,另外一位名叫約薩拔。為tio̍h是beh報復伊謀害撒迦利亞ê事件。伊死後,伊ê kiáⁿ亞瑪謝繼承伊ê王位。

經文:

列王紀下 13:1-13:13

註釋:

Chit章主要lóng是記載北國以色列王約哈斯統治以色列ê時代,伊án怎帶領以色列人民歸向上帝。M̄-koh以色列人民都無完全棄sak拜偶像ê行為,以及約哈斯死後,伊kiáⁿ約華施繼承王位後ê情景。另外有一部分,是記載以利沙活teh ê末期講出預言以色列王約華施會面對ê國政大事。

Chit段經文描寫北國以色列君王約哈斯統治下ê情形。因為伊做上帝看做邪惡ê事,因為án-ne,失去上帝ê賜福。後來伊有改變認罪,祈求上帝帶領,而hō͘以色列人民thang得tio̍h上帝赦免而享受太平ê日子。

第1到2節,chia koh一pái出現列王記作者不時用ê句話,講一個無好ê君王就是「做上主看做邪惡ê事」,mā就是帶領人民「犯罪」,無棄sak拜偶像ê行為(第2、6節)。作者用chit種句話teh描述國王無好好á帶領人民敬拜上帝,反tńg是帶領人民去敬拜偶像神明,hō͘人ê心靈墮落,棄sak了上帝。這就是犯罪ê記號。

第3到6節,列王記作者ê觀點,就是國家會tú-tio̍h災難,就是kah君王帶領人民棄sak上帝,去拜偶像神明ê事有關,當然這是tùi宗教信仰ê基礎切入看國家、社會ê事務,m̄是tùi政治、軍事ê角度看。因為án-ne,chia會講上帝對以色列人民發出「大受氣」當做懲罰ê方式,就是hō͘敘利亞王哈薛,以及伊ê kiáⁿ便‧哈達前後率兵來攻打北國以色列,並且用「殘暴ê手段壓迫以色列人」。Chit時chūn,約哈斯chiah想tio̍h beh tńg來走chhōe上帝,上帝mā垂聽伊ê祈禱,「上主賜hō͘以色列一個解救者」,卻無說明chit位「解救者」是甚麼人,真可能有三個人選;一是亞述ê國王亞大得尼拉利三世,伊tī主前806 kah 804年攻打大馬士革,致使敘利亞腹背受敵,趕緊tùi以色列撤兵。二是以色列王約哈斯ê kiáⁿ約華施(第25節)。三是耶羅波安二世,伊是一位非常有成就ê以色列王。因為ē-tàng phah敗敘利亞軍隊ê侵犯,chiah致使北國以色列人民會得thang像以前仝款,安享太平。Ē-sái講是chit種安享太平ê日子並m̄是真長,原因是以色列人民已經習慣崇拜偶像神明。因為án-ne,tī首都撒馬利亞iáu-koh保存「亞舍拉女神ê像」。

第7到9節,chia講敘利亞王消滅了約哈斯ê軍隊,hō͘伊只chhun「五十個騎兵,十輛馬車,一萬步兵」,chit-ê數目比起伊ê祖先亞哈時代有過兩千輛戰車,以及tī一日之內就消滅了敘利亞軍隊十萬步兵(參考列王記上二十:29)ê實力相比,真是無法度比並。chit-má ê北國以色列ē-sái講是只有簡單ê王室護衛能力,無所講ê「國防」thang講。約哈斯統治北國以色列十七年ê時間。伊死後伊ê kiáⁿ約華施繼任伊ê王位。

第10到13節,仝款ê,約華施統治北國以色列長到十六年時間,m̄-koh伊仝款,mā是「做上主看做邪惡ê事」,chit種君王lóng是上帝所討厭ê對象。第12節是值得注意ê一節,chia講:「伊tī戰場上對抗猶大王亞瑪謝ê英勇事蹟,一一記載tī以色列王史上。」可惜列王記都無留落來清楚資料,說明為甚麼約華施治國時代,為甚麼會發生kah南國猶大亞瑪謝執政ê時ê衝突。M̄-koh thang看出南北兩國有衝突,這並m̄是甚麼新鮮事。

經文:

列王紀下 13:14-13:25

註釋:

這是舊約聖經記載有關以利沙最後一段ê經文。有關以利沙死後ê骨骸有特殊能力,是teh說明伊雖然無親像伊ê老師先知以利亞仝款肉體升天,m̄-koh,伊ê肉體雖然埋葬了,卻iáu有「神力」出現,表示出先知kah上帝之間特殊ê關係。Chit段經文mā是成做後代朝聖者絡繹不絕地去以利沙埋葬墳墓ê主要因素。

第14節,tùi第八章記載有關以利沙ê記事後,就無koh出現以利沙ê事蹟,直到chia重新出現,mā說明tī以色列歷史裡先知運動中,以利沙ê影響力thang講和先知以利亞並駕齊驅。Chia講以利沙「患tio̍h絕症」,tī伊teh要臨終chìn前,約華施去探望伊,並且teh哭teh-hoah:「我父ah,我父ah!以色列堅強ê保護者ah!」tùi chit句話mā thang看出約華施kah以利沙之間有真親密ê關係。Mā同時講出以利沙ê氣力,chiah是真正保護北國以色列ê基礎。因為tī伊身上真有上帝ê能力kah伊同在。而且chit種力量khah贏過軍隊。

第15到17節,tī伊臨終chìn前,iáu繼續對來探望伊ê以色列王約華施講出預言。這方式是透過用弓箭射箭ê方式,hō͘約華施知影,伊ê軍隊thang贏過敘利亞人ê侵犯,並且thang tī亞弗攻打敘利亞人,直到kā in滅絕。

第18到19節,chit兩節以利沙ài約華施用箭phah地上,m̄-koh因為約華施只有phah三pái,因為án-ne,以利沙mā hō͘約華施知影,伊原本只要phah五、六pái,就ē-tàng完全消滅敘利亞人ê,m̄-koh卻因為約華施無全力以赴,結果只有ē-tàng phah敗in,並無能力完全滅絕in。

第20到21節,chit兩節真特別,mā ē-sái講是舊約聖經中siōng特別ê所在,就是以利沙死去,被埋葬à。Ē-sái講是當有人kā死去ê屍體hiat到以利沙ê墳墓中,觸(tak)tio̍h到伊ê骸骨,結果卻發生chit-ê觸(tak)tio̍h,hō͘死去原本準備埋葬ê死人,卻因為án-ne而koh活起來。Mā因為án-ne,後來伊埋葬ê墳墓反而成做以色列人民歡喜朝聖ê所在,可能是希望藉tio̍h去朝聖,hō͘家己ê身軀也ē-tàng得tio̍h神奇ê醫pah。

第22到23節,當以色列王約哈斯執政時代,敘利亞王哈薛不時侵犯北國以色列,m̄-koh lóng因為上帝ê恩典,chiah hō͘北國以色列ē-tàng有能力抵擋敘利亞ê侵犯。列王記作者講,這純粹是上帝ê恩典,因為上帝無願意看見家己ê選民被欺負、受苦,ná親像祂以前透過摩西帶領受苦ê以色列人民脫離埃及ê管轄仝款。

第24到25節,chit兩節應驗ā第18到19節以利沙對約華施ê預言。

經文:

列王紀下 14:1-14:22

註釋:

Chit章記載兩件事,一是有關猶大王亞瑪謝執政ê情景,仝款ê chit段記事,mā thang參考歷代志下第廿五章。二是有關北國以色列王耶羅波安二世治理長到四十一年ê政情。

Chit段經文是記載有關南國猶大王亞瑪謝執政後ê事蹟。伊ê結局kah伊ê老父約阿施ê遭遇仝款,lóng是hō͘暗刣死去。這mā顯示了政情bē穩。特別是當伊決定帶兵出擊北國以色列ê時,m̄-nā無phah贏,顛倒,是hō͘北國以色列王約華施phah敗,而且耶路撒冷城牆被拆一大道,聖殿kah王宮中ê財寶lóng被劫洗一空,而且有人受掠,包括王亞瑪謝在內,這thang講真是悲慘ê結局。

第1到4節,亞瑪謝tī「二十五歲ê時chūn」繼承老父約阿施ê王位,共計統治耶路撒冷長到「二十九年」時間,án-ne,伊死ê時是五十四歲。作者tī chia講伊「做上主認為對ê事」,m̄-koh卻「無親像伊ê祖先大衛王」,因為大衛王tī敬畏上帝ê事頂面忠心耿耿。即使家己ê kiáⁿ叛變伊,而且想殺害伊,m̄-koh,伊無因為災難來臨,就會失去對上帝ê信心。亞瑪謝是學習老父約阿施,對宗教信仰並無堅持,因為án-ne,hō͘人民繼續拜偶像。

第5到6節,chit兩節講亞瑪謝鞏固了政權了後,就決定處決hiah-ê「刣伊父王ê臣僕」(參考十二:20—21)。M̄-koh伊遵行摩西律法ê規定,無kā父母所犯ê罪責,追究、牽連到in ê kiáⁿ身上(參考申命記廿四:16),卻是甚麼人犯罪,甚麼人承擔被懲罰ê責任。

第7節,chit節講出亞瑪謝治理之下南國猶大ê軍事實力,ē-tàng kā以東人制服tī統治之下。Tī伊治國之期,m̄-nā重整軍隊有三十萬名精兵,而且koh開了「三千四百公斤銀á tùi以色列雇來十萬軍隊」(參考歷代志下廿五:6)。M̄-koh後來上帝差遣先知去對亞瑪謝講,不ài伊雇用chiah-ê十萬名以色列士兵,因為只要有上帝同在就有夠。伊chiâⁿ實聽從先知ê話。Mā真如先知ê預言,伊ê軍隊phah敗以東,收復了祖先約蘭執政時代所遺失ê以東(參考列王記下八:20—22)。

第8到10節,chit三節記載亞瑪謝準備出兵攻打北國以色列,到底是甚麼原因,m̄-koh tī歷代志下第廿五章14到16節有一段真重要ê記事,說明亞瑪謝phah敗以東人了後,卻kā以東人所拜ê偶像神明帶tńg來燒香叩拜。為tio̍h chit件事,上帝ê先知去警告伊,m̄-koh伊卻無聽從先知ê話,反tńg恐嚇講beh刣死hit-ê先知,結果hit-ê先知講上帝決定beh消滅伊。Chit段經文講當亞瑪謝決定beh出兵以色列ê時,以色列ê王約華施會講寓言,伊所講ê寓言故事有ná teh說明「草猴捕蟬,黃雀在後」ê道理,意思是別認為ē-tàng phah贏以東就驕傲起來,iáu m̄知tio̍h滿足,認為家己真了不起。若chit-ê定會失敗。

第11到14節,亞瑪謝果然心高氣傲,m̄聽苦勸。Chiâⁿ實出並去phah以色列,結果兵敗如山倒hit種嚴重。以色列軍隊m̄-nā俘虜了伊,mā俘虜了真chē人做人質帶tńg來以色列,甚至以色列軍隊進攻到耶路撒冷,koh kā以法蓮門ê城牆拆毀一大段,koh侵入聖殿、王宮搜刮了真chē金子、銀á,kah用具。

第15到16節,chit兩節記載北國以色列王約華施往生,伊ê kiáⁿ耶羅波安二世繼位。

第17到18節,自從敗hō͘北國以色列約華施了後,亞瑪謝治理之下ê南國猶大就成做北國以色列ê附庸國。Chit段期間伊koh活了十五年後死去。

第19到22節,ná親像頭前提起過ê,亞瑪謝ê晚年境遇kah in父親約阿施仝款,lóng是遇tio̍h謀刣死去。Tī第19節並無說明甚麼人謀刣亞瑪謝,不過可能kah聖殿ê祭司有關,若無,就是保守派ê人。雖然伊bat逃到「拉吉城」去避難,m̄-koh兇手iáu是仝款tui-jiok過去kā伊刣死。伊ê kiáⁿ烏西雅繼承伊ê王位。伊ê能力bē-bái,收復了所羅門時代用來擴充海外貿易ê港口以拉伊(所羅門時代kā它稱做「以祿」,參考列王記上九:26)。

經文:

列王紀下 14:23-14:29

註釋:

Chit段記載有關耶羅波安二世ê事蹟,雖然真簡短,ē-sái講是如果tùi先知阿摩司kah先知何西阿ê作品就thang看出,耶羅波安二世ê時代,ē-sái講是以色列王國自分裂以來,siōng有成就ê一位國王,mā是北國以色列自分裂後,siōng輝煌ê時代。Tī伊任期長到四十一年內,對kui個以色列國ê軍事、經濟、政治lóng有真大ê「貢獻」,甚至有以色列人kā伊當做「拯救者」看待。

第23到25節,作者一開始就講chit位耶羅波安二世「做上主看做邪惡ê事」,he就是「帶領以色列人犯罪」。

Tùi第25節就thang看出耶羅波安二世tī軍事上ê成就,收復了真chē過去祖先所失落ê土地,伊ê成就遠比伊以前ê祖先lóng tio̍h koh khah令以色列人民懷念。

先知阿摩司形容伊hit-ê時代ê貴族是「睏tī象牙ê床頂,靠tī安樂椅上享福,食嫩牛kah肥羊ê筵席」(參考阿摩司書六:4),就thang看出tī耶羅波安二世時代經濟繁榮ê景象。

注意一下第25節所提起ê先知約拿,這kah約拿書中ê hit位「逃亡ê先知約拿」並m̄是仝一個位。

第26到27節,chit兩節講tio̍h耶羅波安二世雖然「做上主看做邪惡ê事」,m̄-koh上帝iáu是藉tio̍h伊來拯救以色列人民。作者ê重點是tī第27節所講ê,對祂ê選民有無比ê疼,mā希望藉án-ne ē-tàng幫助in復興國家,ē-tàng hō͘以色列人民曉悟過來,因為「上主無願意以色列人永遠滅絕」。M̄-koh,上帝iáu是失望了,這mā是後來以色列亡國tī亞述帝國ê原因。

第28到29節,tī耶羅波安二世統治下ê北國以色列,真正是真有實力,m̄-nā phah敗敘利亞kah黎巴嫩ê哈馬,lóng重新歸順tī伊治理之下。伊死去了後,伊ê kiáⁿ撒迦利雅繼承伊ê王位。

經文:

