重新查詢
經文:

歷代志下 1:1-1:12

註釋:

Tùi第一章到第九章,lóng是記載所羅門登基後ê國tāi-chì況,包括伊祈求智慧、建造kah奉獻聖殿、迎接約櫃入聖殿等,其中以建造聖殿為siōng主要ê記事內容。M̄-koh chit段有省略列王記上第三章16到28節,描述所羅門siōng頂港有名聲下港有出名ê一段故事──所羅門得tio̍h智慧ê例證,mā就是兩個妓女爭奪gín-á ê故事。同時mā有省略建造王宮ê經過,以及列王記上第一到二章有關所羅門kah伊ê兄哥亞多尼雅之間爭奪王位ê經過。Tī歷代志上以結束大衛王朝做結語,然後這下卷就直接記載所羅門怎樣得tio̍h上帝ê賜福,興旺以色列帝國ê事蹟。

Chit段經文描述當所羅門tī基遍獻祭ê時,上帝向伊顯現,表明beh賞賜hō͘所羅門任何ê祈求。結果所羅門向上帝求智慧。結果上帝m̄-nā賞賜hō͘伊智慧,mā賞賜hō͘伊所無祈求ê財寶、富貴、名聲等等。Chit段記事mā thang參考列王記上第三章1到15節。

第1節,chia講「大衛ê kiáⁿ 所羅門ê 國位堅固,上主 — 伊 ê 上帝 kah 伊同在,hō͘ 伊不止大興旺。(全民版)」,chit句話參考列王記上第二章13到46節,就會知影所羅門kā兄哥亞多尼雅刣死,mā廢除大祭司亞比亞他,並且tī khǹg約櫃ê祭壇內面刣死軍事將領約押,最後是處死去掃羅家族最後一個有影響力ê示每,mā就是所羅門kā政治對手、宗教領袖、富有敵意ê軍事領袖,以及前朝掃羅家族ê重要人士等等lóng剷除了後,chiah真正hō͘伊ê王權鞏固了落來。

第2到6節,chit段經文講所羅門率領政府所有高級官員去基遍獻祭。Hit時因為聖殿iáu未建造,而本來khǹg約櫃ê聖幕iáu khǹg tī基遍,mā就是講基遍tī當時iáu被以色列人民看做是一個非常重要ê敬拜中心。這mā是為甚麼大衛王一心一意想beh tī耶路撒冷建造聖殿ê原因。所羅門無bē記得時常去當地獻祭敬拜上帝。

Chia指出所羅門「tī銅祭壇頂獻了一千頭cheng-seⁿ做燒化祭」。Chit種「銅壇」,thang參考出埃及記第廿七章1到8節、第三十八章1到7節ê資料,就thang明白chit種祭壇,就是專門為tio̍h獻燒化祭而建造ê。

第7節,就tī hit工暗時,上帝向所羅門顯現。在列王紀上第三章5節、15節lóng真清楚講是上帝tī夢中向所羅門顯現。

第8到10節,所羅門不假思考地就講,希望上帝賞賜hō͘伊「智慧」,thang hō͘伊ē-tàng治理「ná親像地上ê土粉hiah-ni̍h chē ê人民」,chit句話mā teh表明當時ê以色列國,tī大衛治理之下,人口已經增加非常chē。Chit點tùi大衛差派參與聖殿相關事務ê利未族人就高達三萬八千人,而且這iáu hit年滿三十歲以上,而且身軀強壯者。若是加上其他支族ê人,必定koh-khah chē。

第11到12節,因為所羅門無向上帝祈求「富貴、財寶、名聲,mā無求消滅敵人,á是為家己求長壽」,卻只有「祈求聰明智慧」,hō͘上帝非常感動。因為án-ne,上帝決定連chiah-ê伊所無祈求ê,lóng beh同齊賞賜hō͘伊。而且beh賞賜hō͘伊ê,比過去任何一個君王,以及後來ê君王lóng tio̍h多。這表示所羅門ê王朝kā達tio̍h siōng顛峰ê狀態。

經文:

歷代志下 1:13-1:17

註釋:

Chit段經文描述所羅門時代ê軍事力量ê強壯,kah經濟能力之雄厚。Chit段經文mā thang參考歷代志下第九章13到28節;列王記上第十章14到29節等等。

第13節,當所羅門聽tio̍h上帝chit種應允了後,就tùi基遍tńg來到耶路撒冷。在列王紀上第三章15節特別記明,講所羅門tńg來到耶路撒冷後,去khiā tī約櫃前,獻上燒化祭和平安祭,表示感謝上帝chit項重要ê應允,而且iáu設宴席款待所有ê臣僕。

第14節,chit節簡略地講所羅門ê國防軍事裝備非常周密,m̄-nā建立一支chē kah一千四百輛馬車kah一萬兩千匹戰馬ê騎兵隊,然後伊kā chit支雄武ê軍隊派置tī耶路撒冷,另外有一部分配置tī其它城市,這表示伊治理之下ê以色列國防,非常堅固。

第15節,chit節講出伊治理ê時期,以色列ê財富非常驚人,m̄-nā金銀寶石像石頭hiah-nih-chē,而且iáu有貴重ê進口建材香柏木。

第16到17節,chia ê「慕茲黎kah基利家」,chit兩個城市,tī古代是兩個國家,設tīchit-má ê土耳其東南方。Tī所羅門時代,chit兩個城市ē-sái講是戰馬(mā ē-sái講是種馬)培育中心城市。M̄-koh chit兩個城市lóng被所羅門ê忠心商人控制tio̍h。換句話講,chiah-ê戰馬m̄-nā是國防武力,mā控制tio̍h國防裝備輸出ê能力。因為án-ne,所羅門ê商人mā thang tùi埃及進口馬車,án-ne就ē-tàng輸出國防武器hō͘附近國家,大thàn外快。

經文:

歷代志下 2:1-2:10

註釋:

Tùi第二章起到第七章,chit段經文lóng是記載有關所羅門án怎建造聖殿(第二到四章),以及聖殿完成後奉獻ê禮儀(第五到七章)。歷代志作者Tī所羅門登基做王後,馬上就記載伊建造聖殿ê事,thang看出伊有意表明:所羅門kā建造聖殿看做所有國家大事中siōng-kài重要ê,因為án-ne,排列tī siōng頭前。

Chit章主要tī說明為tio̍h建造聖殿kah宮殿,所羅門派人去泰爾向希蘭王走chhōe協助,因為無論是聖殿á是王宮,所需要mā是siōng重要ê建材—黎巴嫩ê香柏木,以及其它相關ê建材,lóng需要透過泰爾港口ê協助chiah ē-tàng順利運送,因為án-ne,伊派臣僕去協調chit項運輸工程,以及人力上ê支援。

Chit段經文是所羅門派信差去對泰爾ê希蘭王講,需要伊協助派出siōng好ê工匠,幫助所羅門建造耶路撒冷聖殿ê事。

第1到2節,chia講所羅門m̄-nā是beh建造聖殿,mā同時決定beh建造家己ê宮殿。Á建造聖殿所需要ê一切差不多lóng由大衛王準備好勢了,所羅門只需要召集工人而已,而且伊決定同時建造家己ê宮殿。所羅門王雇用了共計十五萬ê工人,以及三千六百個監督工程ê人員。Chit種人力ê消耗kah費用確實龐大。是因為聖殿kah宮殿同時進行ê緣故。

第3到6節,這幾節經文說明所羅門對希蘭王提起伊建造聖殿ê看法。伊先肯定希蘭王協助in老父大衛王tùi黎巴嫩運送香柏木,並且帶木匠,為大衛王建造王宮(參考撒母耳記下五:11)。chit-má所羅門mā請希蘭王仝款ê方式對待伊。伊講beh建造聖殿做敬拜ê路用,並且強調聖殿一定tio̍h是宏偉,因為敬拜siōng偉大ê上帝──比任何神明lóng偉大ê上帝。

第7到10節,伊請希蘭王派一個手藝高超ê人來指導大衛王挑選出來ê匠人。另外伊mā請希蘭協助差派工人運送香柏木、松木、檀香木。伊提出hō͘希蘭王派出來ê工人ê工資是:兩千公噸小麥,兩千公噸大麥,四十萬公升ê酒,kah四十萬公升ê橄欖油。Á chiah-ê物資ê來源,就是tùi所羅門所任命ê十二個總督tī家己轄區內負責(參考列王記上四:7、27)。

Tùi chit段所列舉ê chiah-ê建造材料之數目,以及人數,就thang知影聖殿規模非常大,是空前ê壯舉。所寫ê龐大材料,早tī大衛ê時代就已經準備得差不多了(請參考歷代志上十八:7—11、廿二:14)。

經文:

歷代志下 2:11-2:18

註釋:

Chit段經文是希蘭王接tio̍h所羅門信差傳達ê口信了後所做ê回應,表示全力支持所羅門,一切ê需要。其實,希蘭王chit種決定mā等於是tī泰爾ê工人thàn取外匯仝款。

第11到12,希蘭王歌頌以色列ê上帝賞賜hō͘大衛王有chiah-ni̍h聰明koh bat事ê kiáⁿ,m̄-nā beh建造聖殿,mā beh建造宮殿。

第13到14節,希蘭hō͘所羅門知影伊tio̍h派出一位非常傑出ê師傅,名叫戶蘭。其實,伊mā是以色列人,因為母親是m̄-koh支族ê人,嫁hō͘泰爾人。Chit-ê戶蘭有能力幫助大衛所派出來ê所有工匠。

第15到16節,希蘭王ài所羅門kā決定beh付ê工資,運送hō͘伊,伊mā會開始派人去黎巴嫩剉木材準備tùi海路運到約帕koh再轉運到耶路撒冷。

Chia有一個真值得注意ê所在,就是希蘭王用蓋宮殿為大衛王祝賀,m̄-koh所羅門王蓋宮殿,需要家己付錢。這mā teh表示希蘭王對所羅門kah大衛王ê尊敬差了一大截。其實,所羅門只要繼續用家己ê老父大衛王ê王宮to̍h ē-sái。

第17到18節,chit兩節重複第2節所講ê,所羅門所用ê建造聖殿之工人,lóng是來自戰爭俘擄得tio̍h ê苦役,á是寄居tī in中間ê外族人,共計有十五萬人ê chē。Thang參考列王記上第五章13到16節ê記載資料。

經文:

歷代志下 3:1-3:17

註釋:

Tùi chit章開始,直到第五章1節止,lóng是記載有關建造聖殿ê事。Thang看出歷代志作者對建造聖殿ê過程kah外殼並無感興趣,伊所關心ê是聖殿內部ê裝潢設施。作者詳細地說明怎樣用純金裝貼tī聖殿ê牆、棟樑、戶碇、門等。另外一方面,mā有可能是因為歷代志ê讀者對聖殿ê建造過程可能真熟悉,所以作者就不需用koh-khah chē ê篇幅記載chiah-ê事務。

第1到2節,chia提起大衛王預備了一個蓋聖殿ê地址,chia講he是「摩利亞山」、「耶布斯人亞勞拿ê phah麥場」,這地點kah kui個選地ê背景,thang參考撒母耳記下第廿四章,以及歷代志上第廿一章等經文。其實這摩利亞山,mā是當年亞伯拉罕奉獻伊ê gín-á以撒hō͘上帝ê所在。因為án-ne,thang看出建造耶路撒冷聖殿mā就是teh象徵以色列子民kā siōng寶貴ê大kiáⁿ奉獻hō͘上帝ê所在(參考創世記廿二:2、14)。

Chia講tio̍h聖殿開工日期,是所羅門做王ê「第四年二月」。列王記上第六章1節ê作者特別指出,chit-ê時間tú好是以色列人民離開埃及後ê第四百八十年。

第3到9節,chit段經文是描述聖殿ê規模。並且強調無論是行廊道內部牆壁,á是門框上,m̄-nā有純金ê貼上,而且lóng有幼路ê雕刻,並鑲上貴重ê寶石。Chiah-ê lóng teh顯示聖殿ê雄偉kah富麗堂皇。

第10到14節,chit段經文是關係兩個基路伯,象徵tio̍h天使ê樣式,lóng是用黃金打造ê。Chit兩個基路伯就khǹg tī聖殿ê至聖所內面,而至聖所內面就是放tio̍h約櫃。Kah-ná teh象徵天使固守tio̍h約櫃。Chia mā提起至聖所有幕簾隔tio̍h,而且tī chit幕簾頂面mā繡tio̍h基路伯圖案,表示有天使監視tio̍h,一般人bē-tàng隨意窺視至聖所。

第15到17節,這是聖殿ê兩條大銅柱,因為高達十五公尺半,以現代建築來看,大約是五層樓高chit種大柱子,這是khǹg tī聖殿入口所在,看起來就感覺真雄偉之狀。這柱子一條叫「雅斤」,意思是teh指「上帝建立」,另一條柱子叫「波阿斯」,意思是teh指「上帝ê氣力」。換句話講,聖殿表明ê就是:這是上帝ê氣力所在,到chia來敬拜上帝,會得tio̍h上帝賜福ê氣力。

經文:

歷代志下 4:1-4:22

註釋:

Chit章是繼續teh描述建造聖殿ê工程,chit章特別提起聖殿裡ê各種器具,chiah-ê lóng kah敬拜獻祭ê時所使用ê器材有關,包括祭壇kah祭壇頂使用ê鍋á、鏟子、碗等物,祭司行潔淨禮所需要洗滌ê盆子(銅海),以及燈臺等等。

第1到6節,開始就紹介「銅祭壇」,這是獻牲祭用ê。續落來是「銅海」,這是祭司teh獻祭chìn前,一定tio̍h先潔淨家己ê手kah腳。特別ê是,銅海是安置tī有「十二頭銅牛」ê背上,這「十二」真清楚teh表明以色列十二支派。然後,另外造「十個銅盆」,這是用來清洗切做塊ê燒化祭ê物。
第7到8節,chit兩節提起聖殿內部有「十個金燈臺,十張桌á」,這是供桌,beh khǹg供餅用ê,一百個金碗,這碗就是放供餅tī其中。

第9到10節,聖殿裡mā有祭司ê「內院」,這是供給祭司歇睏、換衫褲ê所在。Chia是只有祭司chiah thang進入。Á「外院」是利未人mā thang進入ê所在。無論內院á是外院,門lóng是用銅包teh。擦亮ê時會金光閃閃。

第11到16節,chit段經文列出了戶蘭chit位工匠師傅為耶路撒冷聖殿所做ê工作清單。作者先講祭壇ê物件,包括有鍋á、鏟子、碗等器皿。續落來紹介ê lóng是kah銅器有關各種ê器物。Chiah-ê銅器lóng擦拭ê非常亮眼。

第17到18節,chit兩節非常有意思,hō͘讀者清楚知影早tī三千多年前,人類已經知影怎樣開發礦產,特別是銅礦,當然頂面所講會提起黃金,就表示金礦、銀礦、鐵礦等貴重金屬ê運用tī人類ê歷史上已經有真長一段時間。作者tī chia強調,因為聖殿使用siuⁿ chē ê銅,明明是無法度估計用去jōa-chē銅。

第19到22節,chit段經文提起聖殿裡ê供桌、金壇、燈臺等物件,有kóa是用銅,m̄-koh mā有bē少純金打造。M̄-koh值得注意ê,是聖殿外面ê門kah至聖所ê門,lóng是用純金包起來,可見整座聖殿看起來,內外lóng是金碧輝煌。

經文:

歷代志下 5:1-5:14

註釋:

第五到七章是描述所羅門奉獻聖殿ê經過。作者用án-ne長ê篇幅,描述kui個聖殿奉獻禮ê經過,主要tī說明所羅門kā敬拜上帝看做是siōng重要ê,因為建造聖殿ê主要目的就是為tio̍h敬拜上帝。

第五章主要tī說明聖殿完工後,所羅門kā khǹg tī大衛王所準備ê新聖幕裡ê約櫃移到完工落成ê聖殿安置。因為有大衛王第一pái移動約櫃發生ê意外,致使烏撒意外死去(歷代志上十三:9—10),chit pái格外小心。

第1節,「所羅門王完成聖殿ê一切工程」,而且所羅門koh kā大衛王「獻hō͘上主ê金子銀á kah其他器物lóng khǹg tī聖殿ê庫房裡」,chit句話mā說明建造聖殿ê錢m̄-nā夠額,甚至有chhun thang存入聖殿ê庫房裡。原因是歷代志上第廿九章1到9節記載,全體以色列人民lóng有奉獻參與建造聖殿ê需要。大家lóng the̍h出來奉獻,結果有chhun。

Koh講,照列王記上第六章37到38節ê記載,聖殿奠基是Tī所羅門做王ê第四年二月,完工是tī第十一年八月,án-ne算來,建造聖殿前後用去七年半時間。

第2到3節,chit-má beh kā約櫃tùi原本khǹg tī錫安ê聖幕移往聖殿,所羅門召集所有ê以色列長老kah各支族各宗族ê族長到耶路撒冷,時間就選定tī七月Tòa棚節ê節期,這原本就是以色列民族ê大節期。因為án-ne thang知,並m̄是完工後馬上就舉行聖殿奉獻kah移動約櫃入聖殿ê大典,卻是等到隔年七月Tòa棚節ê時chiah舉行。

第4到9節,chit段經文講述得真清楚,扛約櫃ê是利未人,然後祭司kah利未人kā聖幕理ê物件,kah一切用具lóng搬進聖殿。所羅門kah所有以色列人民lóng熱烈奉獻。Tī聖殿裡ê至聖所,約櫃頂有基路伯作蓋子,而基路伯身上有翼股真大,kā扛約櫃ê槓子lóng遮蓋起來。

第10節,chit節特別說明約櫃內面,只有放tio̍h兩塊摩西當年tī西奈山上tùi上帝hia領受tio̍h ê誡命石版。M̄-koh後來希伯來書第九章4節,講約櫃內面除了十誡ê兩塊石版外,iáu有放tio̍h盛嗎哪ê金罐子,koh有亞倫ná根發過芽ê柺á。希伯來書ê作者會án-ne寫,真可能kah出埃及記第十六章33到34節,以及民數記第十七章6到11節ê資料有關係。chit-má chia講只有兩塊刻tio̍h誡命ê石版,其他物件無tīà。有一種講法,認為可能是因為當年約櫃被非利士人搶去(參考撒母耳記上四:10—11)ê時chūn被偷the̍hà。M̄-koh chit種講法無甚麼根據。

第11到14節,chit段經文講利未人祭司等,lóng真慎重地準備tī聖殿裡ê服事工作,包括潔淨家己,以及穿好衫褲,並kā in負擔ê工作lóng按照規矩辦理。

Chia講「雲彩充滿聖殿,閃耀tio̍h上主ê光輝」,chit句話已經tī說明上帝降臨在聖殿中,chiah會致使祭司無法度繼續主持禮拜,原因是in ê目睭無法度thí開。因為上帝出現ê光輝閃耀tio̍h。

經文:

歷代志下 6:1-6:11

註釋:

Chit章是聖殿完成舉行奉獻禮儀ê時,所羅門對以色列人民講勸勉ê話(第1到11節)。另外一部分是所羅門代表全體以色列人民獻上祈禱(第12到42節)。

Chit段經文是所羅門對全體以色列人民所冊ê訓詞。仝款ê記事mā記載在列王上第八章12到21節。

第1到2節,chit兩節祈禱詞若是khǹg tī第13節chìn前會比較暢順。所羅門表示伊已經為上帝建造「一座莊嚴ê殿宇,做你永遠khiā起ê場所」。不過,ná親像先知以賽亞所講ê,天,是上帝ê寶座;地,是上帝ê腳凳,有甚麼人ē-tàng為上帝建造chit種殿宇hō͘上帝khiā起,原因是kui個宇宙lóng是上帝親手所造ê(參考以賽亞書六十六:1—2)。因為án-ne,所羅門只不過teh表達一個心願:建造一座thang榮耀上帝ê聖殿。

第3到6節,chit段經文是所羅門帶領以色列人民說明建造聖殿ê緣由。Tī chia伊提起tùi上帝帶領以色列人出埃及,直到chit-má選擇耶路撒冷做建造敬拜ê殿宇,以及揀選大衛當以色列人民ê領導者,其中lóng有上帝ê旨意。

第7到9節,chit段經文真清楚表示,kui個建造聖殿ê計畫,是出tī大衛王ê手,m̄-koh上帝講beh由大衛王ê kiáⁿ來完成chit項建造ê工程。這表示所羅門確實是照上帝ê旨意完成chit件工程。

第10到11節,所羅門表示tùi伊接掌王位到建造敬拜上帝ê聖殿,以及kā約櫃安置tī聖殿中,以及kā kah上帝立約ê誡命石版khǹg tī約櫃內面,chiah-ê工作lóng照上帝ê旨意完成。

所羅門講chiah-ê話,等於teh向全國人民宣告,伊確實是照上帝ê旨意做tāi-chì,mā完成了老父大衛王ê遺言。Koh講,這mā同時teh宣告,耶路撒冷tùi án-ne 會成做以色列人民敬拜上帝ê中心。

經文:

歷代志下 6:12-6:42

註釋:

Chit段是所羅門帶領以色列人民向上帝奉獻聖殿ê祈禱文。Chit段經文mā同時記載在列王紀上第八章22到53節。比較特別ê是tī第13節,這是歷代志特有ê資料,在列王紀並無此節ê記事。第13節講所羅門khiā tī一個特製ê銅台頂,hō͘人民thang看見tio̍h伊khiā tī高處,帶領in向上帝祈禱。這並m̄是講伊扮演祭司ê角色,卻是用一國之君,帶領人民感謝上帝。

Kui個奉獻聖殿ê禮儀siōng主要ê內容就是祈禱,chit點對以色列人民tī信仰上ê意義是特別ê,因為祈禱乃是teh kah上帝對話。如果無kah上帝對話,則即使奉獻koh再好ê祭品mā是枉然。Kah上帝對話,即使無任何獻祭ê物件,mā是表明人kah上帝之間ê關係是親密ê。Kui個禮儀ê內容充分表明以色列人民kah上帝之間ê密切關係是bē-tàng分。

第12到13節,chit兩節經文講所羅門khiā tī一個用銅板打造ê高高平台頂,hō͘以色列人民lóng thang看見伊跪落來並舉起雙手,帶領in向上帝祈禱。

第14到17節,chit段經文是伊向上帝獻上感恩,稱頌上帝是信實ê,並且相信上帝會hō͘遵守上主律法ê大衛後代繼續作以色列人民ê王。

第18到21節,伊祈求上帝日夜看守這聖殿,當以色列人民面向這聖殿á是tī chit聖殿祈禱ê時,懇求上帝會垂聽,並且赦免in所犯ê罪過。

第22到23節,若是以色列人民之間有糾紛,懇求上帝成做公正ê審判者。

第24到25節,如果以色列人民因為得罪致使上帝用敵人來phah敗in ê時,若是以色列人民知影回心轉意歸向上帝,懇求上帝會赦免、赦免in ê罪過。

第26到27節,若是得罪上帝致使上帝用乾旱來懲罰ê時,in醒悟過來而知影悔改,懇求上帝赦免in,幫助、教導in知影怎樣行正直ê道路。

第28到31節,假使以色列人民因為tú-tio̍h各種大災禍,包括飢荒、瘟疫、旱風、霉爛、草蜢、草蜢á、疾病等等,in已經Tī痛苦中懇求上帝憐憫、赦免ê時,懇求上帝按照in該受tio̍h ê待遇懲罰in,án-ne in就會知影tio̍h敬畏上帝。

