使徒行傳 6:8-6:15

註釋:

【第8到15節】
Tùi第8節開始到第八章3節止，lóng是記載有關司提反受難ê事件，而司提反mā是第一位殉教ê信徒。

第8節，chit節開始就講司提反「充滿tio̍h上帝ê恩賜kah能力」，hō͘伊ē-tàng行神跡奇事。然後tī第10節koh提起司提反因為聖神「賞賜智慧」hō͘伊，幫助伊知影怎樣kah猶太人ê宗教領袖辯論，hō͘ in無法度「辯駁伊所講」。這tú好應驗ā路加福音第十二章11到12節耶穌所講ê話。

第9節，有「tùi基利家」來ê猶太人kah司提反辯論，使徒保羅mā是基利家人。M̄-koh chia並無清楚是m̄是就是teh指使徒保羅。

第11到12節，koh一pái看tio̍h宗教眾領袖是知法犯法，雖然摩西律法規定「bē-tàng作假證陷害人」（參考出埃及記二十：16），in卻為tio̍h beh陷害司提反，而作假見證。In teh陷害耶穌ê事件上mā是án-ne（參考馬太福音廿六：59，馬可福音十四：55—59）。現在in用錢買收了一kóa人誣告司提反，講伊「毀謗摩西kah褻瀆上帝」。

第13到14節，猶太人有兩種事是絕對beh維護ê：其一是摩西律法ê尊嚴。其二是聖殿ê神聖。如果任何人違反這兩件事，lóng thang用石頭phah死。現在chiah-ê作假證ê人就是用chit兩個理由控告司提反。

第15節，司提反並無驚惶被褻瀆、誣告。Tùi伊「面貌kah-ná是天使」看會出來，這表示有上帝ê平安tī伊心中。

使徒行傳 18:1-18:17

註釋:

第十八章
【第1到17節】
使徒保羅等一陣人來到哥林多，這是一個大城市，mā是一個港口市鎮，貿易興盛，m̄-koh色情行業mā真熱烈，連宗教活動lóng參雜tio̍h色情ê內容。

第2節，chit節提起羅馬「皇帝克勞第命令所有ê猶太人離開羅馬」。Chit項事是發生tī主後49年ê時chūn，原因真可能是因為tī羅馬發生猶太人暴亂ê事件。M̄-koh，另有一種講法是：耶穌koh活ê福音傳入羅馬ê時，引起hit-ê城ê猶太人極大ê不滿，ê時常kah基督徒發生衝突，因為án-ne羅馬皇帝受氣下驅逐令。Chit節mā提起以製皮革業維生ê亞居拉kah百基拉chit對夫婦，mā來加入傳福音ê行列，in是tùi tó位得tio̍h福音？並無資料，真可能原本就tī羅馬教會聚會，in來哥林多城，就成做使徒保羅tī福音事工上真好ê伙伴，特別是tī第18到19節講in夫婦兩人tī福音事工上真積極。Teh寫hō͘羅馬教會ê書信中，使徒保羅講「in為tio̍h我冒性命ê危險」，mā提起in ê厝提供了聚會ê場所（參考羅馬書十六：3—5）。

第5到6節，西拉kah提摩太mā趕來加入傳福音，使徒保羅就停止靠織帳棚維生，全心投入見證福音事工。M̄-koh伊傳福音ê時，反對ê浪潮iáu-koh。伊用跺掉身上ê塵埃表示in m̄信所致使ê滅亡kah伊無關。第8節，chit節真有意思，因為連猶太人管chhap堂ê基利司布kah伊全家ê人lóng受洗歸信耶穌，這表示猶太人ê宗教領袖mā有人接受耶穌koh活ê信息。

第9到17節，chia講tio̍h上帝ê聖神啟示使徒保羅，ài伊「m̄免驚，做你講」，上帝beh kah伊同在。伊kah其他同工留tī哥林多長到一年半，教導信徒對信仰ê正確認知。Ná親像以往仝款，每到一個所在傳福音，使徒保羅等人lóng會去猶太人會堂見證福音，m̄-koh lóng tú-tio̍h猶太人極力ê破壞，甚至告到羅馬統治者ê所在。因為羅馬統治者一直認為he是屬tī「猶太教」內部ê事，無beh受理。因為除了猶太人ê猶太教被羅馬政府許可存在外，不准有其他宗教存在。Tī羅馬政府ê了解中，基督教是屬tī猶太教ê一支。Á控告使徒保羅無成功，卻hō͘會堂主管所提尼受tio̍h傷害。

