啟示錄 2章12節 到 2章17節   背景資料  上一筆  下一筆
這是第三封phoe,寫hō͘「別迦摩教會ê天使」ê信。

Tī作者ê書信中,對chit七間教會有o-ló、鼓勵ê,mā有譴責kah警告,像以弗所教會,有o-ló,m̄-koh mā有譴責kah警告ê話語tī內面,而寫hō͘示每拿教會ê書信,則只有o-ló kah鼓勵,koh khah特別ê是iáu帶有應允beh賜hō͘ hit-ê教會信徒擁有「性命ê華冠」。

	Chit-má chit段經文是講tio̍h有關別迦摩教會。Ná親像頭前所提起寫hō͘以弗所教會ê書信仝款,有o-ló,mā有譴責kah期待。這thang看tio̍h每間教會ê特色,就是有美好ê一面,m̄-koh mā有軟弱ê部分,若是beh查驗一間教會,mā是án-ne。Beh chhōe-tio̍h像示每拿教會hit種,只有得tio̍h o-ló kahhō͘ 上帝應允會得tio̍h「性命ê華冠」之獎賞ê,恐驚是少kah會驚人。

第12節,「別迦摩」,chit位tī示每拿以北約有九十公里ê所在,是一個真特別ê城市,原因是hit-ê城是建造tī一座約三百公尺ê小高山頂,而且該山乃是一個圓錐形ê小山,看起來就會感覺地處顯要,tī當時ê國防上有真好ê要件。它原本並m̄是一個重要城市,m̄-koh tī主前133年,最後一代國王雅伊樂三世(Attalus ṲI)往生前ê遺囑中,交帶beh kā別迦摩併入羅馬帝國,而成做羅馬帝國tī亞細亞省ê省lóng,並派駐總督治理hit-ê城。因為án-ne,有kóa學者認為新約時代亞細亞ê首都,應該是tī別迦摩,卻m̄是用弗所城。別迦摩mā擁有羅馬帝國時代第二大ê圖書館,並且以羊皮紙文件出名。Kah以弗所城仝款,hit-ê城mā是廟宇林立,各式各種ê神明廟宇真chē,偶像崇拜之風氣甚盛。因為án-ne,掠準講hit-ê城ê政治地位重要,不如講hit-ê城tī宗教信仰ê地位贏過政治地位。

Chia提起「有雙刃利劍」,chit句話thang參考第一章16節,出現tī作者約翰看見ê異象中,hit位像人子ê,伊ê嘴中吐出來ê是「一把雙刃利劍劍ê劍」。作者講「hit位有雙刃利劍ê,án-ne講」ê時,意思就是審判者親嘴án-ne講。

第13節,作者寫hō͘每間教會ê封phoe lóng是tùi「我知影」開始。Chit句「我知影」,表示chit位審判者「人子」非常清楚每一間教會ê狀況,mā因為án-ne,伊ê審判是正確ê。

「khiā家就是撒旦稱王ê所在」,因為別迦摩乃是個流行崇拜羅馬皇帝為神ê城市,另外mā有崇拜女神「雅典娜」,並且有羅馬人所供奉ê「宙斯」神廟等等,神廟真chē,拜偶像神明ê風氣甚盛,m̄-koh別迦摩教會ê信徒tī chit種環境之下,對上帝iáu是「忠誠」。Chit種講法mā是teh肯定別迦摩教會乃是一間tī信仰上可取、有見證ê教會。

Chia提起「安提帕」被殺害,chit-ê人到底是甚麼人?聖經中並無任何資料。不過傳說中講,伊是tī多米田皇帝時代(主後八十一到九十六年),為tio̍h福音ê緣故hō͘人掠去用銅鍋活活「烘死」來殉道。因為án-ne,tùi安提帕ê殉道,thang想像會tio̍h當時基督徒所面臨ê危機,以及基督教會所面對ê環境,是jōa-ni̍h-á惡質。

第14節,作者傳出了別迦摩mā有信仰上ê軟弱。作者tī chia提起tī信徒中間有人「隨從巴蘭ê教示」。有關巴蘭ê事件,tī以色列人中間傳聞真chē;tī彼得後書第二章15到16節,以及猶大書第11節lóng有特別強調巴蘭乃是為tio̍h錢棄sak信仰。民數記第廿二到廿四章則詳細記載巴蘭原本收了摩押王巴勒o͘-se ê錢,準備ài詛咒以色列人,結果hō͘ 上帝出面阻止。另外在民數記第三十一章16節講有人聽巴蘭ê話,tī比珥引誘人民背叛上主,hō͘上主ê子民遭遇瘟疫。Á tī民數記第廿五章1到9節soah講以色列人tī什亭谷紮營ê時chūn,kah摩押ê cha-bó͘人行淫,並且食拜偶像ê食物。Á chit兩件事lóng hō͘人認為kah巴蘭有密切關係。

別迦摩城因為當地偶像崇拜之風甚盛,特別是有羅馬女神ê崇拜活動,滲雜有淫亂ê活動tī內面。真可能當地ê基督徒mā有類似ê行為,參與了廟會活動,tī廟埕接受親友接待lim食,了後koh跟tòe kah廟妓進行性行為。

第15節,koh一pái提起「尼哥拉派ê教示」,chit派連以弗所教會mā深受影響。

第16節,chit節回應第12節所講ê,審判者「人子」嘴中會吐出「雙刃利劍」。聖經作者一再明確指出,只有「悔改」chiah ē-tàng改變上帝懲罰ê計劃。

第17節,作者呼籲別迦摩教會ê信徒tio̍h注意聽「聖神」ê聲音。

Chit節提起「隱藏tio̍h ê嗎哪」,thang對照第14節提起ê「食祭過偶像ê食物」同齊看。「嗎哪」,這是以色列人出埃及後、進入曠野ê時,因為chhōe bē-tio̍h食物,上帝為免in因iau餓來死亡,特別tùi天頂降落來ê一種特殊食物(參考出埃及記十六:13b—21,約書亞記五:10—12),這是上帝tùi天頂降落ê「性命糧食」(參考申命記八:3、16,約翰福音六:31)。

Chit節提起上帝kā「賞賜隱藏tio̍h ê嗎哪」,mā tio̍h賞賜hō͘別迦摩教會「一塊白石頭,頂面寫tio̍h新名」。「白石頭」tī古代是hō͘人看做siōng貴重ê寶石之一,甚至被看做thang當「護身符」ê路用。Chia講tī「白石頭」頂面刻有「新ê名」,意思是上帝kā賜hō͘ chiah-ê忠心到最後ê信徒一個全新ê名,表示有新性命ê意思(參考以賽亞書六十二:2、4、六十五:15b),這mā是kah上帝有合宜ê關係。

重新查詢 專卷研經 啟示錄系列
錯誤回報,請聯繫comm[@]fhl.net