列王紀下 15:1-15:7

註釋:

Chit章主要lóng是teh記錄北國以色列政情動盪ê情景,包括有撒迦利雅王(第8到12節)、沙龍王(第13到16節)、米拿現王(第17到22節)、比加轄王(第23到26節),以及比加王(第27到31節)等。其它第1到7節是記載猶大王烏西雅,以及第32到38節有關約坦王ê記事。

因為猶大王烏西雅執政ē-sái講是南kah北兩國歷任國王在位siōng久長ê一位,長到五十二年時間,伊一個人執政時間thang抵得上北國以色列kúi-nā位國王。這mā表示tī烏西雅王執政ê時期,猶大國ê政局ē-sái講是非常穩定ê,這無論是過去á是chit-má ê國家來講,lóng是真重要ê基礎。

有關烏西雅王ê事蹟,tī歷代志下第廿六章mā有詳細記載chit位國王所做ê各項事蹟。Tī中文《和合本》ê記載,kā烏西雅ê名用「猶大王亞瑪謝ê kiáⁿ亞撒利亞登基」,m̄-koh tī歷代志則寫做「烏西雅」。《現代中文譯本》無論是在列王記chia,á是tī歷代志lóng是用「烏西雅」。照歷代志作者ê資料,伊確實是一個真有成就ê君王,包括:phah敗非利士人,hō͘亞捫人向伊降服、進貢,開挖水井,鼓勵人民開墾土地種植葡萄園,並且強化國防力量。不過卻mā因為國家強盛,心內開始驕傲起來。因為對聖殿ê祭司不敬,kā原本只有祭司chiah thang做ê祭祀工作,家己擔當。結果致使癩ko病,mā因為án-ne hō͘伊無法度koh再進入聖殿敬拜上帝,國政是由伊ê kiáⁿ約坦負責。

第1到2節,「以色列王耶羅波安二世在位ê第廿七年」,chit年大約是tī主前767年。當時伊烏雅王是「十六歲」,前後共計執政「五十二年」,chiah-ni̍h久ê時間,是tùi主前792年開始起算是伊kah老父亞瑪謝同齊執政,直到主前767年開始,這年伊獨自執政是到740年止。

第3到5節,tī第3節chia講烏西雅效法in父親亞瑪謝ê模樣,「做上主認為對ê事」,chit句話mā thang對照第十四章3節。可惜,就是無kā猶大境內以色列人民崇拜偶像ê事完全除去。頭前已經有提起過,烏西雅王ê成就真大,m̄-koh卻mā因為án-ne而驕傲起來。歷代志下第廿六章16到21節記載伊擅自進聖殿tī香壇頂燒香,而這是只有大祭司chiah thang進入ê所在,雖然當時有亞撒利亞祭司帶八十個祭司去阻止伊,並且提出警告。伊卻tī聖殿香壇ê所在對chit群祭司發大怒,結果就出現癩ko。列王記chia講伊「一生受這病ê糾纏」,國家大事只好交由伊ê kiáⁿ約坦處理。第5節chia所講ê「tòa tī家己ê行宮」,意思是teh指伊已經因為患有癩ko病ê緣故,被隔離出來à(參考利未記十三:46)。

第6到7節,就án-ne,烏西雅直到死去ê時chūn,lóng是tī癩ko病ê糾纏下過日子,ē-sái講是非常痛苦。伊ê kiáⁿ約坦繼任伊ê王位。Á約坦tī主前750年就開始接落國家大事,直到老父烏西雅tī主前740年往生。

經文:

列王紀下 15:8-15:30

註釋:

Chit段經文連續記載撒迦利雅、沙龍、米拿現、比加轄,kah比加等五位以色列君王ê事蹟。其中以雅比ê kiáⁿ沙龍當以色列王只有一個月(第13節)時間siōng短。另外一方面,tùi chit段經文mā thang看tio̍h以色列宮廷內鬥、爭權奪位ê情形,充分顯示出政局ê bē穩定。為tio̍h beh奪取王位,米拿現甚至以非常殘酷ê手段屠殺居民,連孕婦lóng無放過。

第8到12節,chit段經文是記載耶羅波安二世死後,伊ê kiáⁿ撒迦利雅繼位。列王記作者講伊「kah伊ê先祖仝款做上主看做邪惡ê事」,chit句話對照猶大王亞瑪謝kah烏西雅是「做上主認為對ê事」,就thang看出完全無相仝ê情況kah結果。Chia所講ê「領以色列人犯罪」,意思是棄sak上帝,去拜偶像。真自然tek,就bē遵照上帝ê話去辦理國政大事。

伊執政ê時間真短,只有六個月而已。結果就被沙龍暗刣死去,篡奪了伊ê王位。Án-ne,tùi耶戶到kiáⁿ約哈斯,然後約華施接任,koh再到耶羅波安二世繼任,到撒迦利雅等共計四代就結束loh,這tú好應驗ā上主對耶戶講ê,伊ê後代thang接任伊ê王位,m̄-koh kan-taⁿ會到第四代(參考十:30)。

第13到16節,chit段經文是記載有關有關以色列王沙龍ê事蹟。

沙龍是謀刣撒迦利亞篡奪王位ê王,m̄-koh chit種王位時間真短,只有一個月而已。雖然列王記作者講tio̍h有關沙龍ê事蹟,lóng「一一記載tī以色列王史上」,m̄-koh tī chia都無任何寫了,因為án-ne,mā就只有伊暗刣前王外,其他ê事真oh知影是做kóa甚麼。其實,kan-taⁿ有一個月時間,真oh講ē-tàng做kóa甚麼。

第17到21節,tī第14節就有記載「迦底ê kiáⁿ米拿現」刺殺死沙龍,篡奪王位。Tùi第16節mā thang看出伊是一個手段殘酷ê君王。Tī伊決定叛變奪取王位所經過ê城鎮,特別是「提斐薩」chit-ê城,竟然只因為hit-ê城ê人無向伊投降,伊就進行大屠殺,甚至連「孕婦ê腹肚lóng剖開」,這是非常惡質ê行為。

Mā因為伊手段殘酷ê統治,hō͘附近國家特別是亞述帝國對伊施展壓力,逼kah伊一定tio̍h進貢「三萬四千公斤銀á」,而伊因為手段殘酷,chiah ē-tàng tùi人民手中強索chiah-ni̍h chē ê錢財o͘-se亞述帝國ê皇帝,好保全家己ê王位。Kā chit節經文比較阿摩司書第五到六章,就會發見chiah-ê有錢人所得tio̍h ê錢財是tùi sàn-chhiah人中剝削奪取ê。Chia講米拿現除了強索人民ê錢財外,伊mā同時「強迫每人捐出五十塊銀á」。就án-ne,有長到十年時間,北國以色列人民tī伊治理之下,是過非常痛苦ê生活。

第23到26節,chit段是記載以色列王比加轄ê事蹟。伊是繼承老父米拿現ê王位,m̄-koh mā只統治兩年而已。仝款ê,伊是學老父ê模樣,結果是「做上主看做邪惡ê事」,帶領以色列人民棄sak上帝,去拜偶像。結果伊ê 將領比加造反,tī王宮內kā伊刣死,ná親像伊ê老父米拿現殺害前王仝款,比加篡奪了王位。

第27到31節,chit段經文是描述殺害比加轄而篡奪王位ê比加之記事。伊統治北國以色列ê時間算是比較長ê一位,共計有二十年之久。M̄-koh仝款ê,伊mā是「做上主看做邪惡ê事」。

Thang án-ne瞭解:無上帝賜福,即使擁有王位mā是枉然,對人民、社會、國家lóng bē有幫助。比加做國王期間,國勢衰弱,被亞述帝國佔領ê城鎮包括有:以雲、亞伯‧伯‧瑪迦、亞挪、基底斯,kah夏瑣等,以及基列、加利利,kah 拿弗他利等地區,koh khah嚴重ê,是亞述帝國皇帝iáu俘擄了頂面所講城市ê人民去亞述做奴隸。除了這以外,以色列iáu koh khah年年進貢亞述帝國,而且mā只有ē-tàng聽命亞述ê指揮,任其壓迫。這mā是以色列人自出埃及後第一pái重新經歷到奴隸ê慘痛生活。 後來何細亞起來反叛比加,刣死伊,並且篡奪王位。

經文:

列王紀下 15:32-15:38

註釋:

Chit段經文是記載有關猶大王約坦ê記事。Chit段記事mā記載tī歷代志下第廿七章1到9節。對照兩處經文ê記事,就thang發見約坦確實是一個有實力ê統治者,tī伊統治南國猶大期間,bat出兵攻打亞捫人,而且phah敗in,並且強迫亞捫人像伊進貢三年,每年tio̍h繳交「三千四百公斤銀á,一千公噸小麥,一千公噸大麥」等。歷代志作者用chit句話形容伊:「約坦一工比一工強盛,因為伊忠實地順從上主—伊ê上帝。」ná親像列王記作者tī chia所講ê,伊「效法in父親ê模樣,做上主認為對ê事」。Chit種描述,tú好kah北國以色列ê歷代君王完全顛倒。

第32到35節,短短ê幾節經文,講出久長以來一直無改變ê現象,就是kah chìn前祖先仝款,無kā人民已經是根深蒂固拜偶像神明ê事hō͘除滅,因為án-ne無法度帶領全國人民專心一意敬拜上帝。不過,至少伊是忠實tī上帝ê。只是人民拜偶像ê事,已經是積年thiám月ê老習慣,無強力執行剷除,就會tī民間落根生長。Koh講,tī伊執政期間,伊tī國防要務上確實是下了功夫,伊kā聖殿ê北門防衛工程建造完成。歷代志作者講伊koh tī耶路撒冷ê俄斐勒擴建城牆,mā tī猶大山區建設城鎮,tī山林內建造堡壘kah瞭望台等,chiah-ê lóng是kah國防基礎有密切關係。

第36到38節,伊統治猶大十六年。M̄-koh無想tio̍h tī伊治理期間,敘利亞王利汛kah北國以色列王比加聯盟攻打猶大,主要目的是beh猶大mā加入in ê聯軍,反抗亞述帝國擴大版圖ê舉動。M̄-koh猶大因為m̄敢得罪亞述,結果以色列kah敘利亞出兵懲罰無加入聯軍ê猶大。

經文:

列王紀下 16:1-16:9

註釋:

Chit章lóng是記載有關亞哈斯繼任老父約坦留落來王位,統治南國猶大ê情景。Siōng慘ê,是為tio̍h beh巴結亞述帝國,希望亞述帝國出兵抗拒敘利亞kah北國以色列ê聯軍,伊竟然去亞述拜訪結束tńg來國內ê時chūn,kā亞述ê偶像神明mā帶tńg來耶路撒冷,結果因為án-ne,kā歷代祖先對上帝忠實ê態度,hō͘完全摧毀了,這是非常可惜ê事。

有關亞哈斯ê記事,mā記載tī歷代志下第廿八章。Tī歷代志ê記事中有一段真特別ê資料,描述上帝ê奴僕先知俄德出來對撒馬利亞ê以色列軍隊喊話,講為甚麼beh俘擄家己ê同胞南國猶大ê軍隊?為甚麼beh屠殺in?俄德提醒in之所以ē-tàng phah贏,是因為上帝beh藉tio̍h in懲罰南國猶大。若是in不tháu放猶大ê俘擄,上帝會嚴懲in。就án-ne,北國以色列領袖決定tháu放南國猶大ê俘擄,包括受傷ê士兵lóng全部釋回。

仝款ê歷史記事,mā thang參考以賽亞書第七章。當敘利亞軍隊進攻ê時chūn,hō͘猶大全國人民lóng心靈不安。Chit時chūn,上帝bat差遣祂忠實奴僕先知以賽亞去對亞哈斯講話,ài伊mài驚,tio̍h信靠上帝。M̄-koh顯然地,亞哈斯聽bē落去先知以賽亞ê警語。伊寧可相信亞述帝國ê武力護衛,而m̄相信上帝ê庇護、帶領。

Chit段經文一開始,就講約坦ê kiáⁿ亞哈斯繼任老父約坦留hō͘伊ê王位,m̄-koh伊卻無「效法伊ê先祖大衛王做上主認為對ê事」,就án-ne,帶領南國猶大人民棄sak上帝,去拜偶像神明,kah北國以色列君王ê情形仝款,這是非常可惜ê事。

第1到4節,原本tī約坦chìn前ê猶大君王,lóng是對上帝忠實,雖然in無能力剷除境內ê偶像神明,m̄-koh至少國王本身是敬畏上帝ê。M̄-koh卻無想tio̍h約坦ê kiáⁿ亞哈斯卻m̄是án-ne;伊是棄sak上帝,做上主看做邪惡ê事,kah北國以色列ê王仝款。Koh khah嚴重ê,是tī第3節,伊做siōng無應該做ê事,mā是伊ê祖先所無過ê行為,就是「Kā家己ê kiáⁿ燒獻hō͘偶像,仿效本來住民ê 可惡行為」,而且伊是帶頭四界去拜當地ê偶像神明。

第5到6節,chia mā thang tùi第十五章37節看見,就是敘利亞kah北國以色列聯盟攻打南國猶大,m̄-koh久攻iáu是攻不下耶路撒冷。M̄-koh照歷代志下第廿八章5到7節則記載敘利亞kah以色列phah贏了,而且俘擄了真chē猶大人到大馬士革去,並且因為約哈斯ê軟弱bē-tàng,致使南國猶大有十二萬ê精兵被以色列殺害,包括亞哈斯ê kiáⁿ瑪西雅mā遭殺害。Á被以色列軍隊俘擄ê猶大人民共計有二十萬人,kah真chē財物。Chit對猶大來講,ē-sái講是極大ê創傷。

列王記作者講,就tī chit時chūn,敘利亞侵入了「以拉伊城」,佔領chit-ê城,這原本tī烏西雅王時代所收復ê祖先城鎮,taⁿ koh一pái失落。簡單ê一句話,講出南國猶大ê國勢衰弱了起來。

第7到9節,為tio̍h beh解決以色列kah敘利亞聯軍圍困耶路撒冷ê事件,請求亞述帝國派兵協助救援。結果付出ê代價是非常貴ê,就是kā聖殿kah王宮中ê金子、銀á當做禮物送hō͘亞述皇帝提革拉‧比列色。Thang án-ne瞭解,當君王kā聖殿ê金銀財寶lóng當做進貢他國ê禮物ê時,就已經teh表明chit-ê君王已經無koh看重敬拜上帝ê重要性à。果然,亞述皇帝答應了南國猶大約哈斯ê請求,率領軍隊去攻打敘利亞,kā大馬士革佔領,刣死敘利亞王,而且俘擄人民。