第32到33節,若是有外族人因為仰慕上帝而來這聖殿祈禱,祈求上帝mā垂聽,án-ne,全世界ê人lóng會知影學習以色列人民敬拜上帝。

第34到35節,若是以色列人民因為上帝ê命令而上戰場,面向上帝ê聖殿祈禱ê時,懇求上帝hō͘ in ē-tàng phah贏。

第36到39節,假使in因為得罪上帝而phah敗仗,結果被敵人俘掠到外邦去,無論in被掠到tó位,只要知影悔改認罪,懇求上帝ē-tàng垂憐in,赦免in ê罪。

第40到42節,chit段是結語,希望上帝bē遺棄以色列人民。

Tī chit篇祈禱文中,所羅門一再重複強調以色列人民,á是外族人,只要是向(ǹg)耶路撒冷聖殿祈禱,懇求上帝會垂憐注意聽,這teh表示聖殿就是上帝khiā起ê神聖ê所在。

經文:

歷代志下 7:1-7:10

註釋:

Chit章說明上帝有應允所羅門ê祈禱。上帝應允ê方式,就是用祂榮耀ê光彩降臨在聖殿中。Koh講,上帝直接向所羅門顯現,並且真清楚向伊表示想得tio̍h上帝ê垂憐kah賜福,siōng基本ê要件,就是以色列人民一定tio̍h嚴格遵守上帝ê命令律法。

Chit段經文是上帝回應所羅門祈禱,因為看見上帝ê榮耀降臨在耶路撒冷聖殿,所羅門就án-ne獻上數以萬計ê牛kah羊,然後就tī長到七工ê節期中,tī聖殿舉行歌頌o-ló上帝ê活動。

第1到2節,當所羅門祈禱後,上帝回應伊祈禱ê方式,就是tùi天頂降落火,kā祭壇頂所獻ê燒化祭kah物件lóng燒掉,而且有上帝特別ê光輝充滿tī kui個聖殿中,致使連祭司mā無法度睜眼正視,因為án-ne,無法度進入聖殿裡。

第3到6節,在場ê以色列人民lóng看見這景象,因為án-ne就謙卑坦覆 (thán-phak)tī土腳頌讚上帝。Á所羅門kah以色列人民koh一pái奉獻koh-khah chē,包括有「兩萬兩千頭牛kah十二萬隻羊」,這確實是一個無法度想像得出來ê祭品,必定堆積得如一座小山仝款。Koh講,奉獻禮另外一個特色就是tī第6節所記載ê,in用詩歌o-ló,mā用樂器吹號。這m̄-nā說明獻祭禮儀ê重要內涵,mā凸顯利未人tī kui個禮儀中ê角色是真重要ê。

第7到10節,因為奉獻聖殿是tī Tòa棚節,chit-ê節日長到七工,因為án-ne,這七工中間每工lóng有獻祭ê禮儀,mā利用ná七工,in kah來自各地ê同胞同齊慶祝聖殿ê完成kah上帝ê降臨,並感謝上帝賜福hō͘大衛延續到伊ê kiáⁿ所羅門。

其實,這七工ê歡喜慶祝有ê宴席,mā是teh暗示聖殿ê落成奉獻,ná親像舉辦婚宴仝款。以色列人民ê婚宴通常lóng是七工之久,in用chit種方式teh表明:上帝kah以色列人民之間ê關係ná親像新婚ê夫妻仝款。

經文:

歷代志下 7:11-7:22

註釋:

這是一段非常重要ê一段經文,雖然講奉獻禮真隆重,而且所費不貲,chē kah「兩萬兩千頭牛kah十二萬隻羊作平安祭」(第5節),m̄-koh,上帝並m̄是完全lóng無條件就答應了所羅門祈求ê一切,上帝m̄是人求甚麼,lóng hō͘ in,祂iáu是有條件地審視每一件事。祂提醒所羅門一件非常重要ê事:遵行祂ê律法、誡命,必定得tio̍h賜福。反之,會帶來侮辱,即使是tī chit所聖殿祈禱、敬拜,mā lóng會成做人民譏笑、侮辱ê對象。換句話講:棄sak上帝ê話,聖殿kā只chhun空殼子而已,只是一棟築物罷à。

Chit段經文mā同時記載在列王紀上帝第九章1到9節。

第11到12節,chia講所羅門完成了「聖殿kah王宮ê工程完畢」,其實,聖殿kah王宮並m̄是仝一個時chūn完成ê,因為聖殿用七年時間就蓋完了(參考列王記上六:37—38),m̄-koh王宮koh khah奢華,共計用了長到十三年(參考列王記上七:1)。

Koh講,上帝回應所羅門ê祈禱,講祂同意用耶路撒冷聖殿做敬拜祂ê所在。

第13到14節,上帝同意無論以色列人民tú-tio̍h甚麼困境,包括in因為犯罪而受tio̍h懲罰,只要in棄sak所做ê pháiⁿ事,上帝就會垂憐並原諒in所犯ê錯誤。

第15到16節,上帝向所羅門確認這聖殿就是祈禱ê殿,而且hō͘伊分別為聖,並要求時時刻刻保護這聖殿。

第17到18節,上帝明確地指出,只要所羅門像伊ê老父大衛hit種遵守上帝ê命令、律法,上帝就會永遠kah in做以色列人民ê統治者。

第19到20節,chit兩節是相對tī第17到18節,若是所羅門kah以色列人民棄sak上帝,上帝就會棄sak in,mā會離開耶路撒冷聖殿,hō͘以色列人民kah聖殿成做別人嘲(sau)笑ê話柄。

第21到22節,chit兩節mā是第19到20節ê加強句,說明當以色列人民kah所羅門lóng棄sak了上帝ê時,聖殿就會hō͘敵人嘲(sau)笑,以色列人民所建立ê國家mā會hō͘人欺負。

經文:

歷代志下 8:1-8:10

註釋:

Chit章有kóa記載kah列王記上所記載ê無仝;親像:列王記上第九章10到14節講所羅門kā加利利地區ê二十座城當做工程費用,付hō͘希蘭王。M̄-koh tī chia soah講希蘭王送hō͘所羅門王一kóa城鎮。Mā允准以án-ne講,當初所羅門因為財力無夠,因為án-ne用城鎮當做建築費,m̄-koh為希蘭王拒絕,á是伊kā它收下當做抵押品,等待伊日所羅門來贖回chiah-ê城鎮。

Koh講,第11節作者解釋了為甚麼所羅門kā埃及ê bó͘ tùi大衛王宮遷徙到新ê王宮去,理由是約櫃bat tī大衛城裡khǹg過,是神聖ê。M̄-koh,所羅門建造新王宮hō͘ bó͘,其實是有政治想beh,並m̄是真正是信仰ê理由,因為埃及王嫁cha-bó͘-kiáⁿ ê時,bat送hō͘所羅門一座「基色」城(請參考列王記上九:16)。Án-ne thang看出歷代志作者ê用心,就是beh kā所羅門寫做是一個盡心、盡力敬奉上帝ê君王,chiah會得tio̍h上帝大大ê賜福。特別是tī第12到15節,說明所羅門是一個真遵守規律ê君王,tī信仰ê事頂面,伊lóng是照「摩西律法ê規定」,應該tùi利未人主持ê事,伊就不取代,免得混淆敬拜ê規矩。

Chit段經文講述所羅門完成了聖殿kah宮殿ê建築了後,mā進行了真chē國防要塞城市ê建築,而所有chiah-ê勞力lóng是tùi俘擄來ê迦南地人民去作勞役ê工作。

第1到2節,chia一開始就講所羅門「用二十年ê時間建造聖殿kah王宮」,這二十年是包括建聖殿七年、建王宮十三年。Chia講希蘭王送hō͘所羅門ê幾座城市,所羅門lóng kā它以重建。根據列王記上第九章11到13節,為tio̍h beh hō͘希蘭王材料kah工資費用,kā加利利等二十座城市當做「工資kah材料費」折算過去。M̄-koh chit件事hō͘希蘭王非常不滿意,有可能其中有kóa城市是廢墟,不值錢。因為án-ne被希蘭王退tńg來。M̄-koh mā有可能,chiah-ê城市是所羅門用其他方式,比如the̍h家己ê錢出來給付hō͘希蘭王,然後kā chiah-ê城市收tńg來後,開錢重新整建,而且安置以色列人民khiā起其中。

第3到6節,chit段經文講所羅門m̄-nā重新建造頂面所講被希蘭王退tńg來ê城市,伊同時建造曠野城市巴美拉,以及儲藏貨物ê哈馬境內所有城市,同時kā一kóa老舊城市重新建造起來,其實,伊án-ne大力重建真chē城市,lóng是kah國防有關。這mā teh暗示,所羅門時代,已經無koh像大衛王時代hit種,堅強ê國力,附近國家lóng m̄敢覬覦。M̄-koh所羅門時代,大費周章地奢華建造王宮,tú好teh說明國力會衰退ê原因。古往今來ê歷史lóng是án-ne。

第7到10節,chit段經文說明所羅門lóng是kā迦南地人當做奴工對待,而hō͘以色列人民當戰士、官長、馬車長kah騎兵,並且有監工teh監視迦南人。其實,伊án-ne做,tú好是以色列人民祖先tī埃及做奴工ê苦難經歷。

經文:

歷代志下 8:11-8:18

註釋:

Chit段經文講述所羅門確實是一個真遵守摩西律法規章ê君王。

第11節,所羅門為伊所娶ê埃及王cha-bó͘-kiáⁿ之bó͘,安置tī伊所興建ê王宮後面,伊為這王后興建了特別ê寢宮(參考列王記上七:8)。歷代志作者講這是所羅門為tio̍h hō͘聖殿ê約櫃bē受tio̍h污穢影響,而會有chit種看法,真可能是因為所羅門無要求chit位埃及王ê cha-bó͘-kiáⁿ,歸向上帝,卻是伊要求所羅門為伊建造偶像祭壇,thang hō͘伊tī王宮裡mā thang祭拜,chit點tùi列王記上第十一章1到8節ê記事thang看出來。

第12到15節,chit段經文講所羅門lóng按照規矩獻祭、敬拜上帝,而所有in老父大衛王所規定落來有關聖殿敬拜禮儀,伊lóng全部遵守。

第16節,chit節講所羅門完成了伊計畫中所有ê重大工程。

第17到18節,所羅門進一步請希蘭王替以色列組成一支海上運輸船隊,當做擴展海上貿易ê需要。伊tī以東地區ê阿卡巴灣海岸建立兩個港口,請希蘭王替伊訓練航海人員,結果thàn tńg來了大約有一萬五千公斤ê金子。Thang算是成功ê海上貿易。

經文:

歷代志下 9:1-9:12

註釋:

Chit章主要講述兩件事,一是提起所羅門一生中,kah上帝賞賜hō͘伊智慧有關ê事,除了分辨兩個妓女ê kiáⁿ以外,koh來就是有遠遠tī非洲ê示巴女王不辭千里之遙,來像伊請益ê記事。另外一件,就是講述所羅門ê財富chē到bē-tàng數。M̄-koh若是kui個記事來看,伊雖然真富有,卻iáu tī晚年人民課重稅,tī伊死後,kiáⁿ羅波安mā m̄聽北方人民請求減少稅賦ê請願,導向國家分裂ê結果出現。

Chit段有關示巴女王ê拜訪ê記事,mā tī說明所羅門時代ê以色列國,達tio̍h siōng顛峰ê境界,國家ê財富、政治版圖等等lóng成做當時左右鄰國羨慕ê對象。比較特別ê所在,就是Tī chit段經文中,thang清楚看tio̍h「智慧」kah「財富」是結合做伙ê,這tī古代人ê觀念中,此二者是分bē開ê。聰明有智慧者,往往真有財富,此二項mā帶來強大ê統御力。

第1到4節,chit段經文開始,就講遠遠tī非洲ê示巴女王聽tio̍h了所羅門ê智慧,比起當時kui個中東地帶任何君王lóng會khah受有份量。真可能因為第八章18節記載ê所羅門船隊到俄斐,mā kā所羅門ê名聲遠播出去。示巴女王因為án-ne慕名而來,同時帶懷疑ê心,想beh測試所羅門是m̄是ná親像傳說中ê hit種有智慧。伊帶真chē貴重禮物送hō͘所羅門,mā提出真chē問題,所羅門lóng hō͘了伊滿意ê回答。免不了ê,所羅門會帶領伊參觀聖殿kah富麗堂皇ê宮殿等建築,chiah-ê lóng hō͘示巴女王見識到所羅門ê財富kah智慧。

第5到9節,chit段經文是示巴女王所講客套禮貌性ê官方話,o-ló所羅門,mā o-ló伊治理之下ê人民是非常幸福ê。示巴女王同時kā伊帶來ê禮物送hō͘所羅門,包括有大約「四千公斤ê黃金,真chē香料kah珠寶」等。其中高貴ê香料,是所羅門從來無收過ê。

第10到12節,chit三節講所羅門kah希蘭合作開發ê海運船隊,確實是thàn了真chē財富。Á所羅門mā 回報hō͘示巴女王相對ê財寶,因為所羅門比示巴女王koh khah富有,因為án-ne,tńg來贈ê必定比伊送ê koh-khah chē。

經文:

歷代志下 9:13-9:31

註釋:

前段講所羅門有聰明智慧,因為án-ne,伊thang kā國家治理得真好,特別是tī政治、外交上真成功,hō͘國家ê版圖無需要用武力就ē-tàng達成擴疆闢域ê效果。

Chit段經文主要說明所羅門tī經濟發展上有真突出ê成就,chiah-ê成就lóng kah上帝賜hō͘伊ê智慧有密切關係。伊結合政治、外交、經濟,hō͘以色列國家強盛達tio̍h siōng高峰ê境界。

第13到16節,chit段經文描寫所羅門執政時代,m̄-nā頭前所講ê航海船隊帶tńg來真chē貿易成果,伊mā抽商人ê稅,以及附近國家進貢ê收入,單單是黃金就chē到無法度thang數。

第17到24節,chit段經文描寫所羅門m̄-nā奢華,明明是奢華過度,伊確實真富有,按照chia ê描寫,伊差不多是全世界上siōng富有ê君王。只因為為伊是一個上帝賞賜智慧ê君王。Mā因為án-ne,有真chē君王可能受tio̍h示巴女王ê影響,mā想beh來tùi伊身上獲取智慧,lóng紛紛帶貴重禮物來見伊。Chiah-ê禮物包括金器、銀器、衫褲、武器、香料、馬匹、騾子等。

第25到28節,chit段經文講述所羅門mā強化伊ê國防,m̄-nā有真好ê軍事裝備,mā有真穩定ê疆域,m̄免擔心外族人入侵。雄厚ê財力,是伊thang安穩ê基礎。M̄-koh chit種基礎若是無上帝ê賜福,最後mā會消失。

第29到31節,chia提起幾種以色列文獻,包括有「先知拿單史、示羅人亞希雅預言冊,kah先見易多異象等冊。Chia mā提起所羅門執政共計四十年,kah伊ê老父大衛王仝款。死後由伊kiáⁿ羅波安繼位。

經文:

歷代志下 10:1-10:11

註釋:

Tùi第十章開始,是有關以色列國分裂做做南、北二國ê史料。Mā是tùi chit章開始,直到第三十六章止,thang看tio̍h作者對北國以色列歷史輕視,對南國猶大則偏好,原因是認為南國乃是用大衛kiáⁿ孫為主軸,是屬tī所講ê「正統」王朝。因為án-ne,除非kah南國有關係ê資料,作者chiah kā它紹介,若無,北國以色列ê歷史就有省略。這就真清楚知影,歷代志作者是用南國猶大ê觀點teh看以色列民族ê興衰。

Chit章ê記事mā同時記載在列王紀上第十二章。

直到到chia,歷代志ê作者並無任何記落來所羅門晚年棄sak上帝ê事件,m̄-koh在列王紀上第十一章1到13節則有清楚記載伊犯罪棄sak上帝ê原因。

Chit段經文記載所羅門往生後,伊kiáⁿ羅波安繼位,以色列北部支族ê人就希望伊ē-tàng減免人民稅賦ê負擔,這mā是頭前所講ê,所羅門雖然累積了無法度估計ê財富,m̄-koh卻無法度知影人民生活ê痛苦。Á伊ê kiáⁿ羅波安koh khah無法度知影民間ê疾苦。因為án-ne,當北部支派推出代表來見伊,請求減免稅賦ê負擔ê時,伊並無體會人民生活ê痛苦,而是beh思考了後chiah回答。

第1節,mā可能所羅門並無想tio̍h家己會chiah-ni̍h早就往生pah,chiah無tī伊死去chìn前,就tī耶路撒冷封立伊ê kiáⁿ羅波安為王。羅波安繼任為王後,mā到北部以法蓮境內ê示劍城去,chit-ê城mā是北部支族ê政治中心,北部地區ê人民lóng出來表示擁護伊做王。

第2到5節,chia提起北部支族ê領袖耶羅波安ê事,tī歷代志作者並無任何交帶,m̄-koh在列王紀上第十一章26到40節,有真詳細ê資料記載以法蓮族尼八ê kiáⁿ耶羅波安逃到埃及去避難chit段故事ê背景。歷代志作者甚至認為以色列國會分裂ê原因,是耶羅波安ê「背叛」所造成ê。M̄-koh tī chia,作者講出北部ê族群請求耶羅波安代表in,去向羅波安參詳拜託,希望伊ē-tàng減輕稅賦,原因是所羅門hō͘ in「背負重擔」,已經hō͘ in ê生活陷入困境à。這可能就是頭前已經敘述過ê,Tī所羅門時代,大興土木,而這大興土木並m̄是因為建造聖殿造成ê,因為建造聖殿ê費用tùi大衛ê時代就已經開始存錢準備(參考歷代志上廿二:14、廿三:2—9),而且根據歷代志下第五章1節,建造聖殿了後iáu有chhun落來ê金銀kah其他器物lóng khǹg tī聖殿ê庫房裡。因為án-ne,加重人民稅賦ê重擔應該是kah建造王宮有關,而且伊ê王宮中共有一千名嬪妃(參考列王記上十一:3),這lóng充分顯示伊tī宮廷中ê生活非常奢華浪費,m̄知節制造成一定tio̍h加重稅收chiah ē-tàng平衡收支ê。親像tī歷代志上第九章17到21節,描述伊tī王宮中ê生活情況,就thang看出所羅門是過窮極奢侈ê生活,m̄-koh卻m̄知民間生活ê疾苦。

當耶羅波安去kā羅波安講,希望減輕人民ê生活負擔ê時,伊ê回答卻是ài in三工後chiah來。

第6到7節,tī chit三工中,羅波安去詢問老父時代留落來ê老臣,問in對減免稅賦ê意見。
Chiah-ê老臣建議羅波安tio̍h「好款待chiah-ê人,hō͘ in歡喜」,chit-ê意思真清楚,就是beh接納耶羅波安所代表ê北部支族人民ê意見。

第8到11節,m̄-koh羅波安顯然無歡喜眾老臣ê意見,伊詢問tio̍h kah伊同時長大ê少年顧問,結果in hō͘伊ê意見,m̄-nā是不減輕,而且是beh加重抽稅,換句話講,in建議伊用koh khah嚴苛ê統治手段對待chiah-ê北部支族ê人,想用chit種方式hō͘ in驚惶不安。

經文:

歷代志下 10:12-10:19

註釋:

Chit段經文講述羅波安回覆北部支族代表ê話,講beh加重in ê稅賦負擔,結果致使以色列民族分裂做做為北部以色列、南部猶大等兩個國家。

第12到15節,羅波安tī三工後接見耶羅波安等北部代表,就kā伊身邊ê少年幕僚所提供ê加重稅賦之議回覆hō͘ in。Mā因為án-ne,埋落來了以色列國分裂ê因素。第15節是chit章siōng重要ê一節經文,作者beh說明以色列國ê分裂,其實就是上帝對一個失落疼心ê君王ê審判,mā是上帝對所羅門ê懲罰。因為根據列王記上第十一章ê記載,所羅門因為娶真chē外國cha-bó͘-gín-á做妻妾,in誘惑所羅門棄sak上帝,跟tòe chiah-ê外國cha-bó͘-gín-á ê bó͘去拜偶像神明。

第16到17節,chit兩節真清楚說明羅波安chit種回覆,是致使北部支族決定kah南部猶大支族分裂ê原因。In強調大衛kah in無關係,mā表明beh hō͘大衛ê宗族家己照顧,in無願意koh再kā大衛家族當做in ê領導者。就án-ne,北部支族ê「反叛tńg去厝裡à」,就án-ne,「羅波安只作tòa tī猶大地區ê人民ê王」,而這kan-taⁿ是一段真短ê時間。一個輝煌ê以色列王國分裂à。Chit句「羅波安只作tòa tī猶大地區ê人民ê王」,對照第十一章1節就會明白chit地區只有兩個支族──猶大kah便雅憫。Á便雅憫soah koh是十二支派中siōng弱小ê一族(參考撒母耳記上九:21)。Koh講,猶大支族tī大衛時代已經kā西緬支族併入à。因為án-ne,南部其實就是三族,北部支派就有九族,而且土地大、人chē。

第18到19節,chit兩節清楚講出北部支派背叛後,第一個反應動作,就是拒絕接受羅波安ê指令,kah像過去仝款,指派in ê工作。因為án-ne,當羅波安派出勞工總管亞多蘭陪伊去北部以色列巡視ê時,北部人民具體ê反應,就是用石頭phah死亞多蘭,而羅波安因為逃離ê快,若無,mā會hō͘ phah死。北部支族ê人民用chit種方式hō͘羅波安知影,in確實背叛了伊。

經文:

歷代志下 11:1-11:12

註釋:

Chit章記載當北部支族分裂出去後所發生ê一kóa事件,包括羅波安整軍準備phah北部支族,同時加強一kóa城市ê防衛工程。另外一方面是所有祭司kah利未人lóng因為心向耶路撒冷,而tùi其他城市移轉到耶路撒冷去。

Chit段經文記載上帝ê奴僕去阻止羅波安出兵phah北國支族ê以色列兄弟。另外一方面,是羅波安雖然無出兵,m̄-koh mā預防北部ê軍隊南侵,因為án-ne加強了防禦工程。

第1節,chit節真清楚講tio̍h羅波安一tńg來到耶路撒冷,就開始準備出兵去phah北部ê支族同胞。羅波安tùi猶大kah便雅憫這兩支族中選出siōng精銳ê部隊共計十八萬人,希望藉這ē-tàng繼續控制北部支族。

第2到4節,就tī chit siōng要緊ê關頭,上帝差派奴僕示瑪雅,ài伊去阻止羅波安kah猶大人、便雅憫人,m̄-thang去攻打北部ê以色列人。真重要ê,是in lóng聽示瑪雅ê勸言。因為in知影,若無上帝同意,就算in派出ê lóng是精銳部隊,mā會是枉然。

