重新查詢  A+放大  A-縮小
經文:

約翰一書 1:1-1:10

註釋:

短短只有10節ê一章經文,卻講出chit本書信兩個重要ê主題:一是性命之道,就是tī耶穌基督ê性命裡。二是上帝是疼,這疼帶來性命ê亮光,這光hō͘所有信耶穌基督ê人,lóng thang看見性命ê ǹg望。

第1節,作者開始就清楚寫出伊會án-ne寫chit-ê書信ê原因,就是beh kā伊所知影ê有關「性命之道」陳述hō͘大家明白。作者講這「性命之道」是伊(mā可能iáu有其他做伙同伴)「聽見」,而且「親目看見」,又koh是「親手摸過」ê。作者用chit種方式teh說明一件事:伊chit-má所講ê lóng是事實。

Koh講,chit封書信iáu有一個特別ê所在,就是無作者ê自我紹介。這kah第一世紀ê時代,寫書信ê lóng是作者先自我紹介ê方式大無相仝。
Chia所提起ê「性命之道」中ê「道」,是teh指眾使徒所beh見證ê信息,就是關係性命得tio̍h拯救ê好消息ê意思。因為án-ne作者用「阮」,這表示m̄是只有一個人ê見證,卻是有大多數共同ê見證。

作者會強調所beh見證ê信息,lóng是經過「親手摸過」,這是因為早期教會中有人認為耶穌基督並m̄是真實ê人存活tī chit世界上,卻是一種虛幻、想像ê、m̄是真實ê。如果是虛幻ê、想像ê存在,就無可能摸會tio̍h。因為án-ne,當做者強調「親手摸過」chit句話ê時,是teh說明chit件事確實是真正,m̄是虛幻想像ê,伊kah其他同工就是beh見證chit件in親耳聽見、親目看見,並且iáu用in ê手摸過,chiah做出chit種見證。

第2節,tī chia作者強調chit-ê in聽過、親目看見、親手摸過ê性命,就是「永恆ê性命」。Á這mā是約翰福音siōng中心ê一個主題,就是有關「永恆ê性命」問題。如果講tio̍h「永恆性命」,就是teh表示這性命是過去就存在、chit-má mā存在,將來一直存在。換句話講,性命無時間ê限制,卻是超越時間ê。作者講chit-ê「永恆性命」是kah上帝同在ê性命,而上帝乃是永恆ê上帝,因為án-ne,kah上帝連結做伙ê就是永恆ê性命。

第3節,chit節是續接第1節所講ê,傳揚耶穌基督福音ê人,siōng主要ê工作,就是beh kā「所看見」、「所聽見」ê事實見證出來,並且「傳hō͘」接受福音信息ê人。作者tī chia koh khah進一步kā上帝、耶穌基督kah所有相信ê人,三者之間連結做伙。Tī耶穌基督內面,信ê人會得tio̍h永恆ê性命,而這永恆ê性命就是kah上帝連結做伙ê。

作者tī chia用「團契」chit-ê字,chit-ê字ê希臘文是「koinonia」,意思就是緊tòe在身邊、mā是「一部分」ê意思。換句話講,tī耶穌基督ê人,就是kah耶穌基督分bē開,是交織相連tio̍h,mā同時kah上帝ê關係親密做伙ê意思。

第4節,chit節講出傳福音ê人,kah聽而相信ê人lóng會得tio̍h仝款ê結果—「喜樂滿溢」。所謂「喜樂滿溢」,thang參考詩篇第一三三篇所形容ê,兄弟姊妹和睦相處,自然就會散發出特別ê香氣。

第5節,「上帝是光」,這mā是約翰福音作者非常重要ê見證,Tī該福音書中,作者就án-ne講:「光照射烏暗,烏暗從來m̄-bat有贏過光。」(約翰福音一:5)然後koh講:「he kan-taⁿ講是真光,來到世間照亮全人類。」(約翰福音一:19)然後tī第八章12節,耶穌基督就án-ne對大家講:「我是世界ê光;跟tòe我ê,會得tio̍h性命ê光,絕對bē tī黑暗裡行。」而chit-má約翰一書ê作者講「上帝是光」,並且講這是tùi耶穌基督聽tio̍h ê消息。因為án-ne,有可能就是作者聽過耶穌講「我是世界ê光」chit句話,並且確定耶穌基督就是tùi上帝來「道成肉身」tī人中間,因為án-ne,作者用「上帝是光」來替換耶穌基督所講ê「我是世界ê光」,就是為tio̍h是beh表示一個重要ê信息:tī耶穌基督內面,就有性命ê ǹg望。

第6節,chit節真清楚說明一個真正信靠耶穌基督ê人,就是一個性命有ǹg望ê人,這ǹg望就是tī koh活kah永恆ê性命。作者tī chia講信耶穌基督ê人,就是kah伊同屬一個「團契」,mā就是交織做伙ê意思。因為án-ne,如果一個自稱是基督徒ê人,必定是對koh活ê性命koh再存 chiok厚ê ǹg望,chit種人才是明白上帝救恩ê人。

Chit節提起「行為bē合真理」chit句話,意思是teh指行為無符合上帝ê旨意á是教示。這真清楚teh強調:行為kah信仰一定tio̍h相符合,若無,就是虛假、不實在,mā是自我欺騙。

	第7節,tú好kah第6節相對應;tī第6節講tio̍h行為無符合上帝教示者,就ná親像生活tī黑暗中ê人仝款,性命無甚麼好ǹg望ê。M̄-koh相對ê,就是生活樣式符合上帝旨意ê人,in就ná親像生活tī光明中,這是kah上帝來往關係密切ê人。

	Chia特別強調一個人若是kah上帝和好,伊就是hō͘「耶穌ê血洗淨」一切ê罪ê人。會án-ne講,就是beh phah破當時流傳tī教會中ê錯誤觀念,認為耶穌基督並m̄是真實生活tī chiah-ê世界上。因為若是耶穌基督無真實存活tī chiah-ê世界上,就m̄免談耶穌基督ê死;因為耶穌基督確實死tī十字架上,chiah會流血。Á幻影是無血肉之軀ê,會流血就表明是真實ê肉身。

	「耶穌ê血洗淨咱一切ê罪」,這是teh說明信耶穌基督流ê血洗淨人ê罪,hō͘人「聖潔」。因為上帝是聖潔ê,祂希望祂ê子民mā是聖潔ê(參考利未記十一:45、十九:1—2、二十:7、26)。

第8節,所謂「有罪」,tī基督教信仰中,並m̄是指hiah-ê律法上ê問題,卻是teh表示kah上帝ê關係破壞、疏遠à。Á是講tùi上帝ê救恩中被隔離出來ê意思。

第9節,chit節提起一個人若是知影家己ê軟弱、有限,就是等於承認家己是一個有罪ê人,chit種人,上帝必定會願意「赦免」,因為上帝乃是「信實公義」ê。聖經teh講上帝ê「公義」ê時,表現出來ê就是上帝ê憐憫kah慈愛。Á上帝ê憐憫kah慈愛,就是tī耶穌基督身上顯現出來。使徒保羅tī羅馬書第三章26節說明上帝ê公義,顯明出來就是祂拯救ê疼。

上帝是「信實公義」ê上帝,這是kui本聖經真重要ê信息。當聖經講上帝是「信實」ê時,chit-ê信實kah「約」有關係,表明上帝是一個守「約」ê上帝(參考詩篇八十九:28、34)。

第10節,chia是第三pái用「如果阮講」chit種詞句(參考第6節、第8節),這是作者想beh戳破當時hiah-ê亂傳信息者所用ê語句之方式。因為án-ne真清楚ê kah聽講「如果阮講」chit種語詞。作者講一個人若是m̄承認家己「犯過罪」,這kah拒絕上帝tī耶穌基督內面ê疼仝款,chit種人無辦法見證上帝是疼。因為上帝ê疼就是tī耶穌基督內面顯現出來ê。Mā因為耶穌基督ê疼,chiah hō͘人ē-tàng kah上帝和好。

經文:

約翰一書 2:1-2:29

註釋:

一個基督徒既然領受了新ê祝福而擁有新ê性命,必定會有新ê命令ài伊去遵行。約翰一書ê作者tī chit方面寫了真chē,這mā是第二章重要內涵之一。Tī這章,作者幾個重要觀點:一是耶穌基督ê疼,hō͘人ê罪因為án-ne得tio̍h贖回。二是人tī耶穌基督ê救恩裡,真自然tek會kā耶穌基督ê疼表現tī生活中,chit種性命,ná親像看見亮光仝款,充滿ǹg望。M̄-koh相對ê,就是猶原活tī黑暗中。三是作者提醒所有ê信徒,tio̍h注意chit-ê世界ê誘惑,小khóa不慎就會掉落tī陷阱中。Chiah-ê誘惑包括肉體、眼目的慾望,kah人ê虛榮心。四是作者提醒大家tio̍h謹守起初所聽tio̍h ê福音信息,mā就是tī tāi先感動人心ê信息。

