重新查詢
經文:

民數記 9:15-9:23

註釋:

11.第九章15到23節:
Chit段經文thang參考出埃及記第四十章34到38節。

第15到16節,chia koh一pái提起聖幕完成ê hit一工,mā就是kā聖幕奉獻hō͘上帝後,上帝就降臨tī聖幕裡。而且是用「雲彩」來表明上帝來到聖幕中。

第17到22節,chit段經文清楚說明雲彩有ê時停留真久,有ê時只有短暫時間。雲彩是teh表示上帝同在ê記號。出埃及記第十九章講,當人民聚集tī西奈山下ê時,雲彩出現罩tiâu tī山頂,上帝講ài tī雲彩中出現來對人講話(參考出埃及記十九:9、16、廿四:15—17)。雲彩,成做以色列人民移動ê根據,雲彩動,in就動;雲彩停,in就停。這表示以色列人民tī曠野漂流ê年代,lóng有上帝同在。Mā因為án-ne,in chiah ē-tàng行過這四十年ê曠野生活。Tú親像申命記第八章2到4節所講ê,tī he段艱難ê四十年時間裡,上帝帶領in,hō͘ in無食、lim ê欠缺,mā無因缺乏衫褲soah凍僵,á是腳因為無鞋á soah腳腫。

第23節,無論是拔營、紮營,停止,á是移動,in lóng「遵照上主藉摩西所命令做」,chit句話ē-sái講是以色列人民kui個漂流tī曠野時代ê中心信念。

經文:

民數記 14:11-14:25

註釋:

32.第十四章11到25節:
Chit段經文是摩西kah上帝之間ê一段重要對話。上帝對以色列人民確實非常失望,á摩西不愧是一位偉大ê領袖,伊tùi經歷過ê歷史來講述,堅信上帝是慈悲ê,絕對bē擊殺chiah-ê悖逆ê以色列人民。若無,各地ê民族聽講上帝擊敗埃及,帶領以色列人民離開,卻kāin刣死tī曠野,chit種傳言kābē是慈悲上帝所歡喜聽見ê。其實,摩西是用chit種方式teh祈求上帝ê憐憫kah赦免。

第11到12節,上帝m̄-nā受氣而且對以色列人民失望極了。In雖然看過神跡,卻iáu是對上帝無信心,chit點hō͘上帝相當ê艱苦心。這kah耶穌時代ê猶太人領袖仝款,一再要求神跡hō͘ in看,in chiah beh信,m̄-koh耶穌tī in面向前行了真chē神跡,in iáu是仝款m̄信(參考約翰福音十二:37)。Chia,上帝決定beh消滅chit群埋怨甚至主張mài進入迦南地ê以色列人民。當以色列人民講beh棄絕摩西,另外選出領袖出來帶領in tńg來埃及ê時,上帝ê決定tú好kah in ê計畫顛倒;上帝beh揀選摩西,hō͘伊ê家族成做新ê民族、國家,取代chit-ma2 e5以色列人民。

第13到14節,tùi第13節開始到第19節,chit段lóng是摩西向上帝祈求所講ê話。摩西強調帶領以色列人民出埃及,是上帝用奇妙ê神跡chiah得tio̍h ê成果。並且因為án-nehō͘迦南地ê人lóng聽tio̍h埃及人teh傳述chit件偉大ê事。而且koh khah重要ê,上帝一直kah以色列人民同在,chit種火柱kah雲柱ê顯現,lóng是有目共睹。看見ê人mā因為án-nem̄敢來侵犯。

第15到17節,摩西表示:若是上帝chit-má擊殺了以色列人民,這會hō͘當地真chē民族lia̍h做是上帝無能力帶領以色列人民進入迦南地,所以tī曠野kā in lóng殺了。第16節是真重要ê一節,講出摩西對上帝siōng有力ê懇求,為tio̍h是beh hō͘ koh-khah chē人明白上帝ê救恩kah仁慈,即使像以色列人民hit種墮落,mā tio̍h拯救in、帶領in。這ná親像先知以賽亞ê詩歌中所描述上帝講,祂會án-ne做,是上帝為tio̍h家己,boài hō͘家己ê名失面子(參考以賽亞書四十八:11)。

第18到19節,chit兩節mā講出kui本聖經ê中心信息:上帝是慈悲,有豐富ê疼,不輕易發怒。伊祈求上帝用chit種豐盛ê疼,偉大無變ê疼赦免以色列人民。

第20到25節,chit段是上帝答應摩西ê懇求,m̄-koh並無表示上帝不kā以色列人民hit種悖逆ê心無當作一tńg來事,m̄是án-ne。上帝真堅定地向摩西表示,kābē hō͘ chiah-ê對上帝無信心ê人民進入應允之地。因為in是一pái koh一pái地試探上帝、懷疑上帝,不聽從上帝ê話。M̄-koh因為猶大支族ê領袖迦勒對上帝有夠額ê信心,因為án-ne,上帝決定賞賜hō͘迦勒ê後代擁有迦南地。

經文:

民數記 27:12-27:23

註釋:

16.第廿七章12到23節:
Chit段經文是teh說明摩西年近老邁ê時chūn,mā是伊beh交帶後事ê時刻。伊依照上帝ê旨意按立約書亞繼承伊ê領導權。其實,早tī tú出埃及無久,以色列人民第一pái kah亞瑪力人交戰ê時,就已經teh凸顯約書亞ê領導能力(參考出埃及記十七:9),然後摩西上山去領取上帝頒佈ê誡命ê時,就是帶tio̍h約書亞當助手(參考出埃及記廿四:13),民數記第十一章28節特別提醒,講約書亞tùi少年時代就是摩西ê助手,而且伊kah迦勒兩人排除眾議,堅持beh進入迦南地(參考民數記十四:6)。Chiah-ê資料lóng tī為chit-ma2chit段經文作準備。

第12到14節,chia講是「亞巴琳山」,tī申命記第三十四章1節,講是「尼波山」。上帝真清楚kā摩西講,伊kah亞倫仝款死去,原因是in兩人lóng「teh chhōe曠野違背了」上帝ê旨意,因為無「承認」上帝「神聖ê能力」。Chit件事tī民數記第二十章1到13節有記載,m̄-koh並無真清楚說明摩西有toh一kóa舉止動作違背了上帝。只是tī he事件後無jōa久,亞倫就往生了。

第15到17節,摩西聽tio̍h上帝án-ne對伊講了後,表現出來ê就是上帝忠實ê僕人態度,完全順服。伊講上帝是性命ê源頭。並向上帝祈求ē-tàng差派一個人,thang hō͘ in有好ê牧人來帶領以色列人民。

第18到23節,上帝真清楚講出約書亞就是一個「有才能ê人」,beh按手tī伊頭頂,設立伊為領導者。按立ê禮儀,就是tī大祭司以利亞撒kah眾人面前,由摩西按手tī約書亞ê頭殼頂,然後公開宣佈約書亞ê使命。並且ài kā權力分hō͘約書亞。申命記第三十四章9節,作者講因為摩西ê按手,hō͘約書亞「充滿智慧」,而且以色列人民聽從伊。

值得注意ê是tī第21節,chit節強調大祭司ê角色非常重要,就是tùi chia開始,講約書亞mā tio̍h聽從以利亞撒。M̄-koh大祭司以利亞撒bē-tàng專權,伊一定tio̍h凡事請求上帝ê旨意,幫助約書亞kah以色列人民聽從上帝ê旨意。

重新查詢