經文:

列王紀下 16:10-16:20

註釋:

Chit段經文真清楚說明亞哈斯王帶領猶大人民公然棄sak上帝ê經過。

第10到13節,當亞哈斯去大馬士革迎接phah敗敘利亞ê亞述皇帝ê時,就仿造一座偶像神明kah祭壇交hō͘祭司烏利亞,ài伊仿造一個。當伊tī訪問亞述皇帝結束tńg來到耶路撒冷ê時,祭司烏利亞已經造好勢該偶像神明kah祭壇,亞哈斯就án-ne帶領猶大人民拜偶像。伊會án-ne做,是認為亞述帝國真強,因為án-ne,仿造亞述帝國所拜ê神明mā會強盛起來,其實,這是非常錯誤ê觀念kah信仰認知。

第14到18節,亞哈斯iáu命令祭司烏利亞kā聖殿中原本tio̍h用來敬拜上帝ê新壇移行,kā伊為偶像神明所建造ê祭壇排設tī聖殿內面,換句話講,tī伊手中,kā偶像神明khǹg入聖殿裡,而祭司m̄-nā無阻止,反tńg是聽從亞哈斯王ê命令做tāi-chì,誤導了國王kah人民進入聖殿祭拜偶像神明,這是非常錯誤ê行為。

第19到20節,真清楚,猶大tī亞哈斯棄sak上帝了後,全國人民開始瘋狂地跟tòe伊拜亞述人ê神明,m̄-koh仝款,並無因為án-ne而hō͘國家kah人民陷入萬劫無koh ê處境,因為上帝無koh庇護in,mā m̄ kah in同在。伊tī統治猶大十六年ê時,往生,由伊ê kiáⁿ希西家繼任為王。Iáu好,tī希西家王治理之下,伊帶領人民重頭tńg來上帝ê懷抱,可惜ê是,chit時ê南國猶大已經是衰弱多病,想beh改革mā真oh徹底,m̄-koh至少iáu hō͘猶大人民看見一絲ǹg望。

經文:

列王紀下 17:1-17:23

註釋:

Chit章主要是講亞述帝國消滅了北國以色列,並且kā北國以色列人民俘掠到各地去,而且tùi附近各國引進他國、伊族人民進入北國以色列境內khiā起,而這就是後來以色列人民kah外族通婚ê一個主要背景。Á in生落來ê後代,mā因為án-ne被南國猶大人民鄙視(siùⁿ)而kā它稱做「撒馬利亞人」由來ê一個背景。列王記下mā是tī chit章結束loh北國以色列ê歷史。Chit時是主前721年。

本來亞述帝國只是phah敗以色列,hō͘伊每年一定tio̍h向亞述帝國進貢。M̄-koh,以色列ê王何細亞顯然m̄甘心接受chit種局面,伊想beh結合埃及帝國ê氣力,反抗亞述ê控制權,結果反被亞述帝國知情而kā它消滅à。Chit種情形mā是後來南國猶大發生ê情景,上帝忠實奴僕先知耶利米一再苦勸南國人民tio̍h投降順從巴比倫帝國ê統治,m̄-koh in m̄聽從先知耶利米ê話,甚至kā先知耶利米下tī監獄中,繼續抵抗巴比倫帝國,結果後來被巴比倫帝國hō͘消滅了,全國人民差不多lóng被掠到巴比倫去做奴隸。

Chit段經文細述上帝無koh庇護北國以色列人民,原因是in棄sak上帝好遠、好遠。In m̄-nā接受迦南人ê神明,iáu接受in ê生活風俗,而chiah-ê風俗中有真chē lóng是kah迦南人ê宗教禮儀有密切關係。換句話講,in已經無koh相信上帝,而且歡喜迦南人ê宗教信仰,甚至kā家己ê kiáⁿ當做祭品燒獻hō͘異教神明,tī生活上mā去詢問算命、卜卦等,chiah-ê lóng是惹起上帝憤怒ê原因。

第1到4節,chia講「猶大王亞哈斯在位第十二年」,這應該是主前732年。Chit一年「以拉ê kiáⁿ何細亞作以色列ê王」。其實,伊mā是用刺殺比加王篡奪tio̍h王位,ná親像歷代ê先王仝款,lóng是跟tòe去「做上帝看做邪惡ê事」。M̄-koh伊接落ê chit-ê北國以色列,當時是屬tī亞述帝國ê殖民國家。可能是看見亞述帝國替換皇帝,伊想趁機會脫離亞述ê統治,結果新任ê亞述皇帝撒縵以色(主前727到722年)派兵來攻打以色列,結果北國以色列投降,只好每年lóng tio̍h向亞述帝國「進貢」。M̄-koh何細亞顯然並m̄是真心順服,伊暗中派人去走chhōe埃及ê資助,並且公然背叛亞述。因為án-ne,亞述皇帝撒縵以色kā伊掠關入監牢。

第5到6節,主前724年,亞述koh一pái大舉派兵進攻以色列首都撒馬利亞,會「圍困」長到「三年」之久,是因為chit座城是建造tī山phiāⁿ上,koh tī亞哈王時代,對hit-ê城做真好ê防禦建構,chiah有án-ne堅固ê防禦設施。亞述帝國為tio̍h攻取撒馬利亞城,竟然圍困長到三年之久,不過iáu是攻落撒馬利亞城,這是主前721年。亞述帝國攻落了後,就kā「以色列人掠到亞述去」,而且kā chiah-ê受掠ê以色列人民分散tī其他ê城市。其實,mā就是送到各地ê奴隸市場去拍賣,人數chē kah二萬七千二百九十名。Tī第24節講亞述帝國koh再tùi其它附近地區移入伊族人進入補充chiah-ê以色列人民受掠了後空出來ê城鎮,這就是以色列cha-bó͘人kah異族通婚ê原因。

第7到12節,chit段經文是作者teh說明為甚麼以色列國會hō͘亞述滅亡ê原因,有下列幾點:
一是in bē記得bat拯救in祖先脫離埃及奴隸之地ê上帝。去拜偶像神明。

二是in學習迦南地人ê風俗,kā chiah-ê民間崇拜偶像神明ê風俗帶入敬拜上帝ê禮儀中。

三是tī各地大城鎮、小村、小巷、山丘、樹林等地,雕刻偶像神明。

Chiah-ê lóng是上帝不准in做ê事,m̄-koh in lóng屢勸m̄聽地去做。

第13到18節,chit段經文是繼續前段所敘述ê以色列人民之過犯,就是上帝bat tiāⁿ-tiāⁿ差派先知去警告in,chiah-ê先知包括大家所熟悉ê以利亞、以利沙、阿摩司、何西阿、彌迦,以及siōng早期ê先知以賽亞等。M̄-koh in以色列人民lóng m̄聽。而且m̄是只有北國以色列人民拒絕聽從,連南國猶大人民mā是仝款。其實,chit種話已經有含嚴重警告南國猶大人民ê韻味à。
因為拜偶像神明ê風氣真興盛,而chiah-ê虛假ê神明帶hō͘以色列人民就是虛妄。Koh khah嚴重ê,就是「Kā家己ê子女燒獻hō͘異教神明,koh向通靈ê kah算命ê問卜」,這是上帝非常受氣而oh得原諒ê事。因為án-ne,決定hō͘亞述帝國kā北國以色列消滅,hō͘以色列民族chhun落來猶大國。
第19到20節,前段lóng是細講北國以色列滅亡ê原因,chit-má chit兩節則連帶提起南國猶大人民ê問題,mā是kah北國以色列人民ê情形仝款。作者tī chia提起上帝「棄絕所有ê以色列人,懲罰in,kā in交tī殘忍ê仇敵手中」,chit句話已經真清楚講tio̍h以後一百多年,mā就是主前586年巴比倫攻破耶路撒冷ê慘劇。

第21到23節,chit段經文講述主前930年,mā就是所羅門往生後,以色列民族分裂做做為南北兩國,北國以色列就是由以法蓮族出身ê耶羅波安帶領。M̄-koh伊一開始為tio̍h阻止以色列人民忘不了tńg去耶路撒冷敬拜上帝,竟然tī「但」kah「伯特利」chit兩所在建造聖殿,卻mā同時雕刻金牛hō͘以色列人民去拜(參考列王記上十二:25—31),這就是北國以色列人民犯罪ê第一步。然後歷代國王lóng是án-ne續接落去,ná親像第22節所講ê,in是「不斷重複伊所犯ê罪」。結果上帝嚴厲ê懲罰ná親像第23節所講ê,被俘虜到亞述帝國去ê以色列人民,是「一直tòa tī hia」,mā就是tùi主前721年,直到主前538年波斯帝國興起代替了巴比倫帝國了後,以色列人民因波斯皇帝ê允准chiah有機會回鄉。Án-ne,in tī亞述帝國khiā起超過了二百年之久。其實,Tī chit段將近兩百年時間,北國以色列人民差不多已經chhōe bē-tio̍h完整ê支族宗族à。

經文:

列王紀下 17:24-17:41

註釋:

Chit段經文講述被掠到亞述帝國á是受賣到各地去做奴隸ê以色列人民,並無因為án-ne而悔改,卻是繼續鑄造偶像崇拜。雖然in中間有人想beh敬拜上帝,m̄-koh in顯然已經無法度分別清楚,真假之神間ê差別。原因是chit種錯誤ê信仰認知已經好一陣子ê年日,連祭司mā無法度清楚了,án-ne chiah是真正ê問題所在。

第24節,這是非常重要ê一節經文。以色列人民遇tio̍h空前ê「大浩劫」,就是亞述皇帝kā khiā起tī撒馬利亞kah附近城市ê外族人,強制遷徙進入撒馬利亞城kah附近城鎮khiā起,siōng主要ê目的,就是beh會hō͘俘虜到亞述帝國去做奴隸以外ê,hō͘ hiah-ê餘留tī撒馬利亞ê以色列人民,kah chiah-ê tùi外地遷徙進入ê異族人通婚,想用chit種方式同化以色列民族,mā希望chit種方式改變in ê「耶和華宗教信仰」。其實,亞述帝國會án-ne做有一個原因,講穿了是想beh kā以色列民族消滅。因為án-ne混合tio̍h khiā起,會真容易hō͘以色列ê婦女kah chiah-ê移居進入ê異族cha-po͘人通婚,這mā是後來有「撒馬利亞人」之稱ê緣由背景,m̄-koh chit-ê名稱有種鄙視(siùⁿ)ê語意。這mā是後來以色列人民改變看法,就是只要女性是以色列人,無論伊kah toh族人通婚,生落來ê kiáⁿ lóng認為是以色列人。M̄-koh若是男性是以色列人,除非kah仝款是以色列cha-bó͘人結婚,若無,只要kah異族cha-bó͘人通婚,生落來ê子女並無算是以色列人,一定tio̍h經過祭司檢驗合格chiah算。

第25到28節,chia講chiah-ê被移居進入撒馬利亞城khiā起ê人並m̄知á是拒絕敬拜上帝,結果不時發生被野獸咬死ê事件。因為án-ne,亞述知影了後,隨時kā擄來ê奴隸中間差派一位有祭司身分ê人tńg去,教導in怎樣敬拜上主。

第29到33節,這是一段真重要ê經文,講述以色列人民kah chiah-ê同居做伙ê外族人,in mā kā信仰混雜做伙à。換句話講,以色列人民kā敬拜上帝,當做敬拜真chē神明中ê一位神而已,卻m̄是獨一ê上帝。In甚至學習西法瓦音人kā kiáⁿ燒獻hō͘ in ê神明。而且teh敬拜上帝ê時,mā用拜偶像神明ê禮儀參雜加入,chiah-ê lóng是引起上帝非常憤怒ê原因。

第34到41節,chit段經文說明留tī北國以色列ê人民,in已經m̄知甚麼是獨一ê上帝了,in teh敬拜獨一ê上帝同時,mā teh敬拜當地ê異教神明,無論上帝ê奴僕án怎勸解、說明,in lóng無法度聽從。因為這已經成做in kúi-nā代傳承落來ê信仰態度了,偏離了上帝透過摩西頒佈hō͘ in ê律法誡命。講穿了,in對上帝ê認bat是jú來jú霧霧無清à。

經文:

列王紀下 18:1-18:12

註釋:

Tùi第十八章開始,直到第二十章止,這三章lóng是teh紹介猶大希西家執政廿九年ê情景。Chit時期mā是南國猶大國siōng脆弱ê時chūn,m̄-koh卻因為伊聽從先知以賽亞ê建議,m̄-nā從事宗教信仰改革,帶領猶大人民歸向上帝,koh tī治國ê工作上,ná親像列王記作者tī chia所講ê:伊對上帝ê忠實,從來無一個王像伊án-ne,非常謹守上帝hō͘摩西ê律法誡命。

仝款ê記事,mā記載tī歷代志下第廿九章,kā歷代志ê資料用來對照列王記ê chit段記事,就會koh khah清楚希西家王ê治國情景。

Chit段經文非常特別,就是用第1到8節紹介南國猶大新王亞哈斯ê kiáⁿ希西家繼任王位後ê大略記事,主要teh說明伊「效法伊先祖大衛王ê模樣,做上主認為對ê事」,然續後落來用第9到11節對照北國以色列tī何細亞王治理之下,被亞述帝國滅亡,人民hông掠去做奴隸ê原因,就是「因為以色列人無聽從上主—in ê上帝,違背上主kah in所立ê約」。Chit種對hip相當鮮明,teh說明一個國家、民族ê興衰,就是根據in有無遵行上帝ê話語。Chit點mā是申命記派作者一貫ê思想kah信念中心。

第1到3節,chit三節真簡單地紹介希西家王ê背景,以及伊「二十五歲」開始執政,統治「二十九年」,án-ne算來伊活了五十四歲。第3節講伊「做上主認為對ê事」,chit句話表明伊ê風格kah信仰態度,kah伊ê老父亞哈斯ē-sái講是完全顛倒(參考十六:3—4)。對照歷代志下第廿九章3到11節所記載ê,就thang發見伊做王ê hit年,就重新kā聖殿ê門phah開,而且進行修建ê工作。伊ài眾祭司kā聖殿內hiah-ê邪惡ê偶像全部清除。

