這是一首團體ê祈求詩歌，是kah國家á是民族ê患難有關，mā是一篇siōng有「軍事韻味」ê詩篇，通常是tī全國性ê聚會中使用ê祈禱文。Chit篇詩歌ê第5到12節重chit-má詩篇第一○八篇6到 13節。

第1到5節，chit段詩歌thang看出國家發生極大ê困難，感覺孤獨無助。因為感受tio̍h上帝kah-ná「hiat-ka̍k」了in仝款，chiah hō͘ in遭遇真chē患難。因為án-ne，詩人祈求上帝kā祂ê子民區隔出來，hō͘ in免受敵人攻擊而毀滅。

第6到8節，果然，詩人ê祈禱蒙上帝垂聽。上帝beh出手干涉敵人侵犯祂ê子民。上帝向chiah-ê侵犯祂子民ê敵人宣告，屬tī上帝賞賜hō͘祂子民khiā起ê所在，lóng無容允任何人侵犯佔領。

第7節ê「以法連是我ê頭盔；猶大是我ê權杖」，這teh代表以色列兩大家族系統。以法蓮是代表北方族群，猶大則代表南方支派。

第8節ê詞句lóng是象徵性ê意思；「用摩押作洗腳盆」，意思是thang做為歇睏ê場所。表示hi̍t 所在已經被征服。「向以東hiat鞋」，意思是講統治hi̍t 所在，á是已經佔領了hi̍t 所在區。「向非利士人唱凱歌」，戰贏ê意思。

第9到12節，詩人祈求上帝帶領in去相戰，只要有上帝kah in同齊出征相戰，就必ē-tàng得勝。