羅馬書 9章19節 到 9章33節   背景資料  上一筆  下一筆
當使徒保羅提起kui個拯救工作之主權,lóng是由上帝決定,因為án-ne,有人認為chit種上帝,是不公平ê。因為這會hō͘人感覺家己根本就無存在ê價值,mā無努力向善ê動力kah意念。就án-ne,使徒保羅用chit段經文來解釋伊為何會有chit種主張。

第19到21節,因為使徒保羅提起上帝揀選是早tī祂chìn前ê計畫,因為án-ne有人認為既然是án-ne,án-ne,上帝就無應該對hiah-ê無受揀選ê子民受氣,á是發出責難。使徒保羅對chit種問題感覺艱苦心,因為提出chit種問題ê人,是故意chhōe藉口。使徒保羅引用自耶利米書第十八章1到6節有關陶匠kah陶土ê關係做譬喻,主要teh說明上帝ná親像陶匠,祂ē-tàng隨心所beh照家己ê計畫,á是喜愛ê方式,kā磁土捏成各種造型。伊khah強調ê是:捏陶ê主權在tī上帝,á無在tī人。Á chit種主權表達siōng重要ê方式,就是用揀選來表明。先知以賽亞mā提出chit種看法(參考以賽亞書四十五:9—13)。

第22到26節,chit段經文講出上帝ê憐憫kah慈悲,祂無kā hiah-ê無好ê瓷器棄sak、擊碎,是因為祂ê慈愛、憐憫,因為án-ne,koh khah應該心存感謝chiah-tio̍h。使徒保羅引用何西阿書第二章23節ê詩歌,以「意譯」ê方式表示出來。使徒保羅引用先知何西阿寫ê chit-ê詩歌,來表明原本m̄是屬tī上帝揀選ê族類,chit-má上帝tio̍h用寬容無比ê疼,kā它列為祂所揀選ê子民之一。伊用chit種譬喻,主要teh說明非猶太人(所講ê「外邦人」),會成做上帝心中ê子民。「本來m̄是我子民」,chit句話mā是先知何西阿ê kiáⁿ「羅‧阿米」ê名ê意思。意思是teh指對丈夫無忠實á生落來ê kiáⁿ。因為先知何西阿ê bó͘是一個淫婦。續落來tī第26節引用何西阿書第一章10節,仝款是採用「意譯」ê方式,主要teh說明上帝ê決定是會改變ê,á hō͘上帝改變ê原因是人認罪、悔改。

第27到29節,chit句話是引用以賽亞書第十章22節。以色列人一直相信所有ê以色列人民lóng會得救,m̄-koh,先知以賽亞卻有無仝ê看法,認為只有少數人ē-tàng得救。耶穌mā bat提出chit種看法,伊講真正chhōe-tio̍h得救之道ê人少kah會驚人(參考馬太福音七:13—14)。這mā說明得救並m̄是以色列人民ê專利á是特權,koh khah重要ê,是人tio̍h努力走chhōe正確ê得救門路。Koh講,先知以賽亞tī chia指出「chhun落來ê少數得救」,tú好表明上帝憐憫ê恩典。因為上帝若照人所犯罪ê情景來審判,無一個人是「善」ê(參考羅馬書三:23),就是因為上帝ê疼,留落來一部分人享受祂拯救ê恩典(參考以賽亞書一:9)。Á使徒保羅引用chit句話,主要是teh說明這「chhun落來ê少數」,就是相信耶穌是救主ê人,á chiah-ê人是包括猶太人kah非猶太人在內。

第28節,這是引用以賽亞書第十章23節、第廿八章22節。注意chia所用ê「迅速」,指ê是審判ê時刻to̍h是teh beh來臨。Chit對主後第一世紀ê基督徒來講,意義真深重。In lóng認為上帝teh beh展開全面性ê審判,這kah koh活ê耶穌teh beh koh再臨ê觀念有密切關係。「徹底審判全人類」,chit句話mā說明上帝會展開全面性ê審判工作,無一個人ē-tàng逃避(參考希伯來書四:13)。然後tī第29節使徒保羅引用以賽亞書第一章9節,chit句經文ê歷史背景,是發生tī主前701年,當時亞述帝國ê國王是西拿基立,伊率兵攻打耶路撒冷城,hō͘耶路撒冷城面臨被摧毀ê危機,若m̄是先知以賽亞輔佐猶大國王希西家,猶大國早就被亞述消滅à。Chit段歷史thang參考以賽亞書第三十六到三十七章,列王記下第十八章13到27節。使徒保羅引用這歷史背景,主要teh說明上帝有祂拯救ê計畫,kah奇妙ê旨意,á chiah-ê事件lóng tī說明上帝對人ê憐憫kah慈愛,chiah會保存hit-ê「chhun落來ê少數」。

第30到33節,使徒保羅提起耶穌傳福音ê主題:上帝ê主權。人m̄-thang想beh用家己ê氣力來改變上帝拯救ê旨意,人唯一thang做ê事,就是悔改、順服上帝ê引chhōa,相信耶穌是上帝拯救人類siōng大ê記號。第33節是摘錄自以賽亞書第八章14節、第廿八章16節。Chia ê「絆腳石」,就是拯救者,tī舊約是teh指彌賽亞,使徒保羅強調就是耶穌。

重新查詢 專卷研經 羅馬書系列
錯誤回報,請聯繫comm[@]fhl.net