使徒保羅ê書信有另外一個特色，就是tī最後lóng用請安語作結束。像哥林多前書第十六章19到20節；腓立比書第四章21到22節；歌羅西書第四章15節；提摩太後書第四章19、21節；提多書第三章15節；腓利門書第23到24節等等。M̄-koh tī所有書信中，羅馬書ê請安句ē-sái講是siōng長ê。

羅馬書可能tī第十五章33節就結束loh，因為án-ne，這第十六章有可能是因為編輯上ê需要chiah加上ê。會有chit種看法，是因為chit章同時提出beh向真chē人請安ê話。Á chiah-ê人是分散tī伊旅行傳道ê各地，羅馬教會ê人並無一定lóng認bat in，何況使徒保羅家己mā m̄-bat去過羅馬教會。因為án-ne認為，羅馬書chit本書信是託菲比帶去ê，使徒保羅只要tī phoe中紹介菲比hō͘羅馬教會ê信徒就ē-tàng à。

M̄-koh mā有kóa學者認為，chit章可能是寄hō͘另外一間教會ê信，後來teh編撰羅馬書ê時，mā順續kā它編輯tī-chia，做書信ê結語，以符合使徒保羅寫phoe ê習慣。因為án-ne，有人認為chit章可能是寫hō͘以弗所教會ê信。不過，chit種講法mā欠缺夠額ê佐證。

Chit章是使徒保羅紹介伊ê同工siōng chē ê一章，總共看tio̍h廿七個名。Thang án-ne了解：新約聖經中有記錄出名ê chiah-ê人，可能tī早期教會中lóng真活躍，á是tī早期教會歷史中扮演重要ê角色。雖然有kóa人只有提起名，並無留落來任何事蹟thang供參考，hō͘人了解in所做ê事工。M̄-koh，in ê名會hō͘記錄落來，可見in tī早期信仰團契中必定常常hông提起。Koh講，就是tī chit份廿七個名單中，女性就佔了六個，包括有菲比、亞居拉、馬利亞、土非拿、土富撒、彼息等。可見女性tī早期教會福音事工上有美好ê見證。

Chit段經文是使徒保羅記念tio̍h tī伊傳道工作中，kah伊同工過ê兄姊，伊m̄-nā一一提起in ê名，並簡略講chiah-ê同工tī福音事工上ê努力kah用心，肯定in。Mā用chit種方式紹介in，來方便伊日chiah-ê同工有機會去拜訪其他教會ê時，大家thang因為án-ne認bat來好款待chiah-ê同工。

Koh講，tī chit段經文中，總共出現二十七個名，其中有六個女性，可見tī早期教會中，婦女tī福音事工上貢獻非常大，是bē-tàng忽略ê一股力量。Ná親像腓利ê四個cha-bó͘-kiáⁿ，無結婚，in lóng是「傳講起帝信息」ê難得人才（參考使徒行傳廿一：8—9）。使徒保羅開拓腓立比kah其它教會，就是得tio̍h賣紫色布匹ê呂底亞極大ê支持（參考使徒行傳十六：14—15，腓立比書四：14—16）。

第1到2節，chit兩節紹介「菲比」，伊是一位女「執事」，可見當時外邦人ê教會已經有女性參與教會管理ê事工。使徒保羅就是託伊kā chit封信帶去hō͘羅馬教會，因為án-ne，chiah會teh紹介上真chē所在寫了，並請求該教會好款待菲比，可見伊Tī使徒保羅心中是真被肯定ê同工之一。Chia講菲比是「堅革哩教會ê執事」，這是哥林多地區ê一個港口教會，菲比就是受使徒保羅之託，牧養該教會。

第3到5節a句，「百基拉kah亞居拉」是一對熱心福音事工ê夫妻。In kah使徒保羅仝款，lóng是用織帳棚維持生活（參考使徒行傳十八：1—3），而且使徒保羅tī哥林多地區福音事工ê siōng好伙伴。後來in搬家到以弗所去，就以家己ê厝作為聚會ê所在（參考哥林多前書十六：19）。使徒行傳第十八章24到26節ê記載，in夫婦兩人bat幫助過一位真熱心傳揚耶穌信息ê同工亞波羅，「koh khah準確地kā上帝ê道路向伊解釋」，hō͘亞波羅後來tī教會事工上有真突出ê表現（參考哥林多前書一：12、三：6）。使徒保羅tī第4節並無說明是甚麼原因，百基拉kah亞居拉chit對夫婦一定tio̍h「冒性命ê危險」保護伊ê安全。M̄-koh真有可能是kah使徒行傳第十九章21到41節所記載ê以弗所城之暴動事件有關。Mā tùi chia thang看見in tī信仰上ê熱心kah堅定。

