詩篇 78章38節 到 78章72節   背景資料  上一筆  下一筆
4.第七十八篇38—72節:
第38到39節,chit兩節mā是kui本聖經所beh表達ê一個重要信息:上帝有永遠無變ê疼。祂一再容忍、不快受氣,知影人只不過是用土粉所造、脆弱ê人(參考出埃及記十五:13,民數記十四:19,詩篇一○三:8—14、一四五:8,彌迦書七:18)。

第40到42節,chit三節是為續落來ê第43到51節作前言。表示以色列人民真少知影tio̍h感謝上帝,lóng是一再埋怨上帝,認為上帝並無照in所需要ê hit種,樣樣lóng替in準備好勢、滿足in。

Tùi第43節開始,一直到51節,就是tī簡略地講述出埃及記第七到十二章,以色列人民ê祖先出埃及chìn前,上帝用十項大災難嚴厲懲罰埃及國王kah人民,最後kā以色列人民帶領出來。

第51節「含帳棚中強壯ê頭胎」,埃及人一直被看做是挪亞kiáⁿ孫(參考創世記十:6),chit節ê意思就是teh指出埃及ê時chūn,埃及人ê大kiáⁿ lóng因為上帝ê受氣往生。

第52到53節是離開埃及了後,經過紅海,進入曠野漂流ê生活。
第54到55節chit兩節講tio̍h上帝帶領in進入迦南地,並且hō͘ in thang tòa tī耶路撒冷(這已經是到à大衛時代)。第55節是約書亞ê時代。

第56到64節,「試探並背叛了至koân ê上帝」,chit點早tī以色列人民ê祖先離開埃及進入曠野了後,就一再出現,甚至重塑金牛崇拜,認為he chiah是in ê神(參考出埃及記三十二:1—24),引起上帝極大ê忿怒。Chit段經文主要是用早期所羅門王chìn前ê以色列國之現象來敘述。

當以色列人民進入迦南地,過富庶ê物質生活後,竟然棄sak賜福in ê上帝jú來jú遠,mā jú來jú離譜。鑄造偶像崇拜,而且是tùi君王帶頭,全國人民跟tòe做,tùi所羅門王晚期開始,直到分裂後ê南北兩國lóng仝款。
第60節ê「示羅」,這是tī大衛王朝以前以色列人民敬拜上帝ê宗教中心,因為hit時約櫃lóng是khǹg tī示羅。

第62到64節thang清楚看出北國以色列tī亞述kah巴比倫帝國入侵後所帶來悲慘ê景象。

第65到72節,chit段詩歌說明上帝決定放棄北國以色列,看顧南國猶大。第67節用「約瑟ê kiáⁿ孫」kah「以法蓮支族」來表示北國以色列。然後tī第68節用「猶大」來表明南國。「錫安山」指ê就是耶路撒冷,最後詩人用「大衛」來表示,上帝所kah意ê是親像大衛chit種領導者,m̄-nā忠實tī上帝,mā知影怎樣帶領人民歸順上帝ê旨意。

綜觀這整篇詩歌,lóng teh強調一點:人ê軟弱,若是無上帝ê憐憫看顧,人真緊to̍h會棄sak上帝ê旨意、道路,偏行己路,致使上帝忿怒,就消滅。
重新查詢 專卷研經 詩篇系列
錯誤回報,請聯繫comm[@]fhl.net