使徒行傳 21:1-21:16

註釋:

第二十一章
【第1到16節】
Chit一章thang分做三個段落來看，一是第1到16節；二是第17到26節；三是第27到40節。

第1到6節，chit段經文記載使徒保羅等一陣人繼續ǹg耶路撒冷前去，路經泰爾ê時，tī chia chhōe-tio̍h信徒，並且接受chia信徒ê接待tòa七工。這mā說明tī chit外邦人地區，mā有信徒。耶穌就bat tī chia行過神跡，治好一位婦人ê cha-bó͘-kiáⁿ（參考馬可福音七：24—30）。

值得注意ê是tī chia ê信徒「得tio̍h聖神ê指示，勸保羅mài上耶路撒冷去」，而tī第二十章22到23節ê記載，使徒保羅已經知影chit chōa去耶路撒冷會有災難臨身。Mā因為án-ne，伊明明知影可能有災難會發生，並無因為泰爾ê眾信徒一再挽留、苦勸阻止伊，就改變心意，伊iáu是tio̍h勇敢地行向耶路撒冷。

Koh講，chia看tio̍h真有意思ê情景：使徒保羅無來過泰爾傳福音，chia卻有信徒，而且對伊非常ê善待。早年使徒保羅teh迫害信徒ê時chūn，有kóa人逃離耶路撒冷到各地去避難，mā同時傳福音，真可能就是chiah-ê人kā福音傳到泰爾ê。M̄-koh，，現在in並無因為使徒保羅過去對in ê迫害就記恨tī心，反tńg因為使徒保羅tī外面邦地區傳福音ê見證，對伊珍惜有加。In全家大細全出來，送使徒保羅到海岸邊，大家跪tī沙灘頂面祈禱，了後送使徒保羅上船。

第7到11節，使徒保羅一陣人來到該撒利亞，chia距離耶路撒冷已經真近了。早期教會第一pái推選出來七位門徒之一ê腓利tòa tī chia，in去tòa tī in tau。Chia mā提起腓利m̄-nā是福音工作者，伊有四個cha-bó͘-kiáⁿ mā lóng投入傳福音ê工作。

Tī第10節chia提起有先知名叫亞迦布tùi猶太來，伊bat預言過天下會有嚴重饑荒（參考十一：28）。現在伊koh預言使徒保羅會tī耶路撒冷被猶太人「綑綁，然後被交hō͘外邦人」，即使是án-ne，都無阻止使徒保羅繼續前往耶路撒冷ê堅定意志。伊真清楚表示，為耶穌ê緣故就是hō͘綑綁，甚至是死mā lóng心甘情願。Tī該撒利亞有kóa信徒陪使徒保羅等一陣人，同行去耶路撒冷。

使徒行傳 21:17-21:26

註釋:

【第17到26節】
Chit段經文記載使徒保羅一陣人順利地來到耶路撒冷，tī教會受tio̍h燒熱烈ê歡迎。真重要ê tī第18節，chia講使徒保羅一陣人隔工就先去見雅各（耶穌ê小弟），可見雅各Tī該教會已經是領袖。Á使徒保羅就向雅各kah其他長老報告tī外面邦地區傳福音ê成果。

