啟示錄 2章18節 到 2章29節   背景資料  上一筆  下一筆
Chit段經文是第四封phoe,是寫hō͘推雅推喇教會ê領導者(天使)。Mā是七封phoe件中siōng長ê一封。

第18節,「推雅推喇」,這是希臘帝國皇帝西流古(Seleucus)一世時代建造ê。以工商業出名tī當時ê歐亞地帶。比較出名ê行業,包括有紡織業、皮革業、陶藝(包括銅雕等藝術),可能因為工商業發達ê關係,奴隸販賣ê交易mā非常熱烈。開拓腓立比教會ê呂底亞,就是tùi推雅推喇來ê,伊是用販賣紫色布匹維生ê女商人(參考使徒行傳十六:14)。

Tī chiah-ê工商業非常繁榮ê推雅推喇城市,hit-ê城主要mā是一個國防重鎮,羅馬帝國就派有駐軍tī-chia駐防,它ē-sái講是進入別迦摩城ê重要門戶。Tī-chia城裡,公會ê組織mā甚活躍,m̄-koh chiah-ê公會組織ê活動往往kah廟宇慶典連結做伙,甚至有kóa祭典用ê牲祭,就是由公會出資提供,á是祭典所需要ê經費,由公會資助,因為án-ne,tī祭典了後,所有ê牲祭就成做參加公會活動會員ê主要食物。

Chit-ê城市ê人民崇拜「宙斯」ê kiáⁿ亞波羅(Apollo Tyramnois),以及其它諸神等,偶像神明ê崇拜興盛。比較出名ê是tī hit-ê城有一間「算命」ê神廟,聽講tī chit間「算命」神廟內有一位女巫名叫「森巴堤」(Sambathe),伊專門teh替人算命、卜卦。基督徒tī chit種環境中若是beh經商koh想beh維持良好ê信仰生活並無容易。因為若是tī hit-ê城經商而無參加公會活動,真容易遇tio̍h同行排斥;m̄-koh若是參加,則一定tio̍h參加偶像神明祭拜ê禮儀,甚至會因為án-ne發生kah廟妓行淫亂ê tāi-chì。

chit-má寫hō͘推雅推喇教會ê信則用「上帝ê kiáⁿ,hit位目睭像火燄仝款閃耀、腳像擦亮了ê銅hit種明亮ê」chit種形容詞(參考啟示錄一:14—15),讀起來ê感覺就是真無仝款。「目睭像火燄仝款閃耀」,chit種寫法是用來說明chit位「上帝ê kiáⁿ」thang看穿人心內ê意念,hō͘人khiā tī伊ê面前lóng無藏遁ê機會。

第19節,「我知影」chit句話,表示chit位「人子」á是「上帝ê kiáⁿ」,確實是詳細查訪過,並無任何失察ê所在。Chit位「上帝ê kiáⁿ」真清楚推雅推喇教會tī「疼心、信心、事奉,kah耐心」等等chiah-ê事頂面有真好ê見證。而且koh khah難能可貴ê,tī chiah-ê美好見證上,推雅推喇教會比以前koh khah有進步。這tú好kah以弗所教會所表現ê顛倒(參考二:4)。

第20節,chit節講述推雅推喇教會ê問題,就是「容忍hit-ê自稱是先知ê cha-bó͘人耶洗碧」。Chit-ê「耶洗碧」名,是m̄是真名,並太清楚。Mā可能是借用列王記所描述亞哈王ê bó͘「耶洗碧」來形容chit-ê假先知ê惡形惡狀,講伊犯兩件bē-tàng原諒ê事,就是使弄信徒去行淫,kah食祭拜過ê食物,而chit種罪狀mā出現tī別迦摩教會中(參考二:14)。

第21節,chit節指出上帝bat hō͘ chit-ê「耶洗碧有悔改ê機會,m̄-koh伊無願意悔改,「m̄肯棄sak伊ê淫行」,表示伊雖然講「上帝」,其實心中對上帝無忠實ê心。

第22到23節a句,chit兩節提起教會ê主「上帝ê kiáⁿ」,會懲罰chiah-ê敗壞信仰行為ê人。採取ê是「罪kah罰」相來稱呼方式。既然淫亂是tī床頂進行,便hō͘有án-ne敗壞行為ê人病倒tī床鋪頂當做懲罰。

第23節b句,chit位「上帝ê kiáⁿ」鑒察人ê心內,因為án-ne,「徹底了解人ê思想kah意念」。聖經一再講上帝就是鑒察人心內ê上帝,祂m̄看人ê外表(參考撒母耳記上十六:7,詩篇一三九:1—4,箴言廿四:12,耶利米書十一:20、十七:10)。

第24節,chit節thang參考使徒行傳第十五章28到29節。Tī chia真清楚記載雅各要求外邦ê教會信徒,一定tio̍h嚴禁「食祭過偶像ê食物」;「mā bē-tàng有淫亂ê行為」。

Tī推雅推喇教會內,並m̄是所有ê信徒lóng陷入了假先知耶洗碧ê迷惑,卻是有一kóa人信徒受tio̍h誘惑棄sak了信仰規律。Tùi chia mā ē-tàng看出公義ê審判者是真清楚hit-ê教會每位信徒ê實況,祂絕對bē有冤枉ê錯判,祂是beh按照「每一個人所做ê」來進行「報應」ê懲罰。

Chia提起ê「撒旦ê奧秘」,是teh指信仰上棄sak了上帝tī耶穌基督內面所傳達出來拯救ê信息,卻m̄是指tī肉體上淫亂ê行為。M̄-koh mā有可能確實是teh指tio̍h肉體上ê放蕩,卻推講肉體ê放蕩並無影響心中對上帝忠實。Chit種情形ná親像哥林多教會仝款,有kóa信徒利用「基督徒ê自由」,去做家己愛做ê事,m̄-koh卻傷害了信仰ê神聖kah聖潔ê意義。

第25節,thang參考第19節所提起ê信仰美德。作者傳出上帝ê信息,ài推雅推喇教會ê信徒謹守本來ê信仰美德,不beh hō͘之失色。「直到我來」,chit句話ē-sái講是啟示錄ê思想中心—耶穌基督會一定會koh再臨。

第26到28節,chit段真可能引用自詩篇第二篇8到9節ê詩歌。Tī chit三節經文中,啟示錄作者講tī推雅推喇教會中,hiah-ê持守tio̍h信仰ê信徒得tio̍h了上帝ê應允,會有下列幾項:

一是堅持忠實ê信仰直到最後者,lóng會得tio̍h「權柄」。

二是有「統治權」。Chia講「鐵杖」chit-ê詞,原本是採用顧羊人手中ê「杖」,因為án-ne thang作「牧養」。指堅持美好信仰原則,對上帝絕對忠實者,chiah ē-tàng擁有「牧養」羊群ê機會。

三是賞賜「星辰」。啟示錄第廿二章16節,講耶穌基督就是「明亮ê星辰」,是koh活ê主。Án-ne,作者說明堅持到底ê忠心奴僕(牧養者),會得tio̍h耶穌基督所賞賜ê koh活性命,因為伊kā kah耶穌基督成做一體。

重新查詢 專卷研經 啟示錄系列
錯誤回報,請聯繫comm[@]fhl.net