第1節,tī約翰ê書信中用「眾細kiáⁿ」chit句話相當chē,親像除了chit節外,iáu有第二章12節、18節、28節、第三章7節、18節、第四章4節、第五章21節等等。作者用chit種稱呼只有一個目的,就是beh hō͘讀者感覺作者看待讀者ná親像家己ê kiáⁿ一般hit種ê親密。

Chit節提起講寫phoe ê目的是beh hō͘受信ê讀者「不犯罪」,這包含兩種意義,其一就是teh指對耶穌基督有明確ê信心,m̄-thang棄sak原來所持有對耶穌基督ê信仰。其二是teh指生活規律上bē有違法亂紀ê行為,mā就是一般所講ê,信耶穌基督ê人應該活出信仰ê好模樣,hō͘人看出耶穌基督ê信徒kah一般人無仝款。因為án-ne,chia所講ê「不犯罪」,是有含警戒作用,是預防在先,因為已經有過去ê經驗。

第2節,chia提起tī耶穌基督內面顯現出來ê就是上帝豐富ê疼。作者提起耶穌基督ê赦免有三個特點:

一是伊ê赦免是「公義ê」。Chia所講ê公義,就是憐憫、赦免ê疼。

二是耶穌基督「犧牲家己」。Chia ê犧牲是一種奉獻性命ê疼。因為耶穌基督死tī十字架上,是ná親像為tio̍h贖罪而獻tī祭壇上ê祭物,chit種獻祭是一種「贖回祭」,mā稱做「贖罪祭」。耶穌基督ná親像chit種贖罪ê牲祭仝款,kā性命獻祭tī十字架上。

三是耶穌基督ê贖罪是為tio̍h「全人類ê罪」,卻m̄是只為tio̍h猶太人而已。Chit點非常重要,mā是kui本新約聖經所beh宣揚ê見證。

第3節,chia所用ê「認bat」,希臘文是「ginoskomen」chit-ê詞,mā是約翰chit本書信ê作者siōng ài用ê一個詞,tī chit本書信中則了二十六pái。Chit-ê詞ê意思是teh指:經過直接ê接觸而認bat。Án-ne講起來,一個人認bat上帝,是因為kah上帝有直接接觸過。M̄是憑空想像,mā m̄是單單tùi別人聽tio̍h。Ná親像作者tī第一章特別強調「親手摸過」(參考一:1)仝款,chit-má是講因為有過接觸而「認bat」。換句話講,chit-ê「認bat」是確確實實ê,m̄是捏造ê。

第4節,作者強調一個信徒一定tio̍h有一個基本原則,就是信仰kah行為是分bē開ê。當基督徒講伊「認bat」上帝ê時,卻m̄聽上帝ê話,á是m̄遵守上帝Tī聖經中ê教示,án-ne beh對人講「認bat」上帝,是真諷刺mā是「講白賊」ê話。雅各書ê作者就是án-ne強調ê,認為一個人若是beh講家己有信心,就一定tio̍h tī行為上見證出來,若無,hit-ê人ê信心就是死ê(參考雅各書二:17)。

第5到6節,chit兩節是繼續teh解釋第4節所提起ê,一個真正認bat上帝ê人,一定tio̍h tī行為上顯明伊有確實遵行上帝ê道,就是性命之道(參考一:1)。作者tī chia指出ê「上帝ê道」,是比第3節所提起ê「上帝ê命令」iáu koh khah闊;上帝ê命令,指ê是誡命、典章、規例等。M̄-koh「上帝ê道」則包括所有ê教示、勸勉、指引,mā就是上帝指示ê一切旨意。
Tī chia,約翰書信ê作者強調真正疼上帝,就是會遵照「耶穌基督ê言行生活」去行。Á án-ne行,就是teh表明kah耶穌基督連結做伙。Thang用一句話來表明耶穌基督ê言行kah生活,就是一個「疼」字。因為「疼」就是「完全」上帝ê旨意,mā是實踐了上帝ê道。

第7到8節,tī第3到4節提起基督徒應該遵守上帝ê命令,chit-má chia提起「舊ê命令」是tùi「一開始就領受」,而且「已經聽過了ê信息」,這thang tùi兩個方面來了解:

其一是teh指摩西律法ê教導,就是beh全心、全情、全力疼上帝(參考申命記六:5),mā tio̍h疼厝邊ná親像家己(參考利未記十九:18,路加福音十:26—28)。作者講這m̄是新ê,卻是舊ê。

其二是當加入基督徒信仰團契ê時,聽tio̍h耶穌基督ê教導是beh彼此相疼(參考約翰福音十三:34—35)。Chia雖然所講ê是「新ê」,其實,mā是「舊ê」,這ná親像第7節開始所提起ê,「m̄是新ê命令」。因為耶穌基督已經教導過,只不過是koh一pái提起而已。

耶穌基督ài所有跟tòe伊ê人lóng kā chit「彼此相疼」ê教示列入tī團契生活,因為只有疼chiah ē-tàng hō͘一個團契親密地結合做伙,ná親像耶穌基督kah上帝連結,成做一體ê樣式(參考約翰福音十七:11b、21—23)。

	第9節,chia作者用「光明」kah「烏暗」做譬喻,主要是希望讀者一看就清楚明白,光明kah烏暗是無法度並存ê。Ná親像tī一個人若是有疼,就bē有恨。Ná親像tī一間房厝內,若是有光照耀ê所在,烏暗一定會消失仝款。作者án-ne講,就是tī進一步解釋第5節所提起ê「hiah-ê講伊有上帝ê性命ê,應該照耶穌基督ê言行生活」chit句話,就是hō͘生活見證出信仰ê內涵,m̄是只停留teh講講而已。

	第10節,疼,如果是用「光」來代表,án-ne,「光」就是引chhōa性命ê路徑。有「光」teh引chhōa ê人,當然就bē「失足犯罪」,koh khah bē成做別人跋倒ê絆腳石。

	第11節,chia講「hiah-ê恨兄弟á是姊妹ê,就是tī黑暗中」,chit種人是ná親像「目睭chheⁿ-mê了」ê人仝款,性命失迷方向。Án-ne,thang了解作者tī chia所beh說明ê就是:hō͘人棄sak上帝救恩ê,就是絆腳石。這mā講出初代教會hiah-ê傳說耶穌基督無真正生活tī chit世界上ê人,就是chit種人,in hō͘人離開koh活ê耶穌基督ê救恩,chhōe bē-tio̍h性命koh活ê方向,ná親像chheⁿ-mê人仝款。

第12到14節,細注意一下短短三節經文中,一再出現ê一句話,就是「我寫phoe hō͘ lín」,chit句話共計出現六pái,其中有三pái出現tī第14節中。Thang kā chit段經文分做兩組,其一就是第12到13節,其二就是第14節。Á這兩組ê對象程序lóng仝款,先tùi「眾細kiáⁿ」,然後是「眾父老」,koh來就是「眾青年」。

Tùi作者用「眾細kiáⁿ、眾父老、眾青年」等chit種詞句來看,kah-ná讀者分做三種無仝ê年齡層,其實,並m̄是指年齡,卻是用信仰ê內涵來區分。Mā就是有人tī信仰上真堅定,m̄-koh有ê人卻是初信者。

M̄-koh有另外一種看法,認為chia只有兩種對象,其一就是tī信仰上比較有資深經驗者,另外一種則初信者,ná親像嬰á仝款,而所謂「眾細kiáⁿ」,是包括所有ê讀者在內。對hiah-ê tī信仰上有過歷練、成熟ê長者,作者tī chia提起in認bat「hit位tùi太初就已經存在ê」,chit句話m̄-nā teh講萬物ê起源tùi上帝來,mā同時teh講上帝早就已經存在了(參考出埃及記三:14)。
第三個對象就是hiah-ê「眾青年」,是teh指hiah-ê tī信仰上算是tú入門ê,á是tú加入基督徒信仰團契ê人。作者tī chia提起兩件重要ê事,其一就是tī第13節講chiah-ê「少年人」已經「贏過hit-ê邪惡者」,其二是講in「強壯」,因為有「上帝ê道」活tī in ê性命中。

所謂「贏過hit-ê邪惡者」,指ê就是第三章8節、10節所提起ê「魔鬼」(參考約翰福音八:44)。魔鬼,這是teh指誘惑人棄sak上帝ê話ê氣力,因為án-ne,chia指ê就是chiah-ê少年人已經贏過chit種誘惑。如果「少年人」指ê是hiah-ê初信ê信徒,á是用現代teh描述信徒ê話語,指ê就是「第一代」信徒來講。

Koh講,作者mā提起因為有上帝ê話tī in ê性命中,hō͘ in tī信仰上mā真強ê意志力,不受tio̍h魔鬼ê誘惑,並且贏過hit-ê邪惡者。Chit點mā往往是第一代信徒siōng美好ê見證。