Tùi第19節開始到第25節，是雅各對使徒保羅所講ê話。Chit段經文中thang看出當時ê耶路撒冷教會信徒已經有「數以萬計」了，可見是間非常有影響力ê教會。Koh講，chiah-ê信徒中間，有kóa人對使徒保羅tī外面邦地區傳福音ê時，無要求猶太人信徒遵守割禮kah猶太人ê規矩，真無法度諒解。因為án-ne，in建議使徒保羅去聖殿行「潔淨禮」，原因是伊lóng tī外邦地區tòa、lim，需要用chit種方式來表示伊遵守古禮，而且iáu-beh用「剃掉頭毛」，以表示除去無清氣，用chit種方式來證明家己是潔淨ê。同時耶路撒冷教會mā安排四個已經下願ê信徒陪同使徒保羅去獻潔淨禮，chiah-ê建議使徒保羅lóng接受了。不過，chit四個人行潔淨禮ê費用tio̍h使徒保羅負擔，chit點kah-ná有點á講不過去，因為這費用真高，包括一隻小母羊、一隻小公羊、一隻公綿羊，iáu有素祭kah奠祭（參考民數記六：14—20）。

使徒行傳 23:1-23:11

註釋:

第二十三章
【第二十二章30節到第二十三章11節】
因為使徒保羅表明家己有羅馬公民身分，致使chit位羅馬指揮官心裡開始焦慮起來。伊需要查明到底是發生甚麼重大e5事。因為an2-ne，伊召「祭司長kah全議會做伙」開會，hou7使徒保羅khia7 ti7 in面前，an2-ne thang聽雙方說明。
第廿三章1到3節，chit段是使徒保羅先行發言表明家己e5行事為人，long2是「清白」。M7-koh伊chiah講完，就被「大祭司亞拿尼亞吩咐侍tui3」phah伊e5嘴巴。Chit位大祭司亞拿尼亞是ti7主後47年被設立e5，任職12年，ti7主後66年被猶太人游擊隊暗刣死亡。理由是伊親羅馬政府，貪婪成性，為tioh8錢出賣猶太人，只因為為tioh8 beh取悅羅馬統治當局。使徒保羅對遭遇chit種回應真無歡喜，伊指責亞拿尼亞是「粉飾e5牆」，意思是teh指伊虛偽，外表好看而已。伊並且詛咒亞拿尼亞會hou7上帝「phah」，因為當大祭司，卻無「根據律法審判」。
第4到5節，議員中有人替大祭司講話，認為使徒保羅無禮貌，使徒保羅ma7承認家己咒罵大祭司m7-tioh8，隨時表示因為m7-bat大祭司。
第6到10節，使徒保羅發現在chiah-e5議員中間，有e5是撒都該派e5人，ma7有法利賽派e5代表。因為an2-ne，伊先表明家己是「法利賽人」，而且老父ma7是法利賽人。然後伊講hou7人掠來見官，是因為伊teh傳「ng3望死人koh活」e5信息。Chit種講法至少表明三點意義：（1）使徒保羅相信耶穌koh活e5事實，而這ma7是伊親身e5經歷。（2）使徒保羅ma7期待伊e7-tang3因耶穌e5 koh活而koh活。（3）伊一生e5傳道工作就是teh見證耶穌koh活e5信息。因為撒都該人ma7是猶太人siong7 koan5議會三股主要力量之一（另外兩股代表是經學教師kah民間e5長老）對死人koh活e5事向來持m7信e5態度，in ma7 m7相信「有天使kah神靈」。因為an2-ne，當in聽tioh8使徒保羅講相信死人koh活e5事，就kah相信有死人koh活e5經學教師當場吵了起來。結果原本beh審問使徒保羅e5事m7-na7無法度進行，反卻是「爭吵ju2來ju2劇烈」。相信有koh活e5法利賽派之經學教師，就表示「查不出」使徒保羅有任何錯，同時表示使徒保羅講e5話可能有「神靈a2是天使」啟示，其實chiah-e5經學教師an2-ne講，是利用使徒保羅teh對抗撒都該派e5人，並m7是in chiaN5實查證過使徒保羅無「任何錯處」。因為羅馬指揮官ma7聽m7-bat chiah-e5，看in兩派e5人吵得chiah-nih8厲害，只好命令兵士ka7使徒保羅帶tng2來營房保護。
第11節，koh活e5主koh一pai2顯現在使徒保羅身邊，鼓舞使徒保羅「ai3有勇氣」，並且啟示使徒保羅「一定tioh8 ti7羅馬」為主作見證。因為chit-e5啟示，使徒保羅決定上訴到羅馬法庭。