第5到10節,雖然上帝阻止了羅波安出兵,m̄-koh伊無bē記得tio̍h加強防禦工程ê重要性,共計整建了十五個城市,tī chit十五個城市修築堡壘,來預防萬一一定tio̍h開phah á是北方出兵來侵犯。

第11到12節,m̄-nā是修築堡壘,而且iáu進行囤糧以備戰爭之需。羅波安原本是全以色列十二支族ê統治者,chit-má因為m̄聽老臣ê建議,疼惜北部支族ê困境,反tńg因為án-ne hō͘北部支族決定離伊而去,結果羅波安只chhun統治猶大kah便雅憫這兩支族而已。

經文:

歷代志下 11:13-11:23

註釋:

Chit段經文特別提起全以色列境內ê祭司kah利未人lóng遷徙到南國ê猶大,原因是北國以色列ê耶羅波安不准in繼續擔任祭司ê工作。這mā看出kui個北國以色列人民離開上帝ê道jú來jú遠。

	Koh講,chit段經文mā kā羅波安ê家族留落來簡略記錄。

第13到15節,chit三節ē-sái講是非常重要ê資料,mā thang看出耶羅波安一上任,就想掌握宗教信仰團體,因為伊無想beh照摩西律法ê規定,hō͘利未人繼續帶領祭祀禮儀ê工作,卻是kā in lóng廢除。因為án-ne,全以色列ê祭司kah利未人lóng離開北國以色列,南遷到猶大。同時,in mā喪失原本tī北國tī約書亞時代分配到ê khiā起城市。Koh khah慘ê是,耶羅波安甚至指派家己ê人當祭司,帶領人民去「拜山羊魔神kah家己鑄造ê金牛」,這明明是就是公然侮辱上帝。耶羅波安ê作為,thang看出以色列人民tī信仰上已經墮落真厲害了,並無因為所羅門建造耶路撒冷聖殿而tī信仰上ê態度koh khah堅定。對照列王記上第十二章25到31節,就thang明白為甚麼耶羅波安就是為tio̍h beh阻止北國人民繼續無停地前往南國猶大耶路撒冷去獻祭敬拜上帝,特別鑄造金牛排tī伯特利kah siōng北pêng ê「但」,並且kā北國以色列人民講,hit-ê金牛是帶領in離開埃及ê神,ài in拜金牛偶像當做神明,引chhōa人民棄sak上帝。伊差不多就是重蹈以色列人民祖先tī曠野漂流時代所犯ê重大錯誤(參考出埃及記第三十二章)。

第16到17節,chit兩節說明相對tī北國以色列耶羅波安ê南國猶大羅波安,伊m̄-nā接納利未人kah祭司進入耶路撒冷á是猶大、便雅憫等宗族去協助獻祭敬拜ê工作,tī北國以色列有真chē人民mā lóng跟tòe前往耶路撒冷去獻祭,因為he是in認為敬拜上帝ê中心殿宇,mā因為án-ne,in對羅波安ê向心力就jú強。In擁護羅波安ê政策,hō͘伊執政lóng非常順利,ná親像in老父所羅門時代仝款。

第18到23節,chit段經文thang講簡略地講述羅波安ê家族,伊分別娶大衛ê孫女,以及押沙龍ê cha-bó͘-kiáⁿ,共計妻細姨chē kah七十八個以及八十八個kiáⁿ,伊mā分派ê kiáⁿ分別tī伊統治下ê猶大kah便雅憫區內ê設防城市,為tio̍h是beh防範北國以色列á是其他外族人入侵,伊hō͘家己ê kiáⁿ負起防衛ê責任,而且供給in所需要ê一切。

經文:

歷代志下 12:1-12:16

註釋:

Chit章描述羅波安統治之下ê猶大。Kui個經文看起來,羅波安對上帝並無夠忠實,ê時而遵行上帝ê旨意,ê時而棄sak上帝ê誡命。

第1節,chit節講出人siōng大ê軟弱,就是tī鞏固地位,á是事業有成後,bē記得伊ê能力、財富lóng是tùi上帝來ê賞賜,成功後就藐視á是棄sak了上帝,直到tú-tio̍h困境ê時,chiah會koh一pái想起上帝chiah是性命ê主。羅波安就是一個真典型ê例。因為國王棄sak上帝,人民mā就跟tòe棄sak了上帝。

    第2到4節,chit三節講羅波安治理猶大chiah第五年,就因為棄sak上帝而遇tio̍h上帝ê懲罰。上帝懲罰ê方式ná親像士師記作者所用ê句話,歷代志作者mā是ài用chit種句話──棄sak上帝,形容以色列民族去敬拜偶像神明。上帝對棄sak祂ê子民採取ê方式,mā是仝款,以「棄sak」祂ê子民作回應。所謂上帝「棄sak」,指ê就是無koh kā它保護、帶領,則上帝ê子民就真緊會tú-tio̍h困境。chit-má上帝ê作法是hō͘埃及國王示撒領兵kah附近族群聯合來攻打猶大,而且佔領了真chē邊防城鎮,進逼耶路撒冷。

    第5到6節,先知示瑪雅,伊mā是當年獲上帝ê啟示,去阻止羅波安去攻打分裂伊去ê北國以色列ê先知。Chit pái,伊tī得tio̍h上帝啟示去對羅波安kah伊ê大臣講話,清楚kā in講會tú-tio̍h災難,就是因為棄sak上帝ê結果。結果羅波安kah伊ê大臣lóng承認家己犯罪,得罪上帝。

	第7到8節,上帝koh一pái透過示瑪雅傳出信息,講已經看見羅波安kah伊ê大臣認罪,因為án-ne,上帝只hō͘埃及ê聯軍搜刮財物,m̄-koh bē傷害in ê性命。上帝iáu koh khah繼續觀察猶大人民是m̄是願意順服上帝。

    第9到12節,果然,埃及聯軍雖然攻入了耶路撒冷,而且搜刮了聖殿kah王宮內ê財寶,m̄-koh猶大人民並無受tio̍h甚麼重大傷害。因為án-ne,羅波安tī埃及聯軍退出ê時chūn,伊明白只有順服上帝,謙卑ê認罪,chiah ē-tàng hō͘上帝ê忿怒消失,無koh降災難,mā hō͘猶大有重新整頓ê機會。

    第13到16節,對照第九章29節ê記載,chia koh加出了「示瑪雅史」chit本冊。Á「羅波安kah耶羅波安之間不時有戰事」,chit句話講出分裂後ê兩國統治者,lóng bē記得示瑪雅先知所教導in ê話,m̄-thang phah家己ê同胞。

    羅波安死ê時chūn chiah只有五十八歲而已,伊ê晚年kah in老父所羅門仝款,並無確實地遵行上帝ê旨意,卻是去拜偶像神明。伊kā王位交hō͘ kiáⁿ亞比雅。

經文:

歷代志下 13:1-13:22

註釋:

Chit章記載羅波安ê kiáⁿ亞比雅ê事蹟。伊登基做王ê年代大約是tī主前913到910年。歷代志ê作者用比列王記作者koh khah長ê篇幅紹介亞比雅ê事蹟(參考列王記上十五:1—8),而且認為伊是一個好ê王,chit點kah列王記作者ê看法無仝,後者用「伊犯kah in老父仝款ê罪,無親像伊a祖大衛hit種一心一意忠於上主──伊ê上帝」(參考列王記上十五:3),而tī歷代志chia,作者卻講亞比雅帶領伊ê人民「猶原事奉主──咱ê上帝,無棄sak伊」,kah以色列ê王耶羅波安完全無相仝。

    Ná親像頭前已經敘述過ê,歷代志ê作者kā重點khǹg tī南國,除非北國有特殊ê事件是kah南國猶大有關ê,chiah會記錄落來,而chit章就是tī chit種編撰要件之下記錄落來,為tio̍h是beh表明耶羅波安統治下kah南國猶大tī亞比雅統治下,雖然耶羅波安有八十萬大軍,而南國國勢khah弱,只有北國以色列ê一半──四十萬軍隊,m̄-koh,因為南國亞比雅忠於耶和華上帝,因為án-ne,也ē-tàng phah敗擁有大軍ê北國以色列,甚至消滅了in chē kah五十萬ê精兵。

    另外一方面,歷代志ê作者對tī歷史ê詮釋角度mā kah列王記無仝,作者不提耶羅波安帶北部族人離開猶大統治ê原因,是kah所羅門加重稅tī人民身上ê事有關。顛倒,卻是講耶羅波安背叛所羅門,並且「招集一陣流氓無賴,拗蠻強烈地對敵所羅門ê kiáⁿ羅波安」,這真明顯lóng是出tī南國ê觀點。

    第1到3節,chìn前tī羅波安繼位後chiah第四年,埃及就來進攻,而且攻入了耶路撒冷。對南國猶大造成重創。chit-má,是羅波安ê kiáⁿ亞比雅chiah繼位無久,換北國以色列耶羅波安率領chē kah八十萬大軍來攻打南國猶大,而猶大chiah只有北國以色列軍隊ê一半兵力而已。這真清楚teh表示,兩國若是án-ne開戰落去,南國猶大必定會慘敗。另外一方面,chit種記載mā tī說明,分裂後ê北國以色列,實力確實比南國猶大iáu koh khah強。

	第4到9節,chit段描述南北兩軍對峙,猶大王亞比雅就先對北國以色列統治者耶羅波安kah以色列軍隊講話,這真親像先來一場心理戰。Chit段經文就是亞比雅所講ê第一段話。Tī chit段話裡,伊強調大衛ê kiáⁿ孫,chiah是上帝立約傳承ê對象。意思是teh指耶羅波安根本就m̄是上帝揀選來領導以色列民族ê王。因為án-ne,伊形容耶羅波安是「背叛」所羅門,並且圍tī伊身邊ê,是一陣無賴,拗蠻強烈地對敵所羅門kiáⁿ羅波安。Koh khah嚴重ê,是teh指出耶羅波安帶領人民去拜金牛,koh kā祭司亞倫ê後代kah利未人趕走,只要有錢,就ē-tàng買祭司ê職位來當。

	Tùi chit段經文thang看出亞比雅對耶羅波安kah北國以色列軍人,提出非常嚴重ê警告。

    第10到12節,chit三節真真明顯是相對tī前一段,亞比雅tī chia表明南國猶大擁有耶路撒冷聖殿,chiah是正統ê傳承者,而猶大kiáⁿ孫擔任統治者ê角色。作者用「亞倫ê後代執行祭司ê任務;利未人協助in」chit種句話teh代表正統,強化上帝kan-taⁿ會kah「正統傳承」者同在。這「正統」包括由祭司kah利未人擔綱ê敬拜禮儀(這mā teh暗示:tī耶路撒冷聖殿ê敬拜chiah是對ê)。Koh講,這mā teh表明南國猶大ê人民對上帝忠心,因為這teh表明in嚴守摩西律法ê規定。

    第13到18節,chit段經文thang看出耶羅波安tī軍事上是真有能力ê,知影怎樣對猶大軍隊前後夾攻。M̄-koh猶大軍隊因為有祭司陪伴出兵,知影tī siōng危急ê時chūn,走chhōe上帝ê帶領kah幫助。果然,上帝伸手救助猶大軍隊,雖然in chiah只有四十萬兵力,卻phah敗擁有八十萬大軍ê北國以色列,m̄-nā án-ne,iáu消滅了北國以色列五十萬精兵。這lóng teh表明一個基本信念:真正hō͘軍隊獲勝ê,m̄是軍事武力,卻是上帝ê旨意。

第19到20節,chit pái猶大phah了勝仗,而且佔領了北國幾個重要城市,包括有伯特利、耶沙拿、以弗倫,kah chiah-ê大城附近ê庄頭。北國以色列因為chit pái ê重創,tī耶羅波安統治期間,lóng無法度koh一pái出兵攻打猶大。

第21到22節,亞比雅mā因為chit pái phah敗猶大,國勢漸漸強大起來。伊kah老父羅波安仝款,擁有真chē bó͘ kah細姨kah kiáⁿ。

經文:

歷代志下 14:1-14:15

註釋:

Tùi第十四到十六這三章lóng是記載關係亞比雅ê kiáⁿ亞撒王ê事蹟。亞撒續接作猶大王ê年代,大約是tī主前910到869年,前後長到四十一年。歷代志作者紹介亞撒ê篇幅,mā比起列王記作者所記載ê iáu長(參考列王記上十五:9—24)。作者tī chit三章ê篇幅中,以一個「óa靠上帝,就必得勝;棄sak上帝,一定失敗」chit種主題來提醒所有ê人。作者用四件主要記事來描述亞撒:

一是tī十年ê太平期間,亞撒王極力推動宗教改革,包括廢除偶像神明ê崇拜(第1到8節)。

二是kah古實王謝拉ê戰爭,因為亞撒走chhōe上帝ê幫助而得tio̍h勝利(第9到15節)。

三是伊進行第二pái宗教改革(第十五章1到19節),chit pái改革主要內容除了繼續廢除偶像外,並「修造立tī聖殿庭園裡ê上主ê祭壇」,而且帶領人民koh一pái kah上帝立約,表明beh順服上帝。

四是亞撒王kah伊ê a祖所羅門、阿公羅波安、老父亞比雅等仝款,lóng是tī tú-tio̍h困難ê時無koh走chhōe上帝ê幫忙,m̄是棄sak上帝,去拜偶像神明,就是去走chhōe外國勢力ê協助,bē記得上帝chiah是in ê救主、拯救者,因為án-ne引起上帝ê受氣,無koh看顧伊。Chit-má koh khah嚴重ê,就是當先知哈拿尼去警告亞撒ê時,伊聽了後,m̄是馬上悔改認罪,卻是氣到下令kā先知哈拿尼關了起來(第十六章7到10節),表示拒絕上帝ê話。

    第1到5節,chit段經文thang看出亞撒治理猶大國之初ê十年,確實是一個真bē-bái ê君王。伊m̄-nā「廣行善事,行為正直」,而且是「做上主—伊上帝認為對ê事」,表示伊對上帝非常忠心,掃除偶像、祭壇,並且命令猶大人民一定tio̍h走chhōe祖先ê上帝,服從上帝ê命令kah旨意。

	第6到8節,除了tī宗教信仰上帶領人民對上帝忠心,另外一方面,伊mā積極國防建設,kā每座城lóng強化防禦工程,koh tī軍隊ê裝備上更新,並且訓練軍隊ta̍k個lóng成做英勇ê戰士。

	第9到11節,tī歷代志作者ê筆下,猶大亞撒是一個對上帝忠心ê國王,當伊看見古實(埃及)王帶領一百萬大軍來進攻猶大ê時,伊第一個想tio̍h ê,就是祈求上帝ê幫助,伊深深知影只要有上帝出手,任何大軍lóng會敗潰。Tī第11節ê「上主ah,你ē-tàng幫助弱小ê軍隊,也ē-tàng幫助強大ê軍隊」chit句話,真清楚說明tī上帝眼中,無所講ê「大」á是「小」ê差別,唯一ê差別是甚麼人走chhōe祂,祂就幫助甚麼人。

    第12到15節,上帝果然垂聽亞撒ê祈禱,祂出手打擊古實ê軍隊,hō͘一百萬大軍潰散逃走,而亞撒ê軍隊則一路tui-jiok,in追到基拉耳,這是設tī瑪利沙西南部大約四十公里ê所在,mā是埃及ê境內à。Mā因為án-ne,猶大Tī chit pái ê戰役中,擄獲真chē戰利品而tńg來到耶路撒冷。

經文:

歷代志下 15:1-15:19

註釋:

Chit章經文主要tī說明猶大王亞撒án怎進行宗教改革ê工作。Chit章敘述上帝透過先知亞撒利雅去對亞撒講出上帝ê信息,beh hō͘亞撒知影,只要堅持óa靠上帝,上帝一定會庇護in。雖然mā會tú-tio̍h困境,m̄-koh一定ài會記得,上帝必定會帶領in行出苦難ê陰霾。因為án-ne,亞撒就決定聽從先知亞撒利雅ê信息,積極撒除tī國家境內所有ê偶像神明kah祭壇,照列王記上第十五章12節ê記載,伊hit時chūn ê猶大人民,mā有人tī偶像神明ê廟裡當男娼,伊kā chiah-ê人lóng驅逐離開國境。M̄-nā án-ne,並且iáu真勇敢地kā伊祖母瑪迦太后ê后位mā kā它廢除,只因為為伊造偶像神明。唯一可惜ê,是伊無kā全國所有ê偶像lóng去除掉。M̄-koh已經算是bē-bái ê一位君王à。

    第1到2節,chit兩節講先知亞撒利雅得tio̍h上帝ê啟示,去對亞撒kah猶大、便雅憫兩支族ê人民講出上帝ê信息。Tī chia真清楚講出上帝ê應允,只要猶大人民順服上帝,in就會發覺上帝一直teh帶領 in。

    第3到7節,「以色列已經真久無真神,無祭司ê教導,無律法。」chit句話真清楚講出士師時代ê情景就是án-ne。M̄-koh chit-má ê北國以色列竟然koh kah士師時代仝款,無人拜真正神上帝,連祭司lóng m̄是上帝所揀選ê奴僕,卻是國王家己設立,而且為tio̍h beh拜偶像神明之需。Mā因為chit-ê緣故,上帝hō͘災難chiap-chiap出現tī北國以色列,chit種災難就是動盪不安,除了外患多,而且內亂無停。M̄-koh先知亞撒利雅ài亞撒kah南國人民一定tio̍h堅忍守tiâu對上帝ê忠實。

    第8到9節,亞撒聽完先知亞撒利雅ê信息後,受tio̍h真大ê鼓舞,決定推動宗教改革,m̄-nā去除猶大境內ê偶像神明,mā進行修築聖殿院內ê祭壇,表示潔淨敬拜上帝ê心靈ê意思。因為án-ne,真chē tùi北國以色列ê支族人民,包括有以法蓮、瑪拿西、西緬等支族ê人,lóng紛紛來歸順亞撒ê統治之下,mā親身體驗到上帝同在ê氣力。

	第10到15節,亞撒就呼召chiah-ê tùi北國來歸順ê以色列人民,kah南國猶大人民,大家聚集做伙tī耶路撒冷,用獻祭ê方式重新kah上帝立約,表明beh全心全意敬拜上帝,並且立願若是有人棄sak上帝,就一定tio̍h處死,免得別人因為拜偶像神明而受害。就án-ne,上帝ê應允果然應驗tī猶大國境之內,m̄-nā人民生活快樂,mā無外患出現,因為上帝就是in ê保護者,hō͘ in享受太平。

    第16到19節,chit段經文記載亞撒koh khah進一步kā家己ê祖母瑪迦太后ê官階hō͘廢掉,原因是伊貴為太后,卻帶頭鑄造偶像,這m̄-nā hō͘家己敗壞,mā會連帶ê影響tio̍h人民ê信心。因為án-ne,當亞撒kā瑪迦ê太后后位廢除,mā tī說明若繼續發見伊無停止偶像崇拜,真可能會親像一般人民hit種被處死。而且,亞撒積極kā全國各地所有偶像kah祭壇lóng hō͘摧毀。伊一生對上帝忠實,並kā所有老父beh獻hō͘上帝ê器物lóng khǹg tī聖殿裡,表明真實歸屬tī上帝所有。Án-ne,直到伊治國ê第三十五年,國家都無出現過戰爭。唯一可惜ê是,伊無kā山丘上ê神廟hō͘全部摧毀,chit點真可能就是kah伊ê祖母瑪迦太后有關,hō͘改革ê工作發生困難。

經文:

歷代志下 16:1-16:14

註釋:

Chit章經文mā thang參考列王記上第十五章16到24節。照列王記作者ê寫法是:「猶大ê亞撒王kah以色列ê巴沙王在位期間,雙方不時相戰。」這表示雖然南北已經分開,卻不時為tio̍h政治ê理由互相侵犯,卻m̄是互相扶持、幫助。Tī頭前一章講猶大王亞撒對上帝忠心,知影凡事óa靠上帝ê庇護、帶領,ná親像頭前第十四章記載伊óa靠上帝phah敗古實一百萬大軍。M̄-koh chit章亞撒變了,當北國以色列王巴沙侵犯ê時,伊卻the̍h聖殿ê錢去o͘-se敘利亞王出兵phah以色列。換句話講,亞撒無koh óa靠上帝,卻是óa靠政治力量,chit點真親像伊ê a祖所羅門仝款,晚年ê信仰變質了,是非常可惜ê事。

第1到3節,chia tī記事頂面kah列王記上ê時間有差異,he就是依照列王記上第十六章8節ê記載:「猶大王亞撒二十六年,巴沙ê kiáⁿ以拉tī 得撒坐位做以色列王,共兩年。(全民版)」

chit-má chia講:「猶大王亞撒在位ê第三十六年,以色列王巴沙侵犯猶大。」án-ne tī時間上相差大約有十年時間,目前無法度理解差別ê原因。

	北國以色列想beh孤立猶大,斷絕伊ê外援,án-ne就ē-tàng容易侵犯猶大,壓制猶大成做附庸。因為án-ne,以色列王巴沙就tī拉瑪築壘設防。Á為tio̍h beh解決chit種被包圍ê困境,亞撒bē記得tio̍h chhōe上帝ê幫忙。頂pái伊面臨古實大軍壓境,就是走chhōe上帝幫助,結果得tio̍h全勝。M̄-koh chit pái伊卻是chhōe敘利亞王便‧哈達,而且是用聖殿kah王宮ê金銀當做酬金,請求敘利亞出兵制裁以色列。Chit種kā上帝ê錢lóng作走chhōe外力幫助ê方式,mā是等於teh侮辱上帝仝款。

    第4到6節,果然,敘利亞就出兵phah北國以色列,hō͘會得thang色列王巴沙趕緊撤軍,卻因為án-ne留落來了真chē築壘建材,變成猶大ê意外戰利品。亞撒就kā chiah-ê材料搬運去修築迦巴kah米斯巴這兩座城市加強防衛工程。

	第7到10節,chit段是非常重要ê經文。Tī chit段經文中,上帝差派奴僕先知哈拿尼去見猶大王亞撒,指責伊óa靠敘利亞王,卻m̄知tio̍h óa靠上帝。伊kā亞撒講,上帝看顧對祂忠實ê君王kah人民。先知哈拿尼mā舉出實例,包括古實派出百萬大軍beh侵犯猶大,mā因為上帝出手幫助猶大,就kā百萬大軍phah得潰敗逃走,chit種經驗應該hō͘伊謹記在心。chit-má伊卻bē記得。先知哈拿尼真清楚指出亞撒是一個真笨ê王,既然無願意óa靠全能ê上帝,以後會tiāⁿ-tiāⁿ有戰亂。先知哈拿尼chit種指責,猶大王亞撒非m̄-koh m̄知悔改,反tńg大大受氣,下令先kā先知哈拿尼關起來,同時用koh khah殘酷ê手段虐待人民。

第11到14節,chit段經文講出亞撒心中已經完全無上帝ê信仰觀念,即使伊生重病,mā無想beh走chhōe上帝ê醫,只知影詢問醫生。因為án-ne,tī伊治國四十一年後,往生à。伊ê一生ná親像頭前所講ê,kah所羅門仝款,lóng是晚年tī信仰上變了節,真是可惜。

經文:

歷代志下 17:1-17:19

註釋:

Tùi第十七章到廿一章1節止,chit段經文是記載猶大王約沙法ê事蹟。伊是繼承老父亞撒ê王位,時間大約tī主前872到848年,前後統治猶大有廿五年。作者kā伊kah希西家、約阿施兩個王並列,主要teh歌頌in對上帝ê忠實。特別是tī第十七章9節講約沙法派人行遍猶大各鄉鎮去教導人民認bat上帝ê律法,chit點chiah是伊被作者看重ê要點。值得注意ê是,作者強調教導人民認bat摩西律法是利未人ê工作,mā就是祭司ê職責,就親像上帝差遣先知耶利米beh去完成ê工作仝款(參考耶利米書十一:6—8)。

第十七章講約沙法m̄-nā tī宗教教育上認真推行,而且tī國防工作上mā不怠慢,伊「奮發圖強」,並且tī各城鎮設立國防要塞。單單軍力就高達一百一十六萬之多,大衛時代ê猶大軍力mā不過是五十萬(參考撒母耳記下廿四:9)。

第1到3節,短短ê三節經文,就是用chit句「伊效法in老父早年ê模樣,無拜巴力」來形容約沙法是一個上帝所歡喜ê君王。約沙法為tio̍h防範北國以色列koh一pái侵犯,伊積極tī各重要城市進行防衛工程。

第4到6節,約沙法對上帝忠實,伊不作棄sak上帝ê事,只遵行上帝ê命令,mā因為án-ne,上帝鞏固了約沙法tī猶大國ê統治,hō͘伊kah猶大國漸漸強盛起來,koh khah重要ê,伊繼續掃除國內所有ê偶像神明kah祭壇、神廟等等。

第7到9節,chit段經文真重要,講約沙法為tio̍h beh幫助人民明白上帝ê律法誡命,特別派出使者,尤其是祭司、利未人到全國各地去教導人民認bat上帝ê律法,chit點mā說明一個重要信息:m̄-nā是國王會曉遵守上帝ê命令、誡命,所有人民lóng tio̍h遵守。因為人民若lóng知影遵守,國王就會知影bē-tàng違背上帝ê命令。

第10到13節a句,因為有上帝賜福、看顧,真自然tek,附近各國lóng m̄敢來侵犯猶大,顛倒地,iáu會來進貢,chia講有阿拉伯人送hō͘約沙法「七千七百隻綿羊kah七千七百隻山羊」,這說明約沙法確實成做附近部落眼中ê一個強者。Chiah-ê進貢mā teh表示走chhōe猶大ê庇護。

第13節b句到19節,chit段經文講猶大一個小小國家,就擁有chē kah一百一十六萬大軍,beh養chiah-ni̍h chē ê軍隊,除了需要有充沛ê經濟能力外,mā tī說明猶大國勢ê堅強,已經m̄是北國以色列ē-tàng忽視ê。其實,這lóng tī說明一件事:有上帝帶領,國家就會強盛。相對ê,就會虛弱落來。


經文:

歷代志下 18:1-18:13

註釋:

Chit章主要ê資料來源是列王記上第廿二章,有關約沙法kah以色列王亞哈之間ê關係。作者開始說明約沙法tī siōng強盛ê時chūn,有力量足以對抗北國以色列亞哈ê軍力。Tī頭前記載亞比雅、亞撒ê時代,lóng是軍力比以色列遜色真chē;亞比雅ê時代,猶大ê軍力是四十萬kah以色列八十萬對抗(參考歷代志下十三:3),tī亞撒ê時代,則以五十八萬軍隊對抗擁有一百萬大軍ê古實王(參考十四:8-9)。M̄-koh teh對抗以色列侵犯ê時chūn,卻是去走chhōe敘利亞ê軍力(參考十六:3)協助防禦工作。M̄-koh chit-má約沙法是全心全意地óa靠上帝而hō͘國勢強盛起來,mā因為án-ne,致使猶大雖然是小國,卻ē-tàng kah北國以色列王亞哈同席而座,而且結為姻親。

	Chit段經文是約沙法kah以色列王亞哈之間一段真重要ê互動。亞哈家己御養真chē假先知,滿足家己ê慾望,伊ê行為tú好mā講出北國以色列根本就無歡喜聽從真正上帝先知ê信息。M̄-koh南國猶大約沙法thang m̄是án-ne,伊知影凡事tio̍h問上帝ê旨意,特別是關係出兵攻打敵人ê時,koh khah需要上帝ê帶領kah扶持。因為án-ne,當亞哈beh請伊聯合出兵去攻打敘利亞,好kā祖先ê土地基列ê拉末城搶tńg來,約沙法認為thang,m̄-koh需要先詢問上帝ê旨意。M̄-koh亞哈認為伊ē-tàng chhōe-tio̍h先知,結果hiah-ê lóng是假先知。大家lóng講仝款ê話,並m̄是真實。約沙法一聽就明白,因為án-ne要求去chhōe上帝ê先知,卻m̄是國王御養ê先知。

    第1到4節,chia一開始就講猶大王約沙法kah北國以色列王亞哈有姻親關係,原因是約沙法ê大kiáⁿ約蘭,娶亞哈ê cha-bó͘-kiáⁿ,這表示當時是以色列民族tī王國分裂了後,南北兩國關係siōng好ê時刻。不過,tùi歷代志下第廿二章10到12節ê記事來看,這門親事後來差一點á kā猶大王室hō͘毀à。因為án-ne,這門王室ê姻親關係並無為猶大家族帶來上帝ê賜福。

	約沙法是禮貌上去拜訪以色列王亞哈,因為有姻親關係。因為án-ne,當伊去拜訪亞哈ê時,亞哈ê王室用隆重ê禮儀款待約沙法。M̄-koh chit pái ê宴席並無單純。因為亞哈想beh說服約沙法kah伊同齊去攻打敘利亞所佔領ê基列拉末城。約沙法表示願意,並且表示隨時lóng thang出兵。M̄-koh條件就是beh先問問上帝ê旨意,chit點mā是約沙法tī信仰上kah亞哈差別ê所在。

	第5到8節,亞哈知影約沙法ê要求了後,隨時ài伊御養ê四百名先知出來,問in若是伊beh出兵去攻打拉末城,kám ē-tàng?這四百位亞哈ê御用先知lóng異口同聲地講:「去pah,上帝ē-sái你tio̍h勝。」其實,in講ê lóng是討亞哈歡喜ê話,m̄是真正tùi上帝hia來ê。對上帝忠實而且敬虔ê約沙法一聽就清楚à。因為án-ne,伊對亞哈講beh chhōe上帝ê先知,好求問上帝。這mā表示先知m̄是想講甚麼就講甚麼,卻是需要透過祭祀禮儀來問上帝ê旨意。亞哈一聽約沙法講beh問上帝ê先知,就表示有一位名叫米該雅ê先知,m̄-koh伊講ê話lóng是對亞哈不吉祥,而且lóng是「講凶險ê話」,伊並無歡喜聽。M̄-koh約沙法確認為不應該án-ne講上帝ê先知,而是beh聽從。因為án-ne,亞哈只好派人去請米該雅來王宮。

	第9到11節,chit段經文是teh回應第5節記載ê,四百名亞哈御用ê假先知lóng講出討伊歡喜ê假話,lóng是贊成亞哈出兵去攻打敘利亞。Iáu講上帝會kah伊同在,hō͘伊phah贏。

	第12到13節,chit位受命去chhōe米該雅ê亞哈王之大臣,chhōe-tio̍h米該雅,就警告伊講,所有王ê先知lóng講仝款ê話,表示王亞哈一定會成功phah贏。因為án-ne,ài米該雅mā講仝款ê話。M̄-koh米該雅回應伊講:「我指永生ê上主chiù-chōa,上帝beh我講甚麼,我就講甚麼。」chit句話就成做先知ê定義,mā講出先知ê職責所在。

經文:

歷代志下 18:14-18:34

註釋:

亞哈求問先知米該雅有關出兵攻打拉末城ê事。米該雅就講上帝ê天使故意hō͘亞哈ê御用先知lóng講出欺騙、不誠實ê話。結果chit群御用假先知ê代表,就是基拿拿 ê kiáⁿ西底家真受氣,認為先知米該雅侮辱了伊,phah了先知米該雅一巴掌,而亞哈王則認為米該雅是故意用chit種方式teh挫(chhò)伊ê銳氣,因為án-ne下令kā先知米該雅關tī監獄裡,等伊phah贏tńg來beh審問先知米該雅。結果tú親像先知米該雅所預言,亞哈王出戰to̍h是死tī戰場。

第14到17節,當先知米該雅來到亞哈kah約沙法ê面前,亞哈就問伊是m̄是thang去攻打拉末城。先知米該雅mā故意講和御用先知仝款ê話。M̄-koh亞哈知影一定m̄是án-ne。因為過去先知米該雅講ê信息,lóng是會kah伊ê御用先知大無相仝。Taⁿ講出仝款ê話,倒hō͘伊感覺m̄-tio̍h。因為án-ne,亞哈命令先知米該雅既然奉上帝ê名講話,就該講誠實話。因為án-ne,先知米該雅真清楚講出若是chit pái出兵,必定ē-sái以色列ê軍隊ná親像無顧羊人ê羊群仝款,m̄-nā危險,mā會四散去。亞哈一聽chit種話,就知影先知米該雅koh講對伊不吉利ê話。

第18到21節,chit段經文是先知米該雅用譬喻ê方式,講出天頂開會討論亞哈beh出兵去攻打拉末城ê事。天使決定用假先知ê話來欺騙亞哈ê御用先知,而且上帝表示欺騙亞哈ê話會成功。

第22到24節,當米該雅講chit-ê比喻後,就警告亞哈若是chiâⁿ實出兵,一定會「遭遇災禍」。M̄-koh御用先知ê代表基拿拿 ê kiáⁿ西底家狠(hiông)狠phah了上帝ê先知米該雅一巴掌,認為這是對伊siōng大ê侮辱。西底家會用chiah-ni̍h激動ê方式回應上帝ê先知米該雅,是希望亞哈ē-tàng信任伊。因為若是亞哈聽從先知米該雅ê信息,hit-ê西底家kah所有御用先知ê工作lóng會失去,甚至可能會因為國王而遇tio̍h死刑。因為án-ne,伊m̄-nā phah了先知米該雅,mā質疑地上帝無可能離開家己身上。M̄-koh先知米該雅講上帝ê靈已經無koh kah西底家同在。

第25到27節,亞哈一看見西底家án-ne激烈ê反應,就信任西底家而對先知米該雅感覺憤怒,因為án-ne,下令kā先知米該雅關tī監獄裡,並且虐待伊,等伊phah贏tńg來了後chiah處理伊。M̄-koh先知米該雅表示亞哈無可能koh再tńg來。因為伊會戰死戰場。

第28到29節,就án-ne決定了,南北兩國同時出兵去攻打拉末城。可能因為米該雅ê話,hō͘亞哈感覺心內不安。因為án-ne,伊卸掉國王ê王袍,希望án-ne thang閃過敘利亞軍隊ê注意。M̄-koh卻要求約沙法iáu-koh穿插國王ê王袍,其實,這是真有心機ê想法,認為án-ne,約沙法會成做敘利亞軍隊注目、攻擊ê對象。

第30到34節,果然,亞哈原本存心不良,想beh藉chit-ê機會害死約沙法,當tī戰場ê時,敘利亞軍隊lóng會攻擊對象khǹg tī tio̍h王袍ê約沙法身上,m̄-koh約沙法知影tī危急ê時chūn,喊叫上帝ê幫助。果然,上帝垂聽約沙法ê呼求聲音,出手改變了敘利亞軍隊攻擊ê對象,tùi約沙法身上轉移離開。M̄-koh卻有一位敘利亞小兵隨便射箭,就射中了亞哈身上,而且箭頭tú好落tī盔甲ê連接縫處,亞哈因為án-ne受了重傷,就án-ne死去。Tú好應驗ā先知米該雅ê預言。

經文:

歷代志下 19:1-19:12

註釋:

Chit章主要tī說明兩件事,第一是約沙法因為kah亞哈聯合出兵,tú好表示伊mā支持一再藐視上帝神聖ê君王,chit件事hō͘上帝真受氣。第二是約沙法繼續非常積極進行宗教改革,伊同時任命真chē忠實ê宗教領袖當人民訴訟ê審判官,mā勉勵in一定tio̍h遵守上帝ê規定,以公義審判人民ê案件。

    第1到3節,chit段經文是約沙法kah亞哈去攻打敘利亞ê戰事後,tńg來到了耶路撒冷。先知哈拿尼得tio̍h上帝ê信息去對約沙法講話,kā伊譴責無應該kah亞哈聯合出兵。因為亞哈是「pháiⁿ人」,是「憎恨上主ê人」,約沙法無應該kah chit種君王做伙。因為chit pái ê事件,若m̄是上帝出手救助,約沙法就會死tī戰場上。為tio̍h chit件事,上帝真受氣約沙法,m̄-koh因為約沙法對改革人民ê信仰有貢獻,上帝猶原會繼續引chhōa伊。

    第4到7節,chit段經文講約沙法lóng會定期出巡去看南國人民是m̄是lóng有歸向上帝,伊巡視ê範圍是全國各地lóng去。M̄-nā án-ne,為tio̍h beh徹底執行引chhōa人民歸向上帝,伊tī各地設立審判所,任命審判官員,並且一定會敬畏上帝,beh按照公義審判人民ê案件。

	第8到12節,chit段經文說明約沙法任命利未人、祭司,kah其他領袖作審判官,審理人民ê訴訟案件。Tùi chit段經文thang真明確看出約沙法確實是一個真好ê君王,tī伊設置審判官員之職責siōng大ê特色,就是由政教分別審判無仝ê案件;大祭司審判宗教案件,一般領袖審判民事案件。這tī早期ê社會會án-ne分開,確實是件真無簡單ê事,mā說明約沙法確實是一個聰明有智慧ê君王。伊ài所有審判官員,一定tio̍h心存敬畏上帝ê心,tio̍h忠實地辦事,chiah bē致使得罪上帝。

經文:

歷代志下 20:1-20:19

註釋:

Tùi第二十章到廿一章1節,chit段經文主要tī說明對上帝忠實ê君王,並無表示國家lóng bē tú-tio̍h困境,約沙法算是真忠實ê君王,m̄-koh mā會tú-tio̍h鄰國來侵犯ê大事件,hō͘伊心生驚惶而求告上帝。仝款ê,一個敬虔ê基督徒,並無表示lóng bē tú-tio̍h困難,mā是仝款會tú-tio̍h性命siōng危險ê時刻而需要求告上帝伸出援手。

第二十章記載以東kah亞捫人、摩押人聯合出兵來攻打猶大。約沙法雖然有真chē軍隊,m̄-koh伊iáu-koh會驚惶,而祈禱上帝。結果上帝是垂聽伊ê祈禱,應允會親手打擊chiah-ê想beh攻擊猶大ê聯軍。

    Chit段經文描述約沙法聽tio̍h有摩押、亞捫,以及米烏尼人等聯軍beh來攻打猶大,這hō͘約沙法大大擔憂。因為án-ne,伊m̄-nā下令全國人民一定tio̍h禁食,祈求上帝帶領,koh khah親自帶領人民向上帝大聲祈禱,結果上帝ê靈降臨並傳達上帝ê信息,表示beh kah猶大人民同在,ài in m̄免鬱卒,因為上帝會親自打擊這來侵犯猶大ê聯軍。

	第1到3節,chit段經文開始就講摩押、亞捫,kah米烏尼人來侵犯猶大,而且已經有佔領了一個重要城鎮「洗哈遜‧伊瑪」。約沙法聽tio̍h chit件事,真oh過,就下令全國人民禁食,表示哀傷。

	第4到5節,猶大各地ê人民lóng陸續聚集tī耶路撒冷ê庭園裡,向上帝祈求帶領,用chit種方式表達in確實是需要上帝帶領in。這mā說明約沙法確實是一個對上帝真有信心ê君王。

	第6到9節,這是約沙法帶領全體人民向上帝祈禱ê第一段。Tī chit段祈禱文中,伊先歌頌上帝,是一個大能大力ê神。而且感謝上帝賞賜hō͘ in祖先chit片thang khiā起ê土地。而且祖先為tio̍h beh感謝上帝,iáu特別建造聖殿做敬拜上帝ê路用。chit-má,大家lóng聚集tī聖殿前,向上帝祈求,懇求上帝垂聽in祈禱ê聲音。

	第10到12節,這是第二段祈禱文。約沙法特別提起祖先經過摩押人、亞捫人,以及以東人ê所在,都無入侵in土地。M̄-koh chit-má in卻來侵犯猶大人民kah土地。伊向上帝表明聯軍勢力龐大,猶大人民無法度抵擋in,因為án-ne,只有ē-tàng仰望上帝ê帶領kah保守。

    第13到14節,chia特別強調為tio̍h國家teh beh面臨被滅亡ê危機,猶大所有ê cha-po͘人chhōa bó͘-kiáⁿ地來到敬拜上帝ê聖殿頭前,向上帝祈禱。就tī chit時chūn,上帝ê靈忽然降臨在一位利未人雅哈悉ê身上。伊就因為án-ne傳出上帝ê信息hō͘眾人知影。

	第15到17節,chit三節就是上帝ê靈透過雅哈悉傳出信息ê內容,表示ài猶大人民m̄免驚惶,因為戰爭ê勝敗,lóng是操tī上帝ê手中。上帝beh猶大ê軍隊m̄免攻擊á是tńg來擊,只要守tiâu陣腳、khiā穩就ē-tàng。上帝一定會kah in同在,會hō͘ in phah贏。

    第18到19節,約沙法kah猶大人民聽tio̍h雅哈悉傳出上帝chit種信息,lóng坦覆 (thán-phak)tī土腳感謝上帝,而且有利未支族ê哥轄kah可拉族人khiā起來大聲歌頌上帝。

經文:

歷代志下 20:20-21:1

註釋:

Chit段經文描寫約沙法照雅哈悉傳出ê信息,用歡喜ê方式統領軍隊前往戰場提哥亞ê曠野去。果然上帝是親手為猶大人民打擊敵人。同時,Tī chit段經文中mā描寫約沙法治理時代ê結束。

    第20到21節,當猶大軍隊準備ài出發去迎擊敵軍ê時chūn,約沙法koh一pái提醒猶大ê軍隊,一定會信靠上帝,án-ne就會phah贏。另外一方面,約沙法mā命令聖殿ê歌手穿特別節期ê衫褲,行tī軍隊面前,一面行,一面吟詩歌頌上帝ê偉大。這真無親像軍隊beh出征ê樣式,m̄-koh約沙法卻是用chit種teh表達一個重要ê信息:這m̄是in ê戰爭,卻是上帝親自beh出手相戰。Á世界上無任何力量ē-tàng阻擋上帝、對抗上帝。

	第22到24節,上帝果然親自出手打擊摩押、亞捫,kah以東ê聯軍,上帝先用摩押kah亞捫ê軍隊kā以東ê軍隊消滅,了後koh再反tńg來彼此殘殺。因為án-ne,當猶大ê軍隊來到戰場ê時,只看見到處lóng是屍體。

Chit pái ê戰爭ná親像約書亞帶祭司扛tio̍h約櫃,命令pûn號筒ê祭司吹tio̍h號角,然後扛tio̍h約櫃繞tio̍h耶利哥城,結果就hō͘ hit-ê城牆倒塌了(參考約書亞記第六章),koh像基甸率領三百人攻擊米甸人仝款,上帝hō͘米甸人彼此攻擊、自相殘殺,基甸帶領去ê人m̄免出力就戰勝了(參考士師記第七章)。

	第25到30節,chit段經文真清楚講tio̍h chit pái戰役,是上帝親自替猶大王約沙法kah伊ê人民相戰。只要有上帝出手打擊,阻擋ê氣力一定會瓦解殆盡。摩押、亞捫,以及以東人ê軍隊潰敗逃逸,留落來一大堆戰利品隨在約沙法kah伊ê軍隊奪取,結果是chē到開了三工時間iáu是the̍h不完,可見chit pái聯軍ê數量之大,莫怪猶大王約沙法kah伊ê人民lóng驚惶不安而走chhōe上帝ê庇護、帶領。約沙法就án-ne帶領軍隊凱旋歸來,in是一路上唱歌跳舞tńg來到耶路撒冷聖殿,獻上所得tio̍h ê戰利品外,是一直歌頌上帝奇異ê恩典。Mā因為chit pái ê戰爭勝利,hō͘所有附近族群就此m̄敢koh來侵犯,chiah-ê外族人lóng非常驚惶,因為知影上帝親手打擊對手。因為án-ne,tī約沙法統治之下,真正達tio̍h國泰民安。

	第31到34節,約沙法án-ne共計統治二十五年,而伊是三十五歲繼位ê,因為án-ne,伊總共活了六十歲。伊tī執政期間,lóng是kah老父亞撒仝款,不偏不倚地做上帝看做對ê事,唯一ê缺陷,是無kā偶像神明崇拜hō͘完全割除殆盡。

    第35節到第二十一章1節,chit段經文koh一pái講約沙法重蹈覆轍。因為伊tī次kah北國以色列亞哈kiáⁿ亞哈謝來往。M̄-koh亞哈謝是kah in老父仝款,lóng是棄sak上帝,帶領人民拜偶像。約沙法kah亞哈謝結盟,並同齊組成一支船隊,結果被以利以謝提出警告,表示上帝beh摧毀伊ê船隊。果然事實就án-ne如chit位以利以謝所警告ê,chit支船隊並m̄是上帝所ài看見ê。因為án-ne,雖然有組成,卻無出航過。約沙法往生後,伊ê kiáⁿ約蘭繼承王位。

	Koh講,chia提起有一本taⁿ已經無法度chhōe獲ê「哈拿尼ê kiáⁿ耶戶史」。

經文:

歷代志下 21:2-21:11

註釋:

Chit章記載約沙法ê大kiáⁿ約蘭繼承王位統治猶大ê事蹟。伊做王ê時間是tī主前848到841年,前後共計八年。可惜ê是,伊並無照老父約沙法留落來hō͘伊ê好模樣,謹守上帝ê誡命、規章,反tńg是去跟tòe上帝siōng無歡喜ê亞哈王之pháiⁿ模樣,結果hō͘ kui個有上帝看顧ê猶大王國,tùi án-ne開始衰敗。雖然有上帝ê先知去勸勉伊,m̄-koh伊猶原無願意聽從。雖然用重病打擊伊,伊卻iáu-koh m̄知悔改。真可惜。

	因為約沙法往生,伊共有七個kiáⁿ,由大kiáⁿ約蘭繼承王位。M̄-koh約蘭並無親像in老父約沙法hit種敬畏上帝,反tńg是棄sak上帝,去拜偶像神明。上帝因為有應允大衛王,beh hō͘伊ê後代kiáⁿ孫繼承王位,這tú好表明上帝是信實ê。M̄-koh上帝hō͘以東、立拿城等,tī約蘭統治ê時期,脫離猶大ê統治獨立伊去。