第15到16節,chia所提起ê「世界」,指ê就是第16節所講ê「肉體ê慾望、眼目的慾望、人ê一切虛榮」等等chiah-ê領域講ê。卻m̄是上帝創造hō͘人類kah所有萬物所生存ê chit-ê世界。作者會án-ne講,是希望讀者千萬m̄-thang kā疼ê對象弄錯,而是beh先弄清楚。作者kā「疼上帝」kah「疼世界」作一個對比,ài讀者一定tio̍h kā二者分清楚,並tī其中選一。Chit種寫作ê方式,mā是chit本書信作者siōng歡喜使用ê筆法,伊用「光明」kah「烏暗」譬喻做「性命」kah「死亡」,然後tī chia用「疼上帝」kah「疼世界」譬喻「永遠生存」kah「消失去」。

Chit種鮮明ê對比就是beh hō͘讀者容易明白其中ê差別,tī選擇ê時chūn就bē有混淆,á是憢疑。作者beh kā所有ê讀者講,tī chiah-ê世界上有真chē誘惑充滿teh生活ê每一個角落,chiah-ê lóng是hō͘人離開上帝ê教示。

第17節,chia提起「疼上帝」kah「疼世界」對比ê結果,就是chit-ê世界所帶hō͘人ê慾望,lóng「當teh消失去」,而「疼上帝」而且去遵行上帝旨意ê人「會永遠生存」,這是teh指得tio̍h永恆性命,mā是teh指擁有「疼」ê性命。使徒保羅講過「疼是永恆ê」(參考哥林多前書十三:8a),其它ê一切lóng會跟tòe時間ê消失去,á是跟tòe世間ê轉變有變化,甚至消失殆盡。

Chia強調「實行上帝旨意ê人」chit句話,tú好回應了耶穌基督所講ê教導(參考馬可福音三:35)。Chit句「實行上帝旨意ê人」,表示出來ê意義,就是kah耶穌基督建立「親屬」ê人,而耶穌基督kah上帝是成做一體ê(參考約翰福音十七:11),因為án-ne這確實去實踐了上帝旨意ê人,是kah上帝有bē-tàng分ê關係。

第18節,作者講「世界ê終局就beh到à」,表示上帝審判ê時刻teh beh跟tòe來到。Chit時「對敵基督者beh來」,其實,thang理解世界末日會án-ne來臨,是因為chiah-ê對敵基督ê勢力囂張大膽,甚至m̄ kā上帝khǹg tī眼內。因為án-ne,引起上帝ê忿怒,決定嚴厲懲罰chiah-ê對敵基督者。

「對敵基督」chit-ê詞只出現tī約翰ê書信中,tī本冊第二章22節、第四章3節、約翰二書7節等等lóng有。Tī chiah-ê經文中,作者提起幾種「對敵基督」者ê特性:一是in否認耶穌基督真正降生tī chiah-ê世界上(參考四:1—3,約翰二書7節),mā同時否認耶穌是性命ê救主(參考二:22)。二是in拒絕聖父上帝就是萬物性命ê創造者kah主宰(參考二:22)。三是in無願意公開承認聖父、聖Kiáⁿ(參考二:23)。四是in歡喜講白賊(參考二:22),因為chit種人就是心內m̄信有上帝ê人。Tī chiah-ê經文中thang明顯看出作者用「對敵基督」chit-ê詞句ê時,所beh講ê就是:只要是拒絕承認耶穌基督是真正活tī chiah-ê世界上,而且m̄承認chit-ê世界萬物lóng是tùi上帝來創造ê人,就是「對敵基督者」。

第19節,chit節說明基督徒所建立ê信仰團契—教會,就是承認耶穌基督就是性命ê主;伊真正活tī chiah-ê世界上,bat kah人仝款生活tī chiah-ê世界。Tùi chia thang看tio̍h早期教會內部發生ê問題之一,就是有人因為m̄承認耶穌基督是一個真正人,而離開教會。

第20節,chia ê「聖者」,是teh指耶穌基督。注意,這m̄是只表示尊敬ê稱呼,卻是含帶有「賜永生話語」ê意思。因為án-ne,「聖者」mā teh表明是ē-tàng hō͘人得tio̍h永恆性命ê氣力,mā是有含潔淨人心靈ê氣力(參考馬可福音一:24)。

「恩膏」,chia tī希臘文並無「恩膏」chit-ê字,只有「膏」而已。這有兩方面ê意思,其一是teh指貴重物件,古代用香油來抹tī君王á是特定ê對象身上,hō͘ chit-ê受膏者得tio̍h人民ê尊崇,mā同時表示上帝會賜hō͘這受膏者有「一粒新ê心」,而且被聖神充滿tio̍h(參考撒母耳記上十:9—10)。

其二,chit-ê「膏」iáu有另外一個意思,是teh指對上帝有明確ê認bat。這mā是講做一個人hō͘ 上帝ê恩典充滿ê時,chit-ê人是對上帝有清楚認bat ê人,bē受tio̍h迷惑á是誘惑而離開上帝ê救恩。

第21節,chia指出「真理」kah「虛謊」是相對立ê;真理,所表示出來ê,就是實在。虛謊,意思就是不誠實ê。作者講只有確信耶穌基督就是真實活tī chiah-ê世界,而且性命ê救主,chiah會看chit-ê書信,mā是伊寫chit-ê書信ê主要目的,為tio̍h是beh幫助大家koh khah清楚信仰。

第22到23節,chit兩節進一步teh解釋甚麼人是對敵基督ê人。Tī chia作者講hiah-ê專門teh教會中講白賊ê人就是。Kā第22節對照第二章4節來看,就會koh khah清楚作者ê用心。「講白賊」所指ê,就是既然講「認bat上帝」,就應該tio̍h清楚知影上帝kah祂ê獨生kiáⁿ耶穌基督是無法度分開ê,既然承認上帝是聖父,án-ne就應該承認上帝ê kiáⁿ耶穌基督就是聖Kiáⁿ。因為án-ne,作者tī第23節用相對性ê句話,講出真正信徒就是承認上帝是疼,而祂ê疼是透過耶穌基督ê救贖恩典顯明出來。相對ê,若是m̄是認chit件事,等於否認上帝是疼仝款。

第24到25節,「謹守當初所聽tio̍h ê信息」,這是teh指一個基督徒怎樣接觸tio̍h福音ê信息,並且感動soah決定接受,這是非常珍貴ê信仰,m̄-thang放棄。「當初所聽ê信息」,mā是teh指siōng單純ê信仰內容kah認知。作者講án-ne就會「常常活tī聖Kiáⁿ kah聖父ê性命裡」,chit句話講出一個純潔信仰者siōng珍貴ê所在,ná親像耶穌基督所講ê:「心地純潔ê人jōa-ni̍h-á有福ah;in ài beh看見上帝!」(馬太福音五:8)所講ê「活tī聖Kiáⁿ kah聖父ê性命裡」,這表示chit種人必定kah上帝,以及耶穌基督分bē開。
「永恆ê性命」,這是有含祝福ê「應允」。只要是kā當初所聽ê信息護守tiâu,無放棄,mā無遺失,chit種人lóng會因為án-ne得tio̍h耶穌基督所應允「永恆ê性命」之福氣。

	第26到27節,作者講伊寫chiah-ê有關永恆性命ê事,主要是teh拆破hiah-ê混入教會「欺騙」信徒ê人。因為in一再強調耶穌基督並無真實地活tī chit世界上。M̄-koh這真清楚:如果無耶穌基督真正活tī chiah-ê世界上,就bē有伊死tī十字架上ê事件,mā就bē有koh活ê神跡顯chit-má眾人面前。

	Chia ê「伊ê靈」,這tī中文《和合本版本》用「恩膏」,tī《台語漢字本》聖經用「抹油」,《呂振中教授版本》用「膏沐」,天主教《思高學會曉版本》用「膏傅」,這是因為古人認為做一個人被油膏抹ê時,表示chit-ê人擁有特別ê權力、地位。Tī chia mā有含chit種意思,表示當耶穌基督kā伊ê靈充滿tī甚麼人ê身上ê時,這就kah-ná耶穌基督以貴重ê香膏油傾倒tī chiah-ê人ê身上仝款,ē-sái chit-ê人充滿力量。因為án-ne,tī chia所講ê「恩膏」、「抹油」等,lóng是teh說明來自耶穌基督ê靈充滿、灌ak仝款ê意思。Chit種人已經領受耶穌基督ê教導,就「無需要別人ê教導」,作者ê意思就是teh指hiah-ê用真深奧ê話語,並無一定就是tī信仰上有幫助ê教導。因為真正教導是來自耶穌基督ê靈,伊ê教導chiah是真實ê。使徒保羅就bat表示伊除了講耶穌基督ê受難tī十字架頂之疼以外,m̄免「甚麼華麗ê詞藻á是高深ê學問」來宣講上帝ê奧秘(參考哥林多前書二:1)。

