羅馬書 8章31節 到 8章39節   背景資料  上一筆  下一筆
Chit段經文是tùi第一章18節開始談論ê「kah上帝有合宜ê關係」ê總結。這mā是使徒保羅siōng富詩意ê一段經文,mā是使徒保羅重要ê信仰告白。Tī chit段經文中,伊特別強調無任何力量thang阻擋上帝tī耶穌內面對人類ê疼,切斷人kah上帝之間ê關係。上帝ê疼是lóng無保留hō͘咱,如果連祂所疼ê獨生kiáⁿ耶穌lóng為咱捨命,就是為tio̍h beh hō͘咱kah祂重建合宜ê關係,án-ne iáu有甚麼阻礙會隔離咱kah上帝ê疼?無lah,即使是天頂ê使者、靈界ê掌權者mā無法度破壞咱kah上帝ê關係,因為咱就是上帝siōng疼ê。

第32節,chit節是相當關鍵ê一節經文。使徒保羅講上帝kā祂ê獨生kiáⁿ耶穌賞賜hō͘人類,就是表明一個基本認bat:上帝既然lóng kā siōng好ê禮物送hō͘世人,koh khah án怎都無其他「物件」ē-tàng贏過tī耶穌身上所顯明ê koh khah珍貴ê禮物à。「Kā萬物白白賜hō͘咱」chit句話,主要teh說明上帝是hiah-ni̍h-á疼人類,hō͘人類來管理、享受祂創造ê一切萬物。Chia所指ê「萬物」,mā就是第28節所提起ê,tī chia指ê是「世界」ê意思。

第33到34節,使徒保羅講出有關耶穌ê三件事:一是耶穌死去;二是耶穌已經tùi死內底koh活;三是耶穌成做所有óa靠伊救恩ê保證人(參考約翰福音六:38—40),伊beh為所有信靠伊ê人向上帝祈求(參考約翰福音十七:9,約翰一書二:1)。耶穌向上帝祈求憐憫ê疼,贖回信靠伊ê人所犯ê一切過錯(參考以賽亞書五十三:12)。

第35節,使徒保羅tī chia所描述ê「患難、困苦、迫害、iau餓、sàn-chhiah、危險、刀劍」等七項,chiah-ê lóng是人類世界生活中一再出現ê性命苦難。M̄-koh使徒保羅講chiah-ê性命ê苦難,m̄-nā bē拆散耶穌kah信靠伊ê人之間ê關係,反tńg是koh khah親密地連結做伙。

第36節,thang參考詩篇第四十四篇22節。使徒保羅引用chit-ê詩歌,是beh hō͘羅馬教會ê信徒知影,tī信仰ê旅途中tú-tio̍h苦難,而且威脅tio̍h性命,這並m̄是新鮮事,早tī詩人ê時代就已經有。其實,使徒保羅親身經歷過類似ê苦難,伊tī傳福音ê過程中就有chit種經歷(參考哥林多後書十一:24—28)。

第37到39節,使徒保羅非常肯定講,所有ê迫害lóng無夠額來切斷óa靠耶穌ê人kah上帝之間ê關係。伊tī chia特別提起:
「死」,表明tio̍h性命中所經歷到ê siōng大痛苦,「活」,是teh指性命中siōng有成就、榮耀ê事,á是siōng興奮ê事。

「天使」,是teh指邪惡ê天使,ná親像撒旦、魔鬼就是屬tī chit類ê天使(參考約伯記一:6、二:1)。

「靈界ê掌權者」,這是teh指誘惑ê氣力,想beh阻止上帝拯救世人ê氣力(參考哥林多前書十五:24)。Tī使徒保羅觀念中,靈界有階級層次上ê區分,m̄-koh使徒保羅強調,耶穌ê氣力,會kā chiah-ê氣力lóng消滅(參考以弗所書一:21、三:10,歌羅西書二:10、15)。

「chit-má」、「將來」,這講出一個無限ê時間,耶穌永遠是上帝kah人之間ê調kah者。

「高天」、「深淵」,這是古代占星術ê一種術語,意思是teh指每一個人出世,lóng受tio̍h天頂ê某一個星球控制tio̍h。這是古老東方社會ê思想。用現代術語則kah「星球磁場」真接近。這ná親像詩人所講ê,日時頭,日頭bē傷害,夜間,月娘mā bē害你仝款(參考詩篇一二一:6),因為有上帝ê保護,性命必定是安全ê。

使徒保羅頂面所講ê chiah-ê用詞,lóng teh強調一個基本觀念:kui個宇宙之間,lóng充滿tio̍h上帝tī耶穌內面拯救ê疼。無任何力量ē-tàng破壞人kah上帝之間ê關係。

重新查詢 專卷研經 羅馬書系列
錯誤回報,請聯繫comm[@]fhl.net