	第2到4節,約沙法因為對上帝忠實,因為án-ne得tio̍h上帝特別ê厚愛,賞賜hō͘伊真chē財寶。約沙法kā chiah-ê財寶分hō͘伊ê這七個gín-á,並且派in鎮守設防城。這是為tio̍h beh防範外族人入侵ê國防政策,m̄-koh無想tio̍h約蘭生驚伊ê兄弟會奪取伊ê王位,竟然kā伊ê六個小弟全部lóng刣死à。M̄-nā án-ne,mā同時殺害真chē以色列ê官員。結果,當非利士人kah阿拉伯人入侵ê時,伊就頓失了其他領袖協助防衛工作,致使約蘭厝裡ê kiáⁿ、宮裡ê妃嬪lóng受掠伊去(第16到17節)。

    第5到7節,chit段經文thang看出約蘭ê bó͘,mā就是亞哈ê cha-bó͘-kiáⁿ,對約蘭有真正影響,hō͘伊tùi亞哈學習了真chē上帝看做邪惡ê行為,這mā是上帝非常無歡喜約沙法kah亞哈結為姻親ê關係ê原因。M̄-koh上帝並無因為án-ne hō͘猶大王國改朝換代,因為上帝持守kah大衛所立ê約,就是beh hō͘伊ê後代永遠掌權。

	第8到12節,chit段經文真重要,說明約蘭因為不聽從上帝ê旨意,上帝雖然無hō͘外族人來侵犯,致使國家滅亡。M̄-koh上帝hō͘原本tī in老父親自治理之下ê以東,原本是屬tī猶大國ê附庸(參考撒母耳記下八:13—14),taⁿ上帝是以東人宣告獨立,當做懲罰猶大王約蘭。雖然約蘭bat想beh攔阻以東人叛離,準備出兵懲罰以東人,m̄-koh上帝伸手幫助以東人,hō͘ in thang tī約蘭軍隊ê包圍下,會得thang逃脫獨立而去。另外一個獨立伊去ê是立拿城。上帝用chit種方式當做懲罰約蘭背叛上帝ê方式。

經文:

歷代志下 21:12-21:20

註釋:

Chit段經文說明上帝怎樣懲罰約蘭,除了派先知去指責伊,mā hō͘先知所講ê話lóng一一實chit-má約蘭ê身上。因為伊ê背叛,上帝beh kā伊所有ê一切lóng收tńg去。

    第12到15節,chit段經文是先知以利亞寫phoe hō͘約蘭ê信。這信主要teh表示約蘭竟然背叛上帝,而且因為伊是國王,竟然án-ne棄sak上帝,因此致使猶大人民mā tòe伊去拜偶像神明。另外,先知以利亞mā tī phoe中mā kā伊譴責殺害家己ê六位兄弟。Chit件事hō͘上帝非常憤怒,決定beh摧毀伊擁有ê一切,包括伊ê kiáⁿ、妃嬪。而且伊iáu hō͘伊患有嚴重ê腸病。

	第16到17節,chit兩節經文說明先知以利亞寫hō͘約蘭ê信ê內容是相符ê。He就是上帝hō͘非利士人kah阿拉伯人來侵犯猶大,並且kā約蘭ê妃嬪、kiáⁿ lóng掠去,只chhun伊siōng小ê kiáⁿ亞哈謝。其實,ná親像頭前所講述過ê,伊kā老父約沙法派去坐陣指揮設防城ê六個小弟lóng刣死了,致使chiah-ê城鎮失去指揮官,而無人領導邊防城鎮,taⁿ lóng因外族人入侵而失守,連帶ê,約蘭擁有ê財富,特別是家己ê kiáⁿ只chhun一個kiáⁿ而已。

	第18到19節,chit兩節mā是到處lóng說明先知以利亞所傳達tùi上帝來ê信息,lóng已經開始漸漸完成。Chit兩節thang對照第16節先知以利亞所講ê信息。約蘭因為上帝ê懲罰,結果伊「患tio̍h一種嚴重ê腸病」,而且時間長到兩年,hō͘伊ê病jú來jú嚴重,最後是病到à脫了腸,結果是痛苦而終。M̄-nā án-ne,伊ê部屬,並無任何人為伊ê死表示哀悼。

	第20節,約蘭是三十二歲ê時繼承老父ê王位,然後只統治了八年,四十歲就往生à。仝款ê,chit節koh一pái強調伊往生ê時,無人為伊艱苦心,原因是猶大國tī伊ê治理之下快速衰退。

經文:

歷代志下 22:1-22:12

註釋:

Chit章記載約蘭ê siōng小kiáⁿ亞哈謝ê事蹟。伊當猶大ê王只有一年,而且客死他鄉撒馬利亞,若m̄是因為伊阿公約沙法ê緣故,恐驚伊kā連死都無葬身ê所在(第9節)。其實,若是詳細閱讀chit章,就會發見chit章凸顯北國以色列亞哈王朝對南國約蘭kah 伊ê家室ê影響,chit點tùi第3到4節thang看出來。特別是伊ê母親亞伊利雅是亞哈ê cha-bó͘-kiáⁿ,手段真殘忍,thang tùi第10到12節看會出來。

第1節,chit節thang tùi第廿一章17節ê記事看出來。當時hông掠去ê約蘭王室所有gín-á lóng被刣死,只chhun siōng小ê kiáⁿ亞哈謝。因為約蘭mā往生,因為án-ne,耶路撒冷ê居民就立亞哈謝繼任為王。

第2到3節,chia講當時亞哈謝做王ê時chiah只有「二十二歲」,m̄-koh《希伯來文》聖經寫tio̍h「四十二歲」。無論伊幾歲,chia真清楚講伊只做王一年而已。Á tī伊做王chit年中,lóng是伊ê母親亞伊利雅teh替伊出主意,而亞伊利雅是北國亞哈ê cha-bó͘-kiáⁿ,而伊教導kiáⁿ就是學習外公ê pháiⁿ模樣,棄sak上帝,去拜偶像。特別是採用亞哈王室ê人當顧問,這hō͘亞哈謝墮落得koh khah厲害。

第4到6節,chit三節講亞哈謝聽從亞哈ê顧問之建議,kah北國以色列聯合出兵去攻打敘利亞,為tio̍h beh奪回基列ê拉末。頂pái mā是南北兩國聯合出兵,結果亞哈王重傷死去,chit pái換伊ê kiáⁿ約何蘭受傷。照列王記下第九章ê記載,就tī伊養傷ê中間,耶戶叛變kā伊刣死,結束loh北國亞哈ê王朝。M̄-koh mā同時刣死了去探病ê亞哈謝。雖然是意外之災,m̄-koh其中有上帝ê旨意。

第7到9節,亞哈謝去探望受傷ê約何蘭ê時遇害。歷代志作者認為這是上帝ê旨意,安排耶戶執行chit項懲罰悖逆ê君王。而且同時被耶戶殺害ê,iáu包括伊ê姪á kah猶大ê眾領袖。

第10到12節,chit段經文ē-sái講是舊約聖經中siōng特別ê記事,亞哈謝ê母親亞伊利雅家己當猶大王執政,這ē-sái講是猶大歷史上空前絕後ê一段歷史記事,說明猶大有過一位女王,就是亞伊利雅。

亞哈謝ê母親亞伊利雅無照規定hō͘亞哈謝ê kiáⁿ繼承王位,而自任為王統治猶大。而且伊為tio̍h beh稱任王,iáu殘酷ê處死猶大王室ê全部家族,表示m̄ hō͘猶大ê家族繼承王位。Iáu好,tī亞哈謝ê同父異母小妹中有一為名叫「約示芭」ê,伊嫁hō͘大祭司耶何耶大,伊偷偷á kā亞哈謝ê一個kiáⁿ約阿施救出來,並且kā伊kah伊ê奶媽藏tī聖殿裡ê一間寢室中。Hit時約阿施iáu是幼年幼兒,一直被藏了六年之久,無被亞伊利雅發見,chiah有保存性命。這mā應驗ā上帝應允beh hō͘猶大ê家族,mā是大衛ê kiáⁿ孫繼續統治猶大國,hō͘亞哈謝ê kiáⁿ tī宮廷清算中會得thang存活,mā說明即使tī siōng危險、軟弱ê世代中,大衛王朝mā bē消失,因為有上帝ê應允。

經文:

歷代志下 23:1-23:15

註釋:

第廿三到廿四chit兩章雖講猶大王約阿施ê事蹟,其實主要是teh紹介祭司耶何耶大án怎輔佐約阿施,以及進行宗教改革ê成果。Chit兩章thang分做三個段落來看,一是耶何耶大膏立約阿施登基做王(第廿三章),大約是tī主前835到796年。二是耶何耶大kah約阿施合作施政、進行宗教改革ê時期(第廿四章1到16節)。三是約阿施家己施政ê時期(第廿四章17到27節)。

第廿三章對照列王記下第十一章來看,就ē-tàng發見siōng大ê無仝是:列王記ê作者並無說明聖殿警衛lóng是出tī「祭司kah利未人」,m̄-koh tī歷代志則認為這是siōng重要ê事,mā tùi chia談及宗教改革運動立足點,就是先潔淨聖殿ê規矩,並且tùi chia強化祭司kah利未人所扮演ê角色。

Chit段經文主要是說明大祭司耶何耶大án怎幫助約阿施繼承猶大ê王位,並且設法kā竄位ê王太后亞伊利雅除掉。Hō͘猶大國ê統治系統koh一pái tńg來復由猶大家族執政。

第1到2節,前章第12節講耶何耶大將亞哈謝ê一個稚兒約阿施藏kah伊ê奶媽藏tī聖殿裡長到六年時間。chit-má「到à第七年」,大祭司耶何耶大就串連五個猶大長官,行遍猶大各城鎮,召集了所有ê利未人kah各宗族代表到耶路撒冷來聚集。

第3到7節,chit段經文是大祭司耶何耶大將約阿施公開紹介hō͘所有chiah-ê猶大國各宗族ê領袖,以及利未人。Ài in利用聖殿來保護約阿施,而聖殿就由祭司kah利未人kā關,除了chit兩種人,lóng m̄准任何人進入,而且下令tio̍h利未人帶防衛武器kā守。想beh闖入聖殿者一律格刣勿論。大祭司耶何耶大chit種態度已經真清楚,表明就是準備ài反叛竄位ê亞伊利雅女王。這mā說明祭司參與政變ê角色,mā hō͘「政教」關係顯得koh khah親密。不過Tī chit段政變ê過程中,mā重視了潔淨聖殿ê重要性,因為有潔淨聖殿ê舉動,表示有進行宗教改革ê意思。

第8到11節,chit段經文真清楚講出參與維護聖殿安全ê,m̄-nā是祭司、利未人而已,iáu包括民眾mā在內,這mā說明大祭司耶何耶大所扮演ê角色,hō͘猶大民眾lóng會順服。就tī民眾kah祭司、利未人嚴守聖殿ê時,大祭司耶何耶大公開宣佈並kā王冠戴tī chit位尚為幼年ê約阿施頭殼頂,chit時,民眾大聲hoah「願王萬歲」,就án-ne,約阿施正式繼任為猶大王。

第12到13節,tòa tī王宮裡ê亞伊利雅一聽tio̍h耶路撒冷傳出án-ne大ê歡呼聲,趕緊走到群眾聚集ê聖殿口一看,chiah發見原來是tī大祭司耶何耶大ê帶領kah主持下,膏立約阿施為王。Chit時chūn ê亞伊利雅女王知影chit時mā是伊失去所有權勢ê時刻,伊悲痛地拆裂衫褲來表示極大ê哀痛,並且大聲hoah講「造反了」。M̄-koh伊bē記得當年伊是殘忍ê殺害kui個猶大家族而自任為王。

第14到15節,耶何耶大發見亞伊利雅,下令kā伊掠,並且帶tńg來王宮kā伊處死。

經文:

歷代志下 23:16-23:21

註釋:

短短幾節經文,講述大祭司耶何耶大án怎帶領猶大人民kah新ê王約阿施立約,並且開始推動潔淨宗教信仰ê工作。

第16節,chit節說明kui個改革運動中siōng重要ê一件事,就是kah上帝立約。耶何耶大siōng大ê貢獻就是親像約書亞仝款,帶領國王約阿施(當時伊iáu軟chiáⁿ)kah人民kah上帝立約,表明in願意做上帝ê子民,忠實tī上帝ê話。

第17到19節,這是大祭司耶何耶大大力推動改革工作,m̄-nā kā所有巴力神廟、祭壇、偶像lóng拆毀,mā kā巴力ê祭司馬坦處死。然後kā大衛王所定落來ê敬拜禮儀規章重新the̍h出來使用。Koh khah重要ê,就是派人嚴守聖殿ê潔淨。

第20到21節,續落來就是由大祭司耶何耶大用隆重而且正式ê方式,kā所有猶大官員、貴族,以及民間領袖lóng帶到王宮,表示擁護約阿施,hō͘伊正式登基。Á chit時chūn,約阿施chiah只有七歲,thang瞭解大祭司耶何耶大就是輔佐伊ê大臣。

經文:

歷代志下 24:1-24:14

註釋:

Chit章講tio̍h約阿施ê事蹟。主要thang分做兩個段落,就是tī大祭司耶何耶大活teh ê日子,約阿施lóng照耶何耶大ê輔佐施政,hō͘猶大國人民lóng對上帝忠實,因為án-ne全國人民享受上帝賜福ê安寧kah繁榮。M̄-koh當耶何耶大往生後,約阿施會失去執政ê重要支持力,反tńg聽從身邊一kóa領袖ê餿主意,棄sak上帝,去拜偶像,kā過去進行宗教改革ê事lóng hō͘荒廢了,m̄-nā án-ne,koh kā保護伊、膏立伊、輔佐伊ê耶何耶大kiáⁿ祭司撒迦利亞刣死,只因為為伊向伊進言,ài伊放棄拜偶像。因為án-ne,上帝無koh庇護猶大,就tī敘利亞進攻耶路撒冷ê時,約阿施因受重傷而被兩位軍官殺害,結束loh伊ê統治。

Chit段經文主要記載約阿施tī大祭司耶何耶大ê輔佐下,積極推動整修聖殿工程。會整修聖殿,mā teh表示對耶和華上帝信仰ê忠實。Chit段記事mā thang參考列王記下第十二章1到16節。

第1到3節,chia講當祭司耶何耶大iáu在世ê時chūn,因為有伊輔佐國政,所以約阿施「做上帝認為對ê事」。這mā說明一個君王若有好ê輔佐者,á是忠心ê智囊團協助,伊治理ê國政必定會興旺、穩定。古往今來lóng是án-ne。M̄-koh chit句「tī耶何耶大活teh ê年日」mā teh暗示,大祭司耶何耶大可能是因為權限過大,控制了約阿施王ê一舉一動,甚至連約阿施選王后lóng是由伊決定,這可能是tī耶何耶大往生後,約阿施便反其道而行ê原因。

第4到7節,chit段經文對照列王記下第十二章1到16節經文來看,就會koh khah清楚為甚麼利未人kah祭司無ná親像約阿施下令整修聖殿ê原因。Chia講約阿施「to̍h是位無久,就決定整修聖殿」,在列王紀下第十二章6節講chit件事拖延到伊「在位ê第二十三年,眾祭司iáu未整修聖殿」,原因是約阿施ài in用聖殿奉獻箱裡ê錢the̍h出來整修。祭司kah利未人不服從chit項命令,就用怠工ê方式抵制。就án-ne伊下令tio̍h大祭司耶何耶大去執行chit項整修聖殿ê命令,並且ài in去徵收「稅款」,講這是「摩西為tio̍h維持上主ê聖幕而ài人民付出ê」,這是記載tī出埃及記第三十章11到16節。這是後來所講ê「聖殿稅」。第7節說明約阿施beh整修聖殿ê原因,是因為亞伊利雅執政ê時期,kā聖殿損毀à。

第8到11節,chit段經文講約阿施命令利未人製作奉獻箱khǹg tī聖殿門口,只要到聖殿去敬拜ê人lóng thang kā當年摩西規定ê「聖殿稅」投入內面。In真緊籌到一筆龐大ê經費。

第12到14節a句,in就kā chit筆聖殿稅用來支付整修聖殿ê工資、材料費用。真緊,就kā聖殿恢復到kah當初所羅門建造聖殿ê時仝款「堅固」。M̄-nā án-ne,徵收tio̍h ê這筆稅款扣除整修費用了後,iáu有chhun落來thang用來製作「碗碟kah其他器物,做聖殿禮拜kah獻祭ê路用」。

經文:

歷代志下 24:15-24:27

註釋:

Chit段經文說明tī大祭司耶何耶大活teh ê時代,猶大人民lóng遵從伊ê教導,m̄-koh伊往生後,kui個國家kah人民就變了樣,以前拜偶像ê惡質ê行為koh重現,甚至連約阿施mā bē記得對伊照顧、扶持有恩ê耶何耶大,kā伊kiáⁿ撒迦利亞ê勸言當做侮辱,而殺害伊,而且殺害ê地點竟然是tī聖殿ê庭園裡。

Chit段mā ē-sái講是歷代志作者siōng想beh說明ê一個信息:背叛上帝ê旨意ê君王,siōng常做ê事,就是kā上帝忠實ê奴僕刣死。因為in ê存在就是君王惡行惡狀ê證據。Á上帝對tī殺害祂忠實奴僕ê君王kah人民,絕對bē袖手旁觀。上帝一定會懲罰,而且懲罰一定是嚴厲ê。

第14節b句到16節,耶何耶大真重視信仰生活,因為án-ne,tī伊活teh ê日子裡,猶大人民對敬拜ê事非常重視。當伊往生ê時,猶大人民為tio̍h記念伊,特別是tī宗教信仰上ê堅持,特別kā伊埋葬tī「大衛城王室ê墳墓內」,表示伊ná親像王族ê人仝款有地位、份量。伊ē-sái講是以色列民族建國以來siōng受tio̍h禮遇ê一位大祭司。

第17到18節,chia無指明chiah-ê猶大ê領袖是甚麼人,m̄-koh卻thang看出tī大祭司耶何耶大往生後,猶大tùi國王約阿施開始,tī信仰上墮落ê速度非常緊。有可能是因為大祭司耶何耶大是用非常強猛ê手段執行宗教改革,m̄-koh無改變人累積tī心中ê偶像崇拜思維。

第19到20節,chia無說明上帝差派toh位先知去警告約阿施kah猶大人民,只有講in m̄聽。因為án-ne,上帝ê靈感動耶何耶大ê kiáⁿ撒迦利亞,ài伊去對猶大人民講警告ê話,講in既然棄sak上帝,上帝必定會棄sak in。這是真嚴重ê警語,因為上帝若棄sak猶大,in必定會遭遇災難。

第21到22節,因撒迦利亞ê話語hō͘猶大領袖kah國王約阿施無法度忍受,因為án-ne,國王約阿施參與陷害撒迦利亞,並下令tī聖殿ê庭園裡kā伊用石頭phah死。作者tī chia特別強調約阿施已經bē記得大祭司一間對伊ê幫助kah對猶大ê貢獻。M̄-koh撒迦利亞tī臨終chìn前大聲hoah:「願上主看tio̍h你所做ê,懲罰你!」

第23到27節,上帝ê懲罰非常緊,就tī in殺害撒迦利亞ê仝一個年秋天,敘利亞ê軍隊就來攻打耶路撒冷,m̄-nā kā所有猶大領袖殺害,mā掠奪了真chē戰利品。Chia特別強調敘利亞會得勝並m̄是因為有強大ê軍隊,猶大ê軍事武力比in koh khah強大,m̄-koh上帝幫助敘利亞,用它來懲罰猶大。這mā說明聖經一貫ê立場:軍隊無tī裝備ê武器,á是人數chē少,而tī上帝幫助敬畏祂ê人(參考詩篇三十三:16—18)。

第24節說明歷代志作者ê觀點:有上帝賜福看顧,國家就無tī國防力量強弱,兵馬無tī chē少,當猶大國tī約沙法王ê時代,bat有亞捫人、摩押人等聯軍逼近侵犯,m̄-koh in卻無耗費任何兵力便得勝,因為上帝已經kā in ê敵人phah得落花流水。Tī亞撒ê時代,伊ē-tàng tī只有古實軍隊ê一半力量,phah潰in,chiah-ê lóng tī說明in óa靠上帝ê氣力,就m̄免驚惶敵人來犯。顛倒,如果棄sak上帝,即使有強大ê軍事國防力量,mā是枉然。Chit節講攻打猶大kah耶路撒冷ê敘利亞軍隊,只不過是「一小隊」ê兵力,「m̄-koh上主hō͘ in擊敗比in強大ê猶大軍隊,因為人民棄sak了上主──in祖先ê上帝。上主用這方法懲罰約阿施王。」約阿施既然會殺害上帝忠實奴僕撒迦利亞,上帝ê回應是hō͘伊tī chit pái戰役中受tio̍h重傷。M̄-nā án-ne,伊手下ê兩名軍官,mā就是第26節所提起ê「撒拔」kah「約薩拔」,in利用軍隊teh撤退ê時,kā伊謀刣,替撒迦利亞報仇,這表示撒迦利亞被殺害ê事,tī猶大軍隊中有人不滿。約阿施死後雖然葬tī大衛城,m̄-koh並無hō͘伊埋葬tī王室ê墳墓內。

經文:

歷代志下 25:1-25:16

註釋:

Chit章是記載有關約阿施ê kiáⁿ亞瑪謝繼承王位了後所做ê事蹟。伊在位期間是主前796到767年,前後共計29年。

Chit段經文記載約阿施ê kiáⁿ亞瑪謝繼承王位了後,整頓軍隊ê事。伊知影求問上帝ê奴僕,m̄-koh卻mā犯信仰上嚴重錯誤,就是拜偶像。伊是一面敬拜上帝,一面拜偶像,這thang看出當時以色列人tī信仰上ê混亂。

第1到4節,chit段經文先簡介亞瑪謝作猶大ê王。真可惜ê是伊做「上主認為對ê事,m̄-koh m̄是全心」,這表示伊tī信仰上對上帝並m̄是真忠實,chit點tī伊後來帶領以色列人民tī戰贏以東了後,卻kā以東人ê神明the̍h來當做神明敬拜chit件事看會出來(第14節)。伊無bē記得hiah-ê殺害in老父ê臣僕。因為án-ne,當伊鞏固了王位了後,就開始替老父報仇,不過伊知影遵守摩西律法ê規定,無kā仇恨擴大到下一代(參考申命記廿四:16)。

第5到6節,亞瑪謝mā注重整頓國防軍備,總共精選三十萬人成做精兵,同時iáu用三千四百公斤銀á雇用以色列ê十萬名軍隊。Án-ne,共計有常備軍共計四十萬人,這是真大ê軍容隊伍。

第7到10節,當伊雇用以色列軍人ê時,有上帝ê奴僕去見伊,kā伊講m̄-thang雇用以色列軍隊。伊提醒亞瑪謝,真正幫助phah贏ê,是上帝。亞瑪謝聽tio̍h了後,表示錢已經付出à。M̄-koh上帝ê奴僕建議伊m̄免索取tńg來,上帝會補償伊ê損失。伊聽從上帝奴僕ê建議,就kā以色列ê軍隊打發tńg去,結果chiah-ê軍隊非常受氣。後來mā採取報復行動(第13節)。

