詩篇 65章1節 到 65章13節   背景資料  上一筆  下一筆
這是一首感恩ê詩歌。真親像tī Tòa棚節ê時用來感謝上帝ê詩歌。Mā有詩篇ê學者認為是tī久長乾旱了後,因為天降落甘霖滋潤了大地,致使農作物ē-tàng重新掖種,而且有豐富ê收成,因為án-ne,詩人á是村落ê長老帶領村民歌頌上帝。所以,這mā是一首團體ê o-ló詩歌。

第1到4節,「錫安」,這是teh指耶路撒冷,mā teh表示上帝所在ê所在。Beh去向上帝iáu「所下ê願」。原因是向上帝祈求,已經蒙上帝回應。

詩人認為siōng重要ê一件事,就是罪蒙上帝赦免。性命中無甚麼事比hō͘ 上帝赦免koh-khah重要ê。

早期社會有一個觀念:上天若無落雨,就是因為人犯罪惹起上帝ê受氣。Ná親像先知以利亞時代,上帝因為亞哈王kah以色列人民悖逆嚴重,用乾旱來懲罰北國以色列,有長到三年時間都無落雨。

詩人認為上帝揀選ê子民,一定會遵行上帝ê旨意,而遵行上帝ê旨意,就ná tòa做伙tī上帝ê殿宇中,永遠享受著有上帝同在ê喜樂。

第5到8節,chit段詩歌講出上帝有奇妙ê作為。Chit種奇妙ê作為,就是用祂ê氣力,hō͘群山安定bē搖動,而且hō͘「海洋ê怒號,水湧ê呼嘯」lóng ē-tàng tī祂手中被控制。

聖經作者一再表示:宇宙萬物lóng是上帝創造ê,因為án-ne,上帝會控制kui個宇宙萬物,hō͘伊運行tī一定ê秩序之下。上帝mā會對海洋下命令,hō͘伊分開成道路,mā會移動群山。
所謂「tùi日出到日落」,意思是只要有看見陽光ê人,lóng tio̍h因為上帝奇妙ê作為而發出歡呼ê聲音。

第9到13節,chit段詩歌真明顯kah Tòa棚節ê慶祝有關。Tòa棚節mā hông稱做「收藏節」,就是kā收成ê農作物收藏起來好準備過冬。

詩人一開始就提起「降霖雨」,這是非常chán ê甘露、雨水ê意思,án-ne,大地就ē-tàng有收成,而且是豐收,因為土地有甘霖滋潤,就會肥,無需要人工施肥,只需要上帝ê甘霖就夠用。Án-ne,「大地不斷生產五穀」養飼所有ê人類kah動物。

雨水,m̄-nā是人類需要,所有ê生物,無論是空中ê飛鳥,地上ê行獸、昆蟲等,lóng需要雨水chiah ē-tàng生存。Á雨水,是tùi上帝來賞賜,m̄是人ê氣力ē-tàng得tio̍h。Mā因為雨水滋潤大地,大地發出茂盛ê草,hō͘牛、羊tùi án-ne ē-tàng繁延遍滿大地,mā hō͘五穀滿倉,永遠bē有iau餓ê威脅,bē有乾渴ê痛苦。

重新查詢 專卷研經 詩篇系列
錯誤回報,請聯繫comm[@]fhl.net