	「Lín tio̍h順從聖神ê教導」,chit句話ē-sái講是作者誠心ê建議。聖神chiah是帶領人認bat上帝救恩ê氣力,m̄是人ē-tàng做甚麼大事,特別是關係拯救性命ê事,絕對m̄是人用家己ê氣力ē-tàng達成,chit點tī基督教信仰來講是非常重要ê認bat。因為án-ne「順從聖神ê教導」,mā是hō͘信徒謙卑tńg來到上帝面前ê siōng好途徑。

	第28節,tùi chit節開始,直到第四章6節止,chit段經文中,作者kā重點khǹg tī「怎樣chiah ē-tàng成做上帝ê kiáⁿ」chit-ê主題上。作者khah強調一個基本ê信仰觀念:信仰,是一定tio̍h用實際ê行動表現出來,若無,信仰就無甚麼意義thang講。

「頭尾活tī基督ê性命裡」,chit句話ê意思真清楚,就是teh指出一個耶穌基督ê信徒,一定tio̍h kah耶穌基督相連結做伙,án-ne chiah會kah上帝相連。因為耶穌基督就是性命ê源頭,tī伊ê內面,chiah有性命ê果子。當有一工伊「koh來ê日子」,有結果子ê信徒就ē-tàng「坦然無驚惶」面對tio̍h主耶穌ê審判。

第29節,當聖經講「公義」ê時chūn,指ê就是上帝ê憐憫、赦免、慈悲、公正無私等。Kui本聖經lóng teh強調上帝是公義ê,m̄-nā án-ne,公義ê上帝mā喜愛祂ê子民行公義(參考阿摩司書五:24,彌迦書六:8)。

	作者講「遵行公義ê人就是上帝ê kiáⁿ」chit句話,說明上帝ê公義kah上帝ê疼是仝款ê,因為無疼ê所在,對人ê苦難就bē有憐憫、同情ê心。只有建立公義chiah會hō͘人看tio̍h伊ê性命有上帝同在。


經文:

約翰一書 3:1-3:24

註釋:

Tī chit章經文中,作者koh一pái強調上帝ê kiáⁿ應該表現出上帝ê疼。有真實ê疼,絕對bē去為非作pháiⁿ。作者koh一pái說明tī教會chit-ê信仰團契裡,siōng重要ê見證,就是知影彼此相疼。只有疼,chiah ē-tàng見證耶穌基督ê救恩,mā是上帝ê kiáⁿ。Á chit種疼,是實際ê行動,並m̄是停止tī口頭殼頂ê疼並且實際kā疼實踐出來ê人,chiah會tī審判來臨ê時,坦然無驚惶地面對性命ê主。

第1節,chia繼續提起「上帝ê kiáⁿ」chit-ê觀點,強調這是上帝hō͘ in信靠耶穌基督ê人ê特權。Chit-ê「kiáⁿ」一詞ê希臘文「tekna」,是tùi「生產」(tekein)一字轉換而來ê。Án-ne就真有意思了,因為作者有意思beh表明一件事:一個信靠耶穌基督ê人,雖然是tùi人所生ê,m̄-koh上帝卻kā伊視同己出。當上帝kā信徒看做ná親像祂親生ê kiáⁿ ê時,一定tio̍h會記得上帝是神聖ê,所有ê信徒一定tio̍h有過聖潔ê生活來對稱。因為若是無保持聖潔ê生活,就有污辱上帝聖名ê危險(參考利未記廿二:31)。

第2到3節,chit兩節是帶有應允ê經文,作者講現今在世間成做上帝ê kiáⁿ,將來一定會享受看tio̍h耶穌基督顯現ê福氣。使徒保羅認為性命中siōng大ê恩典,就是tī大馬士革ê旅途中tú-tio̍h koh活ê耶穌基督,這mā ē-sái講是影響使徒保羅一生ê關鍵事件(參考哥林多前書十五:8—10)。因為看見koh活ê耶穌基督顯現,改變了伊對性命ê態度,mā成做伊性命siōng大ê恩典,chit種恩典就是kah上帝同工,這mā是基督徒siōng大ê期待,成做上帝ê同工得tio̍h ê賞賜就是看見koh活ê耶穌基督。Ná親像án-ne,作者講每一個心存án-ne ǹg望ê信徒,lóng會知影保持家己「純潔」ê心靈,因為這是準備ài kah koh活ê耶穌基督見面siōng重要功課。

第4節,chia提起「上帝ê律法」,chit方面是teh指摩西律法講ê,另外一方面則是teh指上帝ê旨意。換句話講,罪ê特色,就是hō͘人脫離上帝ê旨意,m̄ kā上帝ê教示、誡命當做一回事。

第5節,chia thang看tio̍h一個清楚ê信息:耶穌基督之所以降生到chit世界上,就是beh除往生人ê罪。希伯來書ê作者講耶穌基督來到世間就是為tio̍h beh「潔淨罪」(參考希伯來書九:26),hō͘人ē-tàng因為án-ne而聖潔tńg來到上帝面前。

第6節,作者tī chia指出只有一種人會藐視上帝拯救ê恩典,甚至會以自高ê態度看待上帝ê救恩,chit種人就是無tú-tio̍h過耶穌基督ê人,á是根本m̄-bat耶穌基督ê人,chit種人會「繼續犯罪」,in對罪惡有喜好。

另外一方面,作者除了用光kah暗、好kah pháiⁿ ê對比之外,tī chia則用「犯罪」kah「不犯罪」兩種對比ê詞句,hō͘讀者一看就清楚知影伊所beh傳達ê信息。伊講tī耶穌基督內面ê人,會知影珍惜上帝ê救恩,bē koh再繼續「犯罪」;相對ê,一個不認耶穌基督是伊性命救贖ê人,就是繼續生活tī罪惡ê內面,因為chit種人會藐視上帝,mā拒絕上帝ê救恩。

	第7到9節,tùichit三節經文thang看出是kah頭前第4到6節是仝款ê,作者koh一pái說明信靠耶穌基督救恩ê人,kah m̄信者之間ê差別:

第4節:「hiah-ê犯罪ê」	第8節:「繼續犯罪ê」
第4節:「違背上帝ê律法」	第8節:「是屬tī魔鬼」
第5節:「基督顯現ê目的是beh除罪」	第8節:「上帝ê kiáⁿ顯現了,目的是beh毀滅魔鬼ê工作」
第6節:「活tī基督性命裡ê人lóng m̄犯罪」	第9節:「上帝ê kiáⁿ lóng m̄繼續犯罪」

	「m̄-thang hō͘別人欺騙」,意思就是m̄-thang hō͘別人「誘惑」。會誘惑人ê是撒旦、魔鬼。in誘惑人ê主要目的,就是beh hō͘人離開上帝ê法則。作者講beh「遵行公義」,chit種人才是「義人」。所謂義人,意思是teh指kah上帝關係和好ê人。Kui本聖經lóng teh強調上帝是公義ê,因為án-ne,做上帝ê kiáⁿ,siōng重要ê,就是beh hō͘上帝ê公義顯明出來。Á顯明上帝ê公義,siōng簡單ê方式就是「bē繼續犯罪」。

「魔鬼tùi起初就犯罪」,chit句話thang參考創世記第三章誘惑人犯罪ê「蛇」,牠teh代表撒旦、魔鬼。約翰福音第八章44節án-ne講:
「Lín原是魔鬼ê kiáⁿ,kan-taⁿ想beh隨從老父ê慾念做tāi-chì。Tùi起初伊就是謀刣者,從來m̄-bat khiā tī真理一邊,因為伊根本無真理。伊講白賊是出tī本性;因為伊本是講白賊者,mā是一切虛謊ê根源。」

Tùi chit節經文thang看tio̍h魔鬼siōng大ê特色界是講白賊,目的就是beh hō͘人離開上帝,去做犯罪ê勾當。Á上帝差遣祂ê獨生kiáⁿ耶穌基督到世界起來ê主要目的,就是beh毀滅魔鬼,hō͘人知影悔改、認罪,tńg來到上帝ê面前。一個屬tī上帝kiáⁿ ê人,就bē koh再繼續犯罪,因為上帝ê kiáⁿ已經真清楚知影耶穌基督為tio̍h伊tī十字架上獻上珍貴ê性命,因為án-ne人無應該koh再繼續犯罪,若繼續犯罪是無法度面對上帝ê。除了耶穌基督ê救恩之外,人無法度chhōe-tio̍h另外一個機會thang贖罪,這mā是早期使徒彼得kah約翰共同ê見證(參考使徒行傳四:12)。