第11到13節,tī第廿一章記載猶大王約蘭mā就是a祖時代,以東背叛猶大獨立伊去。了後,猶大國一直積弱不振。因為án-ne,亞瑪謝kah-ná有意思beh重建猶大國,希望ē-tàng恢復去過去大衛王朝時代輝煌ê光景。因為án-ne,伊整軍三十萬。然後出兵攻打以東,確實kā以東phah得落花流水,而且手段mā非常殘暴,kā生擒ê一萬以東人活活tùi坑khàm上推落去死亡。M̄-koh亞瑪謝可能無想tio̍h,就tī伊攻打以東ê時,hō͘伊遣tńg去ê hiah-ê北國以色列十萬傭兵,卻去攻打屬tī猶大佔領ê城鎮,而且刣死三千人,iáu搶去真chē財物。

第14到16節,亞瑪謝真正ê問題就Tī chit段經文中顯露出來。Chit段經文mā回應了第2節所講ê,伊做「上主認為對ê事,m̄-koh m̄是全心」。當伊phah敗以東了後,卻tùi以東人hia kā in ê偶像mā帶tńg來供奉。Chit件事惹起上帝極大ê憤怒,而且派先知去見亞瑪謝,警告伊所犯ê chit項錯誤,m̄-koh亞瑪謝卻嚴詞tńg來拒,講伊無聘請先知當顧問。意思真清楚,亞瑪謝表示chit位上帝ê先知多嘴、管siuⁿ chē。而且iáu警告伊,若koh-khah chē講,會遇tio̍h刣身之禍。M̄-koh chit位先知無驚惶,因為伊一定tio̍h忠實地傳達上帝ê信息,伊kā亞瑪謝講,上帝決定beh消滅伊,因為伊m̄聽上帝奴僕傳達ê信息。

經文:

歷代志下 25:17-25:28

註釋:

Chit段經文記載猶大王亞瑪謝決定beh趁他國勢漸漸強壯起來ê時,對北國以色列採取軍事行動,chit件事真可能kah第13節所發生ê事件有關。M̄-koh chit pái ê軍事行動是失敗了,伊iáu被北國以色列王約華施所俘擄。這說明一個重要原因:是上帝teh決定勝負(第8節),m̄是軍事裝備á是兵丁ê武力chē少。

第17到19節,當猶大王亞瑪謝向北國以色列王約華施挑釁ê時,約華施用侮辱ê話對亞瑪謝派去ê特使講,ài伊別驕傲,siōng好m̄-thang出來,若無,一定會親像tī樹林內ê刺phè仝款,野獸用腳一下就踩扁à。表示北國以色列並無驚南國猶大ê意思,m̄-nā án-ne,而且iáu ē-tàng真輕易就kā南國猶大phah倒。

第20到24節,亞瑪謝聽真受氣,果然出兵去攻打北國以色列,結果上帝不幫助伊,而幫助北國以色列,hō͘猶大ê軍隊失敗à。歷代志作者講,這是上帝用chit種方式來懲罰亞瑪謝,因為伊棄sak上帝,供奉以東人ê偶像神明。亞瑪謝被以色列俘擄,m̄-nā án-ne,連聖殿kah王宮ê貴重物件、財寶lóng被以色列帶走。

第25到28節,ná親像in老父約阿施仝款,亞瑪謝mā是hō͘仇敵殺害ê,並m̄是死tī戰場上。Chiah-ê仇敵真可能就是kah殺害in老父相關ê人。

經文:

歷代志下 26:1-26:15

註釋:

Chit章記載有關亞瑪謝ê kiáⁿ烏西雅執政ê情形。歷代志作者kā一位君王ê好kah pháiⁿ分做兩個部分記載,烏西雅ê記事就kah第廿四章有關伊ê阿公約阿施,以及in老父亞瑪謝仝款,lóng是分做兩段記載,前段記載伊可取ê部分,後半段則記載伊背叛上帝ê行為。Tī美好ê部分必定帶有上帝ê賜福,m̄-koh tī背叛上帝ê部分,必定會有嚴厲ê懲罰緊tòe其後。

烏西雅王thang講猶大國執政siōng久長ê一位君王,tùi主前791到739年,共計長到52年之久,Tī chit段超過半世紀ê統治期間,國政穩定,因為án-ne,伊thang大興水利、農事、國防等。烏西雅對猶大siōng重要ê貢獻,是對抗非利士人真成功,而且修復了in老父因為被以色列王約華施phah敗而被拆毀ê耶路撒冷城牆。

Chit段經文記載有關烏西雅好ê部分,就是伊忠於上帝,做上帝認為對ê事。因為án-ne,上帝賜福hō͘伊,tī伊治理之下ê猶大koh重振國威。

第1到2節,烏西雅繼承in老父亞瑪謝ê王位,hit時chiah 16歲,伊就kā老父所攻落來ê以東重要城鎮以拉伊重新修建,chit對猶大來講真重要,因為chit-ê城鎮是一個海港城鎮,是前往非洲kah阿拉伯等地區ê交通、運輸要道,有非常高ê戰略、經濟價值。

第3到5節,chit段經文中所提起ê宗教顧問撒迦利亞是甚麼人?並無清楚。顯然ê,chit位宗教顧問對烏西雅幫助真chē,hō͘伊知影怎樣遵守上帝ê話語,ná親像tī大祭司耶何耶大輔佐之下ê猶大王約阿施時代仝款。

第6到8節,chit段經文描述烏西雅ê戰績,m̄-nā phah敗非利士人,mā降服了亞捫人,以及阿拉伯人等,in lóng紛紛來向烏西雅進貢,表示臣服ê意思。

第9到10節,烏西雅m̄-nā tī軍事上有好ê防禦工事,而且tī經濟上mā非常重視。伊推廣農事,hō͘農作生產增多,mā增加人民ê財富。

第11到15節,因為有充沛ê經濟活動力,hō͘伊thang擁有chē kah「三十萬七千五百名ê兵丁」,以及「兩千六百名軍官」,chiah-ê軍隊lóng是隨時thang派上戰場,而且lóng是ē-tàng征善戰ê勇士。因為有好ê經濟能力,所以chiah-ê軍隊lóng有真好ê武裝配備。Koh khah重要ê,因為伊對上帝忠心,因為án-ne上帝幫助伊。

經文:

歷代志下 26:16-26:23

註釋:

Ná親像頭前已經有提起過ê,歷代志作者用前段記載烏西雅王成功ê所在,後段記載伊失敗ê原因,chit段記載伊因為驕傲,拒絕謙卑聽從祭司ê指導。結果因為án-ne惹起上帝ê受氣,用癩ko病懲罰伊。
歷代志作者一向ê觀點是:一個人ê成功並m̄是人家己有甚麼能力,如果無上帝ê賜福、扶持,人ê能力是真軟弱ê。因為án-ne,驕傲就是bē記得上帝,á是看bē起上帝ê具體表現。

第16到18節,因為有前一段ê成就,hō͘烏西雅王bē記得伊所有ê成就lóng是tùi上帝來ê賞賜,應該tio̍h koh khah謙卑chiah-tio̍h,m̄-koh烏西雅王卻是開始驕傲起來。驕傲,siōng容易hō͘人想beh án怎to̍h án怎,而且m̄聽勸勉。烏西雅王自認thang進入聖殿ê香壇燒香,m̄-koh這是只有祭司chiah thang做ê事(參考出埃及記三十:1—10)。因為án-ne,當伊進入聖殿燒香ê時,祭司亞撒利雅帶八十名英勇ê祭司跟tòe烏西雅,beh阻止伊。警告伊這是嚴重違背摩西律法ê規定,嚴厲警告伊若án-ne做,就是冒犯上帝。烏西雅chit種舉動,kah掃羅王、北國以色列王耶羅波安一世ê行為仝款,lóng是想家己扮演祭司(參考撒母耳記上十三:9—10、列王記上十三:1—3)。

第19到21節,m̄-koh烏西雅並無聽眾祭司ê警告,伊iáu-koh我行我素,手裡the̍h-tio̍h香爐,而且iáu對祭司受氣,就tī chit時chūn,伊ê額頭忽然出現癩ko。

癩ko,這tī猶太人看起來是性命中siōng嚴重ê污點,是上帝對人懲罰siōng嚴重ê記號,因為án-ne,mā被稱做「天譴病」。親像:亞倫ê阿姊美莉安因為批評摩西,致使上帝受氣,懲罰伊,hō͘伊皮膚忽然長了癩ko(參考民數記十二:9—10);先知以利沙ê奴僕基哈西,因為貪戀錢財,the̍h了tùi án-ne縵將軍ê錢財,結果hō͘ 上帝懲罰,「得了癩ko病,皮膚像雪仝款白」(參考列王記下第五章)。感染chit種病ê人,一定tio̍h tùi人群中被隔離出來(參考利未記十三:45—46)。Á tùi chit章ê經文看起來,烏西雅王可能m̄是屬tī一定tio̍h隔離起來ê癩ko病,因為án-ne thang m̄免隔離,m̄-koh mā被看做是屬tī無清氣ê人,因為án-ne,無法度進入聖殿敬拜上帝。以色列人民認為一個人如果無敬拜上帝,就kah永恆ê性命絕緣。

chit-má烏西雅王就是因m̄聽祭司ê勸言而hō͘ 上帝用癩ko病懲罰。Tī伊活teh ê日子裡,只有ē-tàng一直隱身tī家己ê行宮,無法度出來辦理國政,國家大事lóng是由伊ê kiáⁿ約坦掌管。

第22到23節,烏西雅雖然統治了長到52年之久,其實,前段有長到24年是kah老父亞瑪謝同齊執政,後段有十年時間因癩ko病是伊kiáⁿ約坦替伊執政。當伊往生ê時,mā因為患有癩ko病,無法度埋葬tī王室ê墳墓內。

經文:

歷代志下 27:1-27:9

註釋:

Chit章是記載約坦執政ê時期ê事蹟。伊是tī主前750到735年。前後執政16年。Mā是歷代君王中記事siōng簡略ê一位。

第1到2節,chia講約坦執政時間有十六年。這十六年中有十年是kah老父烏西雅同齊執政,因為烏西雅hō͘ 上帝懲罰患tio̍h癩ko病。M̄-koh伊做上帝看做對ê事。「只是伊無參加聖殿ê禮拜」,這真可能kah伊ê老父烏西雅患癩ko病有關。原因是伊mā是khiā起tī王宮,而癩ko是無清氣ê,表示伊mā是無清氣。真可能因為伊無參加聖殿禮拜,致使猶大人民對信仰ê事就疏忽了,mā常去拜偶像神明。

第3到5節,chit段經文講約坦重視國防,ná親像in老父仝款,修建堡壘,而且強化聖殿圍牆ê防禦工程。伊phah敗亞捫人,並且強迫亞捫人一定tio̍h向伊進貢三年,每年tio̍h繳交「三千四百公斤銀á,一千公噸小麥,一千公噸大麥」。

第6到9節,伊一生lóng忠實tī上帝。可惜ê是,伊只有四十一歲就往生à。然後由伊ê kiáⁿ亞哈斯繼任王位。

雖然kan-taⁿ是簡單ê記述伊執政ê情況,m̄-koh卻說明tī伊執政之下,猶大tī軍事、政治上lóng有真好ê成就,包括軍事頂面phah敗亞捫,hō͘亞捫人連續三年向猶大進貢,伊mā修築城牆,hō͘國家防禦功能增強。只是tī宗教信仰上,雖然伊無犯錯,ē-sái講是人民並無學tio̍h伊ê模樣,chit點是唯一可惜ê。第2節講伊「不參與聖殿ê禮拜」,意思是講in老父親自執行祭司ê工作ê tāi-chì,伊無學tio̍h。可能是伊看tio̍h老父烏西雅因為強ài做祭司chiah thang做ê事,結果感染了癩ko,chit件事hō͘伊非常節制,m̄敢妄為。

經文:

歷代志下 28:1-28:15

註釋:

Chit章lóng是teh描述新ê猶大王亞哈斯執政ê情形。伊繼承老父約坦留落來ê王位,統治猶大國大約是tī主前732到715年。

歷代志作者teh紹介一位新ê王,lóng是先作結論,講chit-ê王有無「做上主認為對ê事」,然續後落來是講因為有做上主認為對ê事,所以上帝賜福chit-ê王kah伊所治理ê,hō͘伊國家富強,人民安居樂業。顛倒,若是chit-ê王做上帝看做邪惡ê事,上帝一定會受氣,而且用chit-ê王、國家ê敵人來侵犯,因為he是上帝ê懲罰方式。Chit章講亞哈斯「無效伊ê先組大衛王ê好模樣,無做上主認為對ê事」,這表示亞哈斯拜偶像神明非常嚴重,而這tú好kah伊ê阿公、老父等人顛倒。

Chit段經文是描述猶大王亞哈斯執政了後,就棄sak了上帝,去拜偶像。上帝用敘利亞,以及北國以色列來侵犯猶大,hō͘猶大人民分別被掠到敘利亞kah撒馬利亞去。M̄-koh有一位名叫「俄德」ê先知,伊得tio̍h上帝ê啟示,去向北國以色列領袖,講in bē-tàng俘擄家己ê同胞做奴隸。In因為án-ne聽從先知俄德ê建言,kā所有受掠ê猶大囚犯送tńg去猶大地區。

第1到4節,chit段經文mā同時記載在列王紀下第十六章1到4節。

亞哈斯繼位ê時,chiah二十歲。統治猶大十六年就往生,án-ne,伊只活了三十六歲而已。伊對拜偶像ê事非常熱心,mā是猶大歷代君王中,m̄-nā家己鑄造偶像崇拜,koh khah嚴重ê,是伊家己ê kiáⁿ當做牲禮獻祭hō͘偶像,而這是上帝所無法度容忍ê行為。

第5到6節,短短兩節,記載上帝允准敘利亞來進攻猶大,結果phah敗猶大,hō͘真chē猶大人民hông掠去大馬士革。續落來,上帝koh允准北國以色列來出兵來侵犯猶大,仝款phah敗亞哈斯kah伊ê軍隊,結果「tī一工之內」就有chē kah「十二萬猶大ê精兵」被殺害,這是非常嚴重ê慘敗。Kah過去伊ê祖先有真好ê國防武力相差真chē,原因是因為伊棄sak上帝。就親像上帝ê奴僕對猶大王亞瑪謝所講ê,是上帝決定軍隊ê勝負(參考歷代志下廿五:8)。亞哈斯就是因為拜偶像非常嚴重,遠遠棄sak上帝,mā上帝mā棄sak伊真遠,結果當外族侵犯猶大ê時,就會失去上帝ê庇護,任人侵犯蹂躪猶大人民。

第7到8節,因為軍隊慘敗tī北國以色列手下,猶大人民koh chē kah二十萬人受掠,包括有婦cha-bó͘-kiáⁿ童在內,同時掠奪了猶大ê真chē財富當做戰利品。Tī chit種混亂危kah之狀況下,有一個以色列兵丁刣死亞哈斯ê kiáⁿ,mā刣死王宮總管kah宰相。

第9到11節,上帝ê奴僕先知俄德,伊是北國ê先知。伊看見北國以色列軍隊kā猶大人民當做俘擄帶tńg來撒馬利亞ê時,就去見in,傳達上帝ê信息hō͘ chiah-ê領袖,警告in一定tio̍h馬上kā所擄ê chiah-ê猶大人民,tháu放 tńg去,若無,一定會惹起上帝ê憤怒。因為南國猶大人民kah北國以色列人民lóng是兄弟姊妹,就不應該俘擄家己ê同胞當做奴隸。先知俄德特別強調一個點:猶大ê失敗,是上帝beh藉tio̍h以色列kah敘利亞來懲罰in。M̄-koh並無表示以色列比猶大會好jōa-chē。

第12到15節,北國有四位領袖,知影了chit件事,mā認同先知俄德ê信息,聯合起來反對軍隊俘擄猶大人民,beh趕緊kā in釋放tńg去。In同時承認北國以色列人民並無比南國猶大人民好,mā仝款是犯罪嚴重。只是上帝先懲罰猶大罷à。Chiah-ê軍人聽chiah-ê話了後,就好款待chiah-ê俘擄,然後kā in遣送tńg去。

經文:

歷代志下 28:16-28:27

註釋:

Chit段經文講亞哈斯王tī國家siōng艱困ê時chūn,m̄-nā m̄知tio̍h悔改歸向上帝,相對ê,伊是比以前拜偶像koh khah燒熱切,以前是kā家己ê kiáⁿ燒獻hō͘偶像,koh khah惡質ê行為是kā聖殿關閉,án-ne猶大人m̄-nā無法度入去拜上帝,伊iáu teh耶路撒冷kah猶大各所在建造偶像祭壇,無形中鼓舞了猶大人民紛紛棄sak了上帝。因為án-ne,上帝hō͘外族人侵犯猶大koh-khah嚴重,頻率koh khah高。

第16到18節,chia講以東人來侵犯猶大,掠去真chē人。亞哈斯m̄是tńg來向上帝求救,卻是去走chhōe亞述皇帝ê幫忙。M̄-koh chit時,非利士人mā來侵犯,而且佔領了真chē城市。

第19到21節,而猶大人民並無因為án-ne而悔改,顛倒,是冒犯上帝koh-khah嚴厲。結果,亞哈斯想beh走chhōe亞述ê幫助,m̄-nā得bē-tio̍h,顛倒,連亞述mā加入對敵猶大ê行列,hō͘亞述搜刮了聖殿kah王宮ê財富,連人民ê財產mā保不住。就算án-ne,iáu是無辦法擋止亞述對猶大ê野心。

第22到25節,亞哈斯無悔改ê心,伊差不多是已經bē記得祖先ê教示kah教導。當國家tī危急ê時,伊卻想tio̍h敘利亞thang óa靠in ê神明phah敗猶大。因為án-ne,伊想若是家己mā去拜敘利亞ê神明,án-ne,這敘利亞ê守護神就ē-tàng來守護猶大,án-ne猶大就安全起來。因為án-ne,伊為tio̍h án-ne tī全國各地建造拜偶像神明ê祭壇,mā鑄造偶像,同時,koh khah嚴重ê行踏,竟然是封閉了聖殿,án-ne,猶大人民m̄-nā bē去聖殿敬拜上帝,顛倒,是棄sak上帝koh khah遠。這當然會引起上帝極大ê憤怒。

第26到27節,ná親像頭前已經有提起過ê,亞哈斯只活到三十六歲,死ê時chūn,無被埋葬tī王室墳墓。Á tī伊治理之下,猶大ê國勢陷入了非常脆弱ê狀態。伊ê kiáⁿ希西家繼承伊ê王位。

經文:

歷代志下 29:1-29:17

註釋:

Tùi第廿九章到三十二章lóng是記載猶大王希西家。伊ē-sái講是猶大晚期siōng有希望復興國家ê一位君王,mā是積極進行宗教信仰改革ê國王。Tī歷代志á是列王記ê作者評語中lóng是非常bē-bái ê,作者用「效法先祖大衛王ê模樣」(參考廿九:2),kah「無效法伊ê先祖大衛王ê好模樣」(參考廿八:1)作比較,突顯出希西家kah in老父亞哈斯之間ê對比。作者對希西家ê評語是用(1)「伊效法先祖大衛王ê模樣,做上主認為對ê事」,來形容chit位君王ê施政方針。(2)並且講伊死後,猶大國所有ê人民「lóng為伊舉哀致敬」。有關希西家執政期間ê猶大國勢發展情況,mā thang參考以賽亞書第三十六到三十九章。

對照列王記下第十八到二十章記載有關希西家執政ê記事,就會發見kah歷代志記載ê資料有極大ê差別;列王記在內容上偏重tī希西家tī國政上ê事務,而tī歷代志則偏重tī宗教改革方面ê描述,tī chit方面包括重新奉獻聖殿、過Pôaⁿ過節、提升利未人ê地位等等。

值得注意ê是希西家執政共計廿九年,其中iáu包括伊bat向上帝祈求延長十五年ê歲月(參考列王記下二十:6)。Tī希西家執政ê期間,mā就是主前721年,乃是北國以色列被亞述帝國消滅,人民被俘虜四散tī各地寄居做奴隸,以及亞述帝國tùi外國引進真chē居民khiā起tī撒馬利亞,甚至強迫北國以色列人民kah外族人通婚等等,chiah-ê事蹟都無出現tī歷代志內面。雖然講歷代志作者偏重南國猶大ê正統角色(伊認為猶大kiáⁿ孫chiah是延續雅各家族ê),m̄-koh對tī十二支派中ê九個支派被俘虜到外國去做奴隸,chhun落來無被俘虜去做奴隸ê,soah koh面臨被迫kah異族通婚ê迫害,chiah-ni̍h重要ê事件卻疏忽了,確實是件真oh想像ê事。

因為希西家ê老父約哈斯kā聖殿封閉,而且大量tī全國各地建造偶像祭壇,以及鑄造偶像,致使國家差不多hō͘ 上帝懲罰到滅亡。因為án-ne,當希西家繼承王位後,就積極展開清除chiah-ê錯誤ê宗教信仰態度。伊第一件所做ê事,就是kā祭司kah利未人召集tńg來到聖殿門口,chiù-chōa beh帶領人民tńg來到上帝面前,ài in先潔淨家己,然後根據摩西律法ê規定,進行潔淨聖殿ê工作,伊tùi chia開始,beh重新洗盪猶大人民對上帝無忠實ê心靈。

第1到2節,這是歷代志作者紹介猶大諸王ê一種筆調,就是先講繼承王位ê年齡,然後講chit-ê王統治jōa-chē年,母親是甚麼人等等。Chia講希西家「二十五歲ê時chūn作猶大王」,伊統治猶大共計「二十九年」。Siōng重要ê是伊「效法先組大衛ê模樣,做上主認為對ê事」,chit句話已經說明希西家會帶領猶大人民tńg來到上帝面前。Bē像伊ê老父亞哈斯hit種悖逆上帝。

第3到4節,希西家作猶大王是tī主前715到686年。伊tī登基做王ê第一個月,就召集了祭司kah利未人聚集到聖殿「東院」,這是teh指聖殿大門ê廣場。對chiah-ê宗教領袖表達伊ê心願。

第5到11節,chit段經文中,希西家對chiah-ê祭司kah利未代表講出幾點重要看法:一是所有祭司kah利未人一定tio̍h先潔淨家己,然後kā聖殿ê污穢除掉。二是祖先做上帝看做邪惡ê事。三是不敬拜上帝,mā不開放聖殿hō͘人民敬拜(這是teh指家己ê老父亞哈斯)。四是上帝因為án-ne大怒而懲罰猶大人民。五是頂一代ê祖先因為án-nehō͘ 上帝懲罰死tī戰場ê不計其數,而bó͘-kiáⁿ受掠伊去ê koh-khah chē等。Chiah-ê lóng teh表明希西家是一個真清楚實況kah原因ê君王,並無因為家己ê老父tī政策上有錯誤,就用白賊掩蓋(khàm),卻是坦承錯誤。這mā表示伊teh beh開始進行改革ê工作。

第12到14節,chia列出利未祭司kah利未族ê代表名單,每一個宗族派出兩名代表,共計有十四名。

第15到17節,chiah-ê宗教領袖tńg去,召集家己宗族ê人進行潔淨禮儀,先潔淨家己,了後就進行潔淨聖殿。Án-ne共計開了十五天ê時間,到à第十六天,就lóng kā聖殿「清除清氣」,準備好勢beh敬拜上帝。

