詩篇 5章1節 到 5章12節   背景資料  上一筆  下一筆
Chit首詩kah頭前二首詩真相近,lóng是teh描寫一個人心內掙扎、奮鬥ê信仰告白。長老教會ê聖詩第363首「耶和華,早起ê時祢ē-tàng聽我ê聲」就是用Chit篇詩作詞ê。

第1到2節,chit首詩歌一開始就向上帝祈求,特別是tī第1節講出「吐氣」,這是teh指哀嘆ê意思。因為án-ne,chit首詩歌mā被列為是一首哀歌。

因為第3 節ê關係,一般lóng kā chit首詩看做是一首早起ê詩歌。以色列人民有一種觀念,認為「清早」是向上帝祈禱siōng好ê時間,此時刻大約是tī早起六點ê時,因為清早起來準備好勢了後,beh出門去工作前向上帝祈禱,一則chit時精神飽足,二則hit工ê工作需要上帝ê手帶領。

第4到6節,詩人Tī chit段詩歌中kā咱講上帝所討厭ê事,乃是「邪惡」,這包括狂傲ê、作惡ê、講白賊ê、嗜血ê、詭詐ê等。

第5節thang參考詩篇第十四篇1節,所謂「狂傲ê人」,是teh指心中無上帝ê人,因為án-ne,chit種人是不配khiā tī上帝面前。第6節所講ê「嗜血」,意思是teh指傷害人ê性命,並無一定是teh指gia̍h刀槍ê,因為白賊mā足以傷害人ê性命,á是毀謗mā會造成人ê性命受傷,虛假ê見證koh-khah是比刀劍厲害。這kah第9節所提起ê仇敵之言,是bē-tàng信ê原因仝款。

第7到8節,詩人相信上帝是慈悲ê,chit點mā是kui本聖經共同ê教導。因為有上帝豐富ê慈愛,人chiah ē-tàng來到上帝面前敬拜祂,因為上帝討厭作惡ê人。當上帝接納一個人來到聖殿中敬拜祂,表示上帝接納chit-ê人。一個hō͘ 上帝接納ê人,上帝會引chhōa伊行「正路」。

第9到10節,ná親像頭前teh紹介詩篇ê時提過ê,「仇敵」表示誘惑ê氣力,soah ē-tàng拆破chit種仇敵ê詭計ê,只有上帝chiah有辦法。

第11到12節,體驗tio̍h上帝拯救、帶領行過險境ê人,lóng會有chit種興高采烈ê歡呼,因為贏過仇敵ê誘惑。

第11節ê chit句「因為你有喜樂」,原本ê意思是「因愛你ê名」,意思是喜愛上帝ê名ê人,lóng會蒙上帝ê賜福。第12節ê「盾牌」,指ê是足以蓋過一個人身軀ê蓋kòa。換句話講,chit種「盾牌」是teh指一個人hō͘ 上帝完全包tòa,bē hō͘仇敵傷害到伊。


重新查詢 專卷研經 詩篇系列
錯誤回報,請聯繫comm[@]fhl.net