Koh講,上帝ê kiáⁿ是有「上帝ê性命tī in內面」,ná親像頭前所講ê:上帝甚至是kā歸向祂ê人看做ná親像祂親生ê kiáⁿ仝款。

    第10節,作者講伊寫chit本書信ê另外一個主題,就是beh講tio̍h上帝ê疼(公義),這疼就tī每一個歸向祂ê人身上顯明出來。作者用明顯ê句型表明出來,就是「上帝ê kiáⁿ kah魔鬼ê kiáⁿ有真明顯ê區別」;因為上帝ê kiáⁿ有疼,相對ê,魔鬼ê kiáⁿ無疼。作者無用真深奧ê哲理談疼,伊kan-taⁿ用siōng簡單ê、mā是siōng容易ê方式來要求信徒:tio̍h疼家己身邊ê兄弟姊妹(參考約翰一書四:20—21)

第11節,chia koh一pái提起:「Lín tùi起初所聽tio̍h ê信息就是:咱tio̍h彼此相疼。」作者tī第二章7節所提起,講這並m̄是新ê道理,卻是「舊ê命令」,而且大家lóng熟悉ê信息,就是「彼此相疼」。這mā是耶穌基督出來傳福音ê時chūn,教導門徒一定會確實遵行ê道理,伊認為只有án-ne chiah ē-tàng證明in就是耶穌基督ê門徒。

第12節,chit節作者就舉出實例來說明甚麼是「彼此相疼」ê道理。作者tùi大家所熟悉ê該隱刣死小弟亞伯ê事件講起,記載tī創世記第四章8節,mā是聖經中第一件謀刣案件。Ài beh特別注意ê所在,就是約翰一書ê作者tī chia指出:該隱殺害小弟亞伯ê chit種行為是「屬tī邪惡者」。伊「刣死了家己ê小弟」,chia ê「刣」字,mā thang當做「屠殺」ê意思解釋。Mā就是講,該隱tī殺害伊ê小弟亞伯ê時,手段是非常殘忍ê,非人性ê,差不多是kā亞伯當做動物一般。

作者mā Tī chit節經文中說明該隱會刣死小弟亞伯,是因為「伊ê行為邪惡」,相對ê是伊小弟「行為正直」。邪惡,意思就是偏離了上帝ê教示,而正直,是teh指掠tiâu了中心目標,這目標是teh指上帝ê旨意,因為án-ne,「正直」就是順tio̍h上帝ê教示做tāi-chì。

第13節,作者講一個敬虔ê基督徒,被chit-ê世界所「恨」,因為基督徒ê行為就是beh朝ǹg上帝ê教示行,而上帝ê教示就是疼,而且是beh人彼此相疼。M̄-koh chit-ê世界就是邪惡ê(參考創世記六:5、11—12、八:21),因為án-ne,如果基督徒遭遇像亞伯被兄哥該隱謀刣ê情況,mā m̄免驚奇,作者ê意思是這tùi án-ne一定會發生ê事。

第13節,「咱」kah「in」之間ê差別;「咱」,這是teh指信靠耶穌基督ê人,知影tio̍h kah兄弟姊妹彼此相疼,因為知影耶穌基督就是為tio̍h疼人類chiah來到世界上,並且mā是為tio̍h beh疼人類ê緣故而被釘死tī十字架上ê。明白耶穌基督ê疼,便曉得學習去疼別人。相對ê,一個無疼心ê人就是m̄-bat耶穌基督,因為tī chit種人ê身上看bē-tio̍h上帝ê疼。

第14節,「出死入活」,意思就是teh指基督徒已經因為耶穌基督拯救ê緣故,有koh活ê恩典。「koh活」,這就是超越死亡ê性命,mā就是永恆ê性命。Chia所講ê「死」,是teh指罪惡ê意思(參考以弗所書二:、5,歌羅西書二:13)。耶穌基督講一個人若聽從伊ê話,就是一個「出死入活」ê人,是擁有「永恆ê性命」ê人(參考約翰福音五:24),意思就是teh指一個聽從伊ê人,就會kah跟tòe伊ê教示去行,並ē-tàng脫離罪惡ê捆綁。

第15節,chit節kah前一節有相對ê意涵tī內面;tī前一節講tio̍h有疼ê人,就有永恆ê性命。Á chit節soah講有恨ê人,就無永恆ê性命。原因tùi該隱刣死亞伯ê事件來講,該隱因為亞伯ê祭物hō͘ 上帝歡喜接納,而伊ê祭物並無受tio̍h上帝ê歡喜(參考創世記四:4—5)而懷「恨」亞伯,並且設法kā亞伯刣死。約翰一書ê作者tùi chia講tio̍h一個人若是會「恨」家己ê兄弟姊妹,就會親像該隱刣死「刣人」仝款。有恨ê所在,就bē有疼。

第16節,chit節為第四章10節ê伏筆,主要就是tī說明因為有耶穌基督ê疼,人chiah會認bat上帝ê疼。另外一方面,作者mā tī chia強調疼ê本質就是犧牲性命,chit種犧牲m̄是為tio̍h求任何代價,而且心甘情願ê犧牲之疼(參考腓立比書二:8)。因為án-ne,當耶穌基督teh勸勉祂ê門徒tio̍h「彼此相疼」,ná親像伊疼in ê樣式ê時,就是希望in學習伊為人犧牲ê疼(參考約翰福音十五:12),伊甚至講:「人為tio̍h朋友犧牲性命,無koh 有比這khah 大ê疼。」(約翰福音十五:13)

第17到18節,chit兩節thang看出作者beh kā所有ê基督徒講,kā耶穌基督ê疼用tī生活中,án-ne chiah是siōng重要而且有力ê信仰見證。若是一個「富有ê人」看見ê家己兄弟姊妹sàn-chhiah「缺乏」,卻lóng bē想beh去救助,就無可能kah有人講伊疼上帝。換句話講,疼並m̄是嘴巴講講就算數,作者所強調ê疼是一種具體ê行動,卻m̄是停止tī「口頭殼頂ê疼」。

第19節,thang kā chit節對照約翰福音第十八章37節所記載ê,談及耶穌基督回答彼拉多問伊是m̄是「猶太人ê王」ê時所講ê話:「我是王,這是你講ê。我ê使命是為真理做證,我為tio̍h án-ne而生,mā為tio̍h án-ne來到世間。凡是屬tī真理ê人一定聽我ê話。」基督徒就是屬tī耶穌基督ê人,而耶穌基督就是為真理做證ê,因為án-ne,基督徒mā是teh為真理做證,是屬tī真理ê子民。另外一方面,所謂屬tī「真理」iáu有另外一個意義,就是屬tī上帝ê。Tī第三章1節作者講上帝「jōa-ni̍h-á疼咱!甚至稱咱做上帝ê kiáⁿ」,上帝親自kā所有信徒看做是ná親像祂親自所生ê子女仝款。上帝是真理,是一切性命ê來源。Mā因為án-ne,真正屬tī上帝ê kiáⁿ ê人,會按照上帝ê教導去行,因為án-ne就ē-tàng「tī上帝面前心安理得」。注意,chia特別強調是「tī上帝面前」,卻m̄是tī人ê面前。

第20節,chit節提起上帝「洞察」人ê一切行為kah心思意念。只有上帝chiah有chit種能力,祂m̄看人ê外表,卻是看人ê心內(參考撒母耳記上十六:7,詩篇一三九:1—2,箴言廿四:12,路加福音十六:15)。

「上帝比咱ê心khah大」,chit句話是teh指上帝有夠額ê寬容,會憐憫人ê軟弱kah有限,因為án-ne,人雖然赤the̍h-the̍htī上帝面前,卻mā因為人ê有限kah軟弱,上帝並無會用真嚴厲ê懲罰對付人ê罪,卻是會親像詩篇ê詩人所講ê:「因為祂知咱ê 體質,數念咱是土沙粉。。(全民版)」(詩篇一○三:14)。

第21到22節,遵從上帝ê命令,聽從祂ê話去行,就是屬tī真理,是上帝ê kiáⁿ,chit種人自然tek就bē有心理不安ê事出現。因為遵照上帝ê旨意去行,遵守祂ê誡命、旨意ê人,就是上帝所kah意ê子民,上帝必定會應允chit種子民ê祈求,伊向上帝祈禱,必定會回應。

第23節,頭前講beh遵從上帝ê命令,chia則進一步解釋上帝ê命令就是:一定tio̍h「信伊ê kiáⁿ耶穌基督」,以及照耶穌基督ê命令「彼此相疼」。表面上看起來kah-ná是兩件事,其實只有一件就是相信耶穌基督。一個真正相信耶穌基督ê人,就會遵行伊ê命令。Á耶穌基督ê命令就是beh眾信徒彼此相疼,因為án-ne chiah ē-tàng顯示出kah伊之間ê親密關係。