第4到6節,列王記作者tī chit三節中hō͘ in希西家真好ê評價,講:「希西家信靠上主—以色列ê上帝;猶大國,tī伊以前kah以後,無一個王kah伊仝款。」原因是伊繼位ê時,beh kā伊ê老父所鑄造大量偶像神明ê猶大社會環境改造,確實是需要一下苦心。Koh講,第4節提供了真重要ê資料,講伊mā phah破了tùi摩西時代傳承落來ê「銅蛇」偶像ê崇拜(參考民數記廿一:4—9)。當年摩西鑄造chit座銅蛇,有一個重要ê用意,是beh治療in tī曠野漂流期間,bat因被蛇咬傷,有bē少人因為án-ne死去。鑄造chit座銅蛇,是beh hō͘以色列人民看見了後,無koh驚惶。結果日子久了,以色列人民卻kā它當做神像而kā它崇拜,直到chit-má希西家執政,chiah kā它摧毀。
Ná親像前段所提起ê,當眾祭司潔淨聖殿了後,希西家王重新舉辦獻祭禮儀作聖殿奉獻(參考歷代志下廿九:18—25)。Ē-tàng看出一個君王ê態度絕對會影響tio̍h人民。

第7到8節,因為希西家王對上帝忠實,「因為án-ne上主kah伊同在;伊所做ê一切事lóng順利」,這mā是約瑟tī受賣到埃及做奴隸,以及後來被陷害而關入監獄ê時,作者一再用ê一句話(參考創世記三十九:2、3、21、23)。Tī chia,列王記作者講上帝kah希西家王同在,hō͘伊有能力thang反抗亞述帝國,而且ē-tàng phah敗非利士人,chiah-ê資料thang tùi歷代志下第廿八章16到21節ê經文記事看tio̍h背景。說明tī伊執政之下ê南國猶大,國勢漸漸茁壯起來。

第9到12節,ná親像頭前有提起過ê,chit段經文tī第十七章已經有真清楚描述亞述帝國消滅北國以色列ê經過,chit-má chia重新簡略地敘述北國以色列滅亡ê記事,其實是有一個用意,就是tī第12節所beh說明ê,希西家王就是遵守上帝ê話,因為án-ne會tùi上帝得tio̍h氣力。相對ê,北國以色列ê末代國王何細亞因為m̄遵守kah上帝ê約,帶領人民棄sak上帝,無上帝同在,國家就因為án-ne被消滅à。

經文:

列王紀下 18:13-18:37

註釋:

Chit段有關亞述攻打耶路撒冷ê事件,mā同時記載tī歷代志下第三十二章1到19節,以及以賽亞書第三十六章等。時間ê背景應該是tī主前701年ê時代。有關chit件亞述攻打耶路撒冷ê記事,在列王記就一直記載到第十九章。

Tī第十七章記載亞述帝國消滅了北國以色列後,對南國猶大來講,確實是一個真大ê衝擊,因為北國以色列ê國勢原本就比南國猶大khah大,而且khah強,lóng已經無法度抵擋亞述帝國了,何況是猶大。因為án-ne,當北國以色列人民被俘虜四散後,對猶大國是一個非常震撼ê警訊kah打擊。有可能mā可能就是因為chit件重大ê民族災難,chiah致使希西家深信只有tńg來到耶和華上帝ê信仰,chiah ē-tàng救in脫離亞述帝國ê手。因為án-ne伊帶領全國人民專心敬拜上帝,並且kā一切偶像神明ê敬拜lóng總廢除掉。M̄-koh卻tī chit時,亞述帝國kâⁿ-tio̍h強大武力來進攻耶路撒冷,對希西家挑釁,hō͘伊kah猶大人民感覺非常驚惶kah不安。雖然伊kā亞述皇帝西拿基立勒索ê黃金kah銀á lóng奉送過去à,卻iáu是無法度滿足西拿基立ê要求,西拿基立甚至用極盡侮辱ê話,m̄-nā侮辱猶大人民,甚至鄙視(siùⁿ)tio̍h耶和華上帝,這mā是後來上帝大大憤怒ê原因,進一步koh kā亞述大軍差不多hō͘ in全軍消滅。

第13到14節,chia講時間是tī「希西家王在位ê第十四年」,換算是主前701年。Chia講西拿基立「攻打猶大ê設防城鎮,kā它佔領」,ē-sái講是並無記明講toh一kóa設防城鎮被亞述攻落。M̄-koh tī「亞述帝國年鑑」中則記載有四十六座設防城市被佔,mā有無數ê村落淪陷,而且有二十餘萬ê猶太人民被俘虜。因為án-ne,希西家王派出特使去kah準備率軍來攻打耶路撒冷ê西拿基立求和,表示願意降服。亞述皇帝西拿基立竟然獅大開嘴,向希西家王勒索一萬公斤ê怎kah一千公斤ê金子。

第15到17節,因為希西家希望用「賠償金」來緩和亞述帝國ê攻勢。M̄-koh這筆費用之高,逼kah伊一定tio̍h kā聖殿壁飾ê金子,以及聖殿kah王宮中寶庫裡ê銀á全lóng當à。M̄-koh即使希西家王照約束送了chiah-ê金銀過去,m̄-koh並無減緩亞述決定併吞猶大ê決心,亞述皇帝西拿基立the̍h了錢卻爽約,伊tùi拉吉派出大軍beh攻打耶路撒冷城。

對照一下歷代志下第三十二章到8節ê記載,希西家王看見亞述大軍逼近耶路撒冷,伊馬上就kah民間長老kah官員商量討論應對之策。先是kā通往城外ê水泉hō͘堵起來,án-ne,hō͘亞述大軍無水lim。Koh講,趕緊修築城牆,kah增加軍械,然後召集城內所有ê cha-po͘人,並且勉勵大家mài驚,有上帝thang當做óa靠,上帝一定會為猶大人民相戰。

第18到21節,亞述皇帝西拿基立派出談判大將beh去kah希西家王對談。希西家王則派出三個代表,分別是王宮總管、王室書記,kah國史大臣。亞述ê代表真清楚表示希西家王無看清實況,猶大怎樣可能有本領kah亞述帝國對抗?連埃及lóng自身難保了,ná會想beh期待埃及ê援軍。

對照歷代志下第三十二章9到15節ê記載,亞述ê代表真清楚kā chit三個猶大國代表官員講:一是m̄是定了希西家王所講ê,認為伊講上帝會拯救in,he是白賊。二是無任何國家ê神有能力thang脫離亞述帝國皇帝ê掌握。三是in確定耶和華上帝mā是仝款救不了猶大。

第22到25節,chit位亞述代表繼續對希西家王派出ê chit三位代表講出侮辱ê話,包括講in出兵來攻打耶路撒冷是上帝差派ê,這就是亂用上帝ê名,其實歷代志下第三十二章16節,作者講西拿基立ê代表甚至是講了「一kóa koh khah難聽ê話侮辱主上帝kah上主ê奴僕希西家」。因為án-ne,in無可能是上帝所差派ê,chit點非常清楚。確實,chit位代表在列王記chia mā以非常藐視ê話講,只要猶大國ē-tàng派出兩千騎兵,伊就ē-tàng派出兩千匹ê戰馬,chit-ê意思是teh指伊ê戰馬可以抵擋猶大ê軍隊,而且講亞述軍隊中siōng微小ê軍官lóng tio̍h猶大ê 將領koh khah大。Chit種囂張ê語句,kan-taⁿ會引起上帝koh khah大ê憤怒。

第26到27節,原來當時中東ê外交語言是亞蘭語。Á猶大人民lóng是講希伯來語。猶大ê代表希望亞述代表mài用希伯來語,為tio̍h是beh希望bē致使影響tio̍h城牆上ê守衛軍隊之心。M̄-koh chit種懇求mā被亞述大將所否定。而且iáu講出城內ê人lóng kā「beh食家己ê糞,lim家己ê尿」,chit句話ê意思是teh指耶路撒冷城已經被包圍,最後會因缺乏糧食,而用chit種方式來解飢渴。Chit種情形真類似敘利亞王便‧哈達進攻北國撒馬利亞城ê時,因為圍城真久致使撒馬利亞城內飢荒嚴重,結果委了生存,cha-bó͘人交換gín-á煮來食(參考列王記下六:24—30)。

第28到32節,Tī chit段經文內底,亞述代表故意用希伯來語大聲對牆上ê守衛軍喊叫,主要用意就是ài in m̄-thang koh再聽從希西家王ê話,ài in順從上帝ê帶領,因為亞述一定會攻破耶路撒冷城。Chit位代表ài in派代表出來談降服ê條件,án-ne,in就ē-tàng m̄免lim家己ê尿,食家己ê糞。M̄-koh mā同時講得真明白,in一投降,結果就是親像北國以色列仝款,被遷徙「到另一個所在」khiā起。

第33到35節,Tī chit段經文中,chit位亞述代表提起幾個被亞述消滅ê族群,in ê守護神lóng無法度挽救hiah-ê族群免除亞述帝國ê攻擊。伊用chit種說明來向猶大城牆上ê守護軍進行心理戰,beh hō͘ in驚惶不安。這ná親像歷代志下第三十二章18節講ê,亞述代表án-ne做,為tio̍h是beh「恐嚇in,hō͘ in無鬥志,好thang輕易佔領chit-ê城」。

第36到37節,m̄-koh守衛軍隊真清楚,in聽從希西家王ê命令,lóng m̄回答chit位亞述大將任何挑釁ê話。M̄-koh猶大ê chit三位代表則因為聽tio̍h亞述大將侮辱in kah上帝ê話語,感覺非常艱苦心,用拆裂衫褲表示心中極大ê哀痛,然後kā所聽tio̍h ê話lóng全部kā希西家王講。

經文:

列王紀下 19:1-19:7

註釋:

Chit章非常重要,mā ē-sái講是先知信息ê中心──óa靠上帝,祂必拯救。當亞述帝國一再表示beh攻擊耶路撒冷城ê時,先知以賽亞卻傳出上帝ê拯救信息。

仝款chit章記事,mā記載tī以賽亞書第三十七章,mā有部分記載tī歷代志下第三十二章20到23節。Mā thang看出歷代志作者Tī chit段重要ê上帝拯救耶路撒冷事件之記事,是非常簡略ê幾節經文chhōa過而已。

Chit段經文描述一個忠實tī上帝ê君王,beh到國家大事ê時,一定會先問上帝ê旨意。因為án-ne,透過先知詢問上帝ê旨意,這是希西家聽tio̍h三位臣僕報告後ê第一個動作。

仝款ê chit段記事mā記載tī以賽亞書第三十七章1到7節。Tī希西家王時代ê先知以賽亞,一直認為上帝會teh庇護耶路撒冷,伊ài希西家王一定會對上帝有堅定ê信心。Tī伊ê言論中,非常清楚警告執政者,m̄-thang認為óa靠軍事武力ē-tàng解救in脫離災難,伊特別明確指出埃及是不可靠ê,卻是應該tio̍h óa靠性命ê主宰上帝chiah是正確之道(參考以賽亞書三十一:1—9)。

第1到2節,當三位特使回覆亞述大將所講侮辱上帝kah猶大人民ê話hō͘希西家王了後,伊用「拆裂衫褲,披上麻衣」chit種方式來表示心中艱苦心到極點,然後帶chiah-ê人進入聖殿,而chiah-ê宮廷大官mā tòe國王仝款teh moa麻進入聖殿。Tī hia,希西家王koh一pái派chiah-ê大臣去見先知以賽亞,chit pái受差派ê koh-khah chē幾位「資深ê祭司」陪同。

第3到4節,希西家王ài chiah-ê官員去見先知以賽亞ê時,需要傳達ê消息,就是國家tú-tio̍h大難,chit種困境有ná臨盆ê產婦,卻是因為虛弱而出現難產ê現象。並且beh hō͘先知以賽亞知影,亞述皇帝ê大將講了侮辱、褻瀆上帝ê話。而且希西家講猶大人民ná親像「殘存之民」,這已經teh表示上帝ê選民就只chhun耶路撒冷城內chiah-ê人民而已。因為其他ê衛星城鎮lóng已經被亞述帝國佔領了(參考十八:13)。

第5到7節,這是先知以賽亞回覆chiah-ê臣僕ê話。Tī先知以賽亞傳達出來上帝ê信息真清楚指出:上帝家己會處理chit件事,而其中ê一種方式,就是hō͘亞述皇帝西拿基立聽信謠言而趕tńg去亞述去,最後會遇tio̍h謀害死去。Tī本章第37節記載,伊是hō͘家己ê兩個kiáⁿ亞得米勒kah沙利色殺害,m̄-koh這殺害事件並m̄是tī撤軍了後隨時發生,卻是tī tńg去尼尼微城了後,經過二十年ê時間(主前681年)左右。

經文:

列王紀下 19:8-19:19

註釋:

Chit段經文繼續講述亞述皇帝西拿基立並無聽tio̍h埃及tī伊背後進攻而驚惶,卻是koh一pái用強猛、威脅ê動作,ài猶大趕緊向伊投降。希西家王接tio̍h西拿基立ê恐嚇信了後,就去聖殿向上帝哭訴,請求上帝仲裁。

Chit段經文mā同時記載tī以賽亞書第三十七章8到20節。內容kah列王記作者所記載ê仝款。

第8節,chit節提起亞述皇帝西拿基立tī iáu未聽tio̍h伊ê大將回報猶大王希西家並無降服ê意思,就已經先出兵去攻打猶大ê立拿城,chit-ê城mā是耶路撒冷重要ê衛星城市。此城ê淪陷,mā是teh說明耶路撒冷面臨了嚴酷ê考驗。

第9到13節,chit段經文講出西拿基立可能有兩pái攻打耶路撒冷。第一pái是tī第9節所提起ê,聽tio̍h埃及出兵攻打亞述ê事,這mā是teh回應第7節所提起ê,上帝beh hō͘西拿基立聽tio̍h謠言而撤軍。M̄-koh當伊率兵tńg去防守ê時,埃及koh撤軍tńg去。就án-ne西拿基立koh-khah受氣,認為猶大認為有埃及當靠山,不降服,就án-ne koh一pái出重兵攻打耶路撒冷。伊chit pái先寫一封phoe嚴厲警告猶大希西家王,hō͘伊知影亞述ê先祖已經攻佔了幾個城鎮,chit-má伊mā攻佔了六個城鎮,伊寫chit張phoe ê用意,就是beh希西家王目睭睜亮些,抵抗伊ê結果是koh khah悲慘。

