詩篇 90章1節 到 90章17節   背景資料  上一筆  下一筆
第九十篇開始到第一○六篇:
是詩篇第四集,á是稱做第四卷。Chit部分有一個明顯ê主題:上帝乃是世界ê主,祂是世界萬物ê審判者。

Chit首詩常常hông教會使用teh安慰厝內有親人過世ê時,特別是第10節所講ê:「咱一生ê年歲不過七十,健壯ê可能到八十;m̄-koh所得ê只是勞苦愁煩;性命轉瞬to̍h是逝,咱lóng tio̍h成做過去。」表示性命ê目nih-á,就算活到真滿意ê年歲,mā是無甚麼好誇口ê,因為所ē-tàng誇耀ê,lóng是性命ê苦難。

第1到2節,chit首詩開始講tio̍h上帝ê永恆,tī萬物iáu未形成chìn前,就已經存在。Chit位上帝是永恆ê存在者,祂無有時間、空間ê限制,因為kui個ê時空lóng是祂創造ê。

第3到6節,講述上帝永恆了後,續落來就是講tio̍h人。相對tī受造ê人,性命是非常短促ê。原因是人ê本質是土粉。作者用上帝來kah人相比,時間ê cheng差就非常大;上帝已經有一千年ê時間,人卻是只有目nih-á ê一工,甚至連一工都無,只不過像暗時ê一更而已。換句話講,人kah上帝之間ê cheng差,明明是就是千年kah一瞬間hit種大ê差別。其實,詩人beh hō͘大家知影,上帝是永恆ê,人是有限ê,而且是非常受限,m̄-nā tī年歲,mā tī各種能力上lóng像歲月仝款,就算有甚麼特別成就,mā不過是一瞬間就消失了,甚至連留落來痕跡mā無。詩人用暗時發生ê「夢」、「凋萎枯乾」來形容,表示tī人不知覺中間,就消失去。

第9到12節,詩人認為人性命ê短促,必定kah上帝ê受氣有關係。人tī上帝面前,所有一切罪狀lóng顯露出來,無法度隱藏。Ná親像希伯來書第四章13節所講ê,每一個人lóng只有ē-tàng赤the̍h-the̍h面對上帝,接受祂ê審判。詩人甚至認為人性命ê歲月,mā不過是八十歲,m̄-koh就算是án-ne,回頭一盼,就是「勞苦愁煩」,甚麼mā無。第12節提起「智慧」,chit-ê詞Tī聖經中表示ê意思,是teh指認bat上帝。性命中siōng重要ê,就是認bat上帝。若是無,性命就會轉眼成空。

第13到17節,chit段詩歌是詩人teh向上帝祈求,懇求上帝tī人有限ê年歲裡,賞賜hō͘人得tio̍h祂ê慈愛,hō͘目nih-á ê性命,也ē-tàng享受上帝賜福ê歡喜。

重新查詢 專卷研經 詩篇系列
錯誤回報,請聯繫comm[@]fhl.net