第24節,約翰一書kah約翰福音有一個共同觀點,就是teh強調上帝ê kiáⁿ kah上帝之間ê bē-tàng分之關係。Chit種bē-tàng分ê關係,約翰一書ê作者用「活tī上帝ê性命裡」kah上帝「mā tī人ê性命」chit種論點來表示。Tī約翰福音則用「成做一體」來說明(參考約翰福音十七:23)。其實,chit種觀念是來自舊約聖經中,每pái提起以色列人民kah上帝之間ê關係ê時,就會用類似chit種句話:「我是你ê上帝;你是我ê子民。」(參考出埃及記六:7)而chit種ná親像夫妻間誓約ê講法,一再出現tī先知ê文獻中,親像:以賽亞書第四十六章4節、第五十一章16節;耶利米書第三十一章34節;以西結書第十一章20節、第三十四章31節、第三十六章28節。

經文:

約翰一書 4:1-4:21

註釋:

Chit章ê kui個主題就是khǹg tī「上帝是疼」之主軸上。作者非常強調tio̍h用實際ê行動,見證上帝對人ê疼。因為疼就是上帝賞賜性命ê氣力,因為án-ne,只要有真實之疼ê所在,就bē有驚惶。

另外一方面,作者mā強調,人會知影疼,是因為先體會tio̍h上帝ê疼,chiah想beh kā上帝ê疼分享hō͘其他人,chit種分享,thang先tùi疼家己ê兄弟姊妹開始。

	約翰一書作者beh kā所有ê信徒講:就是因為有上帝ê疼,chiah hō͘人活著有性命ê ǹg望。Á這疼就是tī耶穌基督身上顯明出來。

第1到3節,tùi chit段經文thang看tio̍h早期教會內部發生ê問題就是有人散佈關係聖神ê錯誤信仰觀念。哥林多教會mā是發生類似ê問題,而且非常嚴重,chiah會逼kah使徒保羅一定tio̍h用哥林多前書第十二到十四章等長到三章ê篇幅來解釋聖神ê意義。約翰一書ê作者提起早期教會內「有人自稱有聖神」,伊認為m̄-thang siuⁿ緊相信chit種話,因為聖神並m̄是用人ê嘴巴講就是真正。因為án-ne,作者提醒讀者tio̍h注意先了解一下,看māi hiah-ê自稱有聖神ê人,真可能有ê並m̄是聖神卻是邪靈。原因是早期教會中出現「假先知」,chit種人siōng歡喜假借講有「聖神」充滿tī伊ê身上,來迷惑信徒ê心。因為án-ne,m̄-thang馬上就相信一個自稱有聖神充滿ê人, tio̍h先學會曉分辨比較好。伊認為辨認是m̄是屬tī上帝ê靈ê方式,就是:「所以,我ài lín 明白,受上帝ê 聖神感動ê 人bē 講「耶穌tio̍h 受咒詛」;無受聖神感動ê 人mā bē講「耶穌是主」。(全民版)」(哥林多前書十二:3)

Ná親像頭前已經kúi-nā pái提過,早期教會中有人散佈一種錯誤ê看法,認為耶穌基督並無真正活tī chiah-ê世界上,因為án-ne,約翰一書ê作者就以chit-ê做基準點,教導信徒判斷一個人ê性命裡有無tùi上帝來ê靈ê恩賜,伊講若一個人願意在公開ê場合中宣告講「耶穌基督降世為人」chit種人所講ê就是有聖神充滿;相對ê,若是m̄敢承認耶穌基督確實降生在世間,就是虛假ê。

第4節,chit節提起「內面ê靈」,這是teh指聖神ê意思。Mā就是講ē-tàng感動人認bat上帝ê救恩,而這救恩就是tī第2節所講ê,承認耶穌就是基督、救主。因為邪靈á是撒旦siōng主要ê用意,就是beh帶領人離開耶穌基督ê救恩,beh誘惑人m̄-thang承認耶穌是性命ê救主。作者tī chia講「屬tī世界ê內面ê靈」,意思就是teh指邪惡ê魔鬼。

第5到6節,chit兩節是相對句,作者tī chia用相對ê句型講出一個屬上帝ê人會聽從上帝ê話去行,chit種人一定會明白辨別甚麼是真理ê信息,甚麼是騙人ê白賊。

	第7到8節,作者koh一pái kā主題拉tńg來到「彼此相疼」來,kui本約翰一書ê中心主題就是Tī chit段tùi第四章七節開始,一直到第五章十二節止,lóng是teh討論「彼此相疼」chit-ê主題。Tī第三章23節,作者已經真清楚說明作上帝所歡喜ê事,就是beh遵守上帝ê命令,而這命令就是beh「彼此相疼」。chit-má是第三pái提起,第一pái是tī第二章7到11節,第二pái tī第三章11到18節。作者tī chia kā人kah人之間需要ê「彼此相疼」,結構tī「上帝是疼」chit-ê基礎上。換句話講,若是無「彼此相疼」ê行為出來,就無法度見證「上帝是疼」ê信息,chit點就是約翰一書作者khah強調ê重點。

	Tio̍h注意作者tī chia ê「彼此相疼」,就是beh以上帝ê「疼」(agape),來「相疼」(agapomen)。換句話講,彼此之間ê疼,就beh像上帝疼咱仝款,用chit種純潔ê疼來彼此相疼,用無私ê疼來建構彼此相疼ê基礎。只有chit種ê疼,chiah是表明咱真正「認bat上帝」,而án-ne chiah ē-tàng kah別人講咱是上帝ê kiáⁿ。

	第9節,thang參考約翰福音第三章16節上帝對人類至koân ê疼。「上帝差祂ê獨生kiáⁿ」耶穌基督降生「到世間來」。Á tī羅馬書第五章8節,使徒保羅講耶穌基督就是上帝teh對人類顯示「無比ê疼」ê方式。確實,上帝是hiah-ni̍h-á疼人類,chiah會差遣耶穌基督到世間來。

「獨生kiáⁿ」,所表示ê意義真特別,表明珍貴、無法度比並ê價值,mā是人看做siōng寶貴ê性命。上帝就是kā人看做siōng-kài寶貴ê性命—耶穌基督賞賜hō͘人類世界,就是為tio̍h beh拯救人脫離罪ê束縛所帶來ê死亡。約翰一書ê作者講,chit種舉動表明ê只有一點:上帝就是疼。作者是beh kā所有ê讀者講,認bat上帝ê本質是疼,因為án-ne,若是kā上帝形容為一位「恐怖」、「恨」、「懲罰」、「嚴厲」ê上帝,是真大ê錯誤,chit點一定tio̍h清楚。

第10節,chit節ē-sái講是約翰一書ê中心主題,beh hō͘讀者知影上帝差遣祂ê獨生kiáⁿ耶穌基督降生到世界上,就是為tio̍h beh救贖人類ê罪,mā因為án-ne,耶穌基督「犧牲」à。Chit種為有罪ê人類犧牲性命所beh表達ê,就是上帝ê疼。值得注意ê,作者強調講「m̄是咱疼上帝,卻是上帝疼咱」,並且tī第16節koh進一步講:「咱疼,是因為上帝先疼咱。」
第11到12節,「親愛ê眾朋友」,chit句是最後一pái出現tī chit本書信中,作者共計用過六pái(參考二:7、三:2、三:21、四:1、四:7)。Chit句話mā表明作者kā讀者當做是心目中siōng親近ê朋友一般看待,作者用án-ne親暱ê稱呼,主要是teh beh表示作者jōa-ni̍h-á ǹg望所有ê讀者ē-tàng明白伊寫chit本書信ê用心。

「上帝hiah-ni̍h疼咱」,chit句話是teh說明第9到10節所講過ê上帝之疼,就是上帝差遣祂ê獨生kiáⁿ耶穌基督來到世界上,hō͘所有ê人lóng ē-tàng藉tio̍h耶穌基督而得tio̍h性命。耶穌基督為tio̍h beh拯救人脫離罪ê束縛,犧牲性命。因為án-ne,作者講信耶穌基督ê人,就是beh學習耶穌基督chit種ê疼,並kā chit種ê疼發揮出來。

「無人看過上帝」,chit句話thang對照第一章18節「無人見過上帝」,mā thang參考提摩太前書第六章15到16節,lóng是teh強調從來無人看過上帝。約翰一書作者強調只有tī疼ê內面,人chiah會看tio̍h上帝。因為疼就是性命ê氣力。有疼ê所在chiah有性命ê氣力。

第13節,作者提起信了耶穌基督ê人,m̄-nā是上帝會tòa tī chit種人ê心內,chit種人mā會tòa tī上帝ê內面。Chit-ê意思就是講:做一個人信了耶穌基督了後,上帝ê聖神就會kah伊同在,指引伊行上帝旨意ê道路。一個人若是有上帝ê靈同在,伊ê性命就是kah上帝交融做伙,無法度分開。