第14到19節,希西家王接tio̍h亞述皇帝西拿基立ê恐嚇信了後,感覺非常惶恐,只好kā chit封西拿基立寫ê信攤tī上帝面前。伊向上帝哭訴,hiah-ê被毀滅ê城鎮,lóng是因為人民無敬拜真正創造主上帝,卻是去拜偶像ê結果。M̄-koh伊帶領猶大人民敬拜上帝,因為án-ne,伊懇求創造萬物ê主宰,mā是惟一ê真神一定會「tùi亞述手中」拯救in,án-ne就ē-tàng hō͘全世界ê人lóng知影獨獨chit位創造主chiah是上帝。

經文:

列王紀下 19:20-19:37

註釋:

Chit段經文主要是先知以賽亞回應猶大希西家王ê信。Tī這封回覆ê信裡,先知以賽亞真清楚kā希西家王講,ài伊m̄免驚惶,因為亞述皇帝已經得罪全能ê上帝。因為án-ne,上帝beh庇護耶路撒冷ê決心真明確,一定會去執行。上帝beh hō͘猶大人民ē-tàng繼續掖種、收割。相對ê,beh hō͘亞述ê軍隊無一兵一卒ē-tàng進入耶路撒冷城。Beh hō͘亞述皇帝kah伊ê軍隊怎樣來,就怎樣tńg去。

Chit段經文kah以賽亞書第三十七章21到38節記載ê內容仝款。Lóng是提起上帝beh庇護耶路撒冷城,hō͘伊無受tio̍h一點á傷害。

第20到24節,先知以賽亞回phoe hō͘希西家王,hō͘伊知影上帝已經「垂聽」伊ê祈禱。因為án-ne,上帝beh伸手懲罰亞述帝國ê西拿基立kah伊ê軍隊。理由是西拿基立嘲(sau)笑ê對象是神聖ê上帝。雖然亞述tī戰事上有過真chē豐功偉業ê成就,m̄-koh chiah-ê lóng會真緊成做泡影。

第25到28節,chit段經文先知以賽亞清楚指出,chit-má上帝ài beh進行伊毀滅亞述帝國ê計畫。Tī這信中,先知以賽亞清楚講出,過去亞述帝國ê成就,lóng是因為有上帝賜福帶來ê結果。M̄-koh現今ê驕傲,會hō͘ in所有ê tùi án-ne變成廢墟,甚至付出koh khah大ê代價。Ná親像已經完全無法度彈動、受掠獲ê動物仝款。亞述ê軍隊tùi toh條路來攻打耶路撒冷,mā會tùi原路tńg去,這表示in並無任何因為chit pái戰爭有斬獲ê意思。
第29到31節,先知以賽亞講完亞述ê慘敗了後,續落來就是hō͘希西家王知影上帝beh怎樣做。這是為tio̍h beh hō͘伊安定心思,m̄免驚惶ê一種方式。

Tī chit段經文講,先知以賽亞講上帝ê旨意真清楚,chit段耶路撒冷城被圍困期間,確實是發生食物缺乏ê困境,m̄-koh chit種困境真緊to̍h會過去,因為亞述軍隊會撤軍,然後in就ē-tàng繼續掖種、收割。猶大城內ê人民ná親像上帝chhun落來ê子民,今後thang安心khiā起。

第32到34節,chit段經文是繼續對希西家王講ê話。Chia先知以賽亞真明確地講出,上帝一定會親自庇護耶路撒冷。而且koh一pái重複講,beh hō͘亞述軍隊怎樣來,就怎樣tńg去。In根本無法度發射任何一枝箭傷害chit-ê城ê任何一個人,mā bē hō͘任何一個亞述士兵行入耶路撒冷城。因為是上帝親自固守tio̍h chit-ê城。

第35到37節,當希西家王接tio̍h先知以賽亞ê信後,「hit工暗時」上帝就隨時執行祂對亞述帝國皇帝西拿基立kah伊ê軍隊ê懲罰。Chia講上帝ê天使進入亞述軍隊ê營房中,tī一夜之間,做一睏就刣死了十八萬五千人。這ē-sái講是非常嚴重ê創傷,hō͘亞述帝國就án-ne跋一下peh bē起來。

有一種講法是上帝用突發ê惡性傳染病當攻擊ê武器,hō͘亞述軍隊根本就措手不及。

西拿基立看見chit種慘狀,m̄敢真chē所在停留,隨時帶殘餘ê士兵趕tńg去尼尼微。M̄-koh「有一工」,mā是頭前有提起過ê是過了二十年後發生ê,西拿基立ê兩個kiáⁿ,一個名叫亞得米勒,另外一個叫沙利色,殺害in ê老父西拿基立,主要原因是想beh奪取王位,無想tio̍h兩個人都無得tio̍h,反tńg是西拿基立ê另外一個kiáⁿ以撒哈頓繼任伊ê王位。

歷代志下第三十二章23節作者講,因為chit pái ê事件,hō͘希西家王tī當時lóng受附近各國尊敬伊,不時向伊貢獻禮物。

經文:

列王紀下 20:1-20:11

註釋:

Chit段記載有關希西家王害病嚴重,teh要死去,然後因為伊向上帝ê哭求,上帝koh賞賜hō͘伊有長到十五年歲月之記事,以及後伊康復了後,卻傳來巴比倫帝國差派使者來訪,希西家王bē記得家己所有ê一切lóng是來自賞賜,tī巴比倫帝國使者面前驕傲地顯示家己ê能力,這詳細ê記事mā同時記載tī以賽亞書第三十八到三十九章。Tī以賽亞書第三十八章同時收集到一篇希西家王tī康復了後所寫ê o-ló詩歌。仝款ê記事mā記載tī歷代志下第三十二章24到33節,m̄-koh內容確實是簡略了真chē。

Chit段經文世紀tī希西家王害病。原本先知以賽亞傳hō͘伊ê信息是:bē康復。為tio̍h án-ne,希西家王後來向上帝祈求,結果上帝koh差派先知以賽亞去kā伊講會hō͘伊延長十五年ê性命。伊懷疑,因為án-ne祈求一個兆頭。

仝款ê chit篇記事,mā記載tī以賽亞書第三十八章1到8節。Á歷代志下第三十二章24到26節,用短短三節經文,講希西家王tī康復後,無感謝上帝ê憐憫,反tńg是驕傲起來,結果就發生真chē災禍,chit時chūn,伊chiah知影犯m̄-tio̍h去,上帝就無tī伊活teh ê時chūn,降災禍。

第1到3節,希西家王害重病,這可能是發生tī主前701到702之間,因為án-ne,作者tī chia用「約tī chit時chūn」,mā就是tī亞述帝國皇帝西拿基立派大軍來圍困耶路撒冷ê時。原本是無希望康復ê,因為先知以賽亞傳去hō͘伊ê信息,是伊會死。Ài伊「準備後事」。其實,這mā表示希望伊kah早準備接班ê人,免得koh發生宮廷王室內鬥爭奪王位ê事件。希西家王聽tio̍h chit-ê消息了後,非常艱苦心,伊向上帝祈求。

第4到6節,結果上帝koh垂聽希西家王ê祈禱,ài先知以賽亞koh再tńg去王宮,kā希西家王講,tī「三工之內」,伊就ē-tàng痊癒。並且答應hō͘伊「多活十五年」時間,為tio̍h是beh hō͘伊親目看見上帝怎樣拯救耶路撒冷,m̄-koh擊退亞述大軍圍困耶路撒冷ê神跡。上帝希望用chit種方式,幫助希西家王領導猶大人民用koh khah敬虔ê心,回應上帝ê疼。

第7到11節,當先知以賽亞kā上帝ê應允hō͘伊多活十五年之信息傳hō͘伊ê時,mā同時kā希西家王ê奴僕講,thang the̍h無花果膏塗tī希西家王ê瘡口,án-ne就會痊癒。Á當希西家王聽tio̍h先知以賽亞án-ne講了後,隨時kā伊講有甚麼兆頭thang來證明chit-ê信息是真正。先知以賽亞hō͘伊家己選一個兆頭:看chit工影前進十步,á是倒退十步?希西家王選比較無容易看tio̍h ê日影倒退十步。結果就án-ne應驗ā。Á希西家王mā chiâⁿ實多活了十五年。

Chit種要求日影退十步ê兆頭,真親像約書亞當年chhōa以色列人民tī迦南地攻打亞摩利人ê時chūn,bat祈禱上帝hō͘日頭、月娘lóng停止移動,直到伊phah完勝仗(參考約書亞記十:12—13)。日月星辰lóng是上帝所創造,受造物lóng聽從上帝ê話。

會要求兆頭,表示tī信心上不足。Á聖經中出現真chē pái需要兆頭ê記號,包括亞伯拉罕mā是án-ne,希望上帝hō͘伊知影ná會kah上帝所講ê仝款,會得tio̍h祂賞賜ê土地(參考創世記十五:7)。士師基甸mā是一而再、再而三要求兆頭(參考士師記六:17、37、39)。Á祭司撒迦利亞聽tio̍h天使kā伊講,伊年老ê bó͘會生一gín-á,而且tio̍h號名約翰ê時,伊是m̄敢置信。結果天使hō͘伊成做啞口,直到約翰出世chiah解除(參考路加福音一:20)。

經文:

列王紀下 20:12-20:21

註釋:

Chit段經文是描寫希西家王康復起來了後,就bē記得伊ē-tàng存活落來,完全部lóng是上帝ê恩典,m̄-koh伊卻認為家己真有才華,因為án-ne,先知以賽亞就hō͘伊知影,伊ê後裔會因為棄sak上帝而遇tio̍h嚴重ê挫敗,結果lóng被掠到巴比倫去做奴隸。換句話講,當希西家teh誇耀家己ê財富kah才能ê時,chiah-ê lóng會消失殆盡。

第12到13節,chia講巴比倫王米羅達‧巴拉m̄-koh聽tio̍h希西家王破病,就帶簡單ê禮物kah一張慰問卡來探望希西家王。其實hit時chūn ê chit位巴比倫王是真落魄ê,因為伊被亞述帝國phah敗,逃到巴比倫南方避難,來看希西家主要目的,是希望ē-tàng聯合猶大國反抗亞述。M̄-koh無想tio̍h希西家tī感動之餘,卻kā家己所有ê財力,kah軍事裝備lóng呈現曝光tī伊面前看透透。

第14到15節,先知以賽亞得tio̍h上帝ê啟示,ài伊去見希西家王,chiah-ê訪客tùi tó位來?來做kóa甚麼事等chit方面ê問題。希西家王hō͘先知以賽亞知影,chiah-ê訪客來自巴比倫,而且tī王宮內看見所有一切,mā就是第3節所描述ê。

第16到18節,先知以賽亞聽了後,就kā上帝ài伊傳達ê信息hō͘希西家王知影:伊tùi祖先手上傳承落來ê一切lóng kā「一件mā不留落來」,包括伊ê後代lóng kā hông掠去,甚至有ê人beh「tī巴比倫王宮內當太監,服侍in ê王」。Á chit件事tī大約經過一百一十五年,mā就是主前586年發生,hit年,巴比倫帝國kā猶大國消滅。

第19節,chit節mā是對希西家王siōng hō͘人詬病ê事,就是伊並無因為先知以賽亞傳出chit-ê信息感覺哀傷、艱苦心,祈求上帝赦免憐憫,反tńg是因為chit款tāi-chì是發生tī伊ê後代,伊只致意家己活teh ê年日thang「享受和平安全」就好。

第20到21節,希西家王任內特有ê貢獻,就是挖渠道,kā水引進耶路撒冷城內。因為耶路撒冷城位置khah高,tī防禦(gū)上有利,卻tī飲水上有弊。因為án-ne,伊chit項水利工程是非常重要ê。Koh講,希西家王mā收集了所羅門王ê箴言(參考箴言第廿五章),顯示伊對人文生活ê重視。

經文:

列王紀下 21:1-21:18

註釋:

Chit章記載南國猶大面臨毀滅ê前兆,希西家王ê kiáⁿ瑪拿西繼承伊ê王位,m̄-koh伊卻無跟tòe老父希西家學習做上帝看做對ê事,卻是棄sak上帝ê話,去拜偶像神明。Tī瑪拿西ê身上,看tio̍h ê就是極大ê惡例,m̄-nā kā in父親希西家苦心所建立起來ê信仰典範kā它廢除,iáu改變到差不多完全顛倒ê狀況,m̄-nā拜偶像,而且kā家己ê kiáⁿ當燒化祭獻hō͘偶像神明。Koh khah令上帝無法度忍受ê,是kā亞舍拉女神ê柱像khǹg tī聖殿裡,這m̄-nā是teh污穢聖殿,mā kah當年所羅門王建造聖殿ê目的完全顛倒,明明是就是tī侮辱上帝ê神聖。伊以殘酷ê手段對待人民,koh khah買命ê是án-ne ê國王,竟然ē-tàng統治長到五十五年,ē-sái講是猶大王國掌權siōng久ê一位惡質國王。

是甚麼原因hō͘瑪拿西一登基就馬上kā老父希西家王所辛苦建立ê信仰基業kā它廢除,而且是完全ê改變?有kóa聖經學者認為是因為伊想beh討好亞述帝國,減緩壓力,因為án-ne,引進了亞述帝國敬拜偶像神明ê宗教信仰。Tī第十七章記載亞述帝國消滅了北國以色列後,就故意kā外族人引進撒馬利亞,kā以色列人民四散tī其它城邦khiā起,除了是通婚ê政策外,另外就是beh破壞in tī宗教信仰上ê潔淨。因為án-ne,tī第十七章41節講:「Án-ne,chiah-ê 列國mā 敬畏上帝,mā 服事in ê 偶像。in ê kiáⁿ,in ê 孫,mā lóng 是án-ne,in ê 祖先所行ê, 到今á 日in mā 照án-ne 行。(全民版)」簡單ê一節經文,卻講出亞述帝國tī phah亂以色列人民對上帝ê信仰是成功ê。瑪拿西驚惶亞述,恢復in父親希西家王所廢掉ê一切偶像神明,可能就是為tio̍h取悅亞述帝國,m̄-koh,驚人m̄驚上帝,chiah是真正ê問題所在!瑪拿西chit種舉動,hō͘上帝無法度忍受,mā為猶大ê淪亡帶來主因。

