一般來講，第七十五kah七十六篇，lóng是teh回答第七十四篇ê詩歌。因為án-ne，lóng被看做是先知teh敬拜ê時所用ê詩歌。因為第七十四篇10節問講：「上帝ah，對敵諷刺會到甚麼時？敵人褻瀆祢ê 名kám 會到永遠？(全民版)」tùi chia發出問題，然後tī第七十五篇就有上帝ê回答，上帝已經確定了審判ê日期，而且「tio̍h用公道施行審判」。世人ê氣力是無法度阻擋上帝ê，因為上帝beh親自審判，祂不需假別人ê手。講到上帝甚麼時chūn beh審判，並無講出明確時間，ná親像耶穌所講ê，hit時chūn是甚麼時間，無人知影。因為上帝家己有一個時間表。

第1節，詩人帶領所有ê會眾「感謝」上帝，mā tio̍h宣揚上帝奇妙作為ê偉大。這表示上帝確實開始針對頭前第七十四篇所提起hiah-ê仇對敵上帝褻瀆ê行為進行嚴厲懲罰。

    第2到5節，「上帝講」，這是先知文獻ê特徵，表示tùi上帝來ê信息，眾人一定tio̍h注意聽。

第2節講上帝已經「定下了審判ê日期」，m̄-koh並無說明甚麼時chūn。而且上帝ê審判會真公正，bē冤屈無辜ê人。

第3節講上帝beh tī chit混亂不安ê世代中，用祂ê手穩tiâu kui個世界，tī祂ê手上，一切lóng會變kah非常有秩序。

Chit段詩歌講上帝會hō͘ chiah-ê狂傲ê人koh-khah án怎都無法度狂傲起來，mā beh hō͘ in過去hit種囂張ê態度收斂起來。

第6到8節，上帝開始進行審判ê時，bē借用其他方式，卻是會直接tùi天頂落來進行審判ê工作，ná親像對付hiah-ê建造巴別塔ê人，in想beh tī土腳顯明家己ê名，上帝就是直接tùi天頂落來進行審判，結果是分散in ê語言，hō͘ in無法度koh再聯合做伙（參考創世記十一：1—9），mā ná親像當以色列人民tī埃及過非常痛苦ê奴隸生活ê時，上帝ê作法就是直接tùi天頂落來帶領以色列人出埃及（參考出埃及記三：8）。

第8節所用ê「烈酒」，邪惡ê人lóng tio̍h來lim，這是舊約聖經中一再使用ê方式來形容上帝ê懲罰（參考以賽亞書五十一：17，耶利米書廿五：15—29、四十九：12，以西結書廿三：31，哈巴谷書二：16）。

第9到10節，邪惡者被粉碎，in ê氣力無koh存在，這是值得感謝上帝ê大事。