Tùi chit章開始直到第十八章止，又koh是一個新ê段落，而且是koh一pái出現「七」ê連串異象，ná親像tī第一pái ê「七」封hō͘「七」間教會ê信（參考一：9—三：22）、「七」個印封tio̍h ê冊卷（五：1—八：1），以及「七」個天使吹tio̍h七支號筒（參考八：2—十一：19），chit pái是第三個「七」位天使傾倒「七種災難」到世界上，chit-ê「七」種災難teh代表上帝ê極大忿怒。Chit pái ê「七」之循環，mā是最後一pái ê循環。

    第十五章到第十六章，koh一pái出現「七個天使」ê異象。Tī chit兩章中，會看tio̍h頭前已經有提過ê資料，親像「天頂ê聖殿」、「水變成血」、「日頭」、「烏暗」、「怪獸」等等等chiah-ê奇異現象ê描述。Mā因為án-ne，chiah-ê重述ê資料hō͘讀者閱讀此經冊ê時，bē有siuⁿ chē ê生份感，這mā是作者編撰此經冊ê另外一個特點。chit-má chia ê「七個天使」捧tio̍h「七個碗」所啟示出來ê，teh表示上帝極大ê憤怒，mā因為án-ne，所帶來ê就是極大ê災難，這mā是chit所在「七個天使」kah頭前所形容ê「七個天使」無仝ê所在。

    第1節，chit節是作者所看見「另外一個神秘ê景象」ê序言。Chia講景象非常無仝款，是「koh大koh奇」。Chit-ê「景象」是teh描述天使teh做ê tāi-chì。「七個天使掌管最後ê七種災難」，表示每一個天使lóng有各自負責ê職責工作，而且「chiah-ê災難必定會貫徹」上帝ê忿怒。

    第2節，「玻璃ê海」，tī第四章6節有提起chit種「玻璃海」看起來ná親像「水晶仝款光潔」ê景象。M̄-koh tī chia則無相仝，chit所在「玻璃ê海」則夾雜tio̍h「火」tī其中。作者約翰講伊看見得勝者參與歌頌上帝ê行列，強調in手上lóng是「the̍h上帝hō͘ in ê豎琴」，chiah-ê人就是得勝者，in就是得tio̍h平安kah喜樂ê人，因為in已經通過「火」ê考驗，贏過ná「獸、獸像」等。

    第3節，「唱上帝奴僕摩西ê歌」，所謂「摩西ê歌」，thang參考出埃及記第十五章1到18節。因為án-ne，有kóa學者認為第2節所提起ê「玻璃ê海，摻雜tio̍h火」，是teh指tio̍h「紅海」ê意思，teh表示chiah-ê為tio̍h信仰遇tio̍h迫害ê殉道者，in ná親像早年以色列民族出埃及ê時chūn，行過「紅海」ê時ê景況，ná親像經過死亡ê威脅，終其尾得tio̍h上帝ê拯救。續落來摩西唱了歌頌上帝ê詩歌。Á「羊羔ê歌」，乃是早期教會以耶穌基督贏過死亡、koh活升天為主要內容（參考使徒行傳二：22—36；另外參考使徒信經、尼西亞信經），每pái聚會ê時lóng會用之來歌頌上帝偉大ê救恩。M̄-koh無論是「摩西ê歌」á是「羊羔ê歌」，lóng有一個共同ê主題，就是teh歌頌上帝拯救ê恩典。

    「全能ê上帝」，這是上帝ê特性中siōng重要ê一點（另外兩點：上帝乃是無所不在、無所不知ê上帝）。是teh指tī上帝看起來，無做bē到ê事（參考創世記十八：14，約伯記四十二：2，馬可福音十：27）。續落來講上帝ê「作為jōa-ni̍h-á宏偉奇妙」，表示上帝ê作為m̄是用人ê智慧ē-tàng明白透徹。

    「公正真實」ê上帝，這是kui本聖經ê主題之一。上帝ê公正，mā teh表示上帝ê慈愛、憐憫。祂憐憫軟弱者，m̄-koh對壓迫者施行審判kah懲罰。

    第4節，「甚麼人敢m̄敬畏」上帝？chit句話thang參考詩篇第八十六篇8到10節，以賽亞書第四十五章22到23節，瑪拉基書第一章11節。

    「只有你是神聖ê」上帝，thang參考出埃及記第十五章11節，撒母耳記上第二章2節，詩篇第九十九篇3節，以賽亞書第八章13節。

    第5節，「天頂ê聖殿開了」，thang參考第十一章19節。這是引用摩西帶領以色列民族出埃及tī曠野時代ê背景，hit時in建造「聖幕」，tī聖幕ê內面有「約櫃」，表示上帝臨在其中kah以色列人民對話，kah in同行（參考出埃及記四十：34）。

    第6到7節，chit兩節描述「掌管七種災難ê天使」身上ê特徵，包括有：(a)穿插「光潔ê麻紗衫褲」，(b)胸前繫tio̍h「金帶」，chit種穿戴ná親像tī會幕時代大祭司ê穿插仝款（參考出埃及記廿八：4—13）。Chiah-ê天使teh象徵大祭司beh執行上帝ê懲罰命令。

    「四活物ê另外一個」，thang參考第四章6到7節。

    「忿怒ê七個金碗」，chia ê「碗」所用ê希臘文是「phialas」，kah第五章8節所用ê「金爐」mā是用「phialas」chit-ê詞。因為án-ne，chia所講「上帝忿怒ê七個金碗」，就是第五章8節中所提起ê「金爐」仝款，內面貯滿tio̍h眾信徒ê祈禱，特別是為hiah-ê因福音而受難ê人ê祈禱（另外參考六：10）。

    第8節，天頂ê聖殿充滿tio̍h「煙」，chit-ê「煙」表明上帝出現ê一種榮耀方式。Chiah-ê看起來是「煙」，其實也kah雲彩仝款（參考出埃及記四十：34，列王記上八：10—11）。Tī舊約聖經中，用chit種方式表明上帝ê榮耀極大，大到人無法度接近。