Chit段經文mā同時記載tī歷代志下第三十三章1到20節。無論在列王記作者á是tī歷代志ê作者lóng仝款寫落來chit句話:「伊大大犯罪,對敵上主,激發上主ê憤怒。」chit兩本經冊作者lóng講:「猶大人民m̄聽從上主ê命令。瑪拿西領in犯罪,比上主tùi伊子民面前趕出去ê本來住民所犯ê罪iáu koh khah嚴重。」chiah-ê話為南國猶大ê滅亡寫落來註腳。Mā因為棄sak上帝,á是講根本就m̄相信有上帝,因為án-ne,tī瑪拿西手上「刣死真chē無辜ê人民,hō͘耶路撒冷街路流滿血」,這是上帝無法度赦免瑪拿西ê另外一個原因(參考列王記下廿四:4)。

第1到2節,瑪拿西ē-sái講是南北兩國國王執政siōng久長ê一位,共計有五十五年,m̄-koh卻mā是siōng慘ê一位國王。伊「做上主看做邪惡ê事」,是比過去迦南地ê人所做ê行為koh khah 可惡。

第3到7節a,chit段經文真詳細描述做toh一kóa上帝看做非常邪惡ê事,包括有:重建拜巴力kah亞舍拉偶像,以及建築chit種偶像神明ê祭壇;而且kā家己ê kiáⁿ燒獻hō͘ chiah-ê偶像神明;行占卜、巫術、求問算命ê、通靈ê;koh khah 可惡ê是kā亞舍拉女神ê柱像khǹg tī聖殿中,這等於是teh侮辱上帝ê神聖。Ná親像頭前所敘述過ê,伊會án-ne做,是為tio̍h beh討好亞述帝國。伊án-ne深驚亞述帝國ê原因,真可能就是親像歷代志下第三十三章11節所講ê「亞述軍隊ê 將領侵犯猶大。In掠tiâu瑪拿西,用鈎子鈎伊,銅鍊子鎖伊,帶伊到巴比倫去」,這hō͘伊驚惶到極點,m̄-koh卻m̄知伊嚴重背離上帝ê作為,是惹了上帝極大憤怒ê原因,mā種下了猶大滅亡ê主要因素。

第7節b到9節,這是有關上帝對所羅門王建造耶路撒冷聖殿表達ê看法,聖殿是以色列十二支派人民共同敬拜ê場所,m̄-koh若是大家會遵守上帝ê誡命,上帝會伸手庇護in所khiā起ê土地。M̄-koh可惜ê是,瑪拿西並無án-ne做。

第10到12節,chit三節指出上帝有差遣奴僕先知去傳達上帝警告ê信息hō͘瑪拿西,m̄-koh真顯然地瑪拿西並無聽從眾先知ê話,iáu-koh帶領猶大人民棄sak上帝。因為án-ne,上帝決定beh降災禍到「耶路撒冷kah猶大,hō͘每一個聽見chit項事ê人lóng嚇呆」,這真清楚講出上帝beh降ê災禍必定是非常嚴重。

第13到15節,上帝奴僕先知ê信息tī chia真清楚指出,上帝「懲罰耶路撒冷」ná親像「懲罰撒馬利亞仝款」,chit種信息已經真清楚指出,上帝會摧毀耶路撒冷。而且m̄-nā是án-ne,連國王kah人民lóng會親像亞哈王朝仝款,就是王朝ê後代會被消滅殆盡,人民會hông掠去做奴隸。

注意第14節所提起「殘存ê人民」,這原本是希西家王向上帝祈禱ê時所講ê,祈求上帝看顧chiah-ê kan-taⁿ存ê選民(參考列王記下十九:4)。chit-má上帝奴僕先知所傳出ê信息,卻講上帝連chiah-ê殘存ê人民mā tio̍h放棄,kā in交hō͘仇敵。這mā充分顯示上帝已經boài chiah-ê悖逆祂ê選民。

第16到18節,chit段經文說明上帝決定beh摧毀瑪拿西王朝,因為伊m̄-nā領人民棄sak上帝,mā殺害真chē無辜人ê血。就tī伊治理長到五十二年了後死去,由伊ê kiáⁿ亞們繼位。

經文:

列王紀下 21:19-21:26

註釋:

Chit段經文講述亞們繼位了後,繼續仿效in父親瑪拿西ê惡質ê行為。伊統治ê時間真短,大約只有兩年左右。

第19到22節,ná親像列王記作者所描述一個君王好kah pháiⁿ ê句型仝款;列王記作者認為好ê君王,就是仿效大衛王ê樣式,尊崇上帝為大;相對ê,無好ê君王,就是帶領人民去拜偶像。瑪拿西就是非常惡質ê君王,伊甚至kā偶像神明帶入聖殿內,誤導猶大人民認為敬拜至koân ê萬物之主上帝,kah拜偶像神明巴力kah亞舍拉仝款。Á繼位瑪拿西王位ê亞們mā是án-ne,學習in父親瑪拿西ê樣式,當然就bē去「遵從上主ê誡命」。

第23到26節,chia提起有關宮廷政變失敗ê事件,原因是亞們執政後,真緊就引起伊ê臣僕「反叛伊」,tī王宮內kā伊刺殺死。M̄-koh chiah-ê殺手並無因為án-ne而奪到王位,猶大人民反tńg kā chiah-ê謀害者刣死,然後立亞們ê kiáⁿ約西亞繼位為王。chit-ê約西亞ē-sái講是猶大末期siōng優秀ê一位君王。可惜ê是,伊ê改革mā無達tio̍h預期ê效果。

經文:

列王紀下 22:1-22:10

註釋:

Tùi chit章開始直到第廿三章30節,chit段經文lóng是teh描述約西亞王執政ê各項事蹟。包括伊án怎整修聖殿ê,以及án怎清除聖殿內tùi伊阿公到老父時代所設立ê偶像神明等,並且án怎帶領人民tńg來到獨獨耶和華上帝ê敬拜,koh khah重要ê,是tī伊任期內重新隆重地舉行國家性ê Pôaⁿ過節。

有關約西亞王ê各種事蹟,mā記載tī歷代志下第三十四到三十五章。Tī約西亞統治ê時期,mā有一位真出名ê先知耶利米,伊就bat用真美ê詩句o-ló chit位君王,講伊「頭尾秉公行義」,mā「為窮苦無助ê人伸冤」(參考耶利米書廿二:15—16);而另外一位先知西番雅,真有可能約西亞王ê改革運動kah chit位小先知ê信息有密切關係。

Chit段經文講述約西亞王一登基,隨時進行宗教改革ê工作,而方式就是先整修聖殿,無想tio̍h,就tī整修聖殿ê時chūn,發見了「律法冊」,這ē-sái講是非常重要ê一項發見,mā改變了約西亞王,hō͘伊一生ê時間lóng大力推動信仰改革。

第1到2節,chia開始就講約西亞王繼位ê時,年紀chiah只有八歲而已,伊統治了三十一年,án-ne,伊往生ê時chiah年紀kan-taⁿ 39歲,非常可惜。雖然年紀chiah-ni̍h輕就往生,m̄-koh tī伊活teh ê年歲中,卻是極盡所ē-tàng ê推動信仰改革,mā ē-sái講是猶大王國末代中,siōng傑出ê一位國王。作者用真典型ê句話講:「約西亞做上主認為對ê事,跟tòe先祖大衛王ê腳步,不偏左不偏右。」

第3到7節,chit段經文講約西亞在位ê「第十八年」,mā就是伊廿六歲ê時,就派人去kā聖殿中ê錢the̍h出來,交hō͘整修聖殿ê負責人,好支付工人工資,以及用tī購買整修一定tio̍h ê材料。Koh khah重要ê,伊深信所有整修聖殿工程ê人lóng真「誠實可靠」,這mā thang看出伊用人不疑ê態度。

歷代志下第三十四章12到13節,作者真詳細描寫chiah-ê參與監督kah整修聖殿工程ê人ê名。

歷代志下第三十四章3到7節,作者講伊除了「廢除了山丘上ê神廟、亞舍拉女神ê柱像,kah所有其他偶像」。並且講tī伊領導下,伊ê臣僕lóng聽從伊ê指揮,kā所有境內直到北國以色列各地ê偶像神明、祭壇全lóng拆除,甚至連異教神明ê祭司mā hō͘剷除,這並m̄是一件容易ê事,m̄-koh伊堅持ê毅力完成了chit件事。

第8到10節,chit段經文ē-sái講是約西亞王時代siōng重要ê一段記事,就是tī整修聖殿ê時,忽然tī聖殿內發見了律法冊。因為án-ne,做王室書記沙番去負責執行約西亞王ê命令ê時,tùi監督整修聖殿負責人大祭司希勒家得tio̍h chit-ê重要消息,沙番接受過該律法冊,並且讀了該冊,然後tńg去報告hō͘約西亞王知影,並kā該律法冊讀hō͘王聽。

所謂摩西律法ê冊,指ê是甚麼?一直有爭論。有ê認為是「摩西五經」,有ê認為是申命記ê某一個部分,親像申命記第十二到廿六章。M̄-koh mā有ê認為是利未記第十七到廿六章。

經文:

列王紀下 22:11-22:20

註釋:

Chit段經文描寫一位女先知戶勒大,聽tio̍h chit-ê消息了後,kā上帝hō͘伊ê信息傳hō͘約西亞。Chit-ê信息主要有兩項:一是上帝會嚴厲懲罰耶路撒冷kah猶大人民,因為in悖逆上帝ê旨意。二是上帝肯定約西亞ê忠實,而且會知影謙卑順服。因為án-ne,上帝beh懲罰猶大kah耶路撒冷人民ê時間表,會延後到伊往生後chiah進行。

第11到13節,當約西亞王聽tio̍h沙番讀hō͘伊聽律法冊ê內容ê時,伊用拆裂衫褲án-ne非常悲傷ê態度,表達心內ê艱苦心。因為ná親像頭前所講ê,chit-ê律法冊上記明以色列人民悖逆上帝,所以上帝beh用嚴厲ê方法懲罰這悖逆ê子民。為tio̍h án-ne,約西亞趕緊差派祭司、王室書記沙番ê kiáⁿ亞希甘等重要臣僕數人,去想辦法詢問上帝ê旨意,而且tio̍h確實明白chit卷律法冊上ê教示,伊知影上帝會受氣,就是因為無照律法冊上ê記事去做。

第14到16節,chiah-ê王室重要臣僕去chhōe-tio̍h一位名叫戶勒大ê女先知。當伊聽tio̍h chit件消息,並且tī知影上帝ê旨意了後,就真坦白地kah約西亞王報告上主所講ê話。

為甚麼約西亞王不派人去詢問先知耶利米,á是西番雅?有可能是kah伊ê丈夫沙龍擔任主管聖殿禮服ê職務有關pah,mā可能是kah伊tòa ê所在比較近有關mā無一定。

第17節,chit節講女先知戶勒大所傳出來ê信息,是關係猶大kah耶路撒冷ê,真清楚指出因為in悖逆上帝ê行為非常嚴重。因為án-ne,上帝決定beh嚴厲懲罰in。Chiah-ê行為lóng tī瑪拿西kah伊kiáⁿ亞們時代ê行為thang看出來。

第18到20節,chit三節是關係hō͘約西亞王ê信息,說明約西亞王因為得tio̍h律法冊了後,知影謙卑落來認罪悔改。因為án-ne,上帝應允伊tī「死以前」,bē「降災難hō͘耶路撒冷」,上帝會hō͘約西亞「平平安安地離世」。

經文:

列王紀下 23:1-23:20

註釋:

這是列王記chit本經冊中非常重要ê一章,因為自從所羅門死後王國分裂做做南kah北兩國以來,作者講無一個國王像約西亞án-ne用心tī信仰改革ê事頂面。伊除了宣讀所發見ê「約」冊,mā koh一pái帶領人民kah上帝立約,並且決心beh遵守「約」冊中所講ê誡命。

Chit章ê記事mā記載tī歷代志下第三十四章3到7節、29到33節等等。

約西亞王發見律法冊了後,隨時採取行動,除了第廿二章所提起伊詢問先知ê意見外,mā知影tio̍h馬上進行宗教改革,kā tùi阿公瑪拿西到老父亞們所犯ê錯誤行為,全lóng改正過來,甚至範圍遠到北國以色列ê伯特利,而且siōng重要ê一件事,就是伊親自以國王ê身分帶領耶路撒冷人民同齊參與慶祝荒廢已久ê Pôaⁿ過節慶典,hō͘伊成做國家慶典。列王記作者tī chit章用chit句話來描述約西亞王講:「Tī 約西亞以前,無有王親像伊盡心、盡性、盡力歸向上主,照摩西一切ê 律法;tī 伊以後,mā無出一個王親像伊án-ne。(全民版)」(廿三:25)可惜ê,是伊有宗教改革ê熱情,卻無政治ê智慧,因想beh反抗埃及出兵戰死戰場,而結束伊統治耶路撒冷三十一年ê時間,而chit時伊chiah只有三十九歲而已。

Chit段經文描述約西亞王盡帆拚推動宗教改革ê運動。伊事(tāi)先就是kā聖殿中所有ê偶像全部清除,chiah-ê lóng是tī伊阿公瑪拿西時代設置ê,等於是污穢了所羅門建造聖殿ê原意。chit-má伊kā chiah-ê偶像神明lóng清除,表明伊對上帝ê忠實。同時,伊mā清除了所羅門晚年建造ê偶像祭壇、神像等,hō͘人民bē teh看見chiah-ê偶像神明而繼續崇拜,致使犯罪。

第1到3節,約西亞kā國內所有領袖,mā包括先知、祭司等宗教領袖,並且kā耶路撒冷人民代表,無論是貧富等,lóng帶到聖殿,伊親自大聲宣讀chit本tī「聖殿裡發見ê約冊」,然後伊向上帝立約,而在場ê人民、代表mā kah伊仝款,lóng表示「一心一意遵守伊ê律法誡命,並實行約冊上所規定ê命令」。Chit種方式mā等於是一種立約ê態度。

