羅馬書 6章1節 到 6章14節   背景資料  上一筆  下一筆
羅馬書tùi第一章18節開始到第三章20節,是講tio̍h有關人犯罪,致使kah上帝之間出現隔閡。然後tùi第三章21節起,直到第四章25節,lóng是teh談一個人ē-tàng kah上帝重新和好,是因為耶穌十字架救贖ê緣故。續落來tī第五章講咱是因為信耶穌á得tio̍h上帝拯救ê恩典,這恩典是tùi上帝來白白ê賞賜,並m̄是人ê努力á是功勞換來到ê。

羅馬書ê第六章到第八章39節,是使徒保羅teh解釋一個信耶穌ê信徒,應該有ê信仰態度kah認知。Tī chit段長到三章篇幅ê經文中,伊tī第六章細講人án怎tùi罪ê奴役中脫離,得tio̍h性命ê真自由。然後第七章伊koh再解釋怎樣tùi律法ê詛咒下得tio̍h真正自由,同時,伊mā kā家己ê心靈做一個徹底告白,hō͘咱知影人有多軟弱。續落來tī第八章,伊講tio̍h怎樣tī聖神ê帶領下,成做一個有真實性命ê人。

使徒保羅tī第六章講tio̍h一個性命有基督同在ê人,是有koh活性命ê人,伊講chit種人就是脫離罪惡ê人。使徒保羅真正用意,是beh指出當人透過律法,知影所犯ê罪jōa-ni̍h-á重,就會想tio̍h上帝賞賜ê恩典,而且白白得來ê時,就koh khah應該tio̍h知影謙卑,而且會用感恩ê心來領受,án-ne chiah是正確ê態度。

使徒保羅Tī chit段經文中,一再強調一個信耶穌ê人,等於kah耶穌ê性命相連結,m̄-nā kah耶穌同死,mā將kah耶穌同koh活(參考第8節)。使徒保羅強調:信仰,是性命ê連結。若是將信仰kah性命分離,hit種ê信仰就ná親像穿衫仝款,隨時thang更換。M̄-koh若是將信仰kah性命連結做伙,án-ne就等於人ê身軀kah靈魂仝款,是bē-tàng分割ê。所以chit段經文ê主題就是teh kah耶穌「合做一個」ê基督徒。一個真正信靠耶穌ê人,無koh是原來ê家己,卻是性命中有耶穌ê形象,kah耶穌親密結合做伙ê人,伊kah耶穌同齊同釘十字架,mā同齊koh活。Chit種人會拒絕作罪惡ê奴隸,因為伊已經kā家己獻hō͘上帝à。這mā是使徒保羅所常用ê:成做「新造ê人」(參考哥林多後書五:17、加拉太書六:15、以弗所書二:15、四:17—24)。

第1到4節,tùi第1節就thang看tio̍h有人確實是誤解,á是講故意扭曲使徒保羅所講ê上帝tī耶穌內面拯救恩典ê意思義。原因是tī第五章20節所提起ê「罪jú增多,上帝ê恩典mā koh khah豐富」chit句話。這mā tùi第三章8節伊mā bat提起chit種問題。使徒保羅真清楚表明,罪,hō͘人ê性命死亡。死去ê人怎樣ē-tàng繼續犯罪?無可能ê事。伊講,一個真正kah耶穌連結ê人,就是kah耶穌同死tī十字架上,m̄-koh卻因為耶穌ê koh活,mā 跟tòe齊koh活,chit種koh活就是teh過新ê生活樣式。

第5到10節,chit段經文一再強調kah耶穌「合做一個」ê重要性,表明ê是一個人若真正信耶穌是性命ê救主,chit-ê人就是kah耶穌無分離ê人,伊必定tī信仰上真清楚,是kah耶穌同死,mā會kah耶穌同koh活。Chit種人,就是脫離了死亡威脅ê人。是一個無死ê人,á chit-má活teh,是「為上帝á活」。使徒保羅chit種講法tī加拉太書第二章20節mā出現,伊講:「Án ne,chit-má teh 活ê 我m̄ 是原來ê 我,是基督tiàm-tī 我內面teh 活;我chit-máteh 活,是靠信上帝ê Kiáⁿ teh 活;基督疼我,為tio̍h 我放sak 性命。(全民版)」

第11節,使徒保羅強調一個kah耶穌連結ê人,就一定tio̍h kā家己當做是已經是死去ê人仝款,是過去tī罪惡中ê人已經死去à,chit-má活teh ê我,是因為有上帝tī耶穌內面ê救恩á活。伊一再用「為上帝á活」,chit句mā thang講做「tī上帝內面活着」,因為上帝就是行偉大神跡者,祂hō͘死á埋葬ê耶穌,koh活起來。Koh活,就是永恆ê性命。所以做一個人kah耶穌「合做一個」了後,藉tio̍h耶穌ê koh活,信ê人,mā就跟tòe耶穌koh活起來,這就是tī上帝內面活着。因此thang án-ne了解,一個信耶穌ê人,就是時刻會想tio̍h上帝就tī伊性命中,就ná親像使徒保羅siōng歡喜講ê,是有耶穌活tī伊ê性命裡。

  第12到14節,chit三節經文thang講為頭前ê經文做一個總結。使徒保羅beh釐清一個重要ê觀念,並m̄是講一個信耶穌ê人已經脫離了罪,就認為tùi án-ne bē koh再有罪ê問題出現。Ná親像頭前已經講述過ê,脫離罪ê束縛,是離開了罪ê主宰,m̄-koh卻tùi án-ne成做罪ê對敵者。所以需要不時kah罪對抗。伊講一個信耶穌ê人,是無koh作「邪惡ê工具」,卻是成做「公義ê器皿」。這是相對ê話句,「工具」kah「器皿」lóng是teh指「武器」ê意思。使徒保羅甚至講beh穿上帝所賜ê「全副武裝」,為tio̍h是beh對付罪惡ê誘惑(參考以弗所書六:10—13)。注意這處聖經所講ê「公義」,指ê就是「規範」,mā是屬tī上帝教示ê準則。上帝ê「規範」包含憐憫、赦免、慈愛、公正。「公義」包括了基督徒應該有ê siōng基本之倫理行為。


重新查詢 專卷研經 羅馬書系列
錯誤回報,請聯繫comm[@]fhl.net