經文:

歷代志下 29:18-29:36

註釋:

當chiah-ê宗教領袖向國王希西家報告聖殿潔淨完成了後,伊就隨時帶領人民進行獻祭ê工作。猶大人民因為經歷phah敗仗、bó͘-kiáⁿ受掠伊去ê苦難,taⁿ已經清楚in過去棄sak上帝,chiah換來taⁿ慘痛ê結果。因為án-ne,當希西家推動宗教改革ê時,in lóng願意配合。希西家是親自帶領人民領袖去敬拜,而且為王室「贖罪」,因為伊知影是家己ê老父亞哈斯背叛了上帝,chiah致使人民受難、國家接近淪亡ê邊緣。

第18到19節,chiah-ê宗教領袖來向國王希西家報告,已經完成聖殿ê潔淨工作。

第20到24節,希西家召集耶路撒冷城內ê領袖,伊beh特別為王室ê罪,以及猶大人民ê罪等向上帝獻上贖罪祭。所有chiah-ê贖罪禮儀lóng是根據摩西律法ê規定進行(參考利未記十六:3—10)。

第25到30節,teh獻祭敬拜ê時,所有程序lóng照大衛王時代所定落來ê禮儀進行,m̄-nā kā聖殿歌手lóng chhōe tńg來,希西家mā親自帶領人民謙卑「跪落來敬拜上帝」。伊án-ne親自表率ê禮拜方式,深獲猶大民眾ê心,大家lóng「歡歡喜喜」地跟tòe伊跪落來敬拜上帝。

第31到36節,人民是歡喜希西家帶領in重新tńg來到敬拜上帝ê信仰,因為án-ne,大家lóng主動地chhōa in ê cheng-seⁿ來獻祭,表明in是真心誠意地敬拜上帝。注意第31節講「其中有kóa人自願帶來cheng-seⁿ,宰了做燒化祭」,chit句話表示即使tī亞哈斯時代棄sak上帝,iáu是有人保持對耶和華上帝ê忠實,只是因為政治環境kah社會情況hō͘ in無法度進入聖殿獻祭罷à。

第34節是真值得注意ê一節;kā chit節對照第5節、第15到16節、第31節等等經文來看,就thang明白一件非常重要ê事,tī國政以及社會動亂不安ê世代,連祭司、利未人mā lóng無法度「保持潔淨」。因為án-ne,希西家為tio̍h beh潔淨聖殿,帶領人民重新tńg來到耶和華上帝ê面前ê時,第一件事就是beh chiah-ê宗教人員先潔淨家己。如果宗教人員無án-ne tāi先做起,就無法度帶領人民以敬虔ê心靈敬拜上帝。

經文:

歷代志下 30:1-30:12

註釋:

Chit章thang看tio̍h已經荒廢了許久ê Pôaⁿ過節,tī希西家執政ê時代koh一pái重新出現,mā ē-sái講是tùi所羅門以後,第一pái「以色列人民」án-ne慎重地舉行Pôaⁿ過節(第26節)。

Pôaⁿ過節,chit對以色列民族來講有非常ê意義,因為he是表明in tùi奴隸ê生活環境中得tio̍h脫離,有上帝帶領in出埃及之性命重新koh再造、koh活ê意義。Taⁿ,重新舉行守Pôaⁿ過節,就是beh表明上帝chiah是in性命ê主。特別是tī希西家深知in老父亞哈斯時代,悖逆上帝ê行為之嚴重性,是連聖殿lóng封閉起來。因為án-ne,希西家重新帶領猶大人民守Pôaⁿ過節,所表明ê信仰kah性命ê意意,就koh khah清楚à。

Chit段經文講希西家m̄-nā是帶領猶大人民重新tńg來到敬拜上帝ê信仰告白,伊mā同時發信hō͘北部所有以色列同胞來kah伊同齊敬拜上帝。伊派人kā這信發hō͘瑪拿西、以法蓮、亞設、西布倫等地區ê以色列人民聽tio̍h chit-ê消息,lóng用譏笑ê口吻回覆chiah-ê信差。M̄-koh猶大人民iáu是仝款堅定ê心,beh跟tòe希西家敬拜上帝。

第1到4節,chit段經文講希西家同意kā舉行Pôaⁿ過節ê慶典延遲一個月,原因是祭司iáu未完全潔淨家己,而且iáu有真chē猶大人民無來聖殿朝聖過。因為án-ne,大家lóng同意先kā chiah-ê無完美ê事lóng補足了,chiah來舉行全國性ê Pôaⁿ過節慶典。

第5節,這是非常特別ê一節經文。Chit節講希西家m̄-nā命令猶大人民潔淨,準備ài守Pôaⁿ過節,而且是廣發邀請函hō͘北部支族ê同胞,請in同齊到耶路撒冷來參加這已經真久無遵守ê Pôaⁿ過節。

第6到9節,chit段經文是邀請函ê內容。

Chit句「Lín是tī亞述王來侵ê時倖免tī難ê人」,已經teh表明當時北國以色列已經淪亡了,chiah-ê「倖免tī難ê人」,就是無受掠賣到奴隸市場ê人民。希西家提醒北國以色列人民,國家會淪落到chit種地步,就是因為棄sak上帝所帶來ê結果。伊勸勉chiah-ê倖免tī難ê以色列同胞tńg來到耶路撒冷來敬拜上帝,án-ne,上帝會感化hiah-ê俘擄in親人ê人,hō͘ in生出憐憫ê心,tháu放俘擄伊去ê人tńg去故鄉。因為上帝是仁慈、滿有憐憫ê性命之主。

第10到12節,chit段經文說明北國以色列人民ê心是jōa-ni̍h-á剛硬,mā說明上帝對in ê懲罰,to̍h是in該得ê。因為當希西家派出信差送邀請函hō͘所有北部以色列同胞ê時,in lóng譏笑希西家。Á值得欣慰ê,是猶大同胞決定跟tòe希西家kah宗教領袖,對上帝忠實,以真誠ê心敬拜上帝。

經文:

歷代志下 30:13-30:27

註釋:

Chit段經文描述希西家怎樣帶領猶大人民舉行Pôaⁿ過節ê經過。Tī所有chiah-ê禮儀過程lóng是照摩西當年頒布hō͘以色列人民祖先ê規定進行。換句話講,in重新tńg來到古老ê禮儀,用真嚴肅ê態度進行Pôaⁿ過節應該有ê祭祀敬拜方式。

第13到16節,原本Pôaⁿ過節是tī正月14舉行,m̄-koh因為有kóa祭司準備無夠潔淨,因為án-ne,決定延遲一個月時間(第1到2節),tī二月14日舉行Pôaⁿ過節禮儀。Mā tùi第15節thang看出原來是in中間有kóa祭司並m̄是真認真tī潔淨ê規定上,想beh矇混過去。Koh再對照第廿九章34節「原來利未人比祭司koh khah切實遵守潔淨ê規定」chit句話,就thang明白有kóa宗教領導者並m̄是真真心,m̄-koh taⁿ看tio̍h國王希西家是hit種認真beh恢復過去對上帝忠實敬拜ê禮儀,因為án-ne,就感覺家己真見笑,mā趕緊潔淨家己,帶贖罪祭來奉獻。

第16到17節,tùi chit兩節thang看出宗教領袖確實真嚴厲地檢查每一個祭司是m̄是有真實地潔淨家己,若是無,就不准in擔任祭祀禮儀ê工作。Á chiah-ê禮儀lóng是ná親像第廿九章34節所講ê,利未人比祭司iáu認真切實遵守一切規定。因為án-ne,若有發見祭司不切實地潔淨家己,就不准in進行獻祭ê工作,tùi利未人來代理。這mā講出chiah-ê眾祭司確實是怠忽了in應該有ê職責siuⁿ久à。Á是in心中存疑是m̄是國王希西家是真正ài beh進行chit項宗教改革,想beh koh再觀望一段時間。

第18到22節a句,chit段經文thang看出雖然頂pái派出信差送去邀請北部以法蓮、瑪拿西、以薩迦、西布倫等支族ê同胞來參加,bat因為án-ne受tio̍h侮辱。M̄-koh iáu是有人願意來加入。M̄-koh因為siuⁿ久á是根本就無經驗過守Pôaⁿ過節ê規律,因為án-ne,發見chiah-ê來自北部ê同胞並無遵守應該有ê守節期chìn前tio̍h準備ê潔淨禮儀。希西家真發揮了伊ê疼心,替chiah-ê北部同胞祈求上帝ê憐憫。第20節真重要,chia講上帝垂聽希西家ê祈禱。就án-ne,一連七工,民眾lóng歡歡喜喜慶祝除酵節。Á利未人盡心地帶領人民敬拜上帝ê事,mā得tio̍h希西家ê o-ló。

第22節b句到27節,chit段經文thang看tio̍h in kā原本只有七工ê除酵節延長一倍,一連舉行了十四工。除了Pôaⁿ過節慶典之外,mā同時獻上平安祭。希西家家己帶頭奉獻,民眾領袖mā tòe學習心甘情願地奉獻。Tùi第25節thang看出chiah-ê來自北國以色列人民iáu是有人歡喜遵守摩西律法ê規定,過聖潔ê生活,即使tī困境ê亡國環境下,in並無因為án-ne失落對耶和華上帝ê信。第26節講出希西家án-ne認真地推動宗教信仰改革,是tùi所羅門了後,不bat有過ê現象。上帝mā垂聽猶大人民祈禱ê聲音,這表示上帝會賜福hō͘猶大人民,已經北國hiah-ê歡喜敬拜祂ê子民。

經文:

歷代志下 31:1-31:10

註釋:

Chit章主要是tī說明猶大王希西家怎樣提升利未人tī聖殿ê角色,尤其是為tio̍h beh hō͘祭司kah利未人「ē-tàng專心做上主律法所規定ê事」,伊要求所有人民kā祭司kah利未人「應得ê供奉」帶來hō͘ in。所謂「應得ê供奉」,指ê是申命記第十四章22到29節所記載ê規定。結果人民奉獻ê禮物特別ê chē,chē到有chhun。其實,chia teh強調in lóng kā「各種物件ê十分之一帶來」,表示in已經有一段時間無敬拜上帝,當然mā bē記得該帶jōa-chē ê量來奉獻。Mā因為過去敬拜被疏忽了,致使祭司kah利未人無法度tùi人民敬拜ê時奉獻ê所得供應生活ê需要。Taⁿ,希西家命hō͘人民一定會按照規定奉獻,表示希西家teh改革上已經穩定了,人民chiah會注意敬拜ê事。

另外一方面,咱看tio̍h作者描述希西家之所以tī宗教改革ê事頂面ē-tàng成功,是因為伊「一心走chhōe上帝ê旨意而做」,這表示希西家確實是一位tī信仰上真敬虔ê君王。信仰ê事就是án-ne,tī上位ê人如果以敬虔ê心過信仰生活,人民就bē沈醉tī聲色酒肉ê糜爛生活。反之,kui個社會ê倫理道德就會墮落,國家ê根基真容易就腐pháiⁿ。

Chit段經文是重新組織祭司kah利未人ê班次,thang hō͘聖殿ê祭祀禮儀ê事thang順利進行。以色列人民mā聽從希西家ê指導,kā祭司kah利未人該得ê份帶來hō͘ in,幫助in thang專心tī聖殿事奉ê工作。

第1節,chia一開始就講希西家帶領猶大人民過完siōng重要ê Pôaⁿ過節後,參加過chit節期活動ê人必定lóng大受感動,因為án-ne,in就到各地城鎮去,kā hiah-ê偶像神明ná親像亞舍拉女神像、巴力ê神像等lóng拆毀,同時kā祭拜偶像神明ê祭壇mā摧毀。

第2到3節,希西家同時重新組織了祭司kah利未人ê服事班次,hō͘ in lóng有一定ê工作職責thang做,特別是摩西律法上所訂定ê各種節期該有ê獻祭禮儀,lóng一切按照規矩辦理。這mā反應出in已經真久時間無án-ne做。

第4到7節,希西家mā吩咐tòa tī耶路撒冷ê居民,kā應該hō͘祭司kah利未人ê供奉帶來,án-ne,祭司kah利未人就ē-tàng「專心做上主律法所規定ê事」,換句話講,過去因為tī chit方面疏忽,致使祭司kah利未人為tio̍h生活就會忽略該有ê祭祀禮儀。人民lóng聽希西家ê話,in kā「siōng好ê禮物」,包括五穀、酒、橄欖油、蜂蜜,kah其他農產品lóng帶來,而且mā進行了十分一奉獻hō͘上帝。Án-ne,奉獻禮物之多,chē到「堆積如山」。Chiah-ê tī說明過去因為棄sak上帝,去拜偶像神明,chiah致使聖殿ê kah對上帝ê敬拜疏忽有荒廢ê情景。Taⁿ tī希西家嚴厲推動改革之下,改變à。

第8到10節,因為希西家王推動改革信仰,hō͘大家lóng tńg來到上帝面前,mā因為án-ne,有上帝賜福,m̄-nā奉獻夠額,人民mā不缺乏。因上帝ê賜福永遠夠額祂子民ê需要。

經文:

歷代志下 31:11-31:21

註釋:

Chit段經文描寫祭司kah利未人分班kah工作ê情形,in kā人民所供奉kah奉獻hō͘上帝ê禮物,lóng做siōng適當ê分配,hō͘每一個人都無缺乏。

第11到13節,chit段經文提起祭司kā聖殿ê儲藏室用來儲備禮物kah人民ê奉獻,然後派利未人管理。另外派出十個利未人協助chit項工作。

第14到16節,另外mā派人協助祭司khiā起ê所在,chiah-ê工作lóng thang hō͘祭司專心tī祭祀禮儀ê工作,bē分心。Chia mā特別強調kā利未人應該得tio̍h ê食物lóng平均分配了,而chit項分配並m̄是照宗族,卻是按照每一個人ê工作需要,所有參加聖殿值班ê,lóng有工作,這mā表示in lóng有得tio̍h應得ê禮物á是供品。

第17到19節,原本民數記第四章是清查三十歲以上利未人,thang hō͘ in進入協助祭司ê工作。後來tī第八章23節soah koh改成廿五歲。chit-má卻講是二十歲以上就beh進入聖殿參與服事ê工作。會有chiah-ê變動,真可能kah ê時空ê轉移有關係pah。Tī chia mā特別強調m̄-nā是分配工作hō͘祭司kah利未人,包括in ê厝內人lóng tio̍h列入照顧,thang看出希西家確實是真忠實地teh進行改革ê工作,而改革重心之一,就是hō͘宗教師有安定ê生活,免得因為生活ê煩惱而hō͘工作ê熱情kah真誠變了樣。

第20到21節,chit兩節mā是為希西家推動ê改革工作hō͘ in非常ê肯定。列王記下第十八章5節b句到7節a句有án-ne ê評語:「猶大國,tī伊以前á是用後,無一個王kah伊仝款。伊忠於上主,從來無違背上主;伊謹守上主hō͘摩西所有ê誡命。因為án-ne,上主kah伊同在;伊所做ê一切事lóng順利。」

經文:

歷代志下 32:1-32:23

註釋:

Chit章主要記載上帝怎樣幫助猶大王希西家對抗亞述皇帝西拿基立ê侵犯。Chit件事大約是發生tī主前701年ê時chūn,hit時北國以色列已經被亞述帝國消滅了(主前721年)。亞述既然ē-tàng消滅比猶大iáu koh khah強大ê北國以色列,beh消滅猶大實在是ná親像探囊取物仝款ê容易。M̄-koh聖經作者一再強調,決定勝負ê是上帝(參考歷代志下廿五:8)。詩篇ê詩人mā有chit種講法(參考詩篇三十三:16—18)。

因為希西家kah先知以賽亞「向上帝祈禱,呼求幫助。上主差遣天使kā亞述軍隊ê將領kah官長lóng殲滅」,m̄-nā án-ne,iáu hō͘亞述皇帝西拿基立為tio̍h án-ne事hō͘伊ê眾細kiáⁿ hō͘謀刣死。作者認為亞述皇帝西拿基立會án-ne有chit種結果,主要是因為伊污辱了全能ê上帝ê緣故。上帝根本就m̄免出一兵一卒,祂只「差遣天使kā亞述軍隊ê將領kah官長lóng殲滅」。

Chit章記事thang對照列王記下第十八章來看,就會發見歷代志作者對猶大王希西家ê軟弱部分修飾了bē少。親像作者不提有關希西家bat kā聖殿kah王宮寶庫裡ê銀á kah聖殿門上ê金子,以及包tī聖殿門柱上ê金子等,lóng送hō͘亞述王西拿基立,請求伊m̄-thang攻打耶路撒冷。M̄-koh,因為西拿基立並bē滿足希西家王進貢chiah-ê物件,想beh奪取koh-khah chē,連希西家派去請求西拿基立hō͘ in猶大生存ê機會ê三個特使,mā遇tio̍h亞述皇帝西拿基立ê侮辱,án-ne chiah逼kah希西家只好走chhōe先知以賽亞ê協助。

仝款ê chit段記事mā記載tī以賽亞書第三十六章。Thang看tio̍h先知以賽亞確實hō͘ in希西家真chē鼓舞,ài伊ài有堅定ê信心óa靠上帝,mài驚亞述。上帝一定會替伊phah敗亞述大軍,而最後先知以賽亞ê話果然應驗ā。

Chit段經文是描寫亞述皇帝西拿基立準備來進攻耶路撒冷。Á猶大王希西家m̄-nā不驚惶,iáu鼓舞城內ê猶大人民tio̍h勇敢,深信上帝會幫助。Á亞述皇帝派出使者來到耶路撒冷城下,講了真chē侮辱ê話,m̄-nā侮辱希西家,mā侮辱了耶路撒冷ê猶大人民,甚至連上帝mā侮辱à。先知以賽亞替猶大人民向上帝祈求,結果亞述大軍hō͘ 上帝差遣天使hō͘ in殲滅,並且亞述皇帝西拿基立回國了後,mā hō͘家己ê kiáⁿhō͘刺殺。

第1節,chia講就tī希西家忠心事奉上帝ê時,tú-tio̍h強猛ê亞述帝國來侵犯。亞述帝國ê皇帝西拿基立chìn前已經消滅了北國以色列,taⁿ繼續南下想beh一舉消滅猶大。伊先kā猶大ê設防城市攻陷落來,進一步koh準備攻落耶路撒冷。

第2到4節,這是非常危急ê一件事,為tio̍h beh防止亞述攻落耶路撒冷,希西家看見情況危急,就緊急下令kā水源切斷,hō͘亞述ê軍隊無法度得tio̍h水源而會知難而退。

第5到8節,另外一方面,希西家mā積極修築防禦工事,m̄-nā是防禦堡壘,mā包括槍械軍器等。然後,伊koh對全體人民講鼓舞ê話,ài大家堅信上帝,深信上帝一定會幫助耶路撒冷抵擋會tiâu亞述ê大軍,並且kā它擊退。

第9到15節,這是亞述皇帝西拿基立派出特使去對希西家kah耶路撒冷城ê猶大人民講話。Tī chit段心戰干涉攪擾ê喊話中,表示只要亞述想beh奪取ê城池,無任何一個神明ē-tàng抵擋得,mā無法度救。In ài耶路撒冷城ê人民m̄-thang相信希西家ê話,無任何一個神明ē-tàng保得tòa亞述ê進攻。

第16到19節,chiah-ê特使m̄-nā侮辱希西家,mā侮辱全能ê上帝,講chit位特別眷顧希西家ê耶和華上帝,根本就無能力保護耶路撒冷。In恐嚇hit-ê城ê猶大人民。

第20到21節,chia講希西家kah先知以賽亞向上帝祈禱,呼求上帝ê幫助。就tī亞述大軍kah皇帝西拿基立非常囂張ê時chūn,上帝差遣天使進入亞述大軍ê軍營中,kā in ê將領kah軍官lóng殲滅。Chia並無記錄亞述死去jōa-chē兵員,在列王紀下第十九章35節;以賽亞書第三十七章36節等等處經文,lóng有記載上帝ê天使進入亞述營房中,共計刣死了十八萬五千人。Hō͘皇帝西拿基立大驚恐慌,趕緊落走tńg去尼尼微城。歷代志作者tī chia講伊是「滿面見笑地tńg來本國去」。M̄-koh有一工,西拿基立親生ê兩個kiáⁿ,就是「亞得米勒kah沙利色」kā伊刣死了(參考以賽亞書三十七:38)。

第22到23節,因為chit件事,hō͘猶大王希西家lóng受附近國家、族群ê尊重,m̄-nā kah猶大國和平相處,mā紛紛來耶路撒冷來朝聖kah向希西家進貢。

經文:

歷代志下 32:24-32:33

註釋:

Chit段經文談了三件事:一是希西家王後來因病teh要死去,上帝憐憫伊,koh hō͘伊康復起來(第24到26節);koh講,希西家mā可能因為siuⁿ過驕傲而bē記得上帝賞賜hō͘伊ê一切,向巴比倫使者展寶所有ê一切(第27到31節);tī統治廿九年了後,希西家結束在世間五十四年ê性命旅程(第32到33節)。

第24到26節,chit段經文非常簡略,仝款ê記事mā記載在列王紀下第二十章1到11節;以賽亞書第三十八章1到6節等等處經文。

Chia只有講希西家害病強強beh死去,伊祈禱,上帝就hō͘伊康復起來。M̄-koh在列王紀kah以賽亞書lóng有說明是上帝差派先知以賽亞去傳達信息hō͘伊,並且答應hō͘伊多活十五年歲月。M̄-koh希西家懷疑chit種信息,因為án-ne,先知以賽亞hō͘伊堅定信心ê兆頭。就是hō͘日影倒退十個台階。果然án-ne。不過,歷代志作者tī chia特別強調講,希西家tī康復起來了後,bē記得上帝ê恩典,驕傲,無感謝上帝為伊所做ê,結果hō͘猶大人民kah耶路撒冷遇tio̍h災禍。可惜chia並無指明是甚麼災禍發生。

第27到31節,chit段經文說明希西家成功ê所在,kah伊所有ê財富。作者有意思beh kā希西家類比所羅門王。仝款強調伊所有ê這一切,lóng是上帝賞賜hō͘伊ê。甚至伊治國成功mā引起了巴比倫帝國ê注意,特別差派使者來訪問。照列王記下第二十章12到19節,以及以賽亞書第三十九章ê記載,lóng強調講巴比倫差派特使來探望希西家,是beh窺探猶大國防ê虛實,m̄-koh希西家不查,只知影展寶財富,結果就因為án-ne,hō͘巴比倫帝國有準備入侵猶大ê機會。這mā是歷代志作者tī chit第31節所講ê,tī巴比倫特使來訪ê chit件事頂面,上帝beh hō͘希西家家己處理,為tio̍h是beh考驗伊ê品格。意思是teh指beh看希西家是m̄是會謙卑。可惜,伊無。

第32到33節,chia提供了一個無流傳落來ê史料,就是「以賽亞ê異象冊」。當希西家往生後,伊被埋葬tī王室墳墓內比較重要ê位置,猶大kah耶路撒冷人民用chit種方室來表示對伊ê懷念kah尊崇。伊死後,kiáⁿ瑪拿西繼位為王。

經文:

歷代志下 33:1-33:9

註釋:

Chit章記載希西家ê kiáⁿ瑪拿西繼承王位後施政ê情形。伊統治總共長到五十五年,就是主前697到642年,是南國猶大在位siōng長ê一位君王,m̄-koh mā是siōng惡質ê一位君王,比伊ê祖先亞哈斯所做上帝看做邪惡ê事iáu koh khah嚴重。因為瑪拿西嚴重到「Kā偶像khǹg tī聖殿內面」,這是用往ê王所m̄敢做ê事,即使是伊ê阿公亞哈斯mā bat「Kā家己ê kiáⁿ當燒化祭獻hō͘偶像,仿效本來住民ê 可惡行為」(參考歷代志下廿八:3),m̄-koh iáu bē致使像瑪拿西hit種斗膽地「Kā偶像khǹg tī聖殿內面」。因為án-ne,歷代志作者用「瑪拿西領猶大人民犯罪,比上主tùi伊子民頭前趕出去ê本來住民所犯ê罪iáu koh khah嚴重」chit句話來形容伊ê惡質行踏。Á列王記ê作者講伊「mā刣死真chē無辜ê人民,hō͘耶路撒冷ê街路流滿血」(參考列王記下廿一:16)。傳說中,先知以賽亞就是hō͘伊凌虐致死ê,甚至講南國猶大ê滅亡lóng kah上帝無法度赦免伊所犯ê罪過有密切關係(參考列王記下廿四:4)。後來先知運動中就以「瑪拿西tī耶路撒冷ê惡行」chit句話,形容上帝必定降落災難懲罰違背祂旨意ê子民(參考耶利米書十五:4)。

Chit段經文真詳細地描述瑪拿西繼任in老父希西家王位了後,並無依循老父留落來ê模樣,反tńg是做出kah in老父南轅北轍ê行為;in老父希西家對上帝忠實,瑪拿西卻是一再悖逆上帝ê教導,甚至惡質到kā家己ê kiáⁿ當做牲祭燒獻hō͘巴力神明。Koh khah嚴重ê,是聖殿裡造異教神明ê祭壇,chit點koh khah hō͘上帝無法度赦免。因為án-ne,決定beh hō͘猶大人民被外敵驅離chit塊上帝賞賜hō͘ in khiā起ê土地。

第1到2節,chia講瑪拿西tī十二歲繼任為王,而且長到五十五年之久,ē-sái講是全以色列民族中間,執掌王權ê時間無論北國以色列á是南國猶大,lóng是siōng久長ê一位。

第3到6節,chit段經文詳述了瑪拿西所犯上帝非常討厭ê事,包括伊kā老父希西家拆毀ê偶像神明祭壇全lóng重新建造起來,而且iáu tī聖殿內面khǹg偶像神明ê祭壇,刣死家己ê kiáⁿ獻hō͘神明,信奉占卜、巫術、求問算命ê等等,凡是迦南人所有ê宗教行為伊lóng照單全收。因為án-ne,上帝非常受氣。

第7到9節,chit段經文講述上帝怎樣回應瑪拿西tī聖殿設置偶像神明kah祭壇ê事,強調因為伊chit種行為,上帝一定會kā猶大人民驅離chit塊上帝賞賜hō͘ in khiā起ê土地。

經文:

歷代志下 33:10-33:25

註釋:

Chit段經文除了提起瑪拿西tī被亞述帝國侵犯ê時,被掠去巴比倫後,chiah知影悔改。然後記載伊結束統治ê事,以及簡短ê敘述伊ê kiáⁿ亞們繼任王位ê事蹟。

第10到13節,tùi第10到17節ê chit段經文是歷代志特有之資料。Tī第10到13節ê chit段經文,講瑪拿西因為不聽從上帝ê警告,就án-ne上帝hō͘亞述帝國來侵犯猶大,並且kā伊phah敗koh俘擄了伊,並kā伊帶去巴比倫。會帶去巴比倫,真可能hit時是巴比倫iáu是一個小國,是亞述屬下ê轄區。瑪拿西被用「鉤子」kah「銅鍊」帶到巴比倫,ē-sái講是非常痛苦ê虐待。就tī苦難中,伊悔改。知影是因為棄sak上帝而帶來ê結果。因為án-ne,伊謙卑落來認罪。上帝垂聽伊祈求ê聲音,hō͘伊會得thang tńg去耶路撒冷,繼續統治猶大。

第14到15節,當伊tńg去耶路撒冷了後,就開始積極修建防禦工事,m̄-nā kā城牆加高,mā tī chit防衛城鎮加派駐軍。Koh khah重要ê,伊同時拆毀了過去家己所建造ê偶像神明kah祭壇,伊扔掉了chiah-ê偶像神明。

第16到17節,另外一方面,伊mā恢復到耶路撒冷聖殿敬拜上帝,並且命令猶大人民lóng一定tio̍h敬拜以色列ê上帝,而且只有ē-tàng獻祭hō͘耶和華上帝。Án-ne講起來,伊確實是有真大ê改變。可惜ê是,歷代志ê chit-ê資料,在列王紀完全欠缺,致使無法度對照。

第18到20節,chit段經文記載瑪拿西結束統治長到五十五年時間。伊十二歲繼位,往生ê時六十七歲。由伊ê kiáⁿ亞們繼承王位。 
   
第21到25節,亞們登基繼承老父瑪拿西當猶大國王,是tī主前642年,hit時伊「二十二歲」,只有統治短短兩年時間,到640年就結束loh。Kah伊ê老父瑪拿西執政五十五年相比,伊顯然是極大ê cheng差。M̄-koh Tī chit兩年中,伊並無tùi in老父瑪拿西晚年懺悔ê經驗得tio̍h教示,卻是kah in老父瑪拿西早年帶領人民敬拜偶像神明仝款,棄sak了上帝。歷代志作者tī chia,講伊所做ê甚至是比in老父瑪拿西iáu koh khah嚴重。結果伊ê臣僕起來反叛伊,kā伊刺殺死,立伊ê kiáⁿ約西亞繼承王位。

經文:

歷代志下 34:1-34:18

註釋:

Tùi第三十四到三十五chit兩章,lóng是記載有關約西亞王ê事蹟。無論tùi toh方面看,約西亞lóng是猶大王國中,值得記念ê一位君王,mā是一位成功ê領導者。列王記下第廿三章25節甚至án-ne描講述:「tī伊以前,無一個王像伊hit種盡心、盡意、盡力地事奉上主,遵行摩西所頒佈ê律法;tī伊以後,mā無一個王像伊hit種。」連先知耶利米lóng hō͘ in真好ê評價(參考耶利米書廿二:15—16)。

Chit段經文紹介約西亞起來執政ê時,雖然iáu真年輕,m̄-koh因為身邊輔佐ê大臣lóng真有智慧,幫助伊積極推動剷除所有ê異教神明之祭壇kah神廟、偶像等,帶領人民tńg來敬拜上帝。Koh khah重要ê,伊派人潔淨聖殿,mā因為án-ne tī潔淨聖殿ê時,意外地發見了律法冊,chit對kui個改革信仰運動帶來極大ê助力,這mā是約西亞成功ê所在。

第1到2節,短短兩節,卻是真重要ê踏話頭。Chia講約西亞開始繼位是八歲ê時chūn,he表示伊根本無法度料理國政,m̄-koh伊卻thang「做上主認為對ê事,效法先祖大衛王ê模樣」、「遵行上帝一切ê律法」等,這lóng tī說明伊ê身邊有真好ê幕僚幫助伊認bat上帝ê約,hō͘伊知影重要ê事,就是清除偶像神明,帶領人民tńg來到上帝ê教示,聽從上帝ê旨意。Chiah-ê重要幕僚包括先知、祭司lóng在內。Tī chit段ê時期中出現ê先知有耶利米、哈巴谷、以西結等人。In三人中間,先知哈巴谷ê時代背景比較欠缺。約西亞執政長到三十一年,這是tī主前640到609年。

第3到7節,chit段經文講伊tī經過八年後,mā就是伊十六歲ê時,就在身邊重臣輔佐之下,tī伊二十歲ê時就真積極推動宗教改革ê事,m̄-nā大力剷除所有ê偶像神明,甚至處罰hiah-ê祭拜偶像神明ê人,特別是偶像神明ê祭司,lóng kā in處死刑。M̄-nā án-ne,koh kā北國以色列一kóa城鎮ê偶像神明全lóng燒毀。換句話講,伊是只要有以色列民族khiā起ê所在,伊lóng會想出所有ê辦法帶領in重頭tńg來上帝ê懷抱。

值得注意ê是第6節,chit節講chit項改革推到「北pêng ê拿弗他利等被蹂躪過ê所在」,這表示亞述帝國對伊ê改革hō͘ in同意權?á是hit時chūn ê亞述帝國ê國勢已經衰微,致使無法度干涉約西亞改革ê工作?lóng有可能,不過以後者ê可能性比較高。

第8到9節,除了大力剷除偶像神明外,伊iáu差派三個重要領袖去重修耶路撒冷聖殿,這三人就是:亞薩利雅ê kiáⁿ沙番、耶路撒冷市長瑪西雅,kah約哈斯ê kiáⁿ約亞史官等。整修聖殿ê錢,就是tùi人民奉獻到聖殿ê錢,the̍h出來交hō͘ chiah-ê負責修聖殿ê領袖。

第10到13節,chit三個人就kā錢交hō͘負責修築聖殿ê工人,而且chiah-ê修築ê工人lóng是非常可靠ê,大家lóng盡忠於所受託ê工作,因為約西亞mā是一個忠心tī上帝ê國王。

第14到18節,當大祭司負責監督修建聖殿ê時,tī聖殿ê庫房裡發見了「上主ê律法冊,就是上帝hō͘摩西ê律法冊」,這不得à。伊趕緊the̍h hō͘沙番看。沙番真緊kā chit-ê律法冊帶到約西亞王hia,大聲朗誦律法書記載ê hō͘王聽。

經文:

歷代志下 34:19-34:33

註釋:

Chit段經文描寫約西亞王聽tio̍h律法冊所記載ê內容後,heⁿh驚kah趕緊用懺悔ê心,積極去推動改革ê工作。並且派人去訪問女先知戶勒大,對tī chhōe-tio̍h律法冊ê看法。然後,約西亞帶領全體猶大ê領袖,ài大家重新kah上帝立約,決心beh遵守上帝律法冊上ê記事去行。

發見「約」冊ê時間,大約是tī主前622年左右,mā就是約西亞廿六歲hit年。有kóa聖經學者認為「約」冊ê內容就是申命記第十二到廿七章,á是利未記第十七到廿六章。Koh khah重要ê是,約西亞是當tio̍h祭司、利未人kah所有其他人民宣讀「約」冊ê內容。

第19到21節,約西亞聽tio̍h沙番念ê律法冊,heⁿh驚kah趕緊拆裂衫褲表示懺悔,然後馬上派人去求問上帝,希望koh khah清楚上帝會án-ne懲罰北國以色列,mā可能ē-sái猶大仝款面臨上帝ê審判。

第22節,chiah-ê代表由希勒家祭司帶領,in去求問一個女先知,名叫戶勒大,kā tī聖殿發見了律法冊ê事kā戶勒大講。

第23到28節,chit段經文是戶勒大tùi上帝領受ê信息轉告hō͘ chiah-ê約西亞ê代表,ài in tńg去kā上帝ê話講清楚。Chit-ê信息ê內容就是耶路撒冷kah猶大人民因為棄sak上帝,致使上帝ê憤怒無法度止息。M̄-koh約西亞因為對上帝忠實,因為án-ne,上帝會tī伊往生chìn前,bē懲罰猶大。這表示上帝會tī約西亞安然地離開世間了後,chiah出手嚴厲懲罰猶大人民。

第29到30節,約西亞聽tio̍h先知戶勒大chit種信息後,並無停止改革信仰ê動作。伊召集所有ê猶大kah tòa tī耶路撒冷ê所有領袖,lóng聚集到聖殿,mā包括祭司、利未人,kah thang來ê人民,無論是甚麼人,ài in lóng到聖殿注意聽所發見ê約冊。

第31到33節,約西亞khiā tī聖殿大柱邊,向上帝立約,表示beh聽從上帝ê話,一心一意遵行律法誡命,凡約冊上所記載ê,lóng會切實遵行。伊mā tio̍h所有出席在場ê人,以及全國人民確實遵行chit項立約。就án-ne,tī伊活teh ê日子裡,猶大人民確實án-ne做。Mā因為約西亞án-ne推動,hō͘耶路撒冷koh一pái成做「耶和華宗教」ê信仰中心。

經文:

歷代志下 35:1-35:19

註釋:

Ná親像伊ê a祖希西家改革ê時所做ê仝款,約西亞mā是帶領人民遵守Pôaⁿ過節,透過守chit節期,表明上帝chiah是真正in性命ê主,是kui個以色列民族生存ê óa靠。

Chit段經文記載約西亞除了下令tio̍h祭司、利未人忠於職守,全心全力tī聖殿執行in ê任務,而且ài全體人民遵守Pôaⁿ過節,伊beh親自帶領以色列人民遵守Pôaⁿ過節,這kah伊ê阿公希西家仝款(參考第三十章)。

第1到2節,約西以照摩西律法規定ê每年正月14日就是守Pôaⁿ過節ê時間,並且下令眾祭司tī聖殿中執行任務。

第3到5節,chia講約西亞下命令,m̄-thang koh再移動約櫃,這表示約櫃bat被移動過,真可能是因為tī瑪拿西時代,因為kā偶像神明khǹg入去聖殿,致使in為tio̍h維護約櫃ê「聖潔」,而kā約櫃「藏」起來!約櫃kah守Pôaⁿ過節,對kui個以色列民族來講必定有非常ê意義,因為這兩項lóng是表明in kah上帝之間有bē-tàng分離ê關係。然後伊命令祭司kah利未人lóng tio̍h遵守祖先大衛王kah所羅門時代所訂立ê職責去辦理in應該有職分。M̄-nā án-ne,為tio̍h beh徹底實行chit項守Pôaⁿ過節ê規例,伊iáu beh祭司kah利未人去幫助每一個家庭執行chit項「潔淨人民心靈」ê工作。Á chia所講ê「以色列ê每一個家庭」,指ê是m̄-nā tī南國猶大,甚至包括北國以色列人民ê家庭。

第6到9節,為tio̍h beh發動全體人民尊守Pôaⁿ過節,約西亞家己「捐出三萬隻綿羊、小羊、小山羊,kah三千頭公牛」。因為有伊帶頭捐獻,因為án-ne伊ê臣僕mā自然tek kah進,其他大祭司、祭司、利未人領袖等lóng跟tòe捐獻。這mā說明tī上位者,若是用身作則,身邊ê臣僕mā會跟tòe學習。

第10到15節,chit段經文thang看出約西亞執行Pôaⁿ過節ê禮儀,是非常有計畫,而且按照律法冊上ê規定按部就班地做。伊m̄准祭司kah利未人是tòe性,á是用應付ê態度,卻是頂真地執行每一個動作。Chiah-ê祭司kah利未人mā照規定kā獻祭過ê cheng-seⁿ分hō͘人民。然後利未人來為家己kah祭司預備需要ê一切。大家lóng有份,bē有人欠缺。

第16到19節,ná親像chia所講ê,因為約西亞堅持遵守律法冊上ê規定,因為án-ne,所有一切禮儀就kah-ná tńg來到古老時代。時間長到七工,全體以色列人民lóng歡喜慶祝Pôaⁿ過節kah除酵節。這mā是tùi先知撒母耳時代以來,未bat有過chiah-ni̍h頂真ê態度守Pôaⁿ過節à。這表示約西亞所做ê,遠比伊ê a祖希西家iáu koh khah徹底,ē-sái講是一個非常難得ê君王。

經文:

歷代志下 35:20-35:27

註釋:

Chit段經文簡單ê紹介約西亞晚年ê情況,含意真深。Mā說明約西亞對國際情勢判斷有錯誤,致使出兵去攻打正準備去phah亞述ê埃及軍隊,結果家己卻無幸戰死戰場。

第20到22節,tùi chit段經文thang看出埃及王尼哥其實對約西亞iáu真細jī ê。伊無希望約西亞出來阻擾伊討伐亞述。這mā反應出當時ê亞述當teh衰弱中,chiah hō͘約西亞有機會順利而且大刀闊斧地進行宗教改革,而且ē-tàng hō͘北部ê以色列國某一kóa地區ê以色列人民mā tòe伊。埃及想beh出兵,真可能kah當時巴比倫當teh興起,埃及王尼哥想beh藉tio̍h打壓亞述,嚇阻巴比倫日益壯大ê勢力。M̄-koh顯然對國際情勢m̄是真清楚ê約西亞,卻m̄聽尼哥ê建議,iáu是堅持出兵去阻止埃及。

第23到24節,就tī米吉多ê戰場所在,約西亞被埃及軍ê箭射中而重傷。伊就án-ne往生。真可惜,chiah只有三十九歲而已。

第25到26節,伊ê往生連先知耶利米lóng感覺非常哀傷,特別為約西亞作哀歌。真可惜chit本所講ê「哀歌集」已經失傳。M̄-koh伊ê往生,mā是猶大kah耶路撒冷居民siōng-kài艱苦心ê事。

經文:

歷代志下 36:1-36:12

註釋:

Chit章記載猶大末期幾位君王治國ê情況。晚期ê猶大已經oh得有甚麼作為,chiah-ê君王lóng是附庸tī埃及、巴比倫等帝國ê轄制下,oh得有甚麼改革作為,只有ē-tàng被逼kah一定tio̍h tī強國之下勉強活落去,到最後soah被巴比倫所滅亡。不過,歷代志作者tī chit本經冊ê結尾,是用塞魯士ê興起之記事,hō͘ chit本歷代志ê史冊kah以斯拉記連接了起來。

Chit段經文共計記載四個王,包括有約哈斯、約雅敬、約雅斤,kah末代君王西底家等四位。

第1到4節,chit段經文記載約西亞ê kiáⁿ約哈斯繼承王位。當時伊二十三歲。M̄-koh統治ê時間非常短,kan-taⁿ有三個月時間(主前609年)而已,ē-sái講是猶大國歷代以來做王siōng短ê一位。Koh khah可憐ê是,伊iáu被埃及王尼哥俘虜,並且用伊來要脅猶大一定tio̍h向埃及進貢chē kah「三千四百公斤」ê銀á,kah「三十四公斤」ê金子。M̄-nā án-ne,伊iáu被廢了王位,改由伊兄哥以利亞敬繼承王位。伊mā被尼哥改名成做約雅敬。埃及國王ē-tàng kā猶大王ê名改過來,已經真清楚teh表示埃及對猶大有絕對宗主國ê權柄。

第5到8節,chit段經文是記載被改名ê約雅敬執政ê記事。伊治國ê年代是tùi主前609到598年。

基本上,約雅敬並無帶領猶大人民繼續敬拜上帝,卻是去拜偶像神明。先知耶利米bat寫詩歌撻伐伊,講伊tī國家hit種困境之下,iáu大興土木建造堂皇ê宮殿享受(參考耶利米書廿二:13—19),真是悲哀ê一件事。

Ná親像頭前所講ê,巴比倫ê興起,甚至連埃及lóng無法度保護家己ê附庸國猶大。列王記作者講「埃及王kah伊ê軍隊無koh出兵到埃及境外ê所在,因為巴比倫王chit-má控制所有以前屬tī埃及ê土地,tùi幼發拉底河直到埃及北部邊界」(參考列王記下廿四:7)。約雅敬就tī巴比倫帝國侵犯耶路撒冷ê時被俘虜à。列王記下第廿四章記載伊之所以被俘虜,是因為伊bat想試圖脫離巴比倫宗主國ê掌控,m̄-koh失敗了,而且嚴重ê失敗。

第9到10節,這是有關約雅斤繼承王位ê記事。伊是tī主前598到597年之間。伊執政時間比約哈斯加出十工,是三個月koh十工。Tī伊ê年代仝款,只有ē-tàng被巴比倫帝國hō͘取hō͘求,lóng無抵抗ê能力。後來,伊mā被巴比倫俘擄,然後由伊ê a叔西底家繼承伊ê王位。照列王記作者ê描述,講伊tī巴比倫做人質ê時代,後來受tio̍h禮遇(參考列王記下廿五:27—30)。

第11到12節,續接約雅斤為王ê是西底家,伊治理ê時間是tī主前597到586年。伊是猶大國最後ê一位君王。雖然tī伊執政時代bat試圖脫離巴比倫統治,ē-sái講是m̄-nā無成功,顛倒,iáu受tio̍h殘酷ê懲罰。巴比倫王尼布甲尼撒tī攻落耶路撒冷城了後,tī利比拉審判伊,並且tī伊目睭前刣死伊ê kiáⁿ,然後kā伊ê兩隻目睭挖出來,iáu用銅鍊鎖tiâu伊,然後kā伊帶到巴比倫(參考列王記下廿五:6—7)。歷代志ê作者講這是因為伊無聽從上帝ê話,而且帶領人民去敬拜偶像、污穢聖殿,不聽從先知耶利米ê警告,拒絕悔改,因為án-ne chiah會帶來án-ne大ê災難。

經文:

歷代志下 36:13-36:24

註釋:

Chit段經文記載耶路撒冷被攻陷,聖殿被燒毀,猶太人被掠到巴比倫去,猶大國就此滅亡,這是主前586年。另外一段記載波斯帝國消滅巴比倫帝國,這是主前538年ê事。波斯帝國皇帝塞魯士tháu放所有被掠到巴比倫ê以色列人民回鄉。

    第13到16節,原本西底家就bat chiù-chōa beh效忠巴比倫帝國ê,m̄-koh因為伊聽信身邊幕僚錯誤ê判斷,認為背叛巴比倫會hō͘伊tī人民中間koh-khah有權威。照歷代志作者ê見解,其實,上帝早就透過巴比倫來懲罰西底家,因為伊固執m̄肯悔改歸向上帝。理由就是第14到16節所講ê,in m̄-nā m̄肯悔改,iáu嘲(sau)笑上帝ê奴僕對in ê勸勉,上帝只好用chit種方式來教示西底家kah猶大人民。

第17到19節,說明巴比倫王尼布甲尼撒殘酷ê一面,對tī任何猶大人民lóng m̄憐憫á是同情。伊kā聖殿kah王宮,以及所有官員ê財寶lóng洗劫一空,全部帶到巴比倫去,伊m̄-nā燒毀了聖殿,mā摧毀了耶路撒冷城牆。

第20到21節,巴比倫王尼布甲尼撒koh khah進一步kā戰後餘生ê人,全部lóng掠到巴比倫去做奴隸。Tùi主前586年開始,直到主前538年波斯帝國興起,phah敗巴比倫chiah停止。

第22到23節,chit兩節經文應該是歷代志ê「後記」。真簡單地紹介波斯帝國興起取代了巴比倫帝國,而且波斯帝國ē-sái講是kah巴比倫帝國非常無仝;前者殘酷對待以色列人民,後者則好款待,並且iáu允准in tńg去故鄉重建家園。Chiah-ê事lóng記載tī以斯拉記、尼希米記等冊上。另外mā thang tùi以斯帖記、但以理書中看tio̍h一kóa以色列人民tī波斯帝國統治下ê生活景況。

重新查詢