第4到9節,chit段經文真清楚描述約西亞進行清除偶像ê情景。伊下令祭司kah利未人,以及聖殿警衛,kā聖殿裡所有用來拜巴力kah亞舍拉cha-bó͘人、星辰等器物全部lóng tùi聖殿裡搬出去,然後tī耶路撒冷城外ê山谷lóng燒掉,續落來ài kā chiah-ê燒毀ê灰帶去伯特利,其實,chit種方式mā是teh對統治北國以色列ê亞述宣示,猶大絕對bē順服亞述,政治ê意味真強。
值得注意ê,是約西亞kā chiah-ê神明ê偶像燒毀了後koh磨成灰,然後kā灰掖tī人民ê墳墓上。Koh講,tùi第5節thang看見當時猶大人民已經有流行拜日頭、月娘,kah星辰ê習慣。另外mā tùi第7節看tio̍h當時偶像神明ê崇拜之墮落情況真嚴重,就是tī廟裡設置有娼妓,包括有男娼,這是非常嚴重ê錯誤,表示猶大人民差不多就是迦南地宗教行為化à。

第10到14節,tùi第10節thang看出tī瑪拿西執政ê時代,猶大人民已經因為迦南地神明敬拜ê方式受tio̍h極大ê影響,有人kā家己ê gín-á當做燒化祭般獻hō͘偶像神明,而且瑪拿西家己就是tāi先án-ne做ê國王(參考廿一:6),人民mā因為án-ne跟tòe學習。chit-má約西亞lóng kā chiah-ê祭壇摧毀殆盡,並且koh kā所羅門王時代所建造起來ê亞斯伊錄等神明祭壇(參考列王記上十一:4—9),全lóng phah破、摧毀。

第15到18節,chit段經文thang參考列王記上第十三章1到3節、31到32節ê記載。Tī南北兩國分裂ê時,北國以色列ê王耶羅波安就bat tī伯特利kah m̄-koh兩地建造金牛hō͘人民去崇拜。chit-má伯特利是亞述統治下ê區域,m̄-koh chit時,約西亞án-ne做,有意表示thang kah亞述開戰ê意思。

第16節是真值得注意ê一節,就是約西亞王發見有一座墳墓,後來知影he是先知ê,而hit位死去ê先知就bat對當時ê王傳達仝款ê信息,講ài伊清除偶像神明。約西亞命令kā chit位先知ê墳墓hō͘保存落來,mā包括tùi撒馬利亞來ê先知,in ê墳墓lóng被完整保存落來。

第19到20節,chit兩節mā teh暗示,tī約西亞王統治之下ê南國猶大,國勢有增長茁壯之態。Mā tùi chit兩節看tio̍h約西亞王ná親像發了大怒ê款,m̄-nā清除了所有偶像神明、神廟、祭壇,並且是連根lóng tio̍h清除,伊kā chiah-ê幫助人民祭祀偶像神明ê祭司人員mā刣死,然後koh kā inkhǹg tī chiah-ê祭司所從事偶像崇拜ê祭壇火燒。伊án-ne執行嚴厲ê清除工作,mā是遵從申命記第十三章、第十七章2到7節ê規定。

經文:

列王紀下 23:21-23:30

註釋:

Chit段經文描寫約西亞王除了清除國內所有ê偶像神明之崇拜外,mā帶領全國人民以國家祭祀禮儀方式舉辦慶祝Pôaⁿ過節。並且簡單ê記載伊因為參與抵抗埃及大軍而戰死戰場。

第21到23節,短短ê三節經文,卻講出真重要ê一件宗教上大事。就是伊帶領全國人民同齊舉行慶祝Pôaⁿ過節ê慶典活動。本來Pôaⁿ過節lóng是每一個家庭tio̍h舉行ê節期,m̄-koh tī伊ê時代,一般人民lóng kā Pôaⁿ過節當做是lim食sńg樂ê節期,無人會認真想tio̍h he是kah以色列民族ê存亡有密切ê歷史kah信仰關係。這就是tī第21節所提起ê「遵照約冊上ê記載守Pôaⁿ過節,記念上主—in ê上帝」。約西亞王看重chit節期,mā是幫助人民重新思考chit節期ê意義,明白上帝tī in歷史中拯救ê恩典,án-ne,就bē bē記得上帝而去拜偶像神明。因為án-ne,伊親自主持chit項節期慶典。Á過去從來無一個國王án-ne做ê。

其實mā thang án-ne瞭解:當約書亞帶領以色列民族pôaⁿ過了約旦河進入迦南地了後,bat舉行過一pái國家性ê慶典,了後,就不bat有過,原因除了各族分配了家己族群ê khiā起土地外,另外一個原因,可能是in無koh看重chit-ê節日,因為in已經漸漸地tùi迦南人中學習tio̍h當地ê宗教生活,而忽略對耶和華上帝ê忠實。Chit pái舉行ê意義就特別ê重大,表明in ná親像koh一pái kah上帝立約ê意思。

第24到25節,列王記描寫約西亞王chiâⁿ如申命記第六章4到9節所講ê,是盡心、盡意、盡力帶領人民事奉上帝,伊ē-sái講是對耶和華上帝siōng忠實ê一位君王,列王記作者hō͘伊一個真好ê評價:tī伊以前無,而tī伊以後mā無一個王像伊hit種。

第26到27節,tùi chit兩節就thang看出上帝對瑪拿西所做ê事,一直無法度赦免,就thang知影tī伊治理之下ê南國猶大,棄sak上帝ê行為是jōa-ni̍h-á嚴重。雖然約西亞王chiah-ni̍h努力改革宗教,m̄-koh chit兩節mā隱約地teh暗示,約西亞推動chit項宗教改革運動,顯然並m̄是真徹底,因為人民已經習慣拜偶像神明à。因為án-ne,雖然官方án-ne進行改革,m̄-koh人民iáu是私下腳偷偷á tī非公共場合拜偶像神明。

第28到30節,chit三節經文記載thang參考歷代志下第三十五章20到27節,歷代志作者有特別提起埃及攻打亞述ê迦基米施城,kah約西亞無關。M̄-koh約西亞m̄聽,堅持beh出兵協助亞述,mā可能這是伊ê政治考量kah判斷。Chit pái戰役ê背景是:因為巴比倫帝國興起,巴比倫皇帝tī主前612年出兵攻打亞述帝國,首都尼尼微城被攻陷。殘存ê亞述軍隊逃到幼發拉底河西岸,等待埃及ê援軍幫助。主前609年,埃及國王尼哥二世出兵ê時chūn,約西亞王想出兵beh阻止埃及ê援軍路經米吉多,雖然ná親像頭前所講ê,埃及王尼哥有警告,這kah猶大無關。當時ê埃及mā是中東地區非常強勢ê國家,用猶大之力beh抵擋,he是無可能ê。M̄-koh約西亞王可能是驚惶埃及ê舉動會影響tio̍h猶大ê獨立,mā有可能是為tio̍h beh取悅巴比倫帝國。可惜ê是tī chit pái軍事行動中,就tī「米吉多」chit-ê所在ê戰場,伊被埃及兵ê箭射中而受重傷,伊ê侍從kā伊帶tńg來耶路撒冷,結果就án-ne死去。Á chit時伊chiah kan-taⁿ 39歲而已。伊ê kiáⁿ約哈斯繼任為王。

經文:

列王紀下 23:31-23:37

註釋:

Chit段經文是描述約哈斯kah約雅敬chit兩個王ê情形,in lóng是tī埃及管轄之下ê傀儡君王。

第31到34節,chit段經文是關係約哈斯繼任為王ê記載,非常可惜ê是,伊無kā老父約西亞王所努力一生ê剷除偶像神明崇拜ê事hō͘保存落來,顛倒,伊是學習瑪拿西王ê pháiⁿ模樣,「做上主看做邪惡ê事」。因為約西亞王ê戰敗,約哈斯kan-taⁿ繼位三個月ê時間,就被埃及王尼哥二世hō͘俘虜伊去。M̄-nā án-ne,埃及iáu因為約西亞派兵phah埃及,要求索賠軍事費用chē kah「三千四百公斤銀á kah三十四公斤金子」,這致使原本已經m̄是真強壯ê猶大國勢koh一pái衰退落去。

注意第34節,chit節講埃及國王尼哥二世立約哈斯ê kiáⁿ以利亞敬為猶大王,並且koh kā伊ê名改為「約雅敬」。Chit種「改名」、「號名」,所代表ê意思,是猶大順服了ê意思。Mā就是猶大成做埃及帝國ê附庸國。

耶利米書第廿二章10到12節,有先知耶利米所提起ê關係約哈斯之情景,就是hō͘掠到埃及去,就一直到死都無被tháu放tńg來。

第廿三章35到37節,chit段經文是約雅敬在位執政ê情景,chia講伊繼位ê時廿五歲,統治了十一年。為tio̍h beh賠償埃及ê軍費,伊koh一pái增加稅賦,hō͘人民生活koh khah困苦。仝款ê,伊mā是繼續伊兄弟約哈斯ê pháiⁿ模樣,帶領人民去拜偶像神明。

Koh khah亂講ê是,當國家tio̍h賠償chiah-ni̍h大筆ê錢hō͘埃及ê時,伊除了向人民課重稅外,卻iáu奢華到建造雄偉ê皇宮,m̄-nā貪圖家己ê利益,而且做出「流了無辜ê血,以暴力壓制人民」ê事(參考耶利米書廿二:13—17),莫怪chit種國家會滅亡,人民會hông掠去做奴隸。

經文:

列王紀下 24:1-24:7

註釋:

Chit章繼續記載有關約雅敬kah約雅斤前後兩個王執政ê情景。Chit時ê猶大國並無因為臣服tī埃及而得tio̍h安寧,因為當teh壯大ê巴比倫看猶大,ná親像看待埃及仝款,lóng是伊beh討伐ê對象,結果換做巴比倫帝國入侵猶大。巴比倫王尼布甲尼撒王ê策略,就是先tùi弱小ê國家著手,伊先選擇敘利亞、摩押、亞捫,然後就是透過巴比倫聯合chiah-ê小國組成聯軍進攻猶大。

尼布甲尼撒皇帝ē-sái講是巴比倫帝國siōng強猛ê一位君王。伊是tī主前605到562年在位。主前605年,伊率軍phah敗埃及ê軍隊,致使本來ê中東政治局勢大大改觀。Ē-sái講是,tī主前601年,當伊koh一pái出兵征討埃及ê時,卻tú-tio̍h挫敗,原因是伊接tio̍h老父往生ê消息,而tī中東地區ê真chē小國,包括猶大在內,看見尼布甲尼撒王急忙tńg來國內,認為伊戰敗,就紛紛表態獨立,反抗巴比倫帝國。Chiah-ê小國包括猶大在內,約雅敬kah約雅斤等王lóng m̄聽從先知耶利米ê警告(參考耶利米書廿七:9—11節),反抗巴比倫帝國,結果反tńg帶來亡國ê災難。

Chit段經文是描寫約雅敬執政下ê猶大國。

第1到4節,果然,巴比倫王尼布甲尼撒率兵攻打猶大,伊只有ē-tàng降服。因為埃及tī主前605年ê迦基米施之役,被巴比倫軍隊phah敗。這真清楚,埃及無法度繼續成做猶大ê庇護國。主前604年,mā是尼布甲尼撒執政ê第二年,巴比倫軍隊先掃蕩了非利士,chit時約雅敬表示順服,tùi埃及附庸國變成巴比倫ê附庸國。

Tio̍h注意ê是chia提起約雅敬臣服巴比倫三年了後,就背叛了巴比倫。這可能是因為主前601年,因為埃及背叛巴比倫,巴比倫即時調兵tńg去phah埃及。Chit時,約雅敬宣佈背叛,巴比倫軍隊無法度調tńg來制裁,m̄-koh卻指hō͘敘利亞、摩押,kah亞捫ê軍隊聯合來攻打猶大。結果約雅敬被俘擄à。

歷代志下第三十六章6到7節án-ne記載講:「巴比倫王尼布甲尼撒就來kā 伊攻擊,用銅鏈kā伊縛起來,beh kā 伊帶來巴比倫。尼布甲尼撒koh kā 上主殿內ê 器具帶到巴比倫,hē tī 巴比倫伊ê 廟內。(全民版)」chit種記事tú好就是列王記tī chia第2節所講ê「消滅猶大」。因為國王已經被俘擄à。

	第5到7節,約雅敬受掠了後,巴比倫王尼布甲尼撒就立伊ê kiáⁿ約雅斤繼位。列王記作者tī chia講,埃及已經無力thang幫助伊過去所統轄ê國家、部落、族群。換句話講,已經無可能koh來幫助猶大à。

經文:

列王紀下 24:8-24:16

註釋:

Chit段經文是描寫約雅敬ê kiáⁿ約雅斤治理之下ê猶大。歷代志下第三十六章9到10節簡單ê記載伊ê事蹟。

第8到9節,約雅斤tī十八歲ê時繼位治理猶大國。時間非常短,kan-taⁿ有三個月時間而已,kah伊ê阿公約哈斯仝款。仝款ê,伊mā是帶頭拜偶像神明ê君王。

第10到14節,chit段經文講述約雅斤期間,巴比倫王尼布甲尼撒koh命hō͘伊ê大將帶兵來攻打耶路撒冷。圍城ê時間可能就是tùi主前592年12月開始,大約圍城三到四個月,tī主前597年3月中旬,佔領了耶路撒冷。這是歷代志下第三十六章9到10節ê經文所講ê,圍城是三個月koh十工。尼布甲尼撒王親自來耶路撒冷,「約雅斤kah伊ê母親、kiáⁿ、將領、王宮臣僕lóng投降了」。巴比倫王並且kā約雅斤俘擄,mā同時kā「聖殿kah王宮理所有ê財寶lóng搬到巴比倫去」。Koh khah嚴重ê,就是mā同時俘擄了「高官kah戰士,共一萬人。伊koh kā所有ê工匠kah鐵匠等lóng擄行,只有留落來siōng窮苦ê人」。Chit種猶大國實質上就整chhun落來一個名ê而已。Kui個猶大王國會án-ne淪落到只chhun「siōng窮苦ê人」chit種慘況,列王記ê作者就是用「做上主看做邪惡ê事」chit句話來形容墮落ê君王帶來ê結果。耶利米書tī第廿三章24到30節有記載先知耶利米對這件事ê看法。