因為án-ne,咱mā thang án-ne講:有疼ê所在,就有上帝ê靈。這mā是使徒保羅tī哥林多前書第十三章所提起ê,若是無疼,講聖神ê話會成做無意義ê事,因為hiah-ê kan-taⁿ會ná親像敲得真大聲ê噪音。因為án-ne,真正疼,就是聖神ê工作之一。Mā因為有疼,所以chiah ē-tàng kah上帝交融做伙。

第14節,chit節mā ē-sái講是基督教信仰ê內容主軸—耶穌基督降生在世界上,作「世界ê救主」。因為án-ne,耶穌基督降生並m̄是只要救基督徒而已,而是beh拯救世界所有ê人。

第15節,chit節koh一pái提起「公開承認耶穌是上帝ê kiáⁿ」,chit句話tī第四章2節講過。之所以強調「公開承認」ê重要,是因為信仰就是性命ê見證,m̄是停留tī口頭宣告。作者koh一pái講án-ne公開承認信仰告白ê人,「上帝就tī伊ê性命裡」,而「伊mā有上帝ê性命」,二者交織做伙。

第十六節,作者用真有力ê語句kā讀者講,一定tio̍h知影而且相信上帝teh疼所有ê人。Chia ê「咱」ē-sái講是對讀者á是早期教會ê信徒講ê。M̄-koh chit-ê「咱」thang講是teh指所有ê人類講ê,因為耶穌基督真清楚講上帝m̄-nā kah意人,mā疼pháiⁿ人;疼行善ê人,mā疼作惡ê人(參考馬太福音五:45)。這mā是約翰福音第三章16節所講ê「上帝hiah-ni̍h疼世人」,卻m̄是講「上帝疼基督徒」。

    「上帝是疼」,chit句話tī chia重述第8節所講過ê。Chit句話ē-sái講是kui本聖經ê基礎,mā是聖經所beh見證ê中心信息。

	第17節,chit節看tio̍h一個重要ê使命,就是每一個信耶穌基督ê人,lóng是上帝ê同工。基督徒就是上帝揀選ê同工,beh參與祂拯救世人ê工作,hō͘ koh khah chē人認bat耶穌基督。Á耶穌基督就是上帝賞賜hō͘人類siōng大ê福音,而chit-ê福音m̄是hō͘基督徒用來圖謀家己ê享受,是beh傳揚出去,分享hō͘眾人ê。因為án-ne,約翰一書ê作者tī chia提起,當人知影上帝ê疼後,回報上帝這奇妙恩典ê siōng好方式,就是kā上帝ê疼分享hō͘所有接觸ê人。

	第18節,作者tī chit本書信中用了四pái「坦然無驚惶」chit-ê詞(參考二:28、三:21、四:17、五:14)。人只有tī疼ê內面ē-tàng「坦然無驚惶」,mā就是分享疼ê時chūn chiah會無驚惶。因為真正疼,kan-taⁿ會帶hō͘性命快樂。相對ê,虛假ê疼、不真實ê疼,chiah會hō͘性命驚惶kah不安。這就是此節所提起ê「有疼就無驚惶」ê原因。

	Chia ê「驚惶」,tī希臘文是「phobos」,chit-ê字mā有「敬畏」ê意思。Án-ne,thang理解chit句話ê意思,指ê是:一個人無可能疼一個人ê時chūn,koh驚惶看tio̍h hit-ê個人,á是驚kah hit-ê人做伙。因為疼kah驚惶,是無法度同時存在ê。

	另外一方面,這「驚惶」一詞,mā kah奴隸有關係。古早時,有奴隸ê制度,身為奴隸ê人,一直生活tī驚惶中,因為驚惶主人kā它轉賣到koh khah惡質ê生活環境中,mā同時驚惶主人對伊受氣,性命會不保。

第19節,作者講所有ê疼ê根源tùi上帝來。人ê性命中有疼,是因為上帝先kā疼賞賜hō͘人。Chit種認bat一定tio̍h先tńg來到創世記第一章所提起ê上帝ê形像;當上帝創造人類ê時chūn,就是用祂ê形像來造人,chit-ê形像所表示ê就是祂ê疼。

第20到21節,作者tī chia為疼做真好ê詮釋—疼kah恨不相容。這ná親像疼kah驚惶無法度同時並存仝款。恨只會kah懲罰、報仇、驚惶相連接。
作者tī chia強調疼上帝kah疼兄弟姊妹是仝款重要ê,無講疼上帝比較重要,疼兄弟姊妹不重要,mā無法度kā chit二者分開來看。這mā是路加福音第十章25到37節,耶穌基督tī譬喻中所beh表達ê信息是:「你tio̍h全心、全情、全力、全意疼主—你ê上帝,tio̍h疼厝邊,親像疼家己仝款。」約翰一書ê作者mā清楚chit種觀點,因為án-ne,tī第21節作者做一個明確ê結論,講這就是耶穌基督ê「命令」。

經文:

約翰一書 5:1-5:21

註釋:

如果咱tio̍h用一句話來形容約翰一書ê主題,ná親像頭前已經敘述過ê,就是「彼此相疼」。Chit-ê主題有一個真基本ê認bat,就是只有「彼此相疼」chiah ē-tàng表明人kah上帝之間ê關係是相連結做伙ê。因為「上帝是疼」,因為án-ne上帝希望所有祂ê子民lóng知影彼此相疼,因為上帝kā疼hō͘祂所揀選ê子民,就是為tio̍h beh祂ê子民去傳達chit份疼。

	M̄-koh一定tio̍h注意一點,就是講tio̍h上帝ê疼ê時,應該tio̍h清楚上帝ê疼是包含tio̍h祂ê公義、赦免、赦免、憐憫。公義ê疼,teh表示上帝ê審判kah忿怒,chit點一定tio̍h ài會記得ê,m̄-thang認為上帝ê疼lóng是thang隨便chhut-chāi人舞,甚至是lóng無節制ê亂使用,這是嚴重ê錯誤。

	約翰一書ê作者tī前一章論述到真實ê疼無驚惶,chit點mā是chit本書信中非常有意思ê信息。因為真實ê疼中是bē有恨ê,原因是疼kah恨是兩個完全不相容ê狀況,若是tī疼中有恨,án-ne就表示疼ê無夠完全,chiah會tī內面有驚惶。

    約翰一書作者Tī chit章強調遵守上帝ê命令,就是疼上帝。而且強調這並m̄是困難ê事。作者講基督徒ê使命,就是kā上帝ê疼見證出來。
第1節,「凡信耶穌是基督ê lóng是上帝ê kiáⁿ」,雖然是chiah-ni̍h簡單ê一句話,卻真清楚說明早期教會有人m̄相信耶穌就是上帝差遣到chit世界上救主,這是因為教會內部有出現假先知、假使徒ê緣故,ná親像第二章18節,以及第四章1節所提起ê,chiah-ê人常常攪亂了信徒ê信仰認知。

因為án-ne,chia講「凡信耶穌是基督ê lóng是上帝ê kiáⁿ」,意思就是講:只要相信耶穌就是死tī十字架上ê救主,chit種人,就是上帝ê kiáⁿ。當基督徒講伊疼上帝ê時,mā必定會疼上帝ê kiáⁿ。耶穌基督就是上帝ê獨生kiáⁿ,如果講疼上帝,必定會疼耶穌基督。

另外一方面,如果所有ê信徒lóng是上帝ê kiáⁿ,án-ne,講疼上帝ê人,mā必定會疼上帝ê kiáⁿ,mā就是所有ê信徒,就是tùi彼此相疼著手就對à。

第2到3節,約翰一書ê作者一再強調信仰ê一個基本觀念,就是kā疼上帝ê信仰付諸行動,chit種行動就是tùi疼咱身邊ê兄弟姊妹開始。因為án-ne,伊tī chia koh講一個真正疼上帝ê人,就會遵行上帝ê命令,聽從上帝ê旨意去做tāi-chì。作者講上帝ê命令「並無困難遵守」,是ē-tàng實踐出來ê。Ná親像頭前已經敘述過ê,tùi身邊ê兄弟姊妹身上開始做起。

第4到5節,作者講凡是上帝ê kiáⁿ lóng必ē-tàng因為信心而「贏過世界」。Chit句話確實bē-bái,無論是tùi基督教會歷史來看,á是tùi信徒ê信仰經驗起來檢驗,lóng會看tio̍h chit種見證。會有chit種經驗,就是因為耶穌基督koh活所帶來ê性命力量,chit種超越死亡而koh活ê氣力,絕對m̄是人類社會任何力量thang阻止ê。作者講這是因為「信心」ê緣故,而這信心是來自耶穌基督ê koh活。

「只有信耶穌是上帝ê kiáⁿ ê人chiah ē-tàng贏過chit世界」,原因是耶穌tùi án-ne上帝差遣到chit世界起來ê救主,伊用死tī十字架上ê疼來贏過邪惡ê權柄。

