Chit章ē-sái講是另外「插入」ê一章經文，因為chit章經文編輯tī-chia，hō͘第六章記載第六印phah開了後，一定tio̍h到第八章1節chiah會koh再看tio̍h第七個印被phah開ê記載。Chit章主要teh描述末後ê日子會出現ê景象，chit-ê景象ná親像tī第六章17節所提起ê：「因為in震怒ê大日子到à；甚麼人ē-tàng khiā得tòa？」上帝ê懲罰確實真嚴厲，無人thang抵擋á是免除。M̄-koh，hiah-ê持守信仰到最後ê人，上帝tī in身上lóng做記號，有chiah-ê印記ê人chiah ē-tàng「khiā得tòa」。

    Chit章thang分做兩個段落，其一就是第1到8節，講tio̍h有關「被蓋印」ê總數，另外一則第9到17節有關tùi「各國家、各部落、各民族、各語言來ê」，in lóng身穿白袍。Ē-tàng看出來，除了以色列民族被拯救之外，mā有非以色列民族之「各國、各族」ê人民被列入拯救ê範圍。這mā說明耶穌tī山上寶訓中所提起ê，上帝是疼所有ê人（參考約翰福音三：16）。Á使徒保羅ê觀念中mā提起「上帝beh人人得救」（參考提摩太前書二：4），換句話講，無論是猶太人á是外邦人，lóng是上帝所拯救ê對象，chit對今á日ê基督徒kah世界有極大ê意義。

    Tùi chit章就thang看tio̍h啟示錄tī編輯上有一個真特別ê手路，就是用「七」為一個循環ê數目；每pái有「七」ê數字出現，tī第六kah第七之間就會出現「插入」ê資料，就是tī第「七」個異象beh出現chìn前，隨時koh引發另外一個「七」ê異象出來。Chit種編輯方式除了Tī chit章之外，mā同時出現tī第十章1節到第十一章13節中。

    Chit段經文就是插入ê第一段落，談及以色列十二個支派中被拯救ê人數，每一個支族lóng有詳細ê敘述。

    第1節，chia出現「四個天使」、「四極」、「四面」等「四」ê數字，chit-ê數目Tī聖經中有特殊意義，有含「適當」、「tú好」ê意思。

    「地ê四極」，thang表示全世界ê意思。其背景kah一間厝有四支柱子支撐仝款，地需要有四個「極」來支持它，這mā kah東、西、南、北等四個方向ê觀念有關。

    「四面ê風」，tī耶利米書第四十九章36節則代表「毀滅ê氣力」，mā是受tio̍h上帝差遣ê使者（參考耶利米書四：11—12、五十一：1—2）。舊約ê先知ài用「風」來表示上帝ê奴僕，á是上帝ê工具（參考以賽亞書六十六：15，約拿書四：8，那鴻書一：3，撒迦利亞書九：14）。

    第2到3節，「另外一個天使」tùi「東方」出來，chit位天使帶來ê是好消息，伊手上「捧tio̍h永遠活ê上帝ê印」，而chit-ê印beh蓋tī上帝奴僕ê「額」頭殼頂。古早時ê「印」thang用來teh代表主人、君王（參考創世記三十八：18、25，以斯帖記三：12、八：10，但以理書六：17，路加福音十五：22→經文中ê手指是帶有印記ê手指，thang用來確定身分）。

    第4到8節，chit段經文講tio̍h以色列民族總共計十四萬四千人，被蓋上「印」記，chit-ê數目是以色列十二個支族，每一個支族有一萬二千名。chit-ê數字是根據象徵tio̍h「圓滿」ê十二乘上「圓滿」ê十二，共計一百四十四，然後koh再乘上「一千」。Á這「一千」表示ê意義乃是「無限ê圓滿」狀況。Á值得注意ê，是每一個支族受拯救ê人數lóng仝款是一萬二千名，卻m̄是照人口ê比例分配。Chia ê十二支派，並m̄是根據族譜ê秩序，卻是用「猶大」支派為先，表示猶大chit支派已經得tio̍h繼承ê主權。Koh講，chia無提起「但」支派，卻是提起瑪拿西（第6節），ē-sái講是已經有約瑟了，因為án-ne，正確ê寫法應該是「但」，卻m̄是瑪拿西chiah-tio̍h。會有省略「但」支族ê人，可能是kah創世記第四十九章17節提起ê「但」了後裔，後來背叛上帝有關（參考士師記十八：27—31，列王記上十二：29—30）。Tī歷代志上第四到七章ê族譜中，mā欠缺「但」族人ê記錄（參考歷代志上七：12 b）。