第15到17節,巴比倫王m̄-nā是俘擄了約雅斤,mā kā伊ê「母親、妻細姨、臣僕,kah猶大ê領袖一併帶去」,chit pái是koh一pái俘擄「七千人,iáu有一千工匠kah鐵匠;in lóng是善戰ê勇士」,這等於講猶大ê國防全部lóng被解除à。其實,chit時chūn ê猶大ē-sái講是亡國à。因為chia講「工匠kah鐵匠」mā lóng hông掠去,表示chiah-ê人是戰場上真重要ê「技師」,因為古代製造、修理槍、矛、盾、戰車等兵器lóng是chiah-ê人。當chiah-ê人hông掠去巴比倫ê時,mā就表示猶大連製造兵器ê人才mā無了,而且chiah-ê人lóng變成巴比倫ê奴隸,只有ē-tàng替巴比倫製造兵器。

Chit時chūn,尼布甲尼撒王立約雅斤ê叔父瑪雅探做猶大王,因為約雅斤族裡ê人lóng被俘掠去巴比倫做人質à。仝款ê,瑪雅探mā被改名成做西底家。

經文:

列王紀下 24:18-24:20

註釋:

短短三節,簡略地說明tī西底家執政時代,因為伊背叛巴比倫帝國,而結果是換來猶大徹底被消滅ê厄運。列王記作者維持貫有ê筆調,講西底家「做上主看做邪惡ê事」,這是致使上帝對猶大發出大受氣ê原因,決定hō͘猶大被消滅。

經文:

列王紀下 25:1-25:7

註釋:

Chit章經文記載有關耶路撒冷城終其尾tī主前586年被巴比倫帝國軍隊攻破,猶大ê以色列人民koh一pái hông掠去做奴隸,聖殿被焚燬。Á巴比倫皇帝尼布甲尼撒任命ê總督基大利卻遇tio̍h暗刣。Chiah-ê記事mā同時記載tī歷代志下第三十六章13到21節,m̄-koh簡略了真chē。反tńg tī有關耶路撒冷聖殿被焚燬、猶大ê以色列人民hông掠去做奴隸ê記事頂面,耶利米書第五十二章12到33節有詳細ê記載,而且有關總督基大利被暗刣ê事件上,耶利米書第四十章7節到第四十一章有真詳細ê記載。歷代志下第三十六章22到23節,則記載一段真重要ê資料,是關係波斯皇帝塞魯士皇帝登基,隨時下令tio̍h tháu放受掠tī巴比倫做奴隸ê以色列人民。

Chit段經文是記載巴比倫帝國皇帝尼布甲尼撒率軍來攻打耶路撒冷聖殿,tùi西底家在位ê第九年十月十日,mā就是主前588年,圍城長到一年六個月,一直到隔兩年,mā就是主前586年ê四月九日,因為城裡飢荒非常嚴重,人民無糧食,其實就是城不攻自破,就án-ne,猶大亡國。

第1到2節,chia一起頭就講「西底家背叛巴比倫王尼布甲尼撒」,為甚麼伊beh背叛巴比倫?這真可能是kah當時埃及ê態度有關。主前596年當西底家登基做王ê時,伊bat宣誓beh效忠巴比倫,而巴比倫為tio̍h確保西底家真正效忠於伊,iáu俘虜了「一kóa顯要作人質」(參考以西結書十七:13),而這siōng重要ê人質中,就是約雅斤王,而且kah伊同時被掠到巴比倫去ê iáu有伊ê母親、妻細姨、一大堆王室ê重臣、善戰ê勇士,以及猶大擁有才華ê匠人等八千人(參考列王記下廿四:15—16)。西底家原本是約雅斤ê叔父,名叫瑪探雅,被尼布甲尼撒設立為王ê時,改伊ê名叫西底家。伊tī登基ê時iáu bat差派了沙番ê kiáⁿ以利亞薩kah希勒家ê kiáⁿ基瑪利當特使,前往巴比倫晉見尼布甲尼撒王(參考耶利米書廿九:3),表示絕對忠誠順服。

西底家ê態度會改變,並m̄是chit-má chiah開始,早tī伊執政第四年,mā就是主前593年,伊就bat暗中邀請以東、摩押、亞捫、泰爾,kah西頓等外交使節tī耶路撒冷開會,密謀反叛巴比倫ê聯盟大事。M̄-koh五年了後,伊利用埃及發動反抗巴比倫ê時刻,趁機會反叛巴比倫,西底家真正認為埃及是可靠ê。根據耶利米書第三十七章5節、11節ê記載,當巴比倫軍隊圍困耶路撒冷ê時,埃及確實bat出兵來救援,巴比倫王一聽tio̍h,就馬上撤軍tńg去。Chit種經驗hō͘西底家聽從身邊幕僚ê建言,ài伊趕緊趁此機會脫離巴比倫,m̄聽從先知耶利米ê苦勸,ài伊投降。因為án-ne,當主前588年十月十日,巴比倫軍隊koh一pái圍攻耶路撒冷ê時,而且一直圍困到主前586年四月九日,前後一年六個月ê時間,埃及m̄-nā無出兵來相救;á是bat出兵,m̄-koh被巴比倫軍隊tī途中攔截(參考第6節ê巴比倫王尼布甲尼撒親自守tiâu利比拉據點),而且bat表示beh聯合起來同時反叛巴比倫ê以東等國,並無如約所講ê,同時出兵。Á以東iáu趁巴比倫帝國軍隊攻破耶路撒冷城ê時,城內ê人民逃離出來,in iáu趁火搶劫,而且掠tiâu逃亡者交hō͘巴比倫軍隊(參考詩篇一三七:7,俄巴底亞書第12到14節)。就án-ne,耶路撒冷城終其尾被攻破。

第3節,chit節真清楚講出城門會phah開ê原因是糧食嚴重缺乏,甚至傳出人民交換gín-á煮來食(參考耶利米哀歌四:3—10)。可見糧荒ê嚴重已經非筆墨所ē-tàng形容。

第4到5節,tī chiah-ni̍h嚴重ê飢荒威脅下,守軍就會棄城逃走。西底家mā帶家眷跟tòe逃走。M̄-koh tī逃到耶利哥附近ê平原ê時被巴比倫軍隊追上掠,kah伊同齊逃亡ê軍人lóng離開伊,各自散à。

第6到7節,為tio̍h beh徹底消除猶大以色列人民一再謀劃反叛ê事,巴比倫皇帝ê做法真徹底,就是kā耶路撒冷—chit座以色列人民看做政治、經濟、宗教等中心城市hō͘摧毀殆盡,同時kā以色列人民數百年來看做siōng重要ê信仰中心—耶路撒冷聖殿—mā hō͘完全摧毀燒pháiⁿ。同時當tio̍h西底家ê面前kā伊ê kiáⁿ刣死,而伊家己則被挖出目睭,然後被掠到巴比倫去。

Chit-ê巴比倫軍隊圍城ê「十月十日」,後來成做以色列人民列為每年禁食ê記念日之一(參考撒迦利亞書八:19)。

經文:

列王紀下 25:8-25:21

註釋:

Chit段經文是描寫耶路撒冷聖殿被摧毀,以及猶大人民hông掠去巴比倫做奴隸ê記事。耶利米書第五十二章12到34節有koh khah詳細ê記事。

第8到12節,這是發生tī巴比倫皇帝尼布甲尼撒執政ê第十九年,mā就是主前586年五月十日,mā就是耶路撒冷城被破一個月後,巴比倫軍隊ê司令官尼布撒拉旦放火燒毀「聖殿、王宮,kah一切達官貴人ê房屋,然後kā thang掠tio̍h ê人lóng俘擄準備帶到巴比倫去做奴隸,只「Kā一kóa siōng窮苦ê人留tī猶大,叫in tī葡萄園kah田裡工作」。

早tī約雅斤ê時期,巴比倫王已經俘虜了一萬八千個猶大人民去做奴隸,而且in差不多lóng是重要ê人物,「lóng是善戰ê勇士」(參考廿四:14—16),taⁿ尼布甲尼撒王koh kā「hiah-ê chhun落來ê匠人kah投降巴比倫ê人lóng掠到巴比倫去」,chit時ê耶路撒冷城差不多已成做廢墟。

第13到17節,chit段經文描述巴比倫軍隊摧毀聖殿ê情形,就是kā所有用來敬拜上帝ê一切器皿lóng帶走。就án-ne,所羅門所建造起來非常富麗堂皇ê耶路撒冷聖殿,以及皇宮,tī一夕之間,完全被摧毀à。Ná親像當年上帝對所羅門王所講ê:「設使lín á 是lín ê kiáⁿ 孫,oa̍t-tńg 身無tòe 我,無守我賞賜 hō͘ lín ê 誡命 kah 律例,去服事別ê 神明,來kā 伊敬拜,我就beh tùi我賞賜 hō͘ in ê 地剪除以色列,而且我為家己ê 名所分別做聖ê chit 間殿,mā beh tùi 我 ê 面前 kā 伊棄 sak,hō͘ 以色列人tī 萬國中做話柄,受譏刺。Chit 間殿雖然真koân,將來經過ê 人會tio̍h 驚kah gāng 去,koh 恥笑, 講:『上主ná會án-ne 款待chit-ê 地,chit 間殿?』(全民版)」(列王記上九:6—8)chit種警語taⁿ mā應驗ā,理由真簡單,就是棄sak上帝,bē記得上帝chiah是in性命ê救主。

Chit-ê「五月七日」,巴比倫軍隊攻入耶路撒冷城ê日子,mā成做禁食記念日(參考撒迦利亞書八:19)。

第18到21節,chia講巴比倫大將軍mā同時kā大祭司西萊雅kah副祭司西番雅,以及「聖殿ê三個重要官員」mā擄行,ē-sái講是並無講出chit三個重要官員是甚麼人。Chit-ê大祭司西萊雅,就是後來kah以色列人民回鄉重建家園以斯拉ê老父(參考以斯拉記七:1)。Chia真清楚指出chit pái巴比倫大將軍所掠去ê人,lóng是有代表性ê人物。M̄-koh chiah-ê有代表性ê人物並m̄是去巴比倫做奴隸,卻是被帶到巴比倫王尼布甲尼撒面前處死,koh tī處死chìn前還hō͘ in嚴厲ê凌虐、鞭phah等,chiah-ê lóng是beh hō͘猶大人民心生驚惶,m̄敢koh再反叛。第21節b簡單ê一句「án-ne,猶大人民受掠,離開本國。」清楚說明猶大tùi án-ne亡國。時間就是主前586年。

主前721年北國以色列被消滅,然後tī主前621年,亞述被巴比倫消滅,án-ne,hō͘會得thang色列人民lóng tī巴比倫帝國統治之下,成做該國ê奴隸,一直到主前538年,波斯帝國興起phah敗巴比倫,in chiah得tio̍h機會tńg去故鄉重建家園。

經文:

列王紀下 25:22-25:30

註釋:

Chit段經文有兩件記事,一是記載巴比倫皇帝尼布甲尼撒任命管理猶大ê總督基大利被謀刣ê事件,以及以前被掠到巴比倫做人質ê猶大王約雅斤被tháu放,m̄-koh繼續留tī巴比倫王宮做人質ê情景。

有關基大利被殺害ê記事,mā記載tī耶利米書第四十章7節到第四十一章。Á約雅斤被tháu放留tī巴比倫王宮ê記事,則記載tī耶利米書第五十二章31到34節。

第22到24節,會任命亞希甘ê kiáⁿ基大利為總督,真可能是因為亞希甘是支持先知耶利米而且救過先知耶利米(參考耶利米書廿六:24)。Koh講,基大利mā是貴族出身,阿公沙番就bat當過約西亞王時代ê王室書記(參考列王記下廿二:3)。Á沙番就是極力推動宗教改革ê主要策劃者之一。可惜ê是,當伊被任命為亡國了後ê猶大總督ê時,一陣死硬派ê人(現代用語kā它稱做「鷹派」,主張kah埃及聯合繼續kah巴比倫對抗者)就來投靠。當然基大利真清楚chiah-ê人ê背景,就鼓勵in留tī故鄉,m̄-thang去埃及,只要「服事巴比倫王,一切lóng會順利」。照耶利米書第四十章10節ê記載,基大利甚至允准in繼續留tī原本ê故鄉城鎮,thang享受豐富ê收入,保留財產bē受tio̍h任何ê損傷。可惜這並m̄是chiah-ê人想beh ê。

第25到26節,結果就tī基大利擔任總督無久,王室有一個少年一代名叫以實瑪利ê人,帶十個人來到米斯巴,利用晉見基大利ê機會,kā伊刺殺,連當時kah基大利做伙ê「以色列人kah巴比倫人」mā同齊殺害,結果卻因為án-ne,害得koh-khah chē ê以色列人民一定tio̍h逃走去埃及避難,免得受tio̍h巴比倫王ê究責、報復。

若是tùi耶利米書第四十章13節到第四十一章18節ê記事來看,就會發見在這chìn前,bat有約哈難來kā基大利講chit件暗刣ê消息,並hō͘伊知影策劃chit件事kah亞捫王有關係。In希望基大利先下手反制,m̄-koh chit種建議被基大利tńg來絕à。基大利甚至ài in bē-tàng冤枉以實瑪利。無想tio̍h,tú親像約哈難所講ê,當以實瑪利進宮去晉見基大利,而且受tio̍h基大利誠懇地接待,同齊食飯ê時,趁機會kā基大利殺害,mā刣死所有在場ê以色列人民kah巴比倫軍人。而且mā講逃去埃及避難ê人,就是想beh搶救基大利而被拒絕ê約哈難,kah伊kah其他人tùi以實瑪利手中搶救出來ê,lóng因為驚被巴比倫王追殺,而逃去埃及,in lóng是支持mā擁護基大利ê人。

後來基大利被殺害ê chit工(七月)mā被列為禁食ê日子(參考撒迦利亞書八:19)。

第27到30節,chit段記事mā記載tī耶利米書第五十二章31到34節。

Chia講尼布甲尼撒王往生後,由以未‧米羅達續接為王,伊好款待約雅斤,tùi監獄tháu放伊,並且禮遇伊。Á這已經是伊被掠到巴比倫做奴隸「後ê第三十七年十二月二十七日」,chit-ê時間就是主前562年3月22日到4月4日之間。伊上任繼承王位,第一件事就是大赦約雅斤,hō͘約雅斤tùi監牢中出來,伊成自由身,並且「終生kah巴比倫王同桌進餐」,mā同時thang領取王室hō͘ in ê生活費用。

重新查詢