Tī chiah-ê世界上,siōng偉大ê氣力m̄是刣人ê軍事武器,卻是疼。只有疼,chiah ē-tàng改變chit-ê世界,mā只有疼,chiah ē-tàng hō͘人kā尖銳、刣傷力極強ê武器收起來。這ná親像先知彌迦所講ê,上帝ê疼會「排解列強ê爭端」,ài kā「刀劍phah成鐮刀」(參考彌迦書四:3)。人類之間若真正照耶穌基督ê教示去遵行,就ē-sái戰爭消失,ē-sái所有相戰ê武器lóng成做生活ê工具。Chit-ê世界,是因為相戰而分裂,卻thang因為彼此相疼而連結。

第6節,chit節thang參考馬可福音第一章8節。洗禮是用水,因為án-ne,「水」,已經m̄-nā kan-taⁿ是一般用來潔淨ê一種材料,卻是tī基督教信仰上成做「分別為聖」ê一個記號。

「血」,這Tī聖經中真清楚ê是teh代表性命ê記號,thang用來做贖罪(參考利未記十七:11)。Chia講耶穌基督是「藉tio̍h水kah血」,這已經真清楚表明伊m̄-nā kā信靠伊ê人「分別為聖」出來,而且為tio̍h所有信靠伊ê人,耶穌基督是用伊ê性命來做贖罪祭,而這贖罪ê方式,就是死tī十字架上。所以約翰一書ê作者特別指出這血乃是「犧牲ê血」,m̄是一般ê血,卻是耶穌基督獻出了伊ê性命所流出來之血,做救贖ê記號,án-ne chiah成就了救贖ê功效。

「聖神mā親自見證這是真實ê,因為聖神就是真理」,這表示聖神參與了洗禮ê行列,因為án-ne,聖神thang為洗禮chit件事做見證。因為ē-tàng感動一個人認bat耶穌為性命ê救主,m̄是人ê能力,真正ē-tàng啟開人ê心靈認bat上帝tī耶穌基督內面ê救恩,是上帝ê聖神親自做工ê結果。
約翰一書ê作者tī chia講「聖神就是真理」,chit句話已經清楚表明聖神kah真理是仝一個ê。聖神乃是上帝本身,而上帝就是真理。

第7到8節,chia進一步解釋就連洗禮用ê水,以及耶穌基督ê寶血mā lóng會kah聖神同時做見證。見證受洗ê人歸屬tī耶穌基督,是上帝ê kiáⁿ。約翰一書ê作者強調「聖神、血kah水」等chit三項lóng是一致地ê,意思就是無輕重之分。換句話講,一個基督徒tī chit世間接受洗禮,就ná親像接受耶穌基督ê救恩,而chit-ê人就因為透過受洗而蒙聖神ê感動、潔淨伊ê性命,chiah-ê lóng是一氣呵成,連做伙,無分開ê。

第9節,做一個人因為聽tio̍h有人傳福音信息hō͘伊,受tio̍h感動soah決定接受耶穌基督做伊性命ê主,因為án-ne,接受洗禮,就是chia所講ê「人ê見證」。既然人ê見證咱thang接受,若是上帝親自見證當然大大超過人ê見證。耶穌基督tī傳福音ê時chūn,不時tú-tio̍h有猶太人ài伊koh再用神跡來證明家己ê身分,耶穌基督真清楚kā chiah-ê走chhōe證明ê猶太人講,上帝就是siōng好ê證明(參考約翰福音八:17—18)。因為伊是teh為上帝工作,而且照上帝ê旨意去行(參考約翰福音六:38、八:38)。
第10節,chit節真清楚說明信耶穌基督ê人,kah m̄信者之間是有差別ê;作者真清楚提起信耶穌基督ê人必定會為所信ê做見證。

第11節,chia提起只要是信耶穌基督ê人,必定會得tio̍h上帝賞賜ê恩典,就是得tio̍h「永恆ê性命」。相對ê,m̄信耶穌基督ê人就是對敵上帝者,chit種人否定了上帝ê見證,無認為上帝ê所做ê見證是真實ê。
第12節,chit節為頭前所講ê做簡潔ê結語:甚麼人有耶穌基督同在,甚麼人就會得tio̍h永恆ê性命。相對ê,就無。

第13節,koh一pái強調會有「永恆ê性命」賞賜hō͘「信奉上帝ê kiáⁿ ê人」。這是一個帶有應允ê約,mā是基督教信仰最終極ê目標。約翰福音ê作者就一再kā咱講,凡是信靠耶穌基督ê人lóng會得tio̍h上帝賞賜hō͘ in「永恆ê性命」(參考約翰福音三:15、16、36、十二:50、十七:2、3),耶穌基督mā親自án-ne kā所有信靠伊ê人講(參考約翰福音五:24、六:40、47、54、十:28)。

第14到15節,這是有含應允ê經文,Tī chit兩節中,作者講身為耶穌基督ê信徒有兩件真好ê福氣,其一就是thang藉tio̍h耶穌基督tī上帝面前坦然無驚惶。其二是上帝會垂聽信耶穌基督ê人ê祈禱。

Ē-tàng tī上帝面前坦然無驚惶,乃是因為有耶穌基督為伊做見證,證明眾信徒知影彼此相疼。因為只有tī真實ê疼內面,人面對上帝ê審判chiah bē驚惶(參考約翰一書四:17)。

上帝一定會垂聽伊ê子民祈禱,這是kui本聖經ê信息。M̄-koh m̄-thang bē記得,祈求主要ê目的,就是學習明白上帝ê旨意,chit點是非常重要ê。

第16節,就是相對句型,tī第16節ê上半句講「bē致使死ê罪」,下半句soah講「有kóa罪致使死亡」。照摩西ê律法,siōng嚴重而bē-tàng原諒ê,就是teh指褻瀆聖神ê罪(參考利未記廿四:16)。耶穌基督講:「我實在kā lín 講,世間人無論犯甚麼罪,講甚麼譭謗ê 話,lóng 會得tio̍h赦免。獨獨無論啥人褻瀆聖神,伊絕對bē-tàng 得tio̍h 赦免,因為伊是犯tio̍h 永遠bē-tàng 赦免ê 罪。」。(全民版)」(馬可福音三:28—29)thang án-ne了解:一般ê錯誤行為是thang被原諒ê,因為人無完全,不時會犯錯,特別是人ê心思意念中不時會有罪出現,就ná親像使徒保羅teh描述人性命ê軟弱所講ê,應該做ê事,無去做,反tńg去做he無應該做ê事(參考羅馬書七:19—24)。伊強調chit種人tī無法度自主ê情況下,往往做出致使性命死亡ê罪惡,chit種罪惡就是棄sak了上帝(參考羅馬書六:36)。

第17節,「不義」,這是teh指kah上帝ê關係已經破壞à。M̄-koh作者講chiah-ê mā有thang修補ê可能,就是透過耶穌基督救贖ê疼來重新調kah。Chit種方式就是用祈禱來走chhōe上帝ê赦免。

M̄-koh若是故意侮辱上帝ê神聖,就是teh指明明知影bē-tàng拜偶像,卻故意án-ne做。Á是明明知影tī教會中bē-tàng欺騙,soah koh án-ne行,這便是藐視上帝ê尊嚴。Chit種罪是「會致使死亡」。

	第18節,chit節講tio̍h「上帝ê kiáⁿ bē繼續犯罪」,chit句話並m̄是講基督徒lóng bē犯罪,卻是講信耶穌基督ê人會知影上帝無歡喜人犯罪,mā知影上帝會垂聽信徒ê祈禱,因為án-ne tī知影家己犯罪了後,就會趕緊悔改認罪。基督徒信仰生活中siōng大ê美德,就是知影悔改認罪,而悔改認罪乃是上帝所歡喜ê事。這就是此節所提起ê「bē繼續犯罪」。Chit種「bē繼續犯罪」,是因為有上帝ê聖神teh帶領、保守,hō͘伊知影保守家己純潔ê心靈好面對上帝ê審判。

	第19節,thang看tio̍h基督徒tī每一個時代lóng是真孤獨ê,因為chit-ê世界lóng是「處tī hit-ê邪惡者ê轄制下」,m̄-koh基督徒卻是「屬tī上帝」ê,這是因為有耶穌基督救恩ê緣故。

	第20節,chit節thang講chit本書信ê結尾,mā是chit本書信siōng中心ê信息beh kā所有讀者講:耶穌基督就是上帝ê kiáⁿ,伊來到chit-ê世界上,藉tio̍h祂認bat信實ê上帝來得tio̍h「永恆ê性命」。
	第21節,所提起ê「假神」,tú好第20節ê「真神」相對照;真神,帶hō͘人「永恆ê性命」,相對ê,「假神」所帶來ê是性命ê死亡。作者希望所有ê讀者、信徒lóng ē-tàng遠遠躲避這會帶hō͘性命永遠死亡ê假神。


重新查詢