第5節b句到7節，「以拜尼土，伊是亞細亞省第一個歸信基督ê人」。「以拜尼土」chit種人到底是甚麼人？chit-má已經chhōe bē-tio̍h資料。「亞細亞省」，這是包括了今á日ê土耳其、伊朗、伊拉克、阿拉伯、敘利亞、約旦、以及以色列等地區。第6節提起「辛苦工作ê馬利亞」，chit位婦女是甚麼人？無法度知影。M̄-koh thang知影她是積極投入參與福音事工ê姊妹。第7節講和使徒保羅「同齊坐牢ê猶太同胞安多尼古kah猶尼亞」，in是比使徒保羅iáu早歸屬耶穌ê信徒。為甚麼in會跟tòe使徒保羅「同齊坐牢」？無koh khah詳細ê資料。M̄-koh thang明明確知影「安多尼古」是希臘人ê名。有人講伊kah 猶尼亞是一對夫婦，m̄-koh是m̄是án-ne？mā無清楚。值得注意ê是，使徒保羅特別強調講，in兩位tī「使徒中有淡薄á有名望」，chit句話表示in兩人確實在早期教會非常認真，而且tī福音ê事工上有淡薄á受重視。

第8到11節，chia提起「暗伯利、耳巴努、士大古、亞比利」等chit四個人ê名，chiah-ê lóng是當時奴隸普遍ê名。如果in chiâⁿ實是奴隸，則對早期教會來講，就有真重大ê意義，這表示信徒中間mā有奴隸à。使徒保羅用「主內親愛ê朋友」、「事奉基督ê同工」、「經歷過考驗、對基督頭尾忠心」等等稱呼in，可見chiah-ê人雖然bat是奴隸，m̄-koh tī歸信基督耶穌了後，確實lóng有真好ê見證。「亞利多布一家人」，其原本ê意思是「請安亞利多布厝裡ê人」，chit種話，就無包括「亞利多布」在內。這有兩個意思，一是伊已經往生；二是伊並未信主。有kóa聖經學者認為，「亞利多布」chit-ê人是大希律王ê孫á，是希律亞基帕一世ê兄弟。因為án-ne，chia講beh請安「亞利多布一家人」，有可能是teh指亞利多布厝裡ê奴僕á是奴隸。Án-ne mā真有意思，伊無信主，m̄-koh卻允准伊ê奴隸去聽信福音ê信息，成做基督信徒。若是伊已經往生，m̄-koh，接受伊財產ê人，mā允准伊留落來ê chiah-ê奴僕（奴隸）寫phoe去耶穌。「希羅天」，有可能mā是kah亞利多布仝款，同屬希律家族ê奴隸之一，á是已經被tháu放成自由人。Á「拿其數一間信主ê兄弟們」，意思真清楚，就是teh指in-tau裡ê奴僕。有人認為chit位「拿其數」，可能就是提庇留革老丟王ê家僕。Án-ne看起來，tī使徒保羅等人ê努力下，基督教ê福音已經進入到權貴階層ê厝內à。

第12節，「土非拿」kah「土富撒」可能是雙生á姊妹。「彼息」chit-ê名意思是「波斯婦女」。使徒保羅講伊為傳福音ê事工，真「勤勞工作」。原本chit句「為主勤勞工作」是形容chit三個婦人，可惜《現代中文譯本》只有kā chit「為主勤勞工作」ê形容話句用tī「彼息」，無用tī「土非拿」kah「土富撒」身上。《中文和合本》譯文比較清楚：「koh問為主勞苦ê土非拿氏kah土富撒氏安。」

第13節，chit節真重要，因為chia紹介ê chit位「魯孚」，就是替耶穌背負十字架ê古利奈西門ê kiáⁿ（參考馬可福音十五：21）。「魯孚」chit-ê名ê意思，是teh指「紅色」、「紅髮」ê意思。使徒保羅講伊「是主內一位傑出ê工人」，chit句話真值得推敲，有可能就是魯孚ê老父古利奈ê西門先受感動了後，帶全家信主。然後全家lóng tī早期教會中相當活躍。另外有一種講法，是當古利奈ê西門被羅馬士兵強迫替耶穌背十字架ê時，tú好魯孚mā tī老父ê身邊，看tio̍h這情景就已經深受感動à。使徒保羅特別強調講魯孚ê老母，對伊真照顧，kā伊當做「像家己ê kiáⁿ仝款」看待。伊chit段話有深刻ê感恩心情。

第14到15節，chit節連續提起五個名，包括有「亞遜其土、弗勒干、烏米、八羅巴、烏馬」等人。Chiah-ê lóng是奴隸ê名，á是in原本是奴隸，chit-má已經是自由身。Án-ne看起來，早期教會成員中，有bē少信徒lóng是來自奴隸ê背景，in tī當時ê社會地位並無高。M̄-koh in卻kah hiah-ê有社會地位ê信徒同屬一間教會，chit種現象，過去án-ne，chit-má mā是。因為tī教會中，並無mā不應該有社會地位之別。Mā tùi chia ē-tàng看出早期教會kah近代教會ê經驗仝款，siōng快歸信耶穌基督ê人，大部分是社會中ê低階人民，出tī貴族ê家庭真少。

第16節，「用聖潔ê chim嘴互相請安」，這是早期教會聚會ê方式之一，表示大家lóng互相想念，彼此關係相當親密。Chit種話句mā常出現tī使徒保羅ê書信中（參考哥林多前書十六：20、哥林多後書十三：12，帖